قصة عاشه ام رشه

علمت ان هنالك سرد للقصة تمر رسالتى السابقة و سوف اعود للموضوع فى وقت لاحق

شكرا ابو السيد وينك انت يا راجل شنو بزور المنتدى كده وبتكب الزوقه 0000وانت لسع ما شفت المزازه الصحى صحى والقصه يادوب بدأة جدجد

تسلم يا زعيم
القصة رائعة ونحنا منتظرين عاشه وصالح
تسلم يارب

مشكور يازعيم على فن السرد\

وقالت له يا ول عمى انا دايره شقلات البنات بدور لى دبيبه وعاجايه وخاتم !!

اعتقد (دبيبة)دى فى ناس كتار ماعرفوها

شكرا صباح وسهاد وابوهريره وبت العمده على المتابعه والمرور الرائع وطبعا يا ابوهريره يا عجوز انت عرفت الدبيبه وللجماعه الما اتزكروها هى غويشه من البلاستيك فى حلقات دائريه تشبه الياى 000تتزين بها فتيات ذاك الزمان 0000000اشكركم

إستقبلت الحله الخبر من بين مصدق ومكذب واصبح الامر واقع فى الحله حيث اضحى صالح امجكاكى راجل عاشه بت حسين واكل الناس الطعمه التى قام حاج المكى بإرسالها الى بيت العروس وقامت كله بإعداد العصير للرجال والتمر واحتشد عدد كبير من النساء فى منزل حسين وهذا الحشد لم يشهده هذا المكان من قبل واما العروس عاشه لبست العراقى الجديد وتريحت باوراق الخريف بعد ان اجتهدت فى حمام دافى ذاك اليوم ولبست طرحتها الجميله وجلست فى داخل القطيه تتلقى التهانى من النسوه منهن الساخرات من الوضع واخريات مشفقات على صالح القريب واختياره الغريب مرت العصريه وانتهت الهيصه فى منزل حسين وجهزت كله لصاحبتها مكان نومها وحضر حسين والد العروس ونادى على العريس ان هلم إلينا يا عريس للعشاء 000وقد جهزت كله وجبه قوامها من الفراريج المسبكه وقدمتها مع شيى من الشعيريه المطبوخه مع مرقة الدجاج اكل كل من حسين وصالح وود التوم حتى شبعوا 00وبعد ان شربوا الشاى الساده استأذن حسين من ضيفيه انه ذاهب الى فراشه 00والعاده فى مثل هذه المجتمعات ان يهيئى للعريس ان يبيت ليلته الاولى بعد العقد فى بيت الزوجيه وان تقوم صويحبات العروس بتهيأتها الى هذا الحدث ويقوم اصحاب العريس بمساعدته بان يتم الامر بسهوله ويسر وقام ود التوم بالدور المطلوب منه وحضر هو والعريس وتم استقبالهم من كله وأخريات واعد لهم مكان للجلوس امام قطيت العروس وبدأ الحضور يتسللون الواحد تلو الاخر وكذلك الفتيات حتى بقى ود التوم وصاحبه وكله وقال ود التوم لاخته كله يلا يا كله اوصلك بيتك من الكلاب وتركوا العريس لوحده وعروسته


صحى صالح من النوم مبكرا ووجد الماء معد للحمام والصابون ابوريحه وغيره من اللوازم بعد ان اغتسل كان وجوده مبكرا فى الضره واتاه الشاى ولوازمه وتونس الجميع وضحكوا وكان صالح اكثر الحضور سعاده واكثرهم مساهمه فى الكلام والونسه واستمر هذا الوضع الى شهرين 000وبعد هذه المده مرضت العجوز حبوبت عائشه وازداد عليها المرض وكانت عاشه ورقم ما تعانيه من وحم حاد تسهر مع حبوبتها وتعتنى بها واشتد على العجوز المرض ورحلت واضحت عاشه تتلقى العزاء من نساء الحله وقد طرا تحول كبير فى سلوك عاشه بعد الزواج وكان صالح كريم معها ومع المرحومه حبوبتها وقد اقدق عليهم العطاء وكل يوم سوق ياتى محمل بالاشياء واصبح البيت مقتظ بالملابس والاشياء الجميله 00000انقضى العزاء وقد ترك فقد العجوز فراق كبير فى حياة عائشه وهى كانت الام بالنسبه لها وهى التى ربتها منذ الصغر وكان الفقد اليم وقد ربك حياة عاشه هذا الرحيل المفاجى


بدأ الحمل يظهر على عاشه بصوره مبكره وكان صالح يساعدها فى شئون المنزل وكان يقسل لها الهدوم وظلت كله تطلع بدور كبير مع هذه الاسره الصغيره وفكر صالح فى اتمام مراسم الزواج إلا ان العادات المتبعه فى مجتمع عاشه لا تمنع ان تلد المعقود عليها مره واثنين وبعد ذلك تتم طقوس الزواج المعروفه فالامر غير مستغرب ان تحمل عائشه من زوجها صالح فى العقد وتضع مولودها الاول 0000بدأت تنتفخ بطن عاشه بطريقه ملفته للنظر وبدأ الحمل يظهر اكبر من حجم الحمل الطبيعى 00وظلت كله وهى الدايه البلديه الوحيده فى الحله تراقب وضع صاحبتها عاشه عن كثب 000واصبحت تطمئن صالح بان الامر عادى وكان صالح قلق جدا من حجم بطن زوجته ومن تطورات الحمل واصر على كله ان يزهب بها الى الطبيب فى المدينه التى تبعد عدت ساعات من قريتهم 000استعار حمار حاج المكى منه وزهب هو وزوجته وكله الى المدينه وقابلوا الطبيب العمومى الوحيد الذى كان بمستشفى تلك المدينه وبعد فحص من الطبيب وبصوره تقليديه لم يستعمل فيها غير سماعة الاذن طمأنهم الطبيب بان الحمل طبيعى وهناك زياده فى الاملاح وصرف لهم بعض الحبوب ووصف لهم نظام غزائى من الضرورى ان تلتزم به !!!!!!!!!!!!!!!!!!!!!!!!!!!!!!!!!!!!!!!!1


عاد صالح وزوجته وكله فى المساء الى القريه وقد شكر حاج المكى على اعارته الحمار له واستمرة الحياة عاديه وبعد زواج صالح ووفاة العجوز اصبح حسين والد عاشه كثير الغياب من الحله وكان يذهب يعمل الى عدت ايام فى المدينه واحيانا يقوم بطرد البهائم التى يشتريها التجار الى الاسواق الاكبر 00وبصوره عامه قد قل ارتباطه بالحاه 00وكيف لا وقد اراحه صالح من هم كبير بعد زواجهه من عاشه التى كانت تمثل العائق الاول له للعمل خارج الحله 00واصبح صالح وصاحبه ود التوم يقطعون القماش من دكان حاج المكى ويخيطون كميه من الملابس ويزهبون بها يوم السوق الى المدينه ويسوقونها هناك وقد اصبح لهم زبائن ثابتين يشترون منهم كل الانتاج ويقوم اؤلائك ببيعه بالقطاعى وهذه اعطت صالح ميزه جديده واصبح من الخياطين المشهورين على مستوى المدينه واصبح الناس يرسلون إليه القماش ليخيط لهم الجلاليب من المدينه وكان فى يوم السوق يعود وفى معيته كميه من القماش ليخيطها ويرجعها الى اصحابها فى السوق الجاى وبهذا الشكل ازدهر نشاط صالح امجكاكى بصوره كبيره فى المنطقه وزاع صيطه000000000000000


فى حوالى الساعه الرابعه صباحا سمع صالح حركه خارج القطيه وقام من مكانه واذا به يجد زوجته خرجت تقضى حاجتها ولم تستطع وقالت له ان بطنى توجعنى وجع شديد 000ذهب مسرعا ونادى على كله وحضرت كله ومعها امواسها والحبل الذى تستعين به على توليد النساء وبخبرت المتمرس عرفت كله بان الاعراض هى اعراض مخاض الولاده وارسلت الى جاراتها لكى يساعدنها فى توليد عاشه امرشه 000وبعد ساعات سمع صالح صراخ الطفل وقد امتلا صدره بالسرور وقال هذا جادين قد خرج الى الدنيا وبعد برهه اخرى سمع صراخ لاخر وعلم انهم توائم وبعد حوالى نصف ساعه جاء من النسوه من يبشره بانه قد رزق بتوأمين بنت وولد 00وسأل عن امهم كيف صحتها قالت له محدثته لسع التبيعه ما وقعت 000تبيعت الجنى الاول ما وقعت وانا كله قالت لى نكلمك امشى لشيخ الضو فى الحله الجنبنا ديك خلى يسوى ليك عزيمه وتجيبها لينا بسرعه 000هم بالمقادره وطلب من محدثته ان تستدعى له كله 000!!!!!!!!!!!!!!!!!خرجت كله وهى شاحبة اللون وسالها صالح كيف عاشه 0000قالت له التبيعه ما وقعت وعاشه عندها نزيف حاد وانت امشى الحله ديك وجيب لينا عزيمه من شيخ الضو لعل الله يخفف عنها !!!!!!!!خرج صالح يركض نحو حلة شيخ الضو وهو يدعو فى كله خطوه ان تجد زوجته العافيه وظل يجرى حتى انتهى به المطاف امام تقابت شيخ الضو وقال له يا شيخ الضو مرتى بتنزف والتبيعه ما وقعت بدور لى عزيمه بوديها ليها يا شيخ 000دخل شيخ الضو وتوضا وحمل كوره بها ماء واضحى يتمتم فيها ببعض التعاويز المعروفه عند هؤلاء المتصوفه ودفع إليه بالكوره وركض صالح مره اخرى صوب منزله 0000دخل وهو يحمل الكوره فى يده ووجد النسوه يجلسن فى فناء الدار وسال عن كله وقالت له إحداهن جبت العزيمه يا امجكاكى قال لها وبلهفه نعم قالت إلا تدوها للتيمان وانفجر الحوش بعويل النسوه وسقطت الكوره من يد صالح وصاح يا كله عاشه مالها ماتت ماتت ماتت ماتت ماتت


نواصل

سبحان الله والحمد لله
الله يصبر صالح
ويطرح البركة في التيمان
تسلم يا زعيم

بت العمده وصباح اشكركم على المرور الجميل والمتابعه وجودكم هو الحافز لنا للاستمرار فى القصه

سبحان الله بسبب غيابى فى الأسابيع الماضيه لم أنتبه لهذه القصه ... قرأتها كامل اليوم من موت جادين لموت عشّه ام رشه.
القصه رهيبه يا زعيم لكن كان قبل ما تكتلها تنسج من خيالك العجيب كيف تغيرت وكيف تغيرت نظرة الناس ليها.
على العموم ربنا يرحمها ويجعل البركه فى وليداتها.
ونشكرك كتير على هذه السياحه التى عودتنا عليه

الف ليلة وليلة الكتاب الذي طاف الدنيا بأرجائها، و تمثل فيه سحر الشرق، و
ترجم إلى معظم لغات العالم  كتاب من اجمل
كتب القصة التي كان لها صداها وروعتها والتي اتصفت بالتشويق والاثارة و ببساطة
السرد والتعبير والتي كان من كان ان يفكر بقراءة جزء بسيط منها اومحاولة الاطلاع
ليس الا كانت نهايته ان الايترك الكتاب الا بعد نهاية الجزء الرابع منها  وذلك لروعة هذة القصص .
لم يعرف حتى الان الكاتب الاصلي لهذه القصص وكانت قد ظهرت مابين القرن الثالث عشر والرابع عشر  .


ولكن الف ليلة وليلة التي لدينا والتي تغلبت بروعتها على النسخة الاصلية
عرف كاتبها وعرف زمانها فكانت في القرن الواحد وعشرين للكاتب غريق كمبال

شكرا للاستاذ غريق على هذا الابداع المتواصل الذي
اتحفتنا به ونتمى منه المذيد

غريق ...الرجل الصبور المبدع ..أعرف انه بيعمل المستحيل من أجل إتمام هذه القصة الرائعة كروعة شخصه المواصل دائماً المهذب ..شكراً لك أستاذ / غريق ...وربنا يحفظك لنا لأنك نجم وفخر لهذا المنتدي .... محبتي

سهاد مرورك رائع كروعة المنتدى لك منى الف شكر0000000الفاضل انت اصل الابداع يا ابن الاكابر 000000ابو ابراهيم اشكر لك المرور وتشجيعكم لنا هو الحافز وارجو منك شخصيا رايك وان تبين لى العيوب حتى نجود0000000000سوسو كلامك بطعم عسل جبل العمده اشكرك0000000000ابوعليا انت مبدع ورائع يا راجل يا كريم يا طيب0000000000الحبيب فيصل وينك انت يا رائع مشتاقيييييييين والله والايام دى طبعا اخوك مسكون بحمى الانفصال ربك يستر0000لكم جميعا احبتى كل الحب واتمنى ان ارى رايكم النقضى

استمر العزاء عدة ايام وكان صالح وحسين وحاج المكى يتلقون العزاء من جموع المعزين 000وتولت كله تربيت التيمان الزغب الصغار وقد اثرت وفاة عاشه بشكل كبير فى حياة صالح وحدث امر آخر هو مغادرت حسين الى البلد النهائيه الى الغرب البعيد بعد النكبات المتتاليه التى حصلة له قرر ان يعود الى اهله فى غرب السودان وظل صالح يبزل قصارى جهده مع كله التى تفرقت تماما الى تربية حسن وام الحسن هذا هو التقليد السائد فى حالت التوائم حيث يطلق على الذكر اسم حسن وعلى الانثى اسم ام الحسن وفى حالت التوائم ولدين يسمون حسن وحسين واذا سمى التوم الذكر بحسين تسمى الانثى ام الحسين وهكذا التقليد السائد لم يكن صالح هو الذى اختار لهم هذه الاسماء بل وجدت كله امهم بالتبنى نفسها تدعوهم بحسن وام الحسن وصار لهم هذا اسما فى المستقبل 0000000حدث وفاة عاشه سيطر على احاديث الناس وونسات النساء الى فتره غير قليله وبالاخص مثل هذه المجتمعات تورخ لمثل هذه الحوادث 000مثلا الواحد لو سؤل عن ميلاد ابنه فلان يقول ولدوه فى السنه التى عرس فيها صالح امجكاكى عاشه بت حسين او يقول السنه التى مات فيها فلان !!!!!!!وهكذا000فصار حدث وفاة عاشه من الاحداث التى ظلت عالقه بذاكرة اهل القريه لعقود عديده ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

ظل صالح يتفق على اسرة كله انفاق كبير ووجه كل دخله من المكنه الى تربية اولاده الصغار واصبح كل وقت صالح فى المكنه ومنزل كله يحمل ابنه حسن وبنته ام الحسن التى ظهرت ملامحها منذ الصغر انها تشبه امها شبه كبير جدا وهى جميله وشعرها غزير وكلما حملها والدها تجد يده تستقر فى راسها يداعب شعرها المموج بيده وقد ملا وقته باللعب مع اطفاله وترك اى علاقه اخرى 0000قال له حاج المكى يا صالح يا ولدى انت ما نشوف ليك بت حلال كده نعرسها ليك عشان كله بت التوم دى ترتاح شويه من تربية الوليدات دول وانت يا ولدى يا صالح زول كسيب واسع دخلك كويس وما حقو يا ولدى تقعد عزابى ؟؟؟؟؟؟؟؟؟رد له صالح سمح يا حاج المكى لكن يا ابوى المكى انا داير الاولاد ديل يكبروا شويه وانا داير اوديهم لى اهلى هناك فى الشمال وانا الحمد لله هناك اهلى كتار ومبسوطين وقسمت الوليدات دى هى الجابتنى هنا وانتو ناس الحله دى ما قصرتو معاى وبقيتو لى زى اهلى بالضبط وماقصرتو معاى وجبت منكم الجنا وانا خايف يا حاج المكى لو عرست تانى هنا ما بقدر برجع لاهلى بسهوله وبسوى لى مسؤليه جديده تانى هنا 000عشان كده كده خلينى انا مع كله المبروكه دى اربى وليداتى ديل لحدى ما يكبروا شويه واقوم اوديهم البلد هناك فى السافل وانا نيتى ادخلهم المدرسه واعلمهم ويبقو لى مسعولين كبار مثل البجو فى الرادى ديل 000000نان يا صالح يا وليدى انت عارف الاولاد ديل اسع يادوب بيتعلموا المشيى لمتين يا ولدى يبقو قدر المدرسه وبعدين يا صالح يا ولدى ات بلدكم فيها مدرسه 000أيه يا حاج المكى عندنا مدرسه بسموها الكتاب وكمان اقول ليك فى أدبره فى مدرسه الليلت البنات انا بنيتى ام الحسن دى كن الله اداها العافيه اوديها تقرأ فى مدرسة البنات بتاعت أدبره 00000هوى يا ولدى صالح بنات شنو البودوهن المدرسه هو المدرسه قالو بتخرب الاولاد ذاتهم وبتبقيهم ما كويسين 000قاطعه صالح يا حاج المكى ده كلام ساكت قالو بقولو الخواجات عشان ما الاولاد يتعلمو ويقوموا يسوى حاجات بتاعت البقولولو نادى الخريجين والخواجات خايفين من ناس المدارس عشان كده يا حاج المكى لو الله ادانى طولت العمر بقوم بعلم اولادى ديل 000000


كبر حسن وام الحسن واصبحا بعد شراب الشاى يحضران يلعبان امام دكان حاج المكى وكان والدهم مهتم بمظهرهم وكان يجلب لهم من السوق لعب الاطفال والانابيب والصفافير والملابس الجميله وكانا اجمل اطفال القريه وفى كثير من الاحيان يسطحبهم والدهم الى السوق 00فشبا على معرفه بتفاصيل حياة الناس فى القريه والسوق واصبحا محبوبين من جميع اهل القريه وبالاخص من حاج المكى كلما جاء ليفتح الدكان يهديهم حلاوه وكميه من الطحنيه ومن جانب والدهم كان يهتم كثيرا بنظامهم الغذائى ونشآء فى صحه جيده 000وكان صالح فى المساء يحكى لهم ويحجيهم ويحلى لهم عن قصص القول حتى ينوما 00وقد ملآء حياة صالح واصبحا له رفيقان فى مكان العمل وفى البيت وظلت كله تهتم بهم وتراقبهم بصوره مستمره وتغسل لهم ملابسهم وتحممهم وتغير لهم الملابس وتعتنى بهم كامهم تماما 0000اصبح عمر حسن واخته خمسه سنوات 00وبدا حسن يسأل ابيه من بعض الاشياء 00قال له مره يا ابوى انت امى كله دى صحى هى ما امى ؟؟؟؟؟قال له القاليك الكلام ده دى منو كله دى امك يا ولدى قال لوالده لكن يا ابوى سماعين ود حسن ما قال لى انت امك اسمها عاشه الكتلتها الولاده !!!!!!!!ضماه صالح الى صدره وام الحسين قاعده تلعب باولاد اللالوب ولم تعر حوار حسن مع والده اى اهتمام قال صالح لحسن بعدين لما نمشى البيت وامك كله تجيب لينا العشا انا بوريك يا ولدى الحاصل شنو وهسع قوم العب مع اختك وخلينى اخيط العراقى الفى ايدى ده 00000000000000

احضرت كله العشاء الى صالح واولاده وخرجت 000نظر حسن الى والده وقال له يا ابوى انا جدى اسمو منو قال له جدك اسمو حاج السر !!!!!لكن يا ابوى انت ما قلت لى جدى اسمو حسين !!!!حسين ده يا ولدى ده ابو امك 000اعنى جدك من امك والسر ده ابوى انا اعنى جدك من ابوك فهمت يا حسن ؟؟؟؟؟؟؟ما فهمت يا ابوى انت ما قلت امى دى كله وكله دى ابوها ما اسمو التوم وقاعدين بقولو ليها فى الحله كله بنت التوم وحسين ده منو كده يا ابوى ورينى ؟؟؟؟؟؟إعتدل صالح فى جلسته وقال لولده يا حسن كده نتعشى عشان اختك دى نعست ناكل وخلى اختك تنوم وبعدين انا بوريك الحاصل شنو يا ولدى يلا قوم قسل يدينك وجيب لى الابريق معاك وغسل لاختك دى وتعالوا نا كل يلا بسم الله


بعد العشاء نامت ام الحسن فى فراشها المعد لها وجلس حسين بالقرب من والده وقال له اها ام الحسن نامت يلا قول لى القصه ؟؟؟؟حكى له عن اهله فى الشماليه فى دار صباح كما يسمونها الغرابه وكيف إلتقى بالمرحوم جادين وكيف تعلم الخياطه وعن وصية جادين وقصة المكنه وبعد كل فتره يسكت صالح ظننا منه ان حسن قد نام ويخيب ظنه بان حسن منتبه بصوره كبيره بل يسأل عن التفاصيل 000وحكى له عن كيف تزوج من امه حتى وصل الى الى تنفيز وصية المرحوم جادين ووضح له حال امه قبل زواجه منها وكيف تبدل حالها بعد الزواج منه وكيف حصل لها الحمل والولاده التى توفيت على اسرها 000فقال له يا حسين امك عاشه توفيت ولم تنعم برؤيتك انت ولا اختك وكتر خير امك كله بت التوم زى ما قلت ليك هى صاحبة امك عاشه وبعد وفاتها قامت بدور كبير اتجاهك انت واختك وانا كمان وتولت تربيتك واصبحت هى الان امك ؟؟؟؟صالح كان يتحدث والدموع تتساقط على لحيته الكثه وعندما وصل الى هذا الحد من السرد الى ابنه نظر الى حسن وراى دمعه تتلألأ على خد حسن وخنقته العبر وضمه اليه وسمع النحيب الخفى فى صدر الصغير حسن


اصبح صالح يحكى الى ابنه واخته كل تفاصيل حياته الماضيه واصبح يحكى لهم عن اهلهم فى الشمال ويعدهم ويشوقهم الى الذهاب الى تلك الديار وفى كل سنه يوعدهم انه بعد حصاد الزراعه سوف يحملهم الى دار السافل ويعرفهم بجدهم حاج السر واعمامهم وعماتهم وبدأ يحفظهم اسماء القرى فى ديار اهله ويعلمهم عادات اهل البلد وكيف يتعاملون مع النيل وشكل الزراعه عندهم وكيف يكون الشتاء قارص وليس لهم مطر وهم يزرعون بالسواقى التى تسحب الماء من النيل وماهو النيل وجميع تفاصيل الحياة الصغيره كانت هى المسيطره على عقول الصغيرين حسن واخته 0000اصبحا فى شوق عارم للزهاب الى اهل ابوهم وكانا يشعران بين اترابهم انهم غرباء عن هؤلاء وبالاخص هم قد رباهم والدهم على كثير من الترف المادى الغير متوفر لاطفال القريه الذين فى سنهم وبالتالى اصبحوا محل حسد عند الاخرين لما لهم من ملابس غير متاحه للاخرين 000فكلما خرج حسن تجد الاولاد الذين فى سنه يتحرشون به وينظرون إليه انه من اولاد الجلابه المترفين 000فتربية صالح لبنيه صارت وبال عليهم فى محيطهم الاجتماعى واضحى صالح وابنه وبنته لا بغاء لهم فى هذه الديار وقد حزم صالح امره على ان يسافر الى الشمال كما سافر من قبل حسين الى الغرب سفره نهائيه وسئم من العيش فى الصعيض وكانت الدنيا فى اواخر الخريف وقد حزم امره هذه المره على السفر واخبر صاحبه احمد ود التوم ان يبيع له المكنه واحمد الاخر اصبح ترزى ماهر يجيد الصنعه واحمد بدأ فى تجميع ثمن المكنه 000وفى أواخر هذا الخريف والناس تتاهب لحصاد السمسم وصالح منهم 00جاءت مطره مصحوبه برياح قويه وصالح كان خارج الحله وعند هطول المطره غفل راجع الى الحله وفى طريقه وجد مجموعه من غنمه تسير عكس إتجاه الحله وهم بارجاع الغنم وبدأ يركض مع الغنم يمنى ويسره !!!!!!!!!!ووقعت الصاعقه واصابت صالح وسقط على الارض 000والمطر منهمر !!!!!!!وومات صالح ابو التيمان مات مات حلم صالح مات طموحه للرجوع الى اهله 000مات مات مات





نواصل

رغم الحزن الذى لازم الحلقتن بموت العجوز ثم عائشة واخيرا صالح عليهم الرحمة وكذلك سفر حسين .
نجد ان براعة السرد واضحة جدا مما جعلنا اكثر تشوقا لما يحصل للتيمان مستقبلا .
فى اعتقادى سيكون للتيمان شان كبير فى المجتمع وهذا واضح من نباهة حسن فى سؤاله لوالده.

شكرا يازعيم ونحن قيد الانتظار

شكرا يا ابوهريره ربنا يوفقنا نصل للنهايه 00000اشكرك على المتابعه

إنا لله وإنا اليه راجعون
لمن الدميعات يخفن بجيك صاده

الله يرحمة ويغفر له
ماااااات صالح ولم يحقق احلامة
واصبح حسن و ام الحسن يتيمين الله يقويهم
تسلم يا زعيم

الدكتوره وسهاد والفاتح وصباح لكم منى كل الود واشكركم على المتابعه والتشجيع

فى موكب حزين شمل جميع اهل الحله والقرى المجاوره تم تشييع صالح امجكاكى الى مسواه الاخير وسيطر على الجميع حزن عميق وبالاخص ود التوم وحاج المكى والوفيه كله التى اضحت هذه الابتلاآت تضيف لها اعباء جديده فقط لانها صديقة المرحومه عاشه!!!!!حسن ابن التسع سنوات لم يصدق بان ابيه وحبيبه قد رحل من غير رجعه وكان مصابه اليما 000وام الحسن ظلت تنوح وتبكى اباها الى عدت ايام حتى بح صوتها 000رحيل صالح عقد حياة الصغيرين حسن واخته وكذلك لخبط امور صديقه ود التوم الذى كان يتاهب لامتلاك المكنه وان يخلف صاحبه فى هذه المهنه لكن ارادت الله شاءت ان تاتى الاقدار بما لا يشتهى ود التوم 000تلقى العزاء كل من ود التوم وحاج المكى وتولت كله بت التوم تلقى العزاء من النساء وكان اهل القريه كلهم اهل للفقيد وكانو يذكرونه دائما بالخير وهو ظل معهم اكثر من عشره سنين من عمره وكان دمث الاخلاق وكان يشارك اهل الحله فى مناسباتهم الاجتماعيه وكان رحيما لضعفائهم بارا لشيوخهم ومحل ثناء من جميع اهل القريه فان رحيله المفاجى ترك جرح عميق فى نفوس قاطنى هذه المنطقه 00000000

ظل حسن مرابط فى محل العزاء ويتلقى نظرات العطف من المعزين وكان طوال الوقت ساهى ويستعيد فى زكرى والده وكان كلما خلى مع نفسه يتزكر ما قاله والده الراحل عن اهله وعن النيل وعن قرى الشمال وعن جده السر وعن حبوبته واعمامه واسمائهم وكان يستزكر ذلك بصوره يوميه حتى اضحى يحفظ كل ماسمعه من والده عن ظهر قلب 000000اما ام الحسن فوجدت فى حضن امها كله الملاذ الامن ورمت ضعفها على امها كله واصبحة تجد عندها الدف والحنان والسلوى 000بعد إنقضاء الفراش قام اهل الحله فى نفير لحصاد زراعت المرحوم صالح وذهب معهم الى الزرع حسن وتم حصاد السمسم والفول وتبقى لهم حصاد الدخن التى محتاجه الى وقت قصير حتى تنضج وتولى ود التوم الاشراف على الزراعه يساعده حسن ابن التسعه اعوام وتولى حاج المكى حفظ غلة الزراعه لحسن واخته وبهمه واغانى النفير نفر الى القريه والقرى المجاوره لحصاد زراعة الدخن الخاصه بحسين وكانت زراعه فى عدد كبير من المخمسات وكانت ناجحه نجاح كبير واجتهد اهل القريه الخيرين فى الحصاد بعد ان تكفل حاج المكى بمستلزمات النفير وكان فى كل يوم يزبح لهم تيس ويلتزم بإطعام اهل النفير وظل النفير عدت ايام حتى تم قطع العيش وتم الدق وكان الانتاج وفير فاق انتاج كل تجار القرى المجاوره 00وتولى حاج المكى تخزين الانتاج فى مخازنه 00وقد كان حصيلة زراعة المرحوم كبيره جدا بالمقارنه بالزراعات الحولها 000000000


كل يوم سوق ظل حاج المكى واحمد ود التوم يسطحبان حسن معهما الى السوق ويقوم بتسويق ما قام احمد بخياطته من ملابس ويعودا بربح وفير وكان احمد كريم مع ابن اخيه وكان يتعامل معه بنفس علاقات الانتاج التى كانت تمارس بينهما فى زمن المرحوم وكان النصيب الاكبر من عائد الملابس بعد خصم حق حاج المكى يذهب الى اولاد المرحوم ويكتفى احمد ود التوم بما كان يناله فى حيات صالح امجكاكى 00000

بادب جم حضر حسن الى حاج المكى وحاج المكى قضى لتوه صلاة العصر 000جلس حسن قبالة راس فروة حاج المكى على الارض ووضع كلتا يديه على فخزيه وكأطأ راسه قليلا على الارض وقال وبصوت منخفد يا جدى حاج المكى عندى كلام بدور بشاورك فيه وانت يا جدى ياكا ابوى 000انتبه حاج الكى لحديث الصغير وقال له اتكلم يا ولدى 00اتكلم يا ود صالح انا سامعك يا ود الزول الكريم يا ود الراجل الصالح والله يا ولدى ابوك الله يرحمو ويحسن إليه من ماجانا فى الحله دى ما شفنا منو إلا الخير ونحسب والله انه من عباد الله الصالحين وفى كل صلاة يا ولدى الناس فى الزاويه بسألو ليه الله ان يدخلو الجنه 000الهم اجمعنا به فى حضرت نبيك يارب 00قول يا ولدى قول


قال حسن لجده حاج المكى انا والله ياجدى والدى المرحوم كان بونسنى باهلنا فى السافل كتير وكنا انا وابو ناوين السفر لزيارت اهلنا عشان نعرفهم ونشوف جدى حاج السر وحبوبتى واعمامى واهلى هناك ولو كان ابوى حيى حتى الان كان هسع سافرنا 000قاطعه حاج المكى بعد ان سند وعه فى العنقريب 00وقال له قول يا ولدى وتعرف بلد ابوكقول؟؟؟؟قال حسن يا جدى انا ابوى ورانى اى حاجه عن البلد عارف اسماء اهلى كلهم وعارف اسماء اعماهى وحلتهم اسمها شنو وبركبو ليها القطر وتنزل فى المحطه الفلانيه ومنها تمشى بكرعينك او بالحمير التى تاتى للمحطه عندما يكون فى زول من الحله مسافر 00قاطعه حاج المكى تانى وقال له والله يا ولدى ريحتنى راحه الله يرحم والدك فى قبرو شوفو يا جماعه ود الفار بجى حفار خلاص يا ولدى انا كنت شايل همك انت واختك وانا بقيت زول كبير وقلت لو صاحب الامانه اخد امانتو انت واختك وراى بتعبوا إلا يا ولدى كلامك ده فرج همى خلاص 00يا ود التوم يا ود التوم تعال 000شوف يا ود التوم الله الكبير ده فرجها انا كنت داير ارسلك لى امدرمان عشان تسال من اهل صالح المرحوم لكن يا ود التوم الولد المبروك ده ابو المرحوم وراهو كل شيى حتى الحله بصلوها كيف هو عارف 000يا ود التوم امشى كلم اختك كله تلم للبنيه خلقانها وتختهن فى السبت وانت خيط لى انا خرطويه اشيل فيها هدومى وشوف حسن ده كما عندو شنطة حديد سوى ليه شنطة حديد جيبها من فريق عيال الضهبان داك فى زول هناك بجيب شنط الحديد الخضر وانا ووليداتى ديل يوم السوق نسافر نصل اهلهم 0000قاطعه حسن يا جدى انا ابوى قال لى البلد بعيده وانت يا جدى زول كبير المختر بتعبك عشان كده خلى ابوى احمد ود التوم يودينا؟؟؟؟؟؟؟؟؟؟صاح فيه حاج المكى هو يا جنا ده ما كلام ود المكى انت واختك امانه فى رقبتى يا ودصالح وبعدين انا لما اموت والاقى ربى اقول ليه الوليدات امنتهم لى ود التوم هو يا ولد انا براى بوديك لامن اسلمك اهلك ؟؟ظيلا يا ود التوم امشيى سوى القلتوليك!!!!!!!!!!!!!!!




جهز حاج المكى حاله ونادى كبراء الحله وجمعهم بحضور حسن وقال لهم 00000يا اهلى الاقدار ما معروفه وانتو كلكم شفتو صالح امجكاكى جانا هنا وجاب المكنه ديك وقعد معانا فى الحله هنا عشره سنه وزوجناه عاشه بت حسين الله يرحمها وانت عارفين صالح ربنا شالو وترك الولد ده واختو وانا من الولد عرفت انه يعرف اهله فى السافل وانا بقيت زول كبير وانت عارفنى انا حجيت لى بيت الله ما بدور حق الناس يدخل على عشان كده انا لميتكم عشان بعدين لو حصل لى قدر تجو وتكونوا عارفين حق الاتامه ديل 0000سمح حق الاولاد ديل هو كاتى الفراش بتاع ابوهم وفر كده والسمسم جاب كده والفول جاب كده والمرحوم خاتى عندى قروش امانه كده والمجموع الكلى للنقديه 106جنيه مئه وسته جنيه وكان المرحوم عندو النيه يبيع ليه عربيه ويسافر بيها الى اهلو لكن الاقدار جات كده 000وكمان دايركم تشهدو على ان المرحوم عندو عيش فى المخزن الفلانى وسماه عدد123جوال دخن وعندو 19 غنمايه وبقرتين وعندو المكنه ديك 000دى يا جماعه حاجات المرحوم وانا باكر خاطر وبسوق معاى الوليد واخته وانا متكفل بالسفر وبسوق معاى ولدى الصادق ده بساعدنى وكن حصل لى قدر هو بسد الفرقه وداير اودى الوليدات دول لاهلهم وبعدين نشوف كلام الغتم والبقر والمكنه والعيش بعد ما نلقى ناسهم دى كلامى اللميتكم ليه 0000همهمه من المجموعه الله يستر عليك يا حاج المكى ويجيبك طيب

نظر حسن الى القريه التى بدأ يبتعد عنها وهو واخته يركضان خلف حمار حاج المكى السريع و؟؟؟؟؟؟وكم سار فى هذا الطريق المودى الى سوق المدينه الاسبوعى لكن هذه المره لاعاد الطريق هو الطريق ولا الاشياء التى يحملها هى التى كان يحملها وهذه رحله لربما تكون النهائيه على هذا الدرب المتعرج الذى الفته قدماه منذ القدم

سافر حاج المكى وابنه الصادق وحسن واخته وتوجهوا صوب امدر العاصمه الوطنيه لبلاد السودان


نواصل

ربنا يحفظهم يحفظ ودالمكى ويتوفق فى توصيل التيمان ويرجعل لاهله سالما

ومتابعين يازعيم

قدح يا رهيب.
الله يرحم صالح وعشه ويجعل البركه فى التيمان.
والله تستحق أرفع وسام من هذا المنتدى لما تبذله من مجهود مقدر يسعد كل القرّاء من أحباب المنتدى.

سافروا يا حليلهم
الله يغطي عليهم
منتظرين يازعيم يا رااااااااااااائع

صباح وبت العمده مروركم ادخل السرور علينا 000لكم كل التحايا

انا لله وانا اليه راجعون ...بكيت عندما عرفة عاشه ماتت ولم تر فلذة أكبادها ..ثم بعدهاتوفي زوجها صالح هي الأقدار لم يكتب لهما طول العمر في حياتهم الزوجية
البركة في التيما ن وربنا يمد في عمرهم واكيد سوف يكون لهما مستقبل واعد
شكرا عمو غريق منتهي الروعة في السرد ..

ركب حاج المكى مقعد امامى وركب التيمان والصادق فى اللورى الشاحن المتجه الى امدرمان 00وحمل حاج المكى مدخرات المرحوم النقديه وترك باقى الاشياء لحين ان يتاكد من اهل المرحوم صالح 00بعد رحله شاقه قطع فيها الفارقو مئات الكيلمترات وصل حاج المكى ومجموعته الى امدرمان 000وتوجهه حاج المكى الى اللكونده فى امدرمان واقاما فى اللكونده ثلاثه ايام حتى جاء موعد القطار المتجه الى حلفا وقطع تزاكر الى مجموعته 00وحاج المكى هو الاخر لم يسافر الى الشمال فى حياته وهذه المره الاولى التى يسافر فيها الى تلك الديار 000سافروا بالقطر وتحرك القطار من الخرطوم فى المساء واتجه بهم صوب الشمال فى رحلة الحلم بالنسبه لحسن واخته وكان حسن ينظر الى سحنات الناس وينظر الى النيل وكان يبحث على قصص ابيه فى كل الاشياء التى يراها وكان مستمتع بالسفر ومتفائل ومسرور رغم مسحت الحزن التى ظلت ملازمه له منذ وفاة ابيه

وصل القطار فى عصر اليوم التالى الى المحطه المقصوده وترجل من القطار حاج المكى والتيمان وابنه الصادق 000ونظر حسن من حوله ورأى كل ما حكاه له ابيه شاخص امامه حتى بحث بنظره فى وجوه المستقبلين لعله يجد من يعرفه مما رسخ فى زهنه من وصف ابيه لمكونات هذا المكان!!!!!!لم يتعرف اى منهم على بشر من الذين يسطفون قبالة القطار وصفر القطار إيذانا بالتحرك بعد ان نزل من نزل وركب اخرون من هذه المحطه الصغيره ؟؟؟؟؟؟؟؟اتجه حسن الى احد المستقبلين وكان اكبر الواقفين سنا 000وحياه بادب وساله 00عن ازهرى ود السر موجود فى الحله وهم زاهبون اليه نظر إليه المستقبل نظره استشف منها حسن عدد من الاستفهامات 000وقال له انت تعرف ازهرى ود السر من وين قال له هو عمى 000ضحك محدثه بصوة عالى وقال له عمك وين يا جنا !!!!!واردف يا ولدى ازهرى ده مات زمان وشبع موت بتعرف زول تانى قال له بعرف جدى السر 00قال له السر ده مات قبال ازهرى ومن تعرف تانى قال له بعرف عمى محمد ود السر قال له يا جنا انت بتقول عمى انت يا ود من وين وابوك منو ومحمد ود السر موجود فى الحله 000فى هذه اللحظه جاء حاج المكى وقال لهم يا جماعه انحنا جينا من الغرب ودايرين اسرة السر حامد ولو فى واحد من اولادو حيى كده ودونا ليه 000قال لهم الراجل المستقبل 00عمى السر ده اولادو تلاته قاطعه حسن 00تلاته اولاد وبنتين فاطمه والسره والاولاد ازهرى ومحمد وصالح ؟؟؟؟؟؟اندهش الراجل من اجابت الشافع الشافيه 000وساله ود منو انت يا جنا قال له انا ود صالح 0000احتضنه الراجل وسلم عليه وقال لهم وصلتو تب وجى بالحمير وحمل عليها اغراضهم وركب حاج المكى على حمار وركبت ام الحسن على اخر وسار بهم دليلهم صوب القريه

كان حسن يتامل فى الاشياء من حوله وكان كلما تقدم نحو القريه خطوه يرى فى مخيلته صورة والده 000وكانت الاشياء بالنسبه له واضحه وكانه اتى الى هذه الديار من قبل 00وكان يشتم رائحة ابيه فى كل الاشياء من حوله وكان الكل يشبه ابيه والكل هم اخوته واعمامه 000بعد مسيرة نصف ساعه على الاقدام 000وصلوا الى القريه التى ولد فيها المرحوم صالح ود السر 000دخلوا مع دليلهم الى حوش السر الواسع واسترجع حسن زكريات حكاوى والده كلها 000راها شاخصه امامه وراى اهل الدار راى عمه محمد وهو صوره طبق الاصل من والده ودون ان يشعر ركض نحوه ورمى نفسه فى حضن عمه محمد وغلبته العبره واطلق زفرات حاره فى حضن عمه الذى استغرب سلوك هذا الشافع الغريب رغم احساسه ان هذا الجنى منهم آل السر؟؟؟؟؟؟؟سلموا على الضيوف وفضلوهم فى مكان ضيافة الرجال وساقو البنيه الى خضر الحريم !!!!!بعد ان شربوا الماء البارد من يد محمد اسر لهم الذى اتوا معه ان الجنيات ديل هم اولاد اخيه صالح !!!!!!!!اتى محمد وجلس على الارض ورحب بضيوفه 0000 وبدأ حاج المكى بعد ان حمد الله واثنى على نبيه قال حاج المكى مستوثقا من آل السر وبعد ان إطمأن ان هذا الذى يجلس امامه هو عم التيمان وهو الوصى الشرعى لهم 000000000000000


حكى حاج المكى لمحمد رحلة اخيه المرحوم صالح منذ ان كان فى امدرمان وعلاقته بجادين وحضوره لهم فى كردفان وزواجه من عاشه بت حسين وكيف خرج اولاده الى الحياة ومسيرة تربية الاطفال بعد رحيل امهم ووووكل التفاصيل الى ان وصلوا الى المحطه 00وكيف رحل حسين 000000000

اضحت الحله بعد ان قام محمد ود السر بإعلان وفاة اخيه صالح هاجت الحله وماجت وتصايح الكبار والصغار وبدات النسوه يحتضن ام الحسن والرجال يبكون مع حسن 000وبعد صلات المغرب وقف محمد امام المصلين ونادى ابنه صالح الذى فى عمر حسن ود صالح ونده على حسن وقام من بين المصلين وجمع بين اكتافهم وخاطب الحضور قائلا

هذا هو صالح ابنى وهذا هو حسن ابن اخى المرحوم صالح وكلكم ينظر الى هذا وهذا 000000كان صالح ود محمد على قدر كبير من الشبه مع ابن عمه حسن 00000وقال محمد هؤلاء هم ابنائى ومن اليوم حسن هو ابنى مثل ما صالح ابنى وله جميع الحقوق والواجبات تجاهى كما لابنى صالح بالضبط 0000واخته ام الحسن هى بنتى ومن اليوم انا ابوهم

استمر الفراش ثلاث ليالى وكانت القريه كلها محتفيه بالقادمين الجدد


نواصل

بصراحه رهيب يا قدح وفعلا انت قاص من الدرجه الممتازه يديك ألف عافيه

تشكر يا زعيم
ونحنا منتظرين بشوووووووووق
تسلم

بت العمده وابو ابراهيم وصباح مروركم بطعم المنقه00000اشكركم

شكرا يا سهاد الله يكرمك مرورك حافز لنا 00لنواصل 000اليوم مشققققققققول 00بكره فى حلقه

000000000000000000000000000000000الاخيره


مكث حاج المكى مع ابنه الصادق سبعه ايام بلياليها فى ضيافة اسرة السر 000وفى مسا اليوم السابع نادى حاج المكى محمد ود السر عم حسن ود صالح ونادى حسن ود صالح ونادى محمد بدوره على اقربائه الموجود منهم فى الحله وبدا حاج المكى الحديث شكر الجميع على حسن الضيافه والاستقبال بعد ان ترحم على روح المرحوم صالح وقال لهم انا الان هممت مع ابنى على الرجوع الى ديارنا فى كردفان وعليه اود ان اوضح لكم بعض استحقاقات ابنى حسن واخته وما تركه المرحوم صالح عندنا من اموال خاصه بالورثه 000فان المرحوم ترك زراعه وبهائم وبعض النقديه وله مكنة خياطه وانا قمت ببيع وحصاد الزراعه وكانت حصيلة النقديه 106 جنيه وكان حاج المكى يحملها فى كمر يربطه فى وسطه فقام وحله الكمر ومرق منه النقود وكانت بالتمام والكمال وسلمها الى محمد السر واردف قائل ان للمرحوم كذا جوال من العيش بطرفى فى المخزن وله كذا من الغنم وكذا من البقر والمكنه 000ارجو ان تبعثوا معى من يستلم هذه الاموال 0000اتفقوا ان يرافقهم محمد ود السر عم التيمان والوصى عليهم وعلى الاقل يزور قبر شقيقه ويتعرف على خيلان ابناء اخيه 00000000

فى عصر احدى الايام ركب حاج المكى القطر وبصحبته ابنه الصادق ومحمد السر بعد ان ودع اهل حسن وودع حسن وداع خاص وقبله بين عينيه وقال له تزكر يا حسن ان لك اهل فى كردفان ولا تنسى المكان الذى ولت فيه !!!!!!!!!!!!!!!!!!!ولوح الجميع مودعين ضيوفهم وكان حسن يبكى لفراق اهله الذين ربوه واوه وحفظوا له ماله واحضروه الى هنا وكان المنظر بالنسبه له مزلم 00000000توارى القطار خلف السراب وإنقطع انين عجلاته ورجع الكل من حيث اتوا ومعهم الصغير حسن ود صالح طوال مشوار العوده كان حسن يعيد ذكريات الماضى وذكريات رحلة كردفان 0000000وصلوا الى القريه وحس حسن بفراغ كبير فى حياته جراء سفر اهله من كردفان 0000

ناداه على المدرس بعد صلاة المغرب وقال له انت يا ولد حسن صالح السر قال له ايوه انا حسن قال له على المدرس عمك محمد وصانى ان تحضر انت واختك بكره الى المدرسه فى الحله ديك وان تدرسا معنا فى المدرسه بس تكونا مستمعين الى العام الجاى 000سر حسن بهذا الخبر ايما سرور وذهب واخطر اخته بما حصل ووجد عمهم محمد قد جهز لهم هدوم المدرسه 000ونام حسن تلك الليله نوم متقطع وقلق وكل تفكيره قد حصره فى ماهى المدرسه وكيف يستقبلها غدا وعزاه فى ذلك ان هذه واحده من امنياة ابيه الكبرى فى طريقها الى التحقيق


فى الصباح تدافع الصبيه فى الطريق متجهين الى المدرسه التى تبعد عدت كيلومترات من القريه التى يقيم فيها حسن ود صالح 000وصلوا المدرسه وضرب الجرس واسطف الطلاب فى صفوف وحسن واخته لا يدرون فى اى صف ينتظمون الى ان انغذ الموقف استاز على وبصوته الجهور صاح فى الطابور 000اقيف كويس يا ولد 0000وانجلت الصفوف عن ولد وبنت يقفون لوحدهم وصاح مره اخرى على المدرس وقال يا حسن صالح السر قال نعم قال له انت واختك اقيفوا فى صف سنه اولى واشار اليهم وانضما الى الصف بيسر 0000دخل الطلاب وجلسوا على الكنب المصنوع من الخشب وامامهم كنبه طويله لها فتحات لوضع المحبره والاقلام وجلس حسن واخته 0000000



انتظم حسن وام الحسن فى المدرسه كمستمعين وقد اظهرا نباهه كبيره اغرت استاز على ان ينقلهم الى الصف الثانى فى حالت احرازهم درجات كبيره فى الامتحان النهائى

وصل حاج المكى وابنه وضيفهم الى الحله وكان فى استقبالهم كل قاطنى الحله وقد سلموا على محمد ود السر وعزوه فى اخيه صالح 000واقام القادم الجديد فى بيت حاج المكى الذى زبح الزبائح اكراما لضيفه وكان احمد ود التوم واخته كله اكثر الناس سؤالا عن حال حسن واخته 000وراى اهل الحله الشبه الكبير بين محمد وشقيقه المرحوم صالح 0000مكث محمد فى ديار حاج المكى عدت ايام وبعدها قام شباب الحله بطرد البهائم الخاصه بورثت المرحوم الى سوق المدينه وتم بيع كل البهائم وتسليم ثمنها الى محمد ود السر وكذلك قام حاج المكى بترحيل العيش وتم بيعه وسلم ثمنه الى الوصى محمد واشترى احمد ود التوم المكنه ودفع ثمنها كاش الى محمد ود السر 000000

وبعد ان جمع محمد اطراف ورثة اخيه هم بالرجوع 0000خرجت الحله عن بكرت ابيها تودع محمد ود السر وسافر محمد راجع الى اهله بعد ان حمل بالوصايا الى حسن واخته وحمل معه هديه خاصه من كله الى ام الحسن هى عباره عن دهن مكركر فى زجاجه وصره بها سمسم معجون وفوق كل هذا تحياتها للتيمان الذين شبا على يدها وارضعتهم من ثديها وهى امهم بلا ادنى شك وودعه ود التوم بالدموع وكذلك حاج المكى 000000


وصل محمد الى قريته بعد مسيره شاقه استمرت عدة ايام ووجد اهله وابنائه بخير وقد اشترى محمد عربية فارقو وسجلها باسم ابنه حسن صالح واتى الى القريه بخير كبير ووجد حسن واخته قد تعلقا بالمدرسه واصبحا طالبين فى مدرسة المدرس على


جاء الامتحان وقد احرز حسن المرتبه الاولى فى الصف وجاءت اخته الثالثه فى الصف وقد تم نقله الى الصف الثانى 000ودارت السنين وعشق حسن العلم واصبح من اميز التلاميز فى زمانه ودخل مدرسة عضبره الوسطى ودخل من بعدها كلية قردون ومنها بعث الى مصر 00000وقد تزوج صالح ود محمد ابنت عمه ام الحسن 00وعاد ود صالح من مصر بعد ان نهل من العلم 00وتم تعينه فى اول حكومه وطنيه مشرف ادارى على اقليم كردفان !!!!!!!!حضر الى الحله رينجر جديد احمر اللون يشبه عربات الخواجات ووقف امام دكان المرحوم حاج المكى ونظر المترجل من الرينجر الى موضع الراكوبه وراى احمد ود التوم وقد كسى الشيب راسه واحدودب ظهره 0000وتراى له من بعيد بيت امه كله كما هو لم يتغير فيه شيى


لم يتعرف اى انسان على القادم فى العربه الفارهه 00سلم على ود التوم وقال له يا عم احمد وين حاج المكى 00رغم معرفته من الاجابه لكنه اراد ان يطمئن على صاحب نعمته وسال ود التوم اين امى كله صاح فيه ود التوم هوى يا زول الحكومه ات داي شنو وبتسعل من الناس ديك بتعرفهم من وين 000سقطت دمعه من عينه داراها بمنديله وقال له يا ابوى احمد ودالتوم ات مل عرفتنى انا ما حسن ود اخوك المرحوم صالح !!!ترنح ود التوم وكاد ان يسقط على الارض لولا تدخل حسن 000وضع كلتا يديه فى كتف حسن وتفرسه وضمه الى صدره بكل ما اوتى من قوه وارسله ثم ضمه مره اخرى ثم ارسله وضمه اخرى حتى فترة يداه 000وصاح ود التوم يا ناس الحله هوى ده ود اخوى صالح امجكاكى جا من البندر بسلم عليكم يا كله بنت التوم وليدك جاء حسن ود صالح جاء 0000إندلق سكان الحله صوب دكان حاج المكى وبدأة الدهشه فى وجوه الجميع وسلم الكل على القادم العزيز وسلم حسن على امه وبكى وذهب معها الى بيتها واكل طعامه من يديها 0000


إجتمع اهل القريه واستمع الادارى الكبير على مطالبهم ومطالب القرى المجاوره والتى يعلمها هى شح المياه الذى يشكل راس المشاكل 0000وبعد اسبوع واحد كانت الاليات تحفر فى عدد من الدوانكى والمهندسون يشيدون فى المدرسه والشفخانه 000تحولة الحله الى قبله للقرى المجاوره واصبح دكان حاج المكى واحد من اشهر دكاكين الحله التى تم تخطيطه وعمل يوم سوق للقريه يئمه التجار المتجولون 00اسبوعيا


كانت كله من ضمن الحجاج المتجهين لاداء فريضت الحج وقد تكفل حسن بنفقاة الحج هى واحمد ود التوم وبعد عودتهم من الحج حملهم الى الشمال كلى تحتفى بهم ام الحسن التى اصبحت مدرسه فى مدرسة الحله وانجبة عدد من الابناء والبنات 00التقت الحاجه كله بعد فراق دام لاكثر من 30 سنه ببنتها ام الحسن 000سلمت عليها بكل سرور وحبور وقضت معها وقت جميل 000رجعت الى موطنها وعاش حسن ود صالح ايام وسنين وهو من مسؤلى الدوله فى كردفان ودام الوصل مع اهله الذين ربوه

وعاش بقية حياته واصلا لرحمه فى الشمال الغرب وبازلا علاقاته لمصلحتهم

000000000000000000000000000000000000000000000000000000تمت

انت مبدع يازعيم وحقيقة انت قاص بجد وحتى لايضيع هذا الابداع يمكنك جمعه وعرضه للمصنفات الادبية ومن ثم طبعة
مشكور كثير

الزعيم الرائع غريق
مشكوووووور شكر بلا حدود علي المجهود الكبير
وما اروعها من قصة
رائعة بمعني الكلمة .............
انشاء الله تسلم من كل شر
تحياتي ودمت

ابوهريره وصباح وابوابراهيم اشكركم كتتتتتتتتتتتتتتتتتتتتتتتتتتتتتتتتتير على التشجيع

انتهت قصة عائشه ام رشه
عايشناها بكل دقه ولهفة
واعجاب بالاسلوب والسرد
والتشوق الى النهاية
انت مبدع
اخى غريق
وبتمنى لك التقدم وان تواصل
فى الابداع بنفس
الاسلوب
لك منى الاحترام والشكر
على حالة الاستمتاع التى اصابتنى
وانا اتابعك
حفظك الله اخى غريق

مشكووووووووووووووووووووووووووووره يا سهاد على هذا الالق والتعليق الظريف لكم جميعا اخوتى كل الود