خمسه فى خمسه مع الوصيف أبخمسه...... منقول

خمسة في خمسة مع الوصيف أب خمسة

الأحد, 11 أكتوبر 2009 07:43

استأذن اخوانا في حلمنتيش الذين جادت قريحتهم بهذه النمات الخمس وانشرها هنا حتى تعم الانبساطة الديار المريخية وهي مش ناقصة فرحة وحتى يعم الانخساف ديار بني هلال وهي برضو مش ناقصة خسوف!!

(1)

نعم لا نريد ان نزيد الاوجاع.. او نجيب ليكم ضغط سكري او حتى صداع.. لانو ابو الهل قرب على الوداع بسبب اعلام الفول والخداع.. ((وفي اقوال اخرى ركب التونسية عدييييل))

وبما ان (حلمنتيش) جزء لا يتجزأ من كيان السودان (حلوة كيان دي) فقد انفعل الجميع بالخمسة.. رغم ان الاعلام اياه وصلت احلامه لدرجة الحجوزات والطيران الى بطولة اندية العالم في الامارات.. وجهزوا الحبل قبال يشتروا البقرة.. بل خطط البعض للحوارات مع النجوم الكبار زي ميسي وكده.. ولكن هيهات.. فقد ضاعت الامنيات وعاد الى الهلال الى زمن الخمسات والستات الذي ودعه منذ فترات.. وهذه بعض الزفرات لعلها تغسل الاحزان وتشطب من الشبكة كام قوون.. ولا حول ولا قوة الا بالله.

ديك الجن السوداني

(2)

توفي هلال.. اثر سكتة خمسية مفاجئة... يشيع لمقابر استاده (المقبرة) بام درمان.. انتهي المأتم بعد الهدف الخامس.. "إنا لله وإنا اليه راجعون".

الكدرابي للإعلانات الرقمية

(3)

وقال المتفرد الدولي:

انا شايف الهلال قل الادب واتعالى

في حق الزعيم كل الشتايم قالا

مقبرة السجم دفنوه في أوحالا

مازيمبي العنيد الخمسة جابا رجاله

(4)

اما مستك المستكاوي فقد بكى على (المقبرة) اكثر من بكائه على (الفقيد) حيث قال:

مقبره الخصوم اليوم بقت اسطورة

في وش الجميع مرئية بل منظورة

إعلام السواد قام وسّع المطمورة

والكورة ام قدود ورتنا كم ماسورة

***

مقبرة الخصوم يا حليل زمان امجادا

في اليوم التعيس قلبت على اسيادا

مازمبي الخطير حدد جميع ابعادا

موبوتو العجيب خلخل كيان اوتادا

***

مقبرة الخصوم الليلة صبحت رومة

أحرجت الجميع بالحيل بقت مكلومة

فنيات نهى بالهندي جد معدومة

والاعلام هناك ينعق نعيق البومة

***

مقبرة الخصوم اليوم بقت مفجوعة

بالخط العريض متصدرة الموسوعة

بالخمسة التمام الناس هناك مرصوصة

بي طولة اللسان الناس بتلحس كوعه

(5)

هُس.. ولا كلمة.. تعالوا السنة الجاية مع اخوك الاحمراني داك.. لكين تجو مذاكرين ما مردفين!!

طرف شمال:

ـ شايفين التواصل كييييف!!! انتو ما بتجوش ليه.. ما تبقوا تجوا!

ـ اخر بدع الهلالاب ان احد الهلالاب من ناس المجلس او من ناس المعارضة ما معروف منو رش ملعب الاستاد بالموية قبل مباراة مازيمبي عشان كده اللاعبين (اتزحلقوا).. طيب ناس مازيمبي ديل كانوا لابسين زلاجات..

ـ شكيتك لي الله يا مازيمبي الجماعة لي هسع ما عارفين الخمسة دي من شنو.. على طريقة عادل امام.. انت صحيت الصبح لقيت نفسك برعي واللا سحلية عدت على وشك.. واللا ايه.. لا حول الله..!

ـ بعد لفة راس المصارع علاء شلاليت.. اللفة (والقبة) انتقلت لرؤساء تحرير الصحف الهلالية..! قال الملعب مبلول قال!!

ـ يعني هسع ناس مازيمبي كان عرفوا معلومة الملعب المبلول دي حا تاخدوا كم في لوممباشي؟ انا ماشي لوممباشي اوواوو.. انا ماشي لوممباشي.. انتوا ماشين؟!

ـ لا ادري من اين علم حارس مرمى مازيمبي باغنية (على النجيلة رقصنا) فقام راقص طوالي..!!

تعريف الخمسة من الموسوعة:

خمسة أو خمسة و خميسة هي رمز يستخدم كتعويذة لدرء الحسد والسحر. وهي موجودة في التراثين الإسلامي واليهودي كما انها منتشرة في منطقة الشرق الأوسط وشمال أفريقيا وعدد من الدول الإسلامية ويعتبرها البعض نوعاً من الشعوذة. لخمسة و خميسة تسميات أخرى مثل يد فاطمة نسبة إلى فاطمة الزهراء في حين ان اليهود يسمونها يد مريم نسبة إلى مريم أخت هارون وموسى. كما ان للرقم خمسة ميزة خاصة في الديانتين مثل كتب التوراة الخمسة في اليهودية وأركان الدين الخمسة في الإسلام وأصحاب الكساء الخمسة لدى الشيعة ومع هذا يعتقد بعض من علماء الآثار أن هذا الرمز يعود إلى عصور ما قبل الديانتين اليهودية والإسلامية. عادة يعلق هذا الرمز على الحائط أو يلبس على شكل مجوهرات.

ـ يا دوب عرفت ليه ناس مازيمبي غلبوا خمسة عشان السحر ما يمشي فيهم من الذين اختلفوا على حافز الفكي!!

ـ الجماعة (كانو) مأملين ليك على (كانو) يغلب هارتلاند 5 صفر بس ناس (كانو الاولانيين) اكلو نيم زي ناس (كانو التانيين)!! وبرضو ده بيعتبر انجاز لي ناس كانو التانيين.. يا ربي ناس رد الاعتبار وناس حا نغلب 4 صفر حالتهم كيييف بعد التعادل السلبي مع انو الكورة كانت في ارض ناس كانو التانيين..

ـ اها لسه عندكم امل عطبرة تغلبوا 4 صفر واللا كانو قنعكم!!

ـ في دور الـ 32 ما غلبتوا اربعة تجي تغلبوا اربعة في دور الاربعة؟! معقولة بس.. في هضربات كده!! لفة الراس بتعمل اكتر من كده!