**اين انت اخى الحيدر**

اين انت اخى حيدر خليل
اين انت غائب من اهلك
والحباك فاقداك وبتناديك
و(السياسى) ما بين الانفصال
والوحده بسال عنك
طولت الغيبه عزيزى

لك منى هديه لعلها
تمسح الحزن الجواك
وتضحك وترجع لينا
ومنتظرين ابداعاتك

*نكات ابو داؤد وعوض دكام *
رحمة الله تغشاهم
ادعوا لهم معى

وبهديها كمان لكل اخوانا
واخواتنا المسجلين غياب
ولكم اعزائى النشطاء
وربنا يخليكم لجمعنا
باهلنا واحبابنا


عوض دكام + ابد داؤد من اشهر الشخصيات السودانية .. رحمهم الله

دكام كان مدير مستشفى الاسنان وشالوه من المنصب .. وجابو مدير جديد
واحد من اصحابو لقاهو بيتحاوم بى بره .. قال ليهو مالك يادكام حايم بى بره ...رد دكام .. ياخوى ماضرتى جوه مابقدر ادخل ( بيقصد المدير الجديد )0
**************

قالوا يوم ابو داؤود كان شغال حفلة وانتهت متأخرة ناس العرس اصروا عليهم يبيتوا في بيت العرس وفي الصباح ابو داؤود بتسوك في الماسورة جات ماشة بي جنبه مرة كبيرة في السن قالت ليهو إمبارح العب ساهر بيكم يا ولدى.. قال ليها والله ياحاجة العتب على النظر
*****************************
قالوا ابوداؤود كان شغال حفلة وبعد ما غني الفاصل الاول الجماعة نادوه للعشا فعلي حسب عادته قال عاوز يتعشي مع الجمهور
قام قعد في طربيزة ومعاه مجموعة
جات الصينية الاولي عاين فيها لقاها فقهة (رقبة)..عاين للصينية التانية برضو لقي الضلع فقهة (الجماعة كانوا ضابحين خرفان كمية)التلتة برضو كدا
قام نادي العريس وقال ليهو اسمع يا خوي انتو ضابحين زرافة ولا شنو؟؟
***************************


قالو ابو داؤود مشى بيت فرح على اساس احياء حفل ،
لاكنه وجد الفنان القدير المرحوم / خضر بشير واقف على المسرح ويغنى
ومعروف المطرب خضر بشير انه ينفعل مع الغناء
عندما وصل ابو داؤود ووجد هذا المنظر سحب ليهو كرسى وقعد
يتفرج وهو زعلان جدا ، وكان امامه طفل واقف يشاهد فى المطرب خضر بشير
قام ابو داؤود قاليهو ابعد كدة ولا كدة يا ولد ، اوعى تطير فيك شلوفة ولا اصبع يفلقك
*************

مرة عوض دكام جاء داخل العيادة بتاعته لقى في كشف المرضى
اسم فتحي فرج الله لاعب المريخ زمان ... وبعدين ما كان شافو قبل كدا
طبعا فتحي فرج الله عيونو في نص راسو ) .المهم دكام عاوز يشوفو قام ناداهو أول واحد)
لما دخل عليه ، دكام اتخلع بي شناته ، كان متخيله نجم وجيه
قال ليهو انت فتحي؟ قال ليهو أيوة أنا فتحي
دكام رد بسرعة طيب فرج الله يكون كيف ؟؟؟
******************
ابوداؤد كان بغنى فى حفلة والصف الاول كان
كلو جكس حجم عائلىكلو واحدة اسمن من التانية
وبعد الاغنية الاولى قام الجماعة كوركو ليهو
بالله يا استاز فريع البان ...قام عاين ليهم وعاين
للصف الاول...وقال ليهم فريع البان كيف مع
شجر التبلدى بتاعكم دة

****************
عوض دكام قال فى واحد

مشى يقلع ضرسو فى مصر

الدكاترة قالوا ليه يا زول

ما عندكم دكاترة اسنان فى السودان

السودانى قال ليه فى دكاترة

بس الحكومة مانعانا نفتح خشمنا

***********************

عوض دكام قال جاتو واحدة

جميلة جميلة جميلة

قدر ما فتشها لا سوسة ولا صفار

ولا الم ولا التهاب لثة

قال ليها انتى ما عندك حاجة

مشكلتك شنو؟؟؟

قالت ليه عارفة بس جيتك تعمل لى فلجة

***********************
مره عوض دكام كان واقف في محطه البنزين
ومعهو زوجتو في العربيه الكل كان يعاين ومزهول بالجمال واللون الابيض اللامع دا
عوض دكام نزل من عربيتو وقال ليهم ياانتو ماشفتو ليكم سندوتش جبنة بالزيتون قبل كدا
**************
عوض دكام قبضوه ناس الدورية

وما بعرفوه

يا زول شايل شنو فى الضهرية؟؟؟

قال ليهم جنا حرام

يا زول نحن ما بنهظر

فتحو الضهرية لقو بيض

قالوا ليه انت بتلعب علينا؟؟؟

شايل جن جداد تقول جن حرام

قال ليهم وده ما جن حرام

شفتو ليكم ديك عقد ليه على جدادة؟؟
*****************

قال ليك ابو داود كان بغنى فى عرس والحفلة اشتغلت لحدى الصباح، ولغاية الوقت ده العروس والعريس ما جو، ولا شاف ليهو عروس ولا عريس لحدى ما الحفلة انتهت، بعد ما الحفلة انتهت قام قال للجماعة فى الميكرفون

انتى يا اخوانا عرسكم ده خبر ولا شنو
*********************

ابوداود كان فى رحلة مره فى بورتسودان، بعدين الجماعة طبعا ضابحين ومهيصين وبعد الضبيحة قاموا جابو المرارة والشيه وبدو ياكلو، بعدين من ضمن الأكل كانوا عاملين ليهم خروف كامل معلق فى شواية والنار مولعه تحته والدخان ضارب

قالو ليهو تعال يا عبد العزيز شوف المراره دى

قال لا ما عايز، انا مستنى الكمينة ديك تطلع
*******************
عوض دكام بقدم فى قعدة فيها على ابراهيم و زيدان ابراهيم اول ما بدأ على ابراهيم غنى تمساح اب كبلو الضارب الليه ،،، عوض دكام نطى لى طوالى قال ليهو التمساح الابلعك حسى دا وكت تماسيح زيدان عليك الله وسط الزهور متصور
************
قال ليك عوض دكام كان فى فراش بكا
وكان يوم رفع الفراش وعوض دكام مشى عشان يدفع فى الكشف

واحد من اصحابو قال ليهو انت يا عوض مفروض تدفع بالدولار
عوض دكام قال ليهو لية فارشين فى السوق الحر
*****************

في عيادته في بحري وهو يعالج احد المرضى
..وعنده تلفزيون في داخل العيادة وبدأت مباراة هلال مريخ
..ومعروف عنه انه لازم يحضرها في الاستاد
...خرج الى الصالة ووجد مجموعة كبيرة من المراجعين والمرضى
...واتلفت الى التلفزيون ورأى ان المباراة ستبدأ ...فالتفت الى المرضى قائلا

انتو عاوزين الجد ولا ابن عمو؟
انا من ما فتحت العيادة دي ما شفت واحد كتلو ضرس
امشو وتعالو بكره
وما في زول بيكتلو ضرس
***********

في مرة سايق العربية بتاعتو
وقف في اشارة
اتلفت يمينو لقى
حامد بريمة
حارس المريخ السابق
سايق لفت باك حمراء جديدة
ضرب ليهو العربية بيده
وقالليهو

ياعب لو ما كورتك دي
والطب بتاعي ده

كان مكاوينا تتطاقش
****************
بمناسبة حامد بريمه
قالوا الزعيم فيلب عباس غبوش كان عندوا ندوه فى العشش

قام قال للجماعه ... اولاد ارب ديل هقارين شديد
كل شئ يشيلوه هم ويدونا شئ تعبان
حتى فى كوره دى مصطفى النقر يودو لى قدام وحامد بريمه
يخلوه اخر واهد فى الفريق

شوف ليك هقاره
***************

ومن الطرائف التى يحكيها عبد العزيز محمد داؤود عن زوجته
الفاضلة فوزية محمد حسين انها ابان الفترة الاولى من زواجهما..
ظلت تسال عبد العزيز كحال اى عروسة جديده تود ان تعبر عن حرصها على زوجها..
تساله:عبد العزيز ماشى وين ؟؟
يقول: الاذاعة…
هى: وحتجى متين انشاء الله ؟؟؟
هو :بعد ساعتين..
و فى وقت اخر:عبد العزيز ماشى وين؟..
هو عندنا حفلة عرس فى امدرمان...
هى :وبتجى متين انشاء الله ؟؟؟
هو: بعد اربعة ساعات
..وهكذا من يوم لاخر..وفجاة بادرها يوما...تعالىانتى يا فوزية انا مؤجر منك عجلة!!!!!؟؟؟
*****************
في واحد مجنن أبو داؤود
كل ما يشوفو في حفلة أو قعدة
يقول ليهو يا أبو داؤود عليك الله
زهرة الروض .. الأغنية دي بترجعني
!!! عشرين سنة لي ورا
أبو داؤود زهج من الزول ده
يوم قال ليهو ياخي زهجتني ، أسمع إنت عمرك كم سنة ؟؟
أخونا قال أربعين سنة
أبوداؤود قال ليهو خلاص أنا بغنيها ليك مرتين
!!! عشان ترجع في بطن أمك ونرتاح منك ياخي
*************
كان فى فنان اعمى وعامل عملية حبس بول
قام ابوداود مشى ليه زيارة فى المستشفى
وبعد السلامات والتهانى بالسلامة
قعد يتونس مع باقى الناس الجايين للزيارة
قام فجاة كده ابو داوود سكت مسافة طويلة وباقى الناس بقوا يتونسوا
قام الراجل العيان سمع صوت الناس بس وقايل ابوداوود مشى ولا طلع من الاوضة
قام قال ليهم انتوا العب ده مشى ولا شنو
ابو داوود رد ليه
انت علشان حركاتك دى الله قاطع منك موية ونور
**********************
في لقاء في التلفزيون مع ابو داؤود و فى فقره الاسئله الخفيفة
سأل مقدم البرنامج الفنان عبد العزيز داؤود عن اسامي بعض المشاهير
يعني لو ما كانو وصلو لي الوصلو ليهوالان كان حيطلعوا شنو .
قام المقدم سالوا عن محمد الامين , ابو داود قال ليهو شايل كورتو و قاعد جنب الجامع الكبير
*********************

قالوا عوض دكام لمن كان فى الدفاع الشعبى جاكين فى الكلاكله
وعطشوا ... مروا بى شفع كده قام عوض دكام قال لى شافع جيب لينا
جك مويه ... الشافع جاب المويه وسال دكام
انت شغال ويني ياهناى ؟
دكام قال ليهو انا دكتور
الشافع عاين لى صاحبو وقال ليهو ….. العب عايز يدقس بينا يافرده
ياخوى اشرب مويتك دى وادينا جكنا
قال دكتور قال
**************

عوض دكام يوم جاتو واحدة من بنات اهله زعلانة وبتحكي ليه:
قالت ليه كنت راكبة عربيه مع واحد شغال فى الحكومة
نظام فضل ظهر وكدا اسموا يونس النباح الذى اشتهر بتقديم التعليق السياسى
بعد نشرة ثلاثة فى الاذاعة المهم الراجل دا سالنى رايك شنو فى حكومتنا
قلتو ليها سجم ورماد نبزنى ونزلنى من عربيتو،

فرد عليها عوض دكام ليطيب خاطرها هو نبز خادم الحرمين الشريفين خلي انتي يا خادم العباسية

--------------------------------------------------------------------------------


قالوا يوم ابو داؤود كان
شغال حفلة وانتهت متأخرة ناس العرس اصروا
عليهم يبيتوا في بيت العرس وفي الصباح
ابو داؤود بتسوك في الماسورة جات ماشة بي
جنبه مرة كبيرة في السن قالت ليهو إمبارح العب
ساهر بيكم يا ولدى.. قال ليها والله ياحاجة العتب على النظر
*****************************



أبو داؤود كان سايق عربيتو أشرت ليهو واحدة
متحنكشة دايرة تملح
وقف ليها وقام شغل شريط خاص بيهو أغنية نعيم
الدنيا وهي طبعاً
ما عارفة انها راكبة مع أبو داؤود في نص الأغنية سألها
بتعرفي الفنان
دا قالت ليهو فنان شنو دا حمار قال ليها قلت شنو قالت
ليهو قلت ليك
دا ما فنان دا عبارة عن حمار ياي ... أبو داؤود وقف العربية
ونزل مشى على الباب الراكبة جنبو فتحو
وقل ليها تنزلي والا أرفسك .

يااااااااااااه بالجد ضحكت حد الهسترة وكنت جاي من احدى ضواحي كاودة مرهق شديد وزهجان بس والله كنت قمة النشوى انت منسجم مع المقطوعات الشيقة عن اناس هم الاظرف في تاريخ ام درمان والسودان والاكثر تسامحا مع انفسهم قبل الاخرين الا رحمهم الله واسكنهم فسيح جناته
وشكرا ليك يا سهاد

نعم الكل يسأل عنك يا حيدر.....أين أنت؟؟؟؟؟
شكرا سهاد على هذه المبادره الكريمه وسؤالك عن العزيز الصديق/حيدر خليل.
وكمان مشكوره على الاستراحه الجميله مع دكام وابداؤود

وينك يا حيدر ؟ كل الامكنة تسأل والعيون تتطلع في عيون القادمين والراحلين تسأل عنك فهل من مجيب؟
تعال من رحلة الغياب الى حيث حضورك البهي الذي يثلج القلب ويعيد للروح بهجتها

الحمد الله انا طلعتك من الحاله
الانت فيها
وانا عارفه زهجك
ما ارهاق ولا حاجه
البعد حااااااااااااااار
يا عريس
قول لى الحلوه نوره الحساب يجمع
لازم تدفع لى حاجه على التفريقه دى
وتحياتى ليها
(واين انت اخى حيدر)

تسلم اخى عوض السيد
ومشكور على الاضافه
والله اخى حيدر خليل
عزيز على الكل
والكل فاقده
بس انا شفت غيابه طول
وقلت اقول حاجه
عسى ولعل
يلبى النداء
عشان خاطر الحباك

اقترح نجيب البنابر والكانون وعدة القهوة ونقلي البن امكن يجي لانه بحب القهوة
ولا رأيك شنو؟
اهو منتظرين معاك يا اخية

والله كلام زى الورد
اخيتى الدكتوره
وكان القهوه
ما جابتو
نجيب ست الودع تشوف الكلام
ده كيف

الاخوات سهاد واحسان الاخوان ابوابراهيم وسماعين ودهجانه والفاتح ودالتوم وزهير ومحمد ول نويه وكل الاخوان والاخوات لكم مني التحيه والاحترام والتقدير واشكركم كتير علي سؤالكم عني الكتير ويااخوان والله انا متلوم ومقصر كتير في حقكم وفي حق الحباك بابتعادي هذه الفترة الطويلة عن المنتدي ومافي اي سبب والله ولكن الله غالب واوعدكم انشاء الله بالتواجد الدائم والمستمر اسال الله ان يديم المودة والمحبة بيننا
شكرا ول نويه علي كل ماتقوم به فانت رائع
اعتذر كثيرا للاخ ياسر وابوالزهور للغياب الطويل والانقطاع.

مرحب بعودة العزيز حيدر ...ويا دكتورة أها السهلة جاهزة والبنابر جاهزة وزيرنا ساااااااااااااقط راقد في صدر الهمبريب...باقي إلا تجيبي كانونك وعدة القهوة والبن ..باقي ابوعبدالله دا كيييف قهوة بالحيل...وشكراً "سهاد" ست البوست الذي أعاد لنا أبوعبدالله

غايتو يا اشرف اخوي خلي الدميعات يكملن علي الازيار المغسلة بالطوب والبنابر والعنيقريب بعدين نجيك راجعه

الغالي ابوالزهور العزيزان الاشرف والدكتورة احسان شكرا لكم ويااشرف ازيارك عطشننا عديل اما الدميعات نتركه للدكتورة وسهاد

ول نويه لك التحية والتجلة والتقدير ياخي والله اخجلتني وده من كرمك انت والله النورت ايامنا بطلتك البهية وبذوقك وكرمك لك كل الشكر ايها المسيري الابي

يا سلااااااااااام
يا اخوى ود البشرى
والله
الدميعات اصلن قاعدات على الهبشه
بس عايزه اغسلهم بالنقاط
بتاع الزير ده
واجيكم
بعد ما الدكتوره تكون
جهزة الشاى الما خمج
(ول نويه شاى الدكتوره ده
ما تشطفه شطف اشرطه شرطت دبلان)
مشكورين اعزائى
ومشكور اخى حيدر على تلبية النداء
وتانى ما طول الغيبه
وعقبال الغائبين
يظهرو