من روائع عكير الدامر

يا مولاي تغني بها الفنان الجيلي الشيخ
مولاي أه من غلبي
من النارو حرقت قلبي

يا مولاي بشكيلك شقاي و غلبي
حظي الديمة من ريدة الأنيس جافلبي
طالت السفرة و إتحفت مناسم?? تلبي
هب الريد تلبي و عاودك الحنين يا قلبي

مالك نفسي مطعونة تملي تنيني
مالك عيني لي الغميد أبيتي تليني
عطشان ديما طفح الموية ما برويني
كاتلاني الطريفية البريدا غريني

الناس عيدت مرقت علي أصحابا
و أنا فريت علي الجاهلة السمح ترحابا
فاطرًا يحكي براق البدودي سحابة
دي لفت قلبي زي لف طرحتا اللافحابا

يتمني الدهب لو لونو يشبه لونك
إشتهت الدرر لو هي تبقي سنونك
مجنون ليلي حالتو أقل من مجنونك
ما دام ليلي كانت في المحاسن دونك

عصباً عني فارقت الضريح لي ربي
كل ما هب نسام منو زاد في جمري
جرحي القرب يبري الداير يبدر عمري
بدرو ليّ تغريد بلبلك يا قُمري

أخضر ليهو ضل فوقو المحاسن شرن
و أفلج فاطرو زي برق السواري الكرن
يتقسم مقاطع في المشي و يتحرن
زي فرخ القطا الأماتو ركن و فرن

عمي الهادي نشاب البريدا ضربني
قسم نومي من تيبان حيايا سلبني
حاكم الصافي أبي يقبل سؤالي صدمني
صبري الكان جميل جربتو و كلو غلبني

عن من أحب أنا غير خاطري فرقت
هايم بي غرام عن حالتي كنت سُرقت
لولا أدمعي ،م ناري كنت حرقت
و لو ما ناري من كترت دموعي غرقت

ختت أيدها فوق إيدي انجذبت خِدرت
حبيت أمشي من كُتر الطرب ما قدرت
بقت الحنة بين إيدي وأيديها اندرت
لولا الحنة بيني وبينها كنت ودرت

شعرك منتظم زي السلاسل فتلو
وعينيك ترقِص الحجر ان بقت شافتلو
الطاؤوسة قاصدة مشيكي ما عرفتلو
وأعصاب الرآك أتكهربت تلفتلو

ممشوق القوام الماوجدتا مثيلو
جفاهو معاى ولا محنة غيرو
جافانى العزيز الكنتا ديمه نصيرو
هو يسوى الغلط وانا اسوي كتر خيرو

من طرف **حامدونا** 25th يوليو 2009, 10:57

ابو عبدالله *لك التحية والاحترام
شكرا على القصيدة الحلوة (لكن بينى وبينك *يامولاى اه من غلبنا نحن)ولامش كدة

من طرف **Hassan Khalil** 25th يوليو 2009, 11:32

الغاليين حامدونا وحيدر تحياتي وسلامي لكم,الغربه حاره ومؤلمه نسال الله ان يرد غربتكم ولله مشتاقين ليكم ومحتاجين ليكم وسط اهليكم,الاغنيه بالجد جميله واداء الفنان الجيلي الشيخ كان اداء جميل جدا,طبعا اخيرا الجيلي الشيخ اتجه للمديح وهو مادح صوته جميل ومتفرد وله البوم اسمه صلو يا امم.

من طرف **حامدونا** 25th يوليو 2009, 13:49

اخونا ابومحمد/لك الود كله
والله صحيح الغربة حارة ومؤلمة 0(وبينى وبينك العودة قربة)والغريب عن وطنة مهما طال غيابو مصيرو يرجع تانى ل -----------*لك التحية وللاسرة الصغيرة والكبيرة

الاخوان حامد وحسن لكم التحية ومالكم يااخوان قلبتوا علينا المواجع فعلا الغربة حارة وبس الدعوات وربنا يسهل علينا ونرجع للبلد وابو حسن فهم قصدي من نشر القصيدة فعلا ده احساسنا