سرقوا النفط من أجل المريريخ والآن قبلوا على البنوك والاستثمار

طيب وين الدقير أخوان
منقووووول
انتوا عاوزين تلعبوا كورة وإلا عاوزين تبـنّوا ليكم (طابق ثالث)؟
الثلاثاء 23 أبريل 2013 الساعة 3:40
· في موقع الزاوية امس خبر او توقعات عن لجنة تسيير المريخ التى قيل ان الوزير سوف يعلنها اليوم او في الغد ..حسب ما جاء في موقع الزميل سامر العمرابي.

· لاحظ نحن في الهلال ..مجلس الهلال يتسقيل الف مرة ..(من زمن الطاهر يونس)...زول يشتغل بالهلال مافي.

· لو مجلس الهلال فضل على (هاشم ملاح) الذي لا يستطيع ادارة (بقالة) - الوزير ما بدخل ويدعم مجلس الهلال بشخصيات قوية ومؤثرة.

· في المريخ ممكن كل 6 شهور ..يدعموهم بـ (حكومة جديدة).

· حكومة بس ناقصة (السلام الوطني).

· جمال الوالي الوزير يمشي ليه في (البيت) ويخلي وزارته ويقعد يحنس فيه عشان يرجع.

· يخلي 4 شهور ..ويقول ليه جيب لجنة تسييرك وتعال.

· الوالي شغال تحت سلطة الوزير ؟..وإلا الوزير تحت سلطة الوالى؟.

· الوزير يكون فاكرو (والي) بالجد.

· الاسماء التى اعلن عنها في لجنة تسيير المريخ ..من ناحية المبدأ كدا (بتخلع).

· تقول دي شنو (الامم المتحدة) الجايبنها لينا دي.

· دي حقيقة بنعترف بيها..ولا بنقدر نغالط في الحتة دي.

· لكن عندما تبحث عن خبرة هذه الاسماء المرشحة للجنة التسيير في كرة القدم سوف تجد ان خبرتها (صفر على الشمال).

· ديل علاقتهم بالكورة زي علاقة (جون سينا) بالحزن القديم ..(اغنية وردي العتيقة)..التى كتبها الدوش في احدي حالاته الاندهاشية الساحرة.

· هسع بامانة كدا ..يا السيد الوزير ..ديل علاقتهم شنو بالكورة؟...والله الاسماء دي ..الواحد فيهم ما يكون دخل استاد الخرطوم إلا في (عرس جماعي).

· الديل النوع البقعدوا في الصف الاول ..وما بقوموا..الاغنية وقت تعجبهم ببشروا من حتتهم.

· نظام (تُقال) وكدا.

· احلف عليهم ما يكونوا شافوا استاد الهلال في تخريج دفعة من ضباط قواتنا المسلحة.

· او في مهرجان دفاع شعبي.

· الكورة شافوها وين ديل؟..رصتوهم لينا كدا زي قائمة الشرف.

· هسع لو جبت ليك اي واحد فيهم ..وسألتو من استاد المريخ ..ممكن بكل بساطة يوصف ليك (سينما الحلفاية).

· ولو سألت اي واحد فيهم وقلت ليهم (موسى الزومة) دا شنو؟...ممكن يقول ليك بدون تردد كدا شاعر مصري راحل.

· شاعر وفي الشاعر مصري ..وفي المصري راحل كمان.

· يمين اشطر واحد فيهم ...لو قلتوا ليه بتعرف (حامد بريمة) يقول ليك : دا معتمد ولاية الخرطوم في حكومة مايو.

· اكيد ديل لا بعرفوا ضربة الجزاء ..ولا بعرفوا (الكرت الاحمر)..ولا بعرفوا الزمن البدل الضايع.

· يكونوا فاكرين الزمن البدل الضايع دا (سمك).

· جنهم سمك.

· نحن حافظنهم حفظ.

· اسماء ما عندها اي علاقة بكرة القدم (لا من بعيد لا من قريب)...بس زول كدا بحلم ..شاف ليه ناس عندها قروش ..ورصاها لينا في اللستة دي.

· جابوهم لينا كدا من الصباح.

· اسماء (ملقطة) من مجالس ادارة البنوك.

· ناس ما عندها شغلة.

· عاوزين يخلوا (بنوكهم)..ويتفرغوا لي ناس بلة جابر وموسى الزومة عندو كم كرت؟.

· وضفر بيلبس كم؟.

· ما تشوفوا شغلتكم.

· البعمل فيه عصام الحضري دا بتقدروا عليه.

· الظاهر المريخاب ديل كملوا (النفط)..عاوزين يقبلوا كمان على قروشنا الفي (البنوك).

· الله يستر على قروش البلد الفي البنوك.

· البنوك ...جاءها بلاء.

· سيرة واتفتحت.

· قبل التعليق تفصيلا عن هذه الاسماء ..نورد لكم الاسماء التى رشحت للجنة التسيير حسب موقع الزاوية...عشان تشوفوا (الرصة).

· وتقولوا سلام على البلد.

· سلام يا صاحبي.

· الله اكبر عليكم.

· سيخ البلد كلو كبيتو في استاد المريخ ...كمان عاوزين تكبوا قروش البنوك.

· خلاص – دا الفضل ليكم.

· نرجع ونعرض خبر الزاوية.

· (تحصلت الزاوية على قائمة الأسماء المرشحة للعمل فى لجنة التسيير المريخية والمتوقع إعلانها اليوم الثلاثاء أو صباح غدا الأربعاء عقب مباراة الموردة وستكون اللجنة بحسب إنفرادنا أمس برئاسة جمال الوالى وتضم دكتور مصطفى عثمان إسماعيل رئيس المجلس للأعلى للإستثمار, طارق سر الختم المدير العام لشركة سين للغلال . عبدالرحمن حسن مدير بنك أمدرمان الوطنى . على عمر مدير بنك فيصل الإسلامى , رجل الإعمال عبدالباسط حمزة , رجل الأعمال عبدالله بله رئيس مجلس إدارة شركة ( أين) , رجل الأعمال الشاب هاشم صلاح مطر, الفريق شرطة طارق عثمان الطاهر, مساعد محمد أحمد مدير بنك التنمية الصناعية, المستشار مدحت عبدالقادر ودكتور مدثر خيرى مدير منتدى محبى المريخ . يذكر ان عصام الحاج الأمين العام للمجلس الحالى أطلق على القائمة ( اللوردات) عندما أخبره الوالى بسعيه للحصول على موافقة الأسماء البارزة التى تضمنتها).

· اول احساس ..بجيك وانت بتقرأ هذه الاسماء ..بتشعر ان لجنة التسيير تلك شكلت وكونت عشان منكوبي السيول والفيضانات ..وليس من اجل (انقاذ) المريخ.

· معقولة بس ..البلد كلها كابنها لينا في المريخ.

· ديل جبتوهم من وين؟..الخلوا شغلهم دا ..وحضروا عشان يشتغلوا في لجنة تسيير المريخ.

· ديل مفروض تودوهم دارفور عشان يشوفوا ازمة البلد.

· ودوهم الشرق ..عشان يشوفوا الفقر والمرض على اصوله هناك.

· ودوهم مستشفيات الخرطوم ..عشان يحسوا بالمعاناة ..واوجاع الناس.

· معقولة ديل ح تجيبوهم لي ناس موسى وضفر وبلة.

· هى البلد ناقصة.

· خلاص ...(الاسمنت) شطب.

· الغريب اللجنة دي فيها (هلالاب)...وفيها ناس ما عندهم علاقة بالكورة ..احضرهم جمال الوالي فقط من اجل ان يدفعوا.

· ويدفعوا من وين؟.

· يدفعوا من قروش البلد طبعا.

· هو في حد في الجماعة ديل ح يدفع من جيبو.

· عبدالباسط حمزة هذا ..كان مرشح من قبل لرئاسة نادي الهلال...الان جمال الوالي جابوا في لجنة التسيير معاه ان صح خبر (الزاوية).

· لكن مبروك علينا ..زي هذه الاسماء ...نحن ذاتو ما بتنفع معانا ..وما عندها طريقة تدخل للهلال.

· لو نقطوها نقيط ..الجماعة ديل ما عندهم طريقة في الهلال.

· الهلال هلال الخريجين وهلال الشعب والشرفاء والوطن.

· جمال الوالي لقط ليه جماعة كدا من مؤسسات الدولة الكبرى ومن بنوك السودان عشان يدفعوا مرتبات باسكال ..ومتأخرات الحضري وحوافز موسى الزومة.

· بالله البلد دي ما فوضى.

· ح يعملوا شنو مع ناس امير كمال؟.

· مصطفى عثمان اسماعيل الوزير المسؤول عن (الاستثمار) رئيس المجلس الاعلى للاستثمار في السودان ...ح يحول لينا قروش استثمارات العرب كلها في المريخ.

· تاني يا ناس الاستثمار ...يشمكم في ان تشوفوا (قرش) واحد.

· اقنعوا منو.

· القروش كلها ح تمشي المريخ.

· هو في زول شغال بالبلد.

· قروش الاستثمار تاني منها العوض وعليها العوض ..(ح تلحق قروش النفط).

· اغرب من هذا ان لجنة التسيير تلك فيها مدراء ثلاث بنوك مرة واحدة.

· تاني ما في تمويل اصغر ..او تمويل اكبر ..المريخ دا ح يشطف ليكم قروش (البنوك) دي في موسم واحد.

· في اللجنة عبدالرحمن حسن مدير بنك أمدرمان الوطنى.

· يا سلام.

· قول واحد ..(منو العوض وعليه العوض).

· بنك ام درمان دي مقرون بكلمة (الوطني)...وليس المريخي ...اقنعوا من خير في البنك دا.

· خلاص ..الفيه اتعرفت.

· وفي اللجنة ايضا على عمر مدير بنك فيصل الإسلامى. وايضا هناك مساعد محمد أحمد مدير بنك التنمية الصناعية.

· كمان.

· شفتوا (الرصة) دي كيف؟.

· جلاليب وشالت (منقوشة)..ومراكيب جلد نمر.

· الجماعة ديل ما فاضل ليهم إلا يجيبوا ليهم (عضو) من فرقة عقد الجلاد عشان المريخ يشاركهم في (عداد) الحفلات.

· دا قلع عديل كدا.

· اللجنة فيها المستشار مدحت ...(رقصني يا جدع)..او كما كتب الاستاذ صلاح عووضة في زاويته قبل ايام ..بعيدا عن هذا المستشار ..ولكن نستلف عنوانه.

· اللجنة فيها منو تاني؟.

· جيبوهم لي واحد ..واحد ..وراء كل زول قصة ...وحكاية ..ومليون علامة استفهام.

· غايتو يا ناس المريخ ...الكورة تاني اقنعوا منها ..عشان ناسكم ديل ما عندهم اي علاقة بالكورة.

· ناس اسمنت ..وسيخ سااااكت.

· ممكن يعملوا ليكم (طابق ثالث).

· ممكن يجيبوا ليكم رعاية من بنك ام درمان الوطني او رعاية من بنك فيصل الاسلامي او رعاية من بنك التنمية الصناعية.

· غير كدا ..ما بعملوا ليكم حاجة ...ولا تنتظروا منهم شيء.

· هسع جماعتكم ديل لو عاوزين بي طريقتكم المعروفة يرسلوا ليهم (وفد مقدمة)..البمشي فيهم منو؟.

· الخفيف فيهم مين؟.

· والله ما في غير المستشار مدحت.

· دا اخف واحد في الجماعة ديل.

· اللوردات ديل زي ما قال عصام الحاج ...لو تراوري في اول مباراة قمة لهم جاب ليه (قون) وهزم بيه المريخ.

· لوردات ديل بعملوا شنو؟.

· بقدموا استقالتهم كيف؟.

· بتقبلوا وين؟.

· مدير بنك ام درمان الوطني ..ح يمشي يقول لي جماعتو في البنك شنو؟.

· ح يقول ليهم تاني ما في اي (قروض).

· المريخ لو طار ..شيكات البنوك دي كلها ح تطير.

· ما في زول بقعد.

· الفرق بين الهلال والمريخ دائما يبقى كبيرا.

· كل القروش الدخلت للمريخ من اقطاب المريخ دخلت عن طريق الحكومة.

· من نفطنا ...من دمنا.

· وكان دائما اقطاب المريخ سبب في ادخال قروش البلد في خزينة المريخ..ومحترفيه (المواسير).

· وهذا ما تأكده لجنة التسيير تلك ...اذ نتوقع ان تكون تمارين المريخ تحت شعار ( لن نذل ولن نهان ولن نطيّع الامريكان).

· وتاني المريخ عندما يتهزم بعلموا ليه طوالي (خيمة) ..زي عرس الشهيد.

· وبلة جابر لمن يجيب في المريخ هدفي عكسي ..(بقولوا لا للسلطة ولا للجاه).

· وبدل يجيبوا (ود الجنيد) بي (طلبتو) في مدرجات المريخ عشان يشجع ..الجماعة ديل ح يجيبوا قيقم وشنان.

· الحكاية انكشفت.

· بقت واضحة.

· ناس الدفاع الشعبي كلهم ح يكونوا في مدرجات استاد المريخ ..الدخول بالاوامر.

· ح يشرعوا ليها ..اكيد ..نحن الحاجات دي حفظنها حفظ.

· (بس الكلام دا ما يطلع من العمود دا).

· وإلا اقول ليكم ...خلوها يطلع...ما فارقة بقت.

· اقطاب الهلال دائما كانوا بدفعوا من جيوبهم ..وهم بعيدين كل البعد من خزينة الدولة...عكس اقطاب المريخ البدفعوا من الحكومة.

· بداية من الزعيم عبدالله الطيب الذي كان ينتمى سياسيا وفكريا لحزب امة ..مرورا بالحكيم طه علي البشير وصلاح ادريس (الاتحادي الاصل).

· حتى الامين البرير الان يدفع للهلال من جيبه ..ومن قروش مصانع الاسرة المعروفة.

· لكن الموظفين الجايبنهم لينا ديل ..المستشار ..والمدير البنك ..و الوزير..و...ح يدفعوا من وين؟.

· ما تقولوا لي ح يكون عندهم نسبة في (الدهب) الظهر في السنوات الاخيرة.

· تكون الحكومة طلعت ليهم نسبة من اي (جرام) يطلع في الشمالية او في كردفان.

· او يمكن يكونوا منحوهم نسبة من منحة المانحين لدارفور.

· او ربما مصطفى عثمان اسماعيل في مؤتمره الاخير بالسعودية اقنع ليهم كم امير كدا بالاستثمار في المريخ.

· ما في حاجة بعيدة عليكم انتوا؟.

· بتعملوها.

· انتوا عارفين لجنة تسييركم دي ناقصة منو؟.

· ناقصة عبدالباسط سبدرات ..وتقوم علي كدا.

· هسع عاوز اسألكم سؤال.

· بلة جابر محتاج لي كل هذه اللجنة دي.

· واللجنة دي ذاتها ناس ضفر ح يتعاملوا معها كيف؟.

· غايتو إلا تجيبوا ليهم (مترجم).

· ملحوظة : دا اذا ما قلبتوا لينا المريخ الي مشروع جزيرة اخر.

هوامش

· بشوف محمد نور ..بعد مشاكلو وبعد تقدمه في السن ..وبقول لماذا لا يوقع محمد نور في كشوفات المريخ.

· عشان تاني يضيفوا ليهم (كابتن) للمريخ.

· محمد نور ..اتوقعوا قريبا في المريخ.

· خاصة اذا اللجنة دي جاءت.

· مع ذلك ..لجنة من هذه الاسماء ..لا اتوقع ان تكون في لجنة واحدة.

· ديل ما بتفقوا ..ولا بتلقوا حتى في الشارع الستين.

· مباراة المريخ اليوم مع الموردة يا ربي تعادل ولا خسارة تاني.

· نسينا ..انتصارات المريخ.

· ناس الموردة لو شدوا حيلهم بطلعوا بي حاجة.

· لكن الموردة دائما بتكون ضحية للاربعات والخمسات.

· هى اصبحت سريعة الزوبان امام المريخ.

· عشان كدا ..ما تنتظروا من الموردة حاجة.

· لكن برضو مستوى المريخ ..فريق (الحرية) ممكن يجهجهو.

· خلونا ننتظر ونشوف.

· بكرة مباراة قوية تجمع بين الهلال والامل عطبرة.

· انتصار الهلال ان شاءالله ...يعني ان الهلال حسم الدوري منذ الان.

· رغم من ان الهلال سوف تكون في انتظاره مباراة صعبة في ختام الدورة الاولى في شندي امام الاهلي.

· في الهلال خامة لاعبين في مستوى عالي.

· وغدا سوف يقدم الهلال مباراة كبيرة ان شاءالله وسوف يعود من عطبرة بـ (3) نقاط.

· الهلال قادر على الانتصار غدا.

· نتمنى كروجر في الهلال.

· مجلس الهلال عليه ان يضع كروجر ضمن خياراته الاولى.

· عاجل :
يا ناس المريخ ..اعملوا حسابكم من (ضفر).