الشعب يريد زيادة المصروف ... الفاتح جبرا

الشعب يريد زيادة المصروف

الفاتح جـــبرا | ساخر سبيل

يبدو أن ظاهرة الإعتصامات ..والاضرابات .. والمطالبات التى تشهدها الساحة العربية قد ألقت بظلالها على الجميع

فقد إستيقظت صباح اليوم على أصوات مظاهرات صاخبة ، خرجت من غرفتى لإستجلاء الامر لأفاجأ بان أبنائى ناجى ونشوى يطوفان بأرجاء المنزل وهم يحملان (قطعة كرتون) مكتوب عليها بالقلم الأسود الشينى (الشعب يريد زيادة المصروف) وقد حولا المنزل إلى ساحة (تحرير) حيث إمتلأت الجدران بالملصقات التى كتبت عليها بعض الشعارات والمطالب المختلفة من شاكلة :

أوقفوا الصرف على السجائر
لا تدخين بعد اليوم
اللحمة أساس الحكم
لاب توب لكل مواطن

ما أن شاهداني حتى إزدادت حدة هتافاتهما وتعالت ، إقتربت منهما طالبا منهما أن يتوقفا عن الهتاف وينفضا (ويفرتقوها) قبل أن أقوم بتفريقها مستخدماً القوة ..

- نفرتقا ليه؟

- مظاهرتكم دى غير قانونية

- لكن دى مظاهرة سلمية والدستور بيقول ...

- )مقاطعاً) : القانون بيقول تطلعوا ليها تصريح ! إنتو هسه عندكم ليها تصريح !

- كل ما نكلم ماما نقول ليها عاوزين تصريح تقول لينا ما بديكم عشان خايفة ناس يتدسوا وسطكم وتحصل مشاكل ! والبلطجية يجو ينضموا ليكم !

- وهسه إنتو عاوزين شنو؟

- عاوزنك تحقق لينا الحاجات دى قبل سقف المطالب بتاعنا يعلا !!

- يعلا دى شنو كمان يا أولاد اللذين ؟ أوع كمان يكون فيها (أرحل) دى تبقى مصيبة سوداء !

- إنتا كمان يا بابا بتخاف من (أرحل) دى زى الجماعة !!

- كيفن ما بخاف مكنكش فى أمكم دى ليا عشرين سنة .. أرحل أمشى وين يعنى ؟

- طيب لجنة (التغيير) عاوزه تقعد معاك !

- هلا .. هلا .. هو كمان عملتو ليكم لجنة تغيير ومفاوضات وكده !

- أيوه أنا الرئيس و(نشوى) المقرر !

وجلسنا سوياً .. وقد تفاجأت بأن أول بند تريد أن تناقشه (لجنة التغيير) هو (الفساد) ... نعم الفساد

- يا أولاد إنتو ما عندكم راس؟ فساد شنو كمان ؟ البيت ده لا بيعمل (عطاءآت) ولا (ببنى عمارات) ولا عندو جمعيات خيرية وهمية ولا بشيد طرق وأنفاق ولا عندو شركات وميزانيتو معروووفه وبتتراجع من (أمكم) على داير المليم .. أها الفساد ده يجى من وين؟

- الصرف البذخى ده ما فساد ؟.. لما ميزانية (السجائر) بتاعت حضرتك تكون أكبر من ميزانية (التعليم) ده مش إسمو فساد !

- )ضاحكاً) : فساد شنو يا أولاد إنتو جنيتو ؟ ما الدولة الإسمها دولة ميزانية (الأمن) فيها أكبر من ميزانية (التعليم) والصحة ذاااتا !

- الدولة عاوزة (تأمن روحا) لكن إنتا عاوز (تهلك روحك) ونحنا ما ح نسمح بالعملية دى

- لكن ...

- مافيش لكن .. موافق على إيقاف التدخين وتحويل ميزانيتو (للتعليم) وللا ما موافق؟

بينى وبينكم تحسباً لإرتفاع حدة الإعتصامات والإضرابات داخل المنزل وتخوفاً من رفع سقف المطالب والمسألة تبقى فيها (أرحل) وشنو ما عارف ولأن (التدخين ضار بالصحة) وجدت لزاماً علي ان ارضخ فوراً لهذا الطلب .

- أها المطلب التانى شنو؟

- زيادة المصروف عشان يتماشى مع زيادة الأسعار الكلو يوم دى ! إنتا هسه يا بابا عارف سندوتش الفول المصلح بى كم؟

- ما عارف !

- ما دى هى ذاااتا المشكلة .. لازم تكون ما عارف لأنك ما بتتفقد (شعبك) وما بتعرفوا بياكل شنو وبيشرب شنو والمصروف البتديهو ليهو ده كفاية وللا ما كفاية وبيقعدو كم يوم !!

بدون أى مناقشة تمت الموافقة على زيادة المصروف ليتلائم مع (سياسة التحرير) ! على الرغم من عجز الموازنة المنزلية وقلة الدخل وكثرة الإلتزامات وكمان بصراحة كده خوفا من (إرحل) !

وبعد أن تم إستعراض كافة المطالب وقبولها (طبعاً) طلبت من أعضاء (لجنة المفاوضات) إنزال كافة اللافتات وإزالة كافة الملصقات وإيقاف (المسيرات) غير أن الإجابة كانت حاسمة :

- عاوزين المطالب دى تتحقق فوراً !

- يا جماعة أدونى فرصة يومين تلاته أجتمع مع حكومتى أقصد (أمكم) عشان نتدارس الموضوع

- ما فيش حاجة إسمها تدارسوا الموضوع .. ليكم عشرين سنة ما إتدارستو ليه؟ منتظرين شنو ؟ لازم المطالب دى تتنفذ فوراً وإلا ...

- كمان جابت ليها تهديد ... وإلا شنو؟

وهنا قامت نشوى من مكانها متجهة ناحية (الكاميرا) التى كانت تخفيها فى مواجهتى بعناية وأحضرتها قائلة :

- ما تهديد ولا حاجة بس ح نقوم نرسل الشريط ده (للجزيرة( !!

كسرة :

عشان كل حاجة ولا (تغطية الجزيرة) .. قمت بتنفيذ المطالب على الفور

الشعب يريد زيادة المصروف...دي مظاهرة مظاهرة..دي المطالب ولابلاش...التحية لثورة التغيير بالنفس...احترامي يادكتور

الفاتح جبرا قلم ساخر جدا يا ابو الزهور

كنت اتحدث مع صديقى ( المهاجر ) نهار امس و حكى انه اتصل على خالتة التى يحبها و و تحدث

ايضا الى بنت خالتة و قالت له ( شوف يا فلان فى عرس و لا نطلع الشارع ) ضحكت كثيرا ة قلت

لنفسى ( الشارع قريب )

شكرا ابوالزهور

أصبحت كتابات جبرا هي عزاؤنا الوحيد ..جراء فساد وإجرام النظام الحاكم
ولا يختلف اثنان أن سفينة الانقاذ تقترب من الغرق - من هنا نقول لمن شايع النظام لا داعي للمكابرة مادام الفرصة سانحة للرحيل والانسلاخ والهروب والهرولة نحو الجماهير الغاضبة التي تستعد لساعة الصفر للاجهاز على النظام الذي يحتضر وتخفت الاصوات المتشنجة والناشزة التي كان تتبجح من ما يسمى بصقور الانقاذ التي اصبحت مهيضة الجناح تنتظر مصيرها المشؤوم
عموما لن يكون التنصل كافيا لشباب التغيير مالم يكشف معتزل صفوف النظام عن العبث والفساد الذي تمارسه هذه العصابة والا ستكون التوبة والتبرؤ ناقص – وفي هذه الحالة عليه يكون فوت الفرصة وينطبق عليه مثل الغبش المكتلوة ما بتسمع الصايح – ونقول ليه من بعد ما فات الآوان - جاي تعتذر- من وين نجيب ليك العذر ...

شكرا استــــــــــــــاذ ازهري بعد ما كنت في السودان وشفت الحاصل نؤيد الشعب زيادة المصروف

الشعب يريد زيادة المصروف ... الفاتح جبرا 20_a

دي مصروف الطفل للروضة

من طرف **ود عشمان** 27th مارس 2011, 14:31

الاخ ازهري و بقية الاخوه المتزوجين

دي وصية مني اي واحد فيكم يجب ان يلبي طلبات افراد اسرتو و الا تحصلوا بقية الجماعة في جده
ديرو بالكم ..

لكم التقدير

شباب ..............

النظام يريد إسقاط الشعب

الشعب يريد زيادة المصروف ... الفاتح جبرا

الشعب يريد زيادة المصروف ... الفاتح جبرا

رد: الشعب يريد زيادة المصروف ... الفاتح جبرا

رد: الشعب يريد زيادة المصروف ... الفاتح جبرا

رد: الشعب يريد زيادة المصروف ... الفاتح جبرا

رد: الشعب يريد زيادة المصروف ... الفاتح جبرا

رد: الشعب يريد زيادة المصروف ... الفاتح جبرا

رد: الشعب يريد زيادة المصروف ... الفاتح جبرا