الغنا فى بيت البكا

اجمل ما قرأت لخالد عزالدين


بعرسوا كمان!!
قاعدين من كأس العالم ده بدأ نتابع ونراقب.. قلنا إمكن واحد يجيب ليهو قون زي قون كاريكا..


لا (إيتو) جاب ولا (يعقوبو) جاب ولا غيرو جاب.. غايتو (هوندا) شوية كده قرب لكن طلعت الماكينة تايلاندية!!


تابعوا معانا كان رولاندو جاب بعد ميسي ده فشل!!


نتابع في كاس العالم بمزاااج.. نقارن ساكت.. الزول ده بشوت زي مهند.. راس الحربة ده سريع زي سادومبا.. نيجيريا دي جابت معاها مواسير أخير منها المواسير الصدرتها للخرطوم..


نضحك ونهازر ساكت.. في جماعة كده الكورة كلو كلو مسخت عليهم.. حسن محجوب قال كرت الجزيرة غالي والكورة ذاتها مشوشة!


(بابكر سلك) قلت ليهو ما بتحضر كاس العالم لييه؟.. قال هو (حادي) علي حفيدة (مانديلا) والغريبة لاعبين المريخ والجهاز الفني مسخوا للناس الدنيا ومشوا يعرسوا!!


سفاري عرسو الليلة والنفطي من بدري بدأ وكاربوني ماشي يعرس لي بتو!!


الغنا في بيت البكا..


حسن محجوب زعلان زعل شديد كتب امبارح قال لي كاربوني: (ان شاء الله تجي عجاجة تفرتق ليكم الحفلة)!!


قلت ليهو يا حسن محجوب (العجاجة) دي إلا تجي في أمبدة انت كان زعلان من سفاري قول عديل!!


نحن غايتو ما بنقصر مع سفاري والله نشاركو أفراحو للصباح.. مش كان سبب في أفراحنا؟..

مبروك عليك يا سفاري وإن شاء الله بيت مال وعيال..

إنتوا عرس الباشا متين؟

الزول ده برضو طالبنا فرح كتير!!


لكن حقيقة الما بنقدر ننستر معاهو محمد كمال ده!!


ده خيرو علينا كتير كتير كتير..


وافرح كتير فرح كتير واكاد أطير من الفرح!!


وبت كربوني إن شاء الله ما تجيها أي عوجة!!


بس ولدو ده ما يعرس..


نحن محتاجين ليهو شديد في الدورة الثانية..


قالوا بقعد في المقصورة بكتب الملاحظات لي أبوهو عن اللاعبين!!


شكلو ملاحظ كبير..


بشيد بي سعيد السعودي وبحب لاسانا وضد فكرة إعارة وارغو!!


بالمناسبة إن شاء الله لقيتوا نادي لي وارغو!!


إذا كان جمال الوالي تعب تعب شديد لحدي ما يقنع وارغو بترك الأهلي القاهري واللعب للمريخ فالبتأكيد تعب الوالي في إقناع نادي باعارة وارغو أكبر!!


موسمين والوالي بفتش ليهو عن نادي عشان يقبل وارغو!!


إنت ما تفكو عكس الهواء يا جمال..


والله ما تخاف.. وارغو ده لو الهواء معاهو ما بقدر يشوت!!


بس وارغو لازم يرجع (جوائز سوداني) دي قبل ما يسافر..


أصلو الجوائز دي عملوها ليهو عشان ترفع معنوياتو!!


وطالما معنوياتو ما ارتفعت وكورها ما رفعها يرجع الجوائز لأصحابها الحقيقيين..


قلت لي يا دكتور حاتم الموسم ده موسم وارغو؟!!


بناء على نظرية الضغط النفسي المصاحب للاعب في الموسم الأول.. ونظرية هدوء الأعصاب في الموسم الثاني.. ونظرية التعامل العقلاني في الطب النفساني الياباني فإن دكتور (حاتم إدريس) قد أعلن لكم أن وارغو سيكون نجما للموسم!!


معليش في دكاترة (كُتار) بغلطوا.. والله أنا بعرف دكتور نسى ليهو ماسورة في بطن مريض!! يعني حتبقى عليك إنت النسيت ليك مريض في بطن (ماسورة)؟!!


أنا اتخيل لي لو المريخ نجح في إعارة وارغو حيكتبو الإنجاز ده في خطاب الجمعية العمومية..


وبالتأكيد ( قريش ) ما حينتظر الجمعية وحيصدر بيان مبكر في هذا الخصوص!!


طبعا بيان قريش حيكون حصريا علي الصحف التي لا تخصم من رصيد المريخ!!


يعني يا قريش رصيد المريخ في الدورة التانية احتمال يكون ناقص ستة نقاط.. تلاتة من الهلال وتلاتة من الصحف المعادية!!


شايف أبوبكر عابدين قال ليكم إنو انسحاب (الحارث) كان بأوامر عليا!!


إنتو حكاية الأوامر العليا دي شنو في المريخ ؟؟


برضو سمعنا إنو تشكيلة المباراة بأوامر عليا!!


والغريبة دفاع المريخ ما قدر يتعامل مع كورة الدعيع (العليا) ولا حارس المريخ قدر يتعامل مع كورة (مهند) الأرضية..


يعني لا تحت لا فوق..


يا خالد ما خلي عندك ذوق !!


خلاص مع السلامة.. نلاقيكم بكرة..!!

والله يا فلس انتو فرحتو لما الفرح زاتو احتار.
لكن شئ طبيعى لأن أصغر موهوم ما كان مصدق

حياكى يا دكتوره ولا يسعنا الا أن نبارك.
احترامى وتقديرى

مشكور اخوي تسلم
عقبال تبارك لينا الكاس يا رب

عقبال ابارك ليكى الدكتوراة كدا معقوله اما غير كدا نفكر فى الموضوع