الوطن الجميل..عزمي احمدخليل

يا شعبى لما تقول كلام
صوتك يغير كل نظام
والدمعه تصبح ابتسام
وتوقد شمس وسط الظلام
ومن الفرح يبكى الغمام
والكلمه تبقى الالتزام
والدنيا تصبح يا سلام
يا شعبى لما تقول كلام

يا شعب مرفوع الجبين
يالعمرو عزمك ما هبط
يا الهمك السودان فقط
ويا البيكا وجدانو ارتبط
ثوارك الناس الحنان
وعدوك البيعمل غلط
عروسك الوطن الجميل
وأنت البراك قاطع الرحط
يا شعبي من دون أي شرط
أنا غير رضاك ماليّ قط
وأنا غير هواك مقطوع عقاب
لا عندي مبدأ ولا ليّ خط
يا شعب مرفوع الجبين
يالعمرو عزمك ما هبط

يا شعبي يوم تهدأ وتثور
الظلمه ترشح تبقى نور
والسجن يتحول قصور
وللشهداء تتفتح قبور
وفوق الضريح تنبت زهور
والحزن من الناس يغور
الساحه تتمدد فرح
وبدل الغراب تصدح طيور
يا شعبي يا سيد الشعوب
يا الاصلو عزمك ما بيخور
إنت الهدى وانت الرضا
وفي الحاره جبار الكسور
يا شعبي يوم تهدأ وتثور

يا شعبي يا حب الجميع
حيرانك الشيخ والرضيع
الحق معاك تب ما بضيع
والحلم يتحقق سريع
بالك على القاسيات وسيع
وأمانه ما غضبك فظيع
أحبابك الناس الكتار
وساحاتك الجسر المنيع
يا شعبي لما تقول كلام
مجبوره كل الناس تطيع
يا شعبي يا حب الجميع
]
يا شعب كل افرادو قاده
حاشاك ما بتحتاج قياده
كضب البيقول كان السبب
براك قدته الانتفاضه
يوم شئت شاء ليك القدر
يا الما بتغلبك يوم اراده
أرضك وطن للطيبين
وسودانك الصلاه والعباده
وريتنا مهما الظلم طال
كيف تبقى للشعب السياده
وكيف الشعوب لا من تثور
لا بده يتحقق مراده
ومحال تقيف النار قصاده
والقمره تطلع غير ميعاده
ولا بده ينزاح الظلام
يا شعبي لما تقول كلام

يا شعب مرفوع الجبين
يالعمرو عزمك ما هبط
يا الهمك السودان فقط
ويا البيكا وجدانو ارتبط
ثوارك الناس الحنان
وعدوك البيعمل غلط

[b]