ضيف الأسبوع

اخوتى وأخواتى الأعزاء أحباب منتدى ابوجبيهه......
أولا أتوجه باعتذارى للجميع لعدم ظهور هذه النافذه لفتره ليست بالقليله لا لسبب سوى انشغالى بزحمة العمل طوال الفتره الماضيه.
واسمحوا لى أيضا أن أشكر كل الذين ثمّنوا هذه النافذه وطالبوا بعودتها وعلى رأسهم أخى الأصغر/محمد قادم نويّه.
أيضا لابد لى أن أشكر أخى/فيصل خليل على اقتراحه باستضافة أخ عزيز طال غيابه.
أحبتى هذا هو ضيفكم رقم 13 وهو الأخ العزيز/معتصم مصطفى.
الى الحوار:------------------

البطاقه الشخصيه
1_ الاسم رباعى:-
2- الحاله الاجتماعيه:-
3-الاقامه الحاليه:-
4- الاقامه بالسودان:-
5-أرقام للتواصل:-
6- الاهتمامات:-

سؤال مباشر
* ياخى مش حرام عليك....كل أحبابك فى المنتدى لسان حالهم يقول(توعدنا انك ما تغيب تانى؟؟؟؟؟؟)


فى سطور
*ابوجبيهه الشعبيه المتوسطه
*فندق صحارى كأول تجربه عمليه
*ثلاثون سنه ونيف بالمملكه العربيه السعوديه.


فى الذاكره
*شلة الدراسه
*شخصيه عالقه لن تستطيع نسيانها
*اجازاتك التى كنا نراك فيها بالكاميرا متجها الى خور البطحه

شوية سياسه
أديت صوتك لمن وليه؟؟؟؟؟؟


كلمه أخيره

شكرا استاذ عوض السيد على الاستجابة السريعة لعودة هذه النافذة كما

سميتها و التى نحسب انها أخذت بعدا اكبر و اعمق من كونها نافذة لأعضاء المنتدى

كونها فى المقام الاول تفرد مساحة للعضو العزيز للتعرف على موجز عن الضيف

و فى هذا قيمة كبيرة و ثانيا تقديم تجارب الآخرين فى قالب يطبع عليه العفوية

و عدم التكلف من صاحب النافذة و الضيف الشئ الذى يضفى على النافذة

شئ من التشويق و الاناقة و الرقة فى التقديم.

نشكرك اخى عوض مرة أخرى و نرحب بالكبير جدا و الرجل القامة و صاحب الفضل

على شخصيا فى كثير من امور حياتى و لا اريد ان اكسر ظهر اخى معتصم و لكن

يجب علينا ان نحفظ حق الآخرين تجاهنا و تجاه بلدنا الحبيبة. الحباك.

تخريمة يا عوض لو سمحت...........

يا ابو محمد انت صحى القدرة ما بتقعد الى فى تلتة حجارة.( راجع مداخلة فضل)

حبى

مرحب بالضيف العزيز 00منتظرين

اتصلت للتو على أخى معتصم فرد علىّ من دبى حيث أنه فى اجتماع يخص عمله فوعدنى انه سيقوم بزيارتكم عند عودته غدا

مرحب بضيفنا العزيز جدا ابومحمد ومنتظرين وما مستعجلين هو ورانا حاجه؟

مرحب باابومحمد نحن منتظرين

مرحباً بأخى معتصم من فندق الإكسزلسيور(صحاري حالياً) حيث الربيع الواعد وبدايات الخريف على مرافئ الغربة.

معتصم يحييكم جميعا ويعتذر عن التأخير لظروف عمله.....اتصل علىّ بالأمس وهو فى طريقه الى مدينة العين الاماراتيه ووعدنى أنه سيعاود المنتدى فور وصوله من المأموريه

يا ابو محمد ما عزبتنا.

رفعت هذا البوست عشان تشوف طريقتك مع عوض السيد.

تحياتى كلها بعد اجاباتك.

فيصل

أخي الغالي جدا فيصل ليك التحية والتقدير دوما وأكرر أعتذاري لك شخصيا والأخوة أحباب المنتدي وانشاء الله متواصلين معكم ونسأل الله ان لا يفرقنا أبدا وطبعا أخي ابا ابراهيم كان ساكيني سك شديد لكن هو أعلم بضغوطات العمل فمعذرة لكي مني يا ابا ابراهيم والتحية لكل الأعضاء

منتظرين ياأبو محمد ...مافي طريقة للزوقة ...

وراك حتى نراك يا أبا محمد

أولا كل الشكر والتقدير لأبنائي واخوتي صغار وكبار وطبعا لا أنسي أعمامي وخيلاني أعضاء المنتدي ولكم مني أطيب التحيات والتقدير وأرجو من الجميع معذرتي علي عدم التواصل وكما اسلفت يرجع ذلك لزحمة العمل وعدم التواجد في منطقة واحدة اغلب الاحيان ولكن باذن الله سوف يتم التواصل معكم وبكم الي منتدانا الذي عشقناه وحبيناهو كثيرا لأنه يحمل اسم (اغلي شئ في دواخلنا ) أبوجبيهة الحباك بلدي ، الأخ عوض السيد ابراهيم وكما تحلو لنا التسمية أبو ابراهيم لا عدمناك ابدا ومن هنا اليك المعتصم :
1/ الاسم الكامل :المعتصم مصطفي بابكر ادم
2/ المولد والنشأة : أبوجبيهة - حي الأنجل ( حي المصالح حاليا )
3/ تاريخ الميلاد: 26/10/1958 م
4/ الحالة الأجتماعية : متزوج من أثنين والحمد لله واب لثمانية ( ستة بنات وولدان )
5/ الاقامة الحالية: سلطنة عمان - ولاية الظاهرة - منطقة عبري - مصنع الزرابي للرخام
6/ ارقام التواصل: سلطنة عمان (0096899878716 أو 0096892277563 فاكس 0096825694726
الامارات : 00971503324750
الأهتمامات: التواصل بالناس ( الأهل ) ومعرفة أخبارهم التفصيلية ومن ثم الاهتمام بالعمل والأسرة ( كده كفاية يا أبوابراهيم )
* كما أسلفت انشاء الله سوف يتم التواصل ( ولو بكلمة)
* قبل أبوجبيهة الشعبية مدرسة ابوجبيهة الشمالية الأولية وعندما أذكر الشمالية اعني الأساتذة الأجلاء اصحاب الفضل الذين ربونا علي الكثير من الاشياء الحلوة ومنها حبنا لمدينتنا ابوجبيهة - الاستاذ/ السماني حامد وعلي البدري ومامون واحمد ميسو والمرحوم ابو فصلنا الأستاذ/ حسن السيد رحمه الله وابراهيم دودية والاستاذ/ كمال عبدالكريم
( طبعا أول دفعة تم افتتاح المدرسة الشمالية بيها هم اخوتنا الكبار ديل ميرغني ضيف الله وعثمان جاويش والمرحوم سليمان بشير وعطاء المنان وعبدالرحمن كمبال ولا مش كده ياعثمان موسي لأنو وقتها نحنا كنا صغار .
* أما أبوجبيهة الشعبية: فطبعا هي التي فتحتنا علي الحياة وبرضو قدرنا انو نحن نكون أول دفعة أفتتحوا بيها ابوجبيهة الشعبية ( رسوم دراسةسنوية 15 جنيه ياعوض السيد )عشان يبنو بيها الفصول والله يازمن وطبعا دفعتنا دي كانت عينة يايجماعة ومضرب مثل علي مستوي جميع ثانويات جنوب كردفان وطبعا مش في العلم لكن في الفوضة ( طبعا قمنا باضراب في يوم الايام لأنو ابوجبيهة الثانوية أجزة قبلنا بيوم والأستاذ/ حسين طلب مننا مواصلة الدراسة لمدة كم يوم وطبعا ده كان من مصلحتنا ولكن نحنا فضلنا الاجازة وأبوجبيهة الشعبية كلها ذكريات بالنسبة لي ودفعتي التي أنساها أبدا .
* بالنسبة لبدايات العمل ياعوض أنا قبل ان أبدأ بالخرطوم والفنادق فهناك محطة هامة جدا جدا في حياتي ألا وهي مستشفي أبوجبيهة ( زمن دكتور/ محمد المعتصم وعمنا/ محمد عثمان مفتش الشفخانات) فمن هنا بدأت حياتي العملية حيث التحقت بالعمل في مستشفي أبوجبيهة بوظيفة فراش وأكملت بهذه الوظيفة قرابة السنة في شفخانة العباسية تقلي والترتر
* الفنادق : وصلت الخرطوم وبحثت عن العمل وعن طريق الأخ الأكبر / المهدي سليمان حاج احمد وزميل الدراسة الهادي وجدوا لي فرصة التحاق بشركة الفنادق السودانية موظف استقبال بمكاتب الادارة حيث كان يشغل هذه الوظيفة أخونا وزميل دراستي الهادي فشركة الفنادق السودانية يا أبو ابراهيم كانت شركة الفنادق السودانية المحدودة تتبع للأستاذ /أميل مرعي قرنفلي صاحب فندقي الواحة وفندق الاكسلسيور ومزارع قرنفلي للدواجن والالبان وأخيرا الفندق الذي لم يكتمل ( 16 طابق ) خرطو هارلز هوتيل البناية التي تقع حاليا بين شارع القصر والجمهورية والزبير باشا ( البنك السوداني الفرنسي )
* المملكة العربية السعودية: بدأت الأغتراب بها في العام 1982م شهر مايو حتي العام 2002م ( يعني 20 سنة ياجماعة ما تكبرونا ساكت أسألو أعمامنا القبلنا ولا مش كده ياعمو أبو الزهور )
* شلة الدراسة خلينا نقول من الشعبية ( جعفر كمبال - سعدالدين محمد - محمد السيد أبو - مبارك عبدالكريم - بابكر عبدالله ( ابودقن ) الطاهر ادم ( فريجو ) الشفيع مصطفي - عباس كوكو - عبدالعزيز ( قرن ) وعبدالمنعم النور
شخصية عالقة ولن أنساها: هم كثر والله يا أبو ابراهيم لأن المواقف كانت كثيرة جدا فكل موقف يخلق لك شخصا عزيزا لن تنساه أبدا.
* أيام شبابية لي طلعات العصرية والعودة المغربية وطبعا فترة الاجازات والكاميرا دي ياأبوعويض خلفت لينا ارشيف طيب جدا من الذكريات فهذه الكاميرا حملت للكثيرين ممن هم في الغربة ( هاهي مدينة أبوجبيهة ) بخضرتها ووديانها وناسها السمحين الزينين .
* لو قلت ليك مش حتصدق فلكن لحدي اللحظة سياسيا أنا ما أدليت بصوتي لأحد .
* فاضلنا ود أبوي وأمي ليك التحية والشكر والتقدير وسلاماتي للأسرة الكريمة كلها بالله عليك
* أخوي فيصل ليك كل تحياتي وتقديري دوما ووالله ليك وحشة كبيرة جدا أنت وكل افراد الاسرة وأشكر فيك فيصل الانسان المحترم الخلوق الكريم السخي الودود الحميم البار وأسأل الله ان يحفظك لنا دوما وبيننا لقاء أنشاء الله
* أخوي غريق بشكرك علي ترحيبك وانشاء الله وكما وعدة متواصل معك ، وأرجو أن تطمأنا عنك وكل الأسرة حفظكم الله من كل سوء وشر
* طبعا أخونا ده عامل نايم وماعايز يرسل حتي كلمة واحدة بس ( مبروك ) كنا مفتكرينكم ياول نوية روحكم الرياضية دايما عالية لكن الظاهر عليكم روحكم الرياضية دايما خايسة ذي ما بيقولوا وصدق بيت نسابتي في العرضة جنوب بالقرب من مقبرتكم لي يوم الليلة بينقولو منو حجار جماعتكم لأنو من الجديع البيت اتملأ حجار بعدين قالوا لي لقينا فردة ( جوينت يد الظاهر عليهو بتاع حارس مرماكم ) لسع معلق عندنا في الشجرة خلي جماعتك يمشي يشيلوهو وصحي بالله جمال الوالي قفل مقبرتكم لأجراء اصلاحات الهزات الكاريكية المهندية بدرجة 2 رختر ) تحياتي ...
* حيدر ( أبوعبدالله ) والله مشتاقين كثير كثير جدا ياغالي وكيفك انت عامل وليك اطيب تحياتنا وتقديرنا بس أوع تكون من الجماعة الفوق ديل ( خليهم يموتو بغيظهم )
* أبني العزيز فاتح تحياتي وتقديري ليك والأسرة الكريمة ووين أخبارك مقطوعة عننا وبيقولو الخال شريك الوالد ونحنا خيلان وأعمام اتلمن عليك اتنين يالله ابقي أظهر .
* أخوي فلس حبابك عشرة بلا كشرة وجيتا جيتو وكيفن حالكم يالزينين يالطيبين يالرايقين
*** سامحوني علي الانقطاع وأوعدكم بالتواصل انشاء الله

شكرا الرائع المعتصم على هذه السياحه الجميله الممتعه

شكرا اخي معتصم علي هذه الذكريات والسرد الجميل وربنا يخلي ليك العيال ويديكم الصحة والعافية,فلس طبعا لقب انا محمد سعيد فكي الحاج
ولكم التحية اهل الحباك

أشكركم أخوتي الغاليين غريق كمبال وأخي ( فلس ) علي مروركم وربنا ما يحرمنا منكم ابدا ويا أبو حميد ( فلس ) ده علي فكره لغب أنحنا ما حضرناه لكين البركة في ناس اخونا فيصل خليل هم حاضرنا ومستقبلنا ونور طريقنا دوما واظنك كده فهمتني ياود الخالة

يا أيها المعتصم...سلام...نورت والله
وفعلا يا صديقى دفعتك (مدنكله) فى المدرسة..كلهم والله ناس حلوين وأكيد زمن القراية كانو احلى ....ربنا يخلى ليك الوليدات وعافى منك تب والله ...ترلتين؟؟ والله صعب...رأيك شنو يا ابو ابراهيم؟؟خليك مع شعرة معاوية دى لامن الجماعة (يتلتو)..تلت التلاتة كم؟...
لكم الود

سعادتى لا توصف ايها الاحباب لانى ارى فى اخونا معتصم هذا الشخص الخرافى

ارى فيه صورة للوالد ربنا يرحمه و يغفر له.

معتصم كبير فى كل شئ فهو ذالك الشاب الانيق المهذب و ذو الطاقة الهائلة على

العمل و المثابرة و فوق هذا صبره على المحن.

كنت و ما زلت استلهم منه الدروس و العبر كلما تزكرتة او قابلتة.

فأنت اخى و خالى و صديقى و نحن نفتخر بك كثيرا لانك نموزج للعصامية و نكران

الذات.

لك منى الفى تحية يا عزيزنا و للاولاد.

المعتصم الأخ وولى الأمر والمرجع لنا بسلطنة عمان.
لم أشك لحظه فى أنه سيعود لأننى أكثركم دراية بظروف عمله الميدانيه البحته.
معتصم لمن لا يعرفه رجل مهذب وخلوق واخو اخوان لا تفارقه الابتسامه على الاطلاق حتى عندما تتصل عليه بالتلفون يقابلك بضحكته المعهوده الفريده مما يريحك ويجعلك تسترسل معه فى الحديث بدون حواجز.
معتصم رجل لالبلدى كدا ما ساهل.
أشكرك يا ابا محمد على التجاوب وانا عارف انى حكيتها لمن جابت دم

ابو محمد شيخ عرب هكذا عرفته لك التحية والمحبة وشكرا علي هذه المساحة والسياحة الحلوة من ابوجبيهه الشمالية مرورا بالشعبية ومستشفي ابوجبيهه الظاهر كان عندك واسطه قويه واتذكركم جيدا انت والاخوان مبارك وجعغر كمبال واخر شياكة بالشارلستون وكنا ننظر ليكم بكل اندهاش واعجاب ويا الله متين نلبس الشارلستون زي ناس معتصم وجعفر كمبال حقيقة ايام جميلة وزي ماقال شاويش وليتها تعود.

حبابك أخى معتصم وأبن حلتى والمنتدى منور وأخبارك مقطوعة خلاص أخرة مره سمعنا عنك من عثمان أتمنى أن تكون كل أمورك تمام

والله اخوى معتصم بل تومى اكرر تومى هناك حادث يترك اخوى معتصم يضحك ملئ فيه..كنا نتشابهه شبهه شديد عشان((الرفارف كبيرة))الاذنيين..كنا جاريين فى الفصل بابوجبيهه الشمالية..الحادث كما اسلفته كثيرا لطرافته..كنت جاى من سوق ابوجبيهه القديم وقت المغربية خلاص الشمس ودعت ودخاخيين القطاطى ترسل خيوط على الافق فختلط بخيط شعاع الشمس الذى يلفظ انفاسه..وانا اقدل فى هدوء مارا بباب ناس معتصم ..شايف معتصم جاى صاروخ من البيت ..قبل ان استوعب لماذا معتصم طالق لساقيه العنان..اذا بكف صاروخ ارض جوى تهوى على خدى..المكتنز وقتها كنت((ممتلئ الجسم ماشاء الله))يهوى الكف على وينفد اخونا معتصم الذى مدين لى بكف..بل بكل حب صادق؟؟اليس كذلك ياتومى..لم احرك ساكنا المفاجأة الجمت فمى...برهةوادرك والد معتصم عليه رحمه ان الصاروخ اصاب قوات صديقة حميمة ..ضمنى اليه فى حنان الاب فتلاشى الم ((الكف))وزالت دهشتى..ويقول ود موسى معليش قايلك معتصم وبقى يشتم فيهو..وكلم والدى يعتذر له..والله كان رقيقا هاشا باشا هادئا مثله وكثر من الاعمام امثال عمنا بخيت الحاج وعمنا موسى آدم وكل الاعمام كانوا هكذا..حتى فرقتنا الحياة والسنيين ..يالها من ايام..نسيت معتصم كان معاك بشير محمد ساتى..وكل الجمعيات الادبية كنتم معنا بابوجبيهه الاميرية..
طبعا ياجماعة كان معتصم وجعفر كمبال وجماعة الشعبية انيقيين ووجاهة وبكش اكثر مننا كان فى الحفلات موضع اهتمام الضلع الاعوج الذى كان نادرا مانراه فمجرد رؤيتهن كفاية ..حتى من حى الى حى إلا تكون تحت حماية احد الزملاء يعنى الامور منظمة مافى فوضى..
اخى دخلت اليوم ابحث فى المنتدى كما يعود المهاجر الى وطنه فيتلمس الجدران والامكنه هكذا عندما ادخل المنتدى اقرب بوست ادخل واتفقد..يعلم الله كم نود ان نثرثر مع كل اعضاء المنتدى فلله دركم

وا معتصماه ....!!!!

كنت عايز فيك فرصة احسن من كده

لان الكلام معاك كتييير وداير وقت خاص وجو خاص وطابع خاص وعشان هيك قابلني في الخاص

تحياتي