حلمنتيش...حلمنطييييش

اورد السراج هذه الابيات الحلمنتيشية في عموده مناظير فطرأت لي فكرة استخدامها كبداية لهذا البوست علي ان يكتب كل منكم ما تجود به قريحته


خريج جامعةٍ ببابكَ واقفٌ ......... يرجو الوظيفة هل لديك وظائفُ
حـرقَ السنينَ دراسةً وفلافلاً ..........واذا تبرجزَ فالطعامُ نواشفُ
تقديرهُ الممتازُ يشكو للورى ........فقرَ الجيوبِ و من قراركَ خائفُ
فرد عليه المسؤول:
ليسَ المؤهِّلُ يا فتى بشهادةٍ .........غيرُ الوساطةِ كلُ شيءٍ تالفُ
تقديرُكَ الممتازُ لا يكفي هنا ..........ان الحياةَ معارفٌ و مناسفُ
انقعْ شهادتكَ التي احرزْتَها .......... و اشربْ فانَّ العلمَ شيءٌ زائفُ

(بوش السودان الحبيب) .

الاهبي ببوشك شبعينا -------وجودي بالطعام لجائعنا
نريد لدفس البطن بوشا------نكون باكله كالمجاهدينا
ولن نرشي سواه و لو بلحم—فلسنا في اللحوم بطامعينا
اذاما لاح طيف اللحم يوما---نبحلق فوقه لااكلينا
(ننونو)كالكدايس عند لحم-----وننبح كاكلاب مشاكلينا
فيا لحما يقد الجيب قدا------كفاية مغصتك السويتا فينا
فان بطوننا يا لحم ابت------علي الافوال بعدك ان تلينا
تمطقت الخشوم لاكل بوش—تدنكل بالشطوط و الطحينا
وزغردة البطون لاكل فول---تصوت تارة و تحوط حينا
اذا ما البوش جهز فوق صحن—تخر له الاصابع ساجدينا
وتركع في نواحية الايادي -----يصوم عن الكلام (البوز) فينا
سلي عنا المطاعم في البراري ---سلي الفوال يخبرك اليقينا
بانا نورد المعدات جوعي -------و نصدرهن تخما قد كفينا
ونشرب اذا شربنا الشلي طاعما---ويشرب غيرنا كدرا و طينا
وان سوف تذكرنا السفاسف -------مدنكلة لنا و مسفسفينا
وان غدا وان اليوم اكل------------وبعد غدا نكون الاكلينا
فما شر السفاسف ام ليلي ---------اذا كانت مدنكلة تجينا
يزين صحنها بصل و توم -------وماء الجبن لاح لناظرينا
مدنكلة كان الزيت فيها----------اذا ما الماء خالطها سخينا
فاني قد خبرت الاكل دهرا------وخضت غمارة طورا و حينا
بفتيان يرون الاكل مجدا -------و شيب في الطعام مجربينا
نسفسف ما ترضي الناس عنا ---ونهجم كالاسود اذا دعينا
فبوش قد اكلت بسوق بري -----وفول قد اكلت بطور سينا
هبشت الجيب بعدها –بكيت----يرن امام صاحبة رنينا
فما حظ المفلس غير شوم ----يعيش العمر مكتئبا حزينا
اذا ما كان بالامكان يوما-----اعبي الجيب اجعله متينا
لكنت ملات هذا البطن لحما---وهامبيرقر و تفاحا و تينا
لصرت مفتل العضلات ماكن----و منتفخ الجضوم فتي سميتا
و كنت و ليس بالامكان هذا -----وكنت حسبت هذا الفول طينا
اراني قد فطمت بماء فول ----- ولسنا لبيرقر بمناسبينا
فهل عربية الجازولين تمشي ؟ اذا كبولا يوما موية

ابو الزهور يا كارزم تحياتى وبصراحة خرمنا شديد لسماع سوطك
برائعتك دى رجعتنا كتير للمرحلة الثانوية بالابيض الثانوية وكان اخوك وبلا فخر من الضعاف خالص امام صحن البوش وحينها كنت عضو فعال فى رابطة عشقاء البوش والنشطة انذاك وكانت لها طقوس وقوانين تحكمها وكونك تنال شرف العضوية دى كانت اكبر مشكلة.
ويعنى باختصار لازم تصل درجة برمكى بوش (تحترمه وتديهو حقه) فى كل المحافل
اخونا بكرى مضوى الله يطراهو بالخير هو الزعيم الروحى لقروب البوش وكان المسؤول الاول والناطق الرسمى ومندوبنا عند ا لعم عباس صاحب الكنتين
وكان بمجرد ما يدق جرس فسحة الافطار يتجمع الاعضاء فى المكان المحدد وساعتها تبدا الملحمة (او بكرى بذم وبذير شيرنقز بى كويك وذ بوشنا وبالبصل...) باللحن طبعا على وزن يا ربى بهم .ومنها يبدا الهجوم الشنيع واللا محتمل على البوش
والموقف الطريف فى الامر انه اخونا بكرى مرة من المرات وبعدما شال العيش من عمنا صاحب الدكان وفتاهو وكب الدكوة وقال لى عمك يلا كب لينا موية الفول وطبعا هنا تبدا الحجة سقى البوش وغرق المشة يا عمنا والنقاش فى الكورة طبعا وعمنا الله يطراهو بالخير هلالابى متعصب وبكرى اتجرا وقال ليهو كدى ياعمنا الليله دى كب لينا موية جبنة حبة ..وعلى مضض عمنا وافق لكن بسخريته المعهودة قال لى بكرى (يا ولدى ما اكب ليكم فيها موية زيت !!!؟)
وكانت نادرة ومنها عملنا بند جديد لزيت السمسم وطبعا دا كان خصما على بند السجاير الناشونال
ويا لها من ذكريات مع اعتذارى الشديد على الاطالة رغم الاختصار
ودى

ام شداق

ريدي ليكي يا ام شداق
يقلب اللوري في الدقداق
وكت اغلط واقول مشتاق
ولماعيونك تبحلق جووه في عيوني
وتجعوط تاني في مصاريني
اتوكل واقول بريدك يا سجم خشمي
!!!بريدك قايله من قلبي
وحاتك خوف
خايفك يوم تهجميني وترجميني
وبفد ام كف تكتليني
هييييي يا ام ريدن بعج بطني
هي ام حبن شرط عيني
!!!اريدك انا
!!! اريد لي فيل
يحلني الله يالبرميل
شقوق كرعيك تدخل ضب
تدخل فار
تقول سحليه راسا عديل
!!!اريدك انا
وحاتك الا بي الشلوت
هي يا الهارياني يا الكتلاني
يالباقيه لي شوكة حوت
كل ما اجي
تطفشي مني للبنوت
شكيتك علي الله يا ام زعمووط

هههههههههههه والله عجبني الزعموط ده .....

حب اللحوم

ما عشقتك لي غلاتك

انت اغلى من العيون

او هويتك لي حلاتك

انت اجمل شئ يكون

يا المعلق في الشناكل

إنت هيجت البطون

أم العيال كاشفة حالي

عايزة لحمة وانت غالي

انت غالي يا الخيالي

ديمة في السلخانة باين

ملمسك ناعم حريري

وهناك في اطراف بعيدة

ناس كتير باعوك كيري

اصلو ما بقدر عليك

اخير تشوف ليك حد غيري

بياكلو من البقري فخذه

ومن بطون الضأن كبدة

الظروف حنت عليهم

والدنيا صارت ملك ايديهم

ونحن ناكل في التسالي

وانت غالي

نحن جنينا وسعّرنا

عليك ابدا ما قدرنا

كلما الماهية تعلى انت برضو بتغلى

كم موظف بيك هايم

يحلم في يوم يتغدى شية

فوقها دكوه وشطه حاره

على يمينها مرارة نيه

نفسو مجروحة وحزينة

إنهد من أكل السخينة

ومعاها ماجي ...

ما بصح أبقارنا زينة

ونحن ناكل في السخينة

الارض بتنادي لينا

والأمل معقود علينا

لو مرقنا على المزارع

او مشينا على المصانع

بكرة نشبع في الكوارع

والجقاجق والزبادي

نبني مجدك يا بلادي

كفتيرتك

كفتيرتك في السوق مرمية

وكبايتك يابسة ومجدوعة

يا بت الخلطة النوبية

يا حلوة ورائعة ومربوعة

كانونك كان عامر بالناس

صناع عمال ومساعديه

حارسنك طول اليوم

تجار وسماسرة عطلجية

كم استحملتي رزالة الناس

عشان امونة وزكريا

فتشنا عليك في كل السوق

ورتنا صديقتك قمرية

حزنانة بتبكي بدمعا حار

والعدة هناك في البلدية

كشوك يا حواء من الأسواق

وصبحت ايدك ملوية

انتى الجيتي تشدي الشاي

بتفتشي في لقمة هنية

بتخافي كتير من كشف الحال

أبيتي الطرق الملوية

أحلامك على قدر لحافك

ما عائزة عمارة وعربية

عاجبك بيتك في الإنقاذ

أو حاج يوسف ردمية

كشوك يا حواء من الأسواق

والدمعة في خدك متكية

وهسة خلاص خليتي الشاي

بتبيعي مريسة وبقنية

الوالد الله يمد في ايامه يردد...
الحظ بطال يا ساده وانا ماخده علي اللباده
زرعت المنقة جناين قامت بصل مكادة!!!

اظنه حظنا او حظ حواء السودان
اكملها اذا حافظها..اذا سمحت عمي الغالي

طه الضرير والطيب ود ضحوية


كان طه الضرير والطيب ود ضحوية في طريقهما إلى أبو دليق وكان طه يبحث في اللاب توب في الإنترنيت بال Wireless. وكان يبحث عن رد من محبوبته. فوجد رداً قصيراً. فأنشد قائلاً:
شديت ال Pentium واصبح يبرطع جايط
وال Internet دقش قلبتو صايت صايت
على ام شعراً حلال ما طولنو وسائط
وعطشان الغرام ما برونو 2K.Bite

فرد عليه الطيب قائلاً:
الفيك يا طه Virus والله الكريم الشافي
ومفيدك طبيب حتى إنبقيت Mc Kafi
غير لخلوخة الهرفة أم قليباً جافي
وأركز للتجيك يا طه Options مافي

استسلم طه وأنشد:
إيميلك وصل زود علي الهم
والفكر انشغل ال Ram عليك وال ROM
يالصلاح جميع أنا والحبيب نتلم
ويا ساكن الضريح سيدى الحسن Dot Com

الليلة ام شلوخ لاقيتا عند ال Chat
و Virus ضرب قلبي ومحى الفايلات
يوم شافني الفقير البكتب البخرات
قال Defrag ما بفيد أحسن To Reformat


بعد ما كت فقير بخراتي Word و Excel
دقشتني أم رشوم خلت درايفي إختل
Mother Board القلب الكان زمان Intel
بقى Chipset رخيص كل ما ربطو أنحل

الخبر الأكيد الليلة جابو ال Yahoo
وقال ست البنات إيميلنا مي طارياهو
ست القوام Hardware نظامو براهو
غرامك Virus الهجعة البقرض الجاهو

virus ضرب قلبى ومحى الفايلات.
دا زول بكاى يا دكتوره مقسم الحب فى قلبو لفيلات عشان كدا ب Virus واحد كلها بتمشى الرف.
لك التحيه

حظي التعيس الهردبيس
الناس يرك فوقها الحمام
وانا فوقي قد برك الكديس
*******************
يوم انقشرت وقلت اكسح
بيت عرس يوم الخميس
طوالي فو تتفرتق الحفلة
وتموت ام العريس
*******************
حظي التعيس للترزي
امشي عشان اقيس
كل القماشات قاعدةface
الا قماشي يدخل عليهو وياكلو تيس
*******************
حظي الكعب
من زمن شافع صغير بلعب
اشيل النبلة اقلبا لب
وتسمع رب
ومن الجو يقع لي ضب
******************
حظي الدلم ما عندو دم
في الكبدة يطلع لي عضم
********************
حظي الحشر النحس جواي منتشر
في البسكويت القي القشر
كرعي جوه البنطلون ما بتنحشر
سنارتي في البحر الكبير تقبض جقر
********************
حظي الكعب حظي اللعين
سايقني واصل بي وين
الناس نضاف ومروقين
وانا بي هناك مليان سكن وعجاج وطين
*********************
الناس تكيس ماجدة رنده وماجدولين
وانا بي هناك قايدني ناس بت الحسين
*********************
حظي التعيس والدبرسة
اي واحدة اكيسا
يجي ود لزينة يعرسا

يا دكتورة سلام
ما دام حظك كدا تانى يعملوا ليك شنو ؟
وبالمناسبة ترجع بى الذاكرة ورا خالص خالص زمن الكرتلة وكان قريبك عبد العزيز فرعون ما عندو بيها شغلة نهائى ...وقال هو ما بقطع فى الكرتلة خالص لانه حظه كعب ودليله على ذلك انه مرة اشترى كرتلة وملاها كلها ولما فتحتها وجدها فاضية ........!
والدنيا حظوظ والحظ قسم

محاورة طه الضرير وود ضحوية ... قمة في الإبهار..... والشمار

أظنهم ديل ناس الهيلاهوب يا احسان وذكرتينى بيهم الاخ العزيز معتصم حسن محمد حسن(المسم )لأنو كان مولع بيهم جدا..... ومن حلمنتيشيهم:---------
جيت الجامعه والشغل ابتدى
وأول زول لاقيتو ندى
وسدت نفسى من الغدى(الغداء)
لبست لى فنيله كط ولبست لى معاها شبط
وجيت كاسح بعند الزلط
الناس قالو لى صاح لمن غلط
فى واحد قال لى هوى يا طيره يا ضكر البط
فنيلتك دى ما فنيلة سقط
قلت ليهو انتو مالكم ومالى يا الشايلين حالى ويا الخاشين توش طوالى
ما تبقى فنيلة سقط أنا انتظر لامن يجى السقط..... امكن السنه دى ما يجى سقط وفنيلتى تروح ساكت عبط
انشاء الله اكل عشرين كيلو عجالى ...انتو عارفين ليه..... عشان أبقى قدر مرت خالى
وما أبقى قدر مرت خالى ...انتو مالكم ومالى يا الشايلن حالى ويا الخاشين نوش طوالى
انشاء الله اكتب جواب فبهو عنوانى ...أرمى فى البريد يمشى ويجينى تانى وأقول هى دا ما جوابى مشى وجانى تانى...انتو مالكم ومالى يا الشايلين حالى ويا الخاشين توش طوالى
انشاء الله يرك فينى ضبان العالم كلو وأقول اخىىىىى مش اخينى.....انتو مالكم ومالى يا الشايلين حالى ويا الخاشين توش طوالى
انشاء الله البس سلسل عشان تقولو دا هناى
انشاء البس بدله عشان تقولو دا زول هاى
والله انا يوم أجيكم ساى

تسلم ود ابوي ابراهيم,دي انا استمعت ليها من اخونا معتصم حسن وكان (قادينا بيها),معتصم (المسم) زميل دراسه وصديق لكن اخباره مقطوعه اتمني انه يشارك في المنتدي وهو زول رائع جدا.

حسن خليل وينك أخوى.
معتصم المسم هو الان المدير المالى للشركه السودانيه السعوديه للتجهيزات الطبيه بالخرطوم 2 الود متجدع راكب كورولا موديل 2007 طبعا بدر الدين أخوى موظف معهم فى نفس الشركه.
زرتهم فى فبراير الماضى أكثر من مره عندما كنت فى اجازه

ماشاء الله بلغه التحايا,لو عندك رقم تلفونه ارسله لي,تحياتي

تلفون معتصم ما عندى لكن ممكن تتواصل معه عن طريق بدر الدين
09121163812 بدر الدين ابراهيم عوض السيد

شكرا اخي عوض السيد تحياتي