ابوجبيهه

****سؤال محير رقم (12)****

استعرض الموضوع السابق استعرض الموضوع التالي اذهب الى الأسفل

****سؤال محير رقم (12)****

مُساهمة من طرف Suhad Abduelgfaar في 11th سبتمبر 2011, 13:18

احبابى احباب الحباك
بعد غيبه
من تسؤلاتى المحيره الكثيره جدا
اعيد بكم الى سؤال (غريب وعجيب )
(الشمممممممممممممارات). قبل السؤال ادردش معاكم
مع فكره خطرت ببالى ....

الوووووو تلفون مشغول
ويدخل (الانصر مشين )الو انا (ن) مشغوله الان مع لمليم الشمارات لو عندك شمار طازه
وما قادر تنتظرنى سجل لى شمارك سريع وبعد ما اخلص من العندى برجع ليك (شكرا)
الاخت (ج) المتصله
وينك يختى تلفونك ده مشغول كده
من قبيل بتصل عندى ليكى شمار حاااااااااااار اقفلى
اقفلى قوام وارجعى لى سريع قبل الشمار ما
يقدم
واشوف واحد تانى غيره
وما تنسى الشمار المشغوله بيهو ده
توصلى لى سريع (لكن يختى من غير زيادات ) تبقى زى (فلانه...) تزيد وتزيد فى الشمار حتى يمسخ .....
الشمار التانى ...
عباره عن ايميل مرسل من اخونا( ابو شنب)
وينك ياخى
امس (لطعتنى) كده منتظرك
تكمل لى باقى الشمار وما اشتغلت بى شغله
و(زولتك )عامله فيها نايمه
لكن عارفها تكون عايزه تسمع الشمار عشان ما تقبض بيهو الجو مع صحباتها
لكن كسرت ليها الدش فى راسها
وطلعت ليك
فى البلكونه وانتظرتك بس شريتنى وقلت

اكيد
تكون بتغالط فى (الوليه)
لانها زادت حبه
من الشمار بتاعك وانت زعلان تشاكل فيها
(يا وليه انتى مجنونه
الشمار ده
ما كتير قدر ده
جبت الزياده دى من وين .......)
السؤال هو ........
سمعنا بان (حواء) هى صاحبت (الشمارات) من زمن (عجوبا الخربت سوبا ).
هل (الشمارت) خاصه( بحواء) فقط ام ادم (شمشار) كمان ؟
ونعلم ان الاختلاف فى الراى لا ............
منتظرين (شماراتكم )هى قصدى (مداخلاتكم)
خالص احترامى لكم
[b]

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف اقبال عبداللطيف في 11th سبتمبر 2011, 13:50

امانة شمارك ماداير جبنة كاربة..
والله يابت امي حواء في حاجات كتيرة شايلة النايحة...اما بالنسبة لي شمارك با سهاد ادم يمتلك الخاصية..الأخبار شنو؟


عدل سابقا من قبل اقبال عبداللطيف في 11th سبتمبر 2011, 14:06 عدل 1 مرات


لا اعرف شيئا تواطأ الناس على هضمه وزهدوا في انصافه مثل الحقيقة

اقبال عبداللطيف
مشرف ركن الاسرة
مشرف ركن  الاسرة


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف Suhad Abduelgfaar في 11th سبتمبر 2011, 13:58

تسلمى يا اقبال يا اختى
على المرور الجميل
والجبنه جاهزه امرقى لقدام .
اها (الشمارات) كيف (هى قصدى الاخبار كيف )
تحياتى .
اقبال قالت "(ادم يمتلك الخاصيه )
اها رايك شنو يا (ادم) فى الكلام ده .

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف محمد قادم نوية في 11th سبتمبر 2011, 14:56

الشمار لمن لا يعرفه هو الخبر الذي يتم تناقله في وسط الحلة، والشمار هو الاسم الحركي لـ (القطيعة)، وهو يندرج تحت طائلة (أكل لحم أخيك حياً)، ويُرصد ضمن نتائج حصاد الألسن يوم الحساب، وهو يأتي نتيجة للفراغ وقلة الشغلة الـتي تعلّم المُشاط، نقل الشمارمتواجد في كل المجتمعات واشتهرن به النساوين أكثر من الرجال وبالذات في قعدات الجبنة، حيث يكون الجو ملائماً لنقل الشمارات البينية، وكذلك يحلو الشمار في بيوت العزاء والأعراس، صحيح أن الشمار ماركة مسجلة لـ النسوان، إلاّ أن لبعض الرَجّال منه نصيب، وعملية نقل الشمار تُسمّى بـ (فتّ الشمار)، ويتم (فتّ الشمار) حيثما اجتمعتا امرأتان فـ أكثر.!
ينقسم الشمار إلى ثلاثة أنواع مختلفات: (شمارٌ طازج)، و(شمارٌ تقيل)، و(شمارٌ بايت)، أما الطازج منه فهو الذي يتم نقله بعد وقوع حادثته بقليل، وأحياناً قبل ما تقع ذاتو، فـ مرات يجيبو ليك خبر الواحد قبل ما يموت.!
أما الشمار التقيل، فـ الحديث عنه ذو شجون، وهو النوع السائد والمتوفر هذه الأيام، فـ شمار الطلاق يُصنّف ضمن الشمارات التقيلة جداً، وتقلته تأتي بعد معرفة أن (فلانة ديك طلقوها)، ثم تتواتر الأخبار بعد ذلك لمعرفة لماذا وكيف ومتى وأين طلقوها؟ وما هي الظروف والملابسات التي طُلّقت فيها؟ وهل لطلاقها علاقة بـ ثٌقب الأوزون؟ أم بـ تداعيات الأزمة المالية المعاصرة؟
أما الشمار البايت فهو نادر الحدوث .. لأنو هو ذاتو البخليهو يبيت منو؟!
شكراً سهاد علي الشمار التقيل

محمد قادم نوية
مشرف منتدى الصوتيات
مشرف منتدى الصوتيات


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف Suhad Abduelgfaar في 11th سبتمبر 2011, 15:58

تسلم اخى ود نويه
مشكور جدا على التوضيح الكامل
(لشمارات).
وهى دى المصيبه عزيزى
الشمارات اصبحت
من نصيب (ادم )اكثر من( حواء)
ليه كده يا ادم
تشغل بالك باخبار الناس وتنسى نفسك
وتضيع زمنك
فى القيل وقال ربنا يشفى الجميع .
ويكفنا من شر(فت الشمار)
تحياتى

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف فيصل خليل حتيلة في 11th سبتمبر 2011, 16:07


صباحاتك بتتعانق مع الفكرة عشان تنضج شماراتك

يا شماراتك وكت تتقل فى جلستنا و تاخد كل نهاراتك

شكرا سهاد

موضوع غاية الروعة

اقترح ان تجمعى كل الاسئلة المحيرة فى بوست واحد

ول نويه لك الحب

ياخى رايك شنو فى شمار آدم؟

فيصل خليل حتيلة
مشرف إجتماعيات أبوجبيهة
مشرف إجتماعيات أبوجبيهة


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف اقبال عبداللطيف في 11th سبتمبر 2011, 16:10

علم والله ياول نوية
نحنا الطلعنا فارات
ماقلت ليكم البقر عند كنانة
وبقارة شايلين النايحي

اها ياجماعة الشمار كاتلني الباقين رايكم..سهاد عملت لي توكيل.


لا اعرف شيئا تواطأ الناس على هضمه وزهدوا في انصافه مثل الحقيقة

اقبال عبداللطيف
مشرف ركن الاسرة
مشرف ركن  الاسرة


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف Suhad Abduelgfaar في 11th سبتمبر 2011, 16:17

تسلم عزيزى(ابواحمد)
اقتراحك على العين والراس .
مشكور على المرور .
تحياتى



Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف Suhad Abduelgfaar في 11th سبتمبر 2011, 16:20

انتى الكل فى الكل
اخيتى اقبال
والتوكيل فى يدك
ومنتظرين البقيه
تحياتى

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف ناهد عبيد في 11th سبتمبر 2011, 19:01


اهاااااااا انا جيت

كيفنكم

صراحه موجود بكثره فى وكالات الانباء والصحف السياره يلا اعملو احصائيه سريعه لعدد ادم وحواء العاملين بها سوف تجدون الاجابه ويا ريت لو بديتو بالدار .
صدقونى دى حاله مرضيه ما لها علاقه بالنوع تتعلق بالفرد نفسه.

شكرا سهاد

ناهد عبيد
مبدع مميز
مبدع مميز


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف سومه العمدة في 12th سبتمبر 2011, 09:42

هلا سهاد وبسؤالك المحير وحقيقي هو محير
الا ود نويه طلع خطير عالم بكل انواع الشمارات الا نتمنى ماتكون واحد من الشمارين ،،،لكن ياسيدي ماكل شمار معنى كلام في الغير ممكن يكون شمار لكن خاص بي يعني ماجبتا سيرة زول
وصراحة ناهد كلامك نعمة الحقيقة هو نوع من الامراض لا يختص لنوع ولا جنس
الا ياجماعة الايام دي الرجال زادو شمارتهم من النسوان
ودي واحترامي

سومه العمدة
نشط مميز
نشط مميز


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف صباح حسن عبد الرحيم في 12th سبتمبر 2011, 14:56

في البوست دا انا ما بجئ الشمار كتير
انا تاني ما بجئ ......
ههههههههههههههههههها
احترامي

صباح حسن عبد الرحيم
مبدع مميز
مبدع مميز


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف محمد عبد الله قادم في 12th سبتمبر 2011, 15:10

ابدأ من تعليق الاخت صباح حسن

هههههههههههههههههههه

بالجد لقيتك جرسة مالك قال خفتي من السواطة دي ولا شنو؟

عموما تسلموا يا ارائعين لكن عاوز اقول الشمار معروف سيدو منو مافي داعي لكشف الحال يا جماعة

محمد عبد الله قادم
نشط مميز
نشط مميز


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف Suhad Abduelgfaar في 14th سبتمبر 2011, 09:56

حباب بجيتك يا ناهد يا اختى
ونورتى البوست .
غايتو انا قولى انا قولى (ادم) كتر العيار
ولكن بمشاركة( حواء) عشان ما نظلم (ادم).
تحياتى

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف Suhad Abduelgfaar في 14th سبتمبر 2011, 10:01

تسلمى عزيزتنا بت العمده


عزيزتنا بت العمده قالت :
(الا ياجماعة الايام دي الرجال زادو شمارتهم من النسوان)
والكلام ده حيجيب (شمار) تانى
وينك يا ادم منتظرنك
تحياتى












Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف Suhad Abduelgfaar في 14th سبتمبر 2011, 10:03

الكلام ده كيفنو يا الصبوحه
لازم تجى عشان منتظرين (شمارات) السودان
عايزه( تخمينا)فى شهرين (شمارات)
تحياتى

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف Suhad Abduelgfaar في 14th سبتمبر 2011, 10:06

سلامات يا ود ابوى قادم
والله ما عايزن نكشف الحال بس عايزين
(الشمشارين ) ديل ينتبهو لنفسهم ويبطلو
(شمارات).
علا شايفه الاخوات كترن على (ادم)
والكلام ده كيف ؟
تحياتى

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف غريق كمبال في 14th سبتمبر 2011, 10:39

:d-- إزيكم يا خواتي 00 مالكن واقفات في شنو ؟؟؟ --والله سمعنا قالو في فاتحة في كودى 0000 --أجي سجم خشمي المات منو ؟000 -- سمعنا ساكت يختي قالو دى السودان هو مالو كان عيان ؟
-- بري بري بري يختي إنشاالله الجات عليهو تجي للعدو الماحبيب!! إنتي مالك
طرشه ولا قاعدة في إضنينك؟؟00 الناس يا يمة الفي بيتو ديل ،طبقو علي نفسو
،وخربوها عليهو، خلوه لا مجنون لا نصيح 00 أكان إتكلم ما يسكت وأكان سكت
الياها --أها كان كدي أظنها دي الياها !! 00 لكن يا بت
امي الوصّلو للحالة الصعبة دي شنو ؟ وأهلو وين مخلينو وجادعنو للناس الما
بخافو من ربهم ديل 00 ؟؟ الله يكضب الشينة 00000!!
--عاد يختي قالو
ليك الناس ديل دخلو عليهو بالساحق والماحق ،وما خلو ليهو صفحة ينوم عليها00
الراجل كان ود قباااايل ودارو كبير وواسعة وملااانة خيرات 000 أول حاجة يا
يمة لحسو راسو ما هو زول طيب وطلع على نياتو ومسكو ليك (حلقة الشيخ
الفلاني ،والمدحة الفلانية، وبركات مولانا فلان ) 00 لحدي ما دروش ومخو
طار00 0 أصبري شويه أنبل ريقي 00 تحبي الشمارات كدي زي جوع بطنك00 وإنتي جعانة خلقة --كدي خليني من كلامك دى ما ترى كل مرة نسمع الليلة عرس السودان الليلة عرس السودان كان مدروش العرس ليهو شنو؟ --هئ هئ هئ عرس شنو جاتك خيبة 00 قولي جنازة يختي 0 --ليكي
حق نحنا كلو مرة تجينا ليك داك يالبخور جاولي وعدني وديك يا الربة والهيصة
لما شمشمنا عرفنا إنو الناس ديل بيعملو المحايات والبخرات والليلات 000 ما
يسمعوني الناس يقولو علي متخلفة00 والله يختي الراجل دة كان مات تكون
الحسرة ساهي كتلتو 00 --حسرة دارو الكان بتفشخر بيها بين رفقاتو مسكوها فرزعت فرزعت قسموها وخيراتو وزعت وزعت وزعوها خلوه جعان (صايم ديمة )00000 --أسكتي يا ولية والله تجيكي بخرة طايرة تلحس مخك00 --كدي أسمعي00 قالو لسع ما مات لكن في خشاش الروح 00 --الحمد لله إنشالله أهلو يلفوهو من النصابين والدجالين ديل00 -أها يا بت أمي مع السلامة

غريق كمبال
مشرف المنتدى الاقتصادى
مشرف المنتدى الاقتصادى


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف اقبال عبداللطيف في 14th سبتمبر 2011, 11:54

هي اسكتن وادخلن من الشارع عندي ليكن شمار تقيل ..ادخلن ماتيجن لي كراع بوليس..سمع اضاني قالوا الراجل الجا من ليبيا جا معاهو زنقة زنقة..عات الراجل صاحب واجب ..لكن يابنات امي هي ناقصة زنقات..الرجال ديل جنو ولاشنو ..

البوست دا اسمو شمار محير ياسهاد؟


لا اعرف شيئا تواطأ الناس على هضمه وزهدوا في انصافه مثل الحقيقة

اقبال عبداللطيف
مشرف ركن الاسرة
مشرف ركن  الاسرة


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف ابوهريرة عثمان عبدالسلام في 14th سبتمبر 2011, 16:12

يازعيم شمارك دا الشمار ذاتو دا يكون حير ناس سعاد



اقبال والله شمارك ده مش يجيب كراع بوليس بس دى يجيب ابواتهم ذاتهم



بالله لوسمحتو خشو لينا جوا

ابوهريرة عثمان عبدالسلام
مشرف المنتدى الاسلامى
مشرف المنتدى الاسلامى


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف Suhad Abduelgfaar في 14th سبتمبر 2011, 18:12

اخونا الزعيم هو ده الشمار (التقيل)
(ربنا يحفظك من كل مرض يا( سودانا) الحبيب
والله يمرض الكان السبب)
تسلم اخى غريق ضحكتنى الله يضحكك ويضحك سودانا.
تحياتى

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف Suhad Abduelgfaar في 14th سبتمبر 2011, 18:18

(شمارك )
مبالغه يااقبال يختى
(زولك) ده ربنا يكون فى عونه
وعون (السودان)
تحياتى


Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف Suhad Abduelgfaar في 14th سبتمبر 2011, 18:24

والله كلامك حقيقى اخوى (الافكاتو)
شمار حيرنا عديل كده (النسوان كتلن السودان )عديل كده ومشن فى جنازته.
تحياتى

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف يس محمد يس في 15th سبتمبر 2011, 08:45

الظاهر ناس المنتدى ديل بقو ناس شمارات عديل يا سهاد .

يس محمد يس
نشط مميز
نشط مميز


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف Suhad Abduelgfaar في 17th سبتمبر 2011, 12:13

ضحكتنى اخوى يس .
بس بسعلك سعال
الفول من غير (شمار)بكون طعمه كيف ؟
تحياتى

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف محمد قادم نوية في 9th أكتوبر 2011, 11:20

مرحب بيك أختنا سهاد وسعيدين نراكِ اليوم معانا ..ومن ضمن "الشمارات التقيلة" جداً التي سوف تكون في الأيام القادمات .. في مهاتفة مع جنابو ذكر لي فيها بإنو حــــ يجي بشمارات تقيلة جداً ؛هو قايل انحنا ورانا حاجه؟أهو منتظرنِّو ..
تحياتي؛؛؛؛؛؛؛؛؛؛

محمد قادم نوية
مشرف منتدى الصوتيات
مشرف منتدى الصوتيات


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف Suhad Abduelgfaar في 9th أكتوبر 2011, 11:26

تسلم اخوى ود نويه
وانا كمان سعيده
وسطيكم يا اهلى الطيبين
وربنا ما يحرمنا منكم .
ويجمع كل الغائبين
اها كلنا منتظرين شمارات (اخوناجنابو)
تحياتى

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف nashi في 9th أكتوبر 2011, 11:53

ابوهريره كتب:

بالله لوسمحتو خشو لينا جوا
*********
غايتو احلي شمار سهاد جات
cheers cheers cheers cheers cheers cheers
bounce bounce bounce bounce bounce
فرحة شديده

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف Suhad Abduelgfaar في 9th أكتوبر 2011, 12:11

تسلمى يا اخيتى الدكتوره
وربنا يفرحك دايما
لكن شمارك طازه
خلى بالك سهاد دى تكون كانت بتلملم فى (الشمارت) اختفت قدر ده
تحياتى

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف محمد قادم نوية في 12th أكتوبر 2011, 14:08

في إنتظار أسألتكم ياناس لندن....

محمد قادم نوية
مشرف منتدى الصوتيات
مشرف منتدى الصوتيات


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف Suhad Abduelgfaar في 13th أكتوبر 2011, 10:32

تسلم يا ود نويه يا اخوى
والله الاسئله المحيره كتيره خلاص
وما قادره اركز من كترتها .
رايك شنو تدينا سؤال محير من عندك
المره دى ؟
تحياتى

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف محمد قادم نوية في 13th أكتوبر 2011, 12:54

طوااااااااااالي لبّستي فينا الطاقية ؟ مامشكلة جاهزين بس منتظرين جيّة جنابو

محمد قادم نوية
مشرف منتدى الصوتيات
مشرف منتدى الصوتيات


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف محمود محمد ابراس في 13th أكتوبر 2011, 14:26

منتظرين (شماراتكم )هى قصدى (مداخلاتكم)

محمود محمد ابراس
نشط مميز
نشط مميز


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف Suhad Abduelgfaar في 4th ديسمبر 2011, 14:55

###سؤال محير رقم 13###
سلامات احبابى احباب الحباك
نعود مع بعض الى
الاسئلة المحيرانا
لعلنا
نقدر مع بعض نفك بعض الشفرات
والحيره
العاشينها كل يوم

.....
حشمه فى توبك تملى العين يا بت بلد++

طلعت الان انواع واشكال كثيره من الثوب السودانى واسماء مختلفه
و.....و....
على الاخوات والاخوان ان يساعدونا
بما يعرفوه من اسماء الثياب
سؤالى هو
هل التوب السودانى هو نفس التوب الحشمه
والعز والفخر الزى تغنى له الكثير من فنانين بلدنا ام انه اصبح الشفاف الذى لا يعنى الستره والحشمه ؟
منظرين اراكم ومتفقين ان الاختلاف فى الراى لا ..........
مع خالص احترامى لكم ا







++


عدل سابقا من قبل Suhad Abduelgfaar في 7th ديسمبر 2011, 13:52 عدل 1 مرات

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف فيصل خليل حتيلة في 5th ديسمبر 2011, 08:57


التوب السودانى هكذا يسمونه فهو زى قومى و لا يجب ان يتم تشويهه بأى شكل من اشكال الخلاعة

موضوع حيوى

شفت التوب و ما لاقاني أجمل منو
بس التوب ... شوفو التوب
وسيد التوب يكون كيفنّو
***
نظرة سريعة مريت بيها ما أتمتعت
خطوة وحيدة بيني و بينها لو أسرعت
خلت طيبها مالي الساحة
زيها مافي لا شاهدت لاني سمعت
***
من جاراتها قادلة حلاتها
دخلت بيتها سرت حداها
داير ألقاها تب ما لقيتها
حتي الحنة ديك ما نسيتها
قادت ناري لو تطفيها ليّ يا ريتها
***
أستنيت و قلت أظن ترجع تاني
يمكن أشوفها
,أصلو الزول حياتو أماني
نظرة بريئة
مهما نابني ما هماني
لو ألقاها يرتاح بالي و يصبح هاني

هذا هو التوب و هذه هى ست التوب

شكرا ام يونس و حمدلله على السلامة



عدل سابقا من قبل فيصل خليل حتيلة في 5th ديسمبر 2011, 11:04 عدل 1 مرات

فيصل خليل حتيلة
مشرف إجتماعيات أبوجبيهة
مشرف إجتماعيات أبوجبيهة


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف الفاتح محمد التوم في 5th ديسمبر 2011, 10:44

أنا بعز التوب يا سهاد .....

وجني وجن التوب "أبوفتقة " عجبتك دي مش كده ؟؟؟؟؟؟؟

عز التوب
عز التوب وقت ينشال و يتفره
وعلى الكتفين يتيه مرة يتوه مرة
يزغرد شوق وشلال فرحة اتشرة
بعز التوب بعزو انا غاوي ابداعات
ملان تحنان يملأ قلوبنا اشراقات
في التوب نغم ما بتوصفو الكلمات
بعز التوب بعزو
بعزو صباح على بلدي و بنات بلدي
فيهوالعيون تسرح تسرح وما تعدي
يبقى غناي و يتردد تراث بلدي

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف Suhad Abduelgfaar في 7th ديسمبر 2011, 10:46


شفت التوب و ما لاقاني أجمل منو
بس التوب ... شوفو التوب
وسيد التوب يكون كيفنّو

نعم عزيزى (ابواحمد)
الثوب السودانى هو الحشمه والستره والتراث
والجمال ولكنى اخاف ان نفقده كما فقدنا الكثير
تحياتى

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف Suhad Abduelgfaar في 7th ديسمبر 2011, 11:04


الله يعزك استاذنا الفاتح
والله ضحكتنى
جايب خبر وعارف ابو فتقه كمان والله ليك حق اخوى تكجنو كده
عارف
السبب الخلانى انزل الموضوع ده
اتصلت بزين للتوب السودانى فى لندن
بسال من رسالة لندن عارف الزول ده لما بده يعدد لى انواع التياب لما اتخلعت

بس ركزت
مع


توب اسمو الموهوب قلت عساه ان يكون فعلا موهوبا

وفى كل حاجه فتقه ولا فتقتين وزولك مواصل
قلت ليهو شكرا بتصل عليك تانى
.........
اها وين الاخوات العزيزات محتاجين نعرف الانواع
والاسعار
كمان لو سمحتو.
اخونا ود نويه
سلامات
اها رجعناكم لسؤالات
منتظرين رايكم والانواع الجديد
تحياتى
[/size]

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف محمد قادم نوية في 7th ديسمبر 2011, 14:47

مرحب بيك يا أختنا سهاد بعد الغيبة ..المره دي جيتي بالتوب ذااااااااتو مافي أجمل منّو
في رأي التوب السوداني مهما توارت عليه من أسماء يظل هو التوب السوداني ؛وهذه المسميات علي التوب ليس واقعاً جديداً بل عرفه السودانيين منذ عشرات النسنين فتأتي هذه الأسماء للتوب مواكبة مع الأحداث السياسية والفنية والإقتصادية والفنية ؛فكانت مسميات التوب في الماضي مثل(رسالة لندن كرسي جابر عودة نميري والزرّاق )والآن مع المواكبة ظهر إسم(الأنترنت ؛الثورات وده بالمناسبة قالوا غالي جداً إتنين مليون ج س قديم ؛وندي القلعة والبرير )وكثير من الأسماء الحديثة

محمد قادم نوية
مشرف منتدى الصوتيات
مشرف منتدى الصوتيات


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف Suhad Abduelgfaar في 8th ديسمبر 2011, 12:03

تسلم اخوى ود نويه فيك الخير
والله الغيبه ما باليد بس دعواتكم معانا
ضحكتنى اخوى الانترنت والثورات
ديل شكلهن جداد لجن
علا الخرابه مالن غاليات كده وديل بلبسوهن ولا بسو بيهن شنو
2مليون
ده كلام خطير
والله غبيان ادم البشترى توب بى 2 مليون
الرحمه حلوه
تحياتى

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

مداخلتين يا سهاد والحضور جميع....يعني (( شمار مقنن ))

مُساهمة من طرف الفاتح محمد التوم في 9th ديسمبر 2011, 01:34


الأول :
قصيدة شمار سعدية بت جبريل (( للشاعر هاشم صديق ))
شهادة بحث في حمد النيل..تراجيكوميديا من ثلاثة فصول
«الفصل الأول»
- ناس البيت
هوووي يا ناس.
يا عشمانة.
يا إخلاص.
بنات كلتوم
يا فوزية
كيف حالكن
مشتااااقيين


سلاااام بالكوم
..........
جات سعدية
شايله شمار
معاهو «التُوم»
مشت شهرين
تَنَفِّس بتها
«الخمجانه»
في الخرتوم


تمام شهرين
بيوت الحله
لا سمعت خبار
لا شَمار
ولا قرقر ضحك
حلقوم.
ولا طقطق لبان
هيمان
في مُبْخر
بخور تيمان
ولا شالن حريم
فنجان
وسيرة زول
على قدوم.
لا ضحكو الصغار
في حجوة
لا سهروا الكبار
في حكوه
واتمحّن وطار
النوم.
......
نان سعدية
بت جبريل
كان عارفين؟!
رويحة الحِلة
والطلّة.
لا قِدْمت
ولا هِمْلت
لا مسخت
لخلق الله
لا عِرْفَت
بيوت الحله
ليها متيل.
.....
كان غابت
تقول نامت
عيون القمره
أو ترتر
وفات النيل.
.......
هي المشاطه
والحنانه
والدلاّكه
والدبّاره
والشمشاره
والسمساره.
والطهاره
بي موسا
ما خلت
في هذا الشان
لِبت في الحله
شي مطلوق.
......
هي الجهّازه
للعرسان
ما بتقعد عروس
في حُفره
لو سعدية
ما وقدت
طلح دخان.
هي ديمه الراس.
القيدومه.
دق الريحه.
ست الشوره
والطايوق.
مرسال النَقَص
للسوق
عَرَق الهِمّه
للحبان
خبيرة الخُمره
بي ميزان
لو شم العريس
عوسا
تسيل دمعاتو
ويتجرّس
تقول ولّع
عديل بمبان.
........
كان دقّت
إيدين سعديه
في التعليمه
دلوكه
تلاقي النخله
تِتْفَنّس
وعودها يميل
تبوس سعفاتا
موج النيل.
وكان شالن
بنات الحله
غنوه معاها
تِتْقَطّع عديل
قمصان
ويتكشّف
ضهر شبان
يولول في الجلود
السوط
يرْكز في البُطان
عاشق
تزغرد ليهو
زولتو السمحه
«ست الفوت»
يفور عِشقو
ويقول
- يا سوط
اريدك موت
تهز فوقو الايدين
طايرات
تولع نار
في وسط الدار
تَجِن زغرودة
من سعدية
ويتلهلب
غنا البنوت.
........
- ناس البيت
هوووي يا ناس.
يا عشمانه
يا فوزيه
يا إخلاص
بنات كلتوم
كيف حالكن
مشتااااقين
سلاااام بالكوم
...
إنفتحن
عيون البيت
وانجدعن
ايدين الاوضه
والراكوبه
واتسرّح
شَعَر لالوبه
رجعت شابه
فاتا الشيب.
وركّت رشّه
فوق صفقات
شديرة الحنه
واتمسّح
غَباش الصنّه
واتجمّع
حمام الحله
واتراصص
تقول «قرقول»
صَدَح «قوقايو»
بي تهذيب
.....
- جات سعديه
- جات سعديه
.....
جَرَت عشمانه
لي سعديه
حفيانه
وجات إخلاص
تَنَقِّز
زي وليد الريل
وطربانه.
ضحك قرقار
ودمع الشوق
نزل سرسار
وصار شَهَقى
السلام
دوبيت
...
- جات سعديه
- جات سعديه
....
سباليق البيوت
رفعت عديل
تعظيمها
بالترتيب.
وشوفو الشامه
بت كلتوم
وكت سمعت
سلام سعديه
- بالدهشه-
قدّ الإبره
اتغاتت
واتسمّر رويس
الخيت
وإتنخَجَت
تقول راجياله
بس هبشه
....
ومن بين إيدين
فوزيه بت كلتوم
وبالهجمه
كمان طارت
عديل كمشه.
ونُص السهله
«بت الريله»
إتنفَضَت
واتْنَفَشَت
وجات زغروده
إنبهلت
إتْقَسّم
ضِليل شَدَره
واتبسَّم
خشيم مُفراكه
في حَلة مُلاح
خُدْره
واتشرشر
في نُص الطوه
واتْطاير
حنين الزيت.
.....
- جات سعديه
- جات سعديه
...
اتعنكش
في عود سعديه
كل الناس.
الشُفَع
حريم البيت
الجيران
تقول نخله
سبايط خيرها
إتدْلّت
وتِقلو خلاص.
وهاك يا سلام
وهاك يا شوق
وهاك يا كلام
إتجمّع
في رمش العين
هوى الأرحام
واتجدّع
وطال الضُل
فَرش لي بِرشو
لي قِدّام
واتردّت
رويحة البيت
قلع توب زهجو
بالايدين
...
اتْفَرشت
في غمضة عين
عناقريب الأهل
صفين
وكم سجاده
كم بنبر.
ومن مبخر
مستّف
بي بخور تيمان
طلع صَفّق
سحاب دخان
واتحكّر
في نص تربيزه
جك ليمون
مندِّي قزازو
زي حتّل
دموع مكنون.
ووسط الرجّه
والضحكه
إتماسك تمام
الكون
صِبِح موزون.
....
جات قُراصه
بي دمعه
واتراجف
صحن لقمه
وكت دلقن
إيدين نعمه
عليهو ملاح
نعيميه
واترصت
صحون الفول
تقول لمه
وبالفرحه
ضحك سرويس
وكت رَدَمَن
إيدين الشامه
بت كلتوم
تلات مرات
تل من نارو
طعميه
...
وهاك يا ونسه
يا قرقار
ويا سعديه
ست القعده
إنفتحي
تقول رادي
وهاك يا نشرة
الشهرين
من الخرتوم
جِنس أخبار؟!
تُوم وشمار
حتى الضُل
وقف شمشار
....
صواني تفوت
صواني تجي
قصص بالكوم
ضحك وحكي
ويا سعديه
ما خلت
نَفَس يتشال
ولا إيداً
تحك الراس
جِنِس قصصاً
تجيب هلواس
....
راس البيت
وقف مشطوب.
في عين النخله
كان الزير
خروف دبدوب
وبالهجمه
إنزلقن
من الايدين
كبابي الشوب
واتلخبط
حمار مربوط
نهق في الخُلعه
بالمقلوب.
صهل
ضحك الحريم
كورس
وكت فرقع
تقول في الحته
نُص القصه
كان مكتوب.
.....
يا سعديه
هاك الرص
وراهو الرص
وتتجادع
حريم البيت
سؤال وسؤال
تقول دوبيت
....
- سجم خشمي
مسك إيدينها
جوه البص؟!
...
- أجي يا يمه؟!
كمان قلعن
عديل التوب؟!
....
- سجم أُماتن
الخايبات
شن راجيات؟!
...
- أخير واحسن
يقولن روووب
.....
- قلتي شنو؟!
واحدات شربن
عديل الـ......
شنو؟!
الشيشه
ولاّ حشيش؟!!
....
- سجم أمي
يا سعديه
قلتي الشي الورا
داك
سموهو برضو
شنو؟
الدِش؟!
...
يا سعديه
بت جبريل
تقول حاوي
اتحكرتي
شلتي الجو
حريم البيت
بضحكه طويله
سَوّن شوووو
وكت سعديه
إتفَنَست
وقالت
- أيّا
اسمو الدِش
وحاة الله
شفت بنيّه
نُص السوق
وبالفستان
تَقَلِّب ليها
في دِشّاً
تقول عتالي
شايل ليهو
قنطار عيش
جوه الخيش
...
ويا سعديه
بت جبريل
وكت كِتْر
الطَعِن في الضُل
إتعدلت
في نص الداره
زي ملْكه
وخَشّت توووش
عديل في الفيل
....
- هي يا يمه
نان ما نسيت
أقول ليكن
حكاية الزاكي
ود قنديل
- الزاكي منو؟
- ود قنديل
جار التوم
- التوم
راجل بتك
«الخمجانه»
في الخرتوم؟
- أيّا
...
وانعصرن
حريم البيت
على سعديه
جايى شمار
كبار مردوم
معاهو التُوم
وشِيهن رارا
للاخبار
...
يا سعديه
خُشي عديل
طَعِن في الفيل
....
- هو زول سمسار
قروشو كُتار
وخالو وزير
- سمسار سوق
ولاّ بيوت؟!
- في شيتاً
ما بسمسر فيهو
ود قنديل؟!
من الخرفان
لحدي الخُرده
والعربية والتلاجه
والدكان.
سواقي
لواري
طيارات.
بيوت للبيع
بيوت تأجير
حصين
وحمير
كمان أكشاك
تجارْة الشنطة
والتمباك.
جزم
قمصان
ورق
أقلام
كمان دخان.
....
وكت دقّت سديرها
الشامه
بت كلتوم
كمان
كل الحريم تبعوها
في ذا الشان
....
- سجم خشمي
سجم خشمي
وا خجيلتي
وا خجيلتي
يا نسوان
- كمان دخان؟!
....
سعديه غمزت
ليها
غمزه طَرَف
وزي حاوي
وبي حركة صوابْع
الإيد
سوّت ليها
ورقة لف
ومطّت للحروف
تبيان
- دخاااااان
ما دخااااان
فهمتن حسه
يا نسوان؟!
- سجم خشمي
حتى البنقو
باعو كمان؟!
- أصُبْرَن
أصُبْرَن
وقالوا الساترو
وساندو
خالو وفاهمو.
وسمعت شمار
قالوا استوردو
البمبان
.....
الشامة شهقت
وصوتها عشرق
والريله نَفّت
دموعها سالت
وفوزيه قَحّت.
عشمانة عطست.
....
وسعديه ضحكت
- سجمكن
مالكن حسه
يا نسوان؟!
شان قلت بس
بمبان؟!!
....
- وخالو وزير
- أيّا
مكنكش
في الكراسي عديل
لا شالوهو
في تعديل
لا نقلوهو
بره سفير.
ولو ساط البلد
بي حالها
ما سألوهو
من تفسير
- مساخْر الدنيا
في ناس ديل
- ناس مدفوره
يوت لي فوق
وناس بنيانها
درب السيل.
....
ويا سعديه
زيدي شمار
لسه الرادي
فيهو خبار
....
- أها اتذكرت
حاجة كمان
والله لو حجُّونا
ما بتدخل
عَقُل وأضان
...
اتفتحت
عيون شباك
وصَنُّو اتصّنتُو
البيبان
واتمدّت
إضين نسوان
ويا سعديه
اتشمرتي
واتحكرتي
واتمهلتي
واتوكلتي بالرحمن
شمارا الجاي
صنفو تقيل
عديل يكسر
رقيبة الفيل.
...
- قالو الزاكي
خَشّ عديل
يسمسر
في مقابْر البكري
وأحمد شرفي
وحمد النيل
...
في تربيزه
نص القعده
منّ الخلعه
انكسرت كبابي
الشُوب
وطارت ليك
صواني الشاي
وقعت رُب.
....
- عشان الموت
صبح بالكوم
وموت الجُمله
صار معلوم
ناس الزاكي
شان ما يبقوا
يوم في لوم
قالوا الناس
تقدم لي قَبُر
بدري
وما تْسهِّى
ويشيلك نوم
تخُت دمغات
في طلب التُربه
تدفع للحجز
ورسوم
ويدوك....
ويدوك....
شن سموها يا سعديه
بت جبريل
شن سموها يا سعديه
بت جبريل....
أيّا
«شهادة بحث»
مكان عايز.
تُرب فاروق
ود البكري
أحمد شرفي
حمد النيل
....
إنْقَلَدن
حريم البيت
وانفقعن
دموع وعويل
...
صوت النخله
بالمليان
زِعِل كورك
- يا نسوان
بدل تبكن
على الخرتوم
بدل تبكن
على امدرمان
أخير تبكن
على السوداااان
«و...تتوالى الفصول»
الفصل الثاني قريباً
شمار سعدية بت جبريل
«كضبة ناس.. في شهر ابريل»

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف الفاتح محمد التوم في 9th ديسمبر 2011, 01:59


وثانياً من القاهرة: «الشرق الأوسط» (( عن التوب الســوداني ))
لا يعتبر الثوب السوداني مجرد زي يميز السودانيات، اذ بات مع مرور الزمن جزءاً من التراث الشعبي لذلك البلد الذي يحرص مواطنوه على إعلان الانتماء إليه بشتى الطرق، خاصة عندما يوجودون خارج بلادهم في إشارة إلى هويتهم وثقافتهم، فضلا عن كونه معبراً عن الوضع الاجتماعي والاقتصادي للمرأة السودانية التي لا يمكن أن تخلو خزانتها من «ثوب» بعدة نسخ منه، تزيد من أناقتها حتى لو لم تكن ترتديه باستمرار، بل حتى الأغنيات الوطنية السودانية وجدت في هذا الزي بعضاً من رائحة الوطن الذي يميزه بين الاوطان، ومنها أغنية «يا بلدي يا حبوب، يا أبو جلابية وتوب». يعود تاريخ «الثوب» السوداني إلى سنوات بعيدة، تزيد من عمق تأثيره في مفردات الحياة الاجتماعية السودانية. ففي الماضي كانت الفتاة في السودان، تلتزم بارتدائه بمجرد بلوغها سن الثانية عشرة من عمرها، إيذاناً باكتمال أنوثتها، ومعبراً عن وصولها سن الزواج. بعبارة أخرى كان وسيلة للفت انتباه الناس إلى أن الصبية قد باتت بين عشية وضحاها شابة، تستطيع تحمل مسؤولية الزواج والاشراف على المنزل، إلى حد ان الفتاة كانت ملزمة بارتدائه لهذا الغرض، إلى عهد قريب. الأمر يختلف بالنسبة للسودانية المتزوجة، فهي لا يمكنها التنصل من ارتدائه، لأنه يعتبر إشارة واضحة على أنها سيدة متزوجة. وتمتد علاقة «الثوب» بمفردات العادات الاجتماعية السودانية، لتصل إلى عادات الزواج المتميزة بعاداتها وطقوسها. والدليل على أهميته أنه يتصدر قائمة الهدايا التي يقدمها العريس لعروسه، ويتراوح عدد ما يقدمه لها من اثواب ما بين 3 - 12 بألوان مختلفة. ليس هذا فحسب، بل يتعين على العريس أيضاً شراء مستلزمات الثوب، بدءا من الحذاء إلى حقيبة اليد المناسبة، وهي العادة التي اصطلح أهل السودان على تسميتها بـ «الشيلة». ألوان الثوب تتحدد حسب المناسبة التي سيتم ارتداؤها فيها، فالثوب الأحمر المزركش والمرصع ببعض الحلي، ترتديه العروس بعد انتهاء مراسم الزفاف، التي تليها عادة اسمها «الجرتق»، يرتدي فيها العريس الزي القومي للرجال، وهو عبارة عن جلباب وعمامة. أما الثوب ذو اللون الأبيض فترتديه السودانية في حال وفاة زوجها، حيث تواظب على ارتدائه طيلة فترة العدة ولا تغيره أبداً. وعموماً فإن اللون الأبيض في السودان يظل معبراً عن الحزن على عكس الدول الأخرى التي ترتدي النساء فيها اللون الأسود. ولا يعبر الثوب السوداني عن الوضع الاجتماعي فقط للمرأة السودانية، ولكنه أيضا يعتبر مؤشرا مهما لحالتها وحالة زوجها الاقتصادية. فخامة الثوب ولونه وموديله تلعب دورا كبيرا في تحديد سعره وبالتالي تحديد من يقبل على شرائه، حيث يشكل الثوب مدعاة للتفاخر والتباهي، خاصة في المناسبات الاجتماعية، فنجد النساء يتنافسن على ارتداء أفخر أنواع الثياب، كما يعرف وضع الرجل الاقتصادي بما يقوم بشرائه وإهدائه من أثواب لزوجته. وإذا كان المثل العربي يقول انه لكل مقام مقال، فإن المرأة السودانية تقول «لكل لقاء ثوب»، فعندما تزور المرأة السودانية جيرانها ترتدي ثوبا بسيطا تطلق عليه ثوب الجيران، وعندما تستقبل أحدا في منزلها ترتدي ثوبا يتناسب مع المناسبة، وهكذا. ويتراوح سعر الثوب السوداني بين 50 دولارا و700 دولار للأثواب ذات الخامات الفاخرة والتطريز الجميل. ويتكون الثوب السوداني من قطعة من القماش يختلف طولها حسب طريقة ارتدائه، فيبلغ طول الثوب الذي يتم ربطه من الوسط إلى أربعة أمتار ونصف المتر، بينما يبلغ طول الثوب الذي يتم ارتداؤه من دون ربطه من الوسط، نحو تسعة أمتار. أما طريقة ارتداء الثوب، فتتم عن طريق لفه حول جسد المرأة ورأسها فيما يشبه طريقة الساري الهندي، الذي يختلف عن الثوب السوداني في أنه لا يغطي رأس المرأة. وتحرص السودانية على ارتداء تنورة أو فستان بلون مناسب للون الثوب قبل ارتدائه. وفي السودان تعرف المرأة الأنيقة من عدد ما تملكه من أثواب لا بد أن تتوافق في ألوانها مع لون بشرتها وحجم جسدها، سواء كانت نحيفة أو بدينة. ليس هذا فقط، بل يمتد الحكم على مدى أناقة المرأة الى ما تحويه خزانتها من اكسسوارات مكملة لأناقة «أثوابها». وتبدأ تلك الاكسسوارات من الحذاء وحقيبة اليد ومدى ملاءمتهما وتناسقهما مع ما لديها من أثواب. عالم أزياء الثوب السوداني هو الآخر زاخر ومتجدد، على الرغم من نمطية التصميم التي لا تخرج عن الشكل المعتاد للثوب، ويأتي الاختلاف من نوعية القماش المستخدم وتطريزاته، فضلا عن الاكسسوارات التي يتم تنسيقها معه. فيستخدم في تصميمه الحرير، والشيفون المضغوط، والقطن وغيرها من أنواع الأقمشة ذات الألوان المختلفة، فمنها السادة ومنها المطبوع برسومات مبهرة وألوان زاهية وجريئة أو هادئة ورسمية حسب الرغبة. كما تختلف خامة الثوب باختلاف البيئة النابع منها فهناك «الفردة» وهو اسم الثوب الذي ترتديه المرأة في شرق السودان، ويصنع من القطن الصافي الذي لا يحتاج الى تطريز، وهناك أيضاً «اللاوه» وهو الثوب الذي ترتديه النساء في الجنوب الذي يتميز بربطه من على الكتف من دون الحاجة لوضعه على الرأس، كما هي العادة في الثوب السوداني. ويلجأ التجار السودانيون إلى إطلاق أسماء ذات علاقة بأهم الأحداث الاجتماعية والسياسية والاقتصادية على ما يبيعونه من أثواب، ويمكنك من خلال جولة بين محلات بيع الثوب السوداني أن تعلم آخر المستجدات على الساحة الاجتماعية والسياسية في السودان. ومن بين تلك الأسماء «الدش»، «الإنترنت»، «نيفاشا»، «همس الخليج». هوية الثوب السودانية، لم تمنع دولة مثل سويسرا أن تضم بين حدودها أكبر مصانع الثياب السودانية، فسويسرا تعد من أكبر منتجي الثوب السوداني، حيث تمد السوق السودانية بأكثر من 82% من احتياجاته من هذا الزي. ويتابع مصممو الأزياء السويسريون السوق السودانية ويرصدون اتجاهات الذوق السوداني، ليبتكروا أرقى وأجمل أنواعه. فمثل العديد من الموروثات الوطنية، تأثر الثوب السوداني بعصر العولمة والانفتاح الثقافي الذي لم يرحم الثوب من المنافسه داخل السودان مع غيره من الملابس، خاصة العباءة الخليجية التي باتت المنافس الاول للثوب بين النساء في الشمال السوداني الذي يعيش فيه نسبة كبيرة من المسلمين، حيث تمنح العباءة المرأة سهولة الحركة، مقارنة بالثوب السوداني الذي كثيرا ما تشكو المرأة من أنه يحد من حركتها، وهو ما دعا بعض النساء الى ابتكار طريقة جديدة لارتدائه، من خلال ربطه حول الوسط " الفتــقة "على طريقة الساري الهندي، ووضع جزء آخر كغطاء للرأس تسدله المرأة على كتفها الأيسر، ويطلق على هذا النوع من الأثواب، «الربط» وتكون خاماته في العادة من الحرير والشيفون
+++++++++++++++++++++++++++++++++++++++++++++++++++

تضم قائمة المصصمات مجموعة متميزة " :
*خلود كبيدة التي تميزت عن الباقيات بعروضها التى تهتم بالتراث، حيث اعادت من جديد احياء موضات الثياب القديمة، وارتدت ثوبا من دمور شندى القديم وقالت إن اعمالها توثق لثوب الزراق والفركة والفردة، مع اضافات جديدة ومعاصرة تجسد للحوار بين الماضى والحاضر والمرطز والهامش، وتكون درعا واقيا ضد العولمة وثقافة الاجنبى.. وخلود تخرجت فى معهد سنجر للخياطة، وعملت محررة بصحيفة «الخرطوم» ورئيسة لجمعية المرأة السودانية بالامارات.
٭ شيماء حسين عبد الوهاب، تحمل شهادة الامتياز فى كورس تجميل من مركز افرينا بدبى، وتعمل فى مجال تجهيز العرائس الكامل وتصميم الثياب على طريقة الحرائر الفرنسية والتواتل السويسرية وتجهيز شيلة العروس.
٭ إيثار عباس أحمد، صاحبة مشغل نواعم، نالت البكالريوس فى ادارة الاعمال من جامعة الاحفاد، وتعمل فى تصميم الديكور والتجميل والمكياج وتصميم الأزياء، وتصميم كوش العرسان
٭ نور الهدى ابراهيم النوحى، تميزت بتصميم ملابس الاطفال والملايات والجداعات والفوط، ونظمت معرضا للثياب بمدينة الدوحة القطرية.
٭ نضال عفيفى تخرجت ببكالريوس الفنون الجميلة، ونظمت معارض باتحاد المرأة الافريقية بامريكا ومعرضا فرديا بتركيا وجماعياً بمركز الفنون بأمريكا، ومعرضاً باتحاد التشكيليات وآخر بالمركز الثقافي الليبي
٭ لينا بابكر الطيب، نالت البكالريوس فى المختبرات الطبية من جامعة السودان للعلوم والتكنلوجيا فى مجال الرسم والتصميم، وتعمل أيضا مساعداً لمدير عام شركة رحيق الطبية.
*الفنانة التشكيلية السودانية ميمونة البنجاوي.....
و أخيراً : فإن الاعلامية (مى) من قناة الجزيرة الانجليزية حرصت على نقل وقائع بعض " عروض أزياء " للتوب السوداني
............

خالص الود ....
+++++++++++++++++++++++++++++++++++++++++++++++++++

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف Suhad Abduelgfaar في 14th ديسمبر 2011, 10:49

قالو الزاكي
خَشّ عديل
يسمسر
في مقابْر البكري
وأحمد شرفي
وحمد النيل



عاد جنس شمار

التحيه لك استاذنا الفاتح

والتحيه لشاعرنا

والتحيه لسعدية ورفيقاتها الشمشارات

....................

كل الشكر لك استاذى الفاتح

اوفيت وكفيت

عن التوب السودانى

والتحيه لعزيزاتى المصممات وربنا

يديهن العافيه

تحياتى

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف الفاتح محمد التوم في 14th ديسمبر 2011, 11:57

شنو يا سهاد غيبوبه طويلة
انشاء الله الجميع بخير
ايه أخبار الأخ الصديق ماجد ؟؟؟
تحية كبيرةلشخصك.... وســلامة العودة

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف Suhad Abduelgfaar في 14th ديسمبر 2011, 12:44

انها غيبوبة ما بين( الوعى ولا وعى)
استاذى الفاتح
يسال منك الخير والعافيه
ماجد بخير وبوعد
كل مره وبقول
ارتب امورى وادخل بتقلى
ونحن منتظرين
التقل بتاعه
وينور المنتدى
تحياتى لك ولبنت عمى والعيال

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف محمد قادم نوية في 15th أبريل 2012, 13:48

سلامات يا أختنا سهاد قلنا الليلة ننبش أسألتك المحيرة التي رفعتي عنها يراعك لمدة من الزمن
نترقب السؤال رقم(13)رغم المشغولية وجري الدنيا
والتحية للأخ الفاتح الذي أتي بالتصاميم الجميلة للتوب السوداني بتاعت ناس شيماء وخلود ولينا
تحياتي ؛؛؛؛؛؛؛؛؛؛؛؛؛؛؛

محمد قادم نوية
مشرف منتدى الصوتيات
مشرف منتدى الصوتيات


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف Suhad Abduelgfaar في 16th أبريل 2012, 10:56

تسلم اخونا امير المنتدى ود نويه
ربنا يديك العافيه والصحه
انشاءالله نواصل السؤال رقم( 14 ) قريبا
وزى ما قلت الجرى والله مانعنا

تحياتى

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

+++سؤال محير رقم (14)+++

مُساهمة من طرف Suhad Abduelgfaar في 17th أبريل 2012, 11:01

احبابى احباب الحباك
اليوم سؤالى يختلف عن كل اسئلتى
لما يدور بخاطرى ومن خلال ما يدورفى منتدانا الحبيب راودنى الخوف من ان نفقد اشياء كثيره
والان بلدنا محتاجه لنا ان نقف وقفه واحده ..........
وبرضو بعيدا عن السياسه !!!!!!!!!!!

السؤال هو

ماهو الوطن وما هى الوطنيه ؟؟؟؟؟؟؟؟؟؟؟؟

ولا ننسى بان اختلاف الرأى لا يفسد .........................
خالص احترامى لكم

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف فيصل خليل حتيلة في 18th أبريل 2012, 08:48


سهاد سلامات

السؤال كبير و يحتاج الى كثير من مداخلات الاعضاء و لا يجب ان يكون من الاسئلة المحيرة و كذلك لا يختلف الناس

كثيرا فى مفهوم الوطن و الوطنية

أقترح ان تفردى بوستا لنقاش هذا الموضوع مع الشكر

تحايا

فيصل خليل حتيلة
مشرف إجتماعيات أبوجبيهة
مشرف إجتماعيات أبوجبيهة


الرجوع الى أعلى الصفحة اذهب الى الأسفل

رد: ****سؤال محير رقم (12)****

مُساهمة من طرف Suhad Abduelgfaar في 18th أبريل 2012, 10:16

(ابو احمد ) سلامات
كلامك على عينى وراسى
ولكن انا اضفته الى اسئلتى المحيره لانى بالجد محتاره والحيره راودتنى من دخولى المنتدى السياسى ومعرفة بعض الاراء من الاخوان وادهشونى وحيرونى حتى
بدأت ان اشك فى مفهوم الوطنيه الذى ربونا عليه ولذلك اتتنى الفكره بان احل الحيره بالسؤال ونستفيد من اراء بعض لكى تدخل الطمائنينه الى قلبى .
واعتقد ان هناك اختلافات فى مفهوم الوطنيه عند البعض فى هذا(المنتدى) وهو سبب طرح سؤالى المحير جدا . وقلتها بعيدا عن السياسه لذلك لم اطرح سؤالى فى اتجاه سياسى فى المنتدى السياسى لكى يجد الاخوه راحتهم فى الردود
وكلنا نعلم بان الاقلبيه العظمى فى هذا المنتدى لم يشاركو بارائيهم فى المنتدى السياسى وذلك يرجع الى اسباب يعلمو بها .
وحبيت ان نخرج من الحرب والقلق والخوف على وطنى .

اها ما وريتنا يعنى شنو وطن ووطنيه ؟؟؟؟؟؟؟؟؟
خالص احترامى لك


منتظرين
ردودكم

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى