ابوجبيهه

يا قرايح الشعرا النبيهة دبّجي الأوزان في ابجبيهة

استعرض الموضوع السابق استعرض الموضوع التالي اذهب الى الأسفل

يا قرايح الشعرا النبيهة دبّجي الأوزان في ابجبيهة

مُساهمة من طرف أزهرى الحاج البشير في 12th يونيو 2014, 17:22

كردفان الصيد فوق قويزو التبلدي الشامخ بعزو
يا جمالا نفخر بكنزو يا حليلا عروس الرمال
فيك حلاوة الريف يا سراجا نسمة ذوق أرواحنا و مزاجا
يا ام جديا في طريقنا جاجا شال قلوبنا و صوب نبال
يا البلوم الطاير بفوقي للقماري الباتت تقوقي
ودي ريدي الصادق و شوقي من فؤادي لآرض الجمال
طوف سهولا و اعبر جبالا و مر بكل وديانا و تلالا
تلقى ريلا اليغريك دلالا و الأسود الحارسة الحجال
أمشي بارا و مر بام روابة و النهود الآسر شبابه
في الأبيض غرد حبابه درة رايعة و حايزة الكمال


البلوم ارجوك يوم تحلق شيل رسايل الشوق المحرق
تلقى زولا ضامر رشيق في بسيمتو يلوح الهلال
احكي ليهو الحاصل عليا من شجوني الفي قلبي حية
شيل رسايلو المرسولة ليا بلطافة و اسرع تعال


خلي بالك دي البان جديد و انت من كاسقيل قوم صعيد
اغشى خور شوشاي و العديد و المخارف يمنة و شمال


قيلة في الحمادي النضارة و خور نبق كاسياهو النضارة
شوف (هبوب) الفتق نواره و لينا لاح الحاجز قبال


سنجكاية العز ديك حقولا و الدلنج ركازة القبيلة
من ضيافة المك مافي حيلة في دلنجنا عروس الجبال


في سرف تيمين ليكا راحة و في جمال التكمة و سماحه
و شوف خدار تندية و وشاحا دي الطبيعة الحوت الجمال


شيل رسايل الشوق لي كدقلي و البريق اللاح فيها قبلي
فرح العشاق عرسو قبلي كمبلا و نقارة و دلال


لي ضفاف الليري الفتية جمرة الأشواق لس حية
و البراءة الفي عيون صبية سكسك الخناق بيها جال


و لي دميك الحلوة و تلودي و ام حطان الحفظت عهودي
و للردوم قارين لي شهودي باشتياقي و لي انتي فال


ميري جوة و برة و جبالا سطر التاريخ لي نضالا
بي فكينا و مندي و رجالا يفخر الآباء و العيال


يا جبال النوبة المنيعة ساحرة فيكي الناس و الطبيعة
للمكارم ايدك سريعة و حالي كل ما فيكي و حلال


الفؤاد الاحساسو دالو لي بلاد المك ام دبالو
سيف قدير كان المهدي سالو و لينا بي امجادو احتفال


يا قرايح الشعرا النبيهة دبجي الأوزان في ابجبيهة
القى لي هيبان وين شبيها و لا لي دلامي المثال


للفريق في اللبيض و كيلك و خلي سوق الميرم دليلك
يا بلدنا الخير كلو هيلك غرة انتا و شامة و جمال


بي لقانا لقاوة المدينة نطفي حر اشواقنا الدفينة
حورا حور الدبكر و عينه و الورود جنقارو الطوال


بابنوسة و دينقا و جلاله جلسة فيها اتلمو السجالة
من فوارس الجلة البسالى اهلي اهل الجود و الخصال


للضيوف في اب زبدالكرامة ديلا اهل الجود و الكرامة
آسرة فيها الفولة الوسامة و فيها كنز المال و الرجال


حلة المحفورة الحبيبة و السنوط الملت الزريبة
و ام رسوم الأرض الخصيبة و نلقى في خماس المنال


من هناك قاصدين الأضية زهرة الآمال فيها حية
و نمشي شق الدود الوفية و لي غبيش بنشد الرحال


للسعاتة المزدانة قرب خاطر الخلان فيها طيب
في الخوي القوز لي حبيب شاغل الأفكار و الخيال


النفس بتحن لي نديده و العشم لام سيالة عودة
للوجوه الطيبة الودودة و الكناس الفيهو الغزال


نقصد البحرية و نزورا نفضي ليها حقوقا و نذورا
فيها و ام بركات الحريرة روعة السمحين الخصال


من ضواحي امدم لامصميمة للزريبة في خيرا و نعيمة
فيها اهل الخير و العزيمة المسيد و اللقمة الحلال


ضاوي نور امعشرة الخلاوي و امعدارة بتهدي و تداوي
و البنية الليل فيها داوي ذاكرة رب العز و الجلال


نمشي نغشى الغبشة و عشانا كم ليالي مساهرين عشانا
حيا هيف ابحمرة و غشانا اسكر الارواح دون خبال


في ام كريدم نخوة و شهامة و للمعالي ام بادر علامة
دايمة ليك يا الحمرة السلامة و الصلاح و يدوم الوصال


لاب حراز الحرز المثاني ليا زفرة و عبرة و اماني
ما ببوح بالسر في الأغاني الا صابر و كاتم السؤال


يا بروق النو في الضلمة طرفي يحكي الطرفة و اعم
مخولة الكاتلاهو و معمة عز وصالا و لو قي الخيال


جولة في المزروب و الزريبة و الخلاوي الضاويات دروبا
الشيوخ العمرت قلوبا بالهداية و كسر الضلال


ساحرة طاهرة جميلة و قيافة وربي يحفظا حلة معافى
وراقية كجمرو حايزة اللطافة و نعمة خور جادين بيها سال


ذايعة ليك يا المقنص نفايل و دامرة فيك يا دميرة القبايل
و حلوة فيها بحيرنا الشمايل لافتة للانظار كالهلال


للجفيل و هشابا و حقولا و البشيري التايه نخيلا
شوف مليحة الأنفس تميلا شوقي يا خلان ليها طال


حيي في شيكان البطولة و حيي من خورطقت فصولا
و يا مرافي ام جر لينا طولة و شوقنا لي لقياك لا يطال


صفحة للتاريخ فيك مهابة يا اديم البركة و ترابا
و ام عضام الختمت حسابا و ورت الغازين الوبال


طاري للقردود يا نسيما و طاري ام القرى في نعيمه
و ام رسوم و ام عردة العظيمة و ليا في ام قوزين ابتهال


جولة فيكي ربوعنا المطيرة وماني ناسي ام دلوة و كجيرة
و التميد و الجكة و عبيرا و ذكريات اب دكنة الفعال


كردفان الغرةالفتية لي ضريح اب شرا و اب صفية
و الولي و راقدين البنية ضاوي نورالفقرا الليال


يحفظك مولاي يا عروسنا و ليك تعم الرحمة و تكوسنا
و بيكي ترضى و تنعم نفوسنا يا العزيزة يا بلد الرجال
avatar
أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

رد: يا قرايح الشعرا النبيهة دبّجي الأوزان في ابجبيهة

مُساهمة من طرف الفاتح محمد التوم في 12th يونيو 2014, 19:56

شكراً شيخنـــا و استاذنا الازهري ..... لهذا التألق
في ...أوبريت كردفـــان الكبرى ....
التأليــف / الأســتاذ  محمـــد حامد آدم  " أبوشــقرود "
يعمل على تلحينه الاستاذ .... عبدالرحمن عبدالله " ودبارا " 

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: يا قرايح الشعرا النبيهة دبّجي الأوزان في ابجبيهة

مُساهمة من طرف أزهرى الحاج البشير في 14th يونيو 2014, 00:27

شكرا شيخي .. نعم وجدت الأوبريت في الفيس وإن قام ود بارا بهذا العمل يكون قد أوفى كردفان حقها
avatar
أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

رد: يا قرايح الشعرا النبيهة دبّجي الأوزان في ابجبيهة

مُساهمة من طرف خدورة أم بشق في 14th نوفمبر 2014, 10:27

حاجة روعة شكراً أبو الزهور

خدورة أم بشق
مشرف منتدى الشعر
مشرف منتدى الشعر


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى