اهل ابوجبيهه واللحوم

ابوجبيهه بلد خيراتها كتيرة ووفيرة وناسها مستمتعين بجمال الطبيعة وخيرات البلد ومشهورين باكل اللحوم وهي تقريبا
عادة كل الناس حبهم للحمة ومن اشهر الناس وهم كلهم اعماننا واخوانا عمنا عطية محمد خير السيد وهو من اهلنا ناس جبل العمدة بيحب اكل اللحوم وقال والله انا مابشبع من اكل اللحمة بس حنكي وسنوني بيوجعني بس وده تعبير فريد وعجيب.
وعمنا محمد علي بشارة كذلك من المحبين للحوم وليه طريقة خاصة في تناولها وعندما ينظر اليك وانت تاكل
وترمي العضم وبه لحمة يقول ليك ياخي ديل مابيعرفوا اكل اللحمه وبيبوظوا الاكل ساكت وعنده ناس لا يحبهم يعني اذا دعيتوا اياك ان تدعوا هولاء الناس لانو بصراحة حيترك الاكل ويسخر منك يقول ده عندو ليه كيلوا لحمه وراح عازم ابوجبيهه كلها) واذكر وانا صغير كان عمي ميرغني الله يرحمه يرسلني للعم دبابة ويقول لي قول ليه عمك ميرغني عاوزك وعادة تكون اوقات الفطور وبالمناسبة عمنا دبابة لايحب الغداء وكانت له علاقة حميمة مع العم ميرغني وقالوا ان العم ميرغني له مقوله شهيره في دبابه انو بيعرف الاكل وبيشهيك وبيخليك تاكل وخالنا حسين ابراهيم كذلك من المحبين لاكل اللحوم ويقال انو اكل عتود كامل لحالوا عندما كان يسكن في ملم الكور وماعارف حقيقة هذه القصة وما اعرفه انو الخال لو لقي اللحمة مابيقصر
وعمنا المرحوم الضئ علي كان يحمل بندقيته ويذهب للقنيص لانو لايستطيع ان ينوم من دون تناول اللحمة و في يوم خرجت معه بعربة احد الاخوان القادمين من الخرطوم وذهبنا لخورود المليسه بالقرب من كالوقي ولكن كان حظنا سئ ولم نصادف اي حيوان لنصطاده وقد علق الضئ علي ساخرا (والله دي ماحصلت علي الظاهر معانا واحد كج)
وفي طريق العوده لمح ليهو جدادة وادي وقام باصطيادها وهو كان نيشنجي معروف المهم عندما وصلنا وانا عارف انو الجدادة صارت من نصيب الضئ لامحاله حاولت اشاغلو وقلت ليهو طيب الصيدة دي من نصيب منو فما كان منه الا ان يضحك ويقول طبعا من نصيب البندقية وطبعا البندقية بندقيته وراحت جدادة الوادي لعمنا الضئ هنيئا له ورحمه الله رحمة واسعة وادخله فسيح جناته مع الصديقيين والشهداء وحسن اؤلئك رفيقا.

يا سلام ول حتيلة علي السرد الجميل، قبل سنتين عمنا دمبابة لقانا في البيت انا وشلة من الشباب وكنا في مائدة غدا ضابحين عتود كدة قال لينا عليكم الله ما بتخجلو يا اولادي هسي سخيلكم ده انا بي حالي دي سنوني مابلوكها لي حينها متنا من الضحك فهو راجل ظريف ويحب النكات وبرضو يحب اللحم وبرضو عمنا حسين ابراهيم قال لي انا ما بشبع من اللحم لمن افتر بنوم وتاني بقوم اكل ربنا يديهم الصحة والعافية

شكرا حيدر على هذا الموضوع الشيق ، وهو بلا شك فيه نكات وطرائف كثيرة أذكر منها :

د القوني قال جاء أبوجبيهة وقام ابراهيم آدم ادريس في المحلج عمل ليهم عشاء عزم فيه كل المجموعة الا دبابة ، في الصباح دبابة سأل ياجماعة وين أمبارح قالوا ليهو ماكنا معزومين عشاء ، منو الخاين المابعزمني ده ؟ قالو ليهو فلان ، بعد أن زفر زفرات حرَى قال ، العشاء فيهو شنو القوني قال ليهو نحن شوية ، قال ليهو ما عايز أعرف بس الخاين ده جاب ليكم شنو ؟ قال ليهو نحن الشويه ديل جاب لينا شية وضلعتين وسمك عجالي وسمكتين بلطى و و و

بعد صمت طويل قال ليهم جاب السمك من وين ؟ قالو ليهو رسل ليهو من كاكا . وكانت هذه العشوة سبب خصامة استمرت لشهرين . ونواصل

عطية محمد خير السيد له أسنان زائدة على الأسنان الطبيعية ويفسر ذلك دائما بأن الله حباه بذلك لأنه محب للحمة، والضي له مقولة أن الذي لا يعشق اللحمة إبن حرام. أما دبابة فحديثه يطول.

والله يا حيدر أول أمس في منزل الخال أزهري وكان معنا العم محمد توم بانقا... كنا في هذه السيرة وعشق عمنا محمد علي بشارة(دبابة) مع اللحوم والأهم عشقه الخاص للبصل وحرصه عليه في كل دعوة يذهب إليها.

لقد قلت الحديث عن دبابة واللحوم يطول ......... لنا عودة.

الرد في المنتدي العلمي ارجو مراجعته!!!!