زفاف (إسفيري) لبشرى البطانة من (أنجيلينا جولي)

06-18-2014 03:03 AM
تداولت وسائط التواصل الاجتماعي على شبكة الانترنت، قصيدة ساخرة منسوبة للشاعر الشعبي (بشرى البطانة)، عرض فيها الزواج على الممثلة المثيرة للجدل، (انجلينا جولي)، بعد منعها من زيارة الخرطوم وفقاً لبيان صدر الأسبوع الماضي عن السفارة البريطانية في الخرطوم.

ومن أبيات القصيدة المنسوبة لبشرى البطانة:
يوم جاني الخبر قرّب أقعْ من طُولي
قالوا الدولة رفضتْ تحتضن بِتْ جُولي
لو كايسة العريس من غير تردُّد قُولي
ود البشرى جاهز إنتي شِنْ بتقولي
عينيك كالغزالة وماك متختتة فيلة
تضرب بالسهام في فتحتها وتقفيلا
الرفض الدخول ما عندو أي نفيلة
ود البشري جاهز وممكن يبقى كفيلة
ود البشري في أمبدة قاعد وساكن
بالشعر الجميل مليان رويسو الماكن
دا الخلى البنات من غير شعور يتباكن
الخُدرة الدقاق، اللونا غامت وداكن
يا بت جولي ود البشرى ما هو شوية
ريدتو شديدة ليك، نيرانا تلهب حية
شدة ما بريدك وبعشقك يا بنية
أغمى عليهو تَبْ .. لمن سمع بالجيّة.
في السياق، ذاعت قصيدة (مناوئة) لطلب البشرى الزواج من (جولي)، لم يُعرف شاعرها، تقول أبياتها:
وجه السافل الليلة بالترابة مكتّح
فقد شاعراً كبير وللزعامة مرشّح
فارس حوبة بشهامة البطانة مسلّح
كتل قلبو وفوق (انجيلنا) أتفسّخ
حليلو البشرى وحليل الخديدو مشلّخ
حليل الخشمو بي سمح النضم اتجلخ
حليلو الكان فوق عيد الميلاد بتساخر
حليلو الكان فوق أم شوايل اتفخّر
إرتد البشرى وبعشق (جولي) اتفجّر
لازماهو توبة وفي مسيد الطندب اتبخّر.
وكانت السفارة البريطانية بالخرطوم، قد أكدت في بيان لها، ان السلطات السودانية رفضت منح الفنانة العالمية (انجلينا جولي) تأشيرة دخول للأراضي السودانية والمشاركة في احتفالية متعلقة بوقف الاعتداءات بمناطق النزاع.

الخرطوم: حكايات