الذهب فى الحباك...جد لا تدع عقلك يذهب

صباح النضار..والتبر الفى التراب
احبابى..خلال الاسبوع المنصرم وحتى الآن ظهر الذهب حقيقة فى الحباك..فى منطقة الزلط المقدد شارع مريفعين وقد بدأت عمليات البحث عنه بواسطة الاهالى ثم توافد تجار الذهب باجهزتهم الكاشفة(Gold Detectors)الى المنطقة التى يقدر عدد من فيها اليوم باكثر من ستة الاف من تاجر وباحث وبايع ماكولات ومياه وانتعش السوق حيث استخرج المواطنون كميات معتيره وبلغ سعر الجرام من عيار(مريفعين) الخمسة والسبعون جنيها....ارتفع سعر الخضار فى المدينة حيث صار يرحل الى هناك وحتى ستات الشاى ارتحلن الى حيث الذهب..التجار بمبالغهم نقدا فى الموقع واى مواطن استخرج يشتروا منه فى محله وتصلح حال اسر كثيرة...ان شاء الله ازور الزلط المقدد خلال اليوم او غدا لآتيكم من سبأ بنبأ..دهبكم مريفعين..اقصد صباحكم زين

ياسلام يا دكتور ذكرتنا مريفعين كدي شيل بندقيتك واعمل ليك رحلة صيد عصرية للجداد ووافينا باالخبر اليقين

بشارتك سمحة د.الجنيد اخوي ونجهز لي تذكرة ونجي باقي بدور ادق لي "غبيشات"

يا فراج الكرب فرج على اهلنا الحلوين وافتح عليهم بركاتك وفجر الدهب ينابيع تحت اقدامهم
بشارة يا دكتور ربنا يبشرك بالخير
بنت ابوي دايره ليها غبيشات من مريفئين ولا مريفئيب قال لك اليومين ديل مريفعين الشعيريرة ما تديك الدرب

د.الجنيد لك التحية والود و طلتك دايما بهية
خلاص طلعنا من ابجبيهي وظهر فيها الدهب وكمان عيار مرفعين حظ فلس حلو ماشاء الله
اتوقعوا وصول كميات كبيرة من ابناء ابوجبيهه في المهاجر ومافي حاجه تمنعنا من الرجوع لانو بلدنا ظهر فيها الدحب من عيار مرفعين علي وزن بترول النيل

حبابكم
مرحب بيكم ياحيدر فى داركم...وما تنسى تجيب معاك شحنة(شماغات)اقصد عقالات الراس حقات العرب ديلك... لان الشغلة دى شايفها نجيضة..وبعدين يا دكتورة (غبيشات) شنو نحن تانى بنتكلم ب( السلكوك)..اشرح ياطارق...ويا فلس يا خوى قبال غربتك تطول ارجع لديارك اصلو قالو الزلط المقدد دا عروقو فى جنينتكم وخافسه لى عند فرعون...

(ان بعد العسر يسرا)
الله يبشّرك بالخير يا دكتور بس اكد لينا الخبر وكتّر لينا من ام جنقر

الفاتح اخوى انا ما فهم فى الدهب لكن كان عيار 2000 بيكون صحى...دى ما الحباك شغلاتها كلهن كبار كبار

والله يا دكتور الجنيد محنك محن
السلكوك كان الحاجة سمعت بيه اليوم تلقاها في مريفعين
قبال بكرة

يا خي هو دهب وبس إن شاء الله يكون عيار صفر والجهاز في أبوظبي حصل 12000 دولار من 4000 دولار

الاخ الحبيب د/ الجنيد
لك التحايا والود دهب مريفين حركنا وحنقلع من السعوديه ومعانا اجهزه بدل جهاز واحد والحشاش يملي شبكته
حسن الحاج البشير

والله يا جماعه الزول العندو جهاز فى اليوم بعمل على الاقل اثنين مليون ده الما محظوظ 00فى البعمل 10 وفى الاكثر من ذلك

شكرا دكتور الجنيد علي البشاره الحلوه...نحن تاني قاعدين في كادقلي نعمل شنوا من هناوعدل علي مريفعين...بس عيال جدنا النعيمة ..مايعملوا تزاكر للناس ...
يأتي الفرج من رب العالمين ...وكل ماضاقت فرجة...وهذه واحده من نعم الله علينا...يجب مقابلتها بالحمد والشكر...

د.الجنيد تغيب وتظهر بالنادر والمثير الخطر..يافلس انت رائع خاصة لما قلت صيد الجداد..
الخبر اكيد صحيح اذكر هناك قردود بين ابوجبيهه وكالوقى واحد جولوجى قال فى السبيعينات ان هذه المنطقة يعج باطنها بالنفيس الماتعيس..
بعدين اظن حان الوقت ورفع الجدار..وظهر الكنز ..وابوجبيهه يرقد باطنها صالحين
وَأَمَّا الْجِدَارُ فَكَانَ لِغُلامَيْنِ يَتِيمَيْنِ فِي الْمَدِينَةِ وَكَانَ تَحْتَهُ كَنْزٌ لَهُمَا وَكَانَ أَبُوهُمَا صَالِحاً فَأَرَادَ رَبُّكَ أَنْ يَبْلُغَا أَشُدَّهُمَا وَيَسْتَخْرِجَا كَنْزَهُمَا رَحْمَةً مِنْ رَبِّكَ وَمَا فَعَلْتُهُ عَنْ أَمْرِي ذَلِكَ تَأْوِيلُ مَا لَمْ تَسْطِعْ عَلَيْهِ صَبْراً) (الكهف:82)
ألا توافقونى تيتم الناس((على وزن تفعل الناس الناس بضم السين)) من القحط والجور

حبايبى الحلوين
صباح الخيرات.ونشكركم على التفاعل مع الدهب المجمر
امس _كما وعدتكم_ قمت بزيارة الى مناجم الذهب فى الزلط المقدد وقد هالنى ما رأيت من من اعداد بشرية هائلة شعث غبر كل حامل آلته يحفر الارض ويكشف التراب فى انتظار حامل الجهاز ليمر على مكانه ويكشف له.حسب اسنطلاعاتى فان عدد الاجهزة يفوق العشرين ومازال هناك اعداد منها فى الطريق..سألت صاحب جهاز عن متوسط الذهب الذى يستخرج فى اليوم فقال مابين ال80 الى 150 جراما غير المفاجآت بين الحين والاخر...مشيت زمنا طويا ولم استطع ان احدد نهاية الناس الذينين يبحثون...سوق مكتمل هناك ووابورات الانارة والاكل والبارد وشحن الموبايلات حيث توجد بالمنطقة شبكة زين...وبينما انا اسير اخذنى احدهم جانبا وقال لى(دا سر يا دكتور :قبل شوية جانا خبر انه مريفعين ذاتها اتلقى فيها دهب كثير جدا وهسع انحنا رحلنا التاية والجهاز الى هناك ولى بكره ببين خبر)انتهى حديث المنقب...الترحيل من والى المنطقة متيسر وصار لها موقف بابوجبيهة قرب منزل مولانا شايب بكر وصار صوت الكماسرة(الدهب الدهب الدهب) مالوفا..اسر كاملة من ابوجبيهة ترحل الصباح للتنقيب وتعود المساء واسر كثيرةمن كل السودان معسكرة هناك...الزيارة القادمة سوف اصطحب معى كاميرا ديجتال لاوثق لكم الحدث اكثر...حتى اهلنا الطيبين بقو يعرفو يفرقو بين جهاز الذهب الاصلى والجهاز (الماسورة) ...دهب والله..اقصد عجب والله

التحية لك اخي العزيز ابو احمد والله كنت مفتكر الموضوع( كمرة خفية) لكن طلع الموضوع جد عشان كده الشافنا قريب في الحباك ماكضب بس خايف ما نلقى لينا مكان بعدين يادكتور انتو القاعدين ليها شنو في السوق ما تمشو تلحقوا واكيد لو فتشنا جنب البطحة يمكن نلقى حاجات تانية والله كريم على عباده

مرحب ابو السارة ومرحبتين الدكتور حسن الحاج يا مختفى ..يعنى تظهر الا مع الدهب؟..كاميرا خفية دى ضحكتنى والله يا الفاتح... وبينى وبينك كلام عثمان موسى كان صحى والجدار انكشف الا نفتش من ابواب بيوتنا لى عند البطحة وات ماشى...لى كالوقى وات ماشى ..ويا(غرق يا جيت حازمها)

الكلام القالو الجنيد ده لكو تمام 00انا مشيت الدهب العصريه وتفاجأة بكل ابوجبييهه هناك لاقيت الجنيد وعبد الوهاب الطيب وعادل الزين وكثر من وجهاء الحباك 0000عووووووك يا ناس بره دايرين جهاز متطور

الجهاز بي كم يا غريق اخوي؟
ادنا معلومات......



-------------------------------------------------------------
خلي بالك موضوع الغبيشات ما تنسوه معاك د.الجنيد

جد دكتور جنيد قولوا للحبايب الشعث الغبر ..اكشفوا التبر فى القردود بين ابوجبيهه وكالوقى..بكره اللابدين يظهروا ..بس خايفيين نبقى فلسطنيين من جشع القادميين من كل فج بعيد..وشكرا ان ظهروا الاحباب الفاتح ابو سارة ود.حسن واغلب المتفاعليين الفى المهاجر..نسأل الله ان ترجع الحباك بتبرها لسيرتها الاولى ويكون التبر يزيين ذلك البساط الاخضر الممتد فى دواخلنا بلا حدود وتعود الطيور المهاجرة..يبقى فى العمر بقية ((نقالدهم))ودمتم عزتى.

التحية لك اخي العزيز عثمان موسى وشكرا على سؤالك عني والايام الفاتت كنت مشغول شوية وما مركز لكن زي ماقلت موضوع الدهب خلانا نصحصح شوية والجنيد وغريق عاملين دعاية كبيرة انا خايف الموضوع يكون ما نجيض ونقوم نتهور ونقدم استقالتنا ونعنى الحباك عديل. والله الواحد جد سعيد وان شاء ربنا يوسع على كل السودان وينعم علينا بنعمه الظاهرة والباطنة ونشوف بلدنا في احلى صورة وطبعا ابوجبيهة حتشتهر اكثر ويمكن كمان يستعجلوا لينا الطريق عشان تجار الدهب الجايين من الخرطوم . مع خالص ودي لكل الاحباب

والله الدهب دا قلّق بينا انا ماشي عديل كده

ياول كمبال شوف لي معاك تاية

غني وشكري يا خضرة الليمون
صنديد الرجال ما بتنقدر بالهون
يالحر المأصل يا دهب شيبون
يا ضو الرفاقة اللي عروض مأمون
سموك اللزوم القاطع المسموم
قضاي الغروض اللي الفقر صابون
************************************
غني وشكري وجيبي القول على البطراك
في الجاب الدهب ,رجح وزنو حاشا ماغشّــاك
بغني ليك يا الأصم لإيديكا ما فراك
قدّيت الجبال لميت الدهب , وقدلتا في الحباك

هوووووى الدهب بعدين ما تقولو ما وريناكم الجهاز يادكتوره من 25 الى 80 الامريكى ده بيصفر فى الدهب وبس وبوريك الكميه وعلى عمق كم 000وفى اجهزه تصفر فى اى معدن وهذه متعبه ومتخلفه لكن الغالى بغلاتو يضوقك حلاتو والرخيص بيى رخصتو يضوقك مقصتو 00ولا كيف

سلام احباب
والله الليلة جاءنى من لا اشك فى مصداقيته وهو يمتلك جهاز دهب ومعسكر عديل فى مريفعين..قال والله امبارح الساعة اتنين صباحا اولاد بجهاز على بعد مترين منه استخرجو كتلة دهب وزنت اكثر من نصف كيلو واخرين بنظفو فى دهب مالى ليه صحن متوسط...الزول دا ما بكضب والله....ياغريق يا خوى نتوكلو على هناك ولا شنو

سمعنا تحت .. تحت .. إنو الموضوع إشاعة

يا ابوالزهور تحت تحت دى..تبقى الامال تحت الانفاق مالها قرار..ربنا يكضب الشينة..