ابوجبيهه

صندوق دعم الرادار ساخر سبيل

استعرض الموضوع السابق استعرض الموضوع التالي اذهب الى الأسفل

صندوق دعم الرادار ساخر سبيل

مُساهمة من طرف أزهرى الحاج البشير في 13th أبريل 2011, 12:55

صندوق دعم الرادار
الفاتح جـــبرا | ساخر سبيل

للمرة الثالثة على التوالى تخترق الطائرات الحربية الإسرائلية أجواء بلادنا وتحرز (هاتريك) كما يقولون فى كرة القدم بعد أن تصيب أهدافها بدقة متناهية (وعلى مهل) وتعود إلى قواعدها سالمة وهى تخلف وراءها عدداً من المواطنين القتلى (المتفحمين) ! وأين .. فى (بورتسودان) المدينة التى بها قيادة الدفاع الجوى وهو السلاح الوحيد المناط به المحافظة على الأجواء من الإنتهاكات !
لقد إنتابتنى ضحكة أسيفة حزينة (من الغلب طبعن) وأنا أستمع إلى السيد وزير الخارجية بعد واقعة ضرب بورتسودان الأخيرة حيث صرح سيادته بأن السودان يؤكد (شوفو يؤكد دى) على إحتفاظه بحق الرد على هذا العمل الإجرامى !
هذا التصريح ينفع أن يكون نموذجاً (للكلام الساااكت) ! أتوقع إن إستمع إليه وزير الدفاع الإسرائيلى أن يضحك حتى يستلقى على قفاه ... أى رد حياك الله وأبقاك يا سعادة الوزير؟ وبأى سلاح؟ إذا كانت طائرات العدو (تدخل وتمرق) زى الما حصلت حاجه ! لا رادار (يشوفا) ولا دفاع جوى (يضربا) ولا طيارات (حربية) تتعقبها !! فى بلد يرضخ أبناؤه لان تكون ميزانية (دفاعة) عشرات أضعاف ميزانية علاجه وتعليمه وذلك حتى ينعم بالأمن والإستقرار !
إن أكثر ما حيرنى فى أمر هذه الضربات (البقت كتيره ومسيخة) هو مسالة التصريحات المتضاربة التى يطلقها المسئولون بعد كل (ضربة) ! والدربكة واللخبطة التى يتعاملون بها مع الحدث وإليكم بعضاً منها :
قام التلفزيون الرسمى ببث الخبر بعد أن بثته كل القنوات والمحطات العالمية !
على الرغم من أن كل هذه القنوات العالمية التى بثت الخبر (قبل تلفزيون السودان) قد أوضحت بأن الطائرة التى شنت الهجوم هي طائرة إسرائيلية إلا أن تلفزيوننا (ربنا يهديهو) قد أشار بأن الطائرة مجهولة الهوية (ليه ما تعرف) !! يكونو يا ربي ما عاوزين يتبلوا على إسرائيل ساااكت وخايفين يصيبوها (بجهالة) !
تم بث تصريحات وزير الخارجية التى إتهم فيها إسرائيل مباشرة بشن هذا الهجوم على كافة القنوات الفضائية العالمية قبل أن يبثة (تلفزيون السودان) !! ربما كان مسئولو التليفزيون ماشين بالمثل (كل تأخيرا فيها خيرها) والذى إن كان من الممكن أن يتناسب مع كل شئ فهو لا يتناسب أبداً والإعلام !!
فى الوقت الذى أكد فيه وزير الخارجية الهوية الإسرائلية للطائرة، كما ورد فى تصريحاته للقنوات الفضائية الخارجية صرح نائب والى ولاية البحر الأحمر بأن الطائرة قد أتت من الشرق و لكنه لم يحدد هويتها. (مش كويس إنو عرفوها طيارة) !
أشار وزير الخارجية بأن القتيلين هما مواطنان سودانيان، فى الوقت الذى أشار فيه نائب الوالى الى أن أحدهما مواطن سوداني، و لم يحدد هوية القتيل الآخر!! (عرف واحد وما عرف القاعد جنبو .. أيه الفتاكة دى)!!
وقال مصطفى مندر نائب الدائرة (10) القومية في تصريح لـ(smc) إن الطائرة ظلت تتابع العربة حتى قصفتها موضحاً أن شهود عيان كانوا يتابعون الطائرة حتى قصفت السيارة. (طيب الدفاع الجوى ما كان بيتابع مع الشهود ديل ليه؟) !

ولعل المدهش من هذا كله أنه وعلى الرغم من مضى وقت على الحدث فالعبدلله لم يقرأ ولم يستمع ولم يشاهد أى من جنرالات (وزارة الدفاع) والذى يعنيها هذا الأمر الجلل أى مقابلة أو مؤتمر صحفى أو تصريح !! من أجل توضيح الحاصل بالظبط (ولو ده حصل بيكون حصل متأخر جداً )
يا جماعة الخير لو ما عندكم (رادارات) أو راداراتنا (موديل قديم) كلمونا عشان الناس ديل إستباحوا أجواءنا وبقو يدخلو ويكتلوا ويمرقو زى ما عايزين .. ما مشكلة الشعب عارف إنو (الحكومة) مفلسة والقروش بتاعتا كوووولها صارفاها علينا وعلى اللى خلفونا فى التعليم والصحة والعلاج والشنو ما عارف .. عشان كده أنا بقترح على (الشعب الفضل) يعمل ليهو صندوق يحل بيهو المشكلة دى عشان ما نبقى (ملطشة) ويسميهو (صندوق دعم الرادار) !


كسرة :
.. يا سلام ... دخلوها وخفيرا نام ! هييييييييييييييع !!

أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

رد: صندوق دعم الرادار ساخر سبيل

مُساهمة من طرف Suhad Abduelgfaar في 13th أبريل 2011, 16:29

والله نفس الكلام سالتنى جارتى
وقالت لى انتو فى بلد زى السودان ده وما عندكم رادارات؟؟؟؟؟؟؟؟؟؟غريبه
رديت ليها قلت ليها عاد ده اسمه كلام ده كيف ما عندنا والله عندنا رادارات ونص كمان بس الظاهر
اخوى ضابط برج المراقبه كان (داقس)
قالت لى يعنى شنو (داقس)؟ قلت ليها
يعنى (غاطس)قالت لى يعنى شنو غاطس ؟
قلت ليها شفتى الجو الليله جميل كيف !!!!!!!!!!!
غيرت الموضوع لانى خايفه من رادارنا يلغط كلامى...........

تحياتى الى كاتبنا الساخر
والتحيه لك استاذنا العظيم ازهرى


Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: صندوق دعم الرادار ساخر سبيل

مُساهمة من طرف الفاتح محمد التوم في 13th أبريل 2011, 17:53

معليش يا جبرا...
معليش أصلو الطيارة جات بالليل
تسلم استاذ أزهري

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: صندوق دعم الرادار ساخر سبيل

مُساهمة من طرف محمود منصور محمد علي في 13th أبريل 2011, 19:01

دي اسرائيل يا شباب والاجر على الله.
ايدي طويلة.. امكانيات جبارة .. وقدرات عسكرية حاضرة .. ودعم امريكي وغربي غير مشروط ..وتواطؤ عربي من خلف الحدود .. واسرائيل لن تقف عند هذا الحد لكنها ستتمادى في افعالها طالما ان حيلة الحكومة السودانية هي ان ((تحتفظ لنفسها بحق الرد)) على هذا الانتهاك الصريح.. خم وصر يا كرتى وكان الله في عونك طالما ان وزير دفاعك هو عبد الرحيم محمد حسين...

محمود منصور محمد علي
مشرف المنتدى العام و مصحح لغوي
مشرف المنتدى العام و  مصحح لغوي


الرجوع الى أعلى الصفحة اذهب الى الأسفل

رد: صندوق دعم الرادار ساخر سبيل

مُساهمة من طرف حسن قادم نوية نواي في 13th أبريل 2011, 23:52

التلفزيون السودانى لم يزيع الخبر الا بعد ثبوت الرؤيه من القنوات العالميه (كل سنه وانتو طيبين) واجرى التلفزيون حوارا" مع بعض الماره من السائقين والسكان وبعد كده عرفوا ان المصيبه سببها طياره من وين ما معروف ...ده بيفتح المجال لاى دوله انها تضرب السودان لانو لا يوجد رقيب (رادارمتطور)الاجواء مفتوحه امام كافة الاعداء ولا دفاعات جويه واسرائيل سوف تضرب وتضرب مادام هو الحال ...والحكومه السودانيه صرحت على لسان مسؤول انها سوف ترد على الهجوم ..كيف نرد على اسرائيل ونحن لا نملك وسيلة الدفاع عن النفس ؟؟[/i][/color][/b][/b][/b][/color]

حسن قادم نوية نواي
نشط ثلاثة نجوم
نشط ثلاثة نجوم


الرجوع الى أعلى الصفحة اذهب الى الأسفل

رد: صندوق دعم الرادار ساخر سبيل

مُساهمة من طرف خالد عثمان في 14th أبريل 2011, 13:56

فى صدر الاسلام صرخة امراه كانت كفيله بان تشرد اليهود والنصارى فى بقاع الارض .
فهل ياترى صرخة اطفالنا فى فلسطين وبقاع ارض المسلمين وتحفظ حكام المسلمين كفيلة بان تعيد الكره عليهم ؟؟؟؟؟؟؟

خالد عثمان
نشط مميز
نشط مميز


الرجوع الى أعلى الصفحة اذهب الى الأسفل

رد: صندوق دعم الرادار ساخر سبيل

مُساهمة من طرف فيصل خليل حتيلة في 14th أبريل 2011, 14:12

ههههههههههههههههههههههههها

ابوالزهور - صديقى محمود - اخوى الفاتح - ابنى خالد عثمان.

شكرا على مداخلاتكم الجميلة رغم الحال الأسيف.

علا عندى سعال ( الله يشفينى )

هلى هى طائرة فاذا كانت الاجابة بنعم هل بطيار ولا بدون طيار؟

طالما اننا لا نملك حق الرد على الاقل خلونا نملك حق الغلاط.

شكرا


عدل سابقا من قبل فيصل خليل حتيلة في 14th أبريل 2011, 14:46 عدل 1 مرات

فيصل خليل حتيلة
مشرف إجتماعيات أبوجبيهة
مشرف إجتماعيات أبوجبيهة


الرجوع الى أعلى الصفحة اذهب الى الأسفل

رد: صندوق دعم الرادار ساخر سبيل

مُساهمة من طرف الفاتح محمد التوم في 14th أبريل 2011, 14:40

أتت بليل ... يافيصل
أوكي للصندوق بس ( اللادار ) "Not Made In China"
خلّي جماعتنا يغيروا شوية

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: صندوق دعم الرادار ساخر سبيل

مُساهمة من طرف محمد قادم نوية في 16th أبريل 2011, 11:10

ماذا نقول ؟ فقد أخرسونا هؤلاء خاصة بعد أن ثبت بأن حدود السودان البرية والجوية مفتوحة على مصراعيها
التحية لجبرة علي كتاباته الساخرة والجريئة و التي تتناول
كل مايحدث في مجتمعنا من مفارقات ومايصيب بلدنا من بلاوي زرقاء
ومحن ......

محمد قادم نوية
مشرف منتدى الصوتيات
مشرف منتدى الصوتيات


الرجوع الى أعلى الصفحة اذهب الى الأسفل

رد: صندوق دعم الرادار ساخر سبيل

مُساهمة من طرف أزهرى الحاج البشير في 16th أبريل 2011, 11:17

دخلوها وخفيرا نام ! هييييييييييييييع !!

فيصل دخلوها الضمير راجع لآدميين وخفيرا كان نايم .. ده هين بس المرة الجاية هل حيكونوا صاحين ده السُعال المهم


عدل سابقا من قبل أزهرى الحاج البشير في 16th أبريل 2011, 15:47 عدل 1 مرات

أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

رد: صندوق دعم الرادار ساخر سبيل

مُساهمة من طرف محمود منصور محمد علي في 16th أبريل 2011, 11:22

وانت الصادق يا اب الزهور:: دخلوها ورادارا نام . الف تحية

محمود منصور محمد علي
مشرف المنتدى العام و مصحح لغوي
مشرف المنتدى العام و  مصحح لغوي


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى