أنفاس النخلي وحداء مصطفي السلفاب

جنيد والرفقة لحين العودة لمريم الأخرى وصديق مدثر

علمي عيوني السفر ..
ما البسافر في عيونك ..
سكتو تبقى السلامة ..
بنسى أحزانو ..
وبعرف الدنيا جنبك إبتسامة ..
ضللي الناس بي حنانك ..
أبقي ليهم ضُل غمامة ..
الشقا اللازمني مدة ..
يوم إفوت ، والفرحة تبدأ ..
ما بقول فارقني عدَّا ..
عشان بخاف ترحل عيونك ..
وتنهزم فيني الأماني ..
وبي أساهو وبي شقاهو ..
تاني إتوشح زماني ..
أصلو غير عينيك وحاتك ..
ما في للأفراح معاني ..
جينا ليك .. شوق في عيونا ..
وفي عيونك شوق إناغم ..
الشجون باكر بترحل ..
والزمن يصحى ويسالم ..
الحلم يصبح حقيقة ..
وتنسجم في الحب ظروفه ..
والحنين تزهر غصونه ..
والعشم دانيات قطوفه ..
شوفي كيف يوم بكرة عامر ..
هاتي إيدك شان نشوفه ..
واقـــف بــــراك
مدني يوسف النخلي
واقف براك والهم عصف ..
ريحاً كََسَح زهرة صباك ..
ليلاً فتح شُرفة وَجَع ..
قمراً رحل فارق سماك ..
مطر الحزن عاود هطل ..
جدد عذاب الأرصفة ..
ضي المصابيح البعيدة ..
أتعب عيونك وإنطفأ ..
لمتين مواعيدك سراب ..
والريد شقا وحرقة جفا ..
واقف براك ..
بعد المشاوير البقت ..
ممدودة في نبض التعب ..
بتعود وتلقى رجاكا زول ..
حفظ الوداد زمنا صعب ..
والباقي من ليل الهوى ..
وعطر الصبابة الما إنسكب ..
والباقي من كل الغنا ..
وسيل الكتابة الما نضب ..
واقف براك ..
واقف براك ..
إحساس بالأمل
مدني يوسف النخلي
أديني إحساس بالأمل ..
مع كل رحلة شوق تطول ..
وأدي الخطاوي الراجعة ليك ..
في سكتك وهم الوصول ..
ما الدنيا كلها إنتظار ..
والإرتحال قدر الفصول ..
الموجة تحلم بالضفاف ..
والغيمة تحلم بالهطول ..
راحل معاي ضي الأماني ..
وذكرى للأيام هناك ..
لحظات بتذخر بالمعاني ..
وكيف أنسى تذكارات هواك ..
تتخلل الغربة ونعاني ..
ونصبر عشان نكسب رضاك ..
ونغني لو زار الحنين ..
يا ريتو كان سفراً معاك ..
شايف مداينك في البعيد ..
وبيناتنا ممدود الطريق ..
كيف الخيول بدت الرحيل ..
جوانا كم جرحك عميق ..
جفت حدايق الروح وراك ..
والزهرة عدمانة الرحيق ..
أدينا إحساس بالندى ..
في سكة الضنا والحريق ..
وأدي الخطاوي الراجعة ليك ..
في سكتك عشم الوصول ..
عشـــــم باكـــــر
مدني يوسف النخلي
في عينيك عشم باكر ..
ما إنتي القمر كلو ..
والشمس والوشاحة ورود ..
وزغرودة بتزف للناس ..
خبر زمنا جديد مولود ..
لقيت غيرك بضيع إسمي ..
وأكون أنا حي وزي مفقود ..
وفي عينيك عشم باكر ..
لاقيني يا عشقي الخرافي ..
لاقيني قبال الزوال ..
لاقيني في كل المرافيء ..
زفات ربيع وفرح طوافي ..
وانشر في حزن السنابل ..
زي ضياع كل المشاعر ..
وأمشي قبال الصباح ..
وزعي الطل للأزاهر ..
وأبقى يا شوقي الخرافي ..
خير يغيم شقى الفيافي ..
لاقيني يا شوقي الخرافي ..
لاقيني قبال الخيال ..
غنوة من أزمان بعيدة ..
طالعة من صخب الدميرة ..
تلقيني راجيك بالأماسي ..
وفي المراسي والملمات الخطيرة ..
أملنــا الباقــــي
مدني يوسف النخلي
أملنا الباقي يسرح بي ..
وأهاجر لي زمن تاني ..
وتبقى الدنيا في عيني ..
هدأة موجة ..
في بحر الأسى الممدود ..
هجعة خطوة ..
في سكة فرح مفقود ..
رجعة غنـوة ..
من درب الضنا المهدود ..
وأفتش ليك حناني معاي ..
أماني تصارع المكتوب ..
عشانك .. لا مسافة تطول ..
ولا بتصعب معاكي دروب ..
وقلبي عليك ..
وعلى الوعد الحزين مصلوب ..
وراجع ليك ..
أجيك فارساً يشق ..
صمت المتاهة الطال ..
مواعدِك بي حكاوي الشوق ..
وبي شمساً وراها منال ..
وبي فرحاً يغرِّد في سماك ألحان ..
ويجيب البهجة للأطفال ..
صـرخــــة
مدني يوسف النخلي
مردودة من صرخة وصدى ..
مولودة في الزمن العقم ..
رغم المسافة .. الدهشة ..
والشوق والندم ..
أدمنت تحديق السراب ..
هدمت في الليل الحزن ..
أوغلت في الزمن الغياب ..
أدمنت فيك عشق الحروف ..
رغم إنهزامي مع الظروف ..
لا المدارات المسافر فيها ..
لعيونك مداي ..
لا هواك كان مبتداي ..
لا مداك كان منتهاي ..
كنت فارد للحلم ..
في ليل الرحيل مليون جناح ..
كنت فاتح صدري ديمة ..
وما بخاف عصف الرياح ..
إيدي في الزمن الخرافي ..
ودمي كان باقي المداد ..
نبضي في حزن القوافي ..
وصبري في الليل الوداد ..
ديمة أنسج في الغناوي ..
والتواشيح القديمة ..
أعشق الأمل البعاين ..
في المسافات الأليمة ..
تسخر أقداري العنيدة ..
وتبكي أحزانها القصيدة ..
لا زفافك كان مطاف للأماني وللعفاف ..
وخاصمت عيني الغمامة ..
وداس فرح عمري الجفاف ..
أنــوار المســـاء
مدني يوسف النخلي
ما بان عليك سفر العمر ..
لسه الربيع يا دابو زار ..
لسه الضفاف المترعة ..
بتغيِّـر ندى وتطرح ثمار ..
الناس عليك ناداها فال ..
في عيونها نام الإنبهار ..
وأنا جوَّ قلبي المشتهيك ..
نزفت جراحات الودار ..
جوه العيون أطفال ..
فرح لمَّـة زفاف ..
جوه العيون ..
تشرق شموس يرحل جفاف ..
أزمان بتغرق في النعيم ..
وجنان غمر عاشقين رهاف ..
وأنا جوه قلبي المشتهيك ..
نزفت جراحات الودار ..
يا زهرة طلت بالفرح ..
يتراقص أنوار المساء ..
ما بان عليك أثر القطاف ..
ولا جاتك أيام القساء ..
ما أروعك وإنت في شبابك ..
بي حُمرة الريد إكتسى ..
وأنا جوه قلبي المشتهيك ..
نزفت جراحات الودار ..
مــن جديـــــد
مدني يوسف النخلي
من جديد جيت تاني ..
تكسِر صمتي بالنظرة الخجولة ..
يا أمل عمري القبيل ..
ويا سنين عامرات فصولا ..
ما قِدِرت أنساك من زمان ..
بس ضاعت أحلام الطفولة ..
الحنين الجيتني بيهو ..
جاني في لحظات ندم ..
في زمان ، ضيَّع صبانا ..
وحتى أشتات العشم ..
من جديد تاني كيف ..
تبني فيني الإنهدم ..
ما قدرت أنساك من زمان ..
بس ضاعت أحلام الطفولة ..
ما بفيد أنا لو ألملِم ..
من عيونك ذكريات ..
أو أصحِّي الماضي فِيهِن ..
وأنسى حزن الأمسيات ..
برضو زمن البهجة عدَّا ..
وعمري فات فيهو الفوات ..
وماقِدرت أنساك من زمان ..
بس ضاعت أحلام الطفولة ..
لحظاتــاً نـَدِيــَّـــــة
مدني يوسف النخلي
في خاطري لحظاتاً ندية ..
وإنت ساعة المغربية ..
قعدتك جنبي وعيونك ..
سابحة في الدنيا البهية ..
خِفْنا من سفراً يودِّي ..
للمسافات القصيـَّـة ..
قِصة الزول المسافر ..
وقلبو عشرة على الوصية ..
وأبقو عشرة على البِنَيَّة ..
كنت جد ناوي الرحيل ..
إلا شايل ذكرى منك ..
خفت في الغربة البعيدة ..
المسافات يبعدنِّـك ..
العيون الشايلة سيرتك ..
بُكرة يبكن ويفقدنـِّـك ..
والأماسي الحالمة تحزن ..
والمشاوير يتعبنـِّـك ..
شُفْتِي كيف ..
شفتي كيف لما الشمس ..
مدَّت نوافير الشعاع ..
والضفاف بِعْدَت كتير ..
والريح مَلَت جوف الشراع ..
كيف هناك بدت الضفاف ..
تتلاشى في زمن الضياع ..
وإنتي ساعة المغربية ..
خايفة من كلمة وداع ..

النخلي قطع حبل الغربة وعاد من جديد للخرطوم يرسم رؤاه وغناءه كحكايات بديعة للناس والحياة.. ولان الرجل طاقة حيوية وابداعية سجل الاغاني للاذاعة والتلفزيون وحصد جوائز مهرجان ميلاد الاغنيات ثم قدم لنا ديوانه الشعري البديع الذي اسماه (واقف براك)
استاذ أزهري قد امتعتنا ...
من جديد
جيت تاني تكسر
صمتي بالنظرة
الخجولة
يا أمل عمري القبيل
ويا سنين عامرات
فصولا
ما قدرت انساك من زمان
بس ضاعت احلام
الطفولة
...........

أنفاس النخلي وحداء مصطفي السلفاب

أنفاس النخلي وحداء مصطفي السلفاب

رد: أنفاس النخلي وحداء مصطفي السلفاب