شفنا الديك الأمه نملة

مهداة لود نوية وعوض السيد

شفنا الديك الأمه نملة
رأيناه في شكل قملة
سمين وأمين في شكل بنبر
مريخابي لونه بمبي أحمر
هزمناه ديكو فرفر
سادومبا فنجط للريكة شنقل
**********
شفنا الديك اللونه أحمر
رأيناها في عهد أدقر
خانقة اليك والديك يفرفر
أكلوه ني ريشه كركر
فضيحة عنيفة برز مفلفل
هضومه في مايو حلو مر محرحر
**************
شفنا الديك معاه كبنقا
من جبل لادو دخانة منقة
ساطلة الديك والديك يكاكي
لابس أحمر قايلو كاكي
تلاته من رادس بقى الديك مفنقل
**********

اتحاد الفنانيين (1)(منقول)ضفاري



طبعاً عارف شفقتكم، طوالي من قريتو العنوان الفوق دا افتكرتو إني قاصد اتحاد الفنانيين بتاع ناس محمد وردي، ومحمد الأمين، وعبدالقادر سالم، وأبوعركي وحمد الريح..الخ.. وكالعادة طبعاً تفكيركم طلع غلط، لأنو اتحاد الفنانيين الح نحكي ليكم بيه الليلة تابع للفلاعنة، وهو دار خاص بالناس البفنو الحجار، مش طوالي تلقى واحد يقول للتاني ما (تفني) بالحجر، وللا تلقى ليك زول يقول ليك فنيت ليك الكلب بي حجر لمن عرف حاجة، أها الناس البفنو ديل عندهم دار اسمو دار الفنانيين، والمفرد بتاعها (فنان)، عشان تعرفوا الفلاعنة ديل منظمين كيف، أي حاجة بسوها بي نظام ضرب الطابق التاني بالاقدام عندهم بي نظام، الفليق بي نظام، يعني ما أي زول يمشي يدخل الاستاد وطوالي يبقى (فنان)، يعني عشان تصل مرحلة الـ(فن) دي لازم تمر بي كم اختبار لو لقوك زول اشتر يدخلوك مدرسة بتاعة تفليق يعلموك كيف تفلق، بعد داك يودوك دورة تدريبية مدتها خمسة واربعين يوم.. انتو بي مناسبة الخمسة وأربعين يوم دي مافي خبر من الحوض، الفلاعنة ديل نسونا نتم ليكم الحصل في قصة (أهل الحَوّض)، دي كمان جريدة اطناشر صفحة ما بتشيلها، لكن بتمها ليكم، بس النخلص الحلقات بتاعة الفلاعنة دي ونرجع ليكم في قصة (أهل الحَوّض)، المهم في الدورة التدريبية دي بعملوك كيف تفلق بالحصحاص طبعاً لأنك جديد، وفي بداية الدورة دي بعملوا ليك امتحان تحديد مستوى، يشوفك انت فلقت لحدي وين، لو لقوك منتهي ببدوا معاك من الدراب، بعد داك الحصحاص، بعديه الطوب الأحمر، بعديه الطوب الحراري، والبلوك، وفي نهاية الدورة بدوك (قارورة) معترف بها ممكن تمشي تثقها في الخارجية.. المهم عشان الموضوع ما يطول والناس وراها صلاة جمعة، أمس كنت محتاج لي لي (فنان) بتاع حيرة كدا عشان عندنا حيطة كدا قلت يجي (يفرتقها) لينا، فمشيت دار الفنانيين، دخلت الاستقبال بتاعهم فيه اتنين موظفين خاتين ليهم قارورتين ووراهم صورة كبيييرة في الحيطة لي واحد شايل ليه صخرة و(فانيها) وفوق كاتبين أهلاً بكم في دار الفنانيين.. سلمت على الموظف وطوالي دخلت ليه في الموضوع.. قلت الواحد يطول معاه في الكلام يطلع اخلاقو ضيقة يقوم (يفننا) بي القارورة القدامو دي.. فبعد السلام طوالي قلت ليه:

=الحقيقة أنا محتاج لي (فنان)!!.

-عاوز تفرتق شنو انت.. كورة؟!

=لا.. ابداً

-حفلة..

=لا ابداً أنا عاوز افرتق حيطة؟!

=جداً.. ادينا بطاقتك.. وامشي المكتب رقم اربعة.. تلقى واحد هناك بديك استمارة تملاها وتمشي تحضر البروفات عشان تختار الـ(فنان) البعجبك!!.

مشيت طوالي عملت الاجراءات ودفعت الرسوم، ومشيت عشان أشوف البروفات.. اصلهم الأيام دي بستعدوا للكونفيدرالية والممتاز، عشان كدا بعملوا في (بروفات) تقيلة، والراجل الاداني الاستمارة النصيحة ما قصر قال لي انحنا الأيام دي عاملين ديسكاون كبير عشان الفرتقة دي بتكون لينا خيراعداد لدور الترضية، وبتخلينا نعالج الاخطاء أول بي أول!!.

أول حتة دخلت فيها كان الراجل عامل بروفة وبقول:

سواه الصفوة بي ساق لحم الجداد الني..

وفعل المشجع وقت يتخدر يفلق ما يفضل شيء!!

ده كان حجرك وقت (فنيتو) شفت الدنيا دارت بي!!

وقت اكلتك ارعبت البعثة.. من حارس المرمى لي ناس لؤي!!

ومن الساعة ديك يا الصفوة.. قام شبعني اللحم الني!!

نتفت الريش ما شافـــــــوها.. ناس الشي!!

وقلت الجكنة عاد إن شاء الله .. ما يدعن فراريجا علـــي!!

دم الديك منو المصاهو غيري ..وزاد عليهو شوي!!

وفلق بي حجارو هناك.. وفنن بي قوارير الري!!

شقيت في الاستاد ريسين ناس.. ومديت للجداد أيـــــــدي!!

وسنيت سني فوق الديك.. عشان (افراس)!!

بدور أشوي الجدادات شــي!!

صعيب وصفك لأنك جدادة ..اكلك ني!!

وفوقك (بيضة) وأجمــل (عضة) ولحمك ني!!

دمك في القوارير معدوم.. ريشك ما كحل عينــــي!!

أمضغي واجدعي الحصحاصة.. وفلقي في الترجي سمح الزي!!

أمضغي هي امضغي وفلقي في الترجي سمح الزي!!

الراجل كان كل ما يقول امضغي تلقاني ارجع لي ورا، الراجل الماري معاي قال لي:

=أها نديك الزول دا؟!

-لا ياخي دا ما بنفع معاي.. انحنا عاوزين نفرتق حيطة مش كورة.. شوف لي واحد كدا يكون معقول!!

=جداً.. ارح نوريك التاني البعمل في البروفة في الغرفة اتنين..

مشينا الغرفة اتنين لقينا البروفة شغالة والراجل قاعد يقول:

بعد إيه جيت (تفلقني) بعد إيه..

بعد ما ودرت (مستواي) الكنت فيه..

ليه جيت تشكي .. ليه جيتا تحكي ليّا ليه

(تفليعك) ما بفيدك..و(قواريرك) ما بتعيدك

*****

أنا فلقتك بحجري في زمانك

يا ما (ورغنتك).. وكان كلو عشانك

كان جزاى منك دور الترضية.. و(هوانك)..

أنا أستاهل وضعتك في مكاناً ما مكانك

روح.. البشجع الوصيف ما ببكوا عليه

ضربنا الطابق التاني بالاقدام يا حليلك .. والمجموعات طلعوها غيرك

*******

وكلْ مناي كان تطلع من الموسم باكتر من (رقيصك)..

يا (التمهيدي) و(الضل) مصيرك..

أصلي عهد (النفرة) ما اتنكرت لى..

***

فلقوك.. شتموك ..ودروك.. ورغنوك..

إنت ما بتعرف قارورتك من قارورة اخوك..

استغلوا الماسورة الفي نصك..

وبى انو هداف البطولة الافريقية خدعوك..

الله ياخد ليك (قروشك) ويجازي (الورغنوك)

(انرموك).. و(كنفدرلوك).. انت ما بتعرف صليحك من عدوك..

استغلو الماسورة الفي كشفك، وبي العوازل خدعوووووك..

الله ياخد ليك حقوقك ويجازي الـ(ورغنووووك).

(طبقنوك).. و(نفرنوك).. انت ما بتعرف اسمنتي (كيسك) من كيس اخوك.

استغلو اضاءة الفيفا وجابوا كمية من الشركات و(رعوووووك).

(طيشوك).. (وصفوك).. انت ما بتعرف صليحك من عدوك!!

وقدام الترجي (وضعووووووووك)!!

******.

استغلوا إنو إعلامك سالب وفي الـ(M.B.C) يا كاربوني (ذاعوووووك)!!

وما جابوا ليك خبر يا إعلام يا سالب و(همشوووووك)!!

(سلبنوك).. (خدروك).. الله ياخد ليك حقوقك ويجازي (الكنفدرلوووووك)!!.

استغلوا جبل الرقيص الفي حراسة المرمى وبي الأقوان (تلتووووك)!!

وبي البيضة ناس بوعزة بي رصاصة الرحمة (طخووووووك)!!

وقدام اربعين الف (مفلق) يا وصيف للكونفيدرالية (دحرجووووك)!!

(تلتوك).. (سبعوك).. وناس الدراجي (طيروك)!!

ويا ترجي يا تونسي نعتذر بالنيابة عن الـ(فلقووووك)!!

الأكلو ليك الجداد الني في المطار وافتكروا انهم (ارعبوووووك)!!

الضربو طابق شاخور بي رجلينهم وبالقوارير والحجارة (ردموووووك)!!

الحرقو اطنان الجرايد والطيرو حمامة في الميدان عشان (يكجروووووك)!!

قبل ما نتم البروفة الراجل الحايم معاي قال لي:

-الزول ما بفرتق ليك حيطة، دا متأثر بالهزيمة!!

=الراجل دا شكلو من المعارضة؟!

من ما قلت ليه كدا اداني الوش التاني

(باكر نواصل من غير مشاكل.. جاو)!!

والله يا اخونا فلس (ولو كانت فى جائزة نوبل للفلاعنة) كنت اديتها ليك انت(اجمل مقال لهذا الشهر )مين يثنى

دي الفالحين فيها بس الجماعة (نقل الكليمات دا) حقت ناس رمضان المرض المحليين وغطس حجرهم بكضبو ونفخو لناس سيدا ؛ يافلس الزول الكتب الكلام دا مايكتب عن جلدة الاسماعيلي ليكم ؛ عشان تصححو اخطاكم ؛بالله دي مافضيحة يدفنوكم جوة المقبرة وخارجها وفريق اكتر من عادي

كابتن ودنويه(يااخى انتو تونسه ديل مابرضو جلدوكم مالو ناس مزمل ماقالوا الحقيقة/والله غير مزمل دا مافى حاجة لحقتكم امات طه(الكلام بعدين اولاد عطبرة **اوع من حجارة**ويارب------

أبوشوك الجماعة عندنا في كردفان بسموه (كبش النبي) أما الديك الفطيسة ناس الكفوة بلعوه كيف وإنت نسيت تسعة سان جورج ولا سبعة الوحدات أما الكأس الجبته من الإمارات الناس جابوا زيه وبالمناسبة تصنيف الفيفا والكاف ما وجع قلبكم ... وبعدين المشاكل بدأ بيها عوض السيد وخلاك لحالك وزاغ زوغة مرتضى عبدالعظيم من يوم دلادل سادومبا وبرشة كروووومي ما شفته تاني أخشى أن يكون الديك الني جاب ليه أنفلونزة طيور ولا أيه يادكتور.

طيب وين خمسة مازمبي وسداسية الترجي واواوا الكتيرة ديييك

يا ود نوية
هل ال 6=9 ولا ال 5=7 بعدين حكاية الديك شايفك بتبورح منها جاي وجاي معقول ناس الكفوة بعد الهنبته بقوا دجالين والله في حي الكرنتينة ما سمعنا بجنس دا استقبال شعبي ورسمي بمطار الخرطوم الليلة مع الأمل دا ضابحين شنو ؟؟ متنسونا من الكبد حتى لو الضبحة كيري عند أخوي دكتور بطري بوريني أكان فيه أنفلونزا حمير غايتو حكايتكم حكاية بكرة نسمع من الصفوة لبن الباعوضة العوراء وسمن الضبانة العمياء بعد لحم الديك الني

انا كفيت سفنجتي اللبنية

واخبار الكركاب الضبحتوه في المطار .

يااختي اكفي السفنجة والعروسة (ام زمام) الزمان دييك وقولي تُفْ تُفْ انشاء الله حامييّ

كفيتها بس الله يستر