المقامة التاريخية لتوثيق الأعجوبة الصفرية الهلالية الدولية

* الحبيب خالدونا منتشي اليومين ديل، وشغال غنا بمزاج!
* شقى شقى شقى.. ولقى لقى لقى!
* ويا بنات بحري.. مرة حبونا وأطفوا جمر الشوق، ومرة مرة زورونا في الصبابي الفوق!
* وغصن الرياض المايد.. يا الناحلني هجرك وإنت ناظر وساهي!
* رحم الله المبدع رمضان زايد.
* خالدونا آخر نشوة، وحبايبنا الهلالاب مبتهجين على سنجة عشرة!
* عاذرنهم، فرحهم طبيعي، ومتوقع، ومنطقي، لاهو غريب ولاهو عجيب!
* والسبب معروف: الهلال حقق أعظم إنجازاته عبر التاريخ!
*عمل شنو؟ هزم المريخ!
* عندو شنو فوق كدة؟ جاب كاس قاري؟ وللا شال بطولة جوية؟
* تفوق على المريخ بفارق هدف، نسوا الشكوى، وبلنتي يوسف، وخيبة الجعرانية، وأحلام زلوط المونديالية، والمحصلة الصفرية، وحالات الإغماء الجماعية، والبكاء ما بجيبو ليا!
* الصفر الما بنقدر، أقدم ثابت كروي في تاريخ السودان القديم والحديث!
* غلب الدوا والطبيب!
* حضر التركية السابقة وعاصر الإنجليز، وواكب حريق المك، وشاف سلاطين باشا، وزامل كتشنر والمستر كلارك واللورد كرومر، وعايش لحظات رفع العلم وثورة أكتوبر واستشهاد القرشي والديمقراطيات الثلاث!
* الصفر العنيد، قاتل مع قوة دفاع السودان واتطوع مع سلاح الهجانة، وحضر الأزهري وعبود والنميري والصادق وزروق.. وما راضي يروق!
* وحا يحضر استفتاء الوحدة أو الانفصال، وأكيد أكيد حا يصوت للوحدة.. مع الهلال!
* حتى الانقلابات ما فاتها، خالد الكد وهاشم العطا وحسن حسين ومحمد نور سعد!
* وفي زمن الإنقاذ.. رفض أي إنقاذ!
* الصفر أقدم من الكسرة، وقاعد من زمن الزمام أب رشمة!
* حضر زمن الكركار ودق الشلوفة والرحط، وحضر زمن البوتكس والسيلكون والكريمات والتاتو!
* الصفر متحكر من زمن البرش بي قرش.. والدقة بلاش!
* غنى مع زنقار.. وكمل حقيبة الفن مع كرومة وسرور وعوض شمبات.. والصفر ما فات!
* عاصر زمن أم بلينة السنوسي وعشة الفلاتية ومهلة العبادية، وغنى مع ريماز ونانسي وشموس!
* حضر العبادي وود الرضي وود البنا وود القرشي والسر قدور، وحضر زمن جمال فرفور!
* كرومة لعب وفتر.. وسرور غنى وما قصر.. والصفر لسه محكّر!
* حضر زمن الأنادي والدلوكة والرايات.. وعاصر زمن الشريعة والنظام العام!
* عايش من زمن الناس بتضبط ساعاتها بالقطر.. وتركب المفتخر!
* حضر زمن اللحمة بالوقّة والعيش بالملوة وجوز الحمام 3 فردات!
* وقدل في الطريق الشاقي الترام، وباع واشترى بالمليم والفريني والشلن والريال والطرادة، وحضر زمن اليورو والدينار والدولار الحار!
* اتعالج بحبوب السلفة في الشفخانة، وحكمة الله لي هسة قاعد معانا!
* حلق الكاري والخنفس وشق شعرو مع إبراهيم عوض، وحضر المارينز والراستا، وأكل المديدة والباسطة!
* كتب عنه كوركين أسكندريان وأبو آمنة حامد وعمر علي حسن.. وحضر زمن دسوقي وشجرابي وعائس!
* وكتب عنه خالد عز الدين، وكان ما أخاف الكضب أقول الصفر قاعد معانا لي يوم الدين!
* عاصر الخديوي ونجيب والسادات وعبد الناصر، وصاحب عرابي وعلي ماهر!
* وحضر زمن هيلاسيلاسي وتمبلباي وحسين هبري وجكوني عويدي وعيدي أمين وموسفيني!
* وعاش مع الملك الحسن وشهد خلافة ابنه في المغرب، وحضر زمن الملك حسين وابنه الملك عبد الله، وعاصر عهود الملك عبد العزيز، والملك فيصل، والملك خالد، والملك فهد، والملك عبد الله!
* وفي السودان عاصر زمن الناس بتسمي خشم الموس والكجم وتور القوز واللدر والدود وعشا البايتات!
* وحضر زمن مهند وهيثم ورامي!
* شاف سعدية الداية، ودكتورة خالدة زاهر، وحضر دكتور لؤي كشف علي!
* وحضر زمن فاطنية، وأم ضيفان، وعشوشة، والسُرة!
* حضر زمن نانسي وناريمان وسوسو!
* وحضر زمن بوكاسا.. ولعب الرمة وحراسها!
* الصفر عايش من زمن الدوم بالطبق، وقراصة النبق!
* وعاش في زمن البيتزا واللازانيا والهوت دوغ والكرانشي بيرغر!
* الصفر اتعالج بالجردقة والمحريب والقرض والحرجل، ومشى لي جبارة الكسور بت بتي!
* واتعالج بالبنسلين والتتراسيكيلين والإمبسلين والليزر!
* وحضر الضلام والدمبعلو والبعاتي وحجا الحبوبات!
* الصفر حضر زمن الحمام الزاجل والجواب والتلغراف!
* وقعد لي زمن زمن الموبايل والنت واللاب توب والياهوو والهوت ميل والفيس بوك!
* الصفر حضر زمن الخوسة والسيف والسفروق!
* حضر زمن الليزر والقنابل العنقودية والأسلحة النووية!
* عاصر الحربين العالميتين، حضر تشييد وسقوط حائط برلين، وشارك في بناء سور الصين!
* وحضر زمن كتلة عدم الانحياز وغنى مع كابلي لي ناصر وجومو كنياتا وسوكارنو ونهرو وتيتو!
وشارك في حرب فيتنام، وتابع أزمة خليج الخنازير، ومقتل كيندي، ونضال جيفارا، وثورة كاسترو، وعاصر ثورة ماو في الصين!

* حضر زمن الكلبة لايكا، وصعود الأمريكان للقمر، ووثق انفجار تشيرنوبل وهيروشيما وناجازاكي!

* عاصر زمن الهمباتة، وغنى مع خلف الله حمد (الكنداكة سيدي سيد الأراكة)!



* وركب مع طه الضرير وود ضحوية في جمل واحد، وحضر زمن (بكرة الهمر جاية)!



* الصفر قاعد من زمن القراية أم لوح، وما بعيد يكون ركب في سفينة نوح!



* الصفر نده سيدي الحسن أب قبة لبنية، وزار الشيخ حسن ود حسونة طباب المجنونة!



* وعاش معانا عهود ندى القلعة وستونة!



* هز مع الدلوكة والشتم، ورقص التوتيستي، ولبس الشارلستون، والساعة الرومر، والنضارة البيرسول، وحضر زمن توب الزراق الجابوهو النقادة، والقنجة، وأب قجيجة، ورسالة لندن، وجكسا في خط ستة، وتحرمني منك، وعاش لي زمن الكارينا والبودي!



* وقالوا صفر 2010 (داقي سيستم) بالشكوى ضد التوانسة!



* ومن وين وكيف لمتين.. يا شكوى ضاعت وين!



* يا صفر يا مرتاح، بين الدموع العين!



* 81 سنة.. والصفر الثقيل ما راضي يستقيل!



* الصفر الدولي أعرق من الطابية المقابلة النيل، وأقدم من بوابة عبد القيوم، وأشهر من دهليز صالح جبريل، وأقدم من سبيل خلف الله!



* وجلده أتخن من سور سجن أم درمان وسور دار الرياضة أم درمان!



* حضر زمن السحارة وزمن الدواليب!



* وحضر الديب فريزر والمشلعيب!



* مذنب هالي مشى وجا فيهو 3 مرات!



* الصفر قاعد من زمن دار الضلمة، وقهوة جورج مشرقي، وسان جيمس، والسينما المتجولة والعيادة المحولة!



* دخل سينما برمبل وكلوزيوم والوطنية!



* ويا زوووول، ده حضر زمن عفراء مول!



* الصفر مشى في سوق أم دفسو، وسوق أم سويقا، وسوق خمسة دقايق، واشترى من الملقة و(مليون صنف)!



* وعمرو طال لغاية ما شاف المول والأسواق الحرة والتجارة الإلكترونية!



* الصفر حضر زمن صفرجت وسكج مكج والسيجة وأم الحفر وشليل وينو!



* ولعب بلاي ستيشن وأتاري، مع أولاد ديمبا باري!



* عاصر زمن الهيلمان والهينو والكندة والهنتر وكومر الكشة.. وركب الأمجاد والركشة!!



* ركب الترماي واتحكر في باصات أبو رجيلة، وحضر زمن بيع التمر بالكيلة!



* الصفر قاعد من زمن (الشدة) و(تموت تخلي)، والهلال ما راضي يخلي!



* صفر معمر، لعب مع منزول وممي وقاقا والدحيش وجكسا وباكمبا، وزامل سيدا وسادومبا!



* المريخ فاز بكأس مانديلا.. والصفر العالي ما اتدلى!



* الصفر شاف سيكافا، قال النجمة قيافة!!



* وشاف كاس دبي، قال الله لي!!



* وشاف كاس الشارقة، قال النجمة حارقة!



* الصفر شهد تهجير الفلاشا، وقاعد من التركية لي نيفاشا!



* حضر مجاعة سنة ستة وزمن بيع الباسطة بالحتة!



* صفر الجن، الما راضي يحن!



* عاصر الخريجين الأوائل، ودرس في كلية غردون، وعاصر بابكر قباني، وآدم رجب، والطيب عبد الله، والسماني، والبلولة الرجع تاني!



* وحضر زمن الأرباب وقرأ عمود (بدون حجاب)!



* الصفر والهلال أصحاب أصحاب!



* مش من حقو يقول: صفر.. وأفتخر؟



* يا صفر.. أرحم شوية.. وأهدي لي لحظات هنية!



* خلاصة الزبدة: كان شالوه ما بنشال.. وكان خلوه سكن الدار!



* آخر خبر: ده ما الرماد الكال حماد.. ده أقدم صفر دولي في التاريخ!

المعلقة الصفرية يجب ان تعلق في زريبة العيش
معلقة الهلال الصفرية
صفرية الهلال على وزن عينية سويد بن ابي كاهل اليشكري

ود النو عليك الله أرجانى أرقص معاك بكره لأن هسه خلاص ماشى أهلى

الغريبة نحن سبب أزيتكم وطيرانكم من البطولة الأفريقية وبرغم صفرنا ختمنا على خروجكم الأفريقي شفتو إزاي يا ود النو ؟؟ .
نفخر بهذا الفريق والتالتة ثاااااااااااااااابتة؟؟ والسنة الجاية بسببنا سنتفضل عليكم وسترافقونا في بطولة الكبار دوري أبطال أفريقيا؟؟يا ضلنا ؟؟نسوقكم معانا ونطيركم يا ضلنا؟؟؟
كدي عاين في الشبكة شوف التلاتة ديل قاعدين وين؟؟؟
متعووووووووودة دايماً؟؟على التلاتات؟؟

دا مقال خالد عزالدين سبب أزية مزمل أبوالتالت
منقوول - خالد عزالدين

جابت ليها سواطير كمان !!
نفسي أعرف جماهير المريخ دي زعلانة من سفاري لييه ؟ سفاري ده بخت التشكيلة ولا بدخل الميدان براهو ؟
مش في مدرب بشوف اللاعبين كلهم في التمارين وبعدين بختار التشكيلة !!
ولنفترض أنو اللاعب كان كويس في التمارين وفي المباراة سيئ .. مش ممكن المدرب يبعدو من الشوط الأول ..
إذاً جماهير المريخ من المفترض أنها تهاجم كروجر.. ولا عشان ألماني يعني ؟ دي التفرقة العنصرية البتخلينا ننفصل ذاتو !!
ما تفرقة عنصرية يا خالد.. الناس ديل ما أصلا عندهم مرض الجاسوس الأحوص!
عينهم في الشغيل ينبذو ليك الفاضل أبو شنب ..!
سفاري ده من زمان مدرب المنتخب (قسطنطين) خت رأي واضح فيهو .. إعلام المريخ كلو وقف ضد قسطنطين .
قالوا سفاري كان ماشي يصلي !! عشان كده اتأخر !!
أها سفاري بلا صلاة بقى يتأخر ..
ويتأخر وين .. في خط 18 ..
ودي أول شكلة لي سفاري مع الجمهور !!
قبل كده مش الجمهور غضب من سفاري لما اشترى عربية فارهة وتراجع مستواه !! مش سفاري قال للجمهور وإعلام المريخ أنا تاني بجي التمرين بي طيارة ؟؟
الناس دي بتنسي ولا شنو ؟
ويقولو ليك المريخ مر الموسم ده بي عوارض كتيرة ..
طيب الموسم ده خليناهو .. الموسم الفات كيف ؟
إيداهو حي وكلتشي شديد وطمبل ينطط ووارغو ما تفارقو والعجب في شبابو وسفاري ذاتو بي عربيتو بجي التمرين ..
النتيجة شنو ؟
الهلال بطل الممتاز والمريخ طيش دوري المجموعات ولا فوز وحيد يا كافي البلا .. لا في الرد كسل ولا في الرد الشافي !!
ويا شافي يا كافي ..
وعينهم لي بشة يجيبوا ليك هنو !!
يا حوووصة.
وتاني رجعنا لي قصة جمال الوالي ..
زي التقول جمال الوالي لما كان بخاطب اللاعبين زمان المريخ كان بشيل الدوري !!
وده كلو كوم وأكرم الهادي سليم كوم تاني ..
أكرم على طريقة تصريحات (همد) قال في تصريحات صحفية أنو اللاعبين الأجانب قلبهم ما حار وأنو المريخ كان بلعب بي إيداهو بس زمان، وأنو لاعبي المريخ كانوا بعملوا بروفة للاحتفال بالدوري قبل مباراة الهلال!!
يا شلباية !! في دوري تاني غير الدوري البنعرفو ده !!
المريخ ده قبل أكرم يجي وبعد أكرم جا فاز بالدوري الممتاز من عام 2003 مرة واحدة فقط لا غير !!
البروفات دي كنتو بتعملوها وين يا أكرم .
وكان بتتكلم عن كاس السودان نذكرك سادومبا !!
احتمال غيابك الطويل عن الملاعب نساك..
مين قساك مين قسي قلبك .. وإيه نساك يا ناسي حبك .. ترررم
والله يا خالد عزالدين أنت بطريقتك دي يوم بجيك ساطور !!
أهو حكاية الساطور دي ممكن نقول عليها استعداد كويس وبروفة معقولة يا أكرم !!
يعني سفاري عارف أنو جمهور المريخ حيتحرش بيهو .. ما مجرب .. قام طوالي جاب معاهو ساطور !!
خسارة ما في زول صور لينا الساطور ده.
يا ربي من نوع السواطير الأنيقة الببيعوها في الشوارع اليومين دي ولا ساطور ناس زماااان القليد داك !!
يعني المباراة الجاية يا سعادتو (أحمد علي) مفروض تجيبوا معاكم خبير أسلحة بيضاء تخصص سواطير !!!
ما قلت لي .. الساطور أبيض جديد ولا أسود ؟
أوعى يكونوا غشوك يا سفاري وباعوهو ليك بي عشرين ألف !!
الجماعة الببيعوا في الشارع ديل أي سعر يقولوا ليك أقسموا على اتنين !!
يعني يقولوا ليك عشرة قول خمسة.. تمانية قول ليهم أربعة .. تلاتة قول ليهم تلاتة اتنين !!
والحكم صفر !!
الفاضل أبو شنب مسكين ..
قالوا كان مفروض يتدخل لإيقاف المباراة بسبب هتافات الجمهور !!
سألت أبو شنب أمس .. قال لي أنا ذاتي ما عارف الجمهور بهتف بقول في شنو ؟ ولا عارف الحاصل شنو ..
وقال هو ما بقرأ جرائد !!
على العموم جمهور الهلال في المباراة الجاية حيهتف ..
أبو ساطور أبو ساطور .. دي فيها حاجة !
برضو مفروض الحكم يتدخل ويوقف المباراة ..
هسة عليكم الله يا مزمل مفروض الحكم يتدخل ولا الحكومة تتدخل في حالتكم دي !!
بالمناسبة كلموا الحكومة تحل ليكم مشكلة الفلسطيني ده ..
شايفو عديل كده قال ما داير يلعب المباراة الجاية.
عمل فيها مصاب !
ما تضغطوا عليهو كتير عشان ما تدخلوا نفسكم في مشاكل مع جامعة الدول العربية.. خصوصاً وأنكم حكاية (العربي) دي ما بتقدروا عليها.
يعني من السبعة أجانب البدأ بيهم المريخ الموسم ممكن ما نشوف أي واحد في المباراة الجاية.
سبعة صنايع والبخت ضايع.
ولا غاسيروكا..
يا اخوانا أدوا الزول فرصة يمكن ربنا يوفقو..
هسة غاسيروكا ده لو نهيتوا عقدو .. حيرجع بلدو كيف.. لا جواز لا تأشيرة خروج.. أوعى تكونوا نسيتوا كمان تعملوا ليهو تأشيرة دخول !!
يا اخي دخلوه الكورة الجاية.. يمكن القصة دي تساعدكم في التأشيرة ..
على الأقل ممكن يشيل صورتو في المباراة.. الناس تعرفوا !!
اتخيلوا سفاري ماخد صورة مع الساطور !!
والله إعلان ولا إعلان عدس الوابل!!
من غير توابل ..
تحذير للجماهير.
المباراة القادمة تحت شعار .. سفاري شايل ساطورو !!
أي واحد عندو واقي من السواطير يجي لابسو.
حقو ناس المريخ يستفيدوا من القصة ويعملوا تعاقد مع محلات لحوم (الجزار)
النجمة والساطور في الشعار .. مبااااالغة ..

آخر خبر ..
الساطور في طابق شاخور !

ياحبيب اشرف الصفر اجباري ماعندكم اي طريقة للهروب منه الصفر التاريخي والهلال كل تجهيزاته وتسجيلاته المحلية فقط طموحة يهزم المريخ وما عنده اي طموح غير ذلك ياصفراب افريقيا والوطن العربي ومثلث برمودا وبحر الظلام.
قف صفرا يالراكب الصفرية الشوق على كاسات افريقيا الجوية
المثل بقول (( عشم الهلال للكاسات الجوية))

بس خايفين من خدورها امبشق ادينا بالتقيل

يا ابوابراهيم منتظرين عمنا خدورها امبشق عشان يرد على صفرية ابوالهل فريق الرشاشات

الحال يغي عن السؤال عزيزي اشرف
حال الكفـــــــــــوة

يااخونا صالح تقصد المقبرة ولا المفخرة وضح 2000 كرسي وين في اي استاد

هؤلاء صفراب ومفاضيح افريقيا يا ود النو.
السمى الغالبه فيهم فقدان المنطق لحظة الذل والهوان.
يأتون بأخبار نصفها مبتور والنصف الاخر منسوج من الخيال.
المزعلهم رفض التاريخ أن يتلطخ بعرقهم الا فى حال الكف عن سرقة عرق الاخرين.
الصفر يشبه حرف أل O بالانجليزى وحرف أل O هو أول حرف فى كلمة out
***الشكر لله والمجد للكبار***