سلام جاكو

الاعزاء الاحباب تحيات من الاعماق لكم جميعا .
اولا. الشكر اجزله للقائمين على امر هذا الصرح العملاق.

ثانيا. ما يبعث السرور ان تكون فى بلاد الواق الواق وتتسامر مع اهلك وعشيرتك بسهولة ويسر.

فالتحايا الخالصة لكل اهلى بابوجبيهة اينما حلوا.

حبابك الف ...الف الاخ العزيز وحقيقة لينا طولة من ايام الرابطة والعمل في المدارس ايام العطلة الاجبارية ولقد كان الفائدة والمحصلة كبيرة

شكرا لوجودكم الذي دفع بهذا العمل للأمام ، مرحب بك وسعيدين كل السعادة بحضوركم الباهي.

الف مرحب بالاخ الهمام ادم عيسى سعدنا كثيرا باطلالتكم هذه الف الف مرحب مع احبابك فى المنتدى

مرحبا بك اخونا آدم عيسى ..اخوتى فقد اقترح ابعض الأخوان اظن المتألق آمين منقة بتعريف كل عضو بنفسة ياحبذا دفعة فلان وفلان وشقيق فلان ****
يعذرونا الابناء بالتحديد بحكم السنيين التى فصلت جيل عن جيل نريد التواصل ..والمنتدى فرصة هيأها الله لنا..اتسأل هل اخى ادم انت شقيق ابراهيم عيسى ابن خالة عادل حسن..نريد ان نضيف الى الباقة وردة والى الكوكبة نجما بتلك الوسيلة صرنا ابناء حي واحد ..هذا اضعف الإيمان نساهم بحق الأخاء..ودى للجميع

نعم أخي عثمان إقترحت ذلك على الأخوان وثنى على الإقتراح الأخ النشط أبوإبراهيم عوض السيد إبراهيم ، وفعلا أحس بحرج كثير نحو جهلي بإخوة وأبناء إعزاء ، حتمت علينا الغربة هذا الظرف المحزن ....... وأرفعوا عنا الحرج يا أحبتي.

هلا بأخى العزيز ادم عيسى مرحب بيك فى دارك ووسط أهلك.
يا جماعه ادم عيسى ابراهيم دا شقيق محمد عيسى الخوف البديوى الوقح بتاع السعوديه.
ادم عيسى الان مقيم فى استراليا..... مرحبا به

الاعزاء.
لعلك الاستاذة العزيزة الجليلة احسانnashi ارجو تصحيحى اذا كنت مخطئ.

الاخ غريق كمبال علك بخير.

العزيز عثمان موسى ادم انت جيت عدل يا هو ذاتو شقيق ابراهيم عيسى (الجريميس) ابن خالة عادل حسن.

والاخ العزيز ازهرى الحاج البشير جهدكم عملاق وعليه تشكرات كثيرات.

ونقطة التعريف مهمة جدا لان هذا المنتدى يضم اجيال متعاقبة انتشروا فى ارض الله الواسعة تجمع بينهم الحباك
ولا باس ان ابدأ بنفسى.
ادم عيسى ابراهيم .اهلى بسمونى ادم بكسر الدال.
مواليد دبيبة جمعة (جبرونا) مقطاع الخور بيتنا بقع 600 متر جنوب ميترة عمى خليل محمد على متعه الله بالصحة والعافية.
درست كل مراحلى الاولية(جنوبية-متوسطة غربية-ثانوية بالحباك) واشهر المعلمين الذين درسونى.
الاستاذ الجليل والممثل البارع الشيخ ابوشلش والاستاذ قادم كان بدينا جمباز والاستاذة بثينة عبدالغفار واستاذ دليل
واستاذة مسكينة شديد اسمها سكينة واستاذ اسمو محمد ابراهيم وايضا حضرت اخر سنة للاستاذ عثمان قادم ابو خرس.دا بالنسبة للجنوبية اكيد خانتى الذاكرة فى بعضهم لهم العتبى اها كان الفانا من حلة الشيخ هاشم اسمو محمد ادم.
اما ابوجبيهة المتوسطة الغربية .كان هناك الاستاذ الناظر حماد على احمد مدير المدرسة والاستاذ عبدالمطلب عباس والاستاذ محمد الغالى والاستاذ عثمان كاذقيل وعبد الحكيم بتاع الكاراتيه والنور محمد يس كان بدرسنا علوم وبدرس الثانوى فيزياء واستاذ على الفوال ومعلمين الغربية كانو كتار ما شاءالله ومن الشباب العاصرتهم فى المتوسطة
-دكتور عيسى حمودة كان فى اخر سنة وبابكر محمد الحسن ومعاذ الزين عبد السلام وتجانى السر والصادق الصديق البشير وبله ادم وعوووووك القائمة طويلة .
اما الثانوى العالى. كان اشهرهم الاستاذ سعيد والاستاذ عمر جيلى واستاذ بشرى بن مدنى وحسن مرسال بن الدلنج
واستاذ الجيلى والاستاذ حسين كليل والاستاذ اسماعيل(بونجو).
اما الجامعة كانت امدرمان الاسلامية كلية العلوم الادارية كان دفعتى فيها سعد يوسف -صادق صديق-بله ادم ومن الجامعات الاخرى عاصرنا حسن السيد- ودكتور عامر - والراحل المقيم هيثم هاشم له الرحمة والمغفرة-جبارة عيسى-والاستاذة القديرة احسان عبدالرازق-(الخرطوم) من الاهلية محمد النو حامد-جابر عبدالساتر-يحى ساتى-الغائب عيسى ناصر-محمد على تجانى - رشا هاشم -ايمان عبدالرازق-الفاتح يوسف قادم واحمد مرحوم ومن القران الكريم الاستاذ العزيز جدا ادريس يوسف واسماعيل بشير ومن جامعة الجزيرة بنت الخالة تقوى ابراهيم خراشى يحى ومن النيلين الزين قادم-محمد صديق ابراهيم-رندة يوسف-بشرى. والقائمة طويلة
يالها من ذكريات جميلة كنا فيها اسرة واحدة مترابطة تحس فيها العزيمة والاصرار وكنا خير سفارة لمدينة ابوجبيهة.

لكم حبى جميعا

كيف الصحة اخ ادم عيسي تخمينك صاح

مرحب بالاخ ادم ومرحب بكل من لبى النداء وانضم تحت اللواء ونعتذر عن رسالة ترحيبنا المتاخرة لجميع منسوبينا وكل ماننشده ونتمناه التفاعل والانصهار والاسهام قولا وفعلا وعملا من اجل الرفعة والازدهار والرفاهية لحباك الخير ...
يلا نكبر كومنا وبالله التوفيق

الاخوة الاعزاء
مرحب بالاخ الشقيق ادم عيسى ابراهيم حسبو فى داره, فهو كالعادة لم يتوانى فى الانضمام للمنتدى ساعة واحدة بمجرد اخطارى له به يوم الجمعة الماضى , و اتمنى ان تنهال علينا مساهماته التى بالتاكيد ستضيف للمنتدى حلية جميلة . مرحبا به فى منتدى حكاوى الغربة ليعكس لنا مآسيها و طرائفها فى استراليا الف مرحبا يا ابا محجوب.
نحن اخوة ترتيبنا العمرى كالاتى:ابراهيم النريميس(السعودية ) ثم زينب ,ثم فاطمة و يليها احمد عيسى (متوفى) ثم شخصى محمد عيسى و يلينى الطيب عيسى (بنك التنمية ابوجبيهه) و يليه جبارة عيسى (وزارة الاستثمار سنار) ثم ادم عيسى (سدنى )و هو اصغر اخوتى الذكور ثم اخر العنقود اختنا عازة وهى مع الوالدة فى جبرونة و مسماه على خالتى عازة هجليج ام عادل حسن الذى ذكره الاخ عثمان فى تعليقه.
والدى هو المرحوم عيسى ود الفقير , ووالدتى بانة بنت هجليج و اظن البقية ستضح للاخوان الحباكيين.

العزيز أدم ؛
انا فرح بوجودك هنا ...



النقر.

ول عيسى قبل..توا .. رجعت ثلاثون عاما..ابراهيم(الجريميس) شقيقك كان اول دفعتنا واساتذتنا فى الإبتدائى حسن السيد رحمه الله وطيفوروالناظر السمانى كان لمدة سنة وجاء بعده الناظر يعقوب وكمال عبدالكريم جاد السيد من الطرائف كمال الفارق لم يكن كبير فى السن نحن فى الفصل السادس جائنا وهو ود حلتنا الحلة البيضاء ولعبنا معه البلى وفجأة صار استاذنا وكان متوصى فينا اول سؤال قوم عثمان يايحى انتم فاضيين من اللعب ومعنا شقيقه يحي عبدالكريم وسمعت انه توفى يرحمه الله حيا اوراحلا صححنى يا عوض السيد انت عمده الحلة البيضاء ابن عمى ابراهيم ..
مازلت مع اخى ابراهيم عيسى وقد تزاملنا معه حتى الثانوية العامة ووزع ابوجبيهه الثانوية وقتها نقل والدى الذى يعمل ممرض بالمستشفى لبابنوسة ودرست بكادقلى الثانوية ومنذ1975م تشعبت بنا الدروب والتقينا مع عادل حسن وعماد عبدالرحمن الترزى واسماعيل النور وشلة الفاضل ابراهيم الفاضل وشهاب شقيقه حتى ابراهيم عيسى كان مرشح لمنحة لمصر فى1978م ايام محمود حسيب طيب الله ثراه..وابراهيم والله كان اكثرنا ذكاءا ودماثة فى الخلق وتواضعا..فى كادقلى كونا جالية وكانت دارنا هى دار للاحبة اهل الحباك بعد ان استقر الوالد فى كادقلى ونزل المعاش بمستشفاها مد الله فى عمره ومن الزملاء بشير محمد ساتى شقيق يحى ساتى دفعتك يا ادم وادريس ود الجبل وحامد على الجاك كان بهيئة توفير معه التجانى منقه وعمل العميد صالح حمزة حسن كنونة وهو دفعة من الإبتائى ولى طرفه معه فى بوست اخر المياه وخاصة ايام حسيب وشلة وبعدهاعملت لظروف زيادة العبأ على الوالد يده العافية بنسيج كادقلى منذ1980م موظفا يادوب الشنب نابت ونقابى معافر وكان معى من ابوجبيهه اخونا آدم كدابة ونشأت طرائف تحتاج لمساحة زمنية وانتم فى زحمة الشغل يعنى لم ننقطع من الحباك ووالدتى حفصة ربنا يطول فى عمرها وازهرى الاكبرقد تربى مع جدته خارج ابوجبيهه ولان بحكم عمله مراجع بالتأمين الصحى مواظب الحضور والحبور بالحباك وشقيقى محمد موسى ملقب بتلاف بمدنى حاليا وهم يصغرنى وبسوق مدنى كان عسكرى محارب بالجنوب ويليه ادريس موسى بابحاث الابيض ثم البنات هن خمس على التوالى عزيزة بجدة مع زوجها ومريم ومريم مسمى على مريم سرين كان الست اللبن وخالتنا قبل ومحاسن وسميت على محاسن عبدالكريم جاد السيد شقيقة كمال عبدالكريم ثم عاءشة وفاطمة اخر الجماعة بجامعة كردفان اخر سنة..
ثم استأنفت الدراسة الجامعية فى مصر ودرست محاسبة1986م.. تم تقييم وضعى ونقلت للغزل الرفيع ببحرى مراجع داخلى منذ1988م..حتى ظهور الفك الفترس الخصصة لفظتنا للمهجر للسعودية ومنذ1999م بالخبر بمؤسسة الراجحى التجارية بمسمى مدير مالى..مجرد تسميه لا تعادلها ثمن الغربة..و فى بحرى عملت بمصنع الغزل الرفيع تابع للمؤسسة العامة للغزل والنسيج اخوكم العجوز ود اقاليم جئت لبحرى اتضاهب والسنارة غمزت هناك وتزوجت زميلتى من الحلفاية ولى الحمد لله 3بنات ومحمد كبرى بناتى بالصف ثانى ثانوى وصغراهن بالروضة..نواصل اذا رزقنا الله مشروع عروسات لاولاد اخوانا ..ومن دفعتنا على سبيل المثال على محمد عثمان/عبدالرحمن حماد البيتى/معتصم مصطفى بابكر/الشفيع مصطفى الشفيع/مبارك ابو كراع/ازهرى دانكول/وسلسلة..ياجماعة ليس هناك حرج ان نتفقد بعض بالتفاصيل حتى ترد قلوبنا..كما يوسف السباعى فى كتابه رد قلبى.زفلكم ودى جميعا فى الشتات والمنافى وفى الداخل اخوه وفى ابوجبيهه احبة..لكم ودى..وسلام لكل مشرفيين المنتدى نحن نعترف باننا جيل عواجيز..فلك التحية فى المهجرادم..معاك واحد من مقطع الخور هاجر لاستراليا اسحاق زميل محمد على يحى هم دفعة ازهرى حاج البشير..ارجو من الإخوه مدى بجوال ابراهيم عيسى ..وزميلنا عبدالرحمن فضل الله تيماء يقال بالرياض..لحديث الذكريات حلاوته وللدوام مرارته ..فتكم بعافية

مرحبتين ادم عيسي,هلا بيك في منتداك العامر,ماشاء الله اليوم معانا استراليا ومنتظرين الامريكان يظهرو,تحياتي

النقر ... يشتكى المنتدى العام من إهمال شديد ... رأيته هذا الصباح متكئا على منتدى مجاور ويبكي هجر محبيه.

السيد الزعيم ؛؛
غدا ان شاء الله سنبدا في العام ويدك معانا

الاستاذ عوض السيد ابراهيم .
علك والاسرة بخير لونق تايم عرفت انك مازلت بعمان
وجميل ان نجد باحة تجمع بيننا .لك ودى وتقديرى اخى العزيز.
---------------------------------------
الاخ العزيز جدا حسن خليل والله انا اكثر شخص سعيد بهذا المنتدى لانى بكون ابعد واحد زمن ومسافة.
---------------------------------------------
ابو النون ابوى انا اخبارك عرفت انك كنت بالقاهرة من البوست العاملنو فى سودانينزاون لاين للبحث عن
الغائب الحاضر عيسى ناصر.ازاى اخبار الاسرة والوالد علهم بخير.
----------------------------------------------
الاخ العزيز عثمان موسى حياك الله وبسم الله ماشاء الله ذاكرتك تحسد عليها .مريم ام سرين هذه هى زوجة جدنا المرحوم الشيخ محمد بريمة الملقب ب(كلبان) وقمنا لقينا ابهاتنا بقولوا ليهو ابا كلبان فنشأنا نحن ايضا نقول له ابا كلبان.وهو والد عمنا جمعة (انقتل)متعه الله بالصحة والعافية وعمتنا مريومة زوجة عمنا المرحوم الشريف يونس.
وعمنا جمعة دا كان اى واحد عامل فيها شنكبة عنكبة بوريك نجوم القايلة وكان اب لكل اطفال الحلة وبخوفنا عديل
ومع الصباح لو طنطنت قت ما ماشى المدرسة طوالى تسمع التهديد وكذلك عمنا حامد حمودة ديل عندهم فيتو فى الاطفال والله كان لهم دور عظيم فى تربيتنا وتعليمنا جزاههم الله احياء و امواتا.
اما الاستاذ محمد اسحاق هو ابن المرحوم اسحق امام مسجد دبيبة جمعة وهو شقيق دفعتى عبدالحليم اسحق وهو الان
بالسعودية. ومحمد اسحق مستقر بمدينة برسبن وهى تبعد 1000 ك من سدنى التى اتواجد بها وهو رجل فنان صاحب
ريشة وماشاءالله رجل ملتزم هو واسرته وفعلا ابن عمنا امام مسجدنا وخير خلف لخير سلف.
__________________---------------------------------

لكم التحية والتقدير جميعا.

ولضمى محمد عيسى.
ايدك ايدك دايما واصلة انا من ما لقيت اسم المنتدى طوالى قل اجرى فرررر اقيد اسمى واجيك مقبل ولقيت الونسة
الحالت لى حار والضرة هنانا دا زكرنى اصحابى ومدرسينى قبل زمان بجرى بالترتارة هنت المحلج القطعت شلوفتى
ديك ماك فاكرها لما الجريميس اخوى شالنى مثل فارس الصراع فى كتفة ودانى اللزبتالية الجم خالتى عازة دول ولما
لقينا عمك عطية خيتة لى داك اها يا ولضمى شفت كيف قل انا بسراع احصل اللنتماع دا قبال ما افر . اها من قولت ترو لقيت واحد بقولو لى عتمان ول موسى زكرنى الجريميس اخوى .كلوه شفت الدنيا دى القاصرت كيف قبال كلنا
نلمو ناكلو صحج واحد وانا بمسكة ليكو والملاح قبال ما اكمل تقولو لى قم جيب الملاح وانا اقوم والغبن ليك الاكل.
اها شفت ام قدود دى تعمل شنو فوقنا بقينا اسع قال نلاقو بالنرترنت والمبايل تلكلم مع اخوك هو فى رجل ام خرس
وات فى الواق الواق والله صحى الدنيا القاصرت دا كله قال عشان نلمو القروش وقبل ما تدوق حلوها الدنيا تاخدك.
وناس الحلة اقول ليك فلان مات وفلان عرس بت فلان اها نسيتك الشر انا اليوم سمع لى خبر شين قالو على ول جدى ياقوب مات واخو فاطنا ياقوب ومتزوج بت ابا سماعين اللعسر الله ارحمه واغفر ليه.
اها ولضمى خبرك السمح سمعته وانا بقعد فى التراب وبضرب ليك ونلكلمو فى السمح.
اها قبال داك الطيب اخوى ومحمد ولد النو مشو فريق جدى حماد ابو الطويرة وقال قاعدين فوق الشدرة هنت الرجال
قالو فى شغل وقع فقام ابا حماد بنادى فلانه فلانه قالت لى ها ابا قال ليها الوقع بب دا بوبا الله وجماعتك عيال المدارس محمد والطيب لليوم ماعارفين المترادفات حقت الوقع بب بضم الباء الاولى .لكين قالو محمد النو معانا فوق
شدرتنا دى خلى اللورينا الحكاية دى.
والله محمد ولضمى كلامك فراقنا لى اهلنا فى شغل بعوضنا ليه.
والله حكايتك سمحة خلاص عجبتنى خلاص. واتا ما تكلم صالح ول جالس اجى هنى انفس شوية من الغربة دى اخوى
تزكر زمان لمن جيت من الجامعة ولقيت مراديعى وكشاكيشى تسوى تل مثل رمية الكمشة هنت المردوع وسليتنى مثل
عرق ام بغلى ووديتنى سنار وقريتنى هناك وانتحنت الجامعة مع قدودو اختى وترا كن ما ات انا وكت دا كلامى خلى ساكت الا الزول ما بشكرو فوق عينة الله احفضك واعينك ولضمى ابو مهند .
قول لى اخوك براهيم خلاص قبل الفريق وابقى لينا امعبلة نطيرو ونهدو فوكه .
اها نلاقو تانى انينا هنى بلدنا فللت دايرين ننومو وناقبلو الترك الصباح دغش.

مع المعزرة للاخوة الاصدقاء والقراء محمد دا باقى انا بالنسبة حاجة تانية خالص.

مع خالص ودى واحترامى
_

يا لهذا الصفاء ... سعيد بجمعتكم.

ابو النون ابوى انا اخبارك عرفت انك كنت بالقاهرة من البوست العاملنو فى سودانينزاون لاين للبحث عن
الغائب الحاضر عيسى ناصر.ازاى اخبار الاسرة والوالد علهم بخير

أدم ( بكسر الدال)
والله يا صديق بقيت جافي خلاص !
ما مشكله بشد ليك سلك او ماسنجر..

موضوع عيسي طبعا معذبني شديد يا ادم ؛ وكلما زرت القاهره ؛ ابحث عن
خيوط جديده ؛ عيسي كان معي قبل السفر الي القاهره بيوم ؛ حكي لي بحرقه وغبن
عما يدور في الوطن وغاب !
وعلمت من الاخ عاصم الحزين انه سافر وهنالك بقايا كتابات وملابس تخصه ؛
اما قاسم المهداوي فهو أخر شخص قابله ؛ لذا بدأت مشواري من قاسم .....
عبداللطيف خليل الدنقلاوي قال له خيوط وانا بدوري ليس لدي تلفونه او ايميله !
احتاجك جدا في هذا الموضوع .

يوم قلت اسم (بضم الالف )مريم ام سرين دى ما امى قبل..ربينا تحتها ..حتى يوم البقر بغرزن ..يوم البار انقطع منهم ..ماانقطعت عشرتنا بخالتنا ام سرين وعندها بت اخوها انطها لها اخوها اسمهه مريم سموها عليه عليها وهى ربنا مارزقها كان حنينة وودودة ..وكلامكو ده كل الناس خابرهو ((ماثقافتنا كنانية بقارية)) حتى الانجليزى كان بلهجه كنانية وحميدية عموم البقارة واحد بقول لاخو اخى برك يعنى فطرت..وزمان يوم خور البطحة وجالى وابو عروق ..دافرات يوم داك زول فى السوق بشوف لبن دوت مافى..إلا كواسيات حلة جبرونا فوق..وام سرين اكان حيه اغريها سلام من ولدها عثمان ول موسى التمرجى..وين ول جالس والله عين وصابتو ول كان شاطر متل ابراهيم اخوى الجنرميس ومن الثانومة العامة ما شفتو..عادل حسن ول خالتكم كنا اخوان قبل وقميصنا واحد وهذا سبب علاقتنا اللصيقة بابراهيم..ده ديدن كل جيلنا..((لا نعرف للوجبة محلا..))وكلبان ذلك الرجل الفارس الشديد الخضار بجلابتو جناح ام جكو لما يجى السوق..الدار دارو بقيل .. عموما سعدنا بتلك الذكريات ..بس اخى محمد ول عيسى وين تلفون اخوى ابراهيم الجرميس..ومين فيكم جاء ليهو فى الحصة نصف الفصل وقال الجرميس هوو..عموما هذا جوالى00966508286701 للتواصل ودمتم ذخرا وفخرا للحباك

ابو النون حقك على يا ابوى وانا والله اتلومت مع ناس كتار بس ربنا يغفر لينا وعليك الله كوس تلفون محمد على تجانى
قرقوش وهو اخى الذى لم تلده امى ومافى قادر يجيب لى تلفونه وانا الزول دا اللوم معا حا خلاص.
عموما عبداللطيف خليل متواجد بكثرة فى المنبر العام لسودانيز اون لاين لكن برضو انا سوف امدك بايميلوا حتى نبحث سويا عنه واذا انتو عارفين اى خيط ادونا ليه لو فى اى دوله الواحد بشوف اقرب تزكرة وبركب امجنحين ولاننا
اصلا ما محتاجين تاشيرة لكثير من الدول. لازم نشوف الزول وايد لايد نكمل كل الخيوط حتى ننجمع.
وشكرا

الاخ العزيز عثمان
دا تلفون الجريميس وامى ابتقول ليا الجرماس الدلو الغماس.
+966569470807

قول ليه قبل الفريق وات زاتك كفاكو خلاص.
مع تقديرى

والله يا جماعة من وجهة نظرى هذا البوست هو اجمل ماحمله هذا المنتدى الرائع.

لم اكتف على الاطلاق من قرأتة عدت له اكثر من عشرة مرات.

ياه يا آدم و محمد عيسى يا جماعة الله يرضى عليكم تعالوا البيت.

تحياتى

نتمني اخ فيصل ان يعودا ومعهم آخرين

مع عميق الود للجميع

ياالله على الروعه ان قلت يا اخى فيصل انك عدت اليه عشرات المرات فقد قراته انا مئات المرات ...فهو بحق اجمل ما قيل ... تحياتى الى ابناء جبرونا ودبيبه جمعه وكل الاهل بمقطاع الخور يا سلام على الحباك وابناء الحباك ... لقد اسعدنى حديثك اخى ادم وكل المتداخلين واسعدنى اكثر بحثكم عن ابن خالى عيسى ناصر الذى افتقدته انا اكثر من اى شخص اخر

اكتفي بالترحيب الحار للاخ أدم عيسي ...ومرحب حبابك ...بالجد هذا البوست يحمل طعم المنقة ...
ولنا زكريات مع ابناء جبرونا ...ودبيبة جمعة ...
مرحب ادم عيسي ...ونتمني عودة الاخ عيسي ناصر
(كرنك) الذي ...افتقده كل من يعرفة