البلد الليلة هلالابى - محمد الحسن حميد

سلام الهلال السوداني
محمد الحسن سالم حميد
------------------------------
الليلة دا يوم السودان
البلد الليلة هلالابى
النيل الأزرق نشوان
والأبيض أبيض ياأحبابى
يامشرّف كل الأتيام
فى يوم السعد الافريقى
يا مفرّح كبد الأيتام
باللعب البعد الموسيقى
يا هلال فى جبيرة سودانك
فى جبين الشعب الحبّوب
أبشر لاباشر وأقوانك
ياعريس السمر المحبوب
تعجبنى الرمية الزنجية
لى رأس الحربة النوبية
بى خفة لمسة بجاوية
تتسامى الهامة العربية
وتتناول نسمة صعيديّة
تسكن بى كلّ أريحيّة
ما بين الخصل البنيّة
وزغريدة تبق سودانية
لى أروع دخلة على النية
لى أروع دخلة هلالية
البحر الليلة هلالابى
المطر..
الحجر..
الترّابى
الشدر الشايل متكابى
الساقى عروقو الحطّابى
الشوقو عنقريب هبّابى
الشاقّى مروقوهلالابى
الوسّار ذوقوهلالابى
القمر البيتو قصاد بابى
حبيتو لانو هلالابى
وين تمشى الراضى على المابى
بالشمش الفوقوهلالابى
يا ليم يا الكورة وكت تبقى
أخلاق موروثة مع الخلقة
الغالب حاضنو المغلوب بمودة
وحنية ورقة
وجمهور بيشجع مصحوب
بالنغم الطيب والصفقة
الله ياشعب ياحبوب
ما أحلى الدخلة على المرقة
يا فريق بيطلع كم فرقة
يامارق بينا من الزنقة
وحدنا شبعنا من الفرقة
جددنا عشان نبقى وتبقى
ياريت الطالقة المنطلقة
وعلى بعض طلقة
ياريت يا أبونا يا ابو الحرقة
لو تقرا بياضك والزرقة

حُمّيد يغني للهلال ؟؟
هذا شرف يحسدكم عليه أخوانا فلان وفلان وفلان ...

دالحبيب اشرف ........ ما فعله الهلال حتى الان مشرف ...... عكس ما اتى به غريمه التقليدى من مفاجأت غير متوقعه حتى لنقاد رياضيين غير محليين ....... ولكن هل توافقنى يا ابو الشوش ان القادم اصعب

شيل كلمة لنقاد الكتوبه قبل كلمة الحبيب وخليها بين كلمتى حتى والرياضيين ....... وناسف يا ابو الشوش

عشت

تحياتي ابوالزهور وعوض السيد وكل عام وانتم بخير ، نعم عزيزي عوض السيد القادم أصعب ولكن في إعتقادي أن مباراة مازمبي القادمة بإستاد الهلال هي الأهم والمنعطف الحقيقي او فلنقل هي مباراة الكأس ..إنتصار الهلال فيها بنتيجة مريحة يعني وصولنا للنهائي ولقائه الحاسم بإستاد الهلال مع أحد الفرق النيجيرية"كانو أو هارتلاند" و التي خبرناها جيداً ، بخصوص ما ذكرته عن المريخ لدي قناعة بأن فريق المريخ الحالي يضم افضل مجموعة من اللاعبين مرت على المريخ في خلال العشر سنوات الأخيرة ولا ادرى اين العلة ؟؟كان بالإمكان ان نكون طرفان في النهائي ولك تحياتي.

نعم عوض السيد على الهلال التعامل بهدوء وحذر وإحترافية عالية ، لأن علتنا تمكن دائما فى النهائيات .. لا نريد هذه المرة أن نقول يكفينا شرفا وصولنا للمربع الذهبي .. البرازيليون - وهم أسياد الكرة والبلد (العالم ) - لا يؤمنون إلا بالمباراة الأخيرة .. الطيش أو المركز الأخير فى البرازيل أفضل من الوصافة .. هؤلاء قوم ديدنهم فى كرة القدم لنا الصدارة دون العالمين أو القبر.

المساله لو حراره قلب ساكت مفروض الهلال يشيل الكاس عشان علي الاقل نسكت الخشامه
والكاس ما حيكون محمول جوا!!!!!!!!!!!!!!!!!!!!!!!!!!!!!!!!

نعم عم ازهري الهلال لابد من اللعب بحزر وهدوء تام والتعامل مع الخصم باحترافية ؛ لكن الشي الذي فهمه جمهور الهلال او اللعيبة نفسهم ان النهائي يقام في ارضهم وهذا مفهوم خاطئي وااكد لو فكر الهلال في النهائي قطع شك سيودع البطولة ؛ وكذلك لا يعتقد الهلال ان الحسم لابد ان يكون في المقبرة نعم الهلال الان في فترة عافية ممتاذة ومكتمل الصفوفمادام وصل هذه المرحلة لايفكر في في حسم المباراة في ارضه مفروض الجهاذ او حتي الجمهور يحفذ اللعيبة ان يقول لهم ممكن نحسم المباراة في خارج ارضنا خلاف السودان حتي يشعر اللعيبة براحة واطمئنان ؛لكن الشي المؤسف الان الكل يعتقد ان الحسم يكون في ام درمان ؛ ولو قدر الله اتت النتيجة دون الفوز وهذا ما لا نتمناه سيشكل ذلك ضغط علي اللعيبة ويذهبو الي زامبيا بضغوطات هائلة تشتت افكارهم وتركيزهم ؛ نعم حافذ الارض والجمهور له دافع قوي لابد من الاستفادة منه لكن بحزرشديد وبعلاقنية لان هذا الفريق شاهدته يلعب علي الثقرات ولديه لعيبة علي مستوي عالي ودائماً ما يسجل اهداف في كل مباراة ودي نقطة مهمة لابد من الحزر منها
ونمني النفس ان يصل الهلال الي النهائي ونيل الكاس الغالية 0

ياريت ادارة الهلال تنصح اللاعبين على التعامل باحترافيه عاليه كما قال عمك ابو الزهور ....... وبعدين الشحن الزايد دا هو البسقط حجركم ....... وكان حجركم سقط نحن ما بنسكت ....... بنشمت عليكم من عبد الرازق الحاج لغاية الفاضل عبد الرازق بس الاش لا لانو ما بتاع كوره بس بعرف يوجع راس النقر

حليل مازمبى فى امدرمان وكيجالى والغريق قدام

المسألة لوحرارة قلب يا دكتورة كان نحنا شلنا الكاس؛انا اطالبك انتي والكل بعدم التفكير في ذلك لانه قد يكلفكم الكتيرويدخلكم في مشاكل في غني عنها تغفلو تلفوناتكم والواحد تاني مانشوفو في المنتدي ونحنا محتاجيين ليكم في المنتدي ,والجماعة بضحكو فيكم الموسم كلو, زي ماقالت لي بت خالتي انا من هسي جهذة الدلوكة بتاعتي وجهزت الاغاني للجماعة وطبعاً لو حصل ذلك بترسل لي الاغاني وبنزلا في المنتدي

هوي يا وصيفاب ..انا من قبيل قاعد اطيب في خاطركم لكن الظاهر إنكم مبيتين نية الشماتة..لكن بقول ليكم الهلال إذا إنتصر على مازمبي الكنغولي 2/صفر في امدرمان ..كاس البطولة إنشاء الله هلالي ..

سلام يا اخي العزيز ود ابراهيم عوض السيد
والله مره المريخ غلب الهلال ايام كنا في المحلج وبعدين ناس عم الطيب الرفاعي واولاده (الله يرحمه) مريخاب .واحد من اولاده جاء بي بره ادق في نقارتو ساي بس عمك قال انا كان مرقته بمرق بي خرطوشي اب 10

مسئول في الكاف

سمعة الهلال "زي الجنيه الدهب"

القاهرة/إتصال هاتفي/"حبيب البلد"

قال مسئول رفيع بالإتحاد الأفريقي لكرة القدم أن أمر إختيار حكام متعددي الجنسيات لمباراة الهلال ومازيمبي الكنغولي في نصف نهائي دوري أبطال أفريقيا بإستاد الهلال الأحد الرابع من إكتوبر القادم أمر عادي، وقال المسئول في حديث عبر الهاتف مع "حبيب البلد": هذا الإختيار لا يقدح في نزاهة وكفاءة الإتحاد السوداني لكرة القدم أو نادي الهلال، وإنما أملته أهمية المباراة التي يتعامل معها الكاف بإعتبارها نهائي مبكر للبطولة، فضلاً عن عدم وجود رجال خطوط من نفس البلد الذي تم إختيار حكم الساحة منه بكفاءة وإقتدار الحكم الذي سيدير اللقاء وهو المالي كولوبالي وهو مصنف ضمن أفضل خمسة حكام أفارقة، ورجال الخطوط المنضوين تحت لواء قائمة الحكام الأفارقة بدولته أقل كفاءة من أن يديروا مباراة مهمة في نصف النهائي كمباراة الهلال ومازيمبي لذلك لجأت لجنة الحكام الأفارقة بالتشاور مع المكتب التنفيذي للكاف ولجنة المسابقات بالإستعانة برجل خط من أنغولا وآخر من المغرب. ونفى المسئول الرفيع بالإتحاد الأفريقي ما تردد وأشيع بأن إختيار حكام متعددي الجنسيات يقدح في الهلال وقال: الهلال سمعته في الكاف "زي الجنيه الدهب". موضحاً أن الهلال في نظر الكاف ونظر كل العالم وكل المراقبين والفنيين مرشح لنيل البطولة بنسبة تفوق الـ"60%".

كل عام وانت بخير ول بشري ح تحدثت عن فرص الهلال في نيل هذه البطولة ح فيااخي ده كلام علي الورق ساكت احسن تكونو واقعين شايفكم الليلة كترتو التصريحات فيكم من قال لو حرات قلب بنجيبة واخرون قالو الكاس ضمناها وبنلعبها في ارضنا ؛ احسن واحد اتحفظ فيكم عمنا ازهري خاف من المفاجاءات التي سوف تحصل وركز علي الهدوء وعدم الغرور والتعامل مع الخصم بحزر وهو الراي الصائب ؛وكلام الصحف ده ما يغريكم وتأملتو الان بالبطولة كانها في خذائن الهلال، فده كلام علي الورق والواقع شي اخر وربنا يكضب الشينة

كامبوس: أنا عند وعدي بإحراز اللقب الأفريقي والجمهور اللاعب الأول لحسم مازيمبي بأمدرمان

قال برازيلي الهلال باولو كامبوس أن الجمهور كان السبب الحقيقي خلف إنتصارات الفريق في عهده، مؤكداً أنه ورغم إحترامه لمازيمبي الكنغولي إلا أنه عازم على تحقيق فوز عريض عليه وحسمه بأمدرمان، ورهن ذلك بتدافع الأهلة اللاعب الأهم نحو القلعة والمقبرة يوم الأحد القادم، وأضاف كامبوس: لا زلت عند وعدي للجمهور الحاشد الذي إستقبلني بمطار الخرطوم لحظة وصولي للسودان بإحراز اللقب لأن ذلك بمثابة تحدٍ وضعه الأهلة أمامي لا أقبل غير كسبه. وعرّج كامبوس بالقول أن كل اللاعبين شركاء فيما تحقق خاصة أن الهلال أصبح لا يتأثر بغياب أي لاعب بجاهزيتهم جميعاً للزود عن الحلم الذي يراود جمهورهم، وعبّر كامبوس عن إعجابه الشديد بثغر السودان بورتسودان ووصفها بأنها أجمل من الخرطوم بهدوءها ونظافتها.

ترانا منتظرين والبادى اظلم
...................................................................... عشت يا ابوالشوش

تحياتي ابو إبراهيم وصبحك الله بالخير، بس إنتو تفائلوا معنا خيراً وإنشاء الله الكأس هلالي

الله لى هلالو ظهر وبان لى الليله
ياخى معقول ........ ما اعتقد ...... دى ما يفهمها الا ول نويه

نعم اخوي ول بشري الجمهور رقم واحد في مثل هذه المباريات الحاسمة واتمني ان يستفيد الهلال من هذه الدفعة المعنوية ولا يخذل جماهيره العريضة التي تحلم باللقب الافريقي العريق الغائب عنها واتمني ان يكون التشجيع من البداية حتي النهاية ؛ لكن الشيئ الملاحظ بالنسبة لنا كسودانيين مجرد ما يلج هدف في شباكنا التشجيع يقل او يكاد معدوم تماماً واتمني من كل السودانيين ان يقيفو وراء الهلال ويكون تشجيعهم مثل المشجعين الانجليز Fans idealists (المثاليين) وليس hooligansشعارهم نشجعك حتي لو كنت خسران ؛ بس المهم تلعب بشعار الوطن

ستوزع أكثرمن 10الف فانلة بشعار الهلال على الجمهور ، المباراة يسبقها زخم إعلامي وشعبي كبير، و الازرق عودنا دائماً ان يكون حاضراً في المناسبات الكبيرة، نفس الاجواء هذه كانت قد سبقت لقاءنا الشهير مع الاهلي القاهرى يوم ان جندلناه بالثلاثة ؟؟اتذكرونها ؟؟ رجعنا تاني لحكاية التلاتات؟؟؟

لكن !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

إنتوا بس ما تلكنوها ... وبعدين مازيمبي دا ما أحسن منكم ..زي ما اخدتو المعلوم بتاعكم بالتلاتة وكنتم السابقون فحتماً هم اللاحقون إنشاء الله ..... وساعدونا بالسكات والفرجة والموية الباردة وتكونوا ما قصرتوا ...

يا ابو إبراهيم أرجو تعديل مساهمتك الاخيرة وامسح بعضاً من علامات التعجب ليستقيم البوست ,,,, مع مودتي

عدنا والعود احمد وكل عام وكلكم بالف خير وربنا يحقق الاماني والاحلام ويارب الكاس هلالية واكيد الهلال قريب جدا بس يا اخوانا محمد وعوض السيد ودكتور مرتضي ساعدونا بالدعاء والخوف تدعو علينا مش لينا

ابو عبد الله اهلا بيك والمنتدي منور بوجودكم,كل عام والجميع بخير,وتقبل الله صيامكم وقيامكم,وماتشيل هم الازرق جاهز (ومحروس).تحياتي

ابو الشوش قال لى مازمبى ما احسن منكم ........ لكن المدعو سيد البلد زاتو ما احسن مننا بس الله غالب وجات كدى ....... والخوف تنشتر ومنو البيقدل ويسكت الخشامه
احلى ما فى مداخلتك انها اتت لنا بالحبيب حيدر ,,,,,,,,
شايف فيصل يا ول نويه حاسبها صاح لغاية هسه ما صرح ........ ربما لانه ما زال يعتصر الما للفقد الكبير الذى هز زلزاله مدينة ابو جبيهه عن بكرة ابيها ....... لكننى انصحك اخى العطوف فيصل بالاستغفار والترحم على روحها ويارب الى جنات النعيم

لكم التحية الخالصة اخوتى الاعزاء.

لكم اخوتى عوض السيد و محمد نوية شكر خاص على السؤال المستمر عنى و كما تعلمون كنت فى ابو جبيهه

و الحمد لله عدت و كما قال عمكم فضل اتمنى ان يكون العود احمد.

يمكن ان تعتبروا غيابى ناتج عن اصابة ملاعب بعد رحلة شاقة جدا ( 20 ساعة ) بعربة لاند كروسزر موديل

حديث جدا و الطريق من العباسية ( حدث و لا حرج ) لا فرق و لا ميزة لاى وسيلة سفر عن الاخرى.

كل الاهل بابوجبيهه بخير و بهم حزن على الفقيده ربنا يرحمها.

لكم حار التحايا و سوف اباشر مداخلاتى من غدا فلكم ان تسرحوا و تمرحوا اليوم ومن بكرة ( كجانتكم بتنجض )

حبى

منتظرينك باكر
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, عشت

عودتك مكسب رغم ظروف سفرك بس انشاء الله تكو صورتة لينا الطريق من ابوجبيهة ام روابة او صورة من ابوجبيهة والله كنت اتمني اركب لي عربية موش( سيارة)بي كلام الجماعة الهنا ديييييييل من نوع ام جليلي وتدقني مطرة عشان الواحد يستمتع بحلاوة الطبيعة ؛ والله الواحد زهج من العربات المكندشة دي وعبور المخارج دي الله يمرقنا ساي منها
انا الليلة ماداير اشاغلك احتراماً لك لان بضيافتنا لكن بكرة شيل سلاحك وتعالنا تلقانا قاعدين راجنك مع اخوي ول ابراهيم