رسالة خاصة لأزهري

العزيز أزهري
جمعتني الصدفة في أحد الأيام بأحد الأشخاص وكما هي طبيعة كل السودانيين فقد تعارفنا مع بعض وتجاذبنا اطراف الحديث وسألني من أين أنا فأجبته بأنني من أبوجبيهة فصمت لحظة فأخبرني بأنه درس في مدرسة خور طقت الثانوية وان لديه صديق عزيز من ابوجبيهة وسألني إن كنت اعرف أزهري الحاج ؟
فأجبته بأنني اعرفه حق المعرفة
وبدا يسرد لي بعض ذكرياته عن خور طقت وحينما اخبرته بأنني ساوصل تحياته لك طلب مني أن أذكرك بالمظاهرات التي خضتموها وقصة الرجل الياباني الذي كان مختبئاً لمدة ثلاثين عاماً اثناء الحرب العالمية الثانية وحينما ظهر كان يظن أن الحرب مازالت دائرة وحدثني بأنه وبسبب هذا الياباني أطلق عليه لقب اللورد
والحقيقة فقد إستمتعت جداً بالحديث مع هذاالرجل وطلب مني ان انقل لك حديثه ممزوجاً بأحر أشواقه إليك وتحسره على الأيام التي فرقت بينه وبين العديد من زملائه الذين يفتقدهم
وبقي لي أن أزكرك بإسمه بعد هذه الإطالة المقصودة والتي كانت بإيعاز من هذا الشخص
إسمه ((عمر البشير)) ولقبه ((اللورد))
فتقبل تحياته وأشواقه إليك

صباح الخير محمد هاشم.
أمبارح أبو الزهور قال عايز يخلى الغربه ويمشى يعيش فى السودان وانت هسه تقول لابو الزهور عمر البشير بيسأل منك..... طيّب يا ابو الزهور ما تقول لينا عدييييييييل عمر البشير عمل ليك call

يكفينا انه صديق ابو الزهور يمين خلي عمر البشير اكان بقى عمر ابن هشام ماعندنا معاهو مشكلة تاني

صباح الخير ايها الاحباب
عوض السيد ياخوى خلى اللخبطة...محمد هاشم بيقول ليك الراجل اسمه اللورد وقرأ طقت..تقول ليه call وما ادراكما call ..
مبروك ابو الزهور فأخبار صديق عزيز بعد غربة فعلا بتشرح القلب وتوريك انه فى ناس عزاز مازالو يذكروك
سلام ولدنا محمد هاشم وتحياتنا لوالدك العزيز.

الاخ الحبيب د. الجنيد.
اللخبطه هى فاكهةالمنتدى..... واللخبطه الصحى صحى فى المنتدى الرياضى مع الهلالى الضليع صاحب القلم اللاذع الذى يزيد المنتدى الرياضى ألقا بمهاوشاته(خدوره ام بشق).
لكن شايفو اليومين ديل(مكسكس بعيد)أظنو خجلان عشان الاستغالات وحردان من ادارة الملحناتى

أخي محمد لقد نكأت جرحاً لأستاذنا الأزهري وكأني به يقول لصديقه
مشكور محمد ,على الهمسة " العشرة لا تنسى"

عشت يا ابو الزهور

والله يا عوض السيد أنا كان عملت فترة تدريب ببيت الأمانة بنين وطبعاً هي وكر من أوكار المريخاب ويومها كان حموري الغير طالب بها ولاعب بالمريخ وكذلك عادل أبو جريشة(اللعيطة أم شلش) ويومها الدحيش وقاقرين مجننين المريخ جد وأذكر كان في لعبة ودية هلال مريخ وكان لي صداقة شديدة مع بشرى وهبة فهو يعمل بالمدرسة ومكتبه بالقرب من شعبة الرياضيات التي أتدرب تحتها ويوماتي شكل ورجة مع الطلاب المدرسة التقول شرط القبول ليها تكون مريخابي المهم بشرى وهبة قال لي كان انغلبتو في الماتش دا شوف ليك محل غير المدرسة ماتجي يوم السبت قلت علي اليمين طالما قاقارين والدحيش موجودين اللع قال بقولكم وقلت لو فاز الهلال قال لي برضو ماتجي المدرسة علي اليمين كرف وودالملمون غلا يخنقوك وكان استاذنا الجليل عبدالقادر كرف مدير الدرسة وود الملمون الوكيل والمريخ انصقع 4-2 وكانت في عام 1973 أو 74 والدحيش جايب 3 أهداف هاتريك يمين يوم السبت جيت ليك المدرسة أنقر درست حصة .. أخش كل فصل واكتب التاريخ نفس تاريخ المباراة كل الفصل سا استاذ التاريخ غلط .. أرد ليهم غلط دفاع المريخ الفصل يسكت جم ولو كنت موجود يا عوض السيد كان خليتك تكون هلالابي زي أبوك.

أحييك يا عزيزى الغالى ابو مصطفى.
أكثر ما يعجبنى هو حفظك للأسماء والتواريخ رغم طول الزمن(ما شاء الله).
بالمناسبه بشرى وهبه كان مستضاف فى قناة النيل الأزرق فى برامج عيد الأضحى الماضى وتفاجأت عندما ذكر أنه لم ينل بطاقه(لا انذار ولا طرد) طوال مسيرته الرياضيه.... شوف اللاعبين زمان أخلاقهم كيف وهسه كيف

الأعزاء في المنتدى لكم كل التحايا والود
وشنو يعني ما قلنا رسالة خاصة لأبو الزهور بقت رسالة عامة
وبعدين الشمار ليكم شنو؟
تحية من القلب إلى القلب لكل الأحباب