ابوجبيهه


انضم إلى المنتدى ، فالأمر سريع وسهل

ابوجبيهه
ابوجبيهه
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

مصطفى سيد أحمد .. الأعمال شبه الكاملة

+2
فيصل خليل حتيلة
أزهرى الحاج البشير
6 مشترك

اذهب الى الأسفل

مصطفى سيد أحمد .. الأعمال شبه الكاملة Empty مصطفى سيد أحمد .. الأعمال شبه الكاملة

مُساهمة من طرف أزهرى الحاج البشير 16th مارس 2011, 10:58




السيرة الذاتية للراحل المقيم مصطفى سيد أحمد


مصطفى سيد أحمد المقبول مختار عمر الأمين سلفاب.

من قرية ود سلفاب ـ الجزيرة ـ عام 1953 م.

قدم جده الأمين سلفاب من شمال السودان ، منطقة الشايقية وأستقر جنوب غرب الحصاحيصا على بعد 7 كيلومتر منها ، وغرب أربجى بحوالى 13 كيلو متر " أربجى القديمة " والتى تقع آثارها على النيل مباشرة ، ثم تأسست أربجى الحديثة بحيث تكون القديمة بينها وبين النيل ، وكان قدوم الأمين ود سلفاب للمنطقة حوالى عام 1700 م.

وأستقر فى مكان قرية ود سلفاب الحالية والتى كانت أصلاً قرية للدينكا ، أبادهم وباء الجدرى وما زالت هياكلهم العظمية ترقد تحت تراب القرية ، إلاّ إذا أخرجها حفر المطامير أو أساسات المبانى العميقة المعاصرة فتخرج مع حفنات من السكسك والخرز .

عمل سكان ود سلفاب بالزراعة المطرية لبعدهم عن النيل ولوفرة الأمطار وكان ذلك قبل مشروع الجزيرة ، وبعد قيام المشروع توفر الرى الصناعى والموروث من المعرفة بالزراعة القادمة معهم من شمال السودان لذلك كان والده فلاحاً بالفطرة ، إحتقنت دماؤه بعاطفة الأرض والزراعة فكان محصلة لها بمصطلحاتها النوبية القديمة فيعتقد فى إرتباط الحياة فى الأرض بالنجوم وحركاتها وبالرغم من أنه كان يتمرد كثيراً على التعاليم الرسمية والجدولة الزمنية التى كان مفتشو الغيط يطلبون تطبيقها ، إلاّ أنه كان دائماً وقت الحصاد يكون من أوفر الناس إنتاجاً .. ولكن كان إعتقاده دائماً أن ذلك يتم فى إطار قاموس الطبيعة .. وتكملة لهذا القاموس وإلتزاماً به كليةً كان ينفق فائض الإنتاج على المحتاجين حتى لا يتبقى منه ما يقابل إنتاج العام الجديد .. لم يتخرج فى كلية غردون التذكارية بل كان أمياً ولكنه علمنا ما لا نجده فى دور العلم .

ويقول مصطفى : بل أحمل فى داخلى منه الزاد الذى لا ينفذ فى كل مراحل عمرى ..

ويقول : لدى سبع شقيقات وأخ شقيق واحد توفى فى عام 1970 م ، وكان عمره سبعة وعشرين عاماً وكان يكتب الشعر ويغنى وتنبأ منذ وقت مبكر بأنى سأكتب الشعر أيضاً وأغنى أفضل مما كان يغنى .. وكان صوته جميلاً ..

وفى حوالى عام 1965 وفى مناسبة زواج أحد أبناء القرية من فتاة فى قرية " العيكورة " وفى الحفل الذى أقيم فى هذا الزواج سمعت مغنياً من القرية شارك فى الحفل يشدو بأغنية شعبية ميزت منها فى ذلك الوقت " الفريق أصبح خلا .. جانى الخبر جانى البلا .." وملامح اللحن كانت مشحونة بالعاطفة .. وفى لحظة صفا ذكرت لشقيقى المقبول ملامح اللحن والمعانى التى تدور حولها القصيدة وأخبرته أن هناك إحساساً قوياً يهزنى فى هذا اللحن وهذه المعانى وقد وافق ذلك فيه ظرفاً نفسياً خاصاً فكتب نص أغنية " السمحة قالو مرحّلة ".

أثبت هذه المعلومة إحقاقاً للحق وتوضيحاً للغموض الذى قد يحسه من لهم صلة بالأغنية القديمة عندما فاجأتهم الأغنية الجديدة .. كانت أول كتاباتى بعد أن توفى شقيقى " المقبول " وأول قصيدة مكتملة كانت فى رثائه .

درس الأولية والمتوسطة " المدارس الصناعية " وكان مبرزاً حيث جاء ثانى السودان على مستوى الشهادة الفنية ... لم يواصل فى المدارس الفنية حيث إلتحق بمدرسة " بورتسودان الثانوية " ومنها لمعهد إعداد المعلمين بأم درمان ، حيث تخرج فيه وأصبح مدرساً بالمدارس الثانوية العامة .

إلى جانب ما أشتهر عنه من ممارسته لهواية الغناء ، أيام دراسته بمدينة بورتسودان ، كان موهوباً فى مجال الرسم وفنون التشكيل ...عندما لم يسمح له أثناء عمله بالتدريس بالإلتحاق بمعهد الموسيقى والمسرح قدم إستقالته وعمل فترة مصمماً للأقمشة بمصنع النسيج ببحرى .

إلتحق بمعهد الموسيقى والمسرح وأكمل خمس سنوات بقسم الموسيقى " قسم الصوت " إلاّ أنه لم ينتظر حتى ينال شهادته الأكاديمية .

متزوج وله طفلان " سامر وسيد أحمد " له من الأخوات سبع وشقيق توفى عام 1970 م " المقبول " وهو شاعر غنى له مصطفى .

عانى من المرض كثيراً فقد لازمه الفشل الكلوى مدة طويلة " 15 عاماً" أجرى خلالها عملية زراعة كلى بروسيا أواخر الثمانينات إلاّ أنه تعرض لإنتكاسة جديدة بداية عام 1993 بالقاهرة وإنتقل منها للعلاج بالدوحة حيث ظل هناك يباشر عملية الغسيل الكلوى ثلاث مرات فى الإسبوع إلى أن توفاه الله مساء الأربعاء 17 يناير 1996م.




عينيك مدن

صلاح حاج سعيد

عينيك مدن
منسية فى كتب التواريخ والزمن
عينيك وطن
مشدود على وتر التباريح والشجن
مشدود على حروف الكتابة
مكدود عَنا .. ومكتول صبابة
وفيهو حطّ النيل .. سكنْ
***********
عينيك سفر
مكتوب أعيش فى غربتو
وأعشق عذابو .. وحُرقَتو
وليلو الطويل
وأتخيـّلك يا حلوة زى نسمة سحر
جيتى ومعاك .. حلمى المطوِّل منتظر .. وعدو الجميل
عشقك زمان .. جوّاى رحل
وإتناهى فى الأعماق .. أمل
ضمخ رؤاى .. إحساس نبيل
أذهل طيوف خاطرى القبيل
.. جاشت ملامحك روعتو
وضجّ السكون .. فى وحشتو
والكان أمل فى عيونى .. لاح
ذوب مدارات فرحة الوهج النضير
المزدهر .. بالإرتياح
.. فجأة إنحصد قبضة رياح
وسكت الكلام يا حلوة .. فى القول المباح
وغام الصباح .. بعدِك رحل
**********
والكان أمل فى غيم سماك .. أيقنت إنـّو عدم بلاك
وإنـِّك قدر
وإنـّو البيحلم بى عُلاكْ
بختار ظروف أحلاها .. مُر
عينيكى لو تصدق معايا الأمنية
عينيكى .. لو أعرف خِتام الأغنية
بدء الكلام .. والمنتهى .. المستطاب والمشتهى
كل المباهج الفى المواويل .. والغنا
والعاشقيك قلبى .. وأنا
هزتنا فى عينيك تصاوير المنى
يا أمنيات من كم سنة
يا أغنيات كل الأماسى .. المستحيلة .. وممكنة
المستحيل عينيك تهون
البستحيل قلبك .. يخون
ما الغدر ما طبع الوفا
والصدق ما شرط .. إنتفى
وأنا حالى فى بعدك .. كفى
وأنا حالى من بعدك كفاهو ..
المغنى والحب .. والشجن
والوحشة والشوق للوطن
ما العمر قبلك ضاع سدىً
والعمر بعدك أيه يكون
... لو يبقى بى حساب الزمن










عدى فات


صلاح حاج سعيد


عدّى فـات ..
زمن العيون الإلفـة
والحضن الملاذ
ورهـافة الحس البلوّن .
ضحكة الناس العـزاز
بعد الحنان .. الكان زمان
إستوطن المطر .. الحراز
روّح زمانى .. وفى رجاك
عانيت قساوة الإنـتـظار ..
فى ضل شبابيك السفر
صادقت ليلات الموانئ..
الـساكنة فى بحر
الأمانى بتنتظـر
لو يوم طيوف لحظك تفوت
تعبر خيالاتك تمر
قلق المواعيد الضّجر
سهر العيون ... الإحتراز
إتعزز النوم ..فىالخزار ...
وإتمدد الشقا فى العمر
ملّيت تباريح الجراحات البقت
بعدك أسى وزمناً قسا
وحالاً أسيف
ومشيت أفتش عن
خطاويك القبيل .
واضّارى من زمناً ..
وراك ملانى خـوف
أشتقـت ليك ..
اشتقت أرتاح فى عيون
فيهن ملامحك ذاتا
من غير أىّ .. زيف
وإشتقت لى ضحكة صباحك .
والدعاش عطر رزاز مطر الخريف
أنا وإنت والدنيا الزمان
الناس وفـا وخلة صفـا
ودفء المشاعر الشاتية صيف
أنا وإنت والدنيا الزمان
زمن الغناوى الطالعة من قلباً ..
رضى وحسّاً ندى و زوقاً رهيف
أنا وإنت والـدنيـا الأمـان
ما العمر شتّان بين
أوان زمناً حييتو
وعمر ما بتقدر بتعرف ..
بكرة يصبح حالو .. كيف










غربـة ومطـر

عبد العال السيد


الدنيا ليل .. غربة ومطر
وطرب حزين
وجـّع تقاسيم الوتر
شرب الزمن فرح السنين
والباقى هداهو السهر
*******
ياروح غناى
الغربة ملّت من أساى وغربتى
وبقيت براى .. حاضن أساى
الوحشة ملت من شقاى .. ووحدتى
لا غنوة .. لا موّال يبدد حسرتى
غير الدموع ياملهمة
الغربة مرة .. ومؤلمة
*********
كلمى النيل ضفة .. ضفة
والعشيات لما تصفى
والنسيمات البتاخد
من عفاف ريدتنا .. عفة
إنو شوقى يفيض بحر
شوقى شوق إنسان مضيـّع
ضيعو الليل .. والسهر
لا ينابيع ريدى جفـّت
لا .. ولا أشواقى كـفـّت
كل يوم فى الغربة زايدة
وبيها كل الدنيا .. عرفت









صديقى الاول

كلمات والحان مصطفى سيد احمد


يا صديقى الأول بان فى ود سلفاب
لغز لا يتأول... جمال وكمال
كنت ناعم بال قلت اروح اتجول ..
أقتل اللحظات فى الشباب اتغزل
فجأة والإدراك فى خاب واتعطل
لما دون انزار شفتو غز ووغل
شاف على ذهول وجهو بش وهلل
قال صباحك خير ..قلت أحلى وأجمل
جمــــــال وكمال
قال تشرف لو فى الديار تتفضل ..
قلت ليك شاكرين يا كريم المنزل
جمـــــــال وكمال
أرخى طرفو وفات والمزاج إتبدل
خلى طرفى يجول والرباط يتحلحل
حكمة يا ابراهيم كل جمالو مكمل
شك سهمو وفات صاب قليبى الأعزل
ليلا بوبـا وطال
القديم مدبـور والضمير يتوسل .
عل ردفو يطيع والصدير يتمهل
الوريد مبروع فوق كتيفو مهدل ..
والصدير عوام زى سحابا رحل..
جمـــــــال وكمال
ليلى بوبا وطال حاكا ليلو المسدل ..
واضحى نومى خدار فى خيالو تغزل
وصفو حورى جنان فى فريقنا اتنزل
مابقول دا فلان والحديث إتسلسل










علمي عيوني السفر


مصطفى سيد أحمد + مدني النخلي


علمى عيونى السفر
ما البسافر فى عيونك
سكتو بتبقى السلامة
ينسى أحزانو .
ويعرف الدنيا جنبك إبتسامة
ظللى الناس بى حنانك
أبقى ليهم ضل غمامة
*********
الشقا اللاّزمنى .. مدة
يوم بفوت .. والفرحة تبدا
ما بقول .. فارقنى عدّى
عشان بخاف ترحل عيونك
وتنهزم فينى الأمانى
وبى شقاهو .. وبى أساهو
تانى يتوشـّح زمانى
أصلو غير عينيك .. وحاتك
مافى للأفراح .. معانى
********
جينا ليك شوق فى عيونـّا
وفى عيونك شوق يناغِم
الشجون باكر بترحل
والزمن يصفا .. ويسالم
والحلم يصبح حقيقة
وتنسجم فى الحب ظروفو
والحنين تزهر غصونو
والعشم .. دانيات قطوفو
شوفى كيف يوم بكرة .. عامِر
هاتى إيدك .. شان نطوفو










غدار دموعك

كلمات والحان مصطفى سيد احمد


لا تنبش الماضى البعيد الم تكن
يوما لقلبى واقعا مجهـــولا
لا تنكأ الجرح القديم فإننى
و دعت ليلا مظلما و ثقيلا
وحملت روحى فى فواد نازف
ما زال يحمل نصفه مشلولا
وخلعت اثواب الحداد اما كفى
اذ صار قلبك فى الهوى ضليلا

غدار دموعك ما تفيد
فى زول حواسو اتحجرت
جرب معاك كل السبل
وايديهو ليك ما قصرت
حطمت فى قلبو الامل
كل الامانى الخدرت
كلماتو ليك ضاعت عبس
لا قدمت .. لا اخرت

ما كنا وكت الليل يضيع
تشرق نجومو وتنكتم
ويطل شعاع يكشف قناع
والظلمة ترحل تنهزم
وجفونا من طول السهر
تلبس وشاح فرقة والم
نستبشر اليوم الجديد
ونقول تعود انت العشم

كيف العشم وكتين يموت
والغصة تطعن فى الحلق
كيف الحنين وكتين يهز
لى زول بعيد ما بتلحق
كيف الرجوع لىزول قنع
شايل رماد(رفاة) قلبـو الحرق
سيب الندم وانسى الدموع
ما فات زمان ما بتلحق

غدار دموعك ما بتفيد
فى ظلمة ما بتعرف شعاع
اشباحة زى موج العدم
كسر المقاديف والقلاع
ونزلنا فى طوف الفشل
وابحرنا فى بحر الضياع
ونسينا ذكراك الزمان
عشناها فى زيف القناع









بناجـيهـا

كلمات والحان مصطفى سيد أحمد


حنين مشبوب ظهر فى غناى
وراجيها
على الزمن الصعب مصلوب
يشيل شيل القسا الممدود
عشان تصبح دياجيها
دوام بشتاق واناجيها
مسيرك طال
على السمحة الدروب تقصر
بشارة وفال
كفاك ترحال
منو القال فى السكون
راجيانا راحة البال
وايه باقى العمر معناه
دون احلام ودون آمال
وكيف لو يبقى ليما محال
اذا عزم المحب صادق
بيهزم كل صعب ومحال
ينور شمعى الاخلاص على الاجيال
وقصة جميلة تكبر فى خيال أطفال
بشوفك فى طلة الاصحاب
ورعشة شوق غريب طول
بعيد عن دارو والاحباب
فى دقة الباب وفى الترحاب
وفى كل جميل وكل خلاف
بشوف بيها الجود حولى
واناجيها
وجيهتك لسة ممدودة
تكابد دربك المداد
فى ليل هود تشيل شيلك وتتحزم
وتتلزم وتوحد
ويتساق حزن ليلك قليل الزاد
على اللحظة البتكى غناك
ضنا وتبريح وتتمدد
مع النجم السهر وارياك
ملاذ الحلم لو يرسى
بتمشى حدود خملية براك
معادك قاصد المرسى
ونحن معانا شوق لسه
وصبر نرجاك
ولابنرتاح ولابننسى









طوريتك

كلمات مصطفى ومحمد المهدي وصلاح حاج سعيد


طوريتك فى الطين مرمية
وكوريتك يابسة ومجدوعة
لا غيبتك كانت مرضية
ولا فوتك كانت مبلوعة
***********
اللهب الضوى الليل قناديل
فى عيون النجمة القطبية
والتعب المد ضراع النيل
سجادة فقرا مزاورية
سائلين عنك ويوماتى رحيل
لموانى المدن النفطية
شقيش ما تقبل يا ابو الحيل
فى قلوبنا مواجعك متكية
****************
وابعتلك شال الحب مرسال
تايهين فى بحرو مراكبية
بكتب على صدر الموج امال
اطفال عمال ومزارعية
كيف حال يا ابوى
كيف حال يا خال
بتمسى بيوتنا الكاكية
حزنانة بتبكى مال الحال
والزمن السابكم ايدية










محمد المهدي عبد الوهاب

مزيكة الحوارى


مانى غرقان فى التمنى
ولانى سارح بالأمانى
زارنى خاطراً بلّ شوقى .. وإحتوانى
النخل إتلاقى .. غنى
وردد النيل الأغانى
النجوم لامع بريقا
الورود النايمة .. فاقت
عطرت كل الجزاير بى رحيقا
الندى الراقد بفوقا
صفّقت جنحاتو غنت .. لى هوايا
**********
دقوا مزيكة الحوارى
رقصوا البنوت .. أعرضوا
النخل زايد فى عرضو .. وفى علاهو
البيوت غرقت وراهو
وبرضو زايد فى علاهو
يحكى للدنيا الجميلة
سر عظمتو .. وسر بهاهو
********
ضى عيونك يا بنية
يضوى من بلداً بعيدة
تحملك لينا الغمامة
ويكتمل للروح .. نشيدا
وفى الدروب اللّيك تودى
بنسرج الخيل العنيدة
والحزن من نور عيونك
يلبس الفرحة الجديدة
***********
وأنا راكب يا مراكب
لا الرياح توقف خطايا
لا الجبال .. تحجب رؤايا
ست شموس الكون .. منايا
ليك مسافر
ومن كتير الزاد .. مسافر بى غنايا
نوصل الشمس البعيدة
نبقى عيدا
نزرع الحب البيوقد
لى النهاية










أزهري محمد علي

مشرع الحلم الفسيح


يا مشرع الحلم الفسيح
أنا بينى مابينك جزر
تترامى .. والموج اللّديح
القدرة والزاد الشحيح
كملتو .. ما كِمل الصبر
نتلاقى فى الزمن المريح
ميعادنا فى وش الفجر
********
يا مشرع الحلم الفسيح
يا بعض منى .. وفينى ساكن
أنا أصلى منك ومشتهيك
وبيناتنا ليل الغربة ... داكِنْ
هبّت هبوبك
أفتح شبابيك المساكن
وسـِّع دروبك .. ولـِّع مصابيح الأماكن
***********
يا مشرع الحلم الفسيح
يومنا النـّهِـبْ .. أسلِبنا خوفنا
كبـِّرنا قدرك .. مرتين
وطـِّول قدر كتفك .. كتوفنا
يا غضبة الرعد البيسكن .. فى غناوينا وحروفنا
ضوِّى الدساكر والضفاف
عبِّى الحناجر بالهتاف
سدِّد مسامات الرِّعاف
نوِّر مغاراتنا وكهوفنا
**********
يا مشرع الحلم الفسيح
أنا وإنت .. والمطر الفصيح
حنطوِّع الزمن القبيح
ناخد بعض .. شكل السما
حدِّثنى دايماً .. كلما
تنشف على البر الضفادع
يهجر الضو المواضع
وتسقط من الكف .. الأصابع
حدثنى دايماً كلما
تحرد مراسيك السفن
تسكن مرافيك الزعامات .. الدُمى
حدثنى لو تاهت خطانا .. على الدروب المبهمة
أو ربما
تهدم آلات الشوارع .. وترجمْ العُزّى الصواقِع
حدثنى لو صادف الكى المواجع
وضلك على الساحل رمى
حدثنى لو مطرك هما
علمنا دايماً كلما
نبذر على أرضك شهيد
يطلع شمس .. يبهر بأنوارو السما










التجانى حاج موسى

والله أيام يازمان



والله أيام .. يا زمان
ببكى وأتحسر عليك
وما بقول العشنا .. كان
وأرمى حبة لومى فيك
********
ولسة راجيك يا زمان
بحبة الذكرى .. المعاى
عايشة فى وجدانى .. جوة
ولسة بتدغدغ حشاى
يمكن الحبيتو .. مرة
يلقى فى كلمات غناى
فاصلة بتصحى المشاعر
ويمكن الطوّل سهادو
تغشى ليلاتو البشاير
ويمكن الفرح الزمان
لسة أصداهو .. بترن
غنوة خحاضناها .. الضفاير
*********
جايز الأيام تحن
وتصحى فيك نبل المشاعر
ويمكن المجروح يئن
وتغشى ليلاتو البشاير
ويمكن الفرح الزمان
لسة أصداهو بترن
غنوة حاضناها الضفاير
والله أيام .. يا زمان









أزهري محمد علي

وضاحة


الـصـبـاح الـبـاهـى لـونـك
وضـــاحة يـا فجــر المـشــارق ....
غـــابـة الأبـنـوس عـــيونك
يابنيّة مــــن خـــبــز الفنادق
***********
شـــيدتى فـى جــــوّاى صــوامــع لـى الـفــرح
وفـتـحــتـى فى دنياى .. مـسـارح لى المــــرح
وبــقيتى لى ســــكة وعيون
لا قـدرت أطــولك شـــان أجــــيك
ولا قـــدرت من غــــيرك أكــــون
وأنا بــيــكــى مــالـينى الكـلام
... حــرّكت بيك عــصـــب السكون
جـــلــبت ليـك الغــــيم .. رحـــــط
طـــرّزت لـيــك النيـــل .. زفـــــاف
حرقت ليك الشوق بخور ...
وفرشت ليك الريد .. لحاف
**********
لا الســكة بيكى بتنتهى
ولا مـعــاك مــلّيت طـــــواف
ياريتنى لو أقــدر أطولك
وضّـــاحة يا فجـــــــر المشارق ....









صلاح حاج سعيد


الحزن النبيل


وبقيت أغني عليك
غناوي الحسرة والأسف الطويل
وعشان أجيب ليك الفرح
رضيان مشيت للمستحيل
ومعاك لي آخر المدى
فتينى يا هجعة مواعيدي القبيل
بعتيني لي حضن الأسى
وسبتيني للحزن النبيل
ومشيت معاك كل الخطاوى الممكنة
وبقدر عليها وبعرفها
أوفيت وما قصرت في حقك
ولا كان عرفه غيرك أصادفها
وقدر هواك يجيبني ليك
جمع قلوبنا وولفها
وكتين بقيتي معاي في أعماقي
في أعماق مشاعري المرهفة
لا منك ابتدت الظروف
لا بيك انتهت الأماني المترفه
ندمان أنا
ابداً وحاتك
عمري ما شلت الندم
ما اصلو حال الدنيا
تسرق منيه في لحظة عشم
وأنا عندي ليك كان الفرح
رغم احتمالي أساك
يا جرح الألم
كان خوفي منك
جاي من لهفة خطاك
على المواعيد الوهم
اهو نحن في الأخر سوا
باعنا الهوى
ماشين على سكة عدم











صــــــــــــــــــــــابرين


صابرين يا حزن الغنى ..صابرين

من بعد الضنا .. صابرين

على وعد المنى

برجاك يا ارض الحبيبة

وبلقاك في الفرحة القريبة

وبشراك يا ام السناء .. صابرين

لا ليل ولاحزن طائل

لا صبر ولا دمع سائل

لا هم جاك يا ام نفايل

والنيل فاض وانحنى

نيلين وحلمك هنا

فرعين شايلين جنا

صابرين سلامات

عشرات حبابك سلامات

اسلم شبابك سلامات

شايل سحابك سلامات

والقبلي شابك

سلامات

خيرك سنابل

وهواك هنا

صادقين عاشقين

ترابك حزين سلامات

يا حزن الغنى

صابرين









صلاح حاج سعيد


كان نفسى اقولك من زمان


كان نفسى قولك من زمان
بالكاتمو فى سرى ومكتم
فى حشاى مدسوس سنين
كان نفسى قولك من زمان
بالشايلو فى عينى معزة وفى القلب
ريدا يخاف الغربة والشوق والحنين
زاملنى زى خاطر الفرح
وكتين يقاسم الهم عذاب
وقتين مدامعى تكون جزا
وتفتح مباهج الليل ظنون
كان نفسى قولك من زمان
سطوة محاسنك عندى ما كسرة جفون
وكت العيون تعبرنى زى خاطر المسا
سطوة محاسنك ما الرخام الفى الحرير
وكت الثغير يفجعنى بى حرفاً قسا
سطوة محاسنك عندى وكتين كبريائك ينهزم
لى طيبتى بى لفظة حنان
وكتين مشاعرك تنسجم فى عمرى
تنفح قلبى بى رعشة امان
سطوة محاسنك عندى وكتين شوقى يصبح فى هواك
.. ليل عزة ما بتعرف هوان

كان نفسى قولك من زمان
عينيك وحاتك غربتى وأهلى
وبلادى الفيها ضائع لى زمن..
عينيك وحاتك شوقى لى زولا ولوف..
من بعدو ساب عينى سهن
وأنا كنت دايرك من زمان
أشرح حكايتى معاك الِـف
أحكيك وأزيد القول ولف
وأتمنى لو قلبك عرف كان من زمان
من قبل مافى قلبى يتحكر
زمان الفرقة فى جرح لأسى
من قبل ما حرف الحقيقة الحلوة يتبدل عسى
ويصبح امانى كتيرة فى خاطر الحنان
كان نفسى اقولك من زمان










عبدالقادر الكتيابي

لمحتك


لمحتك قلت بر آمن بديت احلم
الملم قدرتي الباقية و أشد ساعد على المجداف
تلوح لي مدن عينيك وترفع لي منارة بسمتك سارية
وبديت احلم
كل مالريح تطارد الموج ازيد اصرار
و احلف بيك اغيير سكة التيار
و اقول يا انتي يا اغرق
الوح لمدن عينيك تلوح لي
اخاف الضفة ترجع بيك قبل الحق
اخاف غيم المنى الشايل تسوقو الريح واتفرق
اخاف و اخاف اخاف و اخاف
و اشد ساعد على المجداف
واجيك بقدرتي الباقية
حطام انسان موسم بشقى الدنيا
ومقسم حسو في الأحزان
اجيك فنان
اشد اوتاري و احكيلك حكاية انسان وهب لي سكتك نفسو
ورسم صورتك على حسو
وربط ساعد على المجداف وقال يا انتي يا اغرق
اخاف و اخاف اخاف و اخاف
اخاف غيم المنى الشايل تسوقو الريح و اتفرق
اخاف الاقيك يا اماني سراب مواهبي عليهو تدفق
اخاف و اخاف اخاف و اخاف










الشاعر صلاح حاج سعيد

قمر الزمان


كتبت ليك ...
لا بينى بينك ريدة ..
لا قصة غرام
إخترت ليك ....
أجمل حروف وأصدق فواصل
نادرة فى لغة الكلام..
لا قصدى ألهو معاكى
بى كلمات غنا
لا شعرى ليك مرجيحة
من شعر الغمام
كتبت ليك والله يا قمر الزمان
شان جيتى بى زمن المحنة
وشفت فى عينيكى ..
حس أهلى القُدام
*************
كتبت ليك وأنا جايى
فى زمن الشقا
المرسوم على وش
الثوانى .. مظللا
تتمدد الساعات سنين
تتفتح الأحزان غريبة .. ومذهلة
وأشتاق أفتش نسمة ..
فى الزمن العذاب
وأيامى من كتر الأسى
وكتر العزوف .. والإغتراب
صارت حروف مترهلة
لحظات أسيفة .. ومهملة
*****************
كتبت ليك .. ووقفت ليك ..
لامن لقيتك جايه
من قلب الطريق
ولمحت فيك
راحة المشاوير البعيدة
ولفحة النسمة الحنينة
الجاية من جوف المضيق
حسيت عجايب الدنيا إتلمـت
بقت جايـّانى من عصراً سحيق
عينيكى حس أطفال بنادوا
القمرة لى الغايب .. يعود
وجبينك الضوّاى
حجا الحبـّوبة فى الزمن السعيد
يا قمرة اقلبى السنسنة الحمرة
وشوفى ليه ما جا
***********
وأنا فى قساوة الموحش
الزمن المكهرب .. بى الحريق
أنا حيلتى أيه
قولي لى يا قمر الزمان
غير أتـّكى .. وأحلم معاك
وأحضن أماسى الصحو ..
والأمل البريق









محمد عبد الله شمو

مريـم الآخــــرى


هاهى الأرض تغطت بالتعب
البحار إتخذت شكل الفراغ
وأنا مقياس رسم للتواصل .. والرحيل
وأنا الآن الترقب .. وإنتظار المستحيل
أنجبتنى مريم الأخرى قطاراً وحقيبة
أرضعتنى مريم الأخرى قوافى
ثم أهدتنى المنافى
هكذا قد خبرونى .. ثم قالوا لى ترجـّل
***
ثم أنتِ .. أنت ياكل المحاور .. والدوائر
يا حكايات الصبا
تحفظين السر .. والمجد الذى مابين نهديك .. إختبا
ليس يعنيك الذى قد ضاع من عمرى هباء
وأنا .. يا صغيرتى .. لست أدرى ما الذى يدفعنى دفعاً .. إليك
ما الذى يجعلنى أبدو حزيناً
حين أرتاد التسكع .. فى مرايا وجنتيك
لا عليك
فعلي هذه السفوح .. المطمئنة
نحن قاتلنا سنيناً .. وأقتتلنا
نحن سجلنا التآلف .. فى إنفعالات الأجنة
وأحتوانا البحر .. والمد اليقاوم .. والشراع
يا هذه البنت التى
تمتد فى دنيايا سهلاً .. وربوعاً .. وبقاع
ما الذى قد صبّ فى عينيك شيئاً من تراجيديا الصراع
***
والمدى يمتد وجداً عابراً هذى المدينة
خبرينى هل أنا أبدو حزينا
هل أنا القاتل .. والمقتول حيناً .. والرهينة
هل أنا البحر الذى لا يأمن الآن السفينة ؟
خبئينى بين جدران المسام
قبلينى مرةً فى كل عام
فأنا أحتاج أن ألقاكِ فى كل عام
أنا أحتاج أن ألقاكِ فى ذرات جسمى
فى الشرايين المليئة بإنقلابات المزاج
فى إنعكاس الضوء
فى النافذة الأولى .. وبلـّور الزجاج
.. هكذا قد خبرونى .. ثم قالوا لى ترجل
***
وعلى أطروحة الحلم المسافر .. ألتقيك
على حمى الرحيل المستمر .. الآن .. فى كل المواطن ألتقيك
فى مساحات التوهج .. فى جبينى .. ألتقيك
فى إنشطار الوقت .. فى كل الذرى
وفى حكايات الطفولة .. إذ يعود بنا الزمان .. القهقرى
آه لو تأتين يا سيدتى .. من كل فجٍ .. وأتجاه
من عميق الموج من صلب المياه
تستطيعين التنقل بين أرجائى وظلى
تستطيعين التوهج .. عند لحظات التجلى
ولعينيك إمتلاك وثائقى .. حتماً .. وقلبى
ولعينيك التنصل .. عن مواثيقى ودربى
هكذا قد خبرونى .. ثم قالوا لى ترجل
***
وأنا أبحث عن صيغة هذا البعد .. هذا اللاّ نهائى
عن قرار الشعر .. عن لون التـّغرُّب
بين جدران المقاهى
آه لو تأتين ... آهِ
تجدين الإِلف الممتد سهولاً .. بإنتظارك
وأنا .. كالحذر المنساب .. خوفاً
بين صالات الجمارك
كالرحيل .. كالترقب .. وإنتظار المستحيل
هكذا قد خبرونى
ثم قالوا لى ترجل









م
محمد الحسن سالم حميد

ما طال في بحرك في مي



ما طال في بحرك في مي
وتمرك مفدع بالجريد
شدرك امد حد السمى
طينك معتق بالطمي
نبيتك اكيد نبيتك هوى
نبيتك ايوة سوا ..سوا من جديد .. نبيتك جديد
ايد ابوي على ايد اخوي على ايد انا
على ايد على ايد تجدع بعيد في اللجة في من راس ميضنة
حيكومة الفقر الدمار
الكضبن والصهينة
اللي ناقص ايامنا كاس
اليالطيف سوس البحر نردم قفاهو حجر .. حجر
من ها الرصيف
الما قدر قدام سريحة الموج يقيف
الما انستر الرزقية وناس وايه
نسقيها كاس اسقينا
نوريها كيف عشق الحياة
سنانا فوق حجر القصاص
سوانا ناس ضرب البحر
جوانا احد من الرصاص
يا ضو حبيبين القسا
طول ما انت غرقان في الاسى
تبت يدين ما ترمي ساس
ما تبني مجدك من جديد
تفتح شبابيك الخلاص
تدخل نسيمات النشيد
بيت القصيد يستقبله
مستقبله والحاضر الماضي التليد
يا بلدي يا فردة جناحي التاني
وكت الناس تطيرلي عالمة
وا فجعة الزول البيجيك
ما يلقى فيك غير الهجير ناسا تواي مسالمة
مل البشاشات القبيل تلقاها ميتة مسممة
والجاته جاتة من الارض ما جاته من السما
ما اعتى غبنك يا ولد
واعدل قضيتك واعظمة
لا ترجع السيف الجفير
والدنيا فايرة مصادمة
من غير تجيب تار البلد
ريح العوارض تهزمة
تطرد مع ***** الاخير دعة الضلال
من جنتك ادمة
تأكل من الشجر الحلال
يغشاك نعاس في ضل رمى
تختال هضاريب الصعب
كربة ليالي المظلمة
يا نيل قبل خاطرك يطيب
ارضك تفزع باللهيب
تكشح تواريب الغضب صعب المراس
نوبة و زنوج وبجة وحلب
رطانة عربان مواشو
ومولدين تلقانا او نلقاك ضو
ظلمة لياليك العجاف
رعشة نهاراتنا النشاف
امنا بيك وموحدين
في ايدينا فاس وقلم رصاص
شتلة وكمنجة ومسطرين
وطبنجة في خط التماس









عاطف خيري


سيناريو اليابسة - شهيق


نكــــر صــوتك صـــداك ...
غــالــطــني الـزمن فيك
شــهرت عــلى الجــفاف وعدك
بطاقاتنا الخريفيـة ....
رجــع فاضـي الكــلام مليان ...
معــاك إتــبـرجـت غـيـمة
وشهق جوايا صوت جدول ...
مـرقت على المطر حفيان
لـقـيـتــك والــرذاذ مــدخـل .
ونـاديـتـك …أقـيـفـي مـعاي نشيل كتف الغناء الميل
ونتخيل حلم دونك بيتحقق ..
وقبلك خيل دماي واقفة علي شرياني تتشهق ..
وبرق صوتك صداك غنيتي ...

رشحت حلقك لإذاعات الشجر ...
والمنتظر من عودة المدعو المطر ..
وللمسادير و الطنابير ..
واللسة في رحم القصيد ...
والدابو هسة وفي سوق عكاظ
بين مزادات الحروف غيبت رسمك وإحتكرتك للظروف
للزمان الجاي واللحظة الى فاتت مني هسة ..

يا واقفه بين جرح السحاب
وبين شهقة الأرض البكر ..
ما كان ده ريد ..
كان إحتمال تغيير قوانين حركتك ..
ما بين حديثنا ولحظة الفعل الحقيقي ..
وإنتباهك إنت للشارع البيرجع تاني لنقطة بدايتو ..
و إنحيازك إنت للشارع البيرشح في مسام رمل التوقع ..
وما إتعرف قانون نهايتو ...
غايتوا أمشى في الدرب البطابق ..
فيه خطوك صوت حوافرك ...
يا فرس كل القبيلة تلجموا ..
ويكسر قناعاتا ..
ويفر يسكن مع البدو في الخلا ..
ما برضى غير الريح تجادلهُ وتقنعهُ ..

إفترضتك لون أساسي ...
يمنح اللوحة إزدواجية القراية ..
ويفتح الضوء بين خطوط الريشة والخط الإضافي ..
الجاي من شبكية الزول البشاهد ..
وإكتشفنا الرسمك وأنا برضو التوارد في الخواطر ..
نفس أرقام التذاكر ..
البيها سافرنا وشهدنا ...
إنفجارك في الأرض ..
يا سمرة يا واضحة ..

ما غنيت يوم جيتك صدفة ..
قبل أبداك كان غصنك بشر ..
يوم ما كان إحساسك مسى ..
عرج غيمك فيني ومطر ..
لحظة طار عصفور من صدرك ..
رتب فينا إحساس بالإلفة ..
ودوزن عصب الزمن الأشتر ..
وإتوكلت عليك وقلت ..
المارق منك داخل جرح الوردة ..
وراسم فوقا غناوي الطل ..
المارق منك ...
رجع للغابات العرب العاربة ..
وللعتمور الزنج الهاربة ..
وأدى الكون مفتاح الحل ..
المارق منك ...
شادد عصب الورقة وحرفي
وراصد في اللاوعي سكون مواعيد ..
صحوه ... وحلمه... ولونه ..
وشاري يقينك في ظني ...
وسارق لحظة إني أفكر ..
المارق منك ... مارق منك ..
أو مت شهيد ...

ما تتضاري ورى الدعوات ...
وما تتلبسي فرح الفات
يسكن فيك النغم الزايف ...
ويسرق حاسة شوفنا الواقفة
على رجلين جوانا ..
ونحن الهاويه والمطامن من الأرض ..
آه من نحلك ساعة يرحل ..
ولمن يكتب فينا الحنضل ..
ويختم عمره بفعل الشهد ..

قال الجدول :
طلوع النخلة مرور الريح واحد
لكن الريح بتعانق حقل ..
ونحنا بنطلع نخلة وننزل ..
ونكتب في ذاكرة الصفق الأخضر ..
سجنا الريح في الورق الأبيض ..
وجهناها ضد التمر الناعس ..
يسقط زي قبعة الحارس ..
زي الكان بيناتنا وفات ..

قالت غيمة
بين قوسين غيمة لئيمة:
أولاد الشارع فهرس لي كل المدن ..
التهرس جوفك بالأسمنت ..

قالت ريح :
شوف الناس قنديل ..
لو ما نور يحرق كوخ ...
وباقي الحلة تنور ..
أو جبة جوخ أو ينزل بوخ ...
يقول للنسمة الزايفة أقيفي ..
لو تتفرد ريح ...
تتشرد ريح ...
ريح الخوف ...
لو تتفرد ريح
تبدأ تفرتق ضفائر المدن الكاذبة ... تعيد تسريحتك ..

يوم سمايتك شكل قامتك ..
كيف تموتي وتحيي تاني ..
ويوم قيامتك ..
هو البيدينا الثبات ..
يا مجلوبه في قافلة رق ..
ما بستحمل صدرك رصاصة ظلم ..
يا صابت رحم الفال يا قطعت حبل الحلم ..
يا كنا نبيعك يا نسرق ..
إخترنا النار الضلها بيحرق ..
طمناك إنو الدنيا بخشها ضوء ..
يجرح جلد العتمة ..
لما الليل قربان فجرك ..

يا بت يا نيل ... يا بت يا نيل ..
لو نامت قمحة على الأبيض ... واتشرت زيو ..
وزاد الأبيض في غيو..
ومدد رجلة اليسرى ..
ما كان الكسرة جاتك من بره .... صفرا ومنكسرة

زوجناك الشهداء أولاد الكد ..
الماتو عشان الشعب ..
زوجناك ما عندك ضرة ..
زوجناك ما جاتك ضرة ..
ما إنشاف ماعونك ... في الحلة يساسق
ويلقى فتات ...

قال الأبيض للأزرق :
يبقى ضد الانتباه ..
وضد تواريخ التمازج ..
بيني بينك ..
وده البشوفك في مراهقة الخرائط ..
وفينا من وجع المسافرين ..
واطه مالاقت هوية ..

رد الأزرق :
مطر الحبش لو كان نبش ... جواك سقف
وهد حيلك في الدواخل ... وشد عصبك في المداخل
صوت مراكبي وايد بتسأل في القمح ..
وفينا من فرح المسافرين ..
قصة الشمس القضية ..

يا أعشاب النيل الأبيض ..
ماتتضاري ورى الدعوات ..
أقرا تاريخك ... أخاف ..
أقرا تاريخي … أخاف ..
أسأل جبين الفجر ...
ألقى الفجر مطعون في القفا ..
هل سافرت في دمعك المحقون جفا ..
حبة غضب ..
ما شلنا جمرك وإنطفا ..
جوانا نارك والمطر ..
جايين بالكتابة ..
وضربة الناس المهابة ..
لو هز نخلك باشبزق ..
ما فارق التمر السبيط ..
وما ساور الطورية شك ..
إنو الأرض أنثي ... وبتحمل بالحلال
مين اللي قال إنو المسافة ..
البينا بين الشمس طاقة ..
أو مياه النيل بتدخل ..
في عروق السنبلة ..
المسقية بي عرق ..
الجعانين والمساهرين بالبطاقة ..

أقرأ تاريخي وأقيف ..
أقرا تاريخك وأقيف ..
جواك والزمن النضيف ..
جواي من جواك غضب ..
سلم مفاتيح السؤال ..
جيل الشمس موكب حريق ..
واقف على باب الدخول ..
بيناتو بينات الوصول ...
لحظة شهيق










محمد الحسن سالم حميد

عم عبد الرحيم


فتاح يا عليم .. رزاق يا كريم ..
صلى على عجل ..
همهم .. همهمة ..
حصن للعباد ... وهوزز سبحتو
ودنقر للتراب .. هم فوق همهمة ..
صنقع للسما ..
وكان في الجو في غيم ..
وكم نجمات بُعاد ..
وكان الدنيا صيف ..
لا قالتلو كيف ..
كيف أصبحت كيف ..
لا لمسة حنان .. لا لمسة وداد ..
لا رمشة طريف من قلباً وفي ..
زي أيام زمان ..
أيام الدفي ..
وكانت ماها في .. كانت في المراح ..
شدتلو ال ..
تحلب في الغنم لي شاي الصباح ..
والطير ما نضم ... ما رسل نغم ..

عم عبد الرحيم أتوكل نزل ..
في المشرع لقى .. زملان الشقى
الجاء من الجريف .. الجاء من الجبل
عل الناس بخير ..
صبح هاظرم
نقنق ناقرم ..
غاظوه ونعل
وعم عبد الرحيم ما يخبر زعل ..
كل الناس هنا ما بتخبر زعل ..
تزعل من منو .. وتزعل في شِنو ..
كل الناس هنا .. كل الناس صحاب ..كل الناس أهل
والماهم قراب .. قربم العمل ..

الطاق اليطق عشت أبو الزمل ..
بالحالة العليك بالفال بالأمل ..
عم عبد الرحيم كُت فلاح في يوم ..
في أيدك تنوم .. على كيفك تقوم ..
لا دفتر حضور .. لا حصة فطور ..
تقرع بالقمر .. تزرع بالنجوم ..
لكن الزمن دوار لا بدوم ...

وعم عبد الرحيم ماشي على الشغل ..
في البال القديم
إتعارض تُكل ..
تنشايح جراح يا
كيف الغسل ..
الدِنيا أم صلاح .. تبدأ من التُكل ..
في حق الملاح .. في اللبس الجديد ..
في القص القديم .. وبيناتن عشم ..
في الفرج البعيد ..

أمونه الصباح قالتلو النعال ..
والطِرق إنهرن ..ما قالتلو جيب
شيلن يا الحبيب .. غشهن النقُلتي والترزي القريب
بس يا أم الحسن ..
طقهن لا بفيد ....
إنطقن زمن ..
وإنطق الزمن لازمك توب جديد ..
وبأياً تمن ..
غصباً للظروف والحال الحرن ..
شان يا أم الرحوم .. ما تنكسفي يوم
لو جارتنا جن .. مارقات لي صفاح
أو بيريك نجاح .. ده الواجب إذن
وإيه الدنيا غير .. لمت ناس في خير
أو ساعة حزن ..

عم عبد الرحيم يا حر ..
ات ماك حر ..
ياريت التمر ياريت لو يشيل كل تلات اشر ..
ولا أيام زمان كانت ما بتمر ..
كان ما جاك هوان وما لاقاك ضر ..
كان لا ضقتي ضيق لا اتغرغر صبر ..
لا شابيت غريق لا طوح فقر ..
وكان ما كان ... وكان اكسيكي در ..

والماهية أُف .. عيشة هاك وكُف
في هذا الزمن .. تُف يا دنيا تُف
يا العبد الشقي .. ما إتعود شكِي
لكن الكفاف فوقك مُنتكي
والسوق فيك يسوق ..حالك ما بتسر ..
إلا كمان في ناس فايتاك بالصبر ..
ساكنين بالإيجار لا طين لا تمر ..
واحدين بالإيجار ما لاقين جُحر ..
سلعتم الضراع والعرق اليخر ..
عمال المدن .. كلات المواني ..
الغبش التعاني ..
بحارة السفن .. حشاشة القِصون ..
لقاطة القطن .. الجالب الحُبال
الفِطن الفرن .. الشغلانتو نار ..
والجو كيف سُخن ..
فرقاً شتى بين .. ناساً عيشا دين ..
مجرورة وتجر ..
تقدح بالأجر .. ومرة بلا أجر ..
عيشن كم هو .. وديشن هانقدر ..

وناساً حاله زين ..
مصنع .. مصنعين ..
طين في طين وين ..
ما مرابه مُر ..
بارد همها .. لا يعرق جبين ..
لا وشاً يصُر ..
عين والله عين ..
كلها كمها .. وعزها هان قدر ..
في الجنة أم نعيم .. في الجنة أم قصُر ..
يا عبد الرحيم إلا وراء القبر ..
ويُلكز في الحُمار .. لا تسرح كُتر
فتاح يا عليم ..
وإن كان القفر يا عبد الرحيم ..
أشبه بالكفر ..

حيكومات تجي .. وحيكومات تغور ..
تحكُم بالحُجي .. بالدجل الكجُور ..
ومرة العسكري كسار الجبُور ..
يوم باسم النبي تحكمك القبور ..
تعرف يا صبي ..
مرة تلف تدور .. ولا تقول برِي ..
أو تحرق بخور ..
هِم يا الفنجري .. يالجرف الصبور ..
كل السمتو مات .. باقي على التمور
وأرضك راقدي بُور ..
لا تيراب وصل .. لا بابور يدور
ونقرط لل .. نقريطة ال
لا تنسى النعال ..
الطِرقي .. الخضار .. اللبس الجديد
تسريح السفر للماشي الصعيد .. ماشي الديش نفر
والبال إشتغل .. والبال إشتعل بالآبى ما يعيد
الحول ما إشتغل ..
الغُبن الشديد .. السابا ورحل ..
الضيق المحل .. والفرج القريب ..
الجاء وما وصل ..
زي الحال ده يوم لا كان لا حصل .. والبال إشتغل

السكة الحديد يا عمو القطر ..
يا عبد الرحيم قدامك قطر ..
وسال الدم مطر ..
وطارت دمعتين ..وإنشايح وتر
يا طاحن الخبر ما بين القضا ومرحاكة القدر
الشهدوا الدموم .. والدمع الهدر ..
إيدهم في التراب .. والعين في القطر ..
عارفين الحصل .. عارفين في حذر ..
الخبر اليقين بوّخ وإنتشر ..
أطفال القرى وعمال الحضر ..
أدوه الطيور ودنو البحر ..
إنصاعد سحاب وإندافق مطر ..
عم عبد الرحيم في الشارع عَصر ..
لي تاله اليسار متفادي الكجر ..
دورية الكجر .. عربية الكجر ..
جفلت ال وطوّح زي حجر ..
وعم عبد الرحيم إتلافا القطر ..

فتاح يا عليم .. سال الدم مطر ..
جرتق للتراب .. منشور بي كتاب ..
روشتة وجواب .. وماهية شهر ..
مفتاح آب غراب .. أورنيكين سهر ..
جنب لبدة مقطوعين ضهر ..
عم عبد الرحيم يا كمين بشر ..
صحي الموت سلام ..
ما يغشاك شر










عبد العزيز العميرى

الممشى العريض


مكتوبة في الممشى العريض ...
شيلة خطوتك للبنية
مرسومة بالخط العنيد
في ذمة الحاضر وصية ...
شاهدة التواريخ والسير والإنتظار
أدوني من قبلك مناديل الوصول ..
وفردت أجنحة العشم
في ساحة الوطن البتول ..
وضحكت ما هماني شئ ..
وبكيت ولا هماني شئ
عندك وقفت من المشي ..
وغرقت في ضوء النهار
**********
كانوا بتمنوك لو ترتاحي لحظة على الدرب ..
حبوك حب قدر الحروف الحائمة في بطن الكتب ..
قدر الخيال ما مد يدو على السحب ..
كل خاطر قال بريدك
إلا ريدك كان رسول الدهشة في كل الديار ..
************
وأنا زي عوائد الشعر فارس شد خيل الكلمة ليك ..
مصلوب على ظهر البداية القالوا آخرا بين يديك
وصرخت يا مهون تهون شان أجيك
كان أصل يوم لحضورك
كت بريدك ومشتيهك
وأنكسر فيني الترجي
ونلت من سفري الخسار ..
***
بس داير أقولك يا أصلية
لو تعب فينا التمني
وإنهتك وتر المغني ..
لو تسدي علينا طاقات البشائر
ينهزم يوم التجني
وأجيك لاهماني شئ
عندك وقفت من المشي
وغرقت في ضو النهار










جمال حسن سعيد

أظنك عرفتى


أظنك عرفتى

عواصفك مهبـّى

أبارى فى خيالك .. يسوقنى ويودّى

ونهرك يعدى

ويجهل مصبّى

هواجسى البتزرع

وظنـّى البربى

***

لقيتك خواطر

بتصحى .. وتساور

وطيفك يزاور

وروحك تحاور

وروحك تحاور

موشـّح أساور

أقول بس نسيتك

وجرحك .. يتاوِر

***

أظنك عرفتى عذاب المغنى

وطبلو المجدّع

شظايا التمنى

حروفو البتجزع

فى لحظة تجنى

خطاهو البتهرع

متين تطمئنى

***

مسرِّج خيالك .. حصانى القبيل

معربد غبارو

وخلّى الصهيل

مسافر .. مسافر .. وفاقِد دليل

أظنـِّك عرفتى ..

أظنـِّك عرفتى










الشاعر عبد العال السيد

من بعد ما عز المزار


من بعد ما عز المزار
والليل سِها .. وملّت نجومو الإنتظار
والشوق شِرِب حزن المواويل
وإنجرح خاطر النهار
***
وبقيت أعاين فى الوجوه
وأسأل عليك وسط الزحام .. قُبـّال أتوه
يمكن ألاقى البشبهك
ما الليل براح
والشوق .. تعالى بيندهك
***
شايلاهو وين النيل معاك
عصفورة جنحاتا النجوم .. وأنا بى وراك
بسأل عليكى مدن .. مدن
وأعصر سلافة الليل .. حزن
بسأل عليك فى المنفى .. فى مرفا السفن
يمكن طيوفك أُخريات الليل تمر
تملا البراحات ..
لى الحزين طول العمر
***
ما نحنا بينا الأمنيات والتضحية
بينا المعزات .. والعذابات فى الحياة
بينا الهوى ..
إخلاص على قلب إنكوى
وكلام قديم
قلناهو آخر الليل .. سوا
إنو راح نتلاقى لو طال النوى
لكن كلامنا الكان .. وكان
خايف يكون شالو الهوا










محمد الحسن سالم حميد

شوك الشوق


شوك الشوق لى الشوف آ خَىْ
ضارب قطن النسج الحى
يا منقاش أحزانى إنشرت
وادى الفرح إتمدد صَى
يا راحلين عِـنْ دُغُش الليل
ما لاقيتو جناياً زى ..
تكية نخل الفجُر الجاسِر
فوق فى المتَرَة .. عَرَاجِنْ ضَى
آ رعاوة .. العرب الرُّحّل
ما لاقاكُنْ فى المطرانى ؟
فى كاويقْ الجرف الأمحل
بين أسراب الرهو الراحِل
ساند أكتاف الليل الميّل
عِنْ ساساق الغيمة عليكُن
بين رقراق الخيمة معاكُن
ما أديتوهو شِوَىْ ... بى حرجل؟
***
آ رطّانة الليلُن ليّل
ما لاقاكُن فى ونساتكُن؟
بين الشادِى وبين كاساتكُن
فى صلواتكن .. عِنْ دعواتكن
أو .. دقساتكُن عِز خلواتكُن
.. زول .. زول الله
إن مِحِن .. آ .. بِسأل
الهبّاد لى غُلبْ أخواتو
الفرّاح عوّان الحلّىِ
الفدّاع لى الليل ظُلماتو
آ نجمات .. شقيش قولن لى
ما لاقاك طالِع .. متدلّى ؟
المطيوب من طيبة أُمّاتو
كالفجّاج .. الندّ نباتو
موج البحر اللّحَمَر هوجتو
وعِرق العِرِق .. اللاّوى ثباتو
جانا الشَدر الأخَدَر منو
ونار الشدر الأخَدَر جاتو
فات شِقيش ...
أب قولاً واحِد ..
وليش ما يرجع من غُرباتو
طوّل طُول .. ما طلّ علينا
وقاطِع مِننا جواباتو
الغابات جات تنشِد منو
والعربان راجين جياتو
أديناهم عرقو .. وعَلَقو
صورتو يقلِّب فى كِتْباتو
ضُل رشاشو .. ركيزة زولو
ساعة سِلمو .. ويوم حوباتو
سِن طوريتو ولون أبرولو
حِس طنبورو البى نغماتو
لهْلَب عِشق الناس الفقرا
وبرّد جوفُن .. بى غنواتو
... ويا غنواتو
الدخلت فينا
تمرق .. جينا على جِلاّتو
وجِيداً جينا .. طلقنا وشينا
وش الدنيا الليلة حلاتو
وش أطفالنا الليلة حلاتو
وغنى معانا غنانا هويتو
غنِّى العالم
غنى حياتو
لا ساومنا عليها قضيتو
ولا فكينا من إيدنا .. وَصَاتُو
ألف شليل يا نورة يفوتو
عشان ما يجيك شليلك زاتو









محمد الحسن سالم حميد

سلام يمـى

سنى على النضال ايدى
سوكى بالهتاف فمى
شوارعك لى دويها على
اذا ما آخر العلاج الكى
مراويدك حمر حمى
هردت لهاتى بالغنوات
وقت يبرد حشاك يمى
من التعب البلا صالح
تفيقى تروقى تنجمى
تسوى مكانسك المطره
تضوى البيت وتنحمى
تمرقى صبوحه للجيران
قدح فوق ايد وفى ايد المى
يلاقوك شفع الكتاب
نضاف وظراف بلا النسمى
يغنولك غناوى الساب
وفى بيوضه مافى سراب
جبال كجبى وفيافى الكاب
تميد بالخضرة منقسمى
فيافى الصى وبيوضه
البراسيم فيها مفروضه
خدارا يرارى شوف عينى
على الابواب
قماريها ..طواريها
وحواريها بقت روضه
بقت تشرب من الحامداب
تشوفى رهاب بعد نجمى
واشوفو قريب قرب نضمى
اشوف العالم التحتانى
هيلا هوب واقف ناهض
هد عمائد الفوقانى
جوة الجب رمى العارض
وفى السابو الدمار افراق
عريق الحب نبض قابض
متل قبض الحروف فى اسمى
وغناوينا القبيل رقراق
علينا تصب برد قارص
واجر نمى وادودى لهاتى بالغنوات
عقب يبرد حشاك يمى
وطنى ولا ملى بطنى
سكاتى ولا الكلام النـى
بليلتى ولا ضبايح طى
قليلتى ولاكتر سمى
سلام يمـى
سلام لا هكمى ولا دكمى









عاطف خيرى

اقراك مرة صاح

خلينى اقراك مرة صاح
عكس احتشادك فلى الحضور
هل غاب معاك وعى الطريق
ام بيكة زكانى الزمن؟
ماشيك وعارفك يا حريق
فى يوم غماماتك بجن
فرهد غيابك اغنيات
ظلت اراضى اللقيا بور
وبلقاكى يا كل الطيور
مسجونة والحرية سور
وبلقاكى وبيناتنا الثبات
وبيناتنا شمس البكرة فى لحظة مخاض
طول الوجع رشح مواطن العافية فيك
خلانى ارجع وابتديك
واقراكى من كل الجهات
وما بين اقابلك ومشتهيك
كان حلمك الاول ترف
وكنتى الصبية الغايبة فى زحمة حجا
وكلمة شرف
وكنتى الزوايا الميتة فى متحف خزف
وكنتى الوصايا العشرة واللون الشحيح
سميت مساحاتك حكر
كل البيحلمو بالشمس
هجرت من واقعك عبث
سكنت فيك ضد السكون
كل اللى كان ممكن يكون
طارت ضفيرتك ليل غنا
جدلة صبر.. وطولة نفس
وما بين اقابلك وجيت عليك
كان عندى ليك
بس نحنا والجرح الثرى
وخيبة امل ام الشهيد
فى الكلمة والوجه الجديد
وكان احتقان نبض الزمن
نومة طفل
فوق الدمن
يا صاحية
بالحاصل على
يا نايمة
عن فقرى البليد
سميت منافيك وطن
صارت مناحاتك نشيد









عبد الرحمن مكاوى

جمعنا قدر


تقول لىالفراق مكتوب
وزى اول جمعنا قدر
وترحل يا حبيب العين
تخلى صباحى ليل وسهر
اقاسمك فىالسفر بالروح
سعيد انت وشقانى سفر
لما كتمت دمع الشوق
بكيت من غير دموع اكتر
***
طريتك فى عيون الناس
لما لقيتة محتارة
وفى دروبا مشيتة معاك
وراك فترنى مشوارة
وما اتخيلت جناتك
بتصبح للعيون نارة
نار فرقتنا يا حنين
مجبور قلبى يختارة
***
زمان ما كنت قايلك انا
عبيرك منو تحرمنى
والاقى الليل طويل عمرو
وعمرى الباقى يظلمنى
طريتك قلبى علمتو
عشان انساك علنى
لا كان الفراق منك
ولا يا روحى كان منى










مدنى النخلى

ما بان عليك سفر العمر


ما بان عليك سفر العمر
لسة الربيع يا دابو زار
لسة الضفاف المترعة
بتفيض ندى وتطرح ثمار
وأنا جوة قلبى المشتهيك .. الناس عليك ناداها فال فى
نزفت جراحات الودار .. عيوننا نام إبتهار
جوه العيون أطفال فرح .. لمة زفاف
جوه العيون تشرق شموس .. يرحل جفاف
ندمان بتغرق فى النعيم وحنان غمر عاشقين.. رهاف
وأنا جوه قلبى كل بيت
وأنا جوه قلبى المشتهيك .. نزفت جراحات الودار
يازهرة طالت بالفرح بتاقص أنوار المساء
ما بان عليم أثر القطاف
ولا جاتك أيام القساء
ما اروعك وانت الشباب
بحمرة الريد أكتسى
وانا جوه قلبى المشتهيك
وانا جوه قلبى كل بيت
نزفت جراحات كل بيت








عدل سابقا من قبل أزهرى الحاج البشير في 16th مارس 2011, 11:02 عدل 1 مرات
أزهرى الحاج البشير
أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

مصطفى سيد أحمد .. الأعمال شبه الكاملة Empty الأعمال شبه الكاملة 2

مُساهمة من طرف أزهرى الحاج البشير 16th مارس 2011, 10:59




محمد طه القدال

شيخ تلب


حزينة وجوفك دمدم حزين
حزنت وقلب الحازنك خلى
تعدى الحلم الشفتيهو قديم
وتملا حسارك قلبك ملى
وكل ما هبهب قاصدك نسيم
يلهب جلدك كضباً طلى
فطمت جناك وحضنك رحيم
وحنـّك تب ما صابو البلى
سمعت غناك وصوتك رخيم
شديد اوتارك زايد حلى
عرفت الغم الصارلك نديم
وشفت الكون بى شوفاً جلى
لقيت الكاتلك كافر زنيم
وانت وحيدك قلبك ولى
***
يا شيخ تلـّب انزل كبكب
وارمى الحترب فى الميضنة
فى الباردة تعب لى الحارة تسب
عجمان وعرب فى الميضنة
البس خضرب وادخل قصرب
والحس واشرب فى الميضنة
دى الدنيا تهب شقيش ما تصب
القبلى حرب ..
لى سيدك حب لا تخش ضرب
لى يوسف جب فى الميضنة
دقنا وشنب درويسنا يسوق
تايوتا تكب فى الميضنة
يا شيخ تلب وين الزغلب
الكان تلب
ديل صبحو غرب
ام اضحو جنب
فى الميضنة
انزل كبكب وارمى الحترب
فى الميضنة
***
كبس الحال على
والحال قبض يا سيد
غبناً فيا كج
اوتادو جنبى معيد
مو جنا تجيب
سلسل جنازرو تقيد
بلا غيبوبة البلد
النصيح ونصيد
***
كنا تلاتة ...
ود النوق وديك وعتيد
قلنا نكمل الفرض
العلينا نشيـد
جينا عليكى يا المحبوبة
شوقنا يأيـد
بقينا ضهابة متل زولاً
ضرير وقليد
***
ود النوق دا بكور
العليهو يشفق
بقى يتباطى
فى خبة مشيهو يلفق
ان جاهو العلوق
صيحة نفاقو تنفق
اصبح جدوا كل
ما شافلو سلقة يصفق
- وديك الجن
رفيق همى وغنايا وفنى
سوا طريقو فى نخبة
وصبح متهنى
ما هماهو باسط مية
سكرة ينى
كل ما شافلو زفة
جديدة فوقة يغنى
-.. يا عتيد الرماد
نط الحيط بالزانة
تفضى الخانة
تلقى جنابو سيد الخانة
فارش دارو لى اسيادو
بيت كرخانة
غافل ضبحة الفجرى
وجرى السلخانة
يا حميد اقيف
شوف الخلوق محنانة
كفكف دمعتك
والعبرة فوت خنقانة
عسلك سال بحر
فوقو النحل ونانة
ياد ان طاق غرف
جازاك دباير دانة











حسن ساتى

تراتيل

ليه بتسأل .. ديمة بتامل عيونك
ياعيونى فى عيونك
باقة من ذكراى بتعطر فنونى
باقة من اشراق صباى فيها حبانى النسونى
فيها ليلات الفرح والاماسى الفى السنين
شن اسوى غير اعاين
غير اطيل النظره واتونس و اونس فى العيون
فى العيون الديمة بتفتح عيونى
ده البجنن شوقنا فينا
انو فى عينيك زمان بى حالو ساجد
والفرح الكان بعانق فينا ايام الفرح تلقاهو ساجد
والبراءة الكان بتتوشح طفولتنا وتناهد
والسهر آنسنا فيه الليلة فيها الليلة اتهجد
ساوى فى عينيك معابد ياعيون
مشتاق نعاند فيها تتلون تلونا وتعاند ياعيون
وبرضو تسال وديمة بتامل عيونك ياعيونى
وفى عيونك باقه من ذكراى بتقطر فنونى
حلوة عينيك بى زمانه والزمان الفينا شايلنا ومسافر
مرة ماضى .. ماضى غابر مرة حاضر .. حاضر ومرة باكر
***
فى عيون طفله .. صباح العيد بتملا البيت بشائر ياعيون
المسافر لسة ماحط الرحال قال يشوفكن يلقى نفسو
فى بحوركن .. بحوركن خلى رحلو وقال مهاجر
ساب ديارو وقال مهاجر ذكرياتو وقال مهاجر
وبرضو اسال وديمة بتامل عيونك ياعيونى فى عيونك
باقة من ذكراى بتعطر فنونى باقة من اشراق صباى
فيها حيانى النسونى فيها ليلات الفرح والاماسى بالسنين
غابن وضاعن فى السنين وبرضو بسال وديمة بتامل عيونك











بابكر الدقونى

عـنك احــكـى


عنك احكى وليك بقول
للناس حكاية..
رجعة الامل المسافر
رجعة المسا فى عيونك
رحلة الحب والصبايا
***
عنك التاريخ بقول
عينيك صبحت فى البخاصم
فى مشاوير السفر
والحديث الببدأ منك
فى نهايتو بينتظر
وعدك حذر وابتساماتك مشاكل
لحنك المجروح حكاية السمحة
والحب والقدر..
***
جانى مكتوب غير وصية
دمى من دمك متيم
حزنى شايل من عيونك
يبكى ما فاقد الاسية
***
لما رحلت من عيونك
دمعة الوجد القديم
شب قلبى الجوة عمرك
شب عمرى الجوة قلبك
لما رحلت من سما
سطوك غيوم
جيت مهاجر غير هطول
عنك احكى وليك بقول
للناس حكاية












مصطفى سيد احمد

آخر شعاع


الليلة مات آخر شعاع ..
شفنا هو .. من نور الأمل ..
و وقفت في نص الطريق..
والليل خلا السكة انسدل ..
وسطى رياح ..وعميق جراح..
وأشباح تقول لي ما بتصل..
كيفن تصل وسط الضياع ..
حتى الشعاع منك أفل ...
كيفن تصل ..
والليل طويل .. وعليك تقيل ..
زى الجبل ..
وسحابه حجبت النجوم ..
و كست ظلام كل القِبل ..
في اللحظة ديك شفت الضياع ..
واللوعة في القدر النزل ..
وشعرت بى موجه وجع.. آه
قلبي انصدع..
دمعي انبهل ..
شفت الخيال لوح بعيد ..
عبر الظلام.. صاحبي وجل ..
قال الوداع ..
قال الضياع ..
كيف الوداع ..
بعد الحصل ..
والليلة مات آخر شعاع ..











قاسم ابوزيد

نشوة ريد


نشوة ريد احساس اكليل

وردة وصلك جنة اصلك

نجم الليل الوصل جميل

نحنا مشينا الخطوة الاولى

وانت معاي مشوارنا بيقصر

بكرة بنحكي الشوق للذكرى

نار الريد الغابت تظهر

التربال الساقية افراحوا

عطش النيل لو زاد اطراحوا

نار الشمس بتشفي جراحوا

عرقوا بيسقي سنبلة تكبر

الاطفال يابنية بغنوا

الاطفال يا حلوة بغنوا

الاطفال يافاطمة بغنوا

الافراح لابد من ترجع

الاحلام الدونك فاتت

لو واصلنا صباحا بيطلع











يحي فضل الله

يا بكــرة - مساماتك


مساماتك بتتشقق
عشان تشرق صباحاتك
صباحاتك بتتعانق مع الفكرة
وتأخد من جراحاتك
نضيف احساسنا لي بكرة

يا بكـرة .... يا بكــرة
يا بكرة الغصن ناشف
يا بكرة الفرح يوماتي
بيكاتل حزن اطفال
بتتشابا عشان تعرف
شنو الفي ايدنا لي بكرة
شنو الداخرنو للسكة
عشان تشرق صباحاتك
عشان تقصر مسافاتك
عشان تبرق غماماتك
عشان تخضر مساحاتك
عشان بكرة وبعد بكرة

ولسع عشمنا في بكرة
ويمر بكرة ..
ويبقي املنا
في بكرة وبعد بكرة











يحي فضل الله

غيـابـات الخليـل


بالأمس .. كان غناؤنا عذباً
و كنت تتخذين قافيةً
لها طعم التواصلِ .. و التبادلِ بين قمحٍ و خصوبة
فلماذا تأخذين الآن شكلاً يرتدي لغة الظهيرة
يقتفي ظل الفجيعةِ
تختفي منه العذوبة؟
إنها اللغة التي عمقت فينا التداعي
و غلغلت بين العظامِ
تزامن الوجعِ المعبأ بالضياعِ ... و بالرطوبة
فأخترنا من بين الزحام
خرائط الفرح الملون
بالطبول العازفات مقاطعآ تنمو علي عين الحبيبة
بادرتني هواجسي
فأستعرت من الشوارعِ عظمةً كانت تحدقُ في الحياةِ
و تعتريها الأمنياتْ
و سمعتُ من مدنِ الخرابِ حكاية الآتين منك
يلعقون السمّ
من شفةٍ تدندنُ بالرخيصِ من التباكي .. التشاكي الأغنياتْ
فيا بنتُ المسافةِ والرجوعْ
و يا بنتُ الخريطةِ و الدموعْ
إذهبي مني تمنِّي
و أمنحي القلب التجلِّي
و غادري اللغة التي ظلت تموتْ
أغرزي فيّ الثباتْ
الله يا وجعآ تمدد في العشيةِ و الصباحْ
الله يا حلمآ تناثر بين افواهِ الرياحْ
و يا طفلةً ظلت تفتشُ عن ضفيرتها
تحدقُ في حطامِ الأمسياتْ
سافري
سافري
سافري
سافري فيّ شموسآ و وتر
عمقي جرحي اقترابآ و سفرْ
لأغنيكِ التماسك
أبتغي منكِ الوصول
أمنحي القمح الخصوبة
أمنحيني نفسي دون خوفٍدون همس
وأمنحي المدن الدليل
فيا طفلةً ظلت تفتشُ عن ضفيرتها
بين دمعٍ و رحيلْ
هل يكون الموت نوعآ من تآلف
في غياباتِ الخليلْ ؟











حسن بيومي

عجاج البحر


يراقصني عجاج البحر
ترعد داخلي الامطار
يكلمني تراب الارض
يشدد قلبي الاوتار
اغنيكم .... اغنيكم
اغني جذوة النار التي فيكم
وألعن ذلك البرد المدثر
روحكم برماد موتاكم
اغنيكم
وابني في عيون الشمس
مملكتي تناديكم
نسورا تعشق الترحال
في الافاق تبغي الكون حرية
فان شئتم
تعالوا الان نرقص رقصة البدء
ونعلم ان نمد الكف
نحو الشمس بالدفء
تعالوا ايها الجوعي
تعالوا ايها الفقراء











قاسم ابو زيد

كوني النجمة


قولي الكلمة لصمت الليل ..
وكوني النجمة ..
وامشي معانا الدرب طويل ..
وكوني النجمة ..

وأدي الفرح إمتد مساحة ..
نادي الأمل الجوه عيونا ..
شوق الشوق أتجدد تاني ..
باقي أحلامنا جدار من كونا ..
قولي الكلمة لصمت الليل ..
وكوني النجمة ...
وامشي معانا الدرب طويل ...
وكوني النجمة ...


إيد مبسوطة تقابل الحنة ..
نغم الليل السال شبال ..
نخلة تغازل في عيون طفلة ..
وحفلة ورقصة فال ..
قولي الكلمة لصمت الليل ..
وكوني النجمة ...
وامشي معانا الدرب طويل ..
وكوني النجمة












صلاح حاج سعيد

الرسالة


الرسالة الحلوة ريدك ما بريدك
الخطاب النمقت كلماتوا إيدك
قبل ساعات قبل مدة ..
جاني مرسال المودة ..
ياما شال وقلبي أدى ..
إحتفلت وعمري عدى ..

كل كلمة بتكتبيها ..
يا حلوة إنت تنمقيها ...
تضوي بيها فرح عيونك ...
لوحه زاهية بترسميها ..
قبل ساعات قبل مدة ..
جاني مرسال المودة ..
ياما شلت وقلبي أدى ..
إحتفلت وعمري عدى ..


كل كلمة ندية واحة ...
كل همسه شجية راحه ..
والحقيقة الرائعة إنت ..
شن بدورك صورة بنت ..
شلت رسمك والأناقة ..
إنبهرت وغبت ساعة ..
يا ماهل وعما عيدك ..
ما بريدك وزي ريدك ..
الخطاب النمقت كلماتوا إيدك..
قبل ساعات قبل مد ...











محمد طه القدال

حليوة ليلة المولد


بقول غنوات .. واقول غنوات
فى البلد البسير جنياتها لى قدام ..
بقول غنوات
وفى الولد البتل ضرعاتو فى العرضة
ويطير فى الدارة صقرية ..
ولو السمحة تلت إيد
ومدت جيد يقوم شايلاه هاشمية
يشيل شبالو وختفة ريد وفرحة عيد ..
وريدة روح وحمرة عين وإيدية
بقول غنوات .. بقول غنوات
وفى الولد البشيل مدقاقو قولة خير على القمرة
يقابل الجاية متحزم ويدارك الجاية متلزم
كلام فاسك على أرضك
يبقى عديلة يا بيضا
ويبقى زفاف تزغرد ليه قمرية
و قبال حول تغيم غيمة قبلية
ترش الدارة والحدبة الصعيد الحلة
يا فرحه بتطارد الصفقة فى النسمة الصعيدية
وياجهرة نهار الليلة بدرية
رحيح جنياتنا فى
الحدبة الصعيد الحلة
يا قمحاتنا هو لبلب ...
يا سمحاتنا هو لبلب
و يا اللوز الفتق فى الوادى هو لبلب
ويا البحر الطمح مدادى هو لبلب ..
ويا حجواتنا يا دعواتنا هو لبلب
سألتك بالذى ركز الأرض معبد
وسوى الناس عليها مقام
سألتك بى حجا الأمات ودعواتنا ..
سألتك بى كبيداتن و دمعاتنا
شليل وين راح ..
يكون ضل الخريف فاتنا
وشليل وين راح
وزى برق السماك الجابها دغشية
وزى زغرودة البطن الكبارية
مرق من شامة القمرة
مهيقت بى وداعة الله
ومقدم بالعديل يبرا
تعالوا ابشروا ياجنيات
شليل ما راح .. شليل ما فات
شليل عند المسورو حرق بقالو حصاد
شليل فوق التقانت قام خدار وبلاد
شليل مشوار.. شليل مسدار
شليلنا أرضنا يا جنيات
شليل قائم نصاصي الليل
يتمتم ليلو وردية
حرازنا شليل .. شليلنا دليب
شليلنا دليل على البلدات بعد درب التبلدية
شليل ما راح .. شليل ما فات
مزارع بات على عشقين
تراب بلدو
وسماح فوق بت
مزارعية












بشرى الفاضل

باكر ضوّاى


متخبية والناس شايفنك
باباى ونخيل
متخفية والناس عارفنك
قرآن وإنجيل
وشقانا معاكى .. هو إنـّك
طاويك الليل
لكن واردنك .. وراويانا
لا عيون تحزن .. لا دموع بتسيل
***
يوم بكرة جميل
ضوّاى .. ووسيم
يوم بكرة جميل
باكر .. دافـِر
يوم بكرة جميل
أبداً لا أتغرّب .. لا مسافر
باكر ضوّاى
وجميلتو الليل الما سوّاى
كان حاول يطمس أقمارو
يوم بكرة جميل
أبيض ريحو
من فالو النيل يطمح طوفان
وتخاف من موجو تماسيحو
باكر ضوّاى
كلمات وأناشيد .. وقيامة
باكر ضوّاى
وغناهو الحادى .. الهدّاى
يوم بكرة جم












يحى فضل الله

السحاب


السحاب لو اصلو
خاصمنا ... و تعب
و الرياح الفي الدرب
شتّتتْ فرح القوافي
و بّددت حزن المنافي
مددت بعد المنافى
برضو ريدك فينا باقي
ريدك انتى فينا باقى
في الحنايا ..وفى الزوايا
في عيون أطفال بتكتب بالدوايا
في المشاوير والحكايا
و جّوه ثابت في القلب
***
يا سمحه ما غابت مدينة
يا سمحه ما بموت الفريق
و لابينهش في غناوينا الحريق
و الوتر دايماً بغني ..
للقوافل الجاية من وجع الطريق
***
و السحاب برضو بيعود
ويجينا بي بريق البشارة
بينا بينك لا موانع لا سدود
بيناتنا بس تبقي الجسارة











مدنى النخلى

أملنا الباقى


أملنا الباقى يسرح بى

هاجر لى زمن تانى .. تيقى الدنيا فى عينى ..

هدات موجة فى بحر الأسى الممدود..

رجعت خطوة من درب الضنى المهدود ..

رجعت خطوة من سكة فرح مكبوت

وأفتش ليك ..

أفتش ليك حنان معاى أمانى تصارع المكتوب

عشانك لامسافة تطول ولا تصعب معاك دروب

وقلبى عليك

وأجوب الدنيا و أرجع ليك ..

أجيك فارسا يشق صمت السافة الطال

واقف فى حكاوى الشوق وبى شمسا وراها منال

وبى فرحا يغرد فى سماك اللحان

ويجيب البهجة للأطفال ..











محمد مريخا

كيف انساك


كيف انساك وانت الجرح النازف
منو خريف العتة
خريف المحل المابدارك
رحل الديرة وهج وديرة
فرع الحنة النور حتة
جرحك نيلة وسيرة طويلة
وشافى البلسم ابا يتخته
سبر العاشق كتر الليمة
ولم الشمل الروح شتا
سبر الروح الكلمة الزينة
ونفسا طيب مالى الجتة
غلب الراوى تملى حكاوى
وغلبا زيك ما إتعودت
آهة حزينة وأنة دفينة
تخفف عنى لماما حتى
كيف انساك وليل الشارع
رم ستايرو وقفل الحتة
وبرج الدالى إنشر بدالى
حوش ليك ايامى الستة
يوم الليلة يمر بى صبرو
احلام باكر كيف تتعدى
يا مغلوبة وغالبة زمانك
كيف انساك محال البتة












مصطفى ود.عبد القيوم

مت في قلبي


مت فى قلبى
مت فى قلبى ولم أبكى عليك
فمعين الدمع قد نضب قديما
قبل أن أدنو إليك
إن عقلى اتعجب كيف قلبى فيك يخدع
وتقل لى صرت قلبا من حجر
أنا قد مت قبلا .. وتناثرت بعيدا قبل أوراق الشجر
وتجرعت كؤوس .. وتوسدت قدر
مت فى فدفنت خارج القلب الحجر
ترينى أطهر من أن يدفن فيها الآم القدر
هكذا الغدر أمر
عدت من دفنك وحدى أتألم
وأدارى قلبى المكسور كبرا
أتبسم .. وأغنى للربيع الغض والأشراق بالآمال مفعم
ذبحت كفاك .. قلبى و تقل صرت قلبا من حجر
أنت ظلم .. أنت جور
أنت نور .. أنت جور
أنا إحساس و حب و شروق
أنت للعالم فرحة .. أنا للظلمة نور
سرارة اللعوت تتلاقى يوم الموت












مانديلا


ولمانديلا طليقا سأغنى
فرحة الثوار فى الزمن المصادم
كان سجنك امتدادا للمظالم
كان تعبيراً صريحاً للمآسى
وازدهار الجرح فى زحف المظالم
يابريقاً شاجنت ترنيم صحوك
انفعالات الملاحم
يا خلاصاً أشعلت أطياف عزمك
دهارات المكارم
كنت وعدا باندلاق الفجر
فى كل المعالم
كيف تحسبك الحوائط
يا صباحا مشرئبا ;كى يقاوم
ولمانديلا طليقا سأغنى
فرحة الانسان فى كل العوالم
****
أيها الثائر نحن
لم نكن نراك يوما رضينا
ان نراك العمر مرتهنا سجينا
أو نعيش الدهر دوما خاصعين
للمظالم والغذاء القاصبين
قد رفعنا اليوم فينا
راية الانسان فى كل الأعالى
وفتحنا دورة الازمان
للفجــر المثالــى
وهزمنا بالنضال الحــر
ارجاف الاعادى
ثم عدنا لا نبالى لا نبالى
يطوه السجات او ظلم الليالى
ايها المصلوب فى جرح المآسى البشريه
سوف تحملنا الخيول الامهريه
ذات يوم السباقات الذريه
حيث تمتد الايادى لخلاص البشريه
من زمان الحزن من جرح المآسى العنصريه
حيث انسان الهويه
لابسا صحـو البنفسج
وعميقا كانتصار الحق
فى زمن التوهج
يزرع الآمال ساحات البريه
ويعلى قيمه الانسان
فى كل العوالم











كلمات مصطفى سيد احمد

مد إيدك شيل سلاحك


مد ايدك وشيل سلاحك
لاك إضينة ولاكا خايب
لاكا زول تركة مزلة
لا بفوتوك فى الضكارة
انت شايف ...
غطّت الأحزان ربوعنا
وشتّت الطغيان جموعنا
مافى غير تحمل سلاحك
تحمى ساحك..
وتشفى بى ضراعك جراحك
***
هم أرازل .. ديل أرازل
خانو كل أعراف بلادك
جهزو سلاحهم فى غفلة
إستباحوك فى كرامتك فى أصولك...
قم تقدم .. أصحى من وهدة زهولك
شق طريقك...
لى رفاق الوجعة منتظرين وصولك
فى صفوفهم خانة فاضية
إنت سيدة وطولة طولك
بندقيتك راجية جيتك تحمى قولك ..
شيل سلاحك قبل ما سلاحهم يطولك












محمد محى الدين

المناديل الوضيئة ستأتى


ايها المصلوب كالنجم
على الموجة يكفيك ترجل
ارفض الحزن الذى ما اخترته طوعاً
ستبقى نابضاً تشهد ميلاد الرياح
وانظر الساحة تاتيك تمهل
واغنيات ما علاها الصدأ
المدفون فى قلب الزمان
كلمات رفضت ان يأسر الثاقب
من ايقاعها برد المكان
واهجر العشق الذى ..
لا يشعل الساحة انهار صخب
ما يكون العشق الا ..
فى اتحاد البرق بالارض التى ..
تمنح القبلة فى ليل التعب
ما يضى الحب الا فى عيون
عرفت سر الغضب ..
***
ايها القادم من انفاس
اعماق الحكايات
ومن رمل القرى
المهجورة السوح تجرد
ما يموت النغم
المحفور فى الذكرى
اذا اهتز الوتر
فاشدو بالاغنية الاولى
وفى العشق تفرد
ايها القابض جمر التوق
آلالم الشبابيك تناديك
فلا ترحل
تاتيك المناديل الوضيئة
وعلى كل العيون
فى الليل تمدد
ما يجئ الحب الا فجأة
تهتز كل الدور
ترتاح العصافيرعلى الابواب
يمضى زمن الرعب
وينمو فى العبارات القصور
ينشر الفجر ضياء الامن
فى الساحة
والشط ينادى رائعاً
يلتقى العشاق جهراً
يمتنى الموج ويختال الشروق
فاهجر العشق الذى لا يحتويك
واترك الوعد الذى لا يرتويك(يشتهيك)
وانظر الساحة ليلاً ..
خجلاً يتدفق ..
ايهتز الوتر ؟؟
يحتويك العشق صدقاً
يحتوى نجمك ..
تاتيك المناديل الوضيئة











مدنى يوسف النخلى

واقف براك


واقف براك والهم عصف
ريحاً كسح زهرة صباك
ليلاً فتح .. شرفة وجع
قمراً رحل فارق سماك
***
مطر الحزن عاود هطل
جدد عذاب الأرصفـة
ضى المصابيح البعيد
أتعب عيونك .. وإنطفا
لمتين مواعيدك .. سراب
والريد شقا وحرقة وجفا
***
بعد المشاوير البقت ..
ممدودة فى نبض التعب
بتعود وتلقى رِجاك زول
حفظ الوداد زمناً صعب
والباقى من ليل الهوى
وعطر الصبابة الما أنسكب
والباقى من كل الغنا
وسيل الكتابة الما نضب












عبد الرحيم ابو ذكرى

الرحيل في الليل


أيها الراحل فى الليل وحيا .. ضائعا منفردا

أمس زارتنى بواكير الخريف ..

غسلتنى فى الثلوج .. وبإشراق المروج

أيها الراحل فى الليل وحيدا

حين زارتنى بواكير الخريف

كان طيفى جامدا وجبينى باردا

و سكوتى رابضا فوق البيوت الخشبية

مخيفا حيرته فى الشجن .. وغروب الأنجم .. وانحسار البصر

لوحت لى ساعة حين انصرفنا .. ثم عادت لى بواكير الخريف

حين عادت وثب الريح على أشرعتى المنفعلة

سطعت شمس الفراديس على اروقتى المنعزلة

ومضت تحتضننى الشمس الندية والتى ما حفنتنى فى الزمان الأول

فى الومان الغائب المرتحل

أيها الراحل فى الليل وحيدا موغلا منفردا

إنتظرنى ..إنتظرنى

فأنا أرحل فى الليل وحيدا ضائعا منفردا

فى الدهاليز الغصيات إنتظرنى فى العتامير وفى البحر .. إنتظزنى .. أنتظرنى

فى حفيف الأجنحة والماوات الطيور النازحة

حين تنهد المزارات و تسود سماء البارحة.. إنتظرنى .. إنتظرنى












صلاح حاج سعيد

عزه هوانا


ياجرح عزة هوانا

الساكنة فى حرف الكتابة

أصلو فى .. زمان الأسى المشدود

على وتر الكآبة

فى زمان الحرقة .. والخوف ..والرتابة

إنكتم نبض الأغانى

وإنبهم حس المعانى

وإنجرح خاطر المهابة


جيتنى فى الزمن الأليم

قلبى مثخن بى جراحات الهوى

عمرى ضايع فى متاهات النعيم

فى دروب الغربة .. لا تاب .. لا قِوى

كان عيونك فيهن الوصف القديم

معنى فى الحب .. إنطوى

وضاع معاك زمن الوسامة

وإختفى الفرح العلامة

لسة يا حزن الملامة

من سنين دربك .. سلامة












كلمات مصطفى سيداحمد

بين سجن وبيت اشباح


بين سجن وبيت اشباح
وعطالة ودم مباح
ومزلة تودى الغربة
والغربة جراحة جراح
والحل فى بلدك زاتة
تتحدى سلاح بسلاح
تهزم خفاش العتمة
ويغسل سودانا صباح
***
الخمج الماحق سوقنا
من بعض وفا المحتاج
والعبرة الرابطة حلوقنا
من فيض كاس الدجال
الوهم الداير يسوقنا
اصبح مفضوح الحال
ما فضل الا مروقنا
وبسلاحنا نعدل الحال
بسلاحنا نعدل المال
***
يا غضبة نيلنا الطامح
وكتين يكسح طوفان
يا سيل الشعب الجامح
فى الثورة بعد عصيان
يا ضراع الولد الجارح
بسلاحك فى المليان
الكى للالم الناتح
والعبرة لكل غبيان












محمد المهدي عبد الوهاب

اخوان الانسانية


مابين زمناً متمنيهو

وزمناً منك .. زادنى أسيـّة

طفت الدنيا عشان .. أنساكِ

وأنسى الحزن الطارد .. ليـّا

كان البحر الما خـلاّنى .. أعيش فرّادى

كانوا أخوان فى الإنسانية

قعدت معاهم .. وإتفاكرنا

كم لفـّينا .. وكم سافرنا

وكم مازحنا ليالى الصيف

كم غنينا لى الحرية

كم دارينا الحزن الأكبر

بين الصيف .. وجمال المنظر

***

كنتِ بتطلعى من عينيهم

وكتين يفرحوا .. أو يندهشوا

أو يفترشوا سواعد بعض

أو يتكلموا عن الأرض .. وسلام العالم

وكنت غريب الوجهِ .. معذب

***

ما أحلاهم ..

شالوا معاى الهم بى الجملة

.. وهتفوا .. البحر .. البحر

جوة المركب .. فِضلوا يغنوا .. يغنوا

شوية .. شوية ..

وسكتْ المركب

كل الناس إتنين .. إتنين

فرح إتكلم بى لغتين

... كنت برايا

وجانى حنين الكون .. إتكوّم

غوّر .. غوّر .. جوة فى صدرى

وإتمنيت لو كنتى .. معايا












قاسم ابو زيد

ادفقي


إدفقى ما تبقى رقراق

أبقى يا ضُل .. يا شموس

غطى المساحات بالوضوح

إستنهضى الشوق .. الجروس

وهجك شوارع ذاتى

فى ليل اليباب

ما تشفقى العطش .. الرحيل

النيل ركيزة

ودمعة الأحباب سِحاب

ما تخافى من دم الغروب

لو رتّش الّلوحة الضباب

مادام ضمير الفينا .. حى

مادام عِريق العِشق .. حى

ملحوقة يا مدن السراب

نديانة بى فرح التساب

***

أدفقى فيضان عمار

أتربعى .. وفجّى الوجع

دمع الألم .. ما يدفّقك

ما خاب غناك

فارسك رجع

إتوهجى وإنتى الشمس

إتلهجى نورك سطع

نوّر بوادينا الكساح

رقصت مزامير الصباح

مبكية قرية وقنبلة

متكية دمعة .. وسنبلة

الليلة فى إيدنا السلاح

ريشة وكدنكة .. ومطرقة

نبنيكى أحسن يا ظروف

مخضرة .. دانية القطوف

نطوى المسافات .. نسبقا

***

أدّفقى بلدك فِداك

إتوهطى

ورّى البنيات العديل

محمية بى عرق الترابلة

ونغمتك مسقية بى الريد العتيق

أنغام رباباتك تشيل

معزوفة الليل .. والرفيق

ما تصغرى

تكبر أمانى السنبلة

هَىْ أكبرى

تصغر معانى القنبلة

ما ترجعى الصد لى المداين .. والقرى

شيلى الشحوب والإصفرار

أدى البويتات منظرا

إدفقى فى كل شارع .. وكل بيت

فى روابينا المحنّة

وفى ضمايرنا السهول

إدفقى

فى كل حتة .. وكل زول

أبقى .. شان تحيا الفصول











قاسم ابو زيد

زي ما يكون


زي ما يكون
على عمقك
مشيت متلفِّحك .. خاطر
برغم ذبول نجيماتك
سماك معقول
وشارع الشوق ..
بدونك .. تمْ
بحِسْ بى القول .. على حدّ السيوف مجدول
ورغم الفات
ورغم الحاصِل المسلول
فوق عمقك قدل جوّاى
على لقيا .. وبياض خاطر
وزى مايكون

*****

وعلى عمقك
مشيت متلفّحك .. خاطر
لا الشبورة .. لا ريحة الدُعاش
مشبوبة بى ندّكْ
.. صبابة وصوت
ولا برقت شموس منّك
ولا دخلت شموس فينى
ولا أظنّك بتدّى شموس
ويطلع من عيونك ضو
ولا لِمِس الجفاف خدّك
ولا ركّ الندى المحروق
فراشات فى شذاك .. دخان
شعاعات من بريق لحظك
فهل يرجع زمن جيتك
حضور تانى ؟

*******
على ذكراك أمل ممتد
أنا وإنت .. وهدير الكون
على لقيا .. وبياض خاطر

******
وعلى عمقك .. مشيت
متلفّحك خاطر
ولا عند المغيب وجّت غصون شجرك
ولا لمـّة فرح .. بتلم
ولا الرقدة .. التعب بتجم
ولا زِيف العِشِق مفضوح
ولا الصمت القبيل .. مفتوح
ولا الفرح البِتِم القول
صدى الغنوات ... يرقِّص حول
ولا وجّت رياض أطفال
ولا الموّال
مركّب بى نسيج الجيـّة
بى أنغام طبول شدوك
عشان أضحى الفرح مسحور
وإيقاع الرقيص .. مكسور

******
نسيب البلد ... ينجَمْ
نطوى الشوق منام
نتوسد الأحلام
على هبـّة نسيم باكر
لأننا نحن متواعدين
ومن جوّة الضجيج طالعين
بصوت واحد
لأننا نحن متواعدين
على لقيا وبياض خاطر
وزى ما يكون











محمد طه القدال

سمحة و سمرية


سمحة وسمرية
محبوبتى ولفتاتا غزالة
خضرة ومسقية
وجنب النيل مشتولة النالة
بهواك يا بنيـّـة كتبتو قصيد
وبقولو مقالة
بتفتحى فيـّـا معانى غناى
تديلا مجالا
*****
زهرة وبرية
بشوق الأرض عيونا كُحالة
تريانة ندية
بعرق الناس
والناس فى بالا
يا خوفا علىّ عقل وثبات
ماها الولوالة
*****
من فرحى البيا
قلعت الخوف وكستنى بسالة
قت ليها النية متين نتلم
والحال بطالة
قالت لى غنية وإنت معاى
مستورة الحالة
بت سودانية
محبوبتى ولفتاتا غزالة












مصطفى سيد احمد

بسيمة ضو


رسمت بى وجيها بسيمة ضو

بتغالط فى الزمن القاسى

بتعاتب فى الغنوة الصعبة

واللحن حزين

ووتر موجوع تحت إحساسى

تسأل عن مغنى الأفراح

يمكن لى جراحنا يكون .. آسى

ما بشبع روحنا فرح زايف

لو كان نتناسى .. وتتناسى



يا بت يا نيل

العاشقك .. عاشق كل الفيك

غنايك فى كل ظروفك

فى الفرح البشرق وعد .. وفال

فى الحزن الودّر ضى شوفِك

فى سجون القهرك .. فى خوفك

فى النبض الصامد .. فى البركان

السامعو يدمدم فى جوفك



جرّحنا عتابك .. يا باكية

عايزانا نغنى غنا الأفراح

ما الغنوة الناشفة .. لبن ضرعك

والفرح الفيك .. خلاّنا وراح

ولقينا فرحنا ــ وإنتى حزينة ــ

بكون أشتر ويزيدنا جراح

خلينا من الفرح الزايف

بتعود أفراحنا ونلقى .. سراح












سيف الدين محمد صالح

سر مكتوم


ياسر مكتوم فى جـوف أصداف
فـتـشـت عليك بقـليب نزّاف
لا خـبـيـر يـهـدى ... لا دليل وصّاف
***
ياسر مكتوم فى جوف أصداف
راجـياها الريح ... وكتين ما تطــل
على موجة تمرجح زهرة فـــل
وتشيلا تروح ... والدنيا تنوح
على قمراً مات فى مطر الليل
يتّم نجمات بكاها السيل
***
يا سر مكتوم فى جوف أصداف
الريح القاسية عنيدة .. تمام
طـفــت الـقـنديل .. الكان مـقـدوح من دمع الليل
رمت القُـنديل الكان نديان فى جــرف النيل
رسمت أحزان .. وسؤال حيران .. فى عيون أيتام
***
يا عمر مرسوم فى كف أقدار
يا خطايا الطال بيها .. المشوار
ياليل مشتاق لى دفقة نور
ياظلمة تبكى .. حتى البلور
ياموجة تعاند فى التيار
يا خطايا الطال بيها المشوار











حافظ عباس

مع الطيور


والله نحنّ مع الطيور..

الما بتعرف ليها خرطة

ولا فى إيدا جواز سفر

نمشى فى كل المدائن

نبنى عشنا بالغناوى

.. وننثر الأفراح .. درر

والربيع يسكن جوارنا

والسنابل تملا دارنا

والرياحين .. والمطر

*********

والحبيبة تغنى لينا

لا هموم تسكن دروبنا

.. ولا يلاقينا الخطر

*********

إلاّ باكر يا حليوة

لمـّا أولادنا السمر

يبقوا أفراحنا البنمسح بيها .. أحزان الزمن

نمشى فى كل الدروب الواسعة .. ديك

والرواكيب الصغيرة .. تبقى أكبر من مدن

إيدى فى إيدك نغنى

والله نحنّ .. مع الطيور

الما بتعرف ليها خرطة

ولا فى إيدا جواز سفر












أزهري محمد علي

جفاف


حتى الفصول صابة الجفاف
لا غيمة لا زفة هرع
والسمبر البفرح صفيرو
غشانا واتقاطر رجع
وشجرنا من لفح السموم
غصنو الرقص رويان وقع
لا شابا لى ريح الدعاش
لا هش لى برقا لمع
***
انت الخريف يرسم معالم
الخضرة والخير والعشم
انت الربيع يغزل شباك
الريدة يا روح الطعم
اتعب بيادرنا الجفاف
والخضرة لفاها العدم
ابسم عليك احلى الكلام
خلى المواسم تبتسم











صلاح حاج سعيد

عارفنى منك


يبقى بعدك في الأسى ...
وتبقى أنت الظالم القاسي النسى ...
وغصب عني أزيح ظنوني ...
وأقول عليك أنت المسامح ...
وفوق شجوني أعيش زمان بالفرقة جارح ...
عارفني منك ...

لا الزمن بقدر يحول قلبي عنك ...
لا المسافة ولا الخيال يشغلني منك ...
تحرمني منك ...
لا الزمن بقدر يحول قلبي عنك ...
لا المسافة ولا الخيال يشغلني منك ...
تحرمني منك ..

المواعيد لا بتجيب منك تودي ...
لا رسالة تجبني منك ...
لا خبر طمني عنك ...
وأنت سايق فيني ظنك ...
رغم إنك أنت عارف إنو منك ...
لا الزمن بقدر يحول قلبي عنك ...

يا هوى الشجن الأليم ...
خليتني في الألم النعيم ...
وأبقي في كل المدائن ...
سكتي وسفري الجحيم ...
وأنت سايق فيني ظنك ...
رغم إنك إنت عارف إنو منك ...
لا الزمن بقدر يحول قلبي عنك ...
لا المسافة ولا الخيال يبعدني عنك ...











عمر الطيب الدوش

سحابات الهموم


سحابات الهموم يا ليل ...
بكن بين السكات والقول ...
وباقات النجوم ...
الجن يعزن في المطر ...
فاتن عزاك رجعن ...
وشوق رؤياك زمان مشدود ...
وصوت ذكراك ...
مكان يجرى يلاقي السيل ...
وسر مدفون بصدر النيل ...
ولولا الذكرى ما في أسف ...
ولا كان التجني وقف ...
وصوت ذكراك رزاز صفق ...
على خطوات بنات سجعن ...
وشوق رؤياك حنين لي رحلة في المجهول ...
لولا الذكرى ما في وصول ...
ولولا الذكرى ما في شجن ...



عدل سابقا من قبل أزهرى الحاج البشير في 16th مارس 2011, 11:27 عدل 1 مرات
أزهرى الحاج البشير
أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

مصطفى سيد أحمد .. الأعمال شبه الكاملة Empty الأعمال شبه الكاملة 3

مُساهمة من طرف أزهرى الحاج البشير 16th مارس 2011, 11:07

الفرجونى

الحاج ود عجبنا


عمنا الحاج ود عجبنا ...
في الفريق ياهو الركيز ...
هو البشيل حمل الرباعة ...
عندو كلمة على الجماعة ...
في الفريق باقيلينا آية ...
للضعيف تلقاهو ساند ...
ويقهر الكعب المعاند ...
للضيوف ديوانو فاتح ...
ديل يقوموا وديل يدخلوا ...
يا ولد جيب الرتاين ...
جيهوا الديوان فراشو ...
وأفرشوا الفرشة الكبيرة ...
والأباريق والتباريق ...
وأضبحوا الحمل المدوعل ...
********************
*********************
عمنا الحاج ود عجبنا ...
من سنين أيام جهلتو ...
ديمة في دعوة صلاتو ...
بسأل المولى السلامة ...
وسترة الحال والكرامة ...
وعمنا الحاج ود عجبنا ...
في ليلة من ذات الليالي ...
في زمن حظر التجول ...
جاهو ضيف فوق راس حداشر ...
رحب الحاج بيهو جداً ...
فرشولو ونزلوه ...
وكاسو للعشا ما تلقالو ...
ما الرغيف ممحوق مقصر ...
والبلد في حال معسر ...
وعمنا الحاج فيما بالو ...
وجبة الضيف زي فريضة ...
وهسي ضاقت بي العريضة ...
وضيفوا كيف إترك عشاهو ...
********************
*********************
وجاتلو فكرة ...
يمشى للفرن المجاور ...
للجان العيش يشاور ...
بس عشا الضيف يا جماعة ...
ضيفي نازل ليهو ساعة ...
شاكلوه ... ودفروه ... ونهرهوه ...
وجاتو دورية الطوري ...
وأمسى بايت في الحراسة ...
********************
*********************
وناسو جنو للصباح ما عرفوا حاجة ...
وين ده روح ؟؟؟
وجاهن الخبر المؤكد ...
ود عجبنا في الحراسة ...
ماشى دورية الطواري ...
ناسو ... أولادو ... وبناتو ...
راحوا دورين محكمة الطواري ...
فيها في نص الخلايق ...
شافو حالاً ما هو لايق ...
عمنا الحاج بي جلالو ...
فوقوا حس السوط يولول ...
فوق قفاهو ... فوق ذنودو ...
فوق رجولوا ...
ومره فوق فججاً حشايل ...
أصلو ما قيل بهوناً ...
حتى كان نزان عجايب ...
إلا لكن الليالي هي البترخص كل غالي ...
********************
حاكموا الولد المنصب ...
كتفوا بالدبور مقصب ...
أنت يا حاج يا مخالف ...
زول مخرف وعقولوا تالف ...
أنت يا زول ما كا داري ...
زلة الناس في الطوارئ ...
أ جلدوه ... غرموه ...
ونفذوا الحكم البهينوا ...
شان يفتح تاني عينو ...
********************
*********************
تسمع الصوت صيحتو داوية ...
تسمع السوط ليهو خاوية ...
فوق قفة الشيخ صيحتوا داوية ...
وفجأة رفع الحاج عيونو ...
شاف بنات ولدو وبناتو ...
كلهن واقفات يعاينن ...
دمعتين في العين ترقرق ...
والحزن بينن مفرق ...
ده النجوم الفي سماهن ...
ده الزمان الكان حماهن ...
كل سوط نازل عليهو ...
من شعاع الضو عماهن ...
عمك الحاج دمعوا سرف ...
سيلوا فوق اشنابو سرب ...
تمه حكموا وراح بيوتو ...
نفسوا مكسورة وذليلة ...
كيف ملاقاة الحليلة ...
وصحوة الروح العليلة ...
في البيوت الجوه غادي ...
عمك الحاج ما إعتيادي ...
فوقو متلمين جماعتو ...
والسكيلي ضرب حزايني ...
قالوا ناداهو المنادي ...
فارق الدنيا المسيئة ...
يقطع الزلة وسنينها ...
فوق فراش حاج ود عجبنا ...
بسمع الزول البوصي ...
أقفلوا الحوش يا جماعة ...
وطفوا أنوار الرتاين ...
داك حرس حظر التجول ...
من بعيد ليكم بعاين ...
يا زمن حظر التجول ...
يا زمن حظر التجول ...











مصطفي سيد أحمد

عشم باكر


في عينيك عشم باكر ..
ما إنــت العـــمر كلــــــــه ... والشـمـس الـوشـاحـة ورود
وزغـرودة بـتـزف للناس ... خـبـر زمنــاً جــديد مـولـود
لقيت غيرك بضيع إسمي ... وأكون أنا حي وزي مفقـود
وفي عينيك عشم باكر ..


لاقيني يا عشقي الخرافي ... لاقـيـنـي قـبــال الـزوال ..
لاقيني في كل المـرافئ …
دقات ربيع وفرح قوافي ..
وإنشرى في حزن السنابل ... غيمة يا كل المشاعر ..
وأمـشـي قـبـال الـصـبـاح ... وزعي الطل للأزاهر

لاقيني يا شوقي الخرافي ... لاقيني قبال الزوال
غنوة من أزمان بعيدة ... طالعة من زمن الرميدة
تلقيني راجيك بالآماسي ...
في المراسي والملمات الغفيرة ..














يحى فضل الله

يا خطوتــك


لا زمن حبك حقيقة
لا تعب زمنك فرح
لا دغش وترك صدح
لا بعد ليلك صبح
......
يا خطوتك ... يا خطوتك
يا خطوة الوجع الجرح
لا الفيها منك ابتدى
لا البيها منك انتهى
.......
يا خطوتك يا خطوتك
يا خطوة ضاعت
بين صراخك والصدى
بين المسافات والنوى
بينك وبين كل المشاعر
الفينا غرقت فى الغنا
........
يا خطوتك يا خطوتك
يا خطوتك داست على
الحرف اليبس فوق الشفاه
داست على البوح والكلام
داست عليك
على انتظارك والملام
داست عليك
على الدروب الماشة منك
وجاية ليك
لا فتر فيها الولف
لا سكت فيها الحرف
......
يا خطوتك .. يا خطوتك
بين ابتعادك وانتظارى
بين مشاوير طفلة ضاعت
بين عيونك وافتكارى
يا عيونك وافتكارى
يا عيونك وافتكارى














مدني يوسف النخلي

إحساس بالأمل


أديني إحساس بالأمل ..
في كل رحلة شوق تطول
وأدي الخطاوي الراجعة ليك ..
في سكتك عشم الوصول
ما الدنيا كلها إرتحال …
والإنتظار قدر الوصول ..
الموجة تحلم بالضفاف …
والغيمة تحلم بالهطول ..

راحل معاي ضي الأماني ...
وذكري للأيام هناك ..
لحظات بتذخر بالمعاني ..
وكيف أنسى تذكارات هواك ..
نتحمل الغربة ونعاني ...
ونصبر عشان نكسب رضاك ...
ونغني لو زاد الحنين ...
ياريتو كان سفراً معاك ..














عبد الوهاب هلاوي

الملام


لو منى مستنى الملام

يا سلام عليك يا سلام

يا حلو دة السكوت مرات كلام

وعدم الملام هو كمان ملام

يا سلام عليك يا سلام

**********

انا يا غرامى وصلت بيك

فى الدنيا لى حد الغرام

ولقيت ملامى على عينيك

يا سيدى زى الما ملام

يا سلام عليك يا سلام

***********

الورد لو فات الفراش

ما اظن تلومو مع الندى

ما بتجرح احساسو الجميل

والريدة يا حنين كدة

يا سلام عليك يا سلام













هاشـــــــــــــــــــم صديق

حاجه فيــــــــــــــــــــــــك


حاجه فيــــــــــــــــــــــــــــــــــك
تقطع نفس خيل القصائد
تشده اجراس المعابد
توهتني .. تعبتني .. جننتني
جننت حرف الكلام
وبرضو ادتني السلام

حاجه في شرف المداين
وفي غرف كل السفاين
جوه في عمق المناجم والعيون

حاجه زي ما تكون محلق في العواصف
فجأة تهبط في السكون
حاجة زي نقر الاصابع
لما ترتاح للموسيقي
حاجه زي اخبار تناغم من جريدة
حاجه زي وتر الموانئ
لما يصدح لي سفينة
حاجه فيـــــــــــــك لا بتنتـــــــــــــــــــــدئ
لا بتنتـــــــــــــــــــــــــهي
خلتني ارجع للقلم
واتحدي بالحرف الالم
واضحك مع الزمن العريض
وانسف متاريس الطريق
واعرف متين ابقي المطر
وافهم متين اصبـــــــــــــــح حــــــــــــــــــــــــــــــــــــــــريق














خطاب حسن احمد

البت الحديقة


حتجي البت الحديقة
فارده انسام في طريقها
وشايلة ألوان
حتجي البحدث بريقها
ضجه الضوء في المكان
حتجى المن بدري جات
من ضلامات السكات
شايله قمرين في عيونا
وفاتحه ليلين بي جنونا
وضاوية ساحات انتمت لي فجر فات
وتنتمي لعصور جديده
حتجى البت البريده
ضاحكه منتصره وعنيده
آمله مزدهرة وجديده
وناقشه في الزول أغنيات
حتجى المن بدري جات
ناسفة أزمان السبات
واصفه للناس الطريقه
وللعصفاير الجهات














خطاب حسن أحمد

الوجد الملح


جلبت ليك من بلادالله البعيدة

صنوف من الوجد .. المُلِحْ

قلت ألقاك فى السّمح

كنت بصطاد فى الظهيرة

من مناقير الكنار

بوصل السكك .. الأغانى

ومن ثُرى الليل القصيّة

أنتشل عطر الأمانى

ولو ألاقى اللون .. أدسّو

لمّا يغرس فينى حِسّو

لى ملاقاتك .. هدية

وأفقد الرعشة المعبّية .. فى إيديا

جلبت ليك













عــاطــف خيــري

الجـــــــالوص


معتوقة ومعتقة ومنعتقة
نوافير إنتشى وحشمة
وحمار العين
تضحك كلما وقعت مصيبة
تمشى على العجين و تلخبطو
ترطن إذا جاها الحنين
يا بت بيوت الهجعة كيف
غبار شوارعك ماشى وين
زقاق يعيش فى زقاق
كتمة وظلمة وإنعتاق
أنا فيك لامونى المساجين
سكاتك عليهم منازل حلال الحرام
سكاتك على حين أهش الحمام
سكاتك عليك لما تصحى المسام
سكاتك عليهم سكوت و السلام
صوتك وقت قطع البحر قبال مراكب العمدة
ضهر النيل عرق
و الشمس فوق حبل الغيوم
شرت جلاليب النعاس
ناشف غرب مبلول شرق
و المطرة زى شفع العيد
تدخل غرف كل البيوت
حكمة الجوع الشرح للأرضة
كيف تقرأ المرق وقبال يقع
فوقك سقف
إتنحنح الجالوص
أمرق على مهلك
مروق الحنة من ضفر العروس
واصعد على مهلك
صعود البذرة والروح والشموس
مبنية مدن الخوف
من طينة آخر الليل
وانا فى سقالة الشوف
قدح البصيرة تقيل
فاتح زريبة الجوف
تمرق تخش الخيل
على كيفك كيف معلوف
ضهر المظنة يشيل
وانا ظنى ظنيتو للنيل
غريق فى النيل
و الليل ولافى بالو ليل
ساكت يغنوا على القمره
واجعنى فى البحر السكات
سكتنى فى الوجع البحر
يا بت صباح الطير
وين البلد ركت
ما عاد هواك يفتح فى الكتمة
شباك النزيف
وين تكيتك فى الغيمة شطيف النجوم
ريف الجسد صدرك سبلوقة اللبن الخريف
داسينى فيك نضر
والأنبياء فاتوا
والأنبياءء بين بين
قاعدين فى ضل النار
داسينى فيك نضر
فى غفلة جو الكفار
وطارت حمامة الغار
لاقونى ناشف ومر
ماذنب جاد الطار
لو غنو بيهو شتر
ما تخافى الله معاك
وكل الملائكة سمر














أزهري محمد علي

أبداكى من ويــن


أبداكى من وين وفينى منك لسة حاجات
من مخاوف و من شجن
أبداك من وين وظنى إنك فكرة إعلان الحيـاة
وانتهاء العوارض والمحن
نفسى ألقاك
وأكون كلى من بعضك
أو بعضى من كلك بدن
داير ألقاك وأوحد دايرة الدم
المسمة بينى بينك والشجن
أبداك من وين
ولا منك أبتديك محل محل
من ياتو منفذ بدخلك
كل المنافذ الفيك سداها المحل
من ياتو شارع بوصلك
كل الدروب معطونة لآخر الوحل
بستبيح كل الشوارع وادخلك
نتلاقى نهدين من تسامى وإشتهى
أبداك من حيث انتهت
عندك خواطر الإنتهاء
من أى قاسم مشترك
أو شبه التشابه بدخلك
أبداك من وين













صلاح حاج سعيد

صفوة عاشقيك


قلت ليها ..
إيدي في إيديها ..
دمعة حزن سالت ..
جاي منك وماشي ليك ..
يا مداين غربة طالت ..
لو مدارات نجمي ضلت ..
سكة السفر إستحالت ...
كوني في دربي الحقيقة ..
الدايمة ليها مشاعري مالت ..
D D D D D
قلت ليها ..
وكنت راجع لي عينيها ..
من أسى الزمن المسافر ..
في المشاوير العصيبه ..
من متاهات الأماسي ..
من متاهات الحزن ..
مضمناها وحبيبه ..
بيني لا بينك مسار ..
لا محطات إنتظار ..
لا مواعيد قريبة ..
إنتي يا الفرح الحقيقي ..
المستحيل ...
هدهدي الصبر الجميل ...
وأمسحي الألم المخيم ..
في مدارات الرحيل ...
D D D D D
قلت ليها ..
الحقيقة الضائعة ..
بين قلبي وعيونك ..
إني لا قادر أفوتك ..
لا أجيك ..
وإني عارف بدونك ..
أبقى كلمة حب تزف ..
البشرى في ساعة مجيك ..
وإنت عارفة ..
ياني أكثر زول بريدك ..
ياني صفوة عاشقيك ..
ياني أكثر زول بحبك ..
ولسه بحبك متيم ومبتلى ..
وريدك زادني حيرة على العلي ..
لا مراكب القدرة خبت قلبي عنك ..
وإنت لا قلبك نساني ..
ولا خلاني ..
وقلت ليها ..














قاسم ابو زيد

سافِر


سافر ..

مطارات الوداع ضجت قدامك .. وراك بيضا

وسماك غنـّاى

مساحات الأسى الفى عيونّا

تتفجر مدينة وناى

بطاقات دعوة الرجعة .. تساب عينين من الفرحة

دموع للحاضرين فجت

زغاريد غطت الدنيا

وعاد .. فرح الرجوع منية

صداك الريح .. ومتل السنبل الغناى

........

كتير بنعاتب الحاضر

ولا أسفاً على الماضى

صدق الرؤية من قلبك .. بين الشوف وإنسانك

نغم فنان يعيش راضى

مداك إتعدى حد الشوف

دخلت على الشعر .. إنسان

وهواك .. إتختّ جوة الجوف

وإنتحر النهار .. هسـّة

نغنيك لى مدن .. شاخت

معاك أحلامى .. ما تنسى

تغنيك القرى الراحت

خلاص يا غربة .. ما ترسى

غنيناك .. وبنغنى

وبتحدى الزمن .. فنان ..













محمد الحسن سالم حميد


طيبة


كل ما تباعد بينا عوارض

كل ما هواك يا طيبة مكنِّى

تلد الغربة .. الكُربة الواحِد

بيكى أسمى الشوق .. وأكنـِّى



............

لمـّا أفوتك من دون خاطر

أو دون خاطر منى تفوتى

بلقى حبايب فى كل حِتـّة

وكل بيوت الفُقرا .. بيوتى

لا غيرت وراك الجِتـّة .. لا بدلت ملامح صوتى

لا غافلنى وهادن فنى .. غام لى المدن .. الما عِرفتنى

إبن الشوق الصبرو .. مصوبر

للأرياف الكم .. وفّتنى

وللأطفال الناشفة ضلوعا .. ونازفة بغنى

أطمن روعا .. وأهتـّى دموعا

ببسمة بكرة اللاّها تمنى .. ولا مصنوعة



.....................

أغنى لشعبى ومين يمنعنى

أغنى لقلبى .. إذا لوّعنى

مخيـّر دربى الما رجعنى

إذا طلعنى نخلة القرب .. أو الغربة الكدروبية

تنزل غنوتى بى قمرية

أو وقـّعنى فى بطن الجـُّبْ

بطلع يوسف بالأغنية

أغنى الناس الما بتسمعنى

المِنِّى بعيدة .. ومبعدة عنى

النادا نشيدا .. وكنت المعنى

الإيدى فى إيدا .. وإيدا بتبنى

فى دنيا جديدة اليوم .. راح تدنى

وأريت غنواتى فى ناس شغالة

تكون سُندالة .. وعود طورية

ضراع رجالة .. كتاب أطفالا

وجملة بالا .. الما مكرية

سدّة مالا .. وبقـّة فالا

فى ليلة الدخلة على أسمى قضية



.............

حبيبة قلبى يا سودانية

يا أسمى معانى فى زول بيعانى

ياود ضكران .. ويابتْ دغرية

وأنا إنْ سامعانى فضـّلت أغانى غُـبش .. فقرية

وروح غانيانى

حويتك منك يادافعانى براحة إيديا

ويا جابدانى ... برفق عليا

وما بتحيـّر بين الفوق .. وبين الناس التحتانية

إلاّ مغـيـّر .. ولاّ عقُوق .. ولاّ كفيف الإنسانية

ومنـِّك وين يا كاشفة عينيا

بنور الإلفة .. ضِيا الحنية

وحِلم العالم .. ناس تتسالم

والبنى آدم صافى النية

والأطفال الناشفة ضلوعا

يطمِّن روعا

وتبدى تغنى

غناوى البكرة .. الكم مسموعة

حسيس طنبارة .. مع نـُقارة

صفِقتاً حارة .. ودارة تغنى

فيا حلتنا عليكى تـُرابك ..

وإنتى شبابك زينة الجَنـِّى

أحلى عروس البلد اللّتنا

ولاّ الغُبُش الرّابّة تهنى

ولاّ هدير المدن التصحا ..

وتمحى ظلام الحاصل .. عنـّى













محمد الحسن سالم حميد

نورا


وكتين يضيع عرق الجباه الشُّم

شمار فى مرقة .. آه .. يا نورة آه

من دربك التوّر نفس خيل الصبر

فتـّر خطاوى الشوق وراه .. يانورة .. آه

ساعة الشموس الغُر تهضلم

تلحق الصِّح .. فى المغارب

يستر الضو الكهارب

تستر المدن السرابية .. الضبابية الكآبة

حائط التيه .. والطشاشات .. فوق قفيِّك

يا أمْ عوارض...

يا أمْ عوارض .. ما دُعاشة

ماها شبـُّورة وتقيف .. جايى ليك يا نورة غيمة

تملا ماعونِك خريف

يملا عينيكى ويفضـِّل

يروى جوّاك العطاشا

*****

يا نفس فجر القصايد يا بلادى

القطع قلب الروادى .. بى اللّواج الجاى .. وغادى

ماهو صوتك .. لاها صورتك

دى البترقش نادى فوق صدر الجرايد

إنتى يا حُضن الصحارى

شُفّع العرب الفتارى

البفنـّوا الشايلا إيدمْ

ويجروا كايسين القطارى

لا سراب الصحرا .. موية

ولا حُجار سلّوم .. موائد

حالكم البصرخ وينادى

ياوطن عز الشدائد

*****

يا هُدى الناس الحيارى

يا ندى الفجر الببلِّل نور عِوينات الفقارى

جايى ليك يا نورة

آفة .. للسوس البنقـِّر

عود عِشيماً داخرو فيك

أصلى لمـّن أدور أجيك .. بجيك

لا بتعجّزنى المسافة

ولا بقيف بيناتنا عارض

لا الظروف تمسك فى إيدى

ولا من الأيام .. مخافة

يا نفس فجر القصايد

ما ضِهِبْ فى بعدى عنـِّك

أصلى متغرِّب عشانك

راضى بى الجايينى .. منـِّك

ما شكيت شُح اليالى .. وما بكيت نُحْ .. شِلتوا حالى

رغم إنو الحال بيفضح

إلاّ كٌتْ فى الحارة بصرُخ :

يا وطن عِز الشدايد













نجاة محمد سعيد

الزمن الفلانى


لمـّن يجى الزمن الفلانى

سمانا بتقطر مطر ..درّى

وتمازج برتكانى

ندمن الضحك المعافى

نحيا فى الفرح المورّد

ياسمينى .. وأقحوانى

...............

يا حبيبنا .. جوّة عينيك عايشة ناس

بتسجل الأيام .. أغانى

والطريق .. ما ببقى ساهل

ليك بى المعنى المكانى

لمـّا يتحقق زمانى

بشرق الفجر الحقيقة ..

والصباح الأبيضانى

...........

يا حبيبنا

بتحيا فى حلم الترابلة

وفى العلاقات .. المعانى

وفى البقاسى شقا المسافة

وعايشة جوّاهو .. وبعانى

.. لمـّا يتحقق زمانى

بمسح الحزن المعشعشْ

فى عيونك .. أسمرانى














مدنى يوسف النخلى

لحظات ندية


فى خاطرى لحظاتنا الندية

وإنتى ساعة المغربية

قعدتك جنبى وعيونك .. سارحة فى الدنيا البهية

وخوفنا من سفراً بودى

للمسافات القصية

وسكة الزول البسافر

وقلبو عشرة .. على البنية

*******

كنت جد .. ناوى الرحيل

إلاّ شايل ذكرى منِّك

خفت فى الغربة البعيدة

المسافات يبعدنك

العيون الشايلة سيرتك

بكرة يبكن .. ويفقدنك

والأماسى الحالمة .. ترحل

والمشاوير يتعبنك

********

شفتى كيف

لما الشمس لمت نوافير الشعاع

والضفاف بعدت كتير

والريح ملت .. جوف الشراع

كيف هناك بدت الضفاف

تتلاشى فى زمن الضياع

وإنتى ساعة المغربية ..

وخايفة من كلمة وداع














عبد القادر الكتيابى

على بابك


على بابك نهارات الصبر .. واقفات

بداية الدنيا هن واقفات

وكم ولهان وكم طائر

بعد نتـّف جناحو وراك

لملم حر ندامتو .. وفات

قطع شامة هواك من قلبو

إلاّ هواك نبت تانى

وعلى بابك وقف تانى

غمايم شاقة حضن الليل

مسافر فيها وحدانى .. وبدون جنحين

يغنيك الهنا .. المافى

ويغنيلك رهافة حِسو

يفنى على جليد آمال

ويحلم بالشتا الدافى

*******

وقدر ما يمشى فى سور الزمن خطوات

يلاقى خطى السنين واقفات

يلاقى هواك نبت تانى

وعلى بابك وقف تانى

وملا الساحات














يحى فضل الله

أسئلة ليست للإجابة


ما معنى أن نحيا .. ولا ندرى

بأن العشق قد يبقى سجيناً فى الخلايا

ما معنى أن نشهد موات الأغنيات

ما معنى هذا الصمت الذى لا ينتهى

وبرغم حوجتنا الصراخ

***********

هل يختفى الظل الذى لا ينتمى

إلا لمعرفتى وجهلى

وهل نودع بعضنا ونذهب فى سراب الذكريات

كيف تبدو الذكريات

كيف يبدو طعم أيام الشجن

من يعلم ذكريات كل أشكال التداعى ..

والرحيل المر دوماً

حين يختلط المدى بالمآسى .. والمخاوف

وأحتراق الأمنيات

*********

تعِبٌ هو البرق الذى لا يضيءُ أقبية الخبايا

لا ينتمى للسحبِ ..

والعشبُ الذى لا يرتوى

إلاّ بطعمك يا عصيراً من خليط الدهشةِ الأولى

وأحتراف الأغنيات














يحيى فضل الله

ضو شبابيك .. البيوت


يا ضوء شبابيك البيوت

بين التوهج .. و الخفوت

أسرح معاك .. و اسألك

قبال ما يخنقنا الرماد ... و يعلم العقل الحياد

قبّـال لهب حلمك يفوت

و جذوتك تبهت ... تموت



يا ضوء شبابيك البيوت

أسرح معاك .. أستفسرك

عن ظلمة تمتد و تطول

وإتلخبطت فيها الفصول

عن كلمة ضاعت في الفراغ

بين البزيـِّف و البقول

عن سر يباس البذرة .. في طين الحقول

عن كل أحلامي ... الصغار

الما لقت ... غير الذبول














يحيى فضل الله


حبالنا الجوّة


حبالنا الجوة .. ما تخنت
حبال السما الممدود
حبال الصوت وكت يرجع
يجيب الخاطر المردود
*********
تعالى نشوف
غنواتنا
البقت فى الدنيا ما بتشوف
تعالى نشوف
حروف البكا .. الجوّاها مافى حروف
تعالى نشوف .. تعالى نطوف
على المدن البِقت أشباح
على الجوع القعد مرتاح
على الكلمة البِقت فى الجوف
.. تفتش سكة الأفراح
**********
تعالى نشوف
منو البقدر يخاصم طفلة
صِبحت هازلة فوق مدّ الأسى .. الحرّاق
يا غنوتنا ما تفوتى
ويا كلمتنا ما تموتى
فتشى فوق ضمير الكلمة
عن وتراً رحل ... فرّاق
وعن ولداً رحل ... فرّاق
وعن بلداً رحل ... فرّاق
وعن عِلماً رحل ... فرّاق
غُنانا الفينا ما بشفع
حديثنا الجوّة ما بِنفع
تعالى نشوف .. تعالى نطوف
تعالى ..
نعلم الشُفّع
أزهرى الحاج البشير
أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

مصطفى سيد أحمد .. الأعمال شبه الكاملة Empty الأعمال شبه الكاملة 4

مُساهمة من طرف أزهرى الحاج البشير 16th مارس 2011, 11:19

يحيى فضل الله

إستلاب



خبرينى

والمساء الشاحب الخطوات يحترف التعب

ورحيل أغنيةٍ توشوشُ فى خبايا الإنتظار

تضيع منى

كى تجاذب كل أطراف الزمان

أهدهد الكلمات

لا أقوى على شىءٍ من الذكرى

وهذا العقلُ متعب



رجوعُ الدرب .. لا يفضى إليك

ولا إلى اللغةِ الصريحة

كى أحدد ما تبقى من رحيقك

فى مسام الروح .. والجسد إشتعالاً

وهذا النبض .. أتعب



وتلك الخطوة إبتعدت عن الصحو

المكمِّل للحقيقة

أغلقت بالخبث أبواب الوضوح

زيفت صوت المغنى

عهرت لغة النشيد

ضيعت حلم الصبايا .. فى طوابير الرغيف

غيبت حلم الطفولة

أنهكت حزن الشيوخ

همشت منك .. القضايا

فى إحتمالك للتواصل

والمرابون إستباحوا هذه الأرض الحلوب



فيا جميلة .. خبرينى

كيف بددنا الكذوب

ثم إنّا لم نعد ندرى بأنا

مذ حملناكِ .. جنينا

قد نسينا أن نضع فيه الملامح

لو سـُئلنا كيف ضيعنا إنبهارك بالخصوبة

وأرتضينا أن نسلم للعساكر

من ثمارك ما يطيب





يحي فضل الله

يا ضلنا


المرسوم علي رمل المسافه
وشاكي من طول الطريق
قول للبنيه الخايفه
من نارالحروف
تحرق بويتات الفريق
قول ليها ما تتخوفي
دي النسمه بتجيب الامل
والامل بصبح رفيق
والاصلو في الجوف اندفن
لا بتنسي....لا بنمحي....لا بنتهي
منو الحريق يا ضلنا..
******
والفينا من آهات اليمه
في حكاوينا القديمه
لا بيرحل عن عيونا
لا بتخشاه الهزيمه
والقبيل راجنو نحن
يوم تبشر بيه غيمه
لما تمطر يوم علينا
الفرح يملا المدينه
والبلودات الحزينه
يا ضلنــــــــــــــــــــــــا





محمد الحسن سالم حميد

يا مطر عز الحريق


من الواسوق أبت تطلع
من الأبرول أبت تطلع
من الأقلام أبت تطلع
من المدفع طلع خازوق
خوازيق البلد زادت وكترت
يفيض النيل ونحيض نحن
يظل حال البلد واقف تقع محنه
ولا النيل القديم ياهو
ولا يا انا
نعاين في الجروف تنهد
ولا يا انا
رُقاب تمر الجدود تنقص
ولا يا انا
متين إيد الغبش تتمد؟؟
لا قدام ...ولا قدّام
تتِش عين الضلام بالضو
تفرهد شتله لا هدام
ولا فيضاً يفوت الحد
لا هدّام
عُقُب يا نيل تكون ياكا
ونكون أهل البلد بالجد
*****
يا مطر عز الحريق
يا مصابيح الطريق
يالمراكبيه البتجبد
من فك الموج الغريق
جينا ليك والشوق دفرنا
يا نَشوق روحنا ودمرنا
يالمحطات الحنيني
القصّرت مشوار سفرنا
ياما شايلك بيني حايم
لا الليالي المخمليه
لا العمارات السوامق
لا الاسامي الأجنبي
تمحِي من عيني ملامحك
وإنت جاي المغربيه
داقسي دايشي المغربيِّ
وشِّك المكبوت مكندّك
سمسونايتك زمزمي
سبحه فانوساً مدردح
قلتي بيهن لي زمانك
يا زمان الحاجي عندك
يا زمان الآهه حدّك
لا تطأ الورده الصّبيِّ





قريب الله محمد عبد الله

وجيــــــــــــــــــــــــــــــــــــــــــــده


بعيده عني خطاك
ما لامست وجه الطريق
ومشيتي...ومشيتي
لا فوق غيمه
لا ظني...بعيد عني
كأنك من وراء صفحة
زجاج مبلول
وراك الريح
وقدّامك مدي السكّه
ونِدا المجهول
أنادي ليك...وأنادي ليك
وجيده...وجيده
لا إتلفّتي لا ****تي بي إيديك
أنادي ليك
يجاوبني المدي الفاتح مدارج الهم
بتبقي وجيده طعنة سيف
موسّده شِق السما المرسوم
وسادة دم
وتبقي إيدينا في إيديك
وفي شعرك
وفي المنديل
وفي ايديك بعيد عني





قاسم ابو زيد

ليه غبت يا لقمره


الحال وقف
نار الفرح ما ولعت
ساق الحراز كضب
شرب موية المطر
دلوكة العز والعزاز
*********
ليه غبت يالقمره
نركب جياد الليل
انشرّ بينا صباح
سفر العتامير ليل
نرجاك في المطره
ارجع تعال ياشليل
درع الاميره سِرق
سووهو حدوة خيل
بحر العطاشه نشف
نشرب بواقي السيل
*********وقام مصطفي رحمه الله بتكملة النص بمقطع من احدي قصائد حميد وهو..
صد لي ملامحك ياحراز
ريح العوارض غرَّبت
فرتق ضفايرك في الرزاز
جية العصافير قرَّبت





صلاح حاج سعيد

سكت الكــــــــــــــــــــــــــــــلام


من قبل ما اشرح حكايتي معاك
وأزيد القول ولف
سكت الكلام يا حلوه
في خاطري وغلبني اقول حرف
يا لاحلي من كل الكلام
وكتين نغازل الكلمه
شان نوصف وصف
ومن وين اجيب كلمات
وفيك بحر الغرام
غرّقني في حيرتي ونشف
وكيفن اصف يا حلوه كون
قلبي الفريد مهما شاف زيه وعرف
عنده الحنان غيمة العيون
العامره بالالفه وتحن فاقده الولف
خصل الشعر ليلة محاق
تغزل سبايب الوده فوق قلبي وترف
وهج الحرير اتدلي بي الحنين
والغربه يوم شالني الاسف
هدهدني في صدر الخيال طاف بي بلاد ا
الدنيا في لحظة ترف
يا ريتني لو حبري الغمام
ريشتي الندي وخاطري إرتعاشات الحرف
كان قلت بالغت فيك
يا صدفه احلي من الصدف





صلاح حاج سعيد

المســـــــــــــــــــــــــــــافه


لسه بيناتنا المسافه
والعيون واللهفه والخوف والسكون
رنة الحزن البخافه
تعدي با لفرحه وتفوت وامشي بالحسره واموت
الاماني الفي سفر قبل الزمن
كايسه المواني
يوم تجيبني عليك بصدق انو مره الحظ طراني
وإحتواني معاك شجن
عذّبني قبلك ولسه منك جاي تاني
تمشي وين الخطوه منك
مالزمن بالحب بلاك وإبتلاني
يا عيونك يا مداين
يا مداين الفرحه والحب والجساره
عندي ليك مليون بشاره
الف طيف والكلمه شاره
وإنت لما الحب يهون
في عيوني وفي عيونك
إبقي حاير بالاماره
الفرح منك يجيني ويعتريني الخوف عليك
خطوه منك وخطوه ليك
راجي منك بس اشاره
كلمه تديني البشاره
ولسه بيناتنا المسافه





الصادق إلياس

تانى تانى


تاني تاني
راجعين مره تاني
للقديم اللتنسي
مالو عاد الشوق علينا
بعدما روح مشي
مالو جرح الحب ده عاود
بعدما فرقنا عاد
قلنا دابو الراحه جاتنا
ليه تفارق غير ميعاد
يا زمان مالك علينا
القديم خليتو عاد
نحن ما فكرنا مره نمشي للروح نعيده
إلا غايته القسمه قالت
ما في زول يختار با يده
يوم رجنا لقينا فينا الفؤاد ما خلي ريدو





خليفة الصادق

حسنك بديع


حسنك بديع معدوم مثالك
حيَّر عقولنا وسط جمالك
يا بهجه يا فرح الحزين
آمنت زيِّك ما بكون
خطوك نغم يوحي الاغاني
تتهادي زي الناس مكانك
عليك قليل كلمة جميل
وصفك تحتار فيه المعاني
***********
أجمل عيون فيك شفتها
عيون المها ما بتشبها
مني الكلام بيضيع دوام
قدامك ألقاهو إنتهي
أمرك مطاع أبداً يازينه
إنت الجمال وصاك علينا
لما بيهو يا سمحه إنتشينا
حسنك بديع





بشري الفاضل

نفسي في داخلك أعاين


نفسي في داخلك اعاين
أروي روحي واشوف منابعك
الصحراء في عيني تتواثب جناين
ماخده صوتِك من جداول
وماخده صورتِك من كهارب
مولداً ميدانو حافل
كل ما يصبّح تجيهوا الناس جحافل
يا سلام يا سلام
لما تعبري في الشوارع
شوفي كيف الناس تصارع
ناس تطفر وناس تدفر
في البشابي علي نجومك
وفي البخب كايس تخومك
وكل زول من عند سلافك
لا لا قال دايرلو كاس
مره طربان شلت صوتك شان أغني
وقلت آه ياليل و آه
إنت أول وإنت تاني
وإنت تالت وإنت رابع
نافره زي صيد الخلا
وساقيه زي نبع المنابع
حلوه عينيك زي صحابي عنيده كيف
تشبه شريحتين من شبابي
زي عنب طول معتّق في الخوابي
وسمحه زي ما تقول ضيوفا دقّوا بابي
فرحي بيهم سال ملا حتي الكبابي





مدني النخلي

وهج الشعاع


يا ريتنى زى وهج الشعاع

تمتد سحابات الغروب سر روعتو

وزى قدر المسافر لى مدن مجهولة

لما تضيع خطاوى البهجة

فى هم سكتو

حبك صبح أشتات ظلال وأطلال خيال خرافات قصتو

برحل عشان أنساك وأسيب الذكرى فى وجع الطريق

وأمسح دموع شمس الهوى المصلوبة فى صمت الغروب

وأمسح دموع قلبى التعب كان فى هواك

يقدر يتوب
ما كان عشم قلبى الحزين

مترجى من عينيك صدود
كان عندى فى سفر الأمل

دربا بودى عليك وعود
والليلة يا قلبى اللى راح

بروعة أشراق الورود
مد الغروب المادى أيدو..
ضاعت احلام الورود ..
يا ريتنى زى وهج الشعاع ..





عوض مالك


اذا عادت الايام للماضي


إذا عادت بنا الايام للماضي
كتبت علي ثواني العمر شعراً لا يدانيه
غناء الطير وهمس الماء وشوشة الضياء فيه
ركبت زوارقي أبحرت في شعر لها مجدول
جعلت مشاعري جندول
إذا عادت بنا الايام يوماً ايها الاحباب
ولو في زورقٍ يمضي
علي الصحراء عبر سراب
انا ملاحة الفرحان
يطرق مغلق الابواب
ادق ليس يعنيني
لاني قادم من حاضر اللحظات
للماضي ولي شوقٌ
سيشعل صمت هذا الزورق
الهادي فيدفعه الي الوادي
الي افقٍ انيق النجم
صدَّاح البساتين
واشدو حين تاتيني فتاة كالعصافير
انفاس الرياحين بكفيها
ولي في عمق هدبيها
حكايات واشعار
ولي في شعرها المعطار اخبار
اذا سالت علي وديانها
الخضراء امطار
اذا عادت بنا الايام للماضي





محمد الحسن سالم حميد


بت العرب النوبيـــــــــــــــــه


الشوق من حاصف لا قاصف
اتلم يهز ليلك يا نواري
يا درقه وسيف
يا حصناً كيف
منشر الصيف والشتا ضاراي
ياشملت عز بقَّت جواي
عدَّت بي ضلام بحراً عاصف
يا بت العرب النوبيه
يابت النوبه العربيه
بي شملة نخوه بيجاويه
لو شجر الصحوه الزنجيه
دسيني من الزمن الفارغ
من ريح المتعه الوقتيه
من شر الساحق والماحق
بين دبش المدن المدعيه
والليل إتحكر بيناتنا
كحّل بي ديشو عويناتنا
ياشمس الناس المسبيه
الجوع العطش الغد واحد
الفقر الضارب زي سوسه
الخوف والحاله المنحوسه
يابحر الحاصل لاك ناشف
لا قلمي الفي ايدي عصا موسي
الناس عوجات تحرس ترجي
ترجعبو سلاح وانوار زينه
بنبان تواليت افات وسكي
للناس الدّ منا بنزينه
فقراً تسترزق من دينه
يابت الناس الصالحين
الذمم المشريه الطالحه
شتان بين دينك وبين دينه
يانوره شليلك ما فات
بي عدلو شليلك جاييك
جاييك يتزود من غلبك
القمر الطيب يفضحني
تنبحني سجونك وآهاته
كجَّنا سجونك لو لاك
منعول الزمن الخلاك
سلّمت الوطن الهمباته
علي كيف كيفك بتحكم
ياسوس تكنّك ما بتعلم
بي حال الساكت وبتألم
بتفتق جرحك يوم تبرا
تتلم وقيدك يتحطم
وين عادك هارب من بكره
وخطو التاريخ البتقدم
رغماً من عنت الايام
والزمن الجهجاه الفاجع
بي النفس النازل والطالع
ولا واحد من شعبي مضارع
سميت ومشيت وما متراجع
ترتاله تكوسلها في الجيه





مدني النخلي

من جديـــــــــــــــــــــــــــــد


من جديد جيت تاني تكسر
صمتي بالنظره الخجوله
يا امل عمري القبيل
ويا سنين عامرات فصوله
وما قدرت انساك من زمان
بس ضاعت احلام الطفوله
*************
الحنين الجيتني بيهو
جاني في لحظات ندم
في زمان ضيع صبانا
وكل اشتات العشم
من جديد جيت تاني كيف
تبني فيني اللنهدم
وما قدرت انساك من زمان
**************
ما بفيد انا لو الملم
من عيونك ذكريات
أو اصحي الماضي فيهن
وانسي حزن الامسيات
برضو زمن البهجه عدي
وعمري فات فيه الفوات





محمد الحسن سالم حميد

قاسم أمين


سميت المدن النايمة
المدن التصحى فى حين
تترجى خطى العمال
اصوات الفلاحين
النفس الطالع نازل
فى صدور المسحوقين
أسميت السفن التمخر
فى نص البحر الطين
الناس ام عرقا يجهر
السرها يوما حيبين
الناس التنضح سكر
تتجرع مر وطين
التبنى قصور للقيصر
والتسكن حوش الطين
يا موج البحرالاحمر
سميتكم قاسم امين
كتلوك الناس القصر
الناس المأفونين
الناس البالة مغطى
والساسة المبيوعين
كتلوك خدم الراسمال
يا زول يا عاتى يا زين
الفرحو الامريكان
والربحو تجار الدين
كتلوك وكان قاصدين
فى ذاتك ناس تانين
الناس ام عرقا يجهر
السرها يوم حيبين
يا عادى كما العمال
والريح الحينا بحين
يا صاحى كما الآمال
فى عيون المحرومين
ماشين فى السكة نمد
من سيرتك للجايين
شايفنك ماشى تسد
وردية يا قاسم امين





محمد طه القدال

قليبى المهضلم


رجعلك قليبى المهضلم
يراجع صنوف الغناوى .. العصيـّة
يراجع معاك الكلام القبيل إستباكْ
الكلام المبهرج وفاضى
الكلام المزيف
وما فيهو غير إحتلام وإنفصام
تموت الحروف .. يوم تقوم القصائد
مقام الطبول والبخور
بشوفك جرايد شواكر حوامِد
ولا هامِّى فيها
عليها المصايب .. تمام التمام
مغايص بتفرم حشاها
وغباين بتنفُخ بطون البسفـّوا التراب
وحايح لهيب البتنفح .. تلهْـلِبْ .. وتشوى الجلود
أتف القصايد
إذا ما القصايد دايرة ليكى البكا
البصاحب رِضا السرِّدار
وأتف القصايد
إذا ما القصايد بتنزل مريدة
وتسبِّح بحمد الذى إبتلاكى
وهدانى الودار
طريتك وأنا الكنت قايل
خيالك معشعش جوايا
سكنتك .. وما لاقى فِجـّة
أخيرلِكْ أقول البحرِّق حشايا
أخيرلِكْ أفضفِضْ جراب الخبايا
أقول الكلام البفكك سوارك
يوقـِّف جدارك .. ويرفع عضايا
تضيع الرموز التغطى الكلام
أقول السكاكر .. أبتنى ورمتنى .. وكفانا
أقول العساكر .. تبارِى الكبارى
تفتش قلوب الجُهال الشلوخهُمْ .. هويّة
وأغنى الزيود .. والكنانة
كِضِبْ
أقول البنات البفتْحَـنْ صِدورْهِن
يقالدن رشاشك .. ويخلّنْ حبيبهِنْ
كِضِبْ!!!!
مُراحك .. يعشِّى .. ويفشِّى
خدارك .. يرطـِّب .. يندِّى الضَهَارِى
تُرابَك يبوسِبْ .. يقوِّم دُخُن .. لو زرعتوا الحجارة
وِلادكْ .. بِلادك .. كروها السَّحالى
تسفِّر سعيتك
تقنِّب تبارى الجداد العُقالى
تجوع يا البشدِّر خريفك سفافى البطانة
ويمطِّر رزازك .. عزازاً حصاية
وقموحك سنابل مُشاط كردفانى
وِلادك قُصادك .. شُعاع التحايا
يضووا الشقوق التَّلِم الدوابى
ويورّوا الدروب لى القلوبهم عمايا
عرقهم حُبالك .. وصوتهم مشانق
تلم الدقون الكبيرة
وتحدِّر فِقَرْ .. سمنتها اليالى الضليمة
بتهدر حرايق .. وتحمى البياكلوا المطايب
وتسجن بطون الجياع .. العرايا
وشوشهُم سُمُر .. حَر أباطك
صفوفهُم مقامك .. وحِلمك حِلِمهُم
رغيفة وكرامة .. وسلامة
مصانع بتحرق قبُل تبدا فيها
مزارع بتيبس
ونيلك ممدَّد جنازة
وعقيدك .. وسِيدك .. بيكتب ويمحى
وتبقّ المحاية





المقبول سيد احمد المقبول

السمحة قالوا مرحلة


بعدك الفريق أصبح خلا ...
والسمحة قالوا مرحلة ...
جاني الخبر جاني البلا ...
والسمحة قالوا مرحلة ...
قول يا لسان في الراحلة ...
صوغ المعاني وجملا ...
نافر وما عارف العلي ...
حال العلي حال الخلا ...

يا عيني جافيني المنام ...
وخدودي دمعك بللا ...
وين بعدك ألقي عطوف ...
يلم أفكاري بعد البهدلا ...
روح يا نسيم روح قابلا ...
تلقاها نايمة وغافلة ...
داعب بخصلات شعرها ...
وألثم ضفايرا مسدله ...
وأرفع كتيفها الهادلا ...
وكال خدودها وقبلا ...
وقول ليها من بعدك ...
خلاص شفت الرفيق أصبح خلا ...

يا ربي لحظات الوداع ...
أمثالي كيف يتحملا ...
الليلة بوصيك بالحبيب ...
عندك أمانة تحملا ...
وتديم على الخير والهناء ...
وكل يوم تضاعفلوا الحلا ...
قلبي الحنين من قام صغير ...
طول عمره لا جفا لا سلا ...
والسمحة قالوا مرحلة





مدني يوسف النخلي

شعاع شمس الأغانى


زي شعاع شمس الأغاني ..
جا الحنين عاودني تاني ..
كنت راجيك لو تضلي ..
وكنت ليك كل المواني ...
داير أصارحك بالبحسو ...
وبالأسى وزمن الكآبة ..

القصايد سألة عنك ...
في الحروف باين عتابه ..
جاني الحنين عاودني ...
تاني ليك للغنى والكتابة ..
زي شعاع شمس الأماني ..
جا الحنين عاودني تاني ..

لما سبت هواك رحلت ... لي دروب بالحب بخيلة ..
للضياع سلمت عمري ... وقــلت مـا بـالـيـد حـيـلة ..
وزي شعاع شمس الأماني ... ساقني لي كل المواني ..
إنتي يا الراجع صباحك ..
بي بشاشتك وبي سماحك ..
بعد ما الأيام شقتني ..
وإنتي كم نزفت جراحك ..
وزي شعاع شمس الأماني ..
كنت ليك كل المواني





قاسم ابو زيد

ضـــليت


ضليت هرب مني الامل جنيت ..

جافني الشروق حنيت ..

وكنتي معاي في لمة دليب شاشاي

وفي ايقاع حشى المردوم

وفي جيد الزمن سوميت

مرقت على محطات السفر غربة

وما لقيتك امل شارد ...

مع انك معاي في زحمة المشوار

وحتى يقيني عاد من تاني

صحاك يوم حنين ذاتي

نجمة الفرحة يا عايد

تعالي معاي ..

من زفة نفس مسدار

ولا جلست فرح كانت

ولاطعم الشقا الروح

خطاي هانت ...

انت معاني شايلاها القوافي معزة

في عمق الفرح دوبيت ...

وكت ضليت قعدت براي

حسيتك بتطلعي من نفسي طورية ضامة الطين

من دمعات وجع طول

ندى العرق البنادي حنين

واناديك وانت في ذاتي ..

مخاوف سكة آهاتي

مداين قرية لابس القمرة شامة ضو

يحن يغشاها مرة شروق

يخدر من عرق تربال ..

يرتاح في ضليل واسوق ..

ينادي تراب

يغازل خدرة السيال

تطلُ شروق ..

تكون قمر السعد ضويت





عاطف خيرى


الـــهدهد


الهدهد:
مخدوش الفضا
طويل الحزن .. مفتول الحنين
مصاب بالديانات والشرود
نوح:
يبلغ من الطول مسافة يشتهى الغرقان .. شهيق
إنو الأرض مسجونة فى موية .. وكل الناس مراكبية
اليابسة ... فِركة .. مدخورة لى يوم فيهو ساير النيل
قطـّاع رحط كل الجزاير
والبنات البفتحوا الباب للمطر
وأنا جدولك شارف على كل الجداول الصاحية فيك
والغباش فى دمى منك
لو كسر ضلعين عذرتو
لكن نهر كل العصافير البتلعب فى الوريد
وفنـّاكى جواى زى حجر
والبينـّا ما فات الدوائر

الليل خِمار القمرة .. مجدوع فى الفراغ
والرقصة لى البت فينا ..
فوق كل المسامير الندقها فى البساط
والرياح حكـّامة بى دلوكة مرّقت الشياطين .. منها
إتجنن فقير الحلة دقيناهو بى نفس السياط
كل المجرات .. النيازك والشُهُب
ودع راميهو الله على السما
والدنيا زار

ويا هدهد هنا مرت مراكب نوح
محملة بالبخور
مين اللى شال من طاقة الطين البعيدة
قنديل حبيبتى وطيـّب الجرح المثير
مين السرق من بابا مفتاحو الملون .. والصرير
منهوبة مقبرة الفواكه فيكى
قولى معاى يا شرف القبايل .. جر
الشاف تباريح الطلح فى النار
شافنى مرقت من عندك ضرير
أنا ليه تجينى الموية حفيانة ..
وأدنقر ألبِّسا شبط أخضر
وأبيت مبلول .. وأصلِّح فى الرباط
أنا ليه شبابيك البيوت الواجمة .. والناس البُساط
وليه يرجانى النخل
فى السكة يفتح قلبى خمارة .. وخلاوى ..
وبيت بكا

تعبت من المساسقة والهتاف .. ياغيمة
أتبنى جبهة القمرة
السهر والحمى طول الليل تهضرب

ويا هدهد لقيت أمك
ترشرش فى السعف من عينها
وتجبر خاطرا المكسور عليك
ينكسر خاطر السعف فى إيدا
يا هدهد قيام
من السما الأول قيام
من السما السابع قيام
وأنزل مسافة تهبشك غنوة .. وأناولك كاس

ومرت مراكب نوح محملة بالملوك
ركعت على الموج الجنود
من كل جندى تفوح ضحية
ودم مشتت فى الأبد
دسيت جبهتى من السجود
بكى فى مخاض الخوف .. ولد
إشتبهوا فينى ورا الجبل
شافونى دسيت الهداهد بالزبد
صفا !
إنتباه !
وقعت من الهدهد بلد
نهبوها .. وإتقسموا الحدود

ومرت مراكب نوح محملة بالطيور
واقف مع نوح الغراب
ينضم ويأشر فى إتجاه
باقى الطيور يتوسوسوا
إلاّ الحمام .. إتوضا مارق للصلاة
القانقرد فى حزنو يغزل ساله من صوف
الطواويس شارّة قمصانا المزركشة فى الضحى
الزرازير بى عراريقا المغبشة .. جات على

أرجينى يا صالحة !
ومشيت فى الموج
يا النبى نوح أصل سالم
يا النبى نوح أصل .........
حجر الدُّغُش فى الموية يقلع ضُفرى
يادم !
ده ما وكت الرسم واللون
وجات المغارب حننت إيدا .. ومشت
سبحانك الأديتنا من حزنك فوانيس
ــ الغراب يا نوح طفش
واليابسة وين ...؟
يا الله ما يابس سوى حلقى المجرح بالدعا
طير يا حمام !
ـ الحمام يا نوح يجامل فى السما
وبيّاع مناديل خضرا فى كل العصور

أنا ما خلقتك يا ظنون
شان تبيتى الليل معاى
وتجرى من فوقى الغُطا
ما تشُرّى فى حبلى الوساوس
والمعانى الداكنة .. والليل والشتا

الهدهد تميمة الموت
معلّق فى بيوت الناس .. نعش
من خرافاتن تعال
من دياناتن تعال
نفّض نعاسك من كل بيت
من كل حجوة حكوها عنك
فى الليالى الباردة والأطفال نيام

مين يشترينى من الملوك الخايدة فى الدم القديم
مين يوصف بيتنا لى هدهد يتيم
مين اليوصف للنحل ريق الحبيبة
وحبة القمح التقوم فوق محفضة حبوبة
فى الزمن اللئيم

ومرت مراكب نوح محملة بالحجيج
ــ وين ولدك ؟
ــ تركتو على الجبل .
ــ وين بلدك ؟
ــ ضربتها فى مثل .
ــ وين نحن ؟
ــ مرقت على عجل .
ــ يا نوح تخلينا
زيتونك مخلل بالشمس
نار الله والرِجل الغريبة
نحن البلاد الشاكية جرحها للصديد
جاتنا القوافل بالضجيج
جرتنا من حلبة رقيص
ورتنا كيف صلبوا المسيح
ورتنا كيف كتلوا الحسين
وبكينا أكتر منها
ساقتنا فى الآخر .. عبيد
مين يشترينى من الملوك
الخايدة فى الدم القديم
مين البوصِّف بيتنا لى هدهد يتيم

يا هدهدى المهدود
مين هدهدك .. نمت
كل الطيور غنت .. منك يجينى سكوت
مين الهداك للناس
أو هدّ فيك الموت؟
يا أوسم الجايين .. أنا قلبى حِلّة حنين
والشوق فتحنى بيوت
يا صالحة
لا جنبك .. لا فتّ منك فوت
أدخل ضلام الناس
نورك يجينى خيوط
وقبّال أقع فى الضو
جوّاك سندنى خِفوت
أنا برضى حلة شوق
لكنى فى التابوت
ومرت مراكب نوح محملة بالعبيد
الجنة .. زى هدهد معلقة فى الكتاب
ونحن العبيد
باب الحياة السرِّى
حرير فى فكرة الدودة الموجعة .. بالنسيج

هدهد يرك فوق دفــّة المركب .. يدندن
الريح سكن خيمة حريمو الأربعة
النيل رجع فى اللوحة
للوادى القديم
البحار مكتوفة الأيدى
.. الشموس فاقت
ونوح بعاين فى مفاتن اليابسة
تغسل فى حصا .. ومتبرجة
سبحانك الأديتنا من ملكك سلاطين ..

وأنزل مسافة توجعك .. غابة
رقيصنا الحى
طبولنا...
وليك شبال
من اليابسة الممشّطة بالملح
... وهدهد





فيصل محمد صالح

سِفر السكوت


طوبى للرجال العصافير
كلما حطّ طائرهم فوق غصن
غنوا بشجيى الكلام .. بديع الصور
وبؤساً لنا نحن الرجال .. الشجر
تهاوت جذور الكلام
جفت ينابيعنا
وأرهقتنا ليالى السفر
تؤرقنا الذكرى
توقِد نار المواجد فينا
فيوجعنا الشوق فى صرة القلب
يتأبى حتى السكون الذليل
نخرج الآن من جلدنا
ونخدش صمت السؤالات
نركض عبر الطريق الطويل
من أى ثقبٍ فى الحكايات جئنا
ومن أى بابٍ فى السماواتِ .. كان إلتماس السكينة؟
ومن أى ذنبٍ عصىٍ
تعلم القلب سفر الرحيل
الطيور قطعت رحلتها ثم عادت
والأمانى إستكانت
والليالى ما عاد صمتها مستحيل
والنساء اللائى علمننا
العشق فى زمانات النداء الجميل
نسجن كعادتهن من كذوب الروايات
ما يخلع الدفء عن جسد الحب
ثم تذوقن للحبيب البديل
يا صديق المسافات أركض
ما عاد فى الحزن متسع
لصفير الجراحات ــ قلبى وقلبك ــ
ولا صبر فى الأفق لإنتظار الخيول
كل المراكب تاهت
أنكرتنا الشموس
والحبيبات خانت
لفظتنا البحار
فهل يستطيع البنفسج أن يكون الكفيل ؟





مظفر النواب

في المساورة أمام الباب الثاني


في طريق الليل ضاع الحادث الثانى
وضاعت زهرة الصبار
لاتسل عنى لماذا جنتى فى النار ..
فالهوى أسرار
والذى يقضى على جمر الهوى أسرار ..
بالذي يخفى الهوى بالصبر
بالله .. كيف النار تخفى النار ..
يا غريب الدار إنها أقدار
كل ما فى الكون مقدار وأيام له
إلا الهوى ما يومه يوم ..
ولا مقداره مقدار
لم نجد فيما قطار العمر يدنو
من بقايا الدرب من ضوء
على شيء وقد ضج الأسى أسرار
كنت تدعونا فأسرعنا
وجدنا هذه الدنيا محطات بلا ركاب ..
ثم سافرنا على أيامنا أغراب
لم يودعنا بها إلا الصدى ..
أو نخلة تبكى على الأحباب
ياغريبا يطرق الأبواب ..
نحن من باب الشجى
والزخرف الرمزى
والألغاز والمغزى ..
وما غنى على أزمانه زرياب
كلما فى الكون أصحاب وأيام له
إلا الهوى ما يومه يوم ولا أصحابه أصحاب
كم طرقنا بابك السري
فى وجد وفى خوف ..
لم تجبنا فابتعدنا فرسخا هجرًا
فالفيناك سكرانا جوابات فلم تغفر ..
ولم نغفر.. كلانا مدع كذاب ..
كل غىء تاب
انما غيى وغي فيك قد غاب ..
وراء النرجس المكتوب للغياب ...
لاتسل من عادة إن تكثر الاقوال
فى من ذاق خمر الخمر ..
فى المحراب ..
لم يقع فى الشك
إلا أنه من لسعة الأوساخ ..
تنمو خمرة الأعناب ..
نبه العشاق
مدنف اودى بلا هجر ولاوصل بباب الطاق ..
مرهف من خرقة الدنيا
على اكتافه لم تستر الاشجان ..
والإشــــــــــراق والأشــــــــــواق ..
موغل فى السر ..
مدنس بنار الوجد فى الأعماق
ما ابعد الأعماق ..
لم يفق يوما ولم يأبه بمن قد فاق
مشفق مشتاق كله أطراق ..
أثقلته الخمر صحوا فانبرى يبكي
واطفال الزمان الغر لجوا حوله
سخرية في عالم الأسواق
قل لأهل الحى هل فى الدور من عشق ..
لهذا المبتلى ترياق ..
نأمة فى العشق تكفى ..
نقطة تكفى ..
فلا تكثر عليك الحبر والأوراق ..
كل مافى الكون تنقيط له إلا الهوى ..
فبالتنقيط نهوى .. واســال العشـــــــاق
كان يأتى العمر يقضى صبوة فيها
ويصغى للأقاصيص التى فى آخر الدنيا
وفى عمر وفى أحباب ...
هاهنا ينهال فى صمت رماد الموت
يخفى ملعب الأتراب
لاتسل لماذا ألف مفتاح ومفتاح لهذا الباب ..







قاسم أبو زيد

ألــــقاك ويـــــــــــــــــــــــــــــــــــن


ألقاك وين ..
كان الفرح قفل مسامات الضياع
غناك مزمار الزمن إرشيف عشق ..
أصوات نغم وتر التراخى موشحات ..
القاك وين ..
من غبت.. ما شرقت شمس
والدهشة ساساق الدروب ..
لي وين تمش...
نار النضال لو تنهبش ..
توقد سنون .. المتعبين
تعقد زفاف آخر ضمير ..
إتباع مقنن بالقرش
ألقاك وين ..
كان التعب ما خت أيدو على جبين تربال
.. يخم رمل الشقا .. المليان غلب ..
دقست قوافلو مع السراب ..
رابط جليد الهم سعن ..
محزوم خشيمو من الصبر..
راجي السحاب ..
نلقاك وين ..
أنا وإنت والنيل والأرض
والبور مشتت متنسى ..
نجامة التعب الكعب ..
ما كان عول ..
ريدى الصبح صفصاف هدير
البر ..
أيامي توب شحاد .. هذاه خم و خم ..
أنا ما لقيتك ليه.. طعم الفراق دم دم ..
ختيتى فوقى الليل .. والليل سقاني السم
أنا خاطري في المطرة ..
ريحة الدعاش
والشم





د. طلال دفع الله

إصطفيت جرحك


وإصطفيت جرحك براك
وتر إنتباهك والنغم
ضفة تزرع فى الشروق
وضفة بتقاوم الألم
شمعة الأمل التهِد ليل الكوابيس
زمن الودار
شامخة بتعاند فى صدى الليل
الهياج الإحتضار
*********
صاح إنتباهك فى الزمن
لما أصطفاك
قدر العصافير .. الرحيل
غدر الشِباك شوك المتاهات .. الدوار
تحتك نسيج الليل .. طويل
الأناشيد الماخدة من حـِزم الشعاع
نار البدايات البتول
للسحابات التلوِّح قوس قزح
بُشـْرَة هطول
ولى ضِيا القمر المقرّح
ضد قوانين الأفول
*******
ليك يا آخر الخيول
فرس الرِهان الما كبا
وهج الشموس الإشتعال ..
وإنكسار المستحيل
شقيتو بى سيل الحروف
الطالعة دابا من الصدف .. مجرى البحر
تيارو والموج الرجوع
أديتو حيل مدّو الزمان كان إنحسر
غيرت فى الزمن الملامح
طعم الكلام .. لون الغُنا
وطبع البذور .. كيميا التراب
طقس المطر
******
صاح إنتباهك فى المكان
زهو السنابل بالقموح
وإجتراحك لى لسان لغة الجموح
وكتين يتوه بين السكات
وسيف القيود .. الإرتهان
شمس الحقيقة .. الـ .. آه ..
بقت منفى ونزوح
وأقتباسك للصبر لغة اليقين
بإنقسامك فى الزمن
وإنصهارك
وإقتسام الآهة بينك والمحن
وإنتصارك لى صباحاً بكرة طالع
من مدارات الصهيل
يا صباحك
لما تنداح ضفة جراحك .. بالشجن
وتقلِد الزمن العديل
يا جراحك
لما تفرد غيم جناحك
فوق عذابات الوطن





قاسم ابوزيد

لوحة وطن في عيون طفلة


لوحة وطن فى عيون طفلة
طفلة حلوة وشايلة لونة ..
ترسم الوطن الشباب
كل خط فى اللوحة باين ..
من دموع الطفلة يحكى
النفوس تبقى السحاب
القلوب تبقى الأراضى ..
نزرع الوطن اليباب
راسمة فى اللوحة القمارى ..
فيها وش النيل حزين
الضفاف كان لونا أحمر .
الشجر كان لونو أخضر
الجباه عرقة بيضارى ..
حمرة النيل واصفرارو
**********
راسمة جوه اللوحة طفلة ..
الفرح فى رموشة صفق
ادت الامواج بسيمة
غير النيل إنحدارو
لابسة من السعدة قرقاب .
شايلة فى الأيد الطوارى
مارقة قمحة من اليباب
**********
شلة من أطفال مدارس ..
فى نظام ماشين سوا
رددوا الخير بالوتر
الزمن فى اللوحة بشر
الجروف فتحت مداها
الغيوم شايلة المطر
الترابلة هناك كبار
شتتوا العيش للمواسم
العيون شايلات بطر
من بعيد فى اللوحة عامل
الآيادى على السنابل
ودع الليل والفتر ..
خدرالوطن اليباب


أزهرى الحاج البشير
أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

مصطفى سيد أحمد .. الأعمال شبه الكاملة Empty رد: مصطفى سيد أحمد .. الأعمال شبه الكاملة

مُساهمة من طرف فيصل خليل حتيلة 16th مارس 2011, 12:36


كيف حال يا عم كيف حال يا خال

بالجد تسلم يا ازهرى فى هذا الزمن الأسيف

هذا البوست يكفيك ان تتوج ملك ملوك الابداع.

شكرا


فيصل خليل حتيلة
فيصل خليل حتيلة
مشرف إجتماعيات أبوجبيهة
مشرف إجتماعيات أبوجبيهة


الرجوع الى أعلى الصفحة اذهب الى الأسفل

مصطفى سيد أحمد .. الأعمال شبه الكاملة Empty رد: مصطفى سيد أحمد .. الأعمال شبه الكاملة

مُساهمة من طرف محمود منصور محمد علي 16th مارس 2011, 13:13

ياسلام عليك يا دكتور يا عظيم ياجميل يا مبدع يا متالق يا راقي يا اديب!!!
كل العبارات ضاعت واختفت وتلاشى الكلام وذاب بمجرد دخولي في لب الموضوع !!!هنيئا لنا بك يا ابا الزهور والورد وهنيئا لكم به يا اهل المنتدى ... ونرجوا الا تتكاسل في رحلة البحث عن الدكتور عبد الوهاب الزين والاستاذ فضل الحاج ,,,الف تحية
محمود منصور محمد علي
محمود منصور محمد علي
مشرف المنتدى العام و مصحح لغوي
مشرف المنتدى العام و  مصحح لغوي


الرجوع الى أعلى الصفحة اذهب الى الأسفل

مصطفى سيد أحمد .. الأعمال شبه الكاملة Empty رد: مصطفى سيد أحمد .. الأعمال شبه الكاملة

مُساهمة من طرف الفاتح محمد التوم 16th مارس 2011, 13:14

كتبتا ليك ياأستاذنا ....." غشـــوه يا ابو الحاج "
في بوست "فيصل :ذكرى الطيب صــالح"
وأكيد عرفتني يا عمنا قاصد "أزهري الحاج"
أقول ليك الان " قدلة يا ابوالحاج "
بهذا التــاج الأنيق ..... "تعبتنا وبكيتنا وريحتنا "
إليك عميق ودي الإنتا عارفو....

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

مصطفى سيد أحمد .. الأعمال شبه الكاملة Empty صباح البوح..

مُساهمة من طرف الفاتح محمد التوم 16th مارس 2011, 13:21

استاذنا أزهري صحح ليا المعلومة وهي ...وقعت في إيدي قصيده للشاعر مدني النخلي ...وسمعت أن الراحل مصطفى لم يكمل تلحينها.. ورحل قبل ان يتغنى بها:

صباح البوح..
***_***

منو البفتح صباح البوح

ويلملم صوتك المجروح

على شرفة قماري تنوح

ويغني عديله للجايات؟

أسف لو دون مداك شايف

شظف عيشك ولا تخمة رحيل زايف

وقار صمت الكلام المر.. ولا وعد الغنا الهايف

ردمت الهوة بيناتنا وفي بدء الكلام يادوب

أنا العريت.. قواميس الكلام غنيت

لا قبلك ولا بعدك عشق يمخر عباب الهم

ويجاوبك بالقصيد النم

أسائلك كيف ووين نتلم؟

الى ما يلفظك حلمك

يقبل فيك شقاك وينجم

عشم فيك

من عشم فيّ

يمازجنا التقاء الدم

ويادوب الطشاش حلمك

ندهني طشاش

اداريك من سموم تلفح

أتاريك.. غيمه جات ترمح

الى ما تنزحي وأنزح

نقوم من ضو يفج المشهد الزاهي

سكون الكون يطل باهي

يلاقي الشارع الفارع

ناسو الفي الحياه تصارع

تزيد الهوه بيناتنا

ولا عاد الرصيف ضاراي

ولا شقشق صباح مرساك

ونادى للفرح ناداي

ندهتك هل

غشاك الطل

جفاف زهر العمر ينبل

عذرتك لو يساورك شك

إذا انسدت مداخل الحل

متى انهزمت بشاراتك

وايقاع الزمن اختل

على لوحه شروق الفال

يزف وردك صباح الطل

على شرفة قماري تنوح

تغني عديله للجايات
***_***

خالص الود

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

مصطفى سيد أحمد .. الأعمال شبه الكاملة Empty رد: مصطفى سيد أحمد .. الأعمال شبه الكاملة

مُساهمة من طرف أزهرى الحاج البشير 16th مارس 2011, 16:03

شكرا الفاتح على الإضافة .. لم نسمع أبدا بهذه القصيدة عند مصطفي بل علمت من الأخ الأستاذ بدر الدين الأمير رفيق مصطفى في الغربة وخادمه الوفي ورفيق جثمانه للخرطوم إن آخر أعمال مصطفى بعد حفل فندق الواحة والذي كان قبل رحيلة بأيام كان مصطفى يكمل ألحان أغنية سـِفر السكوت .. وكان مصطفى في سنوات عمره الأخيرة أوقف التغني بشعر مدني النخلي وطلب منا ونحن نطبع كتاب فجر المشارق (1) أن نسحب جميع أغاني مدني من الكتاب وقد كان وطبع الكتاب بعد رحيل مصطفى مباشرة خاليا من أغاني الأستاذ مدني ،كما أهدى مصطفى أغاني مدني التي لم يوقعها وقتها لخالد الصحافة وسيف الجامعة ، وكان مصطفى وقتها عاتب جدا وبدرجة قد تصل لحد الجفاء لتصرف بدر من مدني لا داعي لذكرة وقال لنا قولة مشهورة أحتفظ بها .. ولكن تصالح مصطفى مع مدني قبل رحيله وقبل حفل مصطفى قبل الأخير الذي غنى فيه علمي عيوني السفر وهي من كلمات مدني ومصطفى ورحل مصطفى متصالحا مع مدني وهذا المهم ولعل الملاحظ أن كثيرا من من تغنى لهم مصطفى إنتقل منهم دون رجوع لشعراء آخرين ومن ذلك يمكن القول أن الشعر المغنى عند مصطفى يتطور مع المرحلة والتي سرعان ما يتجاوز أمكانيات مرحلة للولوج والتبشير بفكرة جديدة وأسلوب جديد ومرحلة متقدمة في الشعر، شعر الأستاذ مدني مع جزالته ورقته لم يكن معبرا عن مشروع مصطفى الغتائي المتطور ، ولربما كانت القصيدة ضمن آلاف القصائد الموجودة عند مصطفى والتي تصله من أطراف الدنيا وجهاتها الأربع ولكن أكاد أجزم أنها لم تكن ضمن أعمال مصطفى الأخيرة والتي كان نصيب الأسد فيها للشاعر الدكتور طلال دفع الله والذي أثنى عليه مصطفى كثيرا وقال عنه أنه ذو شاعرية متطورة................. تحياتي
أزهرى الحاج البشير
أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

مصطفى سيد أحمد .. الأعمال شبه الكاملة Empty رد: مصطفى سيد أحمد .. الأعمال شبه الكاملة

مُساهمة من طرف أزهرى الحاج البشير 16th مارس 2011, 16:15

شكرا يا أهلنا ويا مصابيحنا ونجومنا الضاوية في ساحات زمّنا
أزهرى الحاج البشير
أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

مصطفى سيد أحمد .. الأعمال شبه الكاملة Empty رسالة نموذج "وينك .. لافي البيت .... لا الشارع .... لا المسرح"

مُساهمة من طرف الفاتح محمد التوم 16th مارس 2011, 20:56

بتلك الكلمات الرقيقة تلقيت " الرسالة " ،،،،،من استاذنا أزهري بعد أن فتحت الموبايل..لأخبره بأنّي كنت " في سابع نومه" بعد أن " تعبتنا وبكيتنا وريحتنا " بهذا التوثيق الحافل ..
هذا التوثيق له أبعاد ودلالات عميقه .... وذو رمزية عالية الدسم أقربها للمتصفح أن التوثيق درس في معاني الإخلاص و الوفاءوالصدق وحفظ المودة وكثير كثير لا تحتويه الكلمات.... لقد بعثتم فينا الراحل مصطفى بعد اهداءنا "فجر المشارق "......نعم مصطفى سيد أحمد مشروع غنائي متكامل، مشروعاً ثقافياً يستوعب القصة والموسيقي، كل قوالب الفنون يفهمها بل تسكنه.. لذا تعامل مع مختلف الشعراء،،،،،
وأنا في منتصف الثمانينات (ثالث ثانوي) كنت حينها ملازماًللأستاذ دفع الله الشيخ في مدني " النشيشيبه " وحضرت جلسات استماع كان الحضور يتناولون مصطفى و النخلي وآخرون .. عشقت التفرد في الكلمات وحضور مصطفى ... بدأ إهتمامي به وبشعراءه ... كنت أجلس قرب الأخ أسامةمن أبناء " القبه" طيلة فترة تلك اللقاءات الغنائية واسامة اصبح زميلي في الجامعة... هو الان بمستشفى مدنى مع زملاء آخرون من مدني( لواحظ _ محمد الفاتح _ فتح الرحمن _ مي الفاضل)...
القصيدة أرسلها لبريدي دكتور أسامة ... لذلك طلبت التصحيح.. كما ورد في الايميل ... أنه سيفاجئني بديوان النخلي الذي أشرف على طباعته الراحل بعنوان (كل النجوم) وديوان " واقف براك " صدر في 2004 بعد عودة النخلي من قطر ...وكمان بشرني ب(أعمال مصطفى +النخلي) و مرثيات النخلي مجموعة في ديوان تحت الطبع بعنوان (غربة الطير)...
كما أسلفت استاذي لربما هذا " الجفاء" ... أدى لسحب كل أشعار النخلي ....أولربما هذه القصيده "و هي أكيد لمدني النخلي " كانت بين آلاف القصائد المرسله له من جميع فجاج الأرض ...والتي لم تر النور ...
ولكن تيفى الحقيقه ... ماقمتم به قمــه الروعه ولمســة وفاء...لامعة خالصة كما الذهب ( ومدني ومصطفى ومدينة مدني و شعراء أغاني مصطفى) مدد للوجدان السوداني الذي عشق الكلمة واللحن و الطريقةفي شخص الراحل .....
خالص الود استاذي ...

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

مصطفى سيد أحمد .. الأعمال شبه الكاملة Empty ازهرى محمد على فى رثاء مصطفى

مُساهمة من طرف فيصل خليل حتيلة 23rd مارس 2011, 11:37


إلى إنبثاق نفسي على – داخلى

مدخل أول :
لمتين متيمم شطر النيل
متوقى اليابسة .. ووارد
متوكى الغنية .. عصا موسى
بتهش فى غيم الإلفة .. الشارد
مهدودة القُدرة وفترانة
حردان الضل البارد
بتوجل لى يوسف فى البير
يطلع من بطن البير المارد

مدخل ثاني :
فات الكان بدينا إحساس بالإلفة
وكان راوينا
فات الباكى جراحنا وناسى جروحو
ولا فى ورانا مدينة .. مدينة
فات الصاحى
ونحن نغط فى النومة السابعة
طالق حسو ولا حاسينا
حتحت فينا غناهو الطاعم
وفات قنعان من خيراً فينا
سلامات يازول يا رائع
سلامات .. عوافى
سلامات يا خلاصة الخير الفى الناس
وترياق الزمن المتعافى
سلامات يا زول يا رائع
سلامات عوافى
............ ............ ...........
محاصر فيك بسأل عن سكة تطلع منك
أو سكة تودي عليك
بسأل عن مخرج منك ... وليك
زى نهر بينبع ... وما لاقى مصب
بتمدد عشقك فى أقصى ضواحى الروح
لى أقصى نواحى القلب
يتكثف بسعة إطلاق الربّ
وانا كنت بفلى القلب بسيرتك
سميتك حلاب الغيم
من ضرع الجدب
وطنيتك مارست الفعل .. السرى
وحفظت فحولة النيل ... أيام الخصب
ولمحتك وانت بتمشى وترقص فى حمامك
على حُمة إيقاع الحرب
وتكلكل جلد الكلمة الحافة
لحبيبة بتفتح مجرى الغنا فى الدم
وتفلس باب القلب
فيا بنوت الشارع الطاعم قومن كب
قومن لى الما قصر فى غناكن .. ضمة
ولا إتلوم بى وراكن تب
ولو تبقى السكة الجاية ضهب
وسلامات يا زول يا رائع
.......... .......... .........
البارح عفورتك ركت فى البال
رقصت
وادت عصفور الريد شبال
وطارت من قولة كر
ما الزول النهر العصفورة
بحرض فى كلاب الحر
لا بسنى وداخل فى اللحم الحى
راصد كل البسأل عن حالى
حرش ضلى على
ونتف زغب الخاطرة ... التخطر على بالى
ومنع العصفورة تحوم
إستجوب كل الناس التجى فى النوم
ماتقول !!
يازول يارائع ... ومهموم
يا مضيع ضى عينيى .. وراك
واقف حاحاى لى النوم
يا مستف رئة الدنيا شهيق
ومشحتف روح الخرطوم
كيف حال يا ابوى
كي حال يا خال
..... وتعال !
إتفضل على باحة بيتنا .. الطيب
ما عون الأطفال
ضمد جراحاتك .. تعال
من ضلاماتك .. تعال
أدينا هينين من صبر
السكة أبعد من مشيك
والجرح أعمق من حدود الإحتمال
السابلة والأطفال هناك
قدامك المشوار .. طويل
والريح .. وراك
كل البيوت
إتشرفت .. لى طلعتك
والونسه ماكملت .. معاك
القرقراب .. والقهقهة
مين سمى ترحالك .. غياب !
والغيبة بتزيدك بها
لويرتق الحزن المصاب
كان بعدك الموت إنتهى
يا أقصى حالات الحضور المشتهى
يا منتهى
تعال فرحنا بى دهشت غناك الحى
وحى من جرحك الدامى
وفتر حيلك
وحى من ضلك الرامى
وحمل شيلك
تموت متل الشدر واقف
تموت واقف على حيلك
فيا حليلك
يا حليلك بنستناك
على صهوة جياد الريح
بنستناك
فى الزمن اللديح القيح
بنستناك
على باب الحلم فى غناك
بنستناك
رحيلك شلهت الدنيا
ورتب العالم البى هناك
بنستناك
وانا تانى وراك .. شن لاحق؟
دهستنى فى بعدك حدود الخوف
الداخلة على بالساحق
أدينى القدرة التمنحنى
بحجمك سعة الشوف
لو أقدر أطل من شاهق
لو أقدر ألوح لى عيونك
تلمحنى
وانا ضعفى أمامك فاضحنى
سامحنى
ما قدرتا أطولك سامحنى
........... ............ ...........
شفتك من وجع طالع
من برزخ ملتقى النيلين
كنت هناك ... وحيدك
وكل الناس ... اتنين ... اتنين
براك واقف حد السيف
براك الما وقف بين ... بين
تغازل حلمك الفارع
فتح بابين على الملكوت
تسلم على حضرة جلال الموت
وتفتح فى الارض نفاج
إذا امتلأ الفراغ ... بالصوت
فيا باطن الاديم أفتح
براحات الحنين ... مشرع
وأنده لى مدن شاخت
أنده لأطلال القري .. الراحت
بيوت فى بيوت
تمرق من شبر مسرح
مدن فاضلة
وعالم بى إتساع الحلم
بقامة يشتهى التابوت
فما لفظ البحر يونس
ولا إنسدت شهية الحوت
ويا زول يا رائع
تمشى بالحسرة .... وتموت ؟؟!!
سلامات
يا زول يا رائع .

فيصل خليل حتيلة
فيصل خليل حتيلة
مشرف إجتماعيات أبوجبيهة
مشرف إجتماعيات أبوجبيهة


الرجوع الى أعلى الصفحة اذهب الى الأسفل

مصطفى سيد أحمد .. الأعمال شبه الكاملة Empty رد: مصطفى سيد أحمد .. الأعمال شبه الكاملة

مُساهمة من طرف أزهرى الحاج البشير 23rd مارس 2011, 15:51

سلامات
يا مُوونج يا رائع .
أزهرى الحاج البشير
أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

مصطفى سيد أحمد .. الأعمال شبه الكاملة Empty رد: مصطفى سيد أحمد .. الأعمال شبه الكاملة

مُساهمة من طرف أزهرى الحاج البشير 11th أكتوبر 2012, 11:39

في ذكرى الراحلين .. وذكرى رثاء أستاذنا صديق مدثر لأستاذنا مصطفى سيد أحمد
أزهرى الحاج البشير
أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

مصطفى سيد أحمد .. الأعمال شبه الكاملة Empty رد: مصطفى سيد أحمد .. الأعمال شبه الكاملة

مُساهمة من طرف كرم هجانه 15th أكتوبر 2012, 16:07

سلامات يازول يارايع .. سلامات عوافى
يا خلاصة الخير الفى الناس و ترياق الزمن المتعافى ...
البارح عصفورتك ركت فى البال و ادت عصفور البال شبال ...
** أبو الزهور
بين و بينك ... هذا المدى .. المصطفى
حين وشحه الهوى صدر الوطن .. حين وشحه الشجى صدر الغمام ..
متوقع تهدى لى الأعمال الكاملة التى غناها مصطفى سيد أحمد ... طيب الله ثراه

كرم هجانه
نشط مميز
نشط مميز


الرجوع الى أعلى الصفحة اذهب الى الأسفل

مصطفى سيد أحمد .. الأعمال شبه الكاملة Empty رد: مصطفى سيد أحمد .. الأعمال شبه الكاملة

مُساهمة من طرف أزهرى الحاج البشير 15th أكتوبر 2012, 16:23

أمرك .. أمرك يا كرم
أزهرى الحاج البشير
أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

مصطفى سيد أحمد .. الأعمال شبه الكاملة Empty رد: مصطفى سيد أحمد .. الأعمال شبه الكاملة

مُساهمة من طرف كرم هجانه 15th أكتوبر 2012, 22:52

شكراً بقدر السحاب الإندفق فى وشى الواطة
شكراً بقدر ما تقطى الـ سوناتا مساحاتنا البقت جدبا ..
و شكراً بكل لغات أهلنا فى أبوجبيهة

كرم هجانه
نشط مميز
نشط مميز


الرجوع الى أعلى الصفحة اذهب الى الأسفل

مصطفى سيد أحمد .. الأعمال شبه الكاملة Empty مصطفي سيد اجمد

مُساهمة من طرف حسن عزو 31st أكتوبر 2012, 15:38

سلامات لكل اهل ابوجبيهة اولا ولعشاق مصطفى سيد احد ثانيا
اليك ابيات من اغنية بلاد الله البعيدة
كلمات :خطاب حسن احمد
جلبت ليك من بلاد الله البعيدة
صنوف من الوجد الملح
درت القاك بالسمح
كنت بصتاد في الظهيرة
من مناقير الكنار بوصلات سكك السفر
حسن عزو
حسن عزو
ابوجبيهه يابلدى


الرجوع الى أعلى الصفحة اذهب الى الأسفل

الرجوع الى أعلى الصفحة

- مواضيع مماثلة

 
صلاحيات هذا المنتدى:
لاتستطيع الرد على المواضيع في هذا المنتدى