أملأ الأماكن الخالية «مع الحلول»!!!

ساخر سبيل

أملأ الأماكن الخالية «مع الحلول»

الفاتح يوسف جبرا

السؤال الأول : يحتاج الخريج إلى ......... كى يمكنه الزواج! 1- «16» سنة ضوئية 2- «24» سنة شمسية 3- «12» سنة قمرية.. 4- كل الإجابات أعلاه غير صحيحة..
- الإجابة: الإجابة الرابعة هى الصحيحة وهى أن كل الإجابات أعلاه غير صحيحة لأنو لو قلنا إنو الخريج ده لقى ليهو شغل وكان محظوظ والله يا استاذ عشروميت ألف سنة (ضوشمرية) ما يقدر يعمل فيها حاجه لأنو ماهيتو ما ح تكفيهو شاى ومواصلات وبعدين بالله قول قدر يعرس أها أولادو الح يجيبهم ديل ياكلو (نيم)!
السؤال الثانى : تمتلئ الشوارع بالعربات الفارهة التى كتب على لوحاتها كلمة ......... ! 1- إستنكار 2- إستحمار 3- إستغفال 4- إستثمار..
- الإجابة: أنا بفتكر الإجابة نمرة تلاته هى الإجابة الصحيحة.. البلد كووولها إتملت عربات من النوع ده ... أى زول جاء فتح ليهو محل (شاورما) وبيرقر وطعمية وعمل فيها مستثمر دخل ليهو كم عربية وهاك يا تسهيلات! بالله يا أستاذ هو هسه لو فى إستثمار حقيقى مش كان وفر ليهو فرص عمل للشباب العاطل ده؟
السؤال الثالث: تذهب الفنانات السودانيات إلى نيجيريا من أجل ......... .! 1- مشاهدة الآثار السياحية 2- مشاهدة الأفلام الروائية 3- مشاهدة العروض المسرحية 4- كل الإجابات غير صحيحة..
- الإجابة: الإجابة الصحيحة يا أستاذ هى الإجابة رقم أربعة الأخيرة دى عشان كل الخيارات الذكرتها دى غلت والفنانات ديل لمن يرجعوا ما بقولو شافو آثار سياحية ولا عروض مسرحية كوووولهن بيقولو شافو حاجه إسمها (الشريف) وهو (مبسوط) منهن! أها الشريف ده يطلع شنو؟ ومبسوط ليه؟ السؤال ده حقو تسألو للحكومة مش الحكومة بتعرف أى حاجة؟
السؤال الرابع: إن كان مرتبك يكفيك حتى نهاية الشهر فأنت بلا شك ......... .! 1- وزير 2- والي 3- حاوي 4- كل الإجابات صحيحة..
- الإجابة: كل الإجابات صحيحة يا أستاذ الوزراء والولاة المسئولين مرتباتهم بتكفيهم لحدت آخر الشهر والمواطن (الحاوى) كمان مرتبو بيكفيهو لحدت آخر الشهر هو لو ما كان (حاوى) بجد يمون مرتبو خمسميت جنيه ومؤجر بى خمسمية!
السؤال الخامس: أصبحت المستوصفات الخاصة أداة من أدوات الـ ......... .! 1- الجر2- الجزم 3- الرفع 4- النصب..
- الإجابة: الإجابات كووولها يا أستاذ صحيحة.. ناس المستوصفات الخاصة (يجرو) المريض بالإعلانات.. بروفيسور منو وبروفيسور منو واحدث جهاز لرسم الشنو و(يجزمو) للمريض إنو ح يلاقى رعاية طبية ما حصلت وإنهم لا محالة ح (يرفعو) عنو البلاء والمرض لكن المواطن فى الأخير يكتشف إنو ده (نصب) سااااكت..
السؤال السادس: رؤساء الأحزاب السودانية يجب أن يدخلوا إلى ......... .! 1- دار المسنين 2- دار العجزة 3- دار فلاح 4- موسوعة جينيس..
- الإجابة: دار فلاح دى ما أظن يدخلوها عشان ما عندهم وكت للغناء والكلام ده ومشغولين بمشاكل المواطنين وكمان دار المسنين والعجزة دى برضو ما أظن (مع إنهم مسنين وعواجيز) عشان الناس دى ما شاء الله قاعدة فى (الملك) بتاعا لكن (موسوعة جينيس) دى حقو يدخلوها بى أوسع أبوابا!! شغالين ستين سنة (ولسه) بس سياسة!!
السؤال السابع: تكون الساعة فى الخرطوم ......... إذا كانت الساعة فى (موسكو) الآن هى السابعة صباحاً: 1- الثالثة صباحاً 1- الواحدة ظهراً 2- العاشرة مساء 3- جميع الإجابات غير صحيحة..
- الإجابة: الإجابة رقم أربعة هى الإجابة الصحيحة وهى أن جميع الإجابات غير صحيحة فعندما تكون الساعة هى السابعة صباحاً فى موسكو يا أستاذ تكون الساعة فى الخرطوم هى السادسة صباحاً بتوقيت (السودان) المحلى وهى الساعة التاسعة بتوقيت (قرينتش) أى الساعة السابعة بتوقيت (الإنقاذ) والبكور!
السؤال الثامن: أقصر الطرق إلى الموت هى الذهاب إلى ......... .! 1- المستشفى 2- الإسبتالية 3- المستوصف 4- كل الإجابات صحيحة..
- الإجابة: أكيد يا أستاذ كل الإجابات صحيحة.. هو كان كل الإجابات ما صحيحة الناس دى كانت (كسرت) على الأردن زى المطرة الأعمى شايل المكسر ما كان قعدت إتعالجت هنا ومشت (أحمد شرفى)!
السؤال التاسع: الساكت عن الحق شيطان ......... .! 1- أحمق 2- أطرش 3- أخرس 4- عاوز يعيش..
- الإجابة: الإجابة الصحيحة هى نمرة أربعة.. الساكت عن الحق (زول شيطان) وعاوز يعيش مالو ومال التلتلة والبهدلة أفرض قال (الحق) يعنى ح يعملو ليهو (تمثال) ما (عاهه مستديمة)!
السؤال العاشر: أكثر لفظ يستخدمه الموظف هو ......... .! 1- تعال بكرة 2- ماشين الفطور 3- ورقك ناقص 4- ماشين الصلاة..
- الإجابة: أفتكر إنو كل الإجابات خطأ هو الموظف فاضى من الكلام فى الموبايل عشان يتكلم مع المواطن يا استاذ الظاهر إنك ما قاعد تمشى مكاتب حكومية!
السؤال الحادي عشر: أسرع الطرق للثراء هى أن ......... .! 1- تشتغل كمعالج بالأعشاب 2- تعمل معالج بالقرآن 3- تشتغل كمعالج بالإبر الصينية 4- تشتغل موظف في المحلية..
- الإجابة: السؤال ده يا أستاذ خارج المقرر!

الرأي العام

آمين محمد اخوي وسماع الآخر اكيد يصب في خانة الحل والحلل للان الحقيقة مقسمة بين الناس فمن المستحيلات تكون كلها عند شخص واحد والبقية صفر إنها حكمة الله في الارض ...انها كما الارزاق مقسمة بين العباد .
نعم اا الفاتح اخوي مع الاخذ بالاسباب.
مشكورين كتير