إتــــكاءة .... وكــده ....

الحمامات .... كنا زمان نستحم بالطشت ... والجردل او بالكورة الكبيرة داخل الأوضة أو في صريف مبني من قش في شكل دائري أو مربع ... وبعض الأسر كانت لها حمامات مبنية من الطوب الأحمر وتضع برميل ماء في أعلى الحمام وتركب دش ... والأرض مرصوفة وممسوحة بالأسمنت ...بلاط ناعم أملس .....وطبعاً حمامات المدرسة الوسطي وحي الممرضين والمستشفي وحي المحلج مرتبه جداً جداً ..... أما عن ( الحمام) بلغة العصر ...وبكلامنا نحنا زمان ... الأدب خانة ويقال هي كلمة تركية .... الأدب خانة ... والأجزخانة ...والسلخ خانة يقال عبارات تركية ..والله اعلم ... ومن أسماءه : بيت الأدب ..والمستراح ... والكنيف ...والمرحاض .... ال w.c أي دورة المياه ...طبعاً في حمامنا البلدي ما عندنا دورة مياه .... لأن بناء الحمام أو الأدب خانة بالبلدي والعرش بلدي ...بالحطب والشوالات الخيش والتراب ... وإحضار حديدة دائرية لفتحة الجلوس....أو بنفس تربيعه وضع الحطب .... وعمق الحفرة قد يصل لأربعة أمتار أو اقل أو زيادة حسب الإمكانيات ...وبابي جبيهة كانت هنالك ناس متخصصة في هذه الحفريات ...أو رجل البيت يشمر ويحفر براهو.... أما بيوت الحكومة والتجار الجلابة .... فكانت مراحيضهم تبني من الطوب الأحمر.... وتعمل فتحة خارجية بباب حديد تقيل طوله حوالي 90×90 سم تقريباً ....تفتح علي الشارع .والسبب لسحب وتفريغ الجردل ... وبالدخل توجد فتحة الجلوس على مسطبة مبنية بالأسمنت... وبالتنسيق ...مع مكتب الصحة بأبي جبيهة ..كان يمر التراكتور بالليل وتفريغ كل الجرادل وتحميلها بالتراكتور ...وبعد داك : عوير ود الشاويش وكده .... أو بع أب شمله الأمير أو بحي البوسنة قبالة المدرسة الشمالية ( حي الزهور حالياً ) وكانت الحمامات توجد كالآتي : نقطة البوليس ، البوسته ، بيوت الوكيل والمجلس ، منازل الأعمام : مغواري ، عثمان حتيلة مصطفي الشفيع ، العم خليل ابو نخيله ، العم يس ، العم ميرغني حتيلة ،مباني الإدارة ، العم حاج مختار، الحاج كوكو ، المدرسة الشمالية ، منازل المعلمين ، البيوت الثلاث : عمنا ابوزلازل وعمنا الحاج البشير وعمنا خليل حتيلة وربنا يرحمهم ومنزل الناظر وخالد البشير وحسن إبراهيم ، الله يرحمهم يارب،ومدرسة البنات والوسطي والإستراحه ، والنادي الأهلي والجنوبية والبيطري ومكتب الصحة والمحلج مع الحي طبعاً والمستشفي وحي الممرضين .... وتقريباً هذه هي الحمامات الرسمية المعروفة في ذلك الوقت ... وكنا نستمتع وننتظر حلول المغرب بفارغ الصبر ... وننتظر تفريغ الجرادل ..عشان نقول لرجل الصحة عيفونة ...ونجري حتى لا يمسك بنا عامل الصحة ... وكنا نستمتع كثيراً حينما يطردنا ... ويحمل معه بطارية وعصاه ... ويا حليل أيام زمااان ويا ليتها تعود .... محبتي ...

هل تذكر أب لونجا

خضر أشهر الحفارين

هل تذكر تربيزة , وابوك ياالطيب راجلا طيب شارع الهوا تجيب الهوا تودي الهوا.دمت

بقولوا ..نيفا..كمان..والمحظوظ يقبض عليه ..يدلكوه دلكة عطرة؟؟ابو عفان يا عجوز..عارفك كنت جراى ماتتلحك..

قطر السبت يوم دور
شال المنقة والجرح الفوق قليبي اتعور
يا مشتول القريب والبرتكان النور
نواحي عليك لامن صفار الصبح اتكور

بس مش عارفين نشم دلكة.. وعطور ابوعفان ...ولا منقة وبرتقاااال طارق ... بس دلوني ع السبيل ... محبتي لمداخلاتكم الرائعة ...

فعلا عمودك الرائع يستحق اسم اتكاءة
نستريح ونتكئ فيها
تسلم

والله يا بو علياء بس التاريخ كالنهر يسير الى الامام فقط
لوكنا نستطيع انرجع عجلته الى الواء لاتيناكم بدلكت ابوعفان وعطرة وكذالك منقتنا
لكن عزاءنا في انه يمكننا ان نبحر فيه الى الوراء بذاكرتنا
عشت يا مبدع

ابو عفان
ياأبو محن
كل مرة تفاجئنا بي حاجة من مخلاية الذكريات دى
بس بي مناسبة السبيل دي عايزك تفلفل لينا مخلايتك دى كويس وتتذكر لينا فى الفترة الحلوة ديك كان في كم سبيل فى البلد ؟
وأكيد ما حتستعين بصديق!!!
قمة الشوق

صدقني يامنقه ... أنت قمة وإبداع ... تعليقاتك دايماً ظريفة وحلوة وفيها خفة دم ... وبتاخد شوية من لون المنقه ...وما عاوز ازيد وأدخل في الأغنية ... بالنسبة للسبيل أذكر بالسوق الكبير .... جوار عمناعبدالرحيم ود اب شنب ... وقدام دكان ابيا مصطفي الشفيع .... وأعتقد قدام دكان عمي المرحوم فكي الحاج ...وجوار طبليات الرغيف اعتقد ذلك ثم امام دكان العم الحاح مختار ..اعتقد وغير متأكد .... وامام دكان العم سر لختم وغير متأكد ... وأمام دكان العم ميرغني حتيله ... والأحياء سوف تأتي ...ذكروني يا أحبائي فقد نسيت .... محبتي

سبيل عند حسين العجلاتي خاص بحاج الأمين ثم سبيل عمنا حسن الأمين دكان غربال ثم سبيل عمنا مصطفى الشفيع فسبيل المغواري فسبيل الزين عبدالسلام قدام دكان عمنا صالح عبدالماجد فسبيل عمنا يسن منصور ثم سبيل حسن إبراهيم وآخر أمام دكان مصطفى الجاك ثم عمنا حاج مختار فسبيل ناس عمي السر فسبيل العم ميرغني حتيلة فسبيل موسى شرتوق فسبيل عمنا الخليفة محجوب

إضافة لسبيل الجامع من عدة أزيار وأخرى متفرقة داخل السوق القديم

مبرووووووووووك عمنا ابو الزهور للنجدة وفك الشفرة
وانا الان أتخيّل صورة ود الشيخ (ابو قرباب) رحمه الله وعلى ما أعتقد مات بي اسراره
كان يصول ويجول بين السبايل دى بدنامايكية غريبة (رغيفة وطماطم وكوز موية من السبيل يفتح الرغيفة ويملاها زيت من اقرب صفيحة زيت تقابله بأقرب طبلية) وهكذا طول اليوم لا يكل ولا يمل
ولله في خلقه شئون

وإنت دائماً محل تقديري ... وتصدق بالله عندك في داخلي إحترام خااااص جداً ... الله يسعدك يارب ...وسوف اعزمك عندنا بالعليا مع العزابة ... ولو عاوز كسرة نمشي ناس عوض جاويش ... ومعليش يا جماعة على الكلام الخاص مع إبني الغالي ول نويه ..... محبتي ...

امشي معانا


المشوار طويل



تاني في حاجة




بعد شوية حتظهر




استعد




1




2





3





المفاجأة





ايمان لندن


في الصورة

هي لكين ما ....... كمل براااك ...ليه كده بس وإنت عارف الطريق زي ما قال الغالي حيدر مراقب بالرادار .... تسلم بس البنت طيبه ومؤدبه...ولكين بالجد مفاجئه وتصدق ضحكت جنس ضحك واحد ؟؟؟بس بشويش علينا ..تسلم طارق الذوووق.... محبتي ....

والله يا ابو علياء قلنا نسخن الحلبة شوية

هوووووووووووى يا هوى. دا شنو البتعمل فيهو دا يا ابن عمى........ ما قالو ليك الحوض فوقو بلوم... وزى ما قالن الحريم(الله يخت محنك يا ول كمبال)

اخوي اللحدب انت زاتك بتجر واطي
انا خاتي الموضوع دة شرك شايف ناس كتار كبوا الزوغة

كيفن ما يكبو الزوغه اذا عمك عثمان ابو ماضى قال ليك فى ناس بيدخلو مختفين وحيدر قال الطريق مراقب بالرادار

خطيييييييير ياطارق وياود الشاوش احسن ليك تعلن التوبة وتتبرأ من كلامك داك ولا ناس طارق ديل بودوك في داهية وشكلك كده ما زول شدايد.
مع خالص ودي

وصية ابو ساره دى يا ابو علياء وصية معلم..... أبقى مارق.
كدى قيس الخامه العندك (تامه متر ونص).
الله يجازيك يا ابن عمى

مشكورين على مداخلاتكم الرائعة ... ويا طارق كل مره بتجي بقنبلة خطيرة ...وشوف وصية الفاتح ابو سارة ... تصدق خوفني زياده ... ولو لاكم أحبتي لكان متنا من آلام الغربة ...وإنت يا عوض اقعد دس لي في شعرة معاوية بجاي وبجاي ... وربنا يحفظكم لنا جميعاً أحبتي ...

ما وريتنى المقاس ولا ما جنبك ترزى

احيك اخي شاويش علي هذه الاتكاءة لمن نعسنا وانا من زمان بدور لي في زول مرجع زيك عشان اسالو من ناس منسين زي جان كرن وود الشيخ واخرين ياتري ماذا فعلت بهم الايام

عاطر تحياتي

ود الشيخ ... كان في حاله ... والمرض من الله عز وجل ... بل كان إنساناً مسالماً .... وكان ملتحي بلحية وسط لظروف المرض طبعاً ... وكان يتجول بين الناس وفي سوق ابوجبيهة وخارج السوق قليلاً وحتي جوار مدرسة البنات ، وطيلة حياته لم يؤذي أحداً ..ونسأل الله له الرحمة ...اما جان كرن فهو إنسان حاضر الذاكرة كل ما يقابلني يقول لي ود ابوي ود الشاويش ، وهو كان إنسان هادئاً تماماً ،،، بل كان يغلق انفيه وأذنيه بقطن او قماش لفافات صغيرة ...وحينما سألته لماذا ؟ قال لي الناس بتشرب دمي ... وهذا على حسب مرضه في ذلك الوقت وكان إنساناً مسالماً تماماً وفي حاله لا يؤذي أحداً أيضاً..بل كا يسير ببطء شديد ..يبحث عن أشياء على الأرض بعكازته ...ولا أدري ما هي ... رحمهم الله جميعاً ...وكان فقدهم مؤلماً... وقد رحلوا عنا وتركوا لنا الديار خاليه رحمهم الله ... وا ألمي ...

ود الشاويش يا خوى طارق دا كمل كلامك...شعرة معاوية حقت عوض السيد دى ما تشتغل بيها واتوكل على الحى الدايم واملأ عينك فى البنية ...الدابة نية...حيرت فينى المشاعر ..وفى الغنج يا داب صبية....
ولد دا

لكين اسمع يا دكتور قالوا الطريق مراقب بالرادار ودا المخوفنا !!!!؟؟؟ ... لك تحياتي يا كبير .... محبتي ..

الليييييييييييييييله..... سرعه رهيبه ومخالفات بالهبل.
والله جنس فلاشات فى الشارع العام

لهما الرحمة من الله عز وجل فهم اسعد منا قي الدنيا والاخرة وكانوا اعلام من اعلام ابوجبيهةوحقيقة كانا محترمين رقم المرض ومحبوبين لكل الناس
لك شكري وتقديري

مالك وقفت تش العويش يا ابن عمى

انا خايف على شعرة مغاوية
يا ابن عمي يا لخباط

شعرة معاويه ما بتتقطع الا للذى قصد قطعها يا ابن عمى.
تش ولا يهمك.

أسمع

راجينك فى الرياضى

تشينا العويش يا ابن عمي

اول حاجه يا طارق إنت ال youtube ده يتنزلوا كيف ؟؟؟ قلنا لناس ايو الزهور وياسر اعملوا لينا بوست لتعليم الكمبيوتر وحتي لأي سؤال رفضوا ؟؟؟ وحقو الواحد يخش الغابة تاني ويجرليه معاهو جماعه ... يعني شنو يعني إلا نحمل السلاح حتي البوست ينزل ؟؟؟ طااارق خليت البنت الظريفة إيمان لندن ومشيت لعجاج لندن؟؟ والله إنت مصيبه ...وصدقني إنت دايماً بهجه وظرف ... وربنا لا يحرمنا منك ... بس بالله علمنا كيف نزلت اليوتيوب... وسلامي الخاص لحامل الشعره في جيبو... محبتي ..

صباح الكير يا رقيق
بالنسبة لموضوع التنزيل
افتح اضافة رد ستجد شريط بة تحت المكان البتكتب فيه العنوان اضغط على اضافت فيديو ستفتح معك خيارات من بينها اليوتبي اختار اليوتوبي سيفتح معاك
اكتب في مكان البحث الموضوع العاوز تنزله
قم بتشقيله اولا ثم لا حظ على يمين الفيديو ستظهر لك روابط قم بتظليل الرابط الذي هو امام(Embed وانسخة في مكان المشاركة واختلر نعم
ومن ثم ارسال
وتلني ما تخش الغابة

والله انت يا ابن عمى انت بتاع شبك..... نانسى دى زاتها جايه من لندن بس جاده حبتين.

أسمع

نحن كايسين عمك فضل ما لاقينو
كدى أضرب ليهو فى العرضه شوفو لسه هناك ولا رجع

عرضة قال
العرضة دي حقت العقارات المضروبة امشي الرياضي شوف الهلال عمل شنو؟

ما بحرق يدى بالمحرق لان التضامن بتاع ابوجبيهه ممكن يحرقو

اختشي يااخي تضامن شنو بيقلب المحرق,المحرق هذا متصدر الدوري في البحرين وكذا لاعب في المحرق بيلعبوا في المنتخب البحريني,وانت تعلم المنتخب البحريني اطاح باالمنتخب السعودي من النصفيات الاسيوية الماءهلة لكاس العالم وكان قاب قوسين اوادني من التاءهل لكاس العالم,لاتبخسوا الناس اشيائهم,وخليكم في قروشكم نحنا عارفنها جايا من وين لكن هذا لايهمنا,لكن قريبا كل شيء ببين,لك حبي

ويعنى شنو يا فلس ما التضامن برضو بطل ابوجبيهة وممثلها فى كأس السودان للمرة الثانيه على التوالى.يعنى زيزو زى المحرق وقاعد يغلب هلال ابوجبيهة(وتحت تحت...نضالها كمان)حاره الاخيرة دى وخلونا نشوف اديس ابابا...بعدين ات شفت ليك حاجة (محرقة) عملت حاجة؟؟؟؟

هوي يا دكتور
هسأ اديس بابا الجابها هنى شنو؟