شاعرنا عبد العظيم اكول

هو عبد العظيم محمد عثمان اكول من ابناء الحباك يسكن فى حلة كاكا ودرس فى ابوجبيهه الشماليه والوسطى فى الشعبيه والثانوى فى كوستى وثقوا له ابن الحباك 000وهو شاعر اغنية ياروعه الزائعة الصيت




يا روعة لو عز اللقاء فرقنا يا حلوه القدر
دي الروعة قاسم مشترك ما وجيهك والقمر
يا روعة
بيناتنا مشوار من افق مطبوعة للقلب الشفيف
انا شلتو ريدك يا مناي داريتو في قلبي الرهيف
فردت اشرعة الخيال لي دنيا ما طلاها زيف
ومشيت علي شط الهوي وصابر علي المد العنيف
يا روعة
إنتي الملاذ لو غبته يومأشواقي عنك بسلألوا
ما نحنا والشوق والزمن جور الحبيب ما بنحملوا
عشان نعيد خيط الأمل لازم جفاك نستحملوا
لازم قساك نستحملوا
ونرجع الماضي البعيد مشوار هوانا نكملوا
يا روعة

يا سلام يا سعادة الامير غريق كمبال ..

بالله اغنية عصام محمد نور الاغنية الجميلة دي دي شاعرها من اولادنا .. انا في تقديري دا شاعر ممتاز و يا ريد لو فتشته لينا بقية اشعاره عشان يتم توثيقها في هذا المنتدي الرائع ..

شكرا يا كمبال لك التحية و التقدير

دي الروعة قاسم مشترك ما بين وجيهك والقمر
يااااااااروعة ............
من الاغنيات الجميلة جدا
تشكر يا زعيم

شكرا ود عشمان وشكرا يا صباح على المرور 000وفعلا اكول واحد من الرائعين فى بلادى وهذا البوست قصدنا منه ان نجمع لهذا النجم روائعه 00اتمنى من الجميع المساهمه والكتابه عنه000

لك الشكر اخى غريق
وانت تبحث وتوثق عن
ابن الحباك
الشاعر الذى نجب ان نفتخر به
ونقف تحية له
ابن المنقه والدليب
ابن خور العمده وخور البطحه
لك منا التحيه شاعرنا الصحفى
عبد العظيم اكول

بعد ما جفت الاشواق
وغابت في المدى الرؤيا...
وسافر زورق العشاق لا من عاد ولا لقيا
وكاسات الهوى الدفاق
بقت لا ساق ولا سقيا ...
لقيتك تاني في دربي وزى اول بقيت اشتاق
بعد ما جفت الاشواق ...

شكراً على هذه الإطراءة الجميلة للشاعر عبد العظيم أكول وقامة من شعراء بلادي تتجسد الوحدة الأصيلة في إسمه .....
نتمنى من الجميع الإلتفات إلى مثل هذه الشخصيات التي تجسد وحدة وجدان هذا الشعب وفي نفس الوقت تحمل الشعور الرقيق والحس الشفيف ...
مشــــــــــــــــــكور يا أميرنا غريق الغريييييق في أفكاره والموفق في إختيار خواطره...
تسلم !!

يمه الحنين الشوق غلب ليك ياجميله وللبلد لكل زول في الدار هناك للخاله للاخت للولد يمه شوق يمه شوق يمه شوق
اشتقت لي كسرت ايديك واشتقت ليك يايمه طال اناشوقي ليك واشتقت ليك اشتقت لطيبة القلب الراقيه فيك يمه شوق يمه شوق
يايمه يانور العيون يايمه الزول الحنون يايمه ياعشق القلب يالفيك عرفت الطيبه لون يمه شوق يمه شوق
زمناقسى واصبح حزين خلى الدمع سايب صخين اشتقت لعيون يابلد واشتقت ليك ياام الحسين يمه شوق يمه شوق يمه شوق
في ذكرة الاحزان وتريعزف على اللحن الجميل ويعذب النفس البقت مشتاقه ياسودان كتير يمه شوق يمه شوق يمه شوق

الاخ اكول شاعر مسكون بالابداع منذ نعومة اظافره كما عهدناه
وهو علي فكره خطاط ورسام من الدرجه الاولي وامنياتي له بدوام الصحه والعافيه.