حكم وأمثال وتعليق.......

حكم وأمثال وتعليق

الفاتح جـــبرا

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

23/08/2010 عنوان المجموعة البريدية للفاتح جبرا http://groups.google.com/group/alfatihgabra



لا يفُلُّ الحديد إلا الحديد ... المغالطنى يمشى شارع الخرطوم – مدنى



المرء بأصغريه : قلبه ولسانه ... أهم شئ ما قالوهو ... و(جيبه( !!


إذا حضر الماء بطل التيمم .. ده إذا (الموية) جات !


الدراهم مراهم ... مراهم بس؟ دى مراهم .. ومضادات حيوية .. ودربات .. والأكسجين زاااتو


تجرى جرى الوحوش غير رزقك ما تحوش ... الأيام دى رزقك زاااتو فى تلتلة


كل ما تشتهي والبس ما يشتهي الناس ... كدى أدونا (المراهم) وبعدين ناكل ما يشتهى الناس زااتم


إذا تخاصم اللصان ظهر المسروق ... فى الزمن ده 60 لص يتخاصمو المسروق ما يظهر


حبل الكذب قصير ... ده كان زمااان هسه بقى طويل جنس طول


حرامي بلا بَيِّنةٍ شريف ... إذن ما أكثر الشرفاء فى بلادى


إذا عُرِفَ السبب بطل العجب ... ناس الموية قالو ليكم المواد المنقية للمياة (قطعت) منهم عشان كده الموية عكرانة


اطلبوا العلم ولو في الصين ... ليه الصين البعيده دى؟ ده كان قبل ثورة التعليم العالى هسه تجيب 50% تقرأ طب ... هندسة .. ذرة .. الكلية البتعجبك


إذا تم العقل نقص الكلام ... وأقول المذيعين والمذيعات ديل نضامين كده ليه ؟


لكل جَوَادٍ كَبْوَةٌ ... ولكل مسئول أكثر من ذلك ... وبعد داك (ترقية) كمان


لا يضيع حق وراءه مطالب ... هذا يعتمد على سرعة التقاضى وهل القاضى نقلوهو وإلا قاعد ؟ والإستئناف ح يرجع من المحكمة الفوق بعد كم؟


في التأني السلامة وفي العجلة الندامة ... شعار القائمين على أمر طريق الإنقاذ الغربى


إذا كان الكلام من فضة فالسكوت من ذهب ... شعار (نوام الشعب) فى البرلمانات منذ الإستقلال


عصفور في اليد خير من عشرة على الشجرة ... أعتقد أن المسألة تعتمد على نوع الشجرة


لا يلدغ المؤمن من جحر مرتين ... إن لم يكن داخل الجحر شرطى مرور


الصديق وقت الضيق ... الأيام دى الصديق زاااتو متضايق


ليس في مقدور المرء أن يخدم سيدين ... بالعربى كده ما ممكن الزول يكون مع السيدين ويكون (أنصارى) و (ختمى) فى أن واحد (لكن فى ناس بيعملوها)


من كثر كلامه قل فعله ... المثل ده بالذات (قطعوهو) فى المسئولين


لا تضع كل البيض في سلة واحدة ... هو البيض وينو؟ الطبق بقى بالشئ الفلانى


من كان بيته من زجاج لا يرشق الناس بالحجارة ... لو القزاز (مظلل) ممكن


ما خاب من استشار ... مثل ما (شغال معانا) بدليل إنوعندنا 77 مستشار


الوقاية خير من العلاج ... طيب لمن الإتنين يكونوا مافيشين؟


لا تبدل القادة في منتصف المعركة ... يعنى أبدلهم بعد المعركة ما تخلص؟


كل لتعيش ولا تعش لتأكل ... جيبوا الأكل فى الأول وبعدين نتفاهم


الصانع الرديء يلقي اللوم على أدواته ... وناس الموية يلقون اللوم على (الطمى)


لمن تشكو إذا كان خصمك القاضي!؟ ... الأمم المتحدة طبعن !


من تأنى نال ما تمنى ... ما طواااالى


كسرة :

المصائب لا تأتى فرادى ... واحد عمل حادث ورخصتو منتهية والعربية ما مرخصة وقزازو مظلل ومبسوط (حبتين) والدنيا (رمضان!(






--

لا يلدغ المؤمن من جحر مرتين ... إن لم يكن داخل الجحر شرطى مرور
الكلام ده كيفنه
عاد يا اخوى
تسلم يا جنابو على صنع الضحكه فى الايام الاخيره ونحن
نتسابق على الفوز من العتق من النار

الله يديك العافية ود أبوي " جنابو ".. والله أمثال في غاية السخرية ,,,,
إذا تخاصم اللصان ظهر المسروق ... فى الزمن ده 60 لص يتخاصمو المسروق ما يظهر
حبل الكذب قصير ... ده كان زمااان هسه بقى طويل جنس طول

الرائع أمين منقا لك تحية الصحة والعافية
جبرا كاتب ساخر بتعبيرات حلوة بس عاوز أجابة لسؤال( الوقاية خير من العلاج.... طيب لمن الأثنين يكونوا مافيشين؟
وكل عام وأنت بالف خير

أزيكم ...كيفنكم....قمر ياخوى فى حالة غياب الاتنين الا نرجعو للطب النبوى والتداوى بالاعشاب..وما تنسى ديوان الزكاة كمان....يديكم العافية والوقاية من كل داء يارب

الاخوان نوية/سهاد /ود ابويّ /قمر الدين /الجنيد

الشكر مع الامتنان

لكن يا قمر ...هاااااك الهوى دا !!!؟؟

هييييييييييييييع عفيت منك يادكتور الجنيد (حلال للشبك)

وكل سنة وانتو طيبين ياحبايب المنتدى