يسن محمد يسن من ابناء امبرمبيطه رغم كيد الحاسدين

الاخ العزيز/ الزعيم غريق
سلامات اخوى اخبارك والحباك,زى ما قلت ليك الاخ يسن ممكن تلقى ليك بصيص ضوء تجادلنا فيهو لكن كرم ول ابَ محمد هجانة ده حيلنا بااااااردعلى قول بن عمه الاستاذ عيسى نورين هجانة.
اخوى براهيم ابو الزهور ده انا بدور عليه لى زمن ما لامى فيه لكن شايف فى لاعب جديد ولسه ريحة السودان ما طلعت منه نتمنى انو يوصلنى لابو الزهور.بعدين رايك شنو الاخ كرم من ابو كرشولاعلى قول الزعيم الهمام.
ولكم ودى وتقديرى

ول كو كو انت واخوك ول عشمان الدرب راح ليكم فى المويه وقعتو تهضربوا ساى

كرم ما فيه تقاش


يس امروا انتهى

ودعتك الله

بتعرف بتلعب ويرينا ويريكم

للإبن ول عشامان و الأخ أحمد كوكو وبقية أبناء أم برمبيطة (أم عشر أم أهلاً ما كو شر)
و :
طبعاً الإنتو ما عارفنو أنو أبوجبيهة (عروس الجبال الشرقية)هى صرة المنطقة الشرقية ـ يعنى الكل بيستمد حاجاتو منها من ألقها الذى لا ينضب ـ و مع ذلك ندين لأمبرمبيطة بالتقدير ليس فقط لأنها تظل أم حنون لـ (حمودى كرم هجانه)لكن لأنها أيضاً يتشكل منها البعد الآخر لأبى جبيهة وهو البعد العاطفى الذى مكن من أن يستمر الحوار فى شأن يسن إلى هكذا .
لهذا .. أنا من الإتنين لو أمى أمبرمبيطة أبوي أبوجبيهة .
تقبلوا تحيات الوالدة مكة ـ بالمناسبة عجبتها لمتنا فى حوش المنتدى و نقاشنا و عرفت لأول مرة إنو فى فضاء آخر بيلم الناس .
أحمد كوكو سلم لى على المدام
ح أتصل عليك
و تحية لإقبال عبد اللطيف و سهاد و للجميع

تسلم ياكرم هجانة ياابوجبيهاوي يا دبلوماسي
ود هجانة بي سببو..وقصير شن كتلو؟ يا ود عشمان

شكرا علي هذا المرح الجميل

يا فيصل 000كرم قالها واضحه

000



أنا من الإتنين لو أمى أمبرمبيطة أبوي أبوجبيهةيعنىكرم من ابوجبيهه على قرار الولد ينسب الى والده



انت يا ول عشمان وول كوكو



تسكتوا خالص بعد كلام كرم ده اعنى موضوع كرم انحسم خلونا فى يس

الخال .. الخال .. الخال العزيز جدا كرم محمد هجاته ..

لك التحية و التقدير ..

اول حاجه يا خال .. حي دار كعابر في امبرمبيطه يعتبر من الاحياء الكبيره و بعدين الناس ديل كلهم لحم و عضم يعني اذا مسكنا مائه نفر من الحي دا نلقاهم كلهم اهلك .. و شجرة النيمايه الكبيره حقت بيتكو ياتوه قاعده ..و العيال كلهم قالوا ليك كفاك تعال من الغربه .. توه حاله كي دايرين يبنو ليك بيت جنب بيت ناس محمد غبوش قطعة الارض الناصيه الواقعه جنب بيت خالي يوسف النضيف .. الناس في امبرمبيطه محتاجين ليك حار و قرمانين ليك .. و بعدين ما تسمع كلام اقبال عبداللطيف انا بعتبرو كلو محاريش ..

اخي سلم حار للاخت منال بت ابوي النور الطاهر امير امارة الحوازمه ..

الزعيم غريق ..

الان نحن لا نريد ان نخلط الكيمان و لم نطالب باي واحد من ابناء امبرمبيطه الموجودين معاكم في ابوجبيهه .. كل ما في الامر نحن الان قلنا يسن محمد يسن و السبب هو الضروره القصوي الخلتنا نطالب ب ولدنا .. ما تعاكسو انطونا ولدنا ..

لكم التقدير

يا اخوانا عملت تلفون للاخ الزعيم غريق كمبال يوم امس و اتناقشنا في موضوع الاخ يسن محمد يسن و ابدي تجاوب لحد كبير .. و قال بصريح العباره يعطينا اربعة من ابناء ابوجبيهه بدلا عن يسن محمد يسن ما فيهم فيصل و المحامي الكبير ابوهريره و اثنين اخرين .. و كان ردي له بصريح العباره الان موضوعنا في التفاوض يسن محمد يسن اما بقية الذين تحدثت عنهم ليس لدينا مانع ان نضيف اسماءهم في ملف التفاوض لبقية ابناءنا الذين معكم ..

الاخ احمد كوكو اود ان اطمئنك الاخ غريق ابدي مرونه في التفاوض و سوف اعمل له تلفون اخر لاقناعه و بذلك نحدد موعد لاحتفال عودة الاخ يسن لاهله و احبابه بمدينة امبرمبيطة ..

مع التقدير

انت زايغ من موضوع كرم مالك





يا احمد كوكو صاحبك ده عامل زى ياسر عرمان





تتفق معاه بهنا ينط ليك بهنا





كل المفاوضات مرفوضه فى موضوع يس



ونحن جاهزين الى اسوا الاحتمالات



يعدين يا ابوحميد انت زولك ول عشمان ده ما تباريه





شكلو كده ببيع القضيه اعمل منو حسابك

الزعيم!!!
غايتو انا ما عارف
انا شايف الموضوع حيوصل لمحكمة العدل الدولية لفض النزاعات القبلية لكن شهادتي للتاريخ اقولا ليك لو استدعوني ناس المحكمة للشهاده
كان عندي صديق اسمه علي محمد هجانة ولد محترم ومهذب وطالب نجيب ومجتهد وصديق اخر اسمه الشيخ ادم الخليل درسنا المتوسطة مع بعض وكنا اصدقاء شديد وبنمشي دائما مع بعض فهل كرم هجانة اخو علي هجانة ام لا ؟
واذا كان هو اخوعلي يبقى كلام ود عشمان صاح مية في المية وحيكسب القضية لانو علي محمد هجانة كان بقول ان والدته من ابكرشولا وابوه من امبرمبيطة
وخلينا نخلص من موضوع الاستاذ كرم ونرجع لموضوع الاستاذ يسين لانو موضوعو صعب ومعقد
الف تحية لابناء العم محمد هجانة الاوفياء

هذه القصيدة الحماسية هدية للاخ ودعشمان الفارس الجحجاح وهو يخوض معركة الكرامة ورد الحقوق والحفاظ على النسيج الاجتماعي لقبيلته العربية الاصيلة والزود عن حماها

كلمات / رقية بنت مسمار

الآلاف درجن ولدا نجيض ماك ني
البجرجر فى ام صقير وحدي
********
غنى وشكري يا اختو يا ريا
تمساح الكوانى الضارب الليه
سمعنالن خبرا في بلد الحوازمية
خمستاشر جواد سكن سبعمائة
*******
من قومة الجهل ما خوفوك باخ
تور بقر الجواميس الرقادن لخ
نقرولو أم هبك الضربخانه يدخ
قرنك بفتح الهامه وبمرق المخ
*******
أنا قولي ليك صحيح
ياركاب على شلق بنات الريح
ياجدرى النزيله الدم كرف في القيح
ادر صاقعة التلوي المقابله السيح
*******
ما بحركو الكشكيش
والقلب ان رجف ما بنفع الحريش
الجنيات براك في الحلة آفة عيش
ود عشمان البيعزم على المافيش

سلامات الزعيم الاخ كرم امرو منتهى وما فيهو نقاش المرة,والدليل مناداتو لول عشمان الابن ابراهيم دى وحيده كفاية وانت افهمه.
الاخ العزيز كرم انت خليك زى اخونا يسن انا واخوى ول عشمان بنثبت ليك الجماعه ديل وبالادلة القاطعة ,اناالان بحضر فى اوراق دفاعى زى ما قال الاخ محمود يمكن الموضوع يصل المحكمة لذا تحوطة لاى طارى انحن جاهزين.
ولكم احترامى وتقديرى.

ا ولا احيكم جميعا واشيد بهذا البوست الظريف المميز ثانيا بما ان هذا الموضوع دخل في اللحم الحي وبما ان الكور ستطالب بحق تقرير المصير فان يس ولد البابو هولنا بارد



تحياتي بلا سقوق

سلامات اخوى محمد نوية وكيف الاخبار انشاء اجواء الرياض فى هذه الايام ما تكون اثرت معاك وخاصة انت جاى من الحباك وجوها العجيب فى الرشاش ,حاولت جوالك لكنه ما دخل معاى ,عندى زول بسأل منك حار الا وهو النور ادم قيدوم, يا اخوى بالله كيف الاخ الفاتح يوسف والحبيب الزين قادم عساهم بخير .
الاخ العزيز /فيصل
زول متل يسن مستحيل ننطيكم ليهو شيفو ليكم شغلة تانية وبعيد ول عشمان فى اخر مكالمة لى معاهو قال خلاص اقنع الزعيم والدور عليك ,وانا الايام دى عندى جولة على الاخوة ابو الزهور وول نوية بذات الخصوص .
مع خالص تقديرى واحترامى

العزيز محمود بن منصور الزعيم المكاوي الامبرمباطوي الاصيل ..

لك التحية و التقدير و الشكر اجزله لك غلي القصيده الرائعه .. و يا اخوي الكلام دا عين الحقيقه و الحق لابد ان يقال .. اما عن محمد هجانه ولدنا هولنا بارد لينا من ابناء جارة الوادي و انت يا اخوي غريق شوف ليك موضوع تاني نحن شهودنا منكم و فيكم و شهادة الاخ محمود معمولا بها و لا جدال في ذلك .. براك مشيت شكشكت النيران توه شلنا منكم اثنين انا وريتك قلت ليك موضوع كرم هجانه خلي ورا الا ما سمع كلامي و بالمناسبة كرم دا لحمي و دمي و خالي .. رايك شنو ..

لكم التقدير

الاخ الطيب ول ابوي ادم علي

ماك طيب انشاء الله البقيرات ملعشيات اتو حاله كي فريقو وين ؟؟ و بعدين اسمع كلامي دا و انطي الهواء .. تعال انضم معانا و عندنا عمنا حماد حامد اللبيرا عندو بتين ازوجهن من اهلك ناس ملم الكور ديل البنات دي لليوم بجرن و بنجمن تقدر تجيب لينا خبرهن ..

اخي سلم علي الاهل و احسن ليك تعال انضم مع اهلك ناس امبرمبيطه ..

لك التحية و التقدير

هاي محمد ول نويه

خالتاك و حبوباتك في امبرمبيطه بسلمن عليك و قالن ليك تعال ينطوك ليك مره .. انا قاعد اخوي ربيطه واليومين الفاتت دي خليت اخوي احمد كوكو يقنع الناس دي عشان موضوع اخونا يسن محمد يسن ..
الان غير غريق كمبال تاني ما بقي لينا زول و الان الاتصالات جاريه ..

بتصل عليك قريب يا حبيب انشاءالله

لك التقدير

الاخ احمد كوكو ..

يا اخوي اتا اخونا المحامي مرتضي حماد ابن امبرمبيطه البار الول الشاطر دا وين ؟؟

لك التقدير يا عزيز

انتو با جناعه ول كوكو وول عشمان دوول ماعندهم ولى بنصحهم0000خلو يس اللهو لينا فى كرم00

وبعدين المحامى الجديد الظهر ده شنو


هوى منصور احسن ليك اقعد محايد


انا اليوم وصلت الحياك وباقى مارود شويه

باكر بقبل عليكم

اقعدوا عافبه

الاستاذ غريق
الف حمدا على السلامة وما تشوف شر
اولا انا ما محامي جديد انا محامي من بداية القضية واوراق القضية كلها معاي شلناها من ابوهريرة لانو قاعد يلعب بديلو
ثانيا لم تجاوب على سؤالي بخصوص الاخ علي محمد هجانة
ثالثا ذهابك الى الحباك في هذه الايام يمثل هروب الى الامام لانو ودعشمان قرب يكسب القضية.
الف تحية لك وللاهل بالحباك خاصة الاخ جعفر كمبال

هههههه ول عتمان ولد اب اتوا يوم تدوروا في عوينكوا ده متفولوا لينا عديل انحن دايرين بتنا مادايرين يس

تحياتي لك ولول كوكو بلا حدود

الاخ الاكرم /براهيم ول عشمان
سلامات والله قرمانين ليك حار خلاص ,الاستاذ مرتضى حماد الايام دى قريب حار من الحباك فى رشادعندو شوية قضايا بعد ما يخلصه عندى ليهو وصية خاصة للزعيم.و شايف الزعيم اول ما سمع كلمة محامى جاتو حمى نتمنى ليه السلامة وطقتين فى الراس بوجعن ياخى ربنا يشفيه.

الاخ ول نوية الله يسلمك ويزيد من امثالك المفروض اكلمك اليوم لكن مع مشاغل الدنيا طلع من بالى لكن موعدنا باكر كن الله حيانا طيبين .جوال النور 0540656613فشكرا على الاهتمام.

الاخ العزيز/ الطيب

سلامات ياخى وكيف الجنوب معاكو انحن الحراى قتلتنا كله كله كى افتحو لينا نافذة شوية خلونا ندوق من الطراوة العندكم دى ,طبعا لقيت اخبارك من الاخ النور قيدوم وهو بسلم عليك كتير ولك خالص تحياتى.

ول كوكو سلامات يااخي وينك انت نحن في اقصي الشمال الغربي الحر شلفطتنا شلفطة


تحياتي لك وللتور وول نويةقالوا جا قريب امشوا سلموا عليه خلا الشدر شق وجا للشقاوة

الزعيم الوردة للعدو

السلام عليكم كلكم.

عيال ام برمبيطة ماكو طيبين؟
نحنا في الحباك سعيدين بهذه الصلبطة التي تدل علي اعجابكم الشديد بابناء الحباك وعليه قررنا فرض رسوم علي اي امبرمبيطاوي والدفع باليورو.

ود عشمان مع الغرامة عند التأخر .

الاخوة الكرام انا الليلة عرضت امامى القضية لانو محمود ماقدر يعمل فيها اى حاجة واطلعت على مرافعات ودعشمان والاخوه ووضح لى جليا بان ادلة ودعشمان غير كافية تماما وغير صائبة حيث انه لم يثبت ما ذهب اليه وهو هل يس من ابوجبيهة ولا امبرامبيطة
وعليه فان دعوتك خاسرة ياول عشمان

الزعيم غريق حمدلله بوصولك وربنا يشفيك

بصراحة الواحد لامن يكون مدبرس ويدخل على المنتدى ويطلع على المشاركات والتعليقات الفيهو شوية بلقى رقبتو اتنفس حبة الله ينطيكو العافية.

الاخت اقبال واخوى فيصل سلامات بالكوم,ما عندنا مانع فى الاقتراح لانو لو سحبنا جماعتنا الكهرباء والاتصالات والصحه عندكم الا تقفل.

الاخ الطيب لك اسمى التحايا وربنا يخفف عليكوالحراى شوية وخاصة رمضان على الابواب,انشاء الله سوف ازور اخوى ول نوية قبال ما يكمل الهجليج والنبق ويكمن المدمس كمان.انا كلمتو البارح بس نشوف ولدبة ظروفو شنو ونمشى لية.

الاخ محمد
يااخوى والله سعدت كتيرا بمكالمتك وربنا يوفقنى فى زيارتك عن قريب فلك الشكر والتقدير.

الاستاذ الهمام
تحياتى الحارة لك وللاسرة الكريمة انحن دفوعاتنا قويةجدا وقضيتنا كن مشينا لقدام واثقين انو بنكسبه,مسئول من الخير بالله كيف اخبار استاذ عثمان صالح كوكو لو معاك بلغو تحياتى والسلام عليكم.

ابوحميد كيف اخبارك وكيف مع الشغل

نحن الحمدلله بخير



وصاحبك عثمان ابو الزيك فى رمبيك

وكيل نيابة فى الدله الجديدة واخباره معانا



ولو استدعيتو هنا برضو ما بحلك وقضيتك دى خلاص خسرانه تماما

ازى اخبارك ول نوية

انشا الله تصوم وتفطر بخير

وماتنسانا من الدعوات

تلفونى 0912912692

والسودانى 0123013135

اعلان هام ..

بعد صمت الاستاذ ازهري و بعد سكوت كل من فيصل خليل و اقبال عبداللطيف و بعد انسحاب رئيس لجنة التفاوض الزعيم غريق من المفاوضات دون سببا واضحا و دون اخطار الوساطة برئاسة الاستاذ محمود منصور .. و بعد جعجعة الاستاذ المحامي ابوهريره التي لم تدر بطحين للقضية المعنية .. تعلن رابطة ابناء امبرمبيطة بمنتدي ابوجبيهه العامر بان اليوم العاشر من رمضان احتفالا رسميا بعودة الاخ يسن محمد يسن الي اهله و احبابه و عشيرته بمدينة امبرمبيطة العامره ..

و قد اعدت اللجنة العليا للاحتفال التي انبثقت منها ثلاثة لجان و هي اللجنة العليا للاحتفال برئاسة الاستاذ احمد كوكو .. اللجنة الثقافية برئاسة الاستاذ محمود منصور و اللجنة الاجتماعية برئاسة الاستاذ احمد الزبير و سهاد عبدالغفار نائبا له .. و سوف يكون هنالك موكبا جماهريا حاشدا يحضره عدد من المسئولين الكبار بعد الافطار ..

الدعوه موجه الي جميع اعضاء المنتدي دون فرز لحضور الكرامه ..

و لكم التقدير

ود عشمان دا بقى بلايم الناس ساى محمود وسهاد ديل االلماك فيهم شنو كمان جايبهم فى لجان ياخى ما تفتش ناسك وين

عووووووووووووووووووووووك انا جيت

هوى يا عيال امبرانبيطه لقيتوا الدار خلا والعيال صغار

ول عشمان وولد ابوى كوكو هوووووووى اعملوا حسابكم


كمان جابت ليها احتفالات وضبائح

انا الورده الايام الفاتت دى قرعتنى منكم

والان انا بقيت طييييييب وجاهز ليكم


الحفله دى لازم تتفرتق ويس يعود الى اصوله فى الحباك سالم غانم

وبعدين يا ول منصور على هجانه هو صحى ده اخو كرم هجانه الاكبر

وانحنا ما نكرنا ان ال هجانه اسره كبيره من ابوكرشولا ومرورا بامبرامبيطه واستقرت فى الحباك

وعمنا محمد هجانه من اوائل موسسى الحباك منذ ان كانت قريه مثل امبرامبيطه حتى اصبحت الحباك ملأ البصر والسمع وطبقت شهرتها الافاق

بعد الكلام ده كلو يا محمود دايرنى اقول ليك على هجانه او كرم من قرية امبرامبيطه ام من الاصوب ان يكونا من مدينة الحباك التى ساهمت اسرتهما الكبيره فى نهضة ابوجبيهه قشه قشه حتى صارت الحباك بهذا الشكل الانيق

لك التحيه ايها العزيز

الزعيم غريق
طبعا طلع كلامي صحيح في اولاد عمنا هجانة وهذا يؤكد صحة اقوال البطل المناضل ود عشمان يعني مافي سلبطة زي ما قال الاخ فيصل في المداخلة السايقة
خلاص نحن نعمل اتفاق اطاري لحل المشكلة ونديكم ابوهريرة وفيصل خليل وعود الصندل والفاتح التوم ومعاهم عمارة خمسة ادوار تشطيب لوكس في العاصمة امبرمبيطة دي لك انت ما تكلم اي واحد... وكذلك قطعة زراعية 1000 فدان والف راس من الابقار ونزوجك من عندهم مقابل ان تخرج من الموضوع وتسكت وما تتدخل ونحن بنعرف نخلي ود عشمان يسترد حقوقو المشروعة كاملة...
الف تحية

هوى منصور 00انت فى زول بعوضو فى حقو والله دى مش سلبطه دى بقت جقاره عديييييييييييل كده

كده انتو ول عشمان بتاعكم ده ما عندو غير السلبطه


قال يعوضونا بى فيصل وابوهريره 0000يا سلام عليكم وكرمكم الحاتمى

انحنا بنطالب بحقوق وتراجع منها مافى

والدايرنا النقعه تفرزنا

تحياتى

فيصل خليل زعيم البلطجية

خلاص غريق وافق على العرض المغري الذي قدمته امبرمبيطة العاصمة القومية واتصل علينا وبارك موضوع الترضيات والاتفاق الاطاري,,
كمان انت قدم شروطك وطلباتك عشان يدرسها ود عشمان لانو ممكن يقبل وممكن ما يقبل كل طلباتك مستجابة ماعدا قطعة ارض سكنية او زراعية لانو ود عشمان قال ما عاوز اي واحد اجنبي يسكن معاهم,,,
الف شكر

كده يا فيصل 000نخلى موضوع يس 000بس انا عاوز اجابه شافيه


ود عشمان ده مشى اليونان لى شنو؟؟؟؟؟؟


وبالزات فى الايام دى ؟؟؟؟

كده يا منصور رد لينا على سؤالنا ده والباقى هين


بعدين ما تنسى تفسر لينا موضوع الجوامع ده


انت ناس اليونان بقو بيبنو الجوامع ولا شنو


موضوع يس محسوم 0000حباكى حتى النخاع

الاخوان فيصل وغريق
تحية طيبة
طبعا ود عشمان عندو جواز سفر دبلوماسي وحصانة دبلوماسية وبتحرك وفق ما تقتضيه الضرورة وهذه التحركات محاطة بسرية تامة لذلك لا تتوقعوا ان نفصح عنها لكم بهذه البساطة..
المهم ان هذه التحركات تاتي في اطار حشد الدعم من المجتمع الدولي وشرح الموقف التفاوضي ووجهة نظر شعب امبرمبيطة المناضل وانتو شايفين الموضوع جاب ليهو يونان وافغانستان وامام مسجد والمثل بقول ليالي العيد تبان من عصاريها.
الف تحية

التحركات المشبوهه دى يا منصور انحنا عارفين نجيب قرارها من وين


نحن الحباكين ضد العنف 000وضد الارهاب 0000وضد المواقف الغامضه


تحياتى

انت عارف ياغريق

الزول دا بكون ماشى يتكك الحكاية ويمشى يحول المسالة لمحاكم الخواجات ديل

لكن نحن دفوعنا جاهزه

الاخوة الاعزاء والله الموضوع ساخن وغلبنا نقعد فراجة وكمان شايف الموضوع تشعب و لو ما حليتوه براكم بقول اكيد حتدخل امريكا ومعاها الغرب وما تنسوا ودعشمان ولدهم والظاهر مالي يده بيهم و عشان الجماعة ديل ها يسوا لينا مشكلة ثانية نقوم نفتح الحدود ونعمل جنسية مشتركة ما عندنا مشكلة خليهم يشتركوا معانا في يسن
بمناسبة امبرمبيطة واهلها اذكر في بداية الثمانينات كنا مسافرين من ابوجبيهة الي كادقلي في عز الخريف عن طريق تركتور (بابور وترلة) وكان السائق هو دودو والزيات مختار البانج ومعانا عمنا عبد الرازق الحاج و احد المهندسين الزراعيين رجل كبير السن اعتقد اسمه الطيب وعدد كبير من الركاب في حدود 14 شخص من حريم ورجال ووصلنا الى خور امبرمبيطة حوالي الساعة الثانية عشرة ليلا ووجدنا الخور مليان وكان مافي طريقة الا ان نرجع ونبيت في حلة العمدة وننتظر حتي يعدي الخور ونقطع وكما ذ كرت فقد كان الوقت متأخرا جدا في ساعات الصباح الاولى وقد حاولنا ان ندخل الحلة بكل هدوء حتي لانزعجهم في هذه الساعة المتأخرة لكن هيهات وما ان سمععوا بصوت البابور حتى صحيت الحلة كلها وفي ظرف دقائق معدودة وجدنا انفسنا في دفء الاسرة والبطاطين وقد حلفوا لهم بالطلاق ما ويلعوا اي نار في هذا الوقت وعندما فتحنا عيوننا في الصباح وجدنا شجرة العرديبة التي تتوسط الدار قد امتلات بالفرش وبراريد الشاي والحليب واللقيمات والكل يتسابق في اكرمنا ونفس الشيء في الفطور والله كأننا في مناسبة او عازومة اطيب انواع الاكل وياريت لو الحكاية كانت يوم واحد وبس الخور حلف ما ينزل وقعدنا اربعة ايام في فريق العمدة واصبحنا مقيمين وبقينا نقيل نلعب الكوتشينة ونسمع الاغاني من مسجلاتهم واذكر كان ضابط الزراعة في امبرمبيطة بابكر الحاج وما ادراكم من هو بابكر الحاج لما شاف حكايتنا طولت قام جاب تركتور تاني وقطر تركترنا وهو مبطل وحلف ما نغادر امبرمبيطة الا هو كمان يكرمنا انتقلنا الى استراحة المؤسسة ويا حليل المؤسسة الزراعية وهناك ذبح لينا تاني واكرمنا اخر كرم وقام الفراش بغسيل ملابسنا وكيها وقضينا يوما خريفيا جميلا واذكر طبعا الوقت داك كان لعب الحريق في عزو وبابكر بحب الحريق جدا وبدا الجماعة في اللعب طبعا بدون قروش وكل مرة بابكر الحاج يقول ليهم يا جماعة اللعبة كده ماسخة طعموها شوية الجماعة يقولوا ليه هوي يا بابكر انت الظاهر عليك داير تخرتنا وتتسد حق الخروف والله كانت رحلة جميلة لم اشاهد مثل هذا الكرم وتلك الاريحية وحسن الضيافة في حياتي كما استمتعنا بمناظر الخريف والخور ولاحظت كل ناس الحلة يجيدوا العوم وكان البنات والاولاد الصغار يقعوا الخور ويمشوا يتسوقوا ويجوا وبجد استمتعنا بكرم وضيافة ناس امبرمبيطة وطبيعتها الجميلة طبعا الحتة الاخيرة دي عشان ودعشمان عشان ما يقول نحن ناس لبوجبيهة ما بنشوف اي مكان تاي زي ابوجبيهة