ودعتـين

ودعتين
من مِفْرَق الشَعَر
الاصيل
زانت جبينِك
وتاوقَن.
ودعتين شَدَهُو
الجبين
ولاّ الجبين
شَدَه الوَدِع
نامن عليهو
وسَلّمن.
يا بنيَّه صحيتي
الشِعِر
فيكِ العيون
إتسَمَّرَن.
رجّعتي حال
وهجا هَمد
بيكِ البروق
اتلاصَفن.
ودقيتي باب
زمناً نعس
عَزَفَن صوابْعك
نقّرن
شَهَق الغَرب
فُرقان جبالو
اتمحّنَنْ
اتقسّم "المردوم"
لَهَج
بي اسمك المنضوم
رطن
هزَّ الطرب
شِدَر الوِدَي
كل الغضون اتْجَنَنَنْ.
ودعتين
عِشْقُو الجبين
بي خيط بهاهو
اتعلّقَن.
خَتّن رَحَل
شوقِن عليهو
اتمسَّحن واتبرَّكن.
طلّن على العينين
سِهَن فيهن
زمن واتمحنن.
ولا مِن شَرَق
ثَغْر الوجيه
بي بسمه
وابتهج الزمن
شهقن عديل
من دفقة الالق
الاصيل
واتقالدن واتمرجَحَن.
يا بنيه مَسَّختي
البنادر
الله قادِر
خَتَّ فيك
عَبَق الوطن.

....................................مع خالص الود.

لونية متفردة يا الفاتح
ديل ودعتين من عيار ثقيل

مشكور على المرور و التعليق .... ودعتك الله.

ودعتـين

ودعتـين

رد: ودعتـين

رد: ودعتـين