إعلان ... بزعل ...

لقد أعلنا عن موضوع جمعية ابوجبيهة الإستثمارية ...وقد مر على الإعلان 35 عضو ... ولكن بكل أسف لم يكلف عضو نفسه بالرد أو التعليق ...شئ يحبط الإنسان ...ولا نصغط على الأعضاء بالقوة ...ولكني كنت أتوقع التفاعل معنا ...وبالجد هذا شئ مؤسف للغاية ...بل شئ يزعل بالجد .....زعلاااان ومنفوخ وعاوز أطرشق ..

يا عم عثمان يا رجل يا رائع
انا بعرف الزعل ده ما من قلبك عارفوا من لسانك ساى
لكن ياعم عثمان ان جيت للحق انا شخصياً الموضوع مريت عليه لكن قلت مابرد الا بعد افكر فى الاسم والمشروع لانوالمشروع كبير و فيه خيرنا وخير اهلنا فى الحباك ..والشغله داير ليها قعدة وكباية شاى من شاى القرنفل بتاع اختنا سهاد عشان الشغلة تظبت
وفى الختام لك العتبا حتى ترضى

يا عثمان شاويش ..

معاك حق تزعل و انا حسي قربت اطرشق من الزعل مش من موضوع جمعيتكم دي انا زعلان من ناس المنتدي ما وقفوا معنا في كيفية تكريم الاخ الباش مهندس صالح .. يا اخوي رايك شنو نمشي انا و انت السودان و نكرم الراجل في امبرمبيطه .. و بالمناسبه انتم وين الزول الاسمو : OSAMA OSMAN الرجل قال مستعد لموضوع الاذاعة و البقدر بلكلم مع الناس الكبار .. الكبار ( الوالي) .. يا فيصل خليل انت مسئول مسئوليه مباشره من استلام التصديق يلا حرك الشقلانيه ..

أحبائي ...أعزائي ...مولانا خالد عثمان ...أختي الغالية وما خمج سهااااد ...الرجل النبيل الأصيل ود عشمان ...إبنتي الحبوبة الطيبة العفوية الفرنساوية صبوحة ... لكم شكري الجزيل ...وقلت يا مولانا خالد داير ليك كباية شاااي صاموطي بوصفات أختي الغالية سهاااد !!! عشان تفكر في مشروع رائع ...ودا الكلااام ...بس خايفك تدخل في الفونقا وتقول لينا الحاجات العجيبة ديك ...وشكراً لك على الإطراء الجميل ...سمعنا أختي سهاااد قالوا شاهيك عجيب ...بجيب ابوجبيهة ...وأم برمبيطة ... ( ولنضدن ) وساركوزي .... أصيلة ...ود عشمااان فعلاً مجموعتنا نسوا تماماً موضوع تكريم الباش مهندس الجليل / صالح الحاج البشير ...وأرجو أن لا نضع هذا الموضوع على الرف ...وصدقوني لو فعلنا كذا نكون ناس ربربه وناس غير عملييين ولا ملتزمين ...أما أخي الإنسان أسامة فربما إنشغل مع الإنتخابات وهو صادق دائماً ومهتم بالدرجة الأولي...وأدوة لكزه خفيفة يا فيصل وحتي لا ننسي موضوع الإذاعة ...وتكون إقتراحاتنا مجرد كلااام سااااي يعني الأهم الآن:
(1) الجمعية الإستثمارية .
(2) تكريم الباش مهندس / صالح ... المحترم .
(2) إذاعة ابوجبيهة .
وشئ مخزي حتي الضحك ...حضرت أم علياء من أبوجبيهة ...وهي تشتاط غيظاً من وضع مستشفي ابوجبيهة المتردي ...وقد صورته بجوالها * لا توجد فيه حمامات نهائياً * الماء بالكارو وغير متوفر ( نحائياً).* اصبح الستشفي مرتع للأبقار ومنتجع للدجاج * خلط الحابل بالنابل في العنابر عنبر أطفال + نساء وولاده + جراحه في عنبر واحد ...وعييييك ....معليش طولت عليكم ...
الفرنساوية الأصيلة الراقية لكي تقديري على مداخلتك الرائعة ... ولكم : مهبتي

عمدة المنتدي فيصل ... أنت رائع بكل ما فيك ... وجدت مرورك الجميل ... وبشكرك عليه وعلى حرصك ... وقد أخجلتني بثناءك العاطر ...ولك تحياتي دائماً .... محبتي

يا عمنا العمده عثمان شاويش اذا زعلتا مننا انحنا نمشي وين والبزعلك لسه منخلق انت الركيزه والعمود الواصل لينا انت الدهر الطويل انت البحر المابنخمج انت جمل شيلنا ومت قول اخوك دا غناي اخوك بهرج وبطبظ ساي وربنا يخليك لينا يا ابو علياءوبجد العمليه بتزعل والمفروض ان نبزل جهدناونكن يد وحده ونقيف مع بعض ونترابط كالبنيان بقوة وشده ونقوياهل الحباك (يدا بيد نحوا الغد)

شكراً اخي الحازمي ...وتعرف أخوك دموعه قريبة جداً ...وقد أدمعتني بهذا الثناء والذي لا أستحقه إطلاقاً ...ولك التحية أخي الغالي ...ونسأل الله أن يديم بيننا الأخوة والمودة الخالصة والترابط والتواصل ...لأننا بنمهد الطريق لجيل قادم ...جيل فاهم واعي متحضر جداً ....وبمجهودناالمتواضع نمهد لهم الطريق ...ونسأل الله أن يحملوا الرايه من بعدناوحتي الوصول للغاية كي تكون ابوجبيهة من المدن التي يشار لها بالبنان ...ونسأل الله أن يحتفظوا بكل القيم والمثل والصفات الحسنة .... محبتي