طرائـــــــف ....ولطائـــــــف ....

أحبتي : اسمحوا لي ان احكي لكم نكتين فقط : الأولي عن الحشاشين ولو اني ما بحب نكت الحشاشين ...وإليكم الأولي :

** قالوا واحد محشش وجد جدو بياكل في تحلية جلي ... وشاف يد جدو بترجف والجلي بيرجف قال لجدوا لكين يا جدي ماجهجتوا المعلقة دي .....

** دي حقيقية بــأ :
تم قبول إبنتي عفراء بالصف الأول إبتدائي ... وجات قالت لي : عارف يا ابوي مدرستنا بتاعت العربي من الشماليه وهي جديده في التدريس ... وقالت لي الفصل جايط ... وهي بتصفق ليهم وبتقول ليهم ها ..اسكتو ان نقول لكم أنا بقول أ أسد وإنتو قولوا بقفاي ... قالت آ أسد ... والتلميذات قالوا بقفاي ....
محبتي ..

حلوه يا شاويش يا رائع
ويظهر انو محتاجين كذلك لمعلمات لبنانيات اضافة للنظام التعليمي اللبناني
وسلم لي علي لندن

يا بتاع اللطائف والقطائف إنت

عفراء دى طالعه بتاعت محن زى أبوها.
محشش يا ابوعلياء يفتح باب التلاجه ويقفلو ويعاين جوه التلاجه.... كرر الحركه دى كتير جدا.... جاء واحد شافو شغال يفتح ويقفل.... قال ليهو يازول انت جنيت كدا بتبوظ التلاجه...... قال ليهو(بس انا المحيرنى البفتح النور جوه دا منو)


..... قديمه.... قديمه يعنى أجيب ليك جديده من وين .........

انت لطيف ورائع ياابو علياء

اسمحوا لي بإضافة ثلاث نكات عن الشوايقه ...وبدون حساسية طبعاً ...ووأنا اعزهم وأقدرهم جداً ...يالله :


شايقيه قالت لي أمها : راجلي اتاخر خايفه يكون عرس علي
قالت ليها يابت اتفائلي خير يمكن طقشتو عربيه



**********************

شايقى عندو فرن جاهو شحات قال ليهو لى تلاته يوم ما ضقت طعم الرغيف قال ليهو ياهو زاتو ما اتغير

**********************

أدروب سألوا تمشي الجنة ولا النار قال ليهم الشوايقة ماشين وين ؟؟ قالوا ليهو ماشين النار قال خلاس بمشي معاهم النار يا ادروب الكلام ده كيييف بس؟؟ قال ليهم: الشوايقة ديل ما بمشوا حتة الا يكون فيها كّدة ولا منفعة

***********************

نكت ظريفة ياعم شاويش وحلوة زي ظرافتك كدة ؛ دوما اشراقاتك منورة والله ياعم شاويش عندما اتذكر نكتة قلتها لي قبل شهرين عن السوداني المغترب ونزل السودان وقال للناس السيارات بتاعتي دي كويسة استعمال الخليج والله عندما اتزكرها لمن ازرف الدمع من الضحك -طبعا بتكون عارف القصة كيف !!!
التحية والتقدير لك

ك

عمنا موسى شرتوق الله يرحمه وىغفر له بالجنه يا رب قال خلّ التمباك وبعد سبعه سنوات هو لسه (خرمان)

ربنا يرحم عمنا موسى شرتوق وعمنا خالد حنجاف تبدو على ملامحهم علامات الجدية والحسم.

ابو علياء خلى موضوع لندن رجع علي الشوايقة والادروب
اخوي هوي نحن مديرنا شايقي لمن يدور يصرف ليك ماهيتك لمن دموعه تسيل
تقوم تنخسو فينا يسقط حجرنا برانا عندنا منو مرض قلب

لما جيت السعودية جديد لنج ... وبعد العمرة ووصولي المدينةالمنورة ... ذهبت مباشرةً لكابينة التلفونات حوالي الساعة 8ص كي اتصل في اخي عوض جاويش وأقول ليه انا وصلت المدينة ...وكان التلفونات بالهلل (ريالات)كبائن... وحينما فتحت الخط بريال : سمعت صوت يقول لي : مكالمتك لا تتم حسب الطريقة التي إستعملتها ، فضلاً تأكد من الرقم الصحيح وشكرا... طوالي رديت قلت ليه والله انا آسف جدا ، لأني جديد ودي اول مره استعمل فيها التلفون دهـ ....تاريه ده الكمبيوتر مبرمج وكان برد على ... وما عرفت الشغلة دي إلا بعد قدمت شوية .... محبتي ..

وبارك لنا فيها !

دعاء بعض قادة الحكومات ... بعيداً عن السياسة ...

دعاء للحكومة :

واجعلها الوارث منا !

واجعل ثأرنا على شعبنا !

وانصرنا على من عارضنا !

ولا تجعل مصيبتنا في حُكمنا !

ولا تجعل راحة الشعب أكبر همنا ولا مبلغ عِلمنا !

ولا الانقلاب العسكري مصيرنا !

واجعل القصر الرئاسي هو دارنا ومستقرنا !

--------------------

اللهم إنا نسألك فترة ممتدة !

وهجمة مُرتدة !

والصبر على المعارضة !

والنصر على الشعب !

ونسألك الحُسن لكن لا نسألك الخاتمة أبداً !

اللهم ارزقنا معونة لا نسرق بعدها أبدا !

اللهم لا تفتح أبواب خزائننا لغيرنا !

اللهم أعطنا كلمة السر لحسابات الحكام السابقين لنا في بنوك سويسرا !

---------------------

اللهم وفق أمريكا لما فيه خيرنا !

اللهم اغفر لـــ ( اوباما ) فإنه لا يعلم أننا لا نعلم !

اللهم وفقه لما فيه 99% من أصوات الناخبين !

اللهم نجهِ من أي إعصار أو كارثة طبيعية لأننا سنلوص مع شعوبنا من غيره !



---------------------

اللهم ارزقنا حب أمريكا !

وحب من يُحب أمريكا !

وحب ما يُقربنا إلى حب أمريكا !

------------------

اللهم أمركني ولا تأفغني !

اللهم برطني ولا تصوملني !

اللهم فرنسني ولا تسودني !

اللهم ألمني ولا تؤلبني !

------------------

اللهم أني أبرأ إليك من الاستعانة في حكم شعبي بأحد !

ولا حتى بصديق، ولا برأي الجمهور !

اللهم أني أعوذ بك من كرسي يُخلع !

ومن شعب لا يُقمع !

ومن صحيفة لا تُمنع !

ومن خطاب لا يُسمع !

ومن مواطن لا يُخدع !

وأعوذ بك من أن أجلس على الكرسي ثم أقوم أو أ ُقام عنه !

--------------------

اللهم ثبتني على الكرسي تثبيتا !

و شتت المعارضة تشتيتا !

من كان منهم اتحاديا او شيوعيا !

ومن غيرهم من الامة او بعثيا

ولا تبق غيرنا أياً كان وحتي عفريتا !

اللهـم آآآآآآآآميييييييييـن

ده مشروع الدعاء والتضرع
نحن زمان كنا بقول امين ساي وماعرفين المواسير
ابو عفان انت بتصتاد دائما الحاجات الحلوة
شكرا يا عزيز

من انتاج عم شاويش

شكراً محمد ول نوية ... وميرسي طااارق كمبال ... لقد إستفدت منكم في الإنزال ... وقد تابعني إبني محمد بالتلفون خطوة بخطوة إلي ان قمت بإنزال موقف الكاميرا الخفية الطريف وبسلام ..بس الصوت اصبح شبه مدبلج ... ولكن الموضوع واضح ... ولكم تحياتي ومودتي بصفة خاصة ...وصدقوني محمد ول نويه معدنه أصيل وطويل البااال واسع الصدر ...وياليتني إقتبست صفاتك الحلوة الرائعة يا محمد ... محبتي ..

شكر لك انت حبيبنا شاويش انت علمت اجيال
ونتمنى لك المزيد
لوتعلمت مننا تنزيل الفيديو نحن تعلمنا منك الذوق والانسانية
شكرا لك يا كبير

مسابقة ... من سيربح المعجون .... والف مرحب بالحضور ...


وبرضـو عاوزيـن تصوتـوا فـي الإنتخابــــات


سيداتي سادتي نبدأ كالعادة بسؤال السرعة إذا بتريدو حضرو حالكم والسؤال بيقول :


رتب كلمات الأغنية التاليــــه : ( مني – عشان – مبسوط – أنا – الشريف – فني – بريد )

( بعد برهة ) : نشوف مع بعض أسرع المتسابقين الذين أجابو إجابة صحيحة وهو المتسابق ( صابر أيوب )يتجه المتسابق نحو المنصة يحاول أن يعتلي ذلك الكرسي ( العالي ) لكنه لا يستطيع فيساعده ( المصور ) !
مالك يا أستاذ صابر موش قادر تطلع على الكرسي ؟


والله الروماتيزم والرطوبة معقلني
طيب ايه ح تعمل إذا ربحت معنا المعجون
ح أبيعو طوااااااااالـي وأشتري ( ليا حبوب رطوبة )
إن شاء الله تربح وبنتمى ليك الفوز والنجاح

سيداتي سادتي مع المتسابق ( صابر أيوب ) والسؤال الأول ( تصفيق ) : -

السؤال الأول : اتعتبر مظهر من مظاهر الفساد التى تصيب المجتمعات


(1) عشوة
(2) نشوة
(3) رشوة
(4) حشوة

السؤال الثاني : بعد زيادة غرامات المرور الفورية يجب على المواطن أن :


(1) يشيل دفتر شيكاتو
(2) يشيل الفيزا كارد بتاعو
(3) يشيل هم
(4) يشيل شيلتو

السؤال الثالث : قررت الحكومة قيام مشروع إسكان للمواطن بمليار دولار لأنها إنتهت من :


(1) علاجو
(2) تعليمو
(3) توظيفو
(4) تفنيشو

السؤال الرابع : عندما تنطلق عربة إسعاف لتسعف مريضاً فإنها :


(1) تقتل أربعة وتصيب واحد ولا تسعف المريض
(2) تصيب واحد وتقتل أربعة ولا تسعف المريض
(3) تقتل أربعة وتصيب واحد وتسعف المريض
(4) تصيب واحد وتقتل أربعة وتسعف المريض

المتسابق طلب وسيلة مساعدة ... حذف إيجابتين ... تتبقى على الشاشة الإجابتان التاليتان :


(1) تقتل أربعة وتصيب واحد ولا تسعف المريض
(2) تصيب واحد وتقتل أربعة ولا تسعف المريض

السؤال الخامس : سبب زيادة عدد السيارات بالشوارع هو إزدياد العربات التي :


(1) تحمل لوحات حكومية
(2) تحمل لوحات إستثمار
(3) لا تحمل لوحات
(4) كل الإجابات أعلاه صحيحة

السؤال السادس : السبب فى إزدياد نسبة العنوسة هو عدم وجود :


(1) قروش
(2) رجال
(3) فرص عمل
(4) لا توجد مشكلة عنوسة من أساسو

السؤال السابع : ما هي العاصمة التي يوجد بها 5 دورات مياة عامة و 500 بنك :


(1) أمازونيا
(2) نفايات أباد
(3) حفرستان
(4) سكسونيا

السؤال الثامن : ما هي الشخصية التاريخية التي تأثر بها ( رجال المرور ) :


(1) فرعون
(2) الحجاج بن يوسف
(3) قراقوش
(4) دراكولا

السؤال التاسع : تنقطع الكهرباء في الصيف لأن :


(1) الكهرباء دي يا جماعة عاوزة ليها قروش كتيرة عشان تتصلح
(2) الكهرباء دي يا جماعي ما شـيء ضروري وكده
(3) المسؤولين لا يتضررون من إنقطاعها ( جنريترات ) وكده
(4) ح تتصلح بس إنتو طولو بااااااااااااالكم

المتسابق طلب الإتصال بصديق :


الـووو الـووو أستاذ عوض زغبير معاك ( جورج ) من برنامج من سيربح المعجون . . . معانا زميلك مزنوق في مساعدتك . . . معاك 30 ثانية مما يبتدي صديقك الكلام :

( بعد أن يقرأ له السؤال ) الحل الصحيح ياتو يا زغبير . . . بسرعي ياخـي
الإجابة هي البقول ح تتصلح بس إنتو طولو بالكم خمسين سنة تاني !

السؤال العاشر : الشيء الوحيد الذى تمنحه الحكومة مجانـاً للمواطن هو :


(1) الهواء الطلق
(2) الهواء الملوث
(3) الهواء السائل
(4) الهواء الصافي

أعزائى المشاهدين المتسابق بيقول الأسئلة بقت صعبة . . . طيب يا سيدي تنسحب وتربح ليك إتنين باكو معجون أبو خمسة صفقات ؟ وإلا تكمل وعندك وسيلتين مساعدتين لم تستخدمهم . . .

أسأل الجمهور . . .

يلا يا جمهور حضرو حالكم ( الأستاذ صابر ) في إنتظاركم ده محتاج ليهو حبوب ( رطوبة ) !

الجمهور بيقول إجابة غريبة جداً : 100% للإختيار الأول . . . 100% للإختيار الثاني . . . 100% للإختيار الثالث و100% للإختيار الرابع . . .

السؤال الحادي عشر : لماذا لا يوجد عاطل ولا عانس بين أبناء المسئولين :


(1) لأنهم سمحين
(2) لأنهم شطار
(3) لأنهم سمحين وشطار
(4) لأنهم شطار وسمحين

السؤال الثاني عشر : أي من رؤساء الأحزاب هؤلاء جلس أطول فترة رئيساً لحزبه :


(1) حسن الترابي
(2) الصدق المهدي
(3) محمد إبراهيم نقد
(4) محمدعثمان المرغني

السؤال الثالث عشر : الخصخصة وبيع مؤسسات الدولة من أجل :


(1) توفير سيولة
(2) توفير سمسرة
(3) توفير عمولة
(4) جات على البيع

الضيف طلب تغيير السؤال خايف من المشاكل . . . وعايز يربي أولادو . . . !


السؤال الرابع عشر البديل :

اللقب المناسب الذى يمنح لمن صار ( بليونيــراً ) في غفلة من الزمن هو :


(1) الوجية
(2) إبن السودان البار
(3) الكلس
(4) إبن السودان الضار

المتسابق مرتبك . . . ويريد أن يكتفي بذلك خصوصاً بعد إنتهاءالوسائل المساعدة ويفوز بدستتين معجون أسنان ماركة ( التلات صفقات ) . . . تصفيق حاد . . . تيييييييييييييييت . . . أنطلق ( البوري ) معلنـاً نهاية الحلقة



سيداتي سادتي الأسبوع القادم حلقة جديدة ومتسابقين جدد من برنامج ( من سيربح المعجون ) !

الأخ عثمان مع تحياتي

ابتكار رهيب والمبتر أرهب.
مبدع يا ابو علياء

مساهمه رائعه نقلتنا بها الى عالم العلماء والفلاسفه فاستمتعنا بما نأت به مخايلهم.
لك الشكر

واحد بنغلاديشي ... قضي سنين كثيرة بالسعودية ... واتقن اللغة العربية ..يعني كده ... وجاهو أخوه بنغلاديشي جديد... وجلس سته أشهر ولم يتعلم العربي ...وقام زهج فيه اخوه وقال ليه إنت ليش 6 شهر مافي تعليم عربي ... هذا سوداني يجي جديد واحد شهر بس بعدين كلو عربي هو معلوم ........ ( والله دنيا يا مهاذل ...محبتي )

بينى وبينك كلامو صح لأنو نحن السودانيين عربينا بالنسبه ليهم زى عربى جوبا

شكرا عوض السيد البوست ده مبالغه

أسماؤنا السودانية القديمة الأصيلة، كان من الصعب بل المستحيل بأن تأتي لها باسم دلع، فمهما بلغت براعتك فلا يمكنك أن تدلّع أسماء مثل: تيبر ، ترب ترب ، أبوهجاسة، كوكو الضبابي ، اللط ، بلة، تقجنا ، الدودو، أزرق ،الطريفي، أب جيبين، التجاني الخزين، عجبين، الزبير، أب كساوي، الصديق، فضل المولى، فتح الرحمن، عبد الجبار، البشير،عكاشة، الجنيد، تيراب، الريّح، الماحي، حمد النيل، حسب الله،حسب الرسول , جبارة الله، أب سقرة، البي كيفو، تميم الدار، جبر الدار، عمسيب الجاك، الجزولي باشكار , وغيرها..


عليْ النعمة تحاول تدلع أي واحد من الأسماء الفوق ديل إلا ضهرك كع ينكسر، لأنها أسماء قوية زي الخرسانة... أسماء مضببة ضد التدليع زي العكاكيز.. أسماء أهلنا زمان أسماء رجال وما في أي طريقة لتمييعها أو تدلعيها،


حتى النسوان عندنا كان أسماهن صلبة ومحتشمة، وتنافس أسماء الرجال! في قوتها وخشونتها، فنلقى أسماء مثل ست النفر، الساتر الله، أم حقين، البتول، سكينة، التاية، نفيسة، النخيل، أم زين، بت الجقمتها بت ابضراع ، فطومة ، التومة ، خديجه ، كاما ، كوشيه وغيرها، والواحدة حتى لو أهلها كانوا متحررين، بالكتير يسموها الصندلية، ومع ذلك ما تقدر تشوفها أو تشم ريحتها، النسوان كانن بنات خدور...


والراجل ذاتو بيكون معجب باسم أمو المحتشم وتلقاهو يحلف بيهو في الصغيرة والكبيرة فنسمع: أنا ولدك آآآ ام زين .. أنا ولدك آآآ البخيتة.. هسه أولاد الزمن ده يقولوا شنو ويحلفوا باسم منو.. معقول الواحد يقدر يقول: أنا ولدك يا عبق أو أنا ولدك يا رنا؟


أهلنا الكبار الزمان كانوا ما بعرفوا الني وكل شيء عندهم نجيض. الني بدوهوا النار..


عليْ الطلاق تنطق الاسم كده لما شعرة جلدك تكلّب، وتتنفخ وجضومك تتورّم من العجب والخيلاء بهذه الأسماء



أب كريق في اللجج


سدّر حبس الفجج


عاشميق حبل الوجج


أنا أخويا مقلام الحجج



أبشر آ جنا .. حررّم تبشر.. أبشر آ جنا التقدْ مركوبك..

مش زي أسماء الأيام دي، شدة الأسماء ما بقت مايعة تقررررّب تخت الاسم في التلاجة عشان يجمد ويبقى اسم رجال .

شوفوا الأسماء دي: وائل، وضاح، وحيد، وليد، وديع، ربيع، مازن، تامر، لؤي، راني، هاني، حمادة، طلال، مهند، وفائى, رامى , إيهاب وغيرها..

والأسماء دي رغم مياعتها لكن الناس برضو دلعوها، فحصل ليها ما يعرف في اللغة بتمييع المايع وهو محرّم لغوياً فسمعنا ب: هنو، ولي، مزوني، تموري، عموري، ندوري، أيموني، هنودي، هوبة وغيرها من الأسماء المايعة الما شادة حيلها...


وكذلك غناهم كان غناء رجال وأصواتهم كانت أصوات رجال،



كان المغني يغني الليل كلو بدون مايك وصوتو تلقاهو زي الجبخانة


يا ليل أبقالي شاهد على نار شوقي وجنوني **** ويا جميل يا مدلل *** وزهرة الروض الظليل ...

وناس زمان ديل حتى كعكهم كان كعك رجال.. تدخل الكعكة في خشمك كده لما يغلبك تلوكها وتقعد تقرقش فيها كُرُم كُرُم زي الخروف القاعد يصقع في الجرة. والآن جابوا لينا الكعك المايع بشتى أنواعو تدخل القطعة في خشمك تجي تلوكها تلقاها عملت (سواح) وما تعرف ! نفسك هل أكلتها ولا ما كانت في قسمتك..




نفس الشيء ده بينطبق على الولادة، زمان الواحدة تلد من خمسة لعشرة وكل سنة تساهم مع زوجها في مصاريف البيت بإنجاب طفل جديد، ومرات لو الظروف ساعدتها ممكن في نفس السنة تلد طفل وتشرع في وضع حجر الأساس لطفل جديد، ومرات الراجل زاتو من كترة الولادة، ما بعرف أسماء أولادو ومنو الأكبر ومنو الأصغر فيهم.. الراجل يسأل مرتو: إنتِ آآآ الزينة أسمعي إنتي كبير ضيف الله ولا كرم الله ؟ فتجيبه الزينة باستغراب: أجي يا راجل: شن جاب ضيف الله لكرم الله! أنا لما ولدت كرم الله ده، ضيف الله كان يا دوووب بيحبا، لكنهم الاتنين مولودين! في نفس السنة المات فيها خالي عبد الرحمن...



بنات الزمن ده الواحدة إلى أن يتخرج ولدها من KG2، حتى يقولوا ليك فلانة قاعدة تتوحّم.. وهو شن الوحم؟ الواحدة وحمها ذاتو مخالف وضد العادات والتقاليد.. تلقاها متوحمة ليها على تفاح لبناني أو زبيب إيراني أو عنب إيطالي أو مهند تركي، فيطلع ليها الولد مايع ومنعّم ،والواحدة أصلها ما بتراعي ظروف زوجها.. زمان حتى وحم حبوباتنا وأمهاتنا كان وحم رجال ووحم بسيط وسهل التنفيذ ، الواحدة تتوحم على أم بقبق فيقوم يطلع الولد لايوق وعبيط أو تتوحم على ويكاب مرس فيطلع الولد بتاع مرايس وشطوط! وكمونية .. نحن ناس بتعيش حياتها بالكمونيّة والنيّة السليمة... بختك يا عوض السيد!! وواحدة تتوحم بدراب العيش.. والولد يطلع أسود ودشن ... وشعرو قرقد ...



أهلنا الزمان كانوا متباشرين وحنينين، بكاهم شهر وعرسهم شهرين، والواحدة لما يموت راجلها من شدة الحزن والأسف والإخلاص، بدل أربعة شهور وعشرة يوم، تتحبس عليهو ثمانية شهور وعشرين يوم، لأنو أصلنا ما كنا بنعرف الشوية..

شهر العسلكانعندنا ثلاثة شهور، العريس يعديها في ضبّيح الخرفان ،


أولاد الزمن ده شهر العسل عندهم ما بزيد ليهو من أسبوع بالكتير0 ويلملم الشنط ويجيك راجع ...ويقول ليك خلاص ....!!!؟؟
هي شكيتك وخليتك ... شنو الخلاص ...
عليْ الجزيمة في الزمن المايع ده حتى شطتنا بقت مايعة وما بتحرق.. ونحن والله شعب لو ما حس بالشطة في جوفو تسوي تح تح، الأكل ما ينفعو. أنا ود التور البتنتّح ومن الشطة ما بقول أحححححح الزمن ده بقى زمن الكيتشاب والمايونيز، أما الشطة الخضراء وشطة القبانيت فزمنهم فات وغنايهم مات..


الناس هجرت المطاعم وبقوا مستعجلين وما عندهم وقت للقعاد عشان كده اتجهوا للكافتيريات، الأكل كلو بقى عبارة عن بوفتيك وطعمية وبرجر وما شابه، والناس بقوا زي المجانين تلقاهم ياكلوا ماشين ويتكلموا ماشين وكان قلت لزول سلام عليك لا بسمعك ولا برد عليك.. مشيت السودان في إجازه.. ما لقيت زول يتونس معاي وفي النهاية جيت راجع وشنطتي مليانة ونسة وشوق للناس الزمان...



وكلابنا برضها بقت مايعة وكسلانة ومسكينة وما بتهوهو في زول، الكلب تجي ماشي فوق ليهو ما يقول ليك هوْ، ولو بقى نشيط خلاص، يقوم ينبح فيك بتهــو ....هـــوة واحدة تاني ما يزيدها، كأنو عامل ليك مس كول.. مرة ناقشت مسألة عدم مبالاة كلاب اليوم مع واحد كلب، فقال لي: زمان كان بيطغى الحماس والانفعال على أدائنا ككلاب، وكنا بننبح في الفاضية والمليانة، لكننا لما شفنا الحكومة ما بتدفع لينا مواهي وحاولت تستملحنا، قلنا ما لنا ومال المشاكل والعباطة الفي الفارغ.. ونحن الآن في ظل نظام عالمي جديد ولن ننبح ببلاش لأنو في حاجة اسمها الملكية الفكرية وأصواتنا دي لازم تقيّم التقييم المناسب واللي عاوز ليهو (هوت دوق) يشوفوا بعيد مننا، نحن خلاص ودعنا عهد العباطة والتهور.
فقلت في نفسي: يا حليل زمان وأيام زمان.. لما الكلاب كانت بتسك الشفّع وتشرط هدومهم.. الآن نبيحها ذاتو بقى مشروط.. زمان تجي ماشي تلقى الكلب منتظرك في الطريق مليان جسارة وعنفوان ولسانو حالو يقول يا دنيا ما فيك إلا أنا، وكان راجل تعال بيجاااي... أما الآن فالكلاب بقى مغضوب عليها وضالة ومهمشة وبتعيش على حافة النسيان ولو نظمت نفسها كويس ممكن تدخل الغابة أو تقيم في فنادق وتعلن التمرد وتعمل

ليها حركة تمرد وممكن تسميها حركة تحرير الكلاب وتختصرها في كلمة (حتك)..





يا جماعة الكلام ده عيب في حقنا وما بصح في حق شعب عاش (علماً) بين الأمم .. والطلبه في المدارس بيقولوا لنشيد العلم ... نحمل النجدة .. وعالماً بين الأمم ...شئ عجيب ..ويا جماعة كفانا تمييع أسماء وتمييع كعك وتمييع وحم وتمييع قضايا وتمييع مياعة وخلونا نرجع لقديمنا ونخلي في البنسوي فيهو ده، الكلام ده بالحيل ما سمح في حقنا ..




ويا حليل الزمن الجميل ......

حليل زمن الصبا الماضى حليل زهر الحياة الزاهر
حليل زمن الحبيب راضى وحليل زمن الهوى الطاهر
حليلو الأبلج الباسم حليلو الكاحل الناير
حليل قمر السما القاسم لياليه وصبح داير
آه لو آه تفيد مجروح والمثل القديم ساير
رهاب ماحصلو الجاري وسماك ما حصلو الطاير
تجدنى مراقب أخبارك اذا النسمات بها تخابر
تجدني على الفراش مضنى وتجدنى على الأسى صابر
أنا البعدك أصون عهدك وليتك كنت بى خابر
وليتك مرة تذكرنى ولو في ذكرة الغابر







منقول ......ومعدل من شخصي الخفيف ..