محمد نوية

الحبيب محمد نوية كيف من الصداع و نحن نضم صوتنا الى صوت الحاجة وحسون قق
اليوم بشوفك بتبورح جاي وجاي ونسيت ام جليلي خالص فق
كانت لنا دوسة مع ابنا عمومتنا سليم في الجاهلية وكانت هناك حكامة سليمية قتل زوجها وقاتل زوجها يعرف ابو عويش وابو عويش قتل ايضا في نفس الدوسة الحكامة بقت تحرض اولادها بتقول ليهم اجيب ليكو عشاكو ولا ابو عويش جاكو قف
المريخاب اجيب ليكو عشاكو ولا الازرق جاكو

ول كمبال ... أحسن تجيب ليهم عشاهم ...لكن باقي ليك بقدروا ياكلو مع (ش) عشاكو الفيها 3 نقط دي ؟؟؟

ههههههههههههههههاي والله انت يا طارق اخوي بتجيب الحاجات دي من وين ماعارف ؛ وابو عويش ده ونسونا بدوستة دي والله هسي اتزكرت الونسة متة ليك من الضحك ؛ طبعاً عارف ونسة أهلنا بتكلمو بدون تحفظ فجاقين الواحد الكلام البجيه في خشمو بقولو يمين الصهيوني لمن عيوني دمعت يوم قصة ابو عويش دي بالله احكي لينا طوالي هذه القصص
دمت.......................

حبيبنا بشرى انا بحييك عشان انت قلت ليهم احسن تبقوا مازمي عديل عشان نرصعكم بتلاتة والحساب ولدقف
حسون اسال الصهيوني ده قول ليه بتعرف الساير عطية والمقيم حيماد والدخان البتلتل داك دا راشد الولاد؟
يمين تاني كان فتح خشم تلاتة عكاز في طوالي
وبعد ده كلو اليوم حنيت عليهم

يا سلام عليكم كم انتم حلويين وعزيزين عليّ يا ول كمبال ؛ العتبة لكم للتاخير عن الرد لمداخلاتكم الجميلة مع حسن اخوي والله منذ الصباح دخلت المنتدي ولقيت قصة ابو عويش صدقني متة عدييل من الضحك كنت عاوز افردت ليها صفحة كاملة لكن ضيق الزمن كان هو السبب في ذلك كنت شغال مع شركة كدة تصميم وكدة ده الشي الحرمني منكم ؛ وعندنا جدنا الله يرحمو بحكي لينا بهذه القصص يمين انا لمن بدمع يالهما من ايام واتنشاء الله في الايام القدمة سوف اسرد ليك هذه القصص عن جدنا ابو عويش وحقت عية وحيماد
الساير عطية والمقيم حيماد تاكل ناقتي انت يا 00000000000

دمتم..........................

سلام عليك اخوي ول كمبال شنو ماتشيت العويش نسيت ولا شنو؟

ول نوية ارسلت لك على الرسائل الخاصة

تعرف يا ازهرى البقارة ( عندهم ميتة دايرين يكفنوها براهم ) كفنا الميتة بيبى.

معقولة يا عمنا سرنا سرك ؛وبكرة بتعرف هذا الشمار وشنو الزراق ده الايام دي مبارييك طوالي كدة اتزكرت توب الزراق الزمان ولا شنو؟ شايف الايام دي النقارة ضربت كتير عن هذا التوبوفيهو جِرْد كمان يمين ساكتين ليه سااااااي لمن نشيف اخرو لو ما ابوهو

اذا كان للشمار علاقة بام جليلى معليش لكن لو حاجة تانية بعدين بمشى للاخ طارق فى جبرة طوالى.

لانو قصت طارق نسى يحرق العويش دى انا ما راكبه لى فى راسى الشين دا.

ههههههههههههههههها بالمصري متفهمووش الشمار دا بمعني تاني اديكم من اخر انا مستهدف بيهو واحد من المجرميين المطلوبيين والمضللين لاهلنا ؛ لكن يا خال فيصل بعد التحية والتقدير جداً انا منتظرك بالكتير وصبرك لي
دمتم؛؛؛؛؛؛؛؛؛؛؛؛؛؛

حبيبنا فيصل انت اصيل والبقارة اليوم اتامروا على تمساح مخزول
اما الحبيب ازهري زي ما قال اخونا شاوش العين ما بتعلى الحاجب
احبكم كلكم

نرجو من الاخ طارق كمبال لصق نص قرارات الولاية التى اصدرها الوالى ( الجديد ) صاحب

خال ول نوية ( بخصوص منع ترخيص سيارات ام جليلى ) ( فى خط ابو جبيهه -- امروابة )

تحياتى

والله يا ول نويه يااخوى الرشاشات ديل قصدوك عديل كدا لكن ما مشكله نكلم ليك أخونا الامير عبد الرحمن كمبال يساعدك فى ترخيصها الثوره الحاره الخامسه ----------------------- العرضه جنوب والكمسارى أجرو 5الف بس فى اليوم.
ما تخاف يا اخوى الجماعه دايرين يخمسوك.

هههههههههههههايي يمين بعدا الا يودوها بلدنا هناك ينقلو بيها العويش والدور بي تلاتة الف

قرار اعدام ام جليلي
نظرا ل سلطات المخولة لي وفق المادة 3 من دستور الولاية
لحماية المواطن من التعب والارهاق ومجابدد السفر

و نظرا الى انعدام الحد الادنى من الانسانية في ركوب العربة ام جليلي والحاقها الازية بشعبنا الابي المناضل الغلبان ومراعاة لضيق مقاعدها الامامية وكثافت الدخان المنبعث من عادمها مما يترتب علية ارتفاع حرارة كوكبنا وتلوث البيئة
وعدم صلا حية هذه العربة او السيارة وعدم مواكبتها وتتطلعات الشعب الذي يتوق الى السفر بالطائرات
ونسبة لتصديقنا لمطار الحباك
اصدر القرار التي نصة
1/ اعفا الحاج ود ام سيالة من منصبة باعتباره كمساري فاشل يتعاون مع اصحاب ام جليلي ويشترك في ازية الناس
2/ تلجين العربة ام جليلي ومنعها لمزاولت اي نشاط
3/ على صاب ام جليلي والذي هو خارج البلاد سحب العربة فورا من الخط وان لم يلتزم الغرامة 3 مليون او 3 سنة سجن او 3 جلدات كل 3 يوم ولمدة 3 شهور
صدر تحت توقيعي وخاتم الولاية في يوم 3 /3 الساعة 3
والي الولاية

تكبير الله اكبر الله اكبر الله اكبر.

تهليل لا اله الا الله لا اله الا الله لا اله الا الله

جزاك الله عنا خيرا يا شيخنا

يمين يا اخوي ول كمبال بعد شهور صبرك زولكم البسن في القوانين ده يمين لو ما صلي دغش في لاهاي قول لي المجرم ؛ هو بتين مسكو كمان بجي بسن قوانين وانا ضهري مليان اهلي الفراس موش قاعدين يمين انوم غفي واتكلم بالدايرو وام جليلي تمشي اي بكان ؛ واتو اسمكم مدون عند ود ام سيالة وكل الجوكيه ههههههههههه يمين ورطتو ورطة
دقيقة شي كي وبتش ليكو العويش لصحبك المجرم ده رهين لاهاي ده

السنة العويش ما بتشو لانوفى جفاف.

الجماعة اشتروا 192 بقرة ( فريزيان ) من الخرطوم عشان يسقوا الجماعة التابعين للفريق ( الحلة ) لبن

فيه فيتامينات و لمن يكون فى صراع تكون عندهم لياقة.

ارقدوا عافية.

يا سلام علي الصراع ؛علي فكرة يوم الجمعة الماضي في قناة النيل الازرق في برنامج كل الالعاب جابو ليك حلقة كاملة عن الصراع والله اتكيفت كيف في واحد اسمو الحماروابوجاقومة وسلوي في الحاج يوسف كانت الصرعة ولو داير تحضر الصراع كل يوم جمعة في الحاج يوسف في سوق ستة
دمت؛؛؛؛؛؛؛؛؛؛؛؛؛؛؛؛؛؛

لك التحية اخي فيصل ومحمد وذكرتونا بالصراع وهو رياضة جميلة وممتعة اتمني ان توضع لها قوانين
ومن القصص الطريفة ذكر لي المرحوم العمدة حسين العمدة عن الصراع ايام زمان كيف ان الناس كانوا مولعون به وكانوا يذهبوا الي الليري ويحضروا فرسان من هناك وقال لي في يوم كان هناك صراع كبير وتقلديا كان الجلابة يقفون مع كنانة ومن ابرز المشجعين المرحوم صالح عبدالماجد وكان مشجع متعصب جدا واثناء الصراع جاءه احد فرسان الفريق الاخر وقال ليهو هوي الجلابي كان انت راجل انزل صارعني وما كان من المرحوم صالح عبدالماجد الا ان يستعد لمصارعة ذلك الفارس بعد ان رفض كل محاولات ثنيه وحلف بالطلاق ان ينازل ذلك الفارس وفعلا صارعه وصرعه وسط دهشة الجميع وتعليقا علي ذلك قال لي العمدة حسين ده صراع الجلابة اسمو ام حربة وهومافيهو حرفنة بس يعتمد علي القوة حيث يدخل المصارع يده بين رجلين خصمه ويحمله الي الاعلي ويرميه

طبعا يا حيدر صراع الجلابة دا ول نوية ما بعرفو.

نحنا طبعا صرعتنا واحدة يا ول نوية ( أم حربة ) لكن صرعة كعبة للصراع الما بعرفها.

كان يوم اتلاقينا فى البلد نسوى صاراع و انا بصارعك انت و عوض السيد ود.مرتضى كمان.

تحياتى

ام حربة دي انا كملن خطير فيها ؛ مرة ايام الجامعة فتنا رحلة كلها حناكيش وكدة وفي واحد من اهلنا مسيرية ابوذبد جننا ليك جن وقال هو فارس الدنيا ويستعرض قدام البنات ويجلب واخينا ماعارفني انا من البلد مفتكرني من الحناكيش وكدا قلت ليهو بي كلام الحناكيش تعال نتصارع وكدا عشان يطمع ويقول الزول ده من حنكوش وصارعته ليك شلته ليك شيلة ريبا ورميته ليك قدام الحنكوشات يمين اليوم داااك تقول ده عقيد المرحوم الحناكيش عملو لي دعاية كدة وتصوير بالكاميرات اليوم داك المشي ذاتو غلبني من البوبار
يالها من ايام واخينا بعد الجلسة عرفته بنفسي قال لي خاي تاريك عطوي وليقته من ابناء عمومتي

حظ الجماعة عندهم 192 بقرة فريزيان وطريقنا كلو 192 كيلوليه الاف السنين يعني في كل كيلو يقّيلو يحلبو ليهم بقرة

دى قوية يا ول نوية.

كنت عايز أشاقلك شوية لانى شايفك تبورح جاى و جاى من ناس طارق كمبال و اشرف و فضل.

لكن لقيتك عمل واحدة من اجمل ما قرأت اليومين دى.

كل كيلومتر يساوى بقرة فريزيان.

سلامااااااااااااااات ول جدي ؛ انت عارف انا شاكي في صحبك طارق ده بكون الجماعة ديل اتو واحدة من الفريزيان ديييلل (د/إحسان بتكون عارفه الكلام ده) لانو شايفو الايام دي ساكت ساااااااااااي الجماعة دييل مامجرمين بعرفو يمسحو الخشم كيف (دي بسموها ام سنونك) لاكين قول ليهو والله بت ابّ عبد الرازق دي مراقت فضائح اي زول بحاول ام سنونك دي يمين تغلب فيهو الدنيا ؛ الليلة ماشفتها طقعتها لي بلد الطليان حتي الخواجات ما سلمو منها لمن التماسيح ديييييييييييل!!

الله يا اخوي نويه كِن لمن حضر الصرعة ما ُزغردت لول عمي واول بربط توبي في نصي وناس فيصل يضربو الروراي

الحرامية ديل يا ول ابوي نوية برقعوا جمب القد

بسألك من الخير اليوم وين صحبي طارق كمبال؛ وشنو الايام دي مافي اي شمار جديدكدة بالله تشونا بالجديد

يا بتاع الشماااااااااااارات يا نوية

الجديد يا ولد ابوي نوية الوالي بقى ما بسافر الا بالطائرات واي رحلة باربع طائرة عمك نجيب سيد نجمو ليك في جريدة المساء قال ليه انت ما من اولاد كردفان بتكون قبل دة سافرت بلولري وبي سفنجة اه هسع خليت العربات الفاره بقيت بتركب الطائرات ونحن دايرين نشرب موية بس

والله عجبني ليه وعم نجيب انا عارفو رجل فارس في الحق لا يخشي احد ؛بالله شوف لي العدد ده ورسلو لي قدر مابحثتو في الصفحة الالكترونية لم اجده
مشكور اخي

هذه الجريدة تصدر للنخبة فقط يا ول نوية ( من حسين خوجلى و فوق ) و طارق لا يستطيع ان

يرسل ليك هذه الصحيفة ( المساء )

نجيب تناول اشياء موضوعية وقضايا حيوية و ملموسة له التحية.

تحياتى.

( الشمار بتاع الدواس لا يزال يكتنفه الغموض ) و نحنا عندنا مندوب متابع التفاصيل و ربما احتجنا

لسياره ( أم جليلى للسفر مع الدوسة من عد الى عد ) بكسر العين.

تحياتى

هو بالله صحبي ده مامن الجماعة الفوق يعني ؛ يمين ناسك ديييل نخلي ليهم بس عم نجيب بجيب لينا خبرهم

يا جماعة ورونا محل الدوسة وتاري ام جليلي بيومها والله يا اخوي فيصل انا قبال بحسبها كانون ساي تاريها بتقضي الغرض

انشاء الله خير ؛ماعارف الليلة في ناس كدة مشهورين زي العجب كدة ونقارتم ضاربة طواااااااااالي كانت في راسنا واليوم كفتو لا جابو حجار ولا جابو لينا شمار
نامل ان يكون المانع خير حتي نري دواسهم كيكيف والفريزيان بتاعهم نوعو شنو؟

يا اخوي خلي الشمار قالو الفريزين الواحة بي ام جليلي ويلا طوالي احسن ليك تشيل ليك واخدة وتخلي الكانون دة لناس ود ام سيالة

لكم التحايا اخوتى طالرق و ول نوية.

الشمار بالكوم يا ول نوية لكين يحتاج الى متابعة و لذلك قررنا ان يترك الاخ طارق العمل بالخرطوم

و الذهاب للعمل بالولاية لمتابعة هذه الشمارات.معروف عن طارق ( اللعب على نار هادئة ) و هو

واحد من احرف من يجيد اللعب الذى يحتاج الى طول النفس.

تقرر هذا بناء على آخر اجتماع مع لجنة متابعة تطورات الشمار بالرابطة.

تحياتى

يا حبيبنا فيصل رابظتكم دي بدل طتلعنا دورات متخصصة في الشمار تقزم تودينا المنفى ؟
يمين كان ده كلامكو باكر الصباح ابقى صهيوني عديل بي سجم المريخ الفوقو دة

سلام اخوي وينك ياخي لينا كم يوم ما اتلاقينا ؛ووين خالنا بتااااااااااااااااع الشمار انشاء الله غيابو عافية والفريزيان اخبارو شنو ؛ انا مجهز ليه شغل كبييييييييييييييير

هاي ول نويه ولد ابو كمبال ده مافاضي ليك اليله مع المطارحه الشعريه وليست (الشعيريه).
وكان لخالك داك اليله لابد لبدة عجيبه.

الله يمرقو من لبدتو دي !! وود المحلج ده مالو سااااااااااااااااااكت سااااااااااااااي كدة لا كفّت لا جاب حجار بباري من بعيد لبعيد! قول ليه إزاي مصرْ

الاحبة حسون وول نوية والله اشتقنا ليكم شوق ان وضع على ظهر بعير لبرك
حسون نحن بنطحن في الشعيرية

شكرا اخي ول ابوي كمبال علي السؤال واخوي ماكلمك ولا شنو؟ انا نازل امتحانا ت ومدعوك شديد لهذا السبب انقطعة من وجوهكم النيرة ؛انشاء الله الاسبوع القادم بخلص وبعدها بفضي ليكم وبكون متواصل معاكم من الحباك انشاءالله بالله لو سحمة حمل لينا صورتك نشوفك بسم الله ماشاء الله شفنا اخونا الوزير غريق كمبال صورة اكتر من رائعة فضلة انت
تحياتي

يا حبيبنا حسون شكرا على مرورك وانشاء الله ح اضع صورتي في المنتدى بس راجي الازن من العمدة ابو الزهور
واخوي البلباصي دة شايفو اليومين ديل ببورح ساي مع عوض السيد صاحبك اظنة ما كان شاف عوض السيد ولمن عوض السيد ظهر لينا بي مزلقان العواي دة
صاحبك البلباصي قال انا ما بعلق في ول مراحي
قلت لية بالله

عليك الله يا طارق نزل صورتك خلينا نشوف فى مزلقانات ولا مهابط.....أنا الفينى اتعرفت

اي ماشفتو لكن هسي خلاص شفتو وصورتو بأسم الله ماشاء الله عليها وطبعاً عارف الجماعة التماسيح بعملو المزلقان شهر اربعة وشهر عشرة تلقي العربات واقفة بتاعت الطرق ده شنو قال والله المزلقان ده اتكسر احسن يا اخوي نشوف مزلقان ثابت وكلو مرة يتوسع وبقي اجمل