اللقـــاء الحميم ....

حينما وصلت مكتبي اليوم الأحد ...وفي تمام الساعة 8ص ...رن جرس الهاتف الثابت ... وإذا بي أجده أخي العزيز الغالي جداً : محمد النو ...وكان يتصل من سلطنة عمان ...وكان يسأل ويتفقدني ويسال عن صحتي ..وعن وعكة ...الحج[النزلة ] وبلغته بأني بلغت الشفاء والحمد والشكر لله...والرجل كان كلامه جميلاً أخوياً صادقاً صافياً ...تحس فيه دفء الأخوة ...ممزوجاً بنبرة الغربة ...ونسأل الله أن يجمعنا سالمين غانمين بارض الوطن ...وخاصة الحباااك ...وقد أخبرني أحياناً قد يتحدث عن بعض المواضيع بإندفاع شديد ...وقلت له هذه أخي من الحماس وحرارة القلب ...وهذا ليس بعيب ...والحماس وحرارة القلب قد تنجم من الحب والولاء الشديد ...والعيب أخي محمد في السرقة...وليس شئ غيرها ...وأتمني دائماً أن تمتد بيننا أواصر الأخوة والصداقة المتينة ...والتحية لك ولكل الأشاوس الموجودون معك بالسلطنة ...منهم أخي الغالي والحبيب عوض السيد وأسرته...وأبناء عمتي فاطمه بت الشاويش الأحباء الشرفاء المعتصم وأسرته وبابكر وأسرته وعبداللطيف مصطفي... وكل ناس ابوجبيهة الأوفياء وأهل السلطنةالأعزاء ...ودام الود بيننا .... محبتي

التحية لك عمي شاويش لانك تحفظ للناس الاشياء الجميلة..
واحيي عبرك ود النو واخي الفاضل عوض السيد واسرتة الكريمة..
دمت

يا جماعه محمد النو معى فى سلطنة عمان وأعرفه جيدا وعن قرب.
محمد رجل طيب وقلبو أبيض الا أن هذا البياض به بعض الحراره والغيره على الوطنين الكبير والصغير.
محمد باختصار زول على نياتو وكمان بالو طويل جدا.
اتصل علىّ بالأمس ليلا أثناء مشاهدتى لمباراة الصفاقسى والفتح وتناقش معى كثيرا بخصوص (ابوجبيهه الأصل والجذور) وسألنى عن ابو الزهور وسبحان الله قبل مهاتفته بساعه كان الأخ ابو الزهور قد اتصل علىّ فى موضوع اخر تماما فكلمته عن ابو الزهور ولا شك أننى ملّكته كل ما تعرفون أنتم من جمال الروح الذى يتمتع به الكبير ابو الزهور.
أيضا طلب منى العزيز الحبيب ود النو رقم تلفون حكيمنا عثمان جاويش فأعطيته وتواصلا.
أدونا اخركم وخلونا نستفيد.
تخريمه:----------------------------------
أبو علياء وسهاد الخواجيه بتاعين محن بتجيبو مواضيع(يا تحيّر يا (تمخوّل)الله (ينطيكم الآفى)

اشكرك العم الراقي عصمان كتير علي البوست القيافة دا
وحقيقي معرفتكم كنززززززززز ثمين ثمين يا احباب المنتدي بدون فرز
حفظكم الله ورعاكم
بالرغم اني لم التقيكم الافي هده الدوحة الجميلة باستثناء اخي الغالي ابو السيد متعة الله بالصحة و العافية
لكن من خلال كتاباتكم الجميلة و ردودكم الاجمل تعرفتا عليكم واكن لكم كل احترام و تقدير
ونسال الله ان يرد غربتنا جميعا سالمين غانمين ونلتقي ببقية احباب المنتدي
في ارض الوطن
كل الود كل الاحترام

صحيح يا صباح انك لم تلتقيهم جميعهم ولكنهم يعرفونك جيدا بحكم انك ابنة عمهم جميعا المرحوم حسن وعبد الرحيم وشقيقة هاشم وابو القاسم وحامد وأحمدو.
لكى التحيه والاحترام

انتو ناس الحباك ناس رايعين وعارفين الروعه دى الواحد ما لاقيها إلا فيكم يا حبايب ووالله كل ما المنتدى السياسى يسخن اخوى ود النو طوالى يشد لى سلك وود النو طبعا راجل طيب ومتواضع وكريم وزول بيحمل صفات البقاره الاصيله 000شكرا يا ابو علياء دائما انت منصف وتقول ما تحس به وقلبك ابيض زى لبن كواسيات الحباك

تسلم أخوي غريق ... ماشاء الله يالمهذب يالراقي في هندامك ...مداخلتك بطعم : النبق ..والقضيم ...والكالتو ...والجرمت ...والهالوك ...والوينا ..والاقشي .... وأم كمبش ...والنسية ...وشاي العصرية .... محبتي لك أيها الشامخ دائماً

والجرمت!!!!!!!!!!!!!!!!!!!!!!!!!!!!!!!!!!!!!!
*********************************************************
أشرح الكلمه التى أتيت بها أعلاه يا ابو علياء؟؟؟؟؟؟؟؟؟؟؟؟؟؟؟؟؟؟؟
ولو الكلمه دى بالرندوك (بردو سارهنا يا هبه)

أوض السيد : إنتي تعرفي تـــُلس ؟؟؟
تــُلس أوينوا بيد ومُلس ما تأرفي ؟؟؟ هذا كلااام أهلنا العزاز اللزاز ناس دارفور ...وبيقولوا منطقة تلس في دارفور نساءها بيض ومُلس ...أي أجسامهم بيضاء وملساء !!!؟؟
وإنتي يا أوض ما تأرفي : الجرمت ؟؟؟ يا حبيبي دا الثمر الرخص في شجرة العرديب ...أي حينما تكون ثمرة العرديبة يا دوووب جديده لنج ...عرفت ولا أجيب ليك وزير التربية والتعليم ...محبتي

والله انت رجل مقنع بكل المقاييس (انت ما بتقيش ليه)

يا سلااااام يا توحة الظريف :

صباح و سعاده وكله سرور
وجماله يغني عليه سرور
يا صاحب الطرف المكسور
كسرت قلب شجاع وجسور

ما هذا الجمال !!وما هذا البهاء ...هديتك حلوة ومقبولة ...محبتي

والله والنو مهموم بقضايا الوطن والحباك رغم بعده وسخانته دى سخاتة الزول الشايل هم الوطن .
وتواصلة معنا وكل الاخوة هاتفيا يؤكد ذلك حيث انه هاتفنا ايضا واحتفظنا برقمه حتى يكون التواصل اوسع .
الاستاذ جاويش ياخى ما تشرح لينا الوينا

لمتكم سمحه إلا بتدور ليها لقيمات وشئيريه حاااااااااااااااارة وكمان كبابي الشاهي تتطاقش
تسلموا كلكم

تسلموا إنتو يالحلوين ...أبوهريرة .... وإبنتي الدكتورة الغالية بالجد ...يا أبو هريرة : الويـــنا بعملوها..وبفرشوها في سوق ابوجبيهة مع الطعمية..هيته بالهيته ...وبنات أهلنا العزاز اللزاز الفلاته بصنعوها وعلى ما أعتقد من العيش الريف ...وشكلها قريب من شكل القراصة ...بس بحجم كفة اليد تقريباً ...فهمت ولا أجيب ليك شريف نيجيريا ....!!! ما أحلي الشئيرية الحارة بكباية الشااااي ...وأهلنا البقارة في الزواج والعقد بسألوا من ثلاث أشياء : الشاي الأسود والسكر والشعيرية ...وإذا الثلاث إجتمعن مافي شئ بعيق الزوووواج ...شكراً لهذا الجمال وهذا التألق ...ودمتم لي جميعاً .... محبتي .

شكرا استاذى والله عرفتها وهى تارى اسمها الوينا
انت ما لمته مع الجوعان والكالتو والحاجات دى
لك محبة كل اعضاء المنتدى