قفة الملاح .....؟

واحده من الاشياء التي اندثرت في مجتمعنا وخاصة في ابوجبيهه .تلك القفة التي تصنع من السعف واشتهر بصناعتها اهلنا امبرروا .فأصبحت الان من التراث اذ تحولت في الاونة الاخيرة الي زينة اوحقيبة يحملنها الفتيات بغرض حمل احتياجاتهن (حاجات تانية حامياني ).وكان في الزمن الماضي رب الاسره هو الشخص الوحيد المنوط بة التوجه الي السوق لشراء مستلزمات الاكل والشرب اليومية .وتتحول المهمه تدريجيا الي الابن الذي يرافقة دائما الي السوق ويكون اكتسب خبره وعرف ناس الخضار والبصل والزيت وناس اللحمة ومنوا الببيع رخيص ومنوا الغالي .ولكن مع مرور الزمن تلاشت القفة مع ظهور الكيس (ابوريال)زمان طبعا واصبح سعر الكيس الان خمسمائة جنية التي كانت في السابق تملاء القفة.
حليل زمن القفة ...؟
وحليل زمن رب الاسره البمشي السوق يجيب المصاريف ..؟
وقع الامر الان علي الامهات والبنات ..
واستولت الاكياس علي الساحة .
حتي البستلة البيجيبوا بيها اللبن احتل مكانها الكيس ...
والله القفة كانت ساتره حتي البيوت ...
هل تعود القفة الي سيرتها الاولي ؟

الكل منا له زكريات وطرائف مع القفة ...

العزيز زهير.
مساهماتك دائما حيّه..... أتوقع تفاعل كبير مع هذا الموضوع خاصة فى ظل غلاء اللحم(البقرى والعجالى والضانى) والطماطم(والكيس الفاضى)وحاجات تانيه.
أبو علياء قال ليك كل يوم كان بجيب ربع كيلو مره قام جاب نصف كيلو أدّو ليك هرشه فى البيت(قرّبو يشدّقو)

زهير الفاهم كلك ذوق ... فعلاً كما قال أخي الظريف اللطيف ...عوض السيد مواضيعك دايماً حية وفي الوتر الحساس ... وربنا يحفظك ويخليك لينا ...وطيب يا عوض السيد انا بعرف درب الحكومة ..وبعرف كل الأوتار الحساسة ... وآي نعم انا هرشتا من ام علياء... بس خايف عليك إنت ..يجي يوم تهرش زي كده ...وتقول لحكومتك انا بورق الخضرة بس ما بفركا ... وبس اعرف حاجه اخي عوض إنت نجم في هذا المنتدي والذي ينضح ايضاً بشخوص كمنبعك العذب ...محبتي ..

تسلم يا ابو علياء.
أنا ما بتهرش لأنى شايل شعرة معاويه 24ساعه فى جيبى

والله ضحكتني شديد ... وبعدين دا مصطلح جديد ... قلت لي شايل شعرة معاوية 24 ساعه في جيبك ؟؟؟ ولد دا ... محبتي

أمبارح يا ابو عفان فى مداخله على مساهمة اخونا الجيلى انا ذكرت انو فى واحد كان كثير المشاكل مع زوجتو والناس حاولو اصلاحهم كتير جدا بدون فائده فقامت نادتو حبوبتو العجوز جدا وقالت ليهو يا وليدى المره(الزوجه) بتاكل من أضانها(يعنى مرتك كان بكّشت ليها(مشكل نهى) راسها بجى.
طبعا دا سلاح أقوى من شعرة عمك معاويه.
يله جرّب البكش وقول لى بس أوعك تمشى تشترى خروف والله الا يطردوك

تسلم ابوعلياء وابو أبراهيم
بس شعرة معاوية دي شنو ياأستاذ..

معاوية ..قال لو كانت بيني وبين الناس شعرة لما إنقطعت ....... إذا شدوها رخيتها ,,, وإذا رخوها شددتها ... ويقول عوض هذه سياسته مع ام إبراهيم ... ( طبعاً بيني وبينك يا زهير إتصلت فيه في رمضاااان لقيتو مشغوول بغسيل العدة )) وما تقول لزووول ... محبتي

والله يازهير موضوعك حى ..وذكرتنى بيه قفة الاسناذ الشيخ (ابشلش) قال قفته اسمها (امبين امبين) يطقع بيها اولاده وسط ...لايعرفوها غداء لا يعرفوها عشاء..
والحقيقة انا شخصيا كنت من الناس البجيب قفتى بنفسى لكن المشاغل كترت وعجزنا عشان كده يوميا قفة احمد الجنيد شايفها كيف ..كيف..اصلو مامكيفانى ...لكن قفة الزعف لسع عندى وكل ماتكمل بجددها
عليك الله ياعوض Sad

الخدرة كان جبتها ماتورقها)...وبعدين يا عثمان نضمن كيف انه عوض ما راخى الشعرة طوالى والطرف الآخر شاديها طوالى..خليه اليقنعنا
دمتو

زهير الحبيب.... طبعا انا قصدت ما أشرح معنى شعرة معاويه لأنى عارف ابو علياء ما مقصر مع أولاد الزمن دا يا(حناكيش).
ابو عفان الزمن دا كان ما غسلت العده بقولو ليك(هوووووووووى يا.....)أخير نغسلها ونسكت.
الجنيد ما تخاف يا اخوى الطرفين ماسكين باحكام شعرة معاويه حقتنا لهسه بتلمع

من طرف **abdelsalamosman** 25th يناير 2010, 20:22

القفه يا زهير بعدده ما بلزما الا المتحف
زمان كانت بتكون مليانه خيرات وكان الشمار بيكتلنا نفتش جوه القفه ناخد حتة دكوه وكسرة طماطم بزيت السمسم وشوية حلاوه قصب على حلاوه شعيريه وفول مدمس على جمبه وطعميه وهالوك وكمية دعافيس بعد داك نقوم بتسليمها للوالده والحلل تدور
مرة اتذكر حكى لى واحد من اعمامنا الجزارين بانو ابوجبيهه فى الزمن الجميل داك فى اليوم بيضبحو اكتر من 25تور غير الغنم والضان والابل
مع انو ابوجبيهه كانت عباره عن اسره واحده كبيره يتعارف الناس من اقصاها الى اقصاها لكن الان عجل +خروفين فى امانت الله

كسره:انا المحيرنى انو فى ناس يقولو ليك فلان ده قفه ساى .دى معناتا شنو؟
cat

الحبابي جلسوا
انتو لقيتو الفيقة وقالو البيلقى الهبيوب بضري عيشه
يا زهير دي جبتها من وين ؟

شكرا اخي عبدالسلام وطارق .
عبدالسلام شكلوا زمان فرفار شديد وبفتش تمام .
اخي طارق ياما شلنا القفة ونحن صغار وفتشنا فيها كتير عشان كده لها زكريات باقية حتي الان .؟
بعدين استاذي عوض السيد ياشاويش لقي الهواء ضاربوا في عمان لكن لورجع السودان بجيب القفة وبغسل العده والله يستر من باقي الحاجات التانيه ...

لكم حبي واحترامي جميعا.....

انا والله راجي لي زول في المنتدي في موضوع القفة دا .؟. احسن لية يتكلم قبال مانقبل عليه ...
هوي ناس الصين شوفوا زولكم دا ......

أحييك أخى زهير عبر هذه المسافات الطويله وأنت تطرق أبوابا حيّه كحيويتك.
أنحت الراس وسنزيّن كل مساهماتك بأقلامنا المتواضعه.
ما تتأخر(مش حنغمض عنينا)

أخي عبدالسلام بيقول :

كسره:انا المحيرنى انو فى ناس يقولو ليك فلان ده قفه ساى .دى معناتا شنو؟
أخي عبدالسلام :
طبعاً للقفة أذنان أثنان ... وممكن توديها السوق او تجيبها في اي وقت ..وممكن تحطها ( أو تختها ) جنبك وإنت بتلعب كشتينه عمرها ما بتعارض ....وشبهو الشخص الإمعة المنقاد دون إعتراض بهذه القفة المسكينه ... والتحية لكل الشباب ومداخلاتهم الرائعة ...محبتي ...

من طرف **abdelsalamosman** 26th يناير 2010, 10:10

شكرا شاويش الرجل الموسوعه
لو فى زول حاول يستقففنى (اى يجعلنى قفه )ما حاستقفف ليهو

منى انا:تذكرت عائلة القفه واقاربها منهم برش الصلاه طاقية الزعف والهبابه وحاجه كده مدوره ومخرومه من النص
ترى هل مازالو على قيد الحياة؟

إنت رجل متواضع وبس وعاف كتير كتير ... المهم من اسرة القفة ...والحاجه السعف الدائرية ومقدوده في النص ...دي طبعاً فرشة الدخان ... بتوضع فوق الحفرة للجلوس عليها ....للأمهات والأخوات والزوجات ... وشايف كده جابوا نظام حفرة جديدة بتشتغل ببخار خارجي ... يعني ساونا عديييل كده... وبرضو مهما يعملوا ما بلحقوا شغلت أمهاتنا ... محبتي ..

(( عوض السيد شيك على بريدك الخاص ورد على وخلى عندك ذوق ورسل لي إيميلك ... بس أقعدألبد كده ودس لي في شعرة معاويه دي برااااك... ولد دا ....محبتي

شكرا علي الروعة وحقيقة كل الارث والتاريخ اندثر وجاتنا حاجات غريبة ؛ياريت تعود القفة و00000 الكتيرة دييك ؛ وشكراً عم شاويش وعارفك مابتقصر ولوسمحة لي احيك من هذه الزاوية واهديكم هذه المقاطع انشاء الله تنال اعجابكم
حاجه لذيذه ومعاها مديده
وختت القرعه وجابت السعن
وعاطت للجماعه من الرعايه والزراعه
جابو بصل للبليله
مبسوطين شايلاهم فريحة الفطره الجميله
حكروا فيها زي كديس ساكيلو فريسه
أنين شديد ولغف مخيف
وكلام مافيش.... عاشه حفت ساقيها
من سواية القلقال فوق النار
وهاك يا إنت نم قول فى البليله كلام
قول فيها نم قول كمان قوام
والكارجقل لا تنساهو أدو حقو
يمه آى عاشه قشى المرحاكه
وطحنى الفريك وحقنيه فى السويبه
عشان نسوى منو عصيده
ويا حبوبه إنتى الغزل خليه
وهاك أجبرى خاطري فى الفطير
عشان إنتى بتريديهو
والليله عاشه جابتليها تختوخ من النبرو
وجابت عيش الريف القفه مليانه
ودقلات بطيخ
وقرون عجور من المقه
وحرست عبدالله التقا
حبوبه قوليلى حكاوى زمان
والله الوقت مليان
شويه شويه خلينا الزمان
حمونا الرحاطه والكركار
وعملولنا شيتا خجلان
لبسه فوق للركبه
وجزمه ساق سنطه
وسريح شعر بدل المشاط
وكمان مدارس زى الرجال
ركوب فى البص وأكل لبان
و ياحليل زمان
وصداقه وزماله وقرقار
وضرب وعود ووقوف جمب الدكان
خلاص يا إنتو جاو
وياحليل زمان
أخوى بشير حتو أتحضر
نسى الشبريه وسكن فى الحيطان
حمموهو ولبسوهو حاجه غريبه
ملصوا منو الفاشرى
والطاقيه وقدم الحمام
وشالو سكينو والشملوخ
وشيلوهو أقلام
بعد أيام عمل ليه شارلى
وربليهو قجيجه وغير مشيتو
وفى الفريق حوام
عمل كلام عمل غرام
مع أسماء وسميه وسوسن وكمان سوزان
وبنت الجيران
دخول سينما ومعارض ومسارح
وكمان زيارة حدائق الحيوان
ويا حليل زمان
شويه شويه خلينا
بقينا نعمل فطور بدل فكة الريق
وجبات تلاته بدل الإتنين
وقعاد فى الكراسى بدل البنابر
وأكل كاسترد وشراب ليمون
لونا فتح وجسمنا طرا
ونومنا كتر وبالنا فاض من الزمان
ياحليل زمان
التحية لكم جميعاً

التحية لك ايها المبدع دوما ول نوية .

من طرف **nashi** 26th مارس 2010, 14:11

الاب:جيب القفة يا ولد!
الولد..جري علي "التكل" يحمل القفة من "الاضينات" بفرح ظاهر ويسلمها للاب.
الاب جيب العمه والمركوب.
جري - الولد علي الغرفة ويسلمه الاثنين.
ومرت سنوات علي هذا المنوال
في احد الايام بعد تكرار الاب لطلباته قال الابن لابيه:
"حليل زمن بتشيل القروش في الجيب وبتجيب الحاجات في القفة وعشنا وشفنا القروش بشيلوهن في القفة وبجيبوا الحاجات في الجيب" Sad

سالت دمعه علي خد الاب.وسرح بخياله في البعيد...!!!

القفة ..... تلك المسكينة كبرت وحل محلها الكيس ....
قفة الملاح .....؟ 310

شكرا دكتوره واخي الفاتح ...بس قفتك دي الفاتح سيوبر...
نحن عملنا نداء لاهل الصين يحدثونا عن زكرياتم مع القفة ...لم يستجيبوا حتي الان ...اصحي يابريش...

اخى زهير.طبعا انا ما من ناس الصين بس خليك منتظر زولك. تعرف يا زهير انا كنت اكتر واحد بيكون تعبان من موضوع القفة.كنت بطلع معى الوالد من حى المحلج للغاية ما نصل السوق بيكون سلم على الشارع كلو ذهاباً وإياباً؟ المهم القفة بتصك البيت الساعة 12ظهراً؟

شكرا اخي الفاضل ...الفاضل ..التحية من هنا لعمنا عبد الرازق الذي يبعث السرور والبهجة في نفس الناس ...لم اجده يوما غاضب ...لم اجده زعلان ...دائما الابتسامه لاتفارقة ...يسألك من احوالك واهلك ...وكل ناس البيت ...للامانة هو الانسان الوحيد الذي يعيد علي كل ابوجبيهه بدون فرز ...يتفقد كل الناس ...دائما تجده يزور المستشفي يتفقد كل المرضي ...
ربنا يمتعة بالصحة والعافية ...
بس ناس الصين من زمان كنا دايرين منهم المعلومة دي ...عملوا زايقين ...

من طرف **فلس** 27th مارس 2010, 15:28

والله يازهير لغاية انا ماجيت من السودان ماتركت القفة اطلاقا ,وكذلك بلاقي فرعون في الجزارة شايل قفته وكذلك عمر ابكر(ابا)يعني مواصلين مانسينا تراثنا لك التحية

التحيه عبركم للرجل الانسان عمنا عبد الرازق الحاج البشير.
(ازيّك يا وداخوى....كيف ابوك وكيف أمك واخوانك).

.....سؤال وجواب بأمانه.....

دكتوره احسان والحاج والفاضل هل منكم من أخذ ولو القليل من سماحة والدكم المحبوب؟

من طرف **nashi** 27th مارس 2010, 15:46

عوض اخوي سؤالك ماله صعب كدي مافي خيارات او اتصال بصديق؟!!!

يا حليلك يا ود اخوى كيف حالك ولدى والله اتصالك دا أسعدنى شديد خلاص.
اتصلت للتو على العم الفاضل/ عبد الرازق الحاج وشرحت له اننى ورّطت اولاده بسؤال وطلبو خيارات.
هذا هو ابوكم يا دكتوره نسأل الله يطيل فى عمره.
أخوكم وعمكم عبد الرازق الحاج يسلم على كل احباب المنتدى بدون فرز

شكراً أستاذى عوض السيد على اتصالك بالوالد. فهذا ديدنك الذى تعارفنا عليه؟ فلك منا أنبل الدعوات الصالحات؟أما بالنسبة لسؤالك فنتمنى أن نأخذ ولو القليل من أبائنا واخواننا الذين سبقونا؟فأنت واحد منهم؟

أشكرك يا راقى.........اتصلت على ابوك العزيز وكم تمنيت ان لا تنتهى المكالمه ولكننى وعدته بمعاودة الاتصال.
ربنا يطول ليكم فى عمره يا رب

أيضا نسأل الله الصحة والعافية للوالد الكريم ابراهيم عوض السيد.ولك أيضاً؟ ونسأل الله ان يديم المحبة والوئام بين أحباب المنتدى جميعاً..

عوض السيد .. زهير حسن ..الدكتورة..الفاضل... الظاهر قفة الملاح ذكرتنا بالآباء في مدينتا الحالمة... هم كنزنا الدائم ومرجعنا الأصيل ...بصراحة أول تتصل على أي منهم ويبدأ السلام , تحس إنو طلع من جواك ووقف قدامك وبسلم عليك ......
أول مكالمة لعمي ابراهيم عوض السيد , أيام كان مريض بالخرطوم( لا أراه الله مكروهاً )
أنا : ألو عم ابراهيم
عمي ابراهيم : كيف حالك ياولدي أنا كويس ومعاي خالتك هنا
أنا : حمد الله على السلامة عم ابراهيم..
عمي ابراهيم : أهلاً الفاتح انشاء الله بخير ,أولادك كويسين, أمس كان أخوي محمد التوم معاي في التلفون , أصلو "ميمي " عندو اجتماع في العباسية,, وكان معاهم ........
(((( مكالمة تبدو عادية )) بس السؤال : سمع صوتي آخر مرة في عزائي له في وفاةأخي المرحوم محمد أحمد( رحمه الله) وبدون تردد كان الرد بالإسم ((أنا متحير للآن ؟؟)) ..
أما عمنا عبدالرازق الحاج : فهو أمين الخزنة بالمؤسسةالتي تحوي مايفرح الموظفين ,,,, وهو خزنة لإنسان سوداني أصيل نبيل ,, بطاقة فرح ...تمشي بين موظفي وعمال المحلج...تبعته بقفتنا عدة مرات في حال سفر الوالد واول مكان نغشاهو (البيت الكبيروالسلام على الحاجة المرحومة بت السرة" رحمها الله بالجنة") ثم نخرج ونواصل للسوق.
عمي الأستاذ حسن السيد (رحمه الله وأسكنه جنات النعيم) كان يدلني على كتب المكتبة ...." رغم أنه لم يدرسني في أي مرحلة" وللآن أحتفظ بكتابين دلني وعندما أحضرتهما وقع عليهما( طبعاً كان التوقيع شئ غريب في الزمن داك) وكان ذلك بحضور عمنا الأستاذ أحمد آدم ( الان موجه في العباسية)
( يقيني إنهم جميعاً ,,هكذا لا تغيرهم الأيــام, ولا الأزمنة أو الأمكنة ,,رحم الله من رحل , وبارك الله في أيام وأعمار من بقى )
====== وصراحة القائمة طويلة ========= ونخليكم مع القفة..

الفاتح محمد التوم داؤود...... انت أحلى من محتويات القفه.....هل تدرى ذلك؟..... زهير أتى بالقفه وكل الفيها غير جاهز(للسفسفه).... فأتيت انت وبحضورك الوسيم وريقك البليل فطبخت لنا ما بداخل قفة الوجيه زهير فلبعنا ونقشنا ولهطنا وسفسفنا.....
انت مناره لهذا المنتدى يا صديقى العزيز

نحمد ربنا كثيرا على نعمه كلها وعلى نعمة المنتدي خاصة وقد جمعنا باهرام شامخة ومنارات علم ومدرسة حوت كل التخصصات
اللهم لك الحمد كله والشكر كله حتى ترضى ونسألك ان تالف بين قلوبنا وكما جمعتنا في هذا المنتدى ان تجمعنا في جنات النعيم ياسميع الدعاء

اميييييين يارب العالمين

.. تسلم ياعظيم ..

يعطيك ألف عافيه على روعة طرحك ..

لا عدمناك ..
أستاذي عوض السيد شكرا" جزيلا" جميلا" لك ولكل ما تخطه هنا في المنتدي .. والسماحة هي ديدنكم آل عوض السيد وانا كنت موجود عند إتصالك وأبلغني الوالد بذلك فأي سماحة اكثر من هذه التي في معيتك ..؟
طرح ولا أروع منه ..
أعجبني بالحيييييييييل وأستمتعت بقرأته ..

شكرا" لكم وماقصرتم ..

دمت كما أنت يازهير ...وتقبل مروري...
ولك تقديري وأحترامي ..

الحاج عبد الرازق...... أشكرك على كلماتك الجميله ولكن مع والدك نحن نرتاح حد الراحه..... هذا الرجل الذى حباه الله بالقبول لدى الجميع فهو بالنسبه أبا وعما واخا وصديقا أسأل الله ان يحفظه لكم ...... بس ما فيكم زول جاوب لى على سؤالى.
السؤال برضو موجّه لمحمد(الاش) وايمان وهدى

دكتوره احسان والحاج والفاضل هل منكم من أخذ ولو القليل من سماحة والدكم المحبوب؟
شكرا" للمرور وللإتكاءة في هذه النافذة مجددا" ..
سأجاوب علي السؤال بأمانة شديدة ..
في تقديري
السماحة - هي السهولة واللين والعفو والإغضاء.. والبذل والعطاء - لها أثر عظيم تنشأ به محبة القلوب .. ومودة النفوس .. وتثبت به لحمة الأخوة .. ويكون به صف المسلمين مترابطا" قويا" .. السماحة بين الأهل والأحباب .. السماحة بين المختلفين من الناس .. السماحة بين الأزواج والزوجات .. السماحة بين الأبناء والآباء والأمهات .. كم نحن في حاجة إلى كل ذلك .. والأمر هين سهل ليس فيه مشقة ولا صعوبة.. ولا حرج ولا عنت. إذ ما إن تمتلئ هذه القلوب بالصفاء والمودة حتى يكون أمر السماحة طبعا" لا تكلف .. ويكون سهلا" لا عسيرا" .. هذا هدي رسول الله صلى الله عليه وسلم.. فيما روى الإمام أحمد من حديث أبي هريرة عن رسول الله عليه الصلاة والسلام أنه قال : (الكلمة الطيبة صدقة) كم نحن في حاجة إلى أن نشيع هذه السماحة.. إبتسامة مشرقة.. وكلمة طيبة.. وعطاء عظيما" وعفوا" وإغضاء.. وتآلفا" للقلوب .. وترفقا" للنفوس .. عل الله عز وجل أن يعيد إلينا صفاء قلوبنا ومودة نفوسنا.. وصلة ما بيننا وأن يذهب عنا تجهم الحياة وهمها وغمها .. بما نحسن فيما بيننا من سماحة ويسر ولين وقرب .. إنه سبحانه وتعالى ولي ذلك والقادر عليه.
إذا" هذه هي السماحة .. فلكل منا شخصيته وفهمه ومنظاره للحياةيختلف من شخص لآخر .. إذا" السماحة موجودة مابيننا ولكن : أيضا" تختلف من شخص لآخر .. والكمال لله ..
مودتي

انت انسان فاهم يا حجّوج ويكفى انك سليل عائلة المرحوم الفكى الحاج البشير.
احترامى وحبى لك بلا حدود