لعب اطفال الحباك قديما

زولك ده يا محمود ماهر وصنايعى درجه اولى

انحنا بنعرف عربات صناديق البرنجى البلصقوها بالانجل

تحياتى يا محمود

الاخ محمود طبعا العربات دى برضو صنعوها ليهم لكن تعال شوفنا فى الحباك زمان

عربات البرنجى زى ما قال غريق وهو تارى البرنجى دا قديم كدة

بعدين عربات الطين والقصب

وبعد كبرنا شوية بقينا نعمل عربات السلوك ودى فيها مجاسافات لازم تمشى تقطع السلك الشايك من جنينة الحكومة او جناين خليل الدنقلاوى او الموسسات الحكومية وحتى البوستة القريبة من الشرط ما سلمت سلوكها مننا



طبعا يا محمود اخوك عندو جنينة فى الحباك داير يسورها بسلك شايك وخايف يقطعو لكن اظن طريقة اللب الان اختلفت

الزعيم غريق
تشكر على المرور لكن عاوزين منك المزيد في هذا الامر خاصة ونحن متاكدين من قوة الذاكرة التي تتمتع بها ماشاء الله
الف تحية

ابوهريرة
مشكور على المرور
انا خايف انت تكون القطعت شجر الدليب كمان مش الاسلاك وبس هههه
المهم الجنينة لازم تسورها بحائط ... يكون زي الجدار الفاصل في فلسطين... الناس سابو الانجل والسلك من زمان... وبعدين طالما انو عندك مزرعة زي حقت نافع معناهو انت من الجبهجية المتسترين وكشفت نفسك
تحياتي

اخى محمود اخوك ماقطع شجر الدليب لكن كان عندو كارو برحل بيه الشقيق ليلا

ياخ سور فى الحباك خلينى اسور البيت اول انت قايلنى نافع المانافع ولاشنو

انا سعر الفدان عندى بمليون ونصف وفدان نافع بمئات الملايين

الاستاذ حامد
مرورك حلو جدا زي مرور اخونا هاشم وسط المدافعين داخل خط ستة
وزي قون الاستاذ النور في شباك اريل
لكن عاوزين توثيق وتعريف وطبيعي ان هذه الالعاب قد انقرضت ولاتوجد الان في عصر التكنلوجيا والتطور المزهل ولابد من ان تتحفنا من ذاكرتك القوية ما شاء الله.. وبالله عليك لو عندك صور قديمة لاتبخل علينا بها.
تحياتي

شكرا محمود على البوست

طبعا كنا نمشى المحلج وجنينة الحكومه ونجيب منها السلوك

وطبعا مسالة تزبيط العربيه كانت ماله لا تخلو من الموهبه وعاوزه ليها زول فنان

انحنا فى حلتنا كان عمر زكريا وحامد الطيب وابو كليقه ديل صنايعيه درجه اولى

بعد ما نجيب السلوك ناجر الواحد منهم بى تعريفه او يصنع عربيتين واحده له وواحده ليك

والامور تمشى تمام التمام بعد داكط

وطبعا انحنا فى الغالب وبعد السلوك ما بقت مجازفه خاصه من المحلج وكمان

هناك قطاع طرق اولاد العرديبه كن شافو فى ايدك سلك قيامتك ربطت وكمان اولاد حلة الانجل ناس محمد سعيد ديل شرسين بشكل رغم اننا كنا جاين من الفريق لكنهم كانو بخوفونا

طبعا انحنا ساكنين فى حلة الجلابه

والعربات دى تصلح ليك كم عربيه والزباين فى

تحياتى

ههههههههههه

ياخ انا كان مريت بموقف خفت فيه خوف

المهندس هاشم كان يبن مسجد ابوجبيهة العتيق الحالى دا وجابو الخشب للسقف

وانا جيت لقيت لى خشبه تنفع لصنع ترتر وكنا نصنع الترترات فى الخريف

وشلت الخشبه ومارق براحه شافنى هاشم زلانى جنس زله الله يرحمه بالجنة

وقال الا يكلم لى ابوى

وبعد تعب خليت الخشبة وخلانى مشيت

الاخ محمود انحنا فى الفريق بنلعب بطريقة اخرى
بنمشى القنطور وبنجيب الطين. طبعا الارضة بتجيب الطين من باطن الأرض عشان تبنى بيتها او القنطور. طبعا دا افضل من ان يخذ الوحد كوز موية ويقوم يعمل طين لأن الأهل بيرفضو لينا العب بالموية.
نقوم بصناعة أنصاف تيران اى الرأس والرقبة وأهم شيء القرون تكون قوية. ونسمى ذلك تور أمبطاح. بعد ذلك نبدأ مصارعة التيران
الثور الذى ينكسر قرنه يعتبر مهزوم.