رسالة .... مفتوحة للجميع ....

التاريخ : 21/04/2010م .

الأربـــعـــــاء



أسرة منتدى أحباب أبوجبيهة ..... المحترمين ،،،

إدراة المنتدي ..... الموقرة ،،،



السلام عليكم ورحمة الله وبركاته.



وبعد :



أفيدكم بأني بعد أسبوعين بإذن الله تعالي ، سوف أسافر في إجازتي السنوية للسودان ...وربما لا أتمكن في السودان أن أتابع معكم بصورة لصيقة دائمة ...فأرجو أن تختاروا ما ترونه مناسباً ... للإشراف على تاريخ أبوجبيهة ...وقد سبق أن رشحت صديقي : عثمان موسي ...فلكم خيار الإختيار ... وأرجو أن تسامحوني من أخطاء إن وجدت ... ومن قصور ...إن كان ...خلال فترة إشرافي على عمود تاريخ أبوجبيهة ... والكمال لله عز وجل .... ولكم محبتي ... عصــمان

نتمنا الله ان تكون اجازه سعيده تستطيع ان تدخل من فتره لفتره والخدمة متوفره وان حصل شئ سوف نتواصل معك عبر الهاتف ونقوم بالمعالجه بعد اذنك طبعا

(شقيش قول لى يامروح)...ان شاء الله الحباك عندها من اجازتك نصيب؟..تكون ابجبيهى نورت..وبهرجت...وطمبرت...وزغردت...ومن اسع ليك على فى الحباك تواصلك عبر النت على انا(اللابتوب وال mDSL)من حسى مفرغين ليك تماما....بس كيف تكون جايينا...
لكم الود...ولك الاحترام والتقدير اخى ياسر لما قدمته لنا من خدمه جليله يسرت التواصل للاحباب..فى ميزان حسناتك ان شاء الله

تصحبك السلامة ياعم شاويش وانشاء الله اجازة سعيدة بين الاهل والاحباب ؛بنقدمك وانشاء الله بنحصلك قريب افتح لينا الشارع بس نحنا جايين جايين انشاء الله
مودتي

أخي ياسر ...شكراً لك كتير ...وتعرف أنت جامع هذا الشمل ...وربنا يحفظك لنا يارب ويخليك لينا دوماً..ايها الراسي العاقل الرزين .... وتحياتي موصولة للأخ والعزيز الغالي أبوالزهور ولا ننسي مجهوده الجبار والذي لا يقدر بثمن فله التحية ...دكتور الجنيد الوفي المخلص الكريم الشهم ...غمرتنا بمودتك وكرمك فلك التحية يا كبير ...ولدي الغالي ول نوية ...شكراً لك ... أنت الذوق وأنت الطيبة والعفة في كل زمان ومكان ...وأسأل الله ان نلتقي بالسودان ...ويارب ..وبس لو عملتها حأزعل منك ... ولو جبت كمان معاك الخضار حأزعل بالجد ...لك محبتي أيهاالشامخ ...أخي ياسر ...شكراً لك على ثقتك الغالية والتي أخجلتموني بها ... وأخشي أن ينام البوست ...ولو أني عارف في رجال ورايا ومن الوزن التقيل ...وحريم كمان ...من العيار التقيل ..وماشاء الله تبارك الله ...ولكل أسرة المنتدي تحياتي وحبي وسلامي ..وفي ظرف خاص .... محبتي

والله يا عمو عثمان الله يصبرنا ساااااااكت
وامنياتنا ليك بامتع وارقي واجمل واحلي اجازه وبشريات الاماني هذي واضحة من تلميحات الاخ الدكتور الجنيد حفظكم الله جميعاً
وسلم لي علي المحلج
وما تطول الغيبة

لكم تحياتي بقدر إحترامي وكلوا واصل ...يعني سوف أنفذ جميع الطلبات ...ولكم شكري على مداخلاتكم الرائعة بطعم المنقة ...محبتي

نتمنى لك يا ابوعلياء اجازه ممتعه بين الاهل والاسره

نتمني لك اجازة سعيدة بين الاهل والاحباب...امين

نتمنى لك إقامة دائمة أخى عثمان فى السودان وكفاية غربة والسودان واسع والرزق كبير والشغل رأأأأأأأأأأأقد بس انت كيف تصل وتقرر الأقامة الدائمة وبالنسبة دى دعوة لكل الأخوة فى بلاد المهجر والعرض دا مستمر حتى بداية تشكيل الحكومة الجديدة وبعد داك فى كلام تانى وفرص محدودة ولاشنو رايكم ياجماعة فى طمع اكبر من كدا نحن عاوزين عثمان وكل العقد الفريد القاعد فى الخارج وجهده وخيرو كلوا لناس بره والله السودان محتاج لكم جمعيا وماتسمعوا الكلام الفارغ بتاع بعض الناس ويقولوا ليك احسن ليك بره وكدا وإذا كان بره كويس ليه الزول القاعد جوه يقول ليك خليك بره دا سوال عاوز اجابة من ناس بكره لانو انا ماعشت بكره ولكم منا الحب والتقدير ونحن فى الأنتظار يابوعفان وعرض د. الجنيد منتظرك فى الحباك بس أنا عرضى جاهز من دخولك حدود السودان عبر الخرطوم ولو جيت عبر بورسودان أمين جاهز ليك بس انت قول بسم الله وتوكل على الحى الدائم حبيبى

والله العظيم ...والله العظيم لقد بكيت كثيراً وزرفت الدمع غزيراً ولا زال ...بس أرجو أن أقول السودان لا زال بخير ... وفيها الخيرة ...والوفاء والأوفياء ...شكراً لكم أحبتي شكراً لكم ..وقدأثلجتم صدري ..ولكم محبتي ...

شكراً ايها الرائع ...ولك محبتي ...

لكم التحية جميعاًوالأشواق .... أمابالنسبة لسفري سوف أسافر طيران إن شاء الله ...وقد حجزت وأشرت وعملت التذاكر ... ولكم محبتي بطعم المنقة ...والله العظيم لقد ابكيتموني كثيراً .....والتحايا موصولة لجنابو أمين ..وشكراً لك أيها الشهم...وأعرف الكرم الحاتمي من صفاتك المميزة... محبتي

انحنا فى إنتظار الطيور المهاجره


الطير المهاجر
صلاح أحمد ابراهيم

غريب وحيد في غربتو
حيران يكفكف دمعتو
حزنان يغالب لوعتو
ويتمنى بس لي أوبتو
طال بيه الحنين
فاض بيه الشجن
واقف يردد .. من زمن

بالله ياالطير المهاجر للوطن
زمن الخريف
تطير باسراع.......ما تضيع زمن
أوعك تقيف
وتواصل الليلة للصباح
.تحت المطر...وسط الرياح
وكان تعب منك جناح في السرعة زيد
في بلادنا بترتاح
ضل الدليب أريح سكن

فوت بلاد وسيب بلاد..وإن جيت بلاد
وتلقى فيها النيل..بيلمع في الظلام
زي سيف مجوهر
بالنجوم من غير نظام
تنزل هناك وتحيي
ياطير باحترام
وتقول سلام
وتعيد سلام


على ..
نيل بلادنا
وشباب بلادنا
ونخيل بلادنا
بالله يا طير
قبل ما تشرب
تمر على بيت صغير
من بابه ومن شباكه
بلمع الف نور
وتلقى الحبيبة بتشتغل
منديل حرير
لحبيب بعيد
تقيف لديها
وتبوس إيديها
وانقل إليها وفاي ليها
وحبي الأكيد

يا اخوانا ما عارفننا قاعدين علي الهبشه والمتسبل تبكي............................
تصل وتجي بالسلامه عمو عثمان

شكرا يا ول نويه يا غالى على هذا الزوق الرفيع

أحبتي الدكتورة ....غريق ... ول نوية ....وكل أسرة المنتدي العملاقة دون فرز ...لكم إعزازي وإحترامي ... بس أسال الله أن يقدرني على جزاكم وشكراً لكم على إبداعاتكم ومشاركاتكم ومروركم الجميل أيها الأشاويس ...محبتي ...

وكان تعب منك جناح في السرعة زيد
في بلادنا بترتاح
ضل الدليب أريح سكن
والحباك اريح سكن ولكن؟واحسرتاه:
اخوي غريق مجرب الغربة وزي مابيقولوا اسال مجرب عشان كده بيعرف يختارالحاجات البتطعن في مكان الصبر ليه كده ياغريق؟
كان صلاح مولع بحب السودان كما الطيب صالح وكلاهما مات بحسرته بعيدا عن السودان.
اسال الله ان لا نموت بحسرة الحنين الي الاوطان.

ربنا يباعد بين أيامكم أحبتى ويرد غربتكم لنا سالمين غانمين وطبعا العمر محدود مافى طريقة لزيادة العمر عشان كدا نسأل المولى أن يباعد بين أيامنا ودمتم لنا أحبه ووطن يسع الجميع

يا رايعين يا حيدر وشاويش وبقية الطيور المهاجره من جده الى الصين نسأل رب العالمين ان يرجعكم للسودان غانمين سالمين الهم آمين

تجوا عايدين ...بالسلامة ان شاء الله ...وياريت كل الطيور المهاجره ...ترجع للوطن ...وخاصة اخيتنا (الدكتوره)...(ملجرسا حار شايفا)
تحياتي ...

ومرحبتين حباب بالزول الظريف ابو دم خفيف وتعال لي عيونا بتشيك

والحي مصيره يلاقي ......
وعقبال ما نسمع بقدوم البقية (الناس شرّادة وورّادة ياناس حيدر وول نوية)

عقباااااااالكم

اخوي محمد الامين لك التحية والمحبة وانشاء الله قريبا وووب معاك في بورتسودان وكتر لينا من السلاد جايين سعرانين
احر التعازي في وفاة ابونا الشيخ هاشم

سلام يا رواد البوست
اها عمو بسافر يوم كم؟
لكم التحية جميعاً

حبابك عشرة اخى عثمان راجنك لموار مريفعيم