ابوجبيهه

واحد مشوكش

استعرض الموضوع السابق استعرض الموضوع التالي اذهب الى الأسفل

واحد مشوكش

مُساهمة من طرف amin_manga في 8th أغسطس 2010, 10:31





واحد مشوكش


لو قلت عنك بأنك قبيحة فقد كذبت أيتها الجميلة، لكنك وللأسف الشديد إنسانة انتهازية


باعتني لأول مشتري وبأبخس الأثمان.. هذا قدري وأنا أؤمن بالأقدار، ولولاها لما أحببتك،
فكما يقولون (الحب أعمى) وهذا ما حدث لي بالفعل، ولو كنت أملك أمر نفسي لما أحببتك
ولأحببت صديقتك هالة فهي تفوقك في كل شيء، في الخلقة والأخلاق، لكنني ماذا أفعل مع حظي
العاثر الذي رماني في امرأةٍ لا يوجد في قاموسها شيءٌ اسمه المشاعر والأحاسيس النبيلة.....


لكنكم لو تعرفون باعتني لمن لازداد كرهكم لها؟


باعتني لمغترب يكبرها بعشرين سنة يقال بأنه طيار.. ويعني شنو طيار؟ ما سواق طيارة زيو
وزي بقية السواقين الماليين البلد، لو كان بسوق طيارتو لمطار هيثرو أو غيرو يعني يفرق
شنو من السواقين البسافروا بورتسودان والأبيض ودنقلا؟ علي الأقل ديل بسافروا لمدن سودانية
نحبها ونحب ناسها..
وتانياً هو مغترب وين يعني؟ مغترب في فنزويلا ولا تركيا ولا كوبا ؟
ما مغترب ليهو في دولة أقامت علاقات تجارية مع إسرائيل.. يعني ممكن يكون شغال سواق طيارة
إسرائيلية وما بعيد يكون انضم لجمعية الصداقة السودانية الإسرائيلية بتاعة ناس تراجي مصطفى
البتكتب في منبر سودانيز أونلاين المنبر بتاع المعارضين بتاعين الضللة، البقى مسيطرين عليهو
الكيزان..


يعني شنو عريسك أب كرشة ده لو ساقك الخليج وعشت في الخير والنعيم؟
هل ممكن يحبك أكتر منّي؟

ما أظن.. عريسك أب صلعة الأشتر ده ما قادر يرقص معاك كويس، الموسيقى كانت في جيهة ورقيصو كان


في جيهة، عليك الله ده حاتتفاهمي وتتناغمي معاهو كيف؟
زول ما قادر يتناغم مع الأغنية معقول يتناغم مع إنسانة شافها في بيت الجيران؟
عريسك ده قايلاهو لو طوّل خلاص، بعيش ليهو أكتر من خمسة أو ستة سنوات؟


والله أنا خجلت من الفنان الجابو ليك في حفلتك.. فنان أشتر وما بعرف يغني، الحفلة كلها كانت عبارة
عن أغاني هابطة.. أغاني كلها أغاني جبجبة.. وأنا ما أظلم الفنان ربما يكون متضامن معاي وكان عاوز
يقول الليلة دي ما ليلة السقوط الأخلاقي وسقوط العهود والمواثيق بس، بل هي ليلة سقوط الفن السوداني
الأصيل..
وأنا في الأول نويت أخرب الحفلة لكين من لقيت فيها الفنان الأشتر ده قلت مافي داعي، الحفلة
براها خربانة وأحسن الناس تتفرج على ذوق العريس التعبان. عليك الله لو كان عندو ذرة من الذوق، كان
ممكن يرقص ويبشر ويسكسك سكسكتو الشتراء دي؟
وأمك البلباصة البتحب القروش كانت تزغرد كل دقيقتين ومستلمة الحفلة التقول حفلة عرسها، نست كل
القروش الأكلتني مني، القروش الكسبتهن بتعبي وعرق جبيني..
نست كان كل يومين تلاتة ترسل لي أخوك الصغيّر القاعد يجي الطيش في المدرسة..
يجيني في كل مرة: قالت ليك أمي عاوزة ليها خمسين ألف.. قالت ليك أمي عاوزة لي مية ألف.. نست كل شيء..
نست الفواكه والسمك واللحمة والكوارع والباسطة وعصير التانك الكنت بجيبها ليهم كل يومين تلاتة..


أما أبوك الجبهجي الضلالي ده فعندي معاهو حساب طويل عريض.. المنافق كان طوالي ينادي لي تعال يا
أيمن يا ولدي.. بالله في زول بشكوش ولدو؟ أنا كان ما سجمان أناسب لي زول كوز.. ديل انقلبوا علي
شيخهم ما بنقلبوا علي أنا المسكين!
بس أنا بتمنى الحكومة دي تتقلب وأبوك ده يروح في ستين داهية ..
وإن شاء الله بركة الشيخ العليش كلكم يسوقوكم لاهاي، وأنا من هسه مع محكمة الجنايات الدولية قلباً وقالباً..
إن شاء الله تطلّع روحكم يا مجرمين يا البتشوكشوا أبناء شعبكم.. وبعد كده نحن ما حا نسكت على الظلم والتهميش..
وأقولها ليكم بالفم المليان.. حلايب مصرية.. ونحن مع حق تحرير مصير جنوب السودان.. وبنتضامن مع كل حركات التحرر في العالم..
الناس قالوا عوض حايبكي ويتأثر، لكين لما شافوني في الحفلة عرفوا إنو عثمان ولد ليهو سبع.. لا بهموا شاكوش ولا بهموا ضياع القروش.. هيييع أنا أخوك يا رشا..


ونحن ناس أهلنا ربونا علي القناعة والصبر عند المصائب... بس عندي كلمة للعريس إن شاء الله لما ترجع
الخليج تلقى روحك فنشوك بسبب الأزمة المالية العالمية.. يا سواق الطيارة يا متفلفس يا أبو نظارات..


وإنت يا العروس... أنا ما بحقد عليك، لكين بتمنى من الله، أصلو ما تضوقي سعادة مع عريسك أب كرشة ده..


وفي النهاية بقول ليك إن شاء الله لما تكونوا مسافرين الخليج ما تلقوا حجز إلا في سودانير..
عشان تلحقوا أمات طه..


الله أكبر عليكم.. يا أعداء الحب..


amin_manga
نشط مميز
نشط مميز


الرجوع الى أعلى الصفحة اذهب الى الأسفل

رد: واحد مشوكش

مُساهمة من طرف محمد قادم نوية في 8th أغسطس 2010, 11:34

جنابو سلامات 000000000 دايماً تاتي بالجميل والمذهل
لكن الجُلُكْ دا ضرب اخينا دا بشاكوش قوي خلاص ؛ الزول دا بالله تاني شنو الماقالو؟
اخينا بس عليهو الصبر ويعتبرها ماقسمتو ؛هوماسمع بالمثل الساير اليومين دييل:كُن كالمسمار كلما اخذ شاكوشاً اذداد قوة ومتانة

محمد قادم نوية
مشرف منتدى الصوتيات
مشرف منتدى الصوتيات


الرجوع الى أعلى الصفحة اذهب الى الأسفل

رد: واحد مشوكش

مُساهمة من طرف amin_manga في 8th أغسطس 2010, 12:09

دا كلام نجارين سااااااااااكت يا عمك ....
مشكور علي المرور

amin_manga
نشط مميز
نشط مميز


الرجوع الى أعلى الصفحة اذهب الى الأسفل

رد: واحد مشوكش

مُساهمة من طرف محمد قادم نوية في 8th أغسطس 2010, 13:59

ياجنابوقلت لي داك زي بتاع عمنا صالح؛ هاك تاني حاجة كده :
في الليلة ديك
القصة ذاتا بقت عليك
يا عبدو وأدوك الشريط
يوم قلنا ليك انضم معاها وانتظر
شوف اليكون إن شاء الله خير
أبيت تسمع كلامنا بقيت لميض
قلت احسن أكون تقيل
أنا ما جميل
باكر بعد باكر بكهربا ليك بي نظرة قتيل
وبقيت تقيل لامن سقوك موية الغسيل
وقعدت يا زينة الرجال
كهربجي قال
يوم جيت تلفلف زي زمان وتباري بقعر الشجر
كايس كراسي الخيزران
والبت تجي وتمشي وتلف مرات تقيف
يا زول معاها ولد حريف
صاحبنا بالاحساس عرف
وسالت والناس كلموك
ملعون ابوك دنيا أم قدود
بقت.. البقت
وقعدت في شارع الزلط
تبكي وتجعر
والخدود اتورمت
ضهر القميص
كم القميص .. يد القميص
حتى الفنيلة اتشرطت
يا عبدو عيب
قوم يا خي صلي علي الحبيب
يا أخوانا لا أنا داير أموت أقع البحر
أنا بنتحر
يا عبدو عيب الدنيا حر والموية بتسخن عليك
تلاتة ساعات كاملة زولنا يسب ويكيل
ودموعو تتخرخر تسيل
دموعو سايلات بالكفوف
وشرايطو تلمع في الكتوف
بقى فيلسوف
في كلام عن الدنيا أم قدود
وعلاقة بين يوم السبت وعين الحسود
ومقارنات بين الجمال والجهل وسوء الاختيار
قال شينه قال
قال شينه قلنا كلام صحيح
وخطيبا زاتو ولد قبيح
وكمان سنيح
دا كلام صحيح
بس قوم ارح
الواطة صبحت دار ننوم
قام تاني جاب سيرة البحر...



محمد قادم نوية
مشرف منتدى الصوتيات
مشرف منتدى الصوتيات


الرجوع الى أعلى الصفحة اذهب الى الأسفل

رد: واحد مشوكش

مُساهمة من طرف ندي هاشم في 8th أغسطس 2010, 14:32

رهيبين لقيتكم بتقولو كلام عجيب لكن؛ قصيدتك رهيييييييييبة ياودقادم وين كتاباتك الكتييييرة دييك عن الحرامية والشواكيش والجماعة 0000000 الطيبين ديك ماشايفاها ؛ نفسي اقراء ليك حاجة عن الحرامية لمن بتذكر "البلاعيين" بموت من الضحك
تسلمو عن الظراااااااافة

ندي هاشم
نشط ثلاثة نجوم
نشط ثلاثة نجوم


الرجوع الى أعلى الصفحة اذهب الى الأسفل

رد: واحد مشوكش

مُساهمة من طرف محمد قادم نوية في 9th أغسطس 2010, 09:45

صباح الخير جنابو 00000000000 خليك قريب من قيفة بحر احمر 000000لانو ابوالسيد هسي بكون في خطرات القيفة اتحرك من امس بالليل والزول هسي النعاس بكون كاتلو حصلو سريع 0000000 هاك تلفونو 0907603506zain sudan
*شكراً علي مرورك اختي ندي ولو دايرة الحاجات دي خليك مداومة علي طول -------- حتلقي اي حاجة حتي "مافي شغل" ذاتو ممكن تلقيهو
-------------------------
مادام هى ما راعت شعورك ولا ضميرا هى استحى
أنساها والبكا مابيفيد قشقش دموعك وأمسحا
كلمنى شن وداك قبيل تظهر مشاعرك تفضحا
خليت حى السوق رياض يانعة وزهورا مفتحة
طولت إيدك لى قطوف زهرة وغميسة مسارحا
زى ما هى عاشقة الإغتراب برضو أنت عاشق ملمحا
ما كنت يا مظلوم دوام دايماً تشكرا تمدحا
وما ترضى لو كان بالغلط بى كلمة انسان يجرحا
ما كت فوق كل البنات تسرد محاسنا تشرحا
كانت عواطف إنسان ضعيف ساكت جناحى مجنحا
انشاء الله منها تتعظ تكون عظات تتوشحا
كانت حساباتك غلط فى القسمة والضرب اتمحا
اتأنى فى جبر الكسور براحة أجمعا وأطرحا
وآخر شى كان تعلرف براك حتى الغرام بقى مصلحة
بت حوة يا مظلوم بقت بالمال عقولا ملقحة
يا ريت قلوبنا الناس بعد ما تحب تخش المشرحة
يبدو المكامن فى القلوب كيف الشرايين تنضحا
يتراجع الأخدو اللسان صح والله زى ضل الضحى
مغرورة ما دارت سكون بلدن شقاوة ودردحة
لا تمشى تنزل بى تحت لا حتى أرضك تنقحا
لا بوغة لا موية شراب لا واطة ماها مصلحة
لا شلت للمحرات فطور لا شتلة ماها مصفحة
كانت قبيل طمعانة فيك فارسن جيوبو متمسحة
دايراكا يوم جيت للعرس نار الله فى الناس تقدحا
الشيلة بالشنط الكبار مقفولة راقدة مبطحة
فى الحلى والناس دار تشوف راجين متين تجى تفتحا
وكان بالا فى شهر العسل طول الزمن ما يبرحا
ترحل معاك لى بيت كبير موكيت وحيطو مسلحة
عربيتك الملك الحلال ..جلد النمر والملفحة
بوتوجاز مولع وديب فريزر وأب رموت والمروحة
تسرق مناها قبل يتم وكل المشاعر تضبحا
ويا زول الحياه مدرسة ودايما مقررا فى الصحى
ممكن نعينك فى الدروس لو إنت غلبك تشرحا
وأعرف بأنو أول درس الزول بياكل المقدحا


محمد قادم نوية
مشرف منتدى الصوتيات
مشرف منتدى الصوتيات


الرجوع الى أعلى الصفحة اذهب الى الأسفل

رد: واحد مشوكش

مُساهمة من طرف ابوطالب في 9th أغسطس 2010, 15:09

يا زعيم قصة الشواكيش دى داير اهديها ل(ابوسستة) فردتى

ابوطالب
عضو نشط
عضو نشط


الرجوع الى أعلى الصفحة اذهب الى الأسفل

رد: واحد مشوكش

مُساهمة من طرف amin_manga في 10th أغسطس 2010, 08:55

يا خي الراجل خلاص وبفضل الله اتأهّل وكمان قطع شوط مشكور علي المرور وخالص تحيّاتي
ول نوية صحبك ختر دغيشا بدري وكن قريب في عطبرة وخلاص انقرن من الخريف ...
شووووووووووووووووووووووووووووووووووووووووووقكم

amin_manga
نشط مميز
نشط مميز


الرجوع الى أعلى الصفحة اذهب الى الأسفل

رد: واحد مشوكش

مُساهمة من طرف محمد قادم نوية في 10th أغسطس 2010, 09:28

صباح الخير جنابو-------
واخينا ربنا يوصلو بالعافية والسلامة للأهل من مجابدة الوحل دي قالو خريف تقيل خلاص
وقال لي امبارح ركّب مكنة عقيد وكده نظام زول قرن وكده والحمد لله حصلك سريع

محمد قادم نوية
مشرف منتدى الصوتيات
مشرف منتدى الصوتيات


الرجوع الى أعلى الصفحة اذهب الى الأسفل

رد: واحد مشوكش

مُساهمة من طرف amin_manga في 10th أغسطس 2010, 10:57

اها يا اخوي ول نوبة !!!!
هلا هلا علي الجد والدور جاييييك وابقي مارق الحق التبش وام اباط والنجرمتي ..وام جنقر وكدا

ورمصاااااان كرييييييييييييييم يا احباب

وتقبل الله منّا ومنكم الصيام والقيام وصالح الاعمال

amin_manga
نشط مميز
نشط مميز


الرجوع الى أعلى الصفحة اذهب الى الأسفل

رد: واحد مشوكش

مُساهمة من طرف محمد قادم نوية في 10th أغسطس 2010, 13:02

نهارك سعيد جنابو
ورمضان كريم علي الجميع تصومو وتفطرو علي خير ؛ بختكم ياجنابو رمضانكو بارد خريف ؛لكن نحنا هنا الحمو كاتلنا عدييل بس ربنا يكتر الاجر
بعدين ياجنابو نحنا لو ربنا طلق نمشي صيف حنان ونلقي ام شرتو طلعت والعجاج كاتل

محمد قادم نوية
مشرف منتدى الصوتيات
مشرف منتدى الصوتيات


الرجوع الى أعلى الصفحة اذهب الى الأسفل

رد: واحد مشوكش

مُساهمة من طرف Suhad Abduelgfaar في 10th أغسطس 2010, 14:23

الله يكفينا شر الشواكيش يا جنابو و شر سودان طير تسلم ويسلم ود نويه على الاضافه

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

بأ دا كلام ياجنابو؟

مُساهمة من طرف محمد قادم نوية في 14th أكتوبر 2010, 10:00

جنابو ياشخصية أول حاجة نقول ليك"Good morning"وتانياً السد العالي دا ماتفتحو شوية كده -- كل اللي حاصل عليك برضو معانا
وإنشاء الله نشوفك قريب معانا

محمد قادم نوية
مشرف منتدى الصوتيات
مشرف منتدى الصوتيات


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى