الشاب السوداني عثمان ذو النون يهاجم رواد مواقع التواصل بسببصورة

الشاب السوداني عثمان ذو النون يبعث برسالة مؤثرة يوضح فيها الحقائق الكاملة حول صورة أظهرته وهو يصنع (الأبري) ويهاجم رواد مواقع التواصل بسبب تفسيرهم الخاطئ

الشاب السوداني عثمان ذو النون يهاجم رواد مواقع التواصل بسببصورة 10494834_923189101053545_1589350599675821475_n

+ A
- A

شن الشاب السوداني عثمان ذو النون هجوماً لاذعاً علي رواد مواقع التواصل الاجتماعي بعد تبادلهم لصورة أظهرته وهو جالس علي الصاج ويصنع (الأبري) والذي يعتبر من المشروبات المعروفة في السودان ويتم تناوله في رمضان.
وقد وضح ذو النون الحقائق كاملة حول هذه الصورة والتي آثارت ضجة واسعة داخل مواقع التواصل الاجتماعي, وقد ذكر بعض الرواد أن هذا الشاب يعمل في مجال (العواسة) أو صناعة هذا المنتج الرمضاني.
عثمان ذو النون من جانبه أكد أنه يفتخر بكونه يساعد أسرته في أعمال المنزل, وهدد مروجي الأخبار الكاذبة بحذفهم من صفحته التي تحظي بتفاعل كبير, وكتب علي صفحته الرسمية عبر موقع التواصل الاجتماعي فيسبوك ما يلي:
الصورة دي بقت لي فاتحة خير ووقفه مع النفس وكنت حالف ما اكتب عنها الا تلف وتجيني في الواتساب عشان اثبت حاجه لي نفسي قبل ما اثبت اي حاجه لي أي زول والحمد لله ثبتت
قبل ما اتكلم عن الصورة دي بي نهاية الأسبوع ده صفحتي حتتقلص من 5000 صديق لي 1000 صديق قابله للتقليص
وبعلن تماااما اني فشلت في خلق تاثير ايجابي في اقرب الناس لي.. وما ح استسلم وحاواصل محاولات تغيير وتاثير .. بس عبر ومع اصدقاء جدد … نقطه
..
يلا بما انو المفارق عينو قويه فداير اكتب كلام اتمني يوصل لي اكبر قدر من الناس الاتريقو علي الصوره
..
منو القال العواسه شغلة نسوان؟؟؟ العواسه والفرن والطبيخ والابري والرقاق والخبيز والشيه واي حاجه بياكلوها ولا يشربوها … بين قوسين .. صناعة طعام…
..
في تقديري الشخصي فيهو جزء صعب شدييييد وقاسي وكانت الفكره انو الواحد ينبه نفسو بس لي انو يقدر المجهودات الجباره من الامهات والاخوات .. والجاي رمضان .. وكتيييير مننا كرجال بيقضيها نوووم ونقه في الامهات والاخوات واصدار تعليمات …
..
في زول شايف مساعدتي لي امي ربنا يديها العافيه .. خيابه .. انا شايف نومك تحت المكيف وامك في النار .. منتهي الخيابه..
انا شايف لما مرتك تتقطع عشان تلحقك الشاي قبل الشغل وما تكلف نفسك تقول ليها شكرا ولا حتي تسلم يدك .. وتقعد تنقنق .. مسيخ .. بارد.. دي قمة عدم الانسانيه
..
بنعرف نلبس الجينز الامريكي .. وبنعرف نكون مستعجلين .. بس ما عارفين يعني شنو لما تجدع بنطلون جينز لي اختك وتقول ليها انا طالع بعد ساعه
..
يا لطييييييييييف ياخ… انا عثمان ذوالنون ده بتجرس من الجينز في الغسيل فما بالك اختك الضعيفه الرقيقه… ولما تتاخر خمسه دقايق من الساعه تسمع مليون كلمه فارغه.. بدل شكرا بحب
..
بنعرف نقعد في شارع النيل ونسمع البنات كلام سمح… ما كعب ياخ … بس ليه لما ندخل البيت بنركب وش ما سمح
..
من هنا اعلن انا عثمان ذوالنون عيسي .. اني ما راجل وباطل وخايب .. لانو ما حصل شاكلت واحده من اخواتي بي سبب غسيل ولا اكل ولا حيحصل.. ولا حصل نقنقت في شاي ولا فرش وما حصل لقيت قدامي توريق خدره ولا نضافة عيد ولا غسيل فرشات ولا عمل شاق شغاله فيهو امي ولا اختي وقعدت اتفرج.. وما حيحصل
..
ورااااااجل انت البتعامل اخواتك بي منتهي الوحشيه مما يدفع الواحده للبحث عن كلمه طيبه او تعامل معتدل خارج اسوار المنزل .. ما معروف يوصلا وين
..
الليله جاتني الصوره في الواتساب ومكتوب عليها رجال اخر زمن
..
كنت اتمني الناس السربو الصوره ونشروها في الواتساب يعملو برينت سكرين للصوره والكلام المكتوب معاها
..
الحصل الايام الفاتت دي نبهني لي اننا لسسسسه بعيدين واتذكرت الفيديو النزلتو لو متذكرين كنت بتكلم فيهو عن الفضائح وترك الناس لخالقها.. وعرفت قدر شنو نحن بعييييديييين من الوصول لي كلمة رقي وتطور
…
لما تلقي زول عامل فيها ناشط سياسي وبيتكلم عن المرأه ويجي يقول ليكي خيابه وشوف جدعة اليد .. ويحسسوك انك قاعد في حفرة دخان
؟؟
البوست ده مقدمه لي كلام كتييييييير عن الصوره دي وردود افعال خشنه شديييييد حتحصل الايام الجايه دي
..
ومتمسك شدييييد بي حق امي علي في اني اساعدها في اي عمل شاق
..
ومتمسك تماما بي حق اختي علي في كلمة شكرا عقب كل كباية شاي ولا ربنا يخليك عقب كل مكواة قميص..
..
خارج النص
..
انا رجالتي كملتها في الشوارع والسجون والمعتقلات ووصلت لي انو قمممة النضال عواسة طرقة ابري مع امي
..
انت الشايف رجالتك ناقصه دي.. رجااااء ما تكملها علي حساب اختك ولا زوجتك ولا امك..
..
تعال لي انا ده بتمها ليك
..
وشكرا..
..
باقي البوست بعد بكره
..
عثمان ذوالنون
..
عواس الابري

ياسين الشيخ _ الخرطوم

النيلين

محمود منصور محمد علي كتب:
وبعلن تماااما اني فشلت في خلق تاثير ايجابي في اقرب الناس لي.. وما ح استسلم وحاواصل محاولات تغيير وتاثير .. بس عبر ومع اصدقاء جدد … نقطه
..

انت ارجل راجل ياعثمان .............بالعودة 30- سنة الى الوراء كانت هذه الممارسات عادية في البيوت السودانية .....عواسة من أولاد البيت والمكوة من اولاد الحلة لملابس ناس الحلة و التنجيد وقش الحوش بالمقشاشة ورش الحوش بالموية .......لا أعتقد أنّ الذين انتقدوا عثمان سمعوا بأولئك العباد الزهاد الرجال الذين يصوطون المهيوبة في طابت أو قدح الضيفان في طيبة الشيخ عبدالباقي أو في أي مسيد على إمتداد السودان مافعله عثمان هو فعل الابن البار بوالدية الذي يأكل ويؤكل من حلاله ومن عرق جبينه ........... ولأنّ الان لبس الحلق للعيال عااااادي ولبس بنطلون لا يواري السوءآت عاااادي والمنكير للأولاد عااادي واحمر الشفايف و المرطبات عاادي و ليست نشــــــــاذ فهي الصــــــــــــــــــــاح وماعداها غلط ........................ انها هوايل اخر الزمن !!!!! الصاح غلط والغلط صاح

الشاب السوداني عثمان ذو النون يهاجم رواد مواقع التواصل بسببصورة

الشاب السوداني عثمان ذو النون يهاجم رواد مواقع التواصل بسببصورة

ياعثمان المثل بيقول لو ان كل كلب عوى لقنته حجرا لصار سعر الحجر دولار !!!