الطيارون المتحدون

الفاتح جـــبرا

كنت أتصفح إحدى الجرائد بالأمس حيث وجدت إستطلاعاً تم فى الأسواق يوضح أسعار السلع الضرورية والتى شهدت إرتفاعاً مخيفا حيث جاء أن

سعر كيلو اللحم الضان 22 جنيهاً والعجالى 18 جنيهاً وكيلو الطماطم 20 جنيهاً هذا غير بقية السلع الضرورية الأخرى كالسكر والزيت والبصل والخضروات والرغيف الذى أصبح تحتاج رؤيته إلى (مايكرسكوب) ،قلت لجارى الذى كان يجلس معى وأنا أناوله الصحيفة :

- بالله هسه المواطن العادى .. والناس الدخلها محدود يعيشوا كيف؟

- والقال ليك يا أستاذ الناس دى عايشة منو؟ يا أستاذ الحالة وصلت مرحلة صعبة خلاس

- كيف يعنى؟

- ما عاوزة ليها كيف يا أستاذ ! مافيش أى علاقة بين (الدخل) والمنصرف

- والله فعلاً مافيش أى علاقه

- تعرف يا استاذ تحت وطأة غلاء اسعار السلع الضرورية والخدمات مع ثبات الأجور والمرتبات و(العطالة) بقت فى ظواهر سلوكية (غريبة) مجتمعنا ما كان بيعرفا ولو حكيت ليك عنها ما ح تصدقا

- زى شنو؟

- بتعرف حاجه إسمها (الطيارين) يا استاذ؟

- مش ديل البيسوقو البويينج والجامبو والحاجات دى ؟

- جامبو شنو يا استاذ ... إنتا المصطلح ده ما مر عليك ؟

- لا والله.. معناتو شنو؟

- الطيارين ديل البمشوا يفتشوا مكان (البكيات) و(الأعراس) عشان ياكلو ويشربو وكده !

- والمشكلة وين يعنى؟

- المشكلة إنو المناسبات البمشوها دى ما عندهم بيها أى علاقة وما بعرفو الناس بتاعنها

لما كنت خالى ذهن وليست لدى اى فكرة عن المسألة فقد طلبت من محدثى أن يمدنى بما يعرفه عن هذه الظاهرة حيث إستعدل فى جلسته :

شوف يا استاذ فى نوعين من (الطيارين) ... طيارين بتاعين (أفراح) وديل بتكون حالتهم المادية شويه ما بطاله يعنى شكلهم فيهو شوية (ترطيب) وكمان بيلبسوا كويس ... يعنى عندهم غيار غيارين ما بطالين والواحد أول ما الواطة تمغرب يقوم ياخد ليهو (دش) ويلبس على (سنجة عشرة) ويتظبط تمااام ويا حبذا لو كمان فيها شوية (ريحة) وعلى أقرب صالة أفراح وللا صيوان عرس ... يقوم يضرب ليك (العشاء الفاخر) ويشرب ليهو (كم بارد) ويسمع ليهو (كم أغنية) وإحتمال لمن الحفلة تجوط يدخل جوة (الحلبة) ويقعد (يهز) فى البنات ويشيل ليهو (كم شبال) !

- إنتا يا أستاذ ما قاعد تسمع فى الأعراس دايماً إنو (العشاء ما كفى الضيوف)؟

- أأى مرات يقولوا ليك أهل العريس لسه ما إتعشوا والعشاء خلص

- ده ما من الطيارين ديل .. تكون عازم ليك خمسمية نفر يجوك خمسمية طيار !



ثم واصل محدثى : أما أصحابنا ناس المأتم والبكيات ديل فهم ماشة معاهم (زى العسل) .. الواحد بيكون مجهز (عدة الشغل) .. (جلابية تترون) بيضاء نضيفة و (عمة توتال) وشال ومركوب وما يسمع ليهو بى بيت بكاء إلا يقوم (يتلبس) ويمشى يشيل الفاتحة ويقعد قعدة واااحدة ... الشاى .. القهوة.. الموية البااااردة ... الفطور ... الغداء ... العشاء وكمان (الجرائد) ... ويقوم يرجع عشان يجى تانى يوم .. لحدت ما البكا (يخلص) ويرفعوا الفراش .. ومرات بعد ما الفراش يترفع والناس تدخل (صالون البيت) الطيار بيكون قاعد .. بس دى عاوزة ليها (طيار عينو قوية شوية) !

- والناس دى ما عندها شغل تمشى ليهو؟

شغل شنو يا أستاذ مع (الأطايب) دى .. أفرض الطيار ده شغال ح يعمل شنو؟ والله إلا يكون طيار أيربص

حتين يلاقى ليهو وجبات زى دى

شردت بذهنى إلى الوراء مستعرضاً صورة (المواطن) عندما كان عفيفاً مترفعاً عن كل ما يشين سمعته وسلوكه ولم يقطع حالة شرودى هذه إلا صوت محدثى قائلاً :

وكمان يا أستاذ فى (طيارين) نسوان !

- كيف يعنى؟

بى نفس الطريقة .. الواحد مما تشوف ليها بيت بكا وإلا بيت عرس إلا (تتظبط) وتظبط (الشفع) وتمشى

وده كلو يا أستاذ كوم و(الطيارين المتحدين) كوم تانى

- وديل شركة !

لا ما شركة .. ديل (أسر) يعنى (عوائل) عديل كده ... بيلعبوا ليك (صالات الأفراح) راس .. الطيار ومرتو وأولادو (يطقموا) ليك وكل يوم والتانى على واحدة من صالات الأفراح .. ياكلو ويشربو وينبسطوا ... وطبعن مافيش زول بيشك فيهم !

(مواصلاً) : عرفتا يا أستاذ العشاء بتاع الأعراس قاعد يقصر ليه ؟؟ والله يا استاذ الحالة دى لو إستمرت كده الشعب ده كلو بعد شوية يكون (طيارين) !



كسرة :

قيل أن أحد (الطيارين المتحدين) قد توجه نحو أحدى صالات الأفراح الفاخرة .. وعندما دخل ومعاهو الأولاد فوجئ بأن الصالة كوووولها (جلاليب) وعمم .. كما فوجئ بعدم وجود (كوشة) أو (فنان) وللخروج من المأزق قام (قطع ليهو إسم من راسو) مخاطباً الأشخاص الذين أمامه :

- يا جماعه ده مش عرس ناس (عوض عثمان) ؟

- لا والله دى الجمعية العمومية بتاعت بنك التنمية

ظريفه يا ابو الزهور بتاعة بنك التنميه دى وجبرا دائما بيجيب الحاجات القويه ذى دى 000لكن يا عزيزى نحن شعب نتلذذ عندما تطربنا المهانه !!!رايك شنو نحن اكبر بلد زراعى فى العالم ولدينا اطول انهار العالم ويكون كيلو الطماطم ب25جنيه اى عشره دولار امريكى بالله عليك مش صاح نحن شعب نمتهن العطاله المخجل ان الطماطم تجينا من مصر لسع نحن ما استقلينا كويس

كويس انها بقت عرس ناس عوض عثمان وما بقى عرس عوض السيد ابراهيم
سلامات عمي ازهري احوالك كيف ولينا طولة منك عساك بخير

شكرا يا زعيم على الإطلالة وشئ محزن أن نعجز حتى عن توفير الطماطم في بلد المليون ميل مربع .. تعرف يا زعيم في نهاية الأسبوع الماضي أشتريت كيلو الطماطم من أرقى سوق مركزي في الخبر ويسمى التميمي .. safeway

وهي سلسلة من الأسواق ومنشأها أمريكا إشتريت كيلو الطماطم ب ريال و45 هلله يعني قول ريال ونص كيلو الطماطم في بلد صحراوي ...

إبني محمد عبدالله .. أفتقدتك كثيرا ,اسعدتني اليوم عودتك القوية .. أرجوا أن تتواصل معنا وسلامي للأسرة الكريمة والأهل...

رمضن كريم اخى ازهرى والله كل دقيقه بتظهر حاجات فى مجتمعنا العفيف بتفقدنا قيمنا بس من المسئؤل؟؟؟؟؟؟؟؟؟؟بتمنى من كل اعضاء المنتدى الكرام ان يرفعو ايديهم بالدعاء فى الشهر المبارك ان يحسن الحال ويغير الاحوال فى بلدنا الحبيب.....جزاك الله الف خير