يا حليلهم!.. شايلين هم الضحية.!

في احد الموضوعات في الراكوبة - الصحيفة الالكترونية- كتب معلقاً علي الموضوع احد الاخوة.. وهذا نص التعليق:

انا غايتو اتفقت مع جاري نعمل شيرنغ ونشتري ديك نضحي بيو ...
يوم الوقفة بليل حانشتري الديك ومعاه ربطة برسيم نشتتها برا في خشم الباب لغرض الدفاع بالنظر ..
فطور العيد حلة محترمة وصحن عصيدة بملاح روب والسادة المعلقين معزومين بس اي واحد يجيب رغيفتين معاه يحشرن جوة جيبو ويجي ....

الله يجازي اللي كان السبب!

فيصل خليل حتيلة كتب : ما قالو يا دكتورة الجماعة واقفين فى الجزراة ( ادينا ربع كيلو و ادينا ربع الربع و أخر ادينا نص كيلو و كده ) جا واحد وقف و قال للجزار ادينا خمسة كيلو

الجماعة كلهم اتلفتوا عليه صارين الوجوه

قال ليهم يا جماعة والله عندى سماية

شر البلية ما يضحك
لكم الله يا فقراء بلادي
-------------------------
كيف حالكم اخوي
مشكور علي المرور

والله ايام يا زمان ببكي واتحسر عليك

كنا في ابوجبيهة نذبح 3 خرفان في عيد الاضحى

اليوم الاول واليوم الثاني واليوم الثالث... والخروف كان خروف بحق وحقيقة... واليوم لا نستطيع ذبح خروف واحد.....

نسال الله ان يصلح الحال والاحوال ويعيد علينا تلك الايام الجميلة في الحباك بلد الخير الكثي والعطاء الوفير

تحياتي

محمود منصور محمد علي كتب: والله ايام يا زمان ببكي واتحسر عليك

كنا في ابوجبيهة نذبح 3 خرفان في عيد الاضحى

اليوم الاول واليوم الثاني واليوم الثالث... والخروف كان خروف بحق وحقيقة... واليوم لا نستطيع ذبح خروف واحد.....

نسال الله ان يصلح الحال والاحوال ويعيد علينا تلك الايام الجميلة في الحباك بلد الخير الكثي والعطاء الوفير

تحياتي

يا حليل ابوجبيهه ويا حليل ايام زمان

كتر الف خير عمو محمود

كاريكاتير معبر اخي الفاتح
وركزت مع الطفل الببكي والديك " المخلوع" من محاوله الضغط عليه حتي يصدر صوتاً .. ولو لمرة
احسست بمحاولة الوالد في ارضاء الصغير
وحقاً شر البلية ما يضحك
بارك الله فيك
وتحياتي للجميع الاسرتين

الحاله بقت صعبه للدرجه دى

فى ضحيه بالاقساط

[quote="الفاتح محمد التوم"][justify]
لقينا الإجــابة يا حاج غريق .............
احسان استعجلي ورسلي القسط الثاني ,,,,
انا بصراحة بحرش فيك ناس البيت ,,,
تموتي معانا سوا سوا ,,, برانا بس نرسل ؟؟؟؟

هههههههههههههه
كلام الله ما بنابي الا الفيك اتعرفت
وبعدين فضلوكم علينا درجة بالانفاق ولا شنو؟

غريق كمبال كتب:الحاله بقت صعبه للدرجه دى

فى ضحيه بالاقساط

هههههههههههه
والما عنده حق القسط يا غريق اخوي

الفاتح محمد التوم كتب:

ههههههههههههههههههه
ضحكتيني لكن .....
ما إنتي براكي يا اختي قلتي (( حليلهم ))
يعني خلاص تميها وشيلي الهم معاهم .........

حلوه حكاية " الإنفاق " .....
في دي بس يا احسان انتن يا بنات حوا فالحات
أما في الباقي "شعار المســاواة " بامتياز .....

" طالع واكل ,, نازل واكل "
" أنا محرش يعني محرش ,,,, اتصرفي "
ههههههههههههههههه
مع خالص الود .... تسلمي

ههههههههه

خروف الوزير

الفاتح جبرا
elfatih.gabra@gmail.com

في البلاد (المتقدمة) المسئول بيمسكوهو من لسانو بمعنى أن تصريح المسئول أو وعوده التي يقولها للمواطنين شئ (مقدس) يعني المسئول قال ح يعمل الحاجة الفلانية معناتو ح يعملا .. طيب إذا (ما عملاااا؟؟ (وده بالمناسبة ما بحصل عندهم كتير) .. الإجابة هي إنو إذا ما عملا طبعن ح يتقدم بإستقالتو ..

أما في البلاد (المتعسمة) زى حلاتنا فالمسئول ما عندو حاجة يمسكوهو منها .. فيمكن للمسئول أن يقول الحاجة وما يعملا .. وبرضو ممكن أنو يعمل الحاجة وما يقولا .. وكمان برضو ممكن لا يعمل الحاجة ولا يقولا .. الحاجة الوحيده الما ممكنة هي إنو المسئول عندنا يقول الحاجة ويعملا !!

لو عاوزين أمثلة .. على قفا من يشيل .. هنالك بعض الأمثلة (تودي في داهية) لكني أعطيكم مثالاً (خفيفاً) واحداً لذلك الوزير المبتسم الذي صرح قبل سنين عددا عندما كان والياً بأن الفراخ سوف يصبح في عهد ولايتة وجبة شعبية فإذا بالفول اليوم يخرج من كونه وجبة شعبية ليصبح سعر أقل طلب فول بخمسة ألف !! ويذهب التصريح أدراج الفراخ أقصد الرياح !!

أيه لزوم الرمية الفوق دي كما يقول (أستاذنا البوني) .. لزوم هذه الرمية أعزائي القراء هو التصريح الذي أدلى به السيد وزير التجارة الأستاذ عثمان عمر الشريف والذي يفيد فيه بأن خروف العيد لن يتجاوز سعره الـ 450 جنيه أي والله 450 جنيه بس ! على الرغم من أن الجميع يعلم بأن أسعار (الخرفان) طايرة في السماء وفاقت (المليون) وكل ما العيد يقرب المسألة بتمشي في زيادة .

طيب .. هل الكلام القالو الوزير ده ح يعملو؟ العبدلله يعتقد إعتقاداً جازما بإنو الكلام ده مش ح يحصل إلا في حالة واحدة وهي أن يختف السيد الوزير رجلو للصين ويطلب من الصينيين صنع خراف صينية 110 فولت تنتهي صلاحيتها عند (الباع) العاشرة !!
طيب .. إذا المواطن المسكين (زي حلاتنا) صدق كلام السيد الوزير وضبط ميزانيتو على إنو الخروف بي 450 جنيه .. والعيد جا .. والمواطن ما لقى ليهو خروف بالمبلغ ده وقام جاتو (جلطة) من نقة (المرا) وسؤال (الشفع) ووقع (كاضم) في الحالة دي مش السيد الوزير مسئول من (روح) المواطن دي؟ يعني المسئولين ديل يصرحو سااااي وناسين الأرواح دي؟
المسئولين عندنا للأسف الاسيف ممكن يقولوا أي حاجة وممكن يصرحوا أي تصريح .. يتحقق ما يتحقق مش مهم .. شفتوا ليكم مسئول إستقال عشان تصريح؟ كل يوم طيارة بتقع ومفيش حد بيستقيل تقولوا ليا تصريح .. صرح يا عم ولا يهمك !
من ناحيتي فالعبد لله ح (يحول) للسيد الوزير رصيد بي 450 جنية ومعاهو وصف البيت ومطلوب من السيد الوزير أن يختو في أي بوكس وأنا بحاسب السواق !

كسرة :

السنة الفاتت قالوا الأضحية تجوز بالتقسيط .. أها المرة دي بالتقسيط ذاااتو مافي طريقة .. تطير عيشتنا نحنا .. ندفع أقساط المدارس وللا أقساط العربية وللا ندفع أقساط الخروف ؟

كسرة ثابتة :

أخبار ملف خط هيثرو العند النائب العام شنو(ووو وووو ووو)؟


الراكوبة

[b]تناشد جمعية الرفق بالقورير كل النساء بعدم النقه في موضوع خروف الضحيه دا ويسكتن الشفع ..وتلزم ادم ان يدفع ال450 دي لي حواء حق السكات ..والله لا جاب الجلطه والسكته ..الفتوى قالت المقتدر المستطيع وجبرا القسط ذاتو مافي طريقه ....والله ما امر بالهلاك ...[/b]

الضحيه بقت رخيصه 500 بس تضحى

والتيوس رخيسات 300 بس تجيب التيس

الحمد لله

والله قبل كم سنه اشتريت خروف الضحيه من كمال خليل بى 105 جنيه

الجماعه قالوا على مفترى تضحى بى 105

سمح كده شوفو الضحيه املاين دى

نحيى ونشوف

بنك الخروف

الفاتح جبرا
elfatih.gabra@gmail.com

لأن إقتصاد البلد يسير نحو الخلف بخطى متسارعة (ما عارفين وادانا وين؟) كان لابد أن تصبح مسألة شراء المواطن لخروف الأضحية مشكلة تستفحل عاماً بعد عام حيث أصبح (البيان) الذي تصدره (هيئة علماء السودان) عند إقتراب العيد والذي هو من قبيل رفع الحرج والإحراج عن ما آل إليه حال البلاد والعباد (في ظل المشروع الحضاري) والذي تشرح فيه للمواطنين جواز (الإستدانة) و(الأقساط) والما عارف أيه .. أصبح هذا البيان شيئاً مملاً ومكرراً يحفظه حتى الأطفال .
علماؤنا الأماجد يفتتحون (بيانهم السنوي هذا) بجواز الإستدانة ويختتمونه بأن الأضحية لا تجب على من لا يستطيع شراءها وكان الأجدر ان تكون الآية معكوسة بحيث يستفتحون البيان بعدم الوجوب ويختتمونه بجواز الإستدانة علماً بان من يستدين هو الفقير الذي لا يستطيع شراءها ولكن يبدو أنه فقه (المخارجة) و (المداهنة) !
طالما إنو مسألة عدم المقدرة على شراء الخروف دي بتتكرر كل عام بالنسبة لكل (أهلنا الغبش) فالعبدلله عندو فكرة جهنمية تريح العلماء من (الفتاوى) السنوية (المدغمسة) كما تريح المواطنين كم هذا العبء الثقيل والفكرة نهديها إلى (حكومتنا الرشيدة) وهي إنشاء (بنك الخروف) .. حيث يقوم المواطن بالتسجيل والإشتراك في هذا البنك مع إعطاء رقم موبايله الذي سوف يحول منه الرصيد (واحد جنيه يومياً) لأرقام البنك التى يعلن عنها ، يقوم البنك بتشغيل ما يتلقاه من أموال المشتركين خلال العام ثم عندما تقترب (الأضحية) يتم توزيع الأرباح إضافة إلى مبلغ الـ 360 جنيه (تقريباً) الذي قام المواطن بدفعه وبذلك يستطيع المواطن أن (يضحي) !! وأن ترتاح هيئة علماء السودان من إصدار تلك الفتوى السنوية (البائسة) .
من مميزات هذه الفكرة إنو مبلغ جنيه يومياً ممكن (مجازفتو) بسهولة وممكن كمان لو وقعت في أيدك عشرة عشرين جنيه ما محتاج ليهم ترسلهم (للبنك) وترتاح ليك كم يوم كده .. وكمان ميزة تانية هي إنو القائمين على أمر (بنك الخروف) سوف يقومون بالشراء بالجملة وأكيد الأسعار ح تكون أقل ، وميزة تالتة هي إنو ممكن الأرباح (لو القروش إشتغلت كويس) تكون أكبر من تمن الخروف وعلى كده تضمن تطلع حق الزيت والفحم والبهارات والرغيف والضباح ذاااتو.
على ذات نهج (بنك الخروف) يمكن إنشاء (بنك التعليم) للإيفاء بأقساط المدارس والجامعات وبنك (إيجار البيت) عشان ما يجدعوا ليك عفشك في الشارع وبنك (الدواء) عشان تشتري كوتة الأدوية المزمنة سنويا خاصة والأدوية بقت كل يوم أسعارا بتزيد وبنك (الخريف) لعمل الترميمات قبل الخريف وبرضو ممكن (بنك الزواج) على الأقل تقدر تطلع حق (تصوير الفيديو) وبنك (النفاس) عشان تقدر تدفع (حق الدايات) وكده وبنك (الطهور) عشان تقدر تطهر الأولاد .. بس المشكلة إنو لو المواطن إشترك في البنوك الفوق دي كوووولها عاوز ليهو يومياً خمسين جنيه تحويل رصيد !! عشان كده خلونا هسه في (بنك الخروف) ده !
ولو الفكرة عجبت (أمنا الحكومة) حقو تبدأ في تنفيذها بعد العيد طوالي وتقوم بتسجيل البنك وتعيين أعضاء مجلس الإدارة والمدير العام ونواب المدير العام ومدراء الأقسام ثم تبدأ في تأجير الموقع وشراء العربات والمكاتب والستائر والموكيت والأثاثات والكوندشنات... وكان السنة الجاية (ضحيتو) دي دقني .. !!

كسرة :
نحنا عاوزين لينا بنك (للصبر) !!

كسرة ثابتة :
أخبار ملف خط هيثرو العند النائب العام شنو(ووو وووو ووو)؟


الراكوبة

عمو فيصل خليل - الاخت إقبال - الاخت سهاد - الاخ غريق - عمو الفاتح - الاخت صباح
كل عام وانتم بالف خير
وشاكرة مروركم وتعليقاتكم
وربنا يسهل علي كل الناس كل الناس يا رب ...آآآآمييييييييييييين
يا رب يفرح كل اطفال السودان

والله ده نظام جديد بتاع الكيلو ده يا الفاتح اخوي هههههههههههههههه
وبطلع الخروف الصغير بي كم؟ موبالغه ههههههههههههههههه

يا فيصل ما تكون لقيت ليك ختيليه هههههههههههههه
تنتظر واحد يضبح وتشتري الجلد والراس هههههههههههههه
اديكم العافية

مشكور عم فيصل علي القصيدة

لص يسرق لحم الأضحية من الثلاجة..!

شندي - منى ميرغني

أقدم لص على سرقة (باقي خروف) كان موضوعاً داخل ثلاجة أحد المواطنين بشندي.
وأبلغ مصدر موثوق (المجهر) أن اللص الذي تسلق حائط المنزل أخذ بقية اللحم الموجود داخل الثلاجة وقام بشرب (الشربوت) وترك التلفاز والديجتال، وبعد ذلك ترك باب الثلاجة مفتوحاً ثم غادر المكان.

المجهر
+
الراكوبة