ﺍﻟﻌﻴﺪ ﻭﺻﻞ...ﺻُﻤﻨﺎ ﻭﻓﻄﺮﻧﺎ ﻋﻠﻲ ﺑﺼﻞ

قصيدة للشاعر الكبير هاشم صديق

************
ﺍﻟﻌﻴﺪ ﻭﺻﻞ
ﺻُﻤﻨﺎ ﻭﻓﻄﺮﻧﺎ
ﻋﻠﻲ ﺑﺼﻞ
ﻓﺾ ﺍﻟﺸﺮﺍﻛﺔ
ﻭﺍﻟﺤﺰﺍﺯﺍﺕ ﻭﺍﻟﺸَﻜَﻞ
( ﺭﻳﻨﻘﻮ ) ﺍﻟﺠﻌﻴﺺ
ﻋﻤﺮ ﺍﻟﺒﻄﻞ
ﻭﺣﻠﻴﻤﺔ
ﺭﺟﻌﺖ ﻟﻲ ﻗﺪﻳﻤﻪ
ﻭﻟﻠﻬﺒﻞ.
ﻣﺎ ﺷَﻊّ ﻧﻮﺭ
ﺇﻻ ﺇﻧﻀﺒﺢ
ﻭﻫﺠﻮ ﺃْﻧﻜﺘﻞ.
ﻣﺎ ﺇﺗﻠﻢ ﺻﻒ
ﺇﻻ ﺇﻧﻔﺼﻞ.
ﻣﺎ ﻗﺎﻡ ﺳﻼﻡ
ﺇﻻ ﺇﻧﺘﺤﺮ
ﻗﺒﺎﻝ ﻳﺘﻢ
ﺷﻬﺮ ﺍﻟﻌﺴﻞ .
ﻣﺎ ﺻُﻤﻨﺎ ﻳﻮﻡ
ﺇﻻ ﻭﻓﻄﺮﻧﺎ
ﻋﻠﻲ ﺑﺼﻞ
ﻭﺩﻩ ﻋﻴﺪ ﺟﺪﻳﺪ
ﺑﺮﺿﻮ ﺍﻟﺤﺼﻞ
ﻳﺎﻫﻮ ﺍﻟﺤﺼﻞ
ﻭﺑﺮﺿﻮ ﺍﻟﻬَﺒﻞَ
ﻳﺎﻫﻮ ﺍﻟﻬَﺒﻞ.
………..
ﺍﻟﻌﻴﺪ ﻭﺻﻞ
ﺇﺗﻤﺤﻨﺖ
ﺷﻤﺲ ﺍﻟﺼﺒﺎﺡ
ﻭﻓﺘﺤﺖّ
ﻋﻴﻦ ﺍﻟﺠِﺮﺍﺝ
ﺇﺭﺗﺞّ
( ﺷﺎﺭْﻉ ﺍﻟﺤِﻠﺔ )
ﻭﺍﻟﺴﻮﻕ ﻭﺍﻟﻜﺒﺎﺭﻱ
ﻣﻦ ﺍﻟﺤﺼﻞ .
ﺍﻟﻨﻴﻞ ( ﺣِﺴَﺎ )
ﺟﻒ ﻭﺿِﻤِﺮ
ﺃﺻﺒﺢ ﺗﻘﻮﻝ
ﺭﺳﻤﻮﻫﻮ
ﺑﻲ ﻗﻠﻢ ﺍﻟﺤِﺒِﺮ
ﺍﻟﻨﻴﻢ
ﺗﻨﺎ ﻓﺮﻋﻮ ﺍﻧﻜﻔﺎ
ﻭﻧﺎﻡ ﺍﻟﻔﺮﺡ
ﻧﻮﻣﺎً ﻗﻔﺎ .
ﺃﻣﺎﺗﻨﺎ ﻣﺎ ﻟﺒﺴﻦ
ﺷﺒﺎﺷِﺐ ﻟﻠﻤﺸﻲ
ﺣَﺪّﻥ ﺣِﺪﺍﺩ
ﻣﺸﻲّ ﺍﻟﺤﻔﺎ
ﻋﻠﻲ ﺍﻟﻤﺠﺎﻣﺮ
ﺑﻲ ﻣﻬﻞ
ﺑﻜﺖ ﺍﻟﺘﻬﺎﻧﻲ
ﻣﻦ ﺍﻟﻀﺤﻚ
ﻭﺿﺤﻜﺖ ﺩﻣﻮﻋﻨﺎ
ﻣﻦ ﺍﻟﺰﻋﻞ
………..
ﺍﻟﻌﻴﺪ ﻣﺒﺎﺭﻙ
ﻳﺎ ﺟﻤﻮﻉ
ﻣﺎﻛﻠﻴﻦ ﻭَﻫَﻢ
ﻻﺑﺴﻴﻦ ﺿﻠﻮﻉ
ﺭﺍﻓﻌﻴﻦ ﻓﻮﺍﺗﺢ
ﻟﻠﺜﻮﺍﺑﺖ ﻭﺍﻟﻔﺮﻭﻉ
ﺷِﻦّ ﺍﻟﺨﺒﺎﻳﺰ
ﻓﻲ ﺍﻟﺠﻨﺎﻳﺰ
ﻃﻌﻢ ﺍﻟﺤﻼﻭﺓ
ﻓﻲ ﺩﻧﻴﺎ ﺟﻮﻉ ؟
ﻭﻛﻴﻒ ﺍﻟﻮﺻﻮﻝ
ﻭﺍﻟﺤﺎﻝ ﺭﺟﻮﻉ ؟
ﻭﺩﻳﻤﻪ ﺍﻟﺴﺆﺍﻝ :
ﻛﻴﻒ ﺍﻟﺒﺼﺎﺭﺓ
ﻭﻛﻴﻒ ﻳﻜﻮﻥ
ﺑﻜﺮﻩ ﺍﻟﻌﻤﻞ ؟
……….
ﺍﻟﻌﻴﺪ ﻭﺻﻞ
ﺭﺍﻛﺐ ﻗﻄﺎﺭ
ﻓﺎﺿﻲ ﻭﻛﻔﻴﻒ
ﺧﻠﻮﻧﺎ
ﻣﻦ ﺣﻖ ﺍﻟﺨﺒﻴﺰ
ﻛﻴﻔﻦ ﻳﻜﻮﻥ
ﺣﻖ ﺍﻟﺮﻏﻴﻒ ؟
ﺍﻟﻠﻪ ﺃﻛﺒﺮ
ﻟﻠﺼﻼﺓ
ﺍﻟﻠﻪ ﺃﻛﺒﺮ
ﻟﻠﻨﺰﻳﻒ.
ﺍﻟﺜﻮﺭﺓ
ﺣﺎﺭﺑﺖ ﺍﻟﺤِﻠِﻢ
ﺣِﺮﺏ ( ﺍﻟﺤﺮﺍﺯﺓ )
ﻣﻊ ﺍﻟﺨﺮﻳﻒ.
ﺍﻟﻠﻪ ﺃﻛﺒﺮ
ﻟﻠﺴﻜﻮﺕ
ﻗﻮﻝ ﻳﺎ ﻣﻬﻴﻤﻦ
ﻭﻳﺎ ﻟﻄﻴﻒ.
ﻳﺎ ﺷﻌﺐ ﺃﻳﻮﺏ
ﻭﺍﻟﺼَﺒُﺮ
ﺷﻦ ﺑَﺸَﺮﺕ ﻟﻴﻠﺔ
ﺍﻟﻘَﺪُﺭ ؟ !!!
………..
ﺃﻧﺎ ﺃﺻﻠﻲ
ﻋﻘﻠﻲ
( ﺍﻟﻤﺎ ﺣﻠﻮ )
ﻭﻧﻀﻤﻲ ﺩﻳﻤﻪ
ﻧﻀِﻢ ( ﻛُﺘُﺮ )
ﻣﺶ ﻗﻠﺖ ﻟﻴﻚ:
( ﺃﻗﺒﺾ ﻋﺬﺍﺑﻚ
ﺇﻳﺪ ﺣﺪﻳﺪ
ﻣﺎ ﺗﺒﻴﻊ ﺟﺮﻭﺣﻚ
ﻟﻲ ﻋﺴﺎﻛﺮ
ﺃﻭ ﻟﺴﻴﺪ )
ﻭﺣﺴﻊ ﺑﻘﻮﻝ:
ﺍﻟﻌﻴﺪ ﻭﺻﻞ
ﻻ ﺗﺼﺪﻕ
ﺍﻟﻬِﺪﻡ ﺍﻟﺠﺪﻳﺪ
ﻻ ﺗﻨﻮﻡ ﻭﺗﺤﻠَﻢ
ﺑﺎﻟﻌﺴﻞ
ﺃﻧﻔﺾ ﻏُﺒﺎﺭﻙ
ﻳﺎ ﻛﺒﻴﺮ
ﺃﻛﺴﺮ ﻗﻴﻮﺩﻙ
ﻳﺎ ﺑﻄﻞ
ﺍﻟﻌﻴﺪ ﻳﻜﻮﻥ
( ﻳﻮﻡ ﺍﻟﺨﻼﺹ )
ﺃﻏﺴﻞ ﻋﻴﻮﻧﻚ
ﻣﻦ ﻏﺒﺎﺵ.
ﺫﺍﻛﺮ
ﺻﺤﺎﻑ ﻣﺎﺿﻴﻚ
ﻣﺜﻞ
ﻳﻤﻜﻦ ﻳﻜﻮﻥ
ﺑﻌﺪ ﺍﻟﻌُﺼﺎﺭ
ﺍﻟﻌﻴﺪ ﻭﺻﻞ
………
ﺍﻟﻌﻴﺪ ﻭﺻﻞ
ﺭﻃﻞ ﺍﻟﺤﻼﻝ
ﺑﻲ ﻛﻢ ﺣﺮﺍﻡ
ﻭﺍﻟﺠﻮﻉ ﻋِﺸﻖ
ﺭﺑﻂ ﺍﻟﺤِﺰﺍﻡ .
ﻏﺎﻟﻲ ﺍﻟﻔِﻌِﻞ
ﺭِﺧﺺ ﺍﻟﻜﻼﻡ
ﺧﻨﻘﻮﻧﺎ
ﺑﻲ ( ﺃﻣﻦ ﺍﻟﺒﻼ )
ﺳﺎﻣﻮﻧﺎ
ﺯﻱ ﺯﻓﺔ ﻫﻮﺍﻡ
ﻭﺍﻟﺪﻧﻴﺎ
ﺳﺮﻭﺍﻟﻬﺎ ﺇﺗﻨﺼﻞ .
……….
ﻗﻮﻝ ﻳﺎﻟﻄﻴﻒ
ﺟﺎﻳﻲ ﺍﻟﺨﺮﻳﻒ
ﻭﻛَﺴْﺮ ﺍﻟﺴﻴﻮﻝ
ﺍﻟﻔﺎﺗﻮ
ﻟﺴﻊ ﻣﺎ ﺑِﺮﺍ
ﻭﻻ ﺇﻧﺠﺒﺮ.
ﺣُﺰﻥ ( ﺍﻟﺴﺒﺎﻟﻴﻖ )
ﻣﺎ ﻛِﻀِﺐ
ﻭﻣﻄﺮ ﺍﻟﺸﺎﺗﻦ
ﻓﺎﺽ ﻧﺰﻝ.
ﻭﻋﻨﺘﺮ ﻣﺤﻜﺮ
ﻓﻲ ﺍﻟﻘَﺼُﺮ
ﻓﻲ ﺇﻳﺪﻭ
ﺭﻭﺡ ﺍﻟﻨﺎﺱ
ﻭﺃﻧﺼﺎﻝ ﺍﻷَﻣُﺮ
…………
ﻣﻮﻻﻳﺎ
ﺟﺎﻙ ﻋﻴﺪﺍً
ﺟﺪﻳﺪ
ﻗﺼﺮﺍً ﺟﺪﻳﺪ
ﻋﺮﺷﺎً ﻣﺠﻴﺪ
ﺣﺮﺳﺎً ﺷﺪﻳﺪ
ﺟﻮﻗﺔ ﻭﻧﺸﻴﺪ
ﻭﺍﻧﺖ ﺍﻟﺤﺼﻴﻒ
ﻭﻣﺎﻙ ﺑﻠﻴﺪ
ﺣُﻜﻤﻚ ﺗﻠﻴﺪ
ﻇُﻠﻤﻚ ﺭﺷﻴﺪ
ﺧﺎﻳﺾ ﻭﻗﺎﺷﺮ
ﺑﺎﻟﻨِﻌﻢ
ﻣﺸﺮﻭﻕ ﻣﺴﺘﻒ
ﺑﺎﻟﺮﻳﺎﺵ
ﺷﻌﺒﻚ
ﻣﻤﺴﺢ ﺑﺎﻟﻐﺒﺎﺵ
ﻳﺄﻛُﻞ ﻭﻫﻢ
ﻳﺸﺮﺏ ﻭﻫﻢ
ﻳﺤﻠﻢ ﻭﻫﻢ
ﻭﺍﻧﺖ ﺍﻟﻮﻟﻲ
ﻭﻣﻚ ﺍﻟﻄﻨﺎﺵ
ﻭﻓﻲ ﻗﻮﻟﻪ
( ﻫﺎﺭﻭﻥ ﺍﻟﺮﺷﻴﺪ ).
………..
ﻋﻴﺪﻙ ﺗﻤﺎﺍﺍﺍﻡ
ﺳﻴﺪﻧﺎ ﺍﻹﻣﺎﻡ
ﺯﻳﻚ ﻣﻨﻮ
ﻭﻗﺪﺭﻙ ﺷﻨﻮ ؟
ﻋﻠﻴﻚ ﻋﻔﺎﺭﻡ
ﻳﺎ ﺑﻄﻞ
………..
ﺍﻟﻌﻴﺪ ﻭﺻﻞ
ﻣﺎﻟﻲ ﺇﻧﺸﺮﻕ
ﻓﺮﺣﻲ ﻭﺑﻜﻲ ؟
ﻣﺎﻟﻮ ﺍﻟﺼﺒﺎﺡ
ﻻﺑﺲ ﺟﻼﻟﻴﺐ
ﺍﻟﻤﺴﺎ
ﻣﺎﻟﻮ ﺍﻟﺤﻨﻴﻦ
ﻗﻠﺒﻮ ﺍﻧﻜﻔﺎ
ﻣﺎﻟﻬﺎ ﺍﻟﻄﻮﺍﻗﻲ
ﺍﻟﺤﻤﺮﺍ ﺫﺍﺗﺎ
ﺍﺗْﻠﻔﺤﺖ
ﻭﺍﺗْﻮﺷﺤﺖ
ﺯﻣﻦ ( ﺍﻟﻄﻮﺍﺭﻱ )
ﻭﺍﺗﻌﺒﺮ
ﺣﻠﻖ ﺍﻟﺤﻮﺍﺭﻱ
ﻣﺮﺟﻴﺤﺔ ﺍﻷﻃﻔﺎﻝ
ﺑﻘﺖ
ﻓﻲ ﻋﻴﻮّﻧﺎ
ﺯﻱ ( ﺳﺎﻗﻴﺔ ﺟِﺤﺎ )
ﺍﻟﺪﻧﻴﺎ ﺷﺎﺭﺩﺓ
ﻣﻤﺤﻨﻪ
ﻭﻣﺸﺖ ﺍﻟﺘﻬﺎﻧﻲ
ﻋﻠﻲ ﺍﻷﺳﻲ
ﻻﺑﺴﻪ ﺍﻟﺤﻔﺎ
ﻭﺍﻟﺸﻮﻕ ﺟﻔﻞ
……….
ﺍﻟﻌﻴﺪ ﻭﺻﻞ
ﺻُﻤﻨﺎ ﻭﻓﻄﺮﻧﺎ
ﻋﻠﻲ ﺑﺼﻞ
--

(فيسبوك)