قهوة الصباح لعوض السيد و ول نوية و د. الجنيد.... الرشيد على عمر

وايه الجديد يعني...؟

• ومن يمني النفس بأن نمارس الانكسار ونحن ندافع عن حقوق الهلال فعليه ان يستيقظ من حلمه..ولا بأس ان يدلق موية باااااردة على رأسه ليفيق لان القادم الاصعب لم يأتِ بعد...

• يمكن ان نتنازل عن اي أمر وفقاً لقانون المرونة العام اللهم الا اذا كان هذا الامر يمس سيادة الهلال العظيم...

• نتجاوز عن المحرشين الما بكاتلوا الا من خلف الجدران..

• لا نعبر الاقلام التى يرتوي فيضها من نعيم المدافع عنه ونلتمس لهم العذر لأن من فرض عليه أن تكون يده قصيرة وسفلى سيظل قصير قامة دنيوياً وإن استخدم الكعب العالي وسيظل في اسفل القائمة حيث ارتهان الارادة والتمرغ في حيشان الايجار الرخيص ...

• ثم هل هي المرة الأولى التى يسبونا دفاعاً عمن تكتنز جيوبهم بالاكراميات...؟ ولن تكون الاخيرة مادام هنالك تجاوزات في حقوق الهلال العظيم وما دام يراعنا مشحون بالذخائر الحية التى نوجهها صوب صدر الحاقدين..الحاسدين...الذين يلهثون لأجل عرقلة المسار...

• ولكن أن نصمت والهلال تمارس عليه الحملات الانتقامية فدونها خرط القتاد...

• ويبدو اننا نعيش عصر العواطف في الهلال...

• العاطفة الجياشة تتحكم في تصرفاتنا للدرجة التى بتنا لا نعرف ما يضر أو يصلح الكيان...

• ومن فرط هذه العاطفة نتغاضى عما يمس الهلال ومن هنا يبدأ السقوط...

• جمال الوالي نعم هو رئيس المريخ ولكنه أدمن التصدي لمسيرة الهلال وتوغل في العداء حتى خارج البلاد...لم ننتقده فيما يخصه شخصياً ولكننا عبرنا عن وجهات نظرنا بصوت مسموع وكما علمنا الهلال...

• وقلنا بأن الهلال يتعامل بالمثالية المطلوبة مع كل الخصوم بعيداً عن استخدام اسلحة الضرب تحت الحزام ...

• كلاتشي كان بيننا...وعرفنا ميقات رحيله قبل ستة اشهر...وباعنا لاجل المريخ مراراً وتكراراً وباعتراف نجومنا الكبار...استلم اموالاً من جمال الوالي وانكر...وكشفنا المخطط الذي يرمي الى الحاقه بقودوين ثم من بعده يوسف محمد وكما اعترف العميل المحتال الذي يدعى بوضياف...

• وبوضياف أحد اذرع جمال..

• وبوضياف صديق مقرب لمزمل ابوالقاسم..

• وبوضياف حبيب عند صديق علي صالح والمهاتفات بينهما لا تنقطع...

• لقد اعترف هذا العميل المحتال انه يعادي صلاح ادريس الأرباب ...مبرراً بأنه لم يتقاضى عمولته في اعارة قودوين للسعودية...ولقد وقفنا على كذبته وتبينا سوء مقصده يوم ان اختبره الكاردينال...

• ولأن بوضياف يمكن أن يكون سلاحاً ناجعاً ضد الهلال استخدمه الوصيفاب على افضل طريقة...وكلنا شاهدنا كيف ضيع قودوين ويوسف محمد وداريوكان وبتوجيه مباشر من جمال...

• نعم من حق جمال أن يتصدى للهلال من الداخل مثلما الحق مكفول للارباب...

• ولكن العبث تجاه المكتسبات الخارجية اذا لم تكن هنالك حاجة فهي تصبح خيانة وطنية..

• والدلاقين لم يكونوا في حاجة الى الدافي...ولم يتحركوا نحوه الا بعد ان تحرك الهلال..وجمال في هذه النقطة غلب عليه الحقد الدلاقيني المتأصل في نفوسهم فكان تبريره أكبر ادانة بالنسبة اليه..

• في النيل الأزرق صرّح بانهم اغلقوا ملف التسجيلات..

• في الصحف السيارة اعلنوا عن عدم رغبتهم في الدافي...

• وعندما تحرك الهلال نحو الدافي جاء حراكهم بواسطة بوضياف وانكروا انه تربص بالحراك الهلالي..

• ولان المكر السيء لايحيق الا بأهله لم يكسبوا الدافي ولم يخسره الهلال...

• فالهلال كسب احترام القاعدة لانه لم يتزحزح قيد أنملة عن الادب المتوارث..لا للمزايدة...لا للمزاد المفتوح..لا للي الأذرع بواسطة النجوم...

• وإن استجاب الارباب للمزايدات لحق علينا بأن نعلقه على أسنة الاقلام لننخر عظمه على قارعة الطريق..

• ودعكم من الدافي افإن استجاب الارباب لمزايدة المعز محجوب وميزه بين اخوته لطالبنا بطرده خارج النادي غير ماسوف عليه...سيما وان المعز اتكأ على عكازة الدلاقين وراح يفاوض..وما درى المسكين انه كتب أول سطر في النهاية الحزينة المرتقبة...فمن يثق فيك بعد اليوم يا عزنا ان كنت ترتدي شعار الهلال وتنظر من على البعد ناحية جمال..؟

• الهلال انتماء...ومساواة ..وعدل جهير...والتمييز أن أتى فهو تمييز اجادة داخل الملعب ..اي من يميز نفسه هو نجم الملعب وكما يحدث في عملية اختيار نجومية المباراة...اما الارتباط فهنالك سقفاً لا يمكن تجاوزه لأن الجميع سواء ...

• اما النجم هيثم مصطفى فنكتفي بما تم من ارسال لأن الرسالة وضحت والمقاصد بانت والحمد لله اننا لم نثر في وجهه لنطالبه بانصافنا أو تعاملا بردود الافعال حيال هجومه علينا بل طالبناه الا يظلم الكيان الذي هو سبب نعيمه..

• وابشركم جميعاً بأن هنالك خطوات قادمات من قبل الحزب الكبير لترجمة مشاعرهم تجاه الهلال العظيم...خطوات ستحدث دوياً هائلاً في ساحتنا الزرقاء وتمسح مرارة الظلم الذي احسسنا به تجاه ابنهم جمال..وبعدها لن يهمنا كثيراً ترشيحه من عدمه ...!

مسكين هذا الوصيف ...

• حزين دوماً هذا الوصيف...

• ديمة مربوح ومن الخصوم مضبوح وساعة الحارة مفضوح...

• وصيف من كترة الأقدار غضبانه عليه يكون طيش مجموعتين وليس طيش مجموعة واحدة فقط..حال يغني عن السؤال وككيف ما يتعقد ويحقد على الهلال..؟

• مهيض الجناح كلما حاول أن يطير ينكب من عل وبلا حراك...

• وكترة التلتيق تبشر بمزيد من الثقوب..

• والناظر الى خط دفاعهم الجديد يرثى لحالهم قبل أن تنطلق المنافسات...

• طارق مختار جُلة..نعم جُلة عديل كده...ويوم يومين في المعسكر حيفوت الجُلة بي غادي...

• طارق مختار يلعب بقدم واحدة وهو متوسط دفاع...يعني لفة واحده من امبيلي يخليه يعصلج زي جنزير العجلة أو الدركسون المؤمن...

• غاروسكا عمنا وعم عمنا...أكبر من عجبكو...ومدافع تقليدي خالص وكما ظهر في مباريات سيكافا...يعني عايز ينتظر الساقط من الكرات ليتحرك بعدها...

• غاروسكا ماسورة مدغلبة خدع الدلاقين الذين انبهروا به وهو يلعب امام هجومهم الحمام الميت...

• لأنه تألق في مبارياتهم تم اختياره ولكنهم إن استرجعوا لقاء آخر له امام فريق آخر لعرفوا حجم الغلطة الكبيرة التى ستجعلهم يقرقشون بنان الندم...

• نجم الدين الخرطوم ربما يكون جيداً ولكنه حتماً لن يكون أفضل من دامر المشبع بالخبرة...

• ونجم الدين لن يكون بديلاً لريتشارد ...

• ثم تعالوا نقلب أوراق الفتى النفطي...

• النفطي مشاغب واعصابه تالفه ومغرور حد التخمة وكما تقول تصرفاته...

• لا يعجبه العجب ولا ألمع العجب...

• وتخيلوا انه رفض للمرة الثانية أن يحتفي وجماهير الوصيف ...المرة الأولى عند ابداء الرغبة همس لمن هو بجانبه (بيوسخولي حويجي)...التقول الجوهوا كانوا ملطخين بالزيت والشحم ومغبرين بتراب الترب...!

• والمرة الثانية عندما أتى للتوقيع الرسمي وهذه المرة سمعه مصورنا اشرف كامل وهو يهتف (لالا ما اخرج عليهم بيصيبوني)..ايه دا بسكويت ولا حلاوة قطن...؟

• وكيف يصيبونك الدايرين يحتفوا بيك ديل جماهير ولا انت فاكرهم باكات ...؟ ولا كمان قايلم شايلين سكاكين ومطاوي ومسدسات...؟ حليلك يا مرق مولد وصاحبه غائب..؟!

• غايتو جنس دلع يعني الوالي يقعد الموسم كله يلولي في النفطي ولا يطبطب على وارغو ولا التحانيس تتقل مع العجب الانتهى خلاص وما في واحد شجاع يقول ليه اخلي خانتك يا كابتن..؟

• انه موسم الدلال والدلع لأن حناكيش الوصيف زادوا حنكوشاً في غروره متعجرف ومربوش ...

• نفطي بلا بترول انه عبدالكريم نجم الوصيف الجديد...والوصيف اشترى اكبر ترام تونسي...ومن يتابع الصحف التونسية يرى بوضوح وكمن يهللون لتصدير مشاكلهم الى السودان...زي شغل النفايات الاليكترونية الما معروفة سيدها منو والجاية من جبل علي..!

• والنفايات النفطية دي بتجيب بلاوي...مولاس مسموم يضيع في دقيقة الخرطوم وبعدها الوالي الخضر الا يترشح في قوز الناقة...

• ومن يتابع تسجيلات الهلال يعرف الفرق المهول...

• دفاع فولاذي...وسط خرافي...اطراف ياااامنت كريم يارب..هجوم كاسحات الغام تعرف كيف تجعل الشبكة تعزف الانغام..ورئيس ملحن يا للهول...!

• التسجيلات انتهت بخيرها للهلال وبشرها لاصحاب الشر المستطير...

• اهل الخير سعدوا..

• واهل الشر عبسوا...

• وموعدنا مع البطح السادومبي والنطح الايداهوري والدلال النفطي..زيدني من دلك شوية وخفف الهجوم علي..كرمرم بيدلى على وش الميه..

• إتدللي..!

ردي ليك بس بقول ليك انتظر بداية الموسم وانشاء الله حتشوف النفط لو ما اغرق المقبرة علي بكرة ابيها
وايه علاقة وبضياف بمزمل ياناس اتتو اكبر من هذا الكلام ومثل هذا الكلام بكون محسوب عليكم
التحية لكم

في كاس الدوري كان موجود وفي كاس السودان كان موجود وما عمل حاجة لأنو ما لاقي ليه دفاع يسنده من قول تيت الدفاع مضروب ولا مهندس نص زي سيدا يرمي ليه باصات زي آخر باص راماه لسادومبا وعينك ماتشوف إلا الضلمه كروووومي لقاها جوه الكيس ... المشكلة في إنكم ما بتدخلوا التسجيلات عشان تسدو ثغراتكم ولكن عشان الهلال يعني بتسجلوا بحاجة الهلال وليس بحاجة فريقكم عشان كدا لو جاكم ميسو ما حيعمل ليكم حاجة لأنو مافي ناس بثبتوا ليه في الدفاع ولا أحد يرقد ليه باص فيه فايدة والعبرة في النهاية بالمحصلة والانجازات مش بضجة التسجيلات.

قلت لي يافيصل عمو غاروسكا ماسورة مدبلغة عليك الله بوصة كم.......

اربعة بوصة يا عباسى.

والله يا عباسى كان شفته عثمانو ( امادو ) تنق تنقا تنقا.

تحياتى

والله ضحكتنى يافضل داير تكتب ميسى كتبتها (ميسو)..لا احسن (أبكير).
فيصل آ خوى ات لامن عارف عن المريخ قدر دا (المهلهلك) شنو؟هسى كان قدراتك دى سخرتها للهلال ماكان احسن من ما تضيعها فينا نحن معشر الصفوة لاننا ما بعجبنا الا (العجب) وعدم الصيام عن شباك الوصيف..
الوالى يحب المريخ ورفعة المريخ فى تدمير الهلال ما دام الموضوع بقى سوق وبيع وشراء..لغة المال هى التى تحدد وجة اللاعبين..ماتحرق بنك ساكت يازول وحقو تشوفو رئيسكم دا يشوف ليه طريق كاش وكان مافى يقنع بنصيبه من كعكة التسجيلات..(الجفلن خلوهن اقرعوا الواقفات).

والله ضحكتنى يافضل داير تكتب ميسى كتبتها (ميسو)..لا احسن (أبكير).
فيصل آ خوى ات لامن عارف عن المريخ قدر دا (المهلهلك) شنو؟هسى كان قدراتك دى سخرتها للهلال ماكان احسن من ما تضيعها فينا نحن معشر الصفوة لاننا ما بعجبنا الا (العجب) وعدم الصيام عن شباك الوصيف..
الوالى يحب المريخ ورفعة المريخ فى تدمير الهلال ما دام الموضوع بقى سوق وبيع وشراء..لغة المال هى التى تحدد وجة اللاعبين..ماتحرق بنك ساكت يازول وحقو تشوفو رئيسكم دا يشوف ليه طريق كاش وكان مافى يقنع بنصيبه من كعكة التسجيلات..(الجفلن خلوهن اقرعوا الواقفات).

والدلاقين لم يكونوا في حاجة الى الدافي...ولم يتحركوا نحوه الا بعد ان تحرك الهلال..وجمال في هذه النقطة غلب عليه الحقد الدلاقيني المتأصل في نفوسهم فكان تبريره أكبر ادانة بالنسبة اليه..
هذا الصحفى يفتقر تماما للمنطق والأسلوب ولا يرقى لأن يكون كاتبا صحفيا لأن أسلوبو أسلوب زول غلباوى ساكت.
دى مشكلة البلد ناس تهرجل فى الشرفات السياسيه وناس تهضرب فى الصحف الرياضيه.
غاسروكا عجوز(زى هيثمكم ونسيبو).
النفطى مدلل ياخى ما يدلل الخير كتير ولا عشا ن ما عندكم.
ياخى دا حقد مبالغه.
بالله شوف الناس ديل محروقين كيف.....
كويس خليكم فى حقدكم دا ونحن جايين السنه دى ناس كاس ومسيرتنا بتلف بدار العجزه

عفوا اولا هذا هو ال skype address بتاعى hitalia_ma

ثانيا يجب علينا ان نوقف زحف هؤلاى الاوغاد على المنتدى بشكل جاد و نهائى.

لقد اتيت الى المكتب و كلى شوق لكم و بدأت بالفعل و لكن!

تصبحوا على خير.