خبار دروب الفتر ( الشــــــــــــــــــاي )

طبعا يا جماعة الواحد فينا مدمن شاى ، الناس تدمن حاجات تانية ولكن نحن شاي بس
وكلكم عارفين إنو للشاي طقوس خاصة عندنا في السودان عموما وناس الحباك خاصة ، فمن الأسماء التي تطلق على الشاي عندنا على سبيل المثال لا الحصر :
1ــ الكمكلي ـــ خبار دروب الفتر ــ وأبوشعيرة وغير ذلك من الأسماء، وكمان أهلنا العرب في البادية ليهم مشكار خاص للشاي ، يقال في مرة من المرات جاء احد إخوتنا الجنوبيين عند بعض البدو وهو خرمان شاي ( الشاي راميهو عديل كده ) وإن كان الجنوبيون بصفة عامة لا يحبون شرب الشاي كثيرا ،المهم أخونا جاء وقعد وطلب كباية شاي قام واحد من الجماعة قال ليهو والله الليلة لو ماشكرت الشاي ما بنعطيك ولا جغمة ، تلفت أخونا الجنوبي شمال ويمين ولا يدري ماذا يقول وفجأة قال :
وه شاي إنت أمك أسود وأبوك أبيض إنت بجي أحمر من وين ؟ فضحك الحاضرون وقالوا أعطوهو شاي
وفي المشكار أهلنا بقولوا ( الشاي حلاتا ما حلا كان أنطيطا للصغير برسل ليكا عجلة عجلة وكان أنطيطا للفقير بكتب ليك البسملة ) وهناك الكثير مما قيل عن الشاي وطبعا أهم حاجة يا جماعة عندنا في أبوجبيهة عن الشاي هوما يعرف ب (الفونكا)
ما هي الفونكا لمن لا يعرفها ؟
الفونكا يا جماعة إنو الواحد أحيانا يكون خرمان شاي لدرجة أنه لا يطيق الكلام مع أي شخص ويكون ساكت وملتزم الصمت بس بعاين بعيونو وفجأة يقوموا يدوهوا ليك شاي صاموتي بعدل الدماغ فتلقاهو يجيب ليك كلام ما أنزل الله به من سلطان
يذكر أن أحد مشايخنا الكبار في أبي حبيهة جاء لبيت بكاء وجلس زطبعا الناس مترصدنو لانو صاحب فونكات عجيبة فواحد من الجماعة قال يا ولد جيب الشاي ، وشيخنا ساكت لم يتفوه بأي كلمة فأول ما جابو ليهو الشاي مسك الكباية وشيت رشف الجغمة الأولى وحط الكباية على الأرض وقال : والله توا حالا كي تلقى العربات في الخرتوم ( للخرطوم ) إلا تيت وتيت تيت (نسبة لزحمة العربات في الخرطوم وإستعمال منبة الصوت كثيرا) فإفجر الجميع بالضحك
ويا جماعة طبعا الفونكات كثيرة بس الواحد ما عاوز يطول عليكم بس بطلب منكم أي واحد لو جاءه ضيف وجاب ليهو شاي فلينتظر ماذا يقول هذا الضيف بعد رشفة أول رشفة ، بس يصور المنظر صورة وصوت ولكم التحية

الاخ سيف لك التحية واتحفتنا بمواضيعك الجميلة وزي ماقال الجنوبي الاحمر ده جاء من وين وفعلا الشاي كيفو عجيب وكان من المدمنيين للشاي اخونا ابوالزهور ويظهر انو بعد ذهابه لامريكا قلل من الشاي واذكر انو لمن كان يجي السودان في الايجازات كنا بنستمتع معاه بشرب اللبتون لانوكان بيجيبو بالكميات وكان شغلنا الشاغل شرب الشاي.

أخونا دكتور حامد والراحل الصديق عبدالله قادم عليه رحمة الله ( آخر عهدى به عند خورالجبل فى خريف 1997 سايرا متدرعا سلاحه ) رحل فى ظرف مأساوى - هذا الثنائى كان من البارعين فى إبراز مناقب الشاى عندما كنا طلابا فى الستينات أما أخونا حيدر خليل فهو رجل مفتون بالجبنة فلا حديث له فى هذا المجال ، أحب الشاى ولى طقوسى الخاصة وعندما أكون قادما للسودان أحرص على أحضار كامل زادى منه ولعلى أنجذبت لأهل والدتى القمارة أو البرابره فى حبهم للشاى وكان أخونا فتح الرحمن بلال من الذين يعشقون الشاى عليه رحمة الله كان لا يحتمل حتى الإزعاج أثناء شربه للشاى قائلا لى وأنا صغير .. ما تهوسنا خلينا نشرب الشاى ..وخبرت جميع أنواع الشاى الهندى والسيلانى والكينى والصينى وأقتنى دوما هذا الوليد الأحمر برغم بياض أبيه وسواد أمه إلا أنه جنى حلال وللشاى نكهات متعددة أدخلها علية الإنجلير كنكهة إيرل جراى والتى تعطر برائحة البراغموت وهى شجرة عطرية من فصيلة الليمونيات وتلك نكهة أحبها جدا ، وهناك نكهة شاى الفطور الإنجليزى دارجيلنج ونكهة الفطر ونكهات أخرى عديدة ومعظمها من نكهات الفواكه وشرب أهلنا الشاى بنكهات النعاع المتعددة والقرنفل والهبهان والغرنجال والجنزبيل والقرفة ، ولعل أجمل كباية شاى شربتها فى حياتى وظلت عالقة فى وجدانى شربتها فى قرية قبل ربك إسمها الرقيق فى التسعينات وأخرى شربتها فى رشاد وعلى وجه التحديد فى25 مايو 1978 فى منزل الأخ عبدالعظيم حامد أيام زواج الأخ صالح الحاج وهذه الكباية كانت من يد شخص أكن له ود خالص ، وكان والله وقتها أبوعركى على جهاز تسجيل مغنيا سوّا ليكم بإيدينا شاى ...وأنا كأنى ما كأنى ..... وحليل زمن الصبا الماضى .. وحليل وكت الحبيب راضى ..وغوّر يا جرح إن شالله ما بريتا.

بالجد خرمتنا عدييل كدة بموضوعك الجميل ده عن الشاي ورجعتنا لبلدنا وانا طبعا من مدمني الشاي وده تنبيه !للجميع لو واحد فيكم عزمني في بيتو وما كتر لي الشاي بشيل حالو0في بعض الطرايف في الشاي حكاها لي عمي ربنا يديهو الصحة والعافية قال لي في واحد هداي نزل عند واحد شيخ حلة والشيخ لم يدري هو هداي لم يكرمو كرم البادية اها لمن جاء وعمنا سالو من الشيخ قال ليهو (ضبح لي فروج وأكله معي واسقاني شاي صليقي){الصليقة } :للانسان المابعرفا يعني بدون سكر {والفروج }:الديك الصغير0 واهلنا لديهم مسميات كتيرة للشاي وكذلك التشكير واخونا ما قصر واضيف ليهو تشكير للشاي (جاجيبة حلو شرابة وغالي جيبة)
طبعا الكلمة (جاجيبة) لم اكتبها بمعناها الاصلي او عند اهلنا المهم اقروها ثلاثة اصفار تحت الحرف جيم وبعداك براكم بتعرفوها