شليل... و...أحلام الحزن الفرعوني !!

"شليل"
الرائع القـــدال...
----------------------
بقول غنوات .. بقول غنوات
فى البلد البسير جنياتها لقدام ..
وفى الولد البسل ضرعاتو فى العرضة ويطير فى الدارة صقرية ..
ولو السمحة تلت إيد و مدت جيد تقوم شايلاه هاشمية
يشيل شبال ختة ريد .. وفرحة عيد .. و غيمة روح .. وحمرة عين و ايدية
وفى الولد البشيل مدقاقو قولة خير على القمرة
يقابل الجاية متحزم ويقابل الجاية متلزم
سلام فاسك على أرضك يبقى عديلة يا بيضاء
ويبقى زفاف غنت ليه قمرية
قبال حول تغيم غيمة قبلية
ترش الدارة و الحدبة الصعيد الحلة
يا مرحب حباب الصفقة فى النسمة الصعيدية
يا هجرة نهار الليل
لما الليلة بدرية
فحيح جنياتنا فى الحدبة الصعيد الحلة
يا قمحاتنا هو لبلب
يا تمراتنا هو لبلب
و يا اللوز الفتق فى الوادى هو لبلب
ويا سمحاتنا يا قمحاتنا هو لبلب ..
ويا البحر الطمح مدادى هو لبلب
ويا حجواتنا يا دعواتنا هو لبلب
سألتك بالذى ركز الأرض معبد وسوى الناس عليها مقام
سألتك بى حجى الأمات ودعواتنا
سألتك بى قميراتن و دمعاتنا
شليل وين راح ..
يكون خير الخريف فاتنا
وزى برق السماك الجاية دغشية
وزى زغرودة للبطن الكبارية
مرق من شامة القمرة
ومجرتق بوداعة الله
ومقدم بالعديل يبراك
أبشروا تعالوا ياجنيات
شليل ما راح .. شليل ما فات
شليل عند المسور مرق بقالو حصاد
شليل فوق التقانت قام خضار و بلاد
شليل مشوار.. شليل مسدار
شليلنا أرضنا يا جنيات
شليل ما راح .. شليل ما فات
حرازنا شليل .. شليلنا دليب
شليلنا دليل على البلدات بعد درب التبلدية
شليل ما راح .. شليل ما فات
شليل قايم نصايص الليل يتمتم ليلو وردية
مزارع بات على عشقين تراب بلدو
وسماح فوق بت مزارعية

********************
القدال....
(أحلام الحزن الفرعوني)
1
البحر المالح سيلاً ضرّع و موجاً فرّع من الشام
من ناك للسهلة النجدية
الأم البكر الزنجية
يا وادي الزنج
الام البكر الزنجية
لو آخر خيمة إنقجت كانت ركزت فوق سنار
لي ريحة القهوة العربية
كانت فابريكة بُن
كانت مشتل أبنوس
كانت فى الشّعَر القُرّقد قايم شتله تجامل الشتله
التفل الروس
كانت فى الطبع الحار
الريد الحار
الحزن الحار
الحزن الجن الأحمر
كان مهووس
2

والحلم التانى
من الفسطاط
الخيل فى الخيل
لي فاطمة أم حجل
العرجون
الخيل مرحات
النوق مرحات
الخيل الدفرت
دفرت وادي صعيد أسوان
للبت الخصبة الزنجية
النوبة تصيح
لي حلفا نبيح
للنهد السابح فوق الريح
للعشق الساخن رجاى
الخيل الدفرت
فاتت دنقلا دون لا جاى
والمدّ التالت
غاشي الدامر بالعطرون
النار ما حرقت دار شنقيط
النار ما بتحرق وادي الزنج
النار
النار آبنيه
يابنية العرب الزنجية
و بنية الزنج العربيه
النار فى النار
نيران ألوان
شِيتنّ قرآن
و شِيّتن يا حليوه الحزن الجاكى يكون غبيان
و شيتن فى الفرح التايه فيكى
كذا الضهبان
وشيتن فى قليب الجدى الرخص الهشة النيه
النار
النار آبنيه
يابنية العرب الزنجية
و بنية الزنج العربيه
الريد الليك متحمد
سركى مسوكر جاك آبنيه بلا عنوان

3
الحلم الثالث
التربة الأولى الموس الشفرة الصغرى
التربة الأولى الموس الشفره الصغرى
التربة الكبرى الموس الشفره الكبرى
التربة الكبرى الموس الشفره الكبرى
الوجعه الكبرى
الستر العار
العار

4
العار
الشهوة انبهلت
إن المؤوده انسألت
يا ووب البُطنه الطلعت
يا ووب البطنه الرجعت
يا ووب الوجع النّوح ورّوح
روحا مرقت تردح يا فرعون
يا ووب الأم الجاضى حشاها
اللّيد السما و العين فى جناها
الرحم أنّشقا
يا ووب الضاقت فى الميلاد
سِتراً مكشوف غطيها
البت يا دوب بكريها
ألحق يا الطايل باعك
نادهاك فى الضيق
الفا الدرّكان بسراعك
سهّل فى الحوبة قساى
برّد في الحارة حشاى
و مرقت دخلت مرقت دخلت
..صلّتْ ندهتْ كتمتْ سكلتْ

5
إن المؤوده انسألت
واللهب الهبر
المهلة آ ناس
المهلة تطير

المهلة متين ألقاها
و السهلة متين ألقاها
المهلة حليل
السهلة حليل
البلد الشجر البحر الطير ووباى
الريق نشفان من القوقاى

وكان فى الحِلّة الناس بتجِضْ
اللوز فى القُطنه هناك بيجٍضْ
و النسمة التائهة وغاشية الحلة سموم بتجض
و البسمة انبهتت ونزلت دمعه وفوق للدمعة
عيون بتجض
وداك اليوم
مسيخه حليوه يا فرعون
لهيب بي بُقّ
وقالوا قبيل كُمّسيب الغبِينه يشُق
ألاّف الألوف رايح
و أكّال الكتوف رايح
البمشى فوق زبد البحر
الببلع السيخ و الحجر
ويا الدمع النزل فى الحارّة
دُميّع الرجال غلّاب
و يا الغبن الوقف فى الحلة شوكت حوت
يكون حزناً فدر فى رجالنا مو كضاب
يكون حزناً فدر فى رجالنا مو كضاب

ماقصــرتي .... أختي سهاد
جبتي ... وجبتي القول البسر البال...
قولاً سمح مليـــان...
جميل منضوم حكم وبيان
..........
يكفي البوست استلهامك القوي ..يا أختي
وردك الوافي بــرائعة القدّال " أمونه "
والتي كانت دافعــــاً لي عند إستقراءي ...
شكراً جزيلا كثيراً لكل اسهاماتك الرائعه في المنتدى
ويقيني أنّ الأعضاء يحتفون بمواضيعك ومداخلاتك ...
دمتي أختـــاً ...ذخرا... رافداً
والله يوفقك..