( أبو النـــوم )

الأصدقاء مع بعضهم عندهم طرائف ولهم قفشات , مثلاً عندما نتلاقى ,يكون فينا كم واحد , زهجان ومّادي بوزو ..... ونحنا كلنا أصدقاء أوشلة, أولاد حلّة واحده ,أو أولاد الحباك ,,, واحد من الشباب يقوم يعكنن على واحد من المّادين بوزوهم , ويقول ليهو بالله يا أخي أديني جنيه عشان أشتري ليكم تسالي أو فول مدمس , سمسية , أو أي حاجه ,, ده كلّوا طبعاً لزوم كسر الجو العام المسيطر ... يقوم التاني بزهج يقول ليهو " بالله سيبنا ياخ أنا أبو النـــوم ماعندي " .... ومن كثرة تكرار كلمة أبو النوم سألت يوماً أحد الأصدقاء....
قلتا ليــــهو : أبو النوم دي شنو أو( دي شني)..
تبسم وقال : دي باقي الحتحات حقا الجيب ... يعني الحركرك الذي يبقى في الجيب بعد أن يفرغ تماماً ... تجد حاجات ذي باقي خيوط ممزوجة بسواد وتكون دايماً وآضحة في جيب القميص الأبيض أو الجلابية البيضا..... وأضاف (ماعندو أبو النوم ) يعني الجيب نضيف تماماً ومغسول كمان ....والعباره يمكن استخدامها " ما ناقش أبو النوم" يعني ماعارف حاجه ( ميــح )...
ضحكت ملأ فمي وودعته .... "فعلاً نحنا السودانين عندنا جمل تحيّر"