أبو كويع وأنفلونزا الخنازير

البارحة حملت الأخبار وفاة أربعة أشخاص بأنفلونزا الخنازير في مدينة الرياض .. وأحدث الخبر ربكة في دوائر العامة بالمينة الكبيرة.
أسرة الأخ عبدالرحمن بالكامل ضربتها أنفلونزا حادة وكان أكثر المتوكين سيدأحمد عبدالرحمن .. وإبلغهم أحد الأطباء أن الأعراض مشابهه لأعراض الأنفلونزا إياها ، وطار عقل أخونا عبد الرحمن حتي جاءت النتائج سليمة وهو الآن يستقبل التهاني بمناسبة تعرضهم لأنفلونزا عادية وشوية إلتهابات في الجيوب الأنفيه وغير الأنفيه.

الف سلامة يا بكل.

والله ابوكويع يكون ( وقف الرياض على كراع واحده ) الله يكون فى عون د.حسن و منير و موسى.

تخيلت بكل ينفخ و يشلت فى الهوى و هاهاهاهاهاهاهاه.

الف سلامه

كفارة وسلامات عوافي يا زووووول...
الف حمدلله علي السلامة وربنا يتم العافية

كفاره اخي ابوكويع سلامتكم ونسال الله لكم الشفاء العاجل,زي ماقال فيصل الرياض تكون واقفب بكراع واحده,

الف سلامات للخال عبدالرحمن واولاده ... .

تفاصيل الحدث ما زالت قيد الإخراج .. ستعرض فصول المسرحية كاملة .. شكرالله خلف الله سيصل الرياض اليوم قبيل منتصف النهار.

حنرسل ليكم مع شكر الله مندوب برتبة (شمرتجي) من الداخل, :roll

شكرا سيد حسن سيتم العرض غدا متزامنا مع نجوم الغد..

سلامات ابكويع وما تشوفو شر انشاء الله اجر وعافيه

الأخوان / فيصل وعوض السيد وحسن خليل وأشرف والعروسة إحسان
لكم ودي ومحبتي وشكرا لسؤالكم عن صحتنا وصحة العيال
طبعا يامونج الشغلة كلها جايانا من غنماية السوق صحبك ( أبوالسيد)والموضوع
كتمناه حتي من حسن الحاج طبعا حسب تعليمات السيد/ صلاح خليل وهو الشخص الوحيد
العندو علم وأخوك لانفخ ولاشلت الهواء لكن والله الضغط وصل 178 علي 112 غايتو
أيام غبراء ذي ماقال أخونا نصرالدين محمد مصطفى0 الحمدلله الحكاية طلعت حاجة
خفيفة دعواتكم لنا بالصحة وربنا يرد الغربة0
تحياتي

الف لا باس عليكم والف بعد الشر عليكم نسال الله ان يجعلها كفارة

الله يحفظه يا عمو عبدالرحمن والله والله انا بحبه جدا جدا هذا الابو سيد والولد ده بشبهك انت في حاجات كتيييييرة بس بشبه ابوي في السلام الكتيييروربنا يديهو الصحة والعافية

الوجية خالص والمحنرم جدا .الحبيب الرفيق الفردة والMULTI القاب
ابوكويع وكما يحلو لاستاذنا الجليل والله يطراه بالخير(الطيب المجذوب)
ان يناديه .هييييييييييييع ود اللو.........
اولا الف لا باس عليكم وكفارة وسلامات وبعدين انت ياخى ما يكشكشوكم الا بانفلونزا الخنازير دى ؟ ما تسمع الاوهام دى وود ابو قرن قال ليكم رشو الكوارع بتاعت العجالى دى وما بتجيكم اى عوجة باذن الله (دى وصفة مجربة يا دكتورة احسان ومن زماااااان ومن فضلك بدون تعليق)
واخونا عبد الرحمن كمبال وبعد التحية والشوق وليتك تذكر اخر لقاء جمعنا !!؟ وقلنا وقررنا فيهو شنو وكان فى منزلك العامر دوما باولاد الدفعة وانا كنت متابع معكم بالهاتف ....
بس عاوز ارجع بيك شوية فى مقالتك او مناشدتك لاولاد الدفعة وموضوع المساهمات واثراء المنتدى بروح النقاش وتنوير جيلنا الواعد بماضينا التليد (الجيل اللى ما مشى اتكوكر فى دبيكرولا اتلولو فى خور ملولو ولا مشى بالبريات كدارى وبس شنطتة فى ضهر اللورى .الجيل اللى ما ما بيعرف شرومة-/على الزاكى/الطاهر ابا ويج/الدور الجاى/عثمان الفكى /الجيلى بخيت /عثمان مصطفى الجاك/-ود رباح /رمضان بيش رمضان تكل (بفتح التاء)/ابو سلوك /مكى مهنا /هنجوهنجو/عثمان سر الختم .....و و و )التحية لهولاء وامثالهم كثر .
خلاصة القول ان من واجبنا وكما قلت تبصير وتنوير شبابنا شباب المنتدى بى مجاهداتنا وبالذات فى سفر الخريف للمدارس
وكيف كان يكون التعاون والتكافل والنفير ..زمن علبة المربى الفارغة (البرطمانية) يشربو بيها الشاى ركاب اللورى كلهم .. كمل الباقى عبد الرحمن كمبال
خالص ودى وشوقى

اولا سلامى للمرة الثالثة الأخ عبدالرحمن الحاج البشير..طبعا ساكك فى كم مداخلة مارديت السلام والان عرفت انك كنت فى كمين انفلونزا فعذرتك طلعت انا المقصر..طبعا انفولنزا بتاعت الحج كما تسمى شرسة ..تغوص فى العظام ..وتدمر المفاصل..سلامات والف حمدالله على السلامة وطهور إنشاء الله..وسلام لدكتور حسن ..طبعا انا بالخبر وسالت عنك الاستاذ ازهرى..وكل الاخوان بالرياض ..ابن عمى امين منقة وينك لعلك بخير والاهل كلهم ..ماشاء الله تجربة سفر الخريف لا تتمحى من الذاكر وعبدالرحمن كمبال تنادى للدفعة ماحد ..اجاب..عموما نحن كنا شبهة اولاد دفعة يعنى الدفعة التى تليكم..وانتم اخر دفعة وزعت لطقت واكبر دفعة دخلت طقت على الإطلاق..وكان المدير كردمان..حضرنا اخر السوق المجذوب شهور والشايب غادر بعد سنة..بس استاذ ((الو))كان المخدرم..فدفعتنا كانت الأغلبية من مدرسة ابوجبيهه الإبتدائية38 طالب تقريبا فكان الفصل متروس شغب وايام الناظر السمانى وخلفة الناظر يعقوب لما امتحنا للثانوى كان جل الاساتذه الزينيين غادروا المدرسة زى الطوف لما يشتت..كل فى بلد ..بس الاغلبية بمدرسة ابوجبيهه الثانوية..وكان اغلب الاساتذه الزينيين غادروا المدرسة ..من الطرائف اول من بدا معنا الانجليزى كردمان ..لما يشوف احدى بناته الصغيرات حايمة بالمدرسة ينادى عليها ويضعها على التربيزة ويقول 0?is this agirlوكان الغرض عاوز يدها علقة بالبارد لما تنزل الصغيرة تهرب صوف للبيت.. ولا تعقب ولا تعتب المدرسة..
شذرات اخوتى تغسل بها تراكمات السنيين وتعيد الحنيين..جزا الله القائميين بامر المنتدى ان جمعونا بالاحبة..التحية لكل دفعة امين منقة...فصل نميرى اوفصل ب والفصل ا..وقد رجع بنا اخونا عبدالرحمن كمبال لجرس المدرسة..من الصباح حتى جرس النوم اولاد الداخلية ..قدير وتقلى وكرن..والفراش عمر..عبدالرحمن الشايب المربى..طيب الله ثراه..لكم ودى وتقديرى..طبعا السنيين طالت والذاكرة معذورة اذا نسيتنا عبدالرحمن اسال اخونا ازهرى ماشاء الله وتبارك الله يفيدك..ودى للجميع

اخي محمد الامين تحياتي اكيد انتو جيل نشهد بانكم اتلولوتو واتبهدلتو في سبيل الوصول الي مدارسكم الابيض كاقلي النهود نيالا وقد ابليتوا بلاءا حسنا لكننا نحن جيل الفترة لا اتلولونا زيكم ولا ارتحنا زي الاجيال البعدنا
جيل الفترة علي غرار اصحاب الفترة الذين راحوا في النص لا ادركوا سيدنا المسيح عليه السلام وماتوا قبل ظهور سيدنا محمد صلي الله عليه وسلم
اذكر سفره مع العم شايبو وساني ادريس طلعنا شويه من تاجلبوا وماشفنا اللواري الا في جبل الداير بعد يومين ووقتها حاولت اتحايل علي عمي شايبو اتمرضن يعني اتاخرت ومانزلت بعد ان نزل كل الركاب وطبعا الركاب فيهم جنس حساده قالوا ليهو لسع في واحد فوق طلع عم شايبو وقال لي ياولدي بتجيب لينا مشاكل ساكت انزل وامشي زي اخوانك وفعلا نزلت وكدراويه الي سدره

الاخوة / عثمان وحيدر
شكرا على المرور بس انتم على موعد مع ابوكويع به الكثير والمثير من فتات الذكريات



خالص الحب وفائق الاحترام

ابو كويع سلامتك وسلامة وليداتنا والتحية موصولة لمحمد الأمين عمر منقه ، أنا سافرت الأبيض وجيت بى نزلة لو كنت فى غير السودان لقالو دي البتاعة زاتها .

سلامات أيها الأمير ...

المجد عُوفيّ إذا عُوفيت والكرم * وزال عنك إلي أعدائك الألمُ

أحبابي أبوكويع وجنابو امين وعثمان موسى وحيدر
لكم التحية والشوق

نحن يا حيدر اولاد الفترة (من الفتر يعنى التعب )و لسنا اولاد الفترة الزمنية ، على أيامنا اللوارى بقرشوها يوم 15/6 بقرار من المجلس وما بسمحوا لواحد منها بالسفر الا باذن مكتوب ولأسباب مقنعه ، اذكر مرة طلعوا لينا كومر المحلج ومعاه تركتر (ترتر) ولا تركرك زي ما بقولو عربنا طبعا نفعنا تدخل عمنا تنير اولاده اثنين معانا، كنا 35 طالب وقامت المرحومة عمتنا كلتوم مندري ركبت معانا ماشة تجملا ، في ام قصاصة الكومر دقش بينا عمود تلفون والسلك وقع فينا جرح 17 جروح خفيفة (جروح طلبه) طبعا بي حالتنا دى المجتمع بعتبرنا (سنه ناعمه ) علي قول الأيام دي ، زي ما قال الجعلي أيام الجلد في الحفلات ( الطلبه والمدرسين والبنات يبقوا لينا جاي والرجال يبقوا بي جاي ) واحد فينا لا اذكره الآن المروحة قطعت اصبعه ربطوه بي دلقان بعد ما كبوا فيهو زيت فرملة ونحن نقول ده كله من لفتك والوداك تجغجغ الحديد شنو ، وصلنا تجملا العصر ورفضنا مندري تواصل معانا لقدام .
أذكر مرة قوموا لينا عربية الجيلي بخيت عليه رحمة الله ابو هويدا كان رجل مصادم لايهاب القواسى ، في تلك الرحلة العربية كانت شايلة العفش لكن نحن بدون مبالغه مشينا علي الأقل 90% من المسافه بين ابوجبيهه والرهد كدارى وحل في الأرض ومطر من فوق ، شهر 8 خريف صاح خريف رجال ، كان معانا في الرحلة ديك جوز خواجات ولدين وبتين قالو جايين من كادقلي بالحمير باعوها في ابوجبيهة وركبوا معانا ، من المدهش لنا في ذلك الوقت عندهم خيم صغيرة زي بيت البقارة عندها سسته للقفل وفتح الباب مثل التي تملأ الدنيا اليوم وعندهم حاجه بتمسحوا بيها من الباعوض ، نحن نهابهم أما الجيلي بسألنا عن بعض الكلمات Gone give me ( علي نطق الجيلي ) خواجه جبار مافيهو فايده من زمان هم شغالين فينا ونحن ما جايبين خبر ، ( قبل 34 سنه الناس ديل بعرفوا السوفل والخيمة ام سسته ، قبل أيام وقت قالوا احتفلوا بمروراربعين سنه علي اكتشاف الانترنت ، واحد قال لي الشئ ده داسنو وين الزمن ده كله ) .
بعد سته ايام سفر وصلنلنا التقاطع بتاع سدرة اللوري كسر كرونه (حت اولاد الحرام) رسلوا المساعد يمشى الرهد كداري يجيب اولاد الحرام ويجي ، نحن الماشين كداري كل الوقت ده زوادتنا كملت ،التحيه لأمهاتنا وأخواتنا البسون لينا زوادة الزمن داك كعك يعني كعك (مش كيك ) لا كعك الواحده توزن ربع رطل خشم كباية كامل الا تتنبر حتي تكسرها وأصلك مابتقدر تاكل كعكك بالدس ، واحد منو شكل هلال .
جو رواعية بي جنبنا عملنا شيرنق اشترينا منهم خروف قضينا بيهو اليوم ، تاني يوم المساعد جاب عيال الحرام وسافرنا عند الضهر وصلنا حلة فلاته لقينا ود الحرام الكبير (ابوحبل) يلاقيك من مسافة كيلو شايل الخلا ساكت دي قراية شنو دى ، فينا البكا وفينا الكتم والدبرسة عمت ، جانا شمبلي محبوس معانا عنده ألف راس ضأن قال قطعوهن ليّ وأعزلو عشرة خرفان طردناه مننا ، جونا اولاد الحلة باقتراح قالو انتو قطعوا عفشكم لحدى الكبري و نحن نأجر ليكم حمير توصلكم الرهد (توصل العفش طبعا )
العفش صنف واحد شنطة حديد +مقرون للزواده +لحاف ،،، انتهينا من تقطع العفش قريب المغرب و شديناه علي الحمير وباريناهن بكل فرح وسرور الي الرهد التي وصلناها ليلا ولكن كأننا وصلنا ألأبيض ما خلاس فارقنا الطين والوحل ،،،
شنو ليك ياحيدر مش أولاد ؟؟؟؟؟؟؟؟؟؟؟؟؟

شكرا يا أبو الزهور
تسلم ويسلموا عيالك ويسلم لينا زوقك

الأسبوع الجاى أنا جاي الحج ، سنفقد الدندور هذه المرة لكن البركة في بشير محمد بشير وحيدر

حمدل على السلامة يا أمير

لكن والله زعّلتوني فى العشرة خرفان بتاعت الشنبلي ... يعني صبرتو الأيام دى كلها ما كان تقطّعوا الخرفان وتقيلوا بالعشره ديل والرهد ملحوقة ... لا نبكي على الأسلفت من هيّن .. لقد ضقنا الويل وسهر الليل .. وكيف ذاتها ترتاح النفوس تقبل قرايتن في سفر !!!!!!!!!!!!!!!

الامير لك التحيه...... عملوها فيكم اولاد الحرام لكن برضو انتو عملتوها فى رقبتكم لما فوتو خرفان الشمبلى عاد دا كلام دا لاحقين شنو فى ابدكنه...... أحييك مره أخرى وكترو لينا من نوع القصص دى.
وأسال الله أن يعينكم فى الحج

أبو كويع ......

الأمير عبدالرحمن وود أخوي عمر منقه يشكوان من ضعف مشاركتك ، وكسل أولاد دفعتكم وعدم فعاليتهم في المنتدى.

راوى الدفعة اخونا الامير عبد الرحمن كمبال كفارة ليك قدر شوقنا ليك ونتمنى ليك حجا مبرورا وسعيا مشكورا وذنبا مغفورا وعودا حمدا يارب .
وطبعا يا احباب المنتدى عمكم الامير دا الله حباه فوق لموهبة الذكاء دى انه رجل لماح ولبق وراوى درجة زيرو وفوق لى كدا عنده هواية تقليد الاساتذة لدرجة انه حافظ ملف وتاريخ اى استاذ فى مراحلنا التعليمية المختلفة (جربوهو) اما اخونا ابوكويع ومولانا المؤمن احمد المؤمن وحسن محمد زين اسد . دا كوم براهو .......
ويا الامير كان اتعس مافى رحلة الكومر العجيبة ديك ..المساجين المكلبشين الركبوهم معانا ومرحلنهم سجن رشاد.
شفت المحن دى يا حيدر خليل ؟مساجين وسجانة وكلابيش وبنادق ابو عشرة وطلبة بريئين زى حالتنا ده كلو فى ضهر كومر وبس وكيلنا الوكيل...الحى .. الدائم

والله يا جنابو أمين القلتو عن أخى الامير دا جديد لنج لأنو أنا لو قلوا لى صف الأمير عبد الرحمن كمبال(الصادق كمبال) أقول انو أهدأ زول فى العالم

الأمير عبدالرحمن .. حجا مقبولا إن شاء الله.

لك التحية اخي الامير عبدالرحمن واشهد بانكم رجال ومجاهدين كمان ياخي دي سفر دي ولجهاد؟ وحقيقة رحلة مثيرة ومضحكة في نفس الوقت واكثر شئ ضحكني فيها ود الحرام الاكبر خور ابوحبل وحقيقة ده ما فيش معاه حلول اللهم الا تعضي جلابيتك وتتوكل كدراويه وطبعا المويه مع الاطنين
طبعا شنطة الحديد وما ادراك ما شنطة الحديد ونحن جيل عافانا الله من حمل تلكم الشنطة ذات الوزن الثقيل يعني جيل متحضر شويه يا محمد الامين واذكر شنطة حديد للوالد سوداء لونها تسر الناظرين
بس يالامير انا زعلان منكم في حاجتين اول حاجه لماذا انزلتم الحاجه كلتوم مندري من الكومر في تجملا؟ والموضوع بسيط بس كان تختوا حجر في الكومر والامور حتمشي تمام التمام
ثانيا الخرفان العشرة يعني ما كانت فارقه لو جلستو مع الشنبلي يوم يومين وظفرتم بها ولكن معليش خيرها في غيرها
اتمني عليك اخي الامير مواصلة سرد تلك المغامرات الجميلة واقترح ان تجمع في كتاب
لك مني كل الشكر والود

اخونا عوض السيد /
تحياتى هدوء الطبع دا شئ مؤصل فيهو اما مواهبه دى بقى حاجة تانية خالص
وزيما ذكرت فى البوست السابق (جربوهو)

احتراماتى

تحياتي لكم جميعا

انت يا أبو الزهور قدر شنو خلي كلام العجايز لفضل الحاج وعلي حموده و كمال عبدالكريم

تحياتي

شكرا أيها الأمير .. في الحقيقة أنا ود بتين على قول بخيته شندي فوق؟؟

طبعا ياأبو الزهور وياحيدر وعوض السيد
لو كانت تلك الواقعة اليوم تلقانا لي هسي نقطع في الخرفان ، لكن للأسف جاتنا زمان ونحن بعد رحلة الأسبوع ديك
نحن محتارين كيف تقطع حاجاتك واحده واحده والمويه صدر لمسافه لا تقل عن 300 متر قبل ما تصل الكبري ابوجنازير علي خور ابوحبل ؟؟ أيام