حبوباتنا....... بين الحكمــة و الأحاجي

(حبوباتنا ياناس الحباك ....... هدية قصيدة شعر من طابت )
يا حليل زمان .. وكتين كُنا صُغار
حبوبة بترحم ما بِتدُق …
لا معاها سير لا جَرْ شَـدُوقْ
وكتين نَجِر نضحك كتير ننقل حجارْ
حبوبة بترحم ما بتدقْ
لا معاها سيرْ لا جَرْ شَـدوقْ
يا ما حفرنا من الشِقـوقْ
عقرب كبير ما فيهو خير
نفرح نطير نضحك كتير
ولِعِبْ شِليلْ يا حليلو فاتْ
ما كان جرى ما كان نشاطْ
نُوَّار يكورِكْ ويتلَخِمْ ولدَة سَجَمْ … وَلدةْ رَمادْ
سرقوا اللحم خربوا القَصَبْ …
كَتلوا الجِـدادْ
ساحاتْ تعربِد بالعَجاج …
دخان يطوف من تِحتو صاج
نلعبْ نلِف نجرى ونرِفْ
والحلة يا خوى تترجِف
نصطاد شباب .. شايلين حُراب …
حاملينْ تُراب …
ماهدومنا أوسَخ من تُراب
بالفوضى داقين الف باب
وتجى الزلال وكلاما مخلوط بالسعالْ
تجرى وتقول .. تجرى وتجول
يا أولادى جَفلتوا العِجول
ونقومْ نجِر نعبُر حيطْ .. ناكل شيطْ
ندخُل تُكُل .. من السَكَن نعملْ دِقونْ
ما اصلوا لون ولعب جنون
والليل برَدْ دايرين مَسُوح
حبوبة نتعشى ونجيك ؟؟
نسمع حُجاك .. ننقُد فَريكْ
دايرين نشوف ود النِمير …
كيف سَوَّى شقَّـاق الهَجير
يا حليل حُجاك وكتين نقنِب يوت معاكْ
نسرح مع ريش النعام …
نقدِل مع قدم الحمامْ
يابِاكْ أم كفْ ما فيش كلام مافيش سَخَفْ
لمن ننوم ونقعْ نُجاضْ …
ويشيلونا يا ناس للرقاد …
ما نومنا فى عناقريب عُراضْ
ومَشِينا للخلوة القِبيل ما أكترو
صوت الفكى البتذكرو …
كان صوتْ مَقطرَن ليهو لِسنات يلاعِبِنْ
جابو الصِبى واتبترو
يا حليل ذِكرْ جُوَة المسيد …
ياحليل رجالاً جابا عيد …
....... مديح ......
نوباتْ ترِن ترزِم تقول …
ناس ليلة جَنْ … ناس ليلة جَنْ
--------------------------------------------------
رحم الله من توفى من جداتنا , وبارك الله في الأحياء منهن ,,,, ( آمين )

ندخُل تُكُل .. من السَكَن نعملْ دِقونْ
ما اصلوا لون ولعب جنون
***الحمدلله جنس دا ما عملناه
اللهم استجب اللهم آمين اغفر لهن وتولهن برحمتك وارحمنا إذا صرنا الي ما صارن اليه
آمين

الحصة : إنشـــاء .
الموضوع :الحبوبة
كلمات مساعدة :.السحّارة . الدولاب المصنوع من النملية ,صاج الكسرة ,القرقريبة ,و الغنيمات البحلبن, والبنبر , ضفيرة السعف ,وبرش الصلاة,الحنقوق ,التفتة ,المشلعيب
معينات : يمكن إضافة كلمات ذات علاقة بزمن الحبوبة من عندك..

التمده . الطايوق . السُورِج.
ماتحته خط هو السُورِج والمعني واضح

شكري الجزيل اخي الفاتح

من كلام الحبوبات :ـ
قالوا ليك سالوا الديك ما لك بتخاف من الصقر الصغير الابيض انت ما اكبر منوا !!!!
قال ليهم ده مدخل فيني ام فرارة من صغير ( الفرارة تعني الخلعة – يعني من كان سوسو)

من كلام الحبوبات :ـ
قال ليك ديك وجدادة بتشاكلوا لان الصقر الابيض خطف من الجدادة سوسو . من خلال لغة الدجاج الديك قال للجدادة انتبتري وين ( تعايني وين ) كت كت كتوت كت . قالت ليه الجدادة باكر الصباح برحل كت كت كتات كت كت .

تحياتي