الغربـــــــــــــــــة العجيــــــــــــبة ..........

قصـــــــــة واقعية ميـة بالمية :
إتصل على اخي عوض جاويش ... وقال لي انا مسافر السودان ... وتجي تقعد مع اولادي ....بالعزيزية الرياض ... قلت ليه طيب ... إستلفت لي الف ريال على الراتب كمصاريف وعشان ما احتاج شئ وانا مع اولاده ... المهم سفره إتأخر ... اسبوع .... وانا بصرف من الألف ريال .... وتاني إتأخر ... المهم يوم سفره انا كان معاي 5 ريال فقط ..... وف يوم سفر وكان بالأحد مره على بالمكتب وطلعنا بسيارته الباجيرو المطاااار ولما سفرته رجعت بالسيارة حتي مكتبي بالعليا ... ونهاية الدوام العزيزية على طول .... وقريب البيت ...قلت اشتري لي رغيف بدل امشي يدي فاضية وبالفعل إشتريت خبز بآخر 5 ريال .... ولما جيت اشغل السيارة قالت يمين ماتشتغل ... ولما فتحت الكبوت وجدت سير طلمبة الموية مرخي شديد .... وكان حوالي الساعة 5م ...تركتها وبرجولي حتي المنزل ... وسألوني اولاد عوض الصغار وين السيارة ... قلت ليهم عليها عطل شوية ...قالوا لي خربت سيارة ابونا من ماهو سافر ... سكت ...بعد ما اكلت وصليت المغرب أخبرت زوجة عوض ... قالت لي السير بكم قلت ليها بحوالي 10 أو 15 ريال بس الآن ما معاي فلوس ... المهم عرفت الحصل... واعطتني 30 ريال .... وإتصلت في كهربائي قريب كاموكا ... وقال أعمل ليها إشتراك ووصلها لي ..المهم وصلتها وتركتها بالورشة ورجعت بتاكسي ب10 ريال .... ونمت وفي الصباح ...ذهبت الظلط عشان امشي شغلي ... وعندما وصلت الظلط وجدت ... سوداني واقف وسلمت عليه وصافحته ... قال لي على وين قلت ليه على العليا ...قال لي انا ذاتي ماشي العليا ... قلت ليه انا جوار حراج الكمبيوتر ..وقال لي وانا كمااان ...قلت ليه خلاص ناخد تكسي مع بعض وانا بدفع 10 ريال وإنت 5 ريال قال لي اوكي ... المهم ركبنا مع واحد سعودي سيارة فارهة جدا... جدا ... انا امام والسوداني خلفي مباشرةً وللزحمة اخذنا طريق الملز ...وقد سأل السوداني الذي معي عن محل سندوتشات إسمه :عرفه محل مشهور وبالبحث حصلنا الموقع ...وذهب ليحضر سندوتشات وانا في هذه اللحظة اعطيت السعودي 20 ريال للمشوار وقلت له لا تاخذ من السوداني شئ .. السعودي ظريف قال لي خليه ..قلت ليه لأ ابداً والله...المهم احضر لي السوداني سندوتش وبرتقال فريش وكذك للسعودي ... وفي الطريق كتب السوداني إسمي وتلفوني وعنواني والتلفون الثابت .. وقال لي انا إسمي عمر من العيلفون ... قلت له تشرفنا ... وحينما نزل ودعته ومكتبه قريب مني جداً ممكن 15 متر فقط وبعده ... نزلني السعودي وودعته وإنصرف ... وحينما وصلت المكتب وجدت انني أحمل كيسين سندوتش وقد تركت للسعودي العصير فقط واخذت السندوتش تبعه ... وتألمت الم ما بعده الم ... ووالله لم اكن قاصد ...المهم الساعة 4م إتصل على: عــمــر وقال لي معاك سيارتك قلت له ايوه وأخذته معي وذهبنا مع بعض وفي الطريق قال لي نمر على الخزان لي أغراض وشنطه وفـــرش نأخها معنا بيت اخي والذي عمر يسكن معه ... وبعد وضعنا الاغراض بالسيارة .... قال لي اديني اسوق ليك وسلمته مفتاح سيارتي ... وقلت له نمر على الميكانيكي وقد كان ...وجدناه قد اخرج لنا قاعدة المروحه والسير ...وقال لي لابد من شراء هذه القاعده والسير ..وقلت له إنت إشتريها وانا بعدين احاسبك قال لي والله العظيم انا جيت قريب من السودان وما معاي فلوس ... عمر قال ليه بحوالي كم ؟ ...قال ليه قي حدود 150 ريال او 200 ريال ...عمر قال ليه انا بشتريها ...قلت له لأ ياعمر قال لي والله العظيم .... ودخلنا حراج قاسم ...ولم نجد القاعده ... وقررنا الذهاب العزيزية ثم العوده بعد المغرب ونزل مني عمر عند منزل اخوه ... وذهبت منزل عوض على بعد 150 متر تقريباً .... وبعد المغرب إتصل فيني عمر قال لي وينك ؟ يالله نمشي .... المهم حضرت له ... وقال لي هات السيارة اسوق انا .... المهم وجدته زهجاااان وقالي لي حينما احضرت أغراضي زوجة اخوي ....زعلت جداً جداً كيف احضر هذه الأشياء واسكن معهم ؟؟؟ قال لي والله العظيم الليلة ما انام عندهم لو أنام في الشارع ... ومعنا ولد عوض الصغير بالسيارة وعمره حوالي 5 سنوات ...المهم وصلنا وقطعة الغياروجدناها بمبلغ 1300ريال والسير ب 160 ريال ولم نشتري شئ.... لا حولة ولا قوة إلا بالله ...رجعنا الورشة ...وقريب يونس كاموكا.. قال لي خلاص انا حأتصرف وإنت امشي خلاص ... وفعلاً مشينا وعمر قال لي ياخي بالله سكني معاكم بالعليا ... قلت ليه نحن عذابه وقلت ليه هنالك مسئول عن السكن ...قال لي لازم نمشي ليه ... وبالفعل ذهبنا له بالعليا .... وبحراج الكمبيوتر قلت له إنت ومحمد الصغير إنتظروني هنا .... وذهبت وقلت لمسئول السكن : لقد تعرفت اليوم على واحد إسمه عمر من العيلفون وعاوز يسكن معنا عشان عنده مشكلة سكن ...قال لي من طرفك يا عثمان مرحب به ...قلت له نعم ولكن معرفة اليوم فقط ...ولم أتأكد من شخصه بعد ... ولكن يبدوا لي جيد ...وقال لي شوف انا لو نظرت فيه بعرفه ...لو ما وجدت فيه سمات طيبه سوف اقول ليه انا عندي شورة ....المهم ناديت عليه ومحمد الصغير ... ورحب به على طول وقال له الآن تحضر وتسكن ...وذهبت معه السكن وأحضر أغراضه ...والآن يسكن معنا ...وصديق عزيز وأخ كريم .... والسيارة جلست حوالي 10 أيام ...وبعد ما صرفت رحت وجدتها ميه بالميه ... وكلفت مخرطه فقط ومصنعية ... وكان كل الحساب 400 ريال فقط .... والحمد لله رحت بالسيارة المطار واحضرت عوض وسلمته سيارته ... ورجعت انا العليا وكل شئ على ما يراااام ....ولكن حتي الآن اخي عوض لم يعرف كم دفعت .... محبتي ....

انتى يا زوجة أخو عمر كلامك دا عيب وانت يا أخو عمر مرتك دى أديها راسها أما انت يا أبو عفان ربنا سخرك لهذا الشاب عشان تذلل ليهو مشكلة السكن وانشاء الله ربنا اختارك له لأنك رجل طيب وستنال الثواب باذن الله لأن رسولنا الكريم صلوات الله وسلامه عليه قال فيما معناه(ما خرج ابن ادم فى خدمة أخاه ابن ادم قضاها أو لم يقضها فله أجر ستين عاما أثابك الله يا رجل يا طيب

والله يا عثمان إنته فلته ، الآن هداني تفكيري أن أحيل نفسي للتقاعد قريبا ، وسوف أحضر دفاتري لكتابة نوادرك وبعدين بعد النشر بالنص.
هل بلغت الوقاحة بالبعض أن يطرد أخ الزوج من دار أخيه ... وهل يمكن أن يحصل هذا من سوداني ، ثم أين هذا الأخ ؟؟ أسئلة ليست للإجابة ؟؟؟

الباجيرو أخباره شنو ؟؟

كما اسلفنا سابقا يعتقد الكثير انه بمجرد خروجة من السودان سيجد النقود تغطى الارض بمجرد نزولة من سلم الطائرة , هناك مآسى عجيبة و لاثراء هذا المنتدى ( حكاوى الغربة ) اتمنى من اعضاء المنتدى المغتربين ان يكونوا اكثر صراحة و شفافية و يكشفوا تجاربهم مثل الاخ جاويش و ذلك لفائدة الجميع و اذا كانوا كذلك انا متيقن انه سيبكى كل من فى المنتدى .
اخوتى تصبح الماساة كبيرة اذا كانت العائلة تقيم معك ,ووقعت فى ورطة و انشاء الله حكايتى الثانية التى سارويها لكم هى ماساة صديقى حاتم التى تدمى القلب و الصف طويل و طويل .