+++القاموس الرائع فى الزمن الضائع+++

الى من يهمهم الامر
الى الاب الشاردولم يفهم
والام التايها ولم تفهم

لكم منى اعزائى (منقول)
فى أيام شبابنا الباكر ظهرت فى العامية السودانية بعض الألفاظ التى لم نكن نعرف مصدرها لكننا كمراهقين فى ذلك الزمان الغابر كنا نستخدمها مع بعضنا البعض كلغة شبابية جديدة وهى عبارة عن كلمات متجانسة أذكر منها (السنقة فى الرنقة) و(القزازة فى البزازة) و(والعملية فى النملية) . وعلى الرغم من أن هذه العبارات عبارات خاوية لا تشير أو ترمز إلى شئ معين إلا أن الوالد عليه رحمة الله قد (قبضنى) ذات يوم أردد إحدى هذه العبارات فكاد أن يصاب (بجلطة دماغية) وبعد ان أرغى وازبد قال لى :
- شوف يا ولد ده بيت محترم لو عاوز تتكلم جنس الكلام ده فتش ليكا بيت تانى .
مناسبة هذه المقدمة هو أن جارتى (س) قد حكت لى وهى شبه منهارة أنها لاحظت أن إبنيها المراهقان يتحدثان بلغة غريبة عليها لم تفهم منها شئ .، قلت لها إن الأمر بسيط فما عليك لا التوجه للمكتبة القريبة من المنزل وشراء كتاب (القاموس الرائع فى الزمن الضائع) الذى قام بكتابته (واحد من شباب اليومين ديل)
قامت جارتنا (س) بالذهاب إلى المكتبة وشراء القاموس وبعد أن قامت بتصفحه أصابها الهلع لما قرأته من مفردات ومصطلحات يستخدمها شباب اليوم.
فى مساء ذات اليوم سمعت إبنها الأكبر يخاطب شقيقة :
- أيه رايك نقوم ندقس الجلكين ونديهو (مكنة) نقول ليهو معانا واحد زميلنا أبوهو إتلحس عشان يعمل لينا (زيدان أبراهيم) للضحاكات نقوم نظبط بيها (عشة الفلاتية)
ما أن إستمعت جارتنا (س) إلى ما قاله إبنها مخاطباً شقيقه حتى قامت بتصفح (القاموس) بسرعة فى محاولة لفك الرموز لتجد أن الترجمة هى :
- أيه رأيك نقوم ندقس (نغش) الجلكين (الراجل الكبير يقصد والده) ونديهو مكنة (كضبة) نقول ليهو واحد زميلنا أبوه إتلحس (مات) عشان يعمل لينا زيدان أبرهيم (زياده) للضحاكات (القروش) نقوم نظبط بيها عشه الفلاتية (العشاء) .
بعد خروج إبنيها عشان يعملو (عشة الفلاتية) بعد ان مشت (المكنة) فى (الجلكين) جلست جارتنا (س) ممسكة بالقاموس وقد ألت على نفسها أن تقوم بحفظه (صم) حتى تستطيع أن تتعرف على ما يقوله إبنيها من كلمات وعبارات وتراكيب بعد أن أضحت هذه اللغة هى لغة التخاطب بينهما فى كثير من الأحوال .
فى اليوم التالى بينما كانت (س) وإبنيها يجلسون يتناولون الشاى بالمنزل بعد عودتهما من الجامعة سأل الأخ الأصغر شقيقه :
- عملتا شنو مع (الحنان) القاعد (تحنك) معاهو اليوم كلو فى الكافتيريا ده؟
تعرف اليوم كلو أقعد (أحنك) ليك فيها لكن هى عاملة ليا (عبدالعظيم حركة) بس أنا مرات بعمل ليها (الفاتح النقر) ومرات كده بعمل ليها (عمر إحساس) وكم مرة كده عملت ليا (شرحبيل أحمد) لكن أنا ح أقوم أعمل ليك (جوزيف لاقو) واقوم أمشى أعمل ليك (محمود الخطيب) للبقاقة دى قالو أبوها (مقندل) وماسك كهرباء شديده
- طيب أفرض قال ليك إنتا لسه وعمل ليك (الجزيرة أبا) ؟
- ما مشكلة بعمل للموضوع (كمال ترباس) طوالى
- طيب وكان ورطك وقال ليك عمل ليكم (إيهاب توفيق) ؟
- خلاس أقول ليهو نعمل (عقد الجلاد) بعد ما نتخرج
- طيب أفرض قال ليك تعمل (عرس الزين) طوااالى- ما (بدق ليهو جرس) طوااالى
- وكان أصر على (عرس الزين)؟- بسيطة بعمل ليهو (الفتيحاب)معانى المفردات :
- الحنان = الحبيبة- أحنك = أقنع - عبدالعظيم حركة = عاملة حركات
- الفاتح النقر = بيفتح ليها كناية على عدم الإهتمام - عمر إحساس = يعمل فيها حساس
- شرحبيل أحمد = الشرا وعدم الحضور للمواعيد- جوزيف لاقو = مجازفة
- محمود الخطيب = الخطوبة- مقندل وماسك كهرباء شديده = مرتاح وعندو قروش كتيره
- الجزيرة أبا = رفض- كمال ترباس= يقفل على الموضوع - إيهاب توفيق = الموافقة
- عقد الجلاد = عقد القرآن - عرس الزين = الزواج- دق جرس = للرفض بشدة
- الفتيحاب = يفتح ليهو
وسط دهشة إبنيها ما أن إستمعت (س) لذلك الحوار حتى هبت واقفة بعد أن تحزمت بثوبها وهى تصيح :
هووووى يا أولاد إنتو قايلينى (فاره) وما (ناقشة) حاجة .. إنتو ما عارفينى خلاس بقيت (تفتيحة) وشايلا (مفاتيحا) .. هوووى يا أولاد أقيفوا بعيد (وجرو شخيط) وأوعكم تقيفو فى الظلط وتتكلمو غلط ، أبوها شنو (المقندل) وماسك كهرباء .. نحن ذااااتو هينين ولا لينين نحمد الله الغدا ضأن و التحلية برتكان والعشا حمام و التحلية شمّام و تربية بيت و فرش موكيت ولدونا فى الإمتداد و حبّينا فى البلاط .. قال شنو يمشى يعمل عقد الجلاد .. إنتا لسه بصرفوا عليك يا الما عارف أيدك من كرعيك .. يودوكم للقراية تحنكو (الجكساية) .. (وهى تجر فيهم نور طويل)
- سجم و كمان عدم فهم ؟!!-(فى صوت واحد) : معقوله؟ الحاجة طلعت تفتيحة ! كسرة :
أيها الأباء .. إيتها الأمهات .. عليكم بإقتناء القاموس الرائع فى الزمن الضائع حتى لا تكونوا (فارات) ويقوم الأولاد (يدقسوكم)!!!

تسلم عزيزى الفاتح
وشكلنا كده (محتاجين لخلف خلاف)
الله يسترنا من الدقيسه

شكرا سهاد على هذه التقليعات الرائعه

زي ما قال ليك أخي غريق دا الرندوك ...بالشئ المتعارف عليه ...وتعرفي أن هذا الأسلوب من لكلام يدل على الذكاء الشديد ..وأول من إبتكره أعتقد : ناس العربات السواقين والمساعدية ...يقول ليك :عمك عامل سنة ... يعني مشبط ...اي شارب حاجة ...وعبارة فارة بقصد الجبن والهروب ...رتينزة ...اي مجموعة سلسة الحجبات ... لأنها تشبه رتينزة العربية ...وعبارة جلك كما أسلفتي ...وصدقيني فيها شئ من أنواع الطرافة ...ومرة راكب حافلة من لخرطوم للثورة ...وراكب تشاجر مع الكمساري..وحجزوه ...وحينما نزل الراكب في محطة خليفة حاول الكمساري ينزل عليه وحجزوه بباب الحافلة الأمامي ...قال للجماعة كنتوا تخلوني أنزل عليه عشان يعرف حاجة ...!!؟؟ بالجد انا ضحكت شديد ...لهذا التعبير ...وشكراً لك على هذا القاموس العجيب ... إحترامي

مشكور اخى غريق على روعة مرورك
وقلنا نحطات احسن

اخى عتمان والله كلام ظريف ويطلع الواحد من عزاب
الغربه
والضحكه النادره
اصلو بقينا نفتش عليها بيناتكم ربنا يديكم العافيه
ويجمعنا بيكم عشان تتم الضحكه
ود نويه الفضل يرجع ليك
انت البديت الرونديق
شوف خالتنا (س) دى شاطره وبقت تتدقس ليك اولادها كمان
وين جنابو فاتح لينا كده
غايتو انا بجيب قاموس زولتى دى وبرسل ليه منه
انا خايفه يطلب المساعده (من صديق )
واكيد حتكون انت .

حقيقه اخيتك ما مثقفه كلو كلو في الموضوع ده
إلا القاموس مفيد عشان نقدر نواكب

سلام عليكي وعلي ضيفان وزوار البوست الظريف

والله يا سهاد حيرتينا شى رطانه وشى راندوق.
مشكوره على هذه الجدعه.
بالمناسبه الواحد لو(فلسطين) فى لندن وعايز يعمل (فاطمه الحاج) فى المطعم ممكن ولا بيعملو ليهو(طردونا).

لالا ده كلام كبير والله
اخوى ايمن قمر الدين
شكلى كده زولتى (س) دى حاباصى ليها
كلامك ده كله
عشان مافى حاجه تفوت عليها
يقومو كمان يدقسوها تانى
تسلم يا( منقه )على سبيل المثال
اخيتى الدكتوره
سلامات وشكلك مدعوقه ربنا يكون فى عونك
والله اخيتك عجبتها الفكره
وقلت احطات لما ارجع السودان
وجماعتى ديل
ديمه مدقسين
يعنى الرندوق ده بالنسبه ليهم
لغه جديده
غايتو شغاله مع ابوهم دقيس ساى وهو يضحك بس

عوض السيد اخوى سلامات
قلنا نعمل
حركه فى المنتدى
ونخلى الناس تتنور وتعمل حسابها من الدقسه
(والله الواحد لو فلسطين وما عمل فيها خوجلى عثمان بعملو ليه نقصان حمور .
لقيتنى كيف؟

[color=blue]

والله خطيرين خليتونا مسطحين ...ولا شنو يا مان !!؟؟ محبتي

شى عجيب تارى الناس كلهم عارفين الرندوك إلا انحنا المسطحين

والله ضحكتونى ضحك شديد
ربنا يديكم العافيه يا رب
وجعلكم ضاحكين و وصانعين الضحكه فى قلوبنا
اعزائى عتمان وغريق
اها بعد ده خلو بالكم واوعاكم من السطيح

وانت كمان يا عزيزى زهير
اعمل حسابك ما تعمل فيها تفتيحه
وتقوم تجيك تدقيسه
شنو عامل فيها (تقليه)
تحياتى