مهاجمة المنتخب الوطني من أجل حسام البدري

لم يجد جمال الوالي (حرجا) في ان يرد خسارة المريخ للمنتخب الوطني ..لم يتحرج
من ذلك وتعلل بعذر اقبح من الذنب حينما حاول ان يجد لحسام البدري (عذرا)
وذلك بتواجد معظم لاعبي المريخ مع المنتخب الوطني.

{ في الدنيا كلها ( ايطاليا وانجلترا واسبانيا والصين وبنغلاديش والصومال
والهند...الخ) ..المنتخب الوطني يشكل اضافة لاللاعب ..إلا عند جمال الوالي.

{ جمال الوالي والاعلام السالب.

{ رغم ان الكل يعلم ان في المريخ 5 محترفين ...(اجانب ومجنسين) ...يقال انهم من الكبار وانهم سوف يحققوا نقلة في المريخ.

{ وين الحضري؟.

{ يجنس جمال الوالي ما يشاء من الاجانب ..(بغير حساب).

{ كفي ان عصام الحضري الذي بلغ الاربعين (جُنس) ..ومنح الجنسية السودانية من (شبرا) القاهرية.

{ جنسية بالتشبر.

{ وجنس كذلك بقرار رئاسي النيجيري (كلتشي) وهو في واشنطون.

{ جنسية بالتوشطن.

{ جنسية من منازلهم.

{ مع ذلك وفي وجود (سكواها وباسكال وعبدالكريم الدافي) يتحدث جمال الوالي عن تضرر المريخ من انضمام لاعبي الاحمر للمنتخب.

{ لماذا لم يتحدث جمال الوالي عن تأثير المنتخب المصري على عصام الحضري؟.

{ سافر الحضري الي مصر ...والمريخ في مواجهة حاسمة من اجل الانضمام للمنتخب المصري.

{ وسافر الحضري الي جنوب افريقيا في رحلة مرهقة مع المنتخب المصري لمقابلة المنتخب الجنوب افريقي.

{ ولا في زول جاب سيرة.

{ وجاء الحضري من بعد للخرطوم ليسافر الي انغولا مشتتا مرهقا ...وانعكس ذلك على تركيز الحضري ومستواه.

{ وكان الحضري يبدو (تائها) ..وانتركلوب يسدد ضرباته الترجيحية.

{ علما ان الحضري متميز في الضربات الترجيحية.

{ لكن جمال الوالي لا يستطيع عن ينتقد الحضري ..لأن انتقاد حارس كلفه كل ذلك المبلغ ..امر يجعل الهجوم يرتد على الوالي.

{ وجد جمال الوالي (الجرأة) فقط في ان يهاجم المنتخب الوطني ..ومحمد عبدالله مازدا.

{ يا مازدا انت لو عملت ليك (عقال) ما كان في زول سألك.

{ ولو جنسيتك السودانية (بالتجنس) كانوا ضربوا ليك سلام سلاح.

{ الوالي فعل ذلك فقط من اجل الدفاع عن المصري حسام البدري.

{ يا حليل كمال شداد.

{ لقيتوا البلد هملة.

{ هذا زمن ...يعترض فيه جمال الوالي على انضمام لاعبي المريخ للمنتخب...ويقول من غير حرج ..ان المنتخب الوطني اضر بالمريخ.

{ في الوقت الذي يتواجد فيه 11 لاعبا من الهلال في المنتخب.

{ ويوجد في أي تشكيلة للمنتخب اكثر من 7 لاعبين من الهلال.

{ لكن جمال الوالي يضن بـ (مصعب عمر وموسي الزومة) على السودان.

{ الهلال يشارك منه بصورة مستمرة 7 لاعبين في المنتخب الاول في التشكيلة الاساسية ..لم يشك احد ..بل لم يتضرر الهلال من ذلك.

{ نعتبر تواجد اكبر قدر من لاعبي الهلال في المنتخب امر يحسب لصالح الهلال وهو شيء تنعكس ايجابياته على الهلال بشكل واضح وملحوظ.

{ الهلال حقق الممتاز في سنوات الوالي 6 مرات من 7 مواسم.

{ ونحسب في هذه السنوات فضل المنتخب على الهلال ...كما نجزم ان المنتخب استفاد من لاعبي الهلال ..ومضي بفضله بعيدا.

{ وهذا شيء لا يشكر عليه الهلال ....لأن خدمة المنتخب واجب لا شكر عليه.

{ الهلال ظل يتواجد بشكل دائم في المجموعات في البطولات الافريقية ...حتي
صار اكثر الاسماء ترددا في وكالات الانباء بسبب تواجده المستمر في مرحلة
المجموعات في البطولة الافريقية للابطال.

{ حدث تشبع في الهلال ...وكانت المنافع متبادلة بين المنتخب والهلال ..رغم ان المنتخب احيانا قد يشكل رهق على لاعبي الهلال.

{ لكن هذا غير مهم ...نتمني فقط ألا يشكل الهلال رهق على لاعبي الهلال الذين يمثلون المنتخب.

{ جمال الوالي ...لا يقدر كل هذه الاشياء ...يخرج الان ليهاجم (المنتخب الوطني).

{ انت يا جمال الوالي في زول سألك عن (المقصورة).

{ عملت ليك (مقصورة) وبقيت عائش عليها.

{ مقصورتك دي بقت زي (جركانة العسل).

{ خلى المقصورة.

{ في زول حاسبك يا جمال الوالي عندما دفعت 5 مليون دولار في (وارغو)..وفرحت
وفرح الاعلام السالب يوم ان سجل المريخ وارغو وحسبوا ذلك انتصارا على
الاهلي القاهرى الذي كان يفاوض في اللاعب.

{ في زول سألك يا جمال الوالي يوم ان اعار المريخ الي وارغو الي الاهلي
الليبي بـ (50 الف دولار) وهو الذي جاء بهذا المبلغ مضروب في 60.

{ في زول سألك.

{ عاوز تجى الان تهاجم المنتخب وتقول ان المنتخب الوطني ارهق لاعبي المريخ.

{ ارهق منو؟.

{ مصعب عمر؟.

{ طمبل؟.

{ العجب؟.

{ ناسك ديل (كبروا) ساكت يا جمال الوالي.

{ الوالي يحاسب الان.

{ من يحاسبه وهو الذي جاء بعصام الحضري.

{ 40 سنة وغرامة 800 الف دولار.

{ خلوها معقولة شوية.

{ خلوها تمشي.

{ ما تخلونا نفتح الدفاتر القديمة.

{ نجاد واباولو واليجا تانا....الخ.

{ في زول يا جمال الوالي قال ليك اتعاقد مع (حسام البدري) الذي ثبت فشله في
الاهلي المصري ...واتضح تواضع خططه الفنية واسلوبه العقيم الذي يلعب به.

{ في زول سألك.

{ ابوجريشة ...برضو بهاجم في المنتخب.

{ كأن المنتخب السوداني بمثل (الكنغو).

{ وين الناس البتحدثوا عن (الوطنية).

{ الوطنية مشت وين؟.

{ ثم ماذا بعد هذا.

{ انتوا ما بتذكروا عندما ابعد فيصل العجب عن المنتخب.

{ الاعلام السالب كلو كتب ..لا بد من وجود العجب في المنتخب.

{ لازم العجب يرجع للمنتخب.

{ العجب رجعوه للمنتخب ..قالوا المنتخب الوطني ارهق لاعبين المريخ.

{ وين كلتشي؟.

{ وين سكواها ...(اصابو المنتخب برضو).

{ وين الدافي ...(قاعد برة).

{ باسكال عمل شنو؟.

{ الحضري ذاتو شن طعمو.

{ الراجح ان الاعلام السالب هذه المرة ما لقي ليهو عذر.

{ فتشوا الاسباب القديمة كلها ...ما لقوا فيها سبب.

{ مطر ما في.

{ حكم (نضيف).

{ ارضية كويسة.

{ والهلال ذاتو بيلعب في نفس الدولة.

{ يعني ما في أي طريقة للكذب.

{ عشان كدا قالوا المنتخب ارهق لاعبي المريخ.

{ انتوا نسيتوا حاجة.

{ ناس عمر بخيت ومساوي ديل كانوا في (حوض سباحة).

{ الجماعة ديل برضو كانوا في المنتخب ...المشكلة شنو؟.

{ اشمعنا (الارهاق) ظهر فقط في لاعبي المريخ.

{ لكن بيني وبينكم يمكن الجماعة ديل ارهقوا فعلا.

{ المريخ كان معسكر في مصر.

{ وكان معسكر برضو في ليبيا.

{ وناس موسي الزومة ديل يمكن يكونوا شاركوا في الثورات دي.

{ الظاهر معسكر ليبيا دا كان فيه (ضرب نار).

{ عشان كدا حبة الكورة العند سعيد السعودي (طارت).

{ والله ناس (بنغازي) ديل يطيّروا أي حاجة.

{ المريخ الايامات دي شغال طيران.

{ مشوا مصر طيروا ...(مبارك).

{ مسكلوا لي تونس (النفطي ..مهدي ..مرابط) طيروا (زين العابدين).

{ مشوا ليبيا عاوزين يطيروا (القذافي) قرب من الاقلاع.

{ مشوا انغولا ...طاروا هم براهم.

{ ارجع لموضوع المنتخب ...واقول ان المنتخب الذي يشكي منه جمال متصدرا الان مجموعته مع (غانا).

{ غانا المنتخب الافضل الان في القارة الافريقية ...منتخبنا الوطني يقاسمها الصدارة ويتساوى معها في النقاط.

{ عارفين منتخب الحضري وين؟.

{ منتخب الحضري (طيش) مجموعته.

{ قلت ليكم ..قبل كدا ...الحضري دا محل ما يمشي نحن وراه.

{ يا الحضري ...في السودان هنا ما في طريقة ليك للهروب الي (سويسرا).

{ ناس بشة ديل ...شالوا جوزاك.

{ السوداني والمصري.

{ يبقي لحين السداد.

{ ملحوظة : لو الغرامة غلبتكم فكوا (المقصورة).

هوامش

{ قالوا ليك موسي الزومة علق.

{ الي الان بشوت في (الضربة الترجيحية).

{ ليهو حق يشوت.

{ ما دام الحضري بغالط في الحكم.

{ قالوا ليك تاني ..في واحد دخل فيهو (مجروس).

{ قام بعد الحادث ..ما شايف أي حاجة..قال والله حادث المجروس احر من خروج المريخ من دور الـ 32.

{ في واحد تاني وقع من الطابق العاشر.

{ زولكم ما قال أي حاجة ...(عشان اتوفي في الحال).

{ ح يقول شنو يعني بعد ما وقع من الطابق العاشر.

{ يمكن يقول التحكيم ظالم.

{ واحد اشتري ليهو (بطيخة).

{ فتح البطيخة لقي (الحضري بغالط في الحكم).

{ غايتو جنس غلاط.

{ في سبيل ترقية كورة القدم ...والضربات الترجيحية ..لماذا لا يقيم الاتحاد
العام لكرة القدم دورة تدربية لموسي الزومة وسكواها والعجب في كيفية تنفيذ
الركلة.

{ في واحد قال لي تفتكر فيصل العجب ضيّع الضربة الترجيحية ليه؟.

{ قلت ليهو عشان ما حافظ جداول الضرب ...انا عارف ..تسألني انا ليه.

{ لكن تاني اتذكرت رجعت قلت ليهو ...العجب متعود الحكم يعيد ليهو تنفيذ الضربة.

{ صاحبكم متعود على الحاجات دي.

{ لكن الحكم ما قصر مع موسي الزومة.

{ روسي شاف ليهو قطر.

{ قال ناس السودان ديل عندهم حاجات غريبة ...اول مرة اشوف لي (ركشة) بالحجم دا.

{ انت يا الروسي القال ليك دي (ركشة) منو؟.

{ غايتو الروس ديل عندهم جنس حاجات.

{ روسي عملوا ليهو عملية عيون.

{ بعد اسبوع قال كلو من (الموبايل).

{ الموبايل ذنبو شنو؟.

{ عاجل: الحضري ما غلطان ...غلطان محمد كمال.

بالضبط يا استاذنا الجليل

قلت ان سبب خروج المريخ هو ( حسام البدرى ) و عددت الاسباب للاخ محمد نويه و كذلك د.الجنيد.

يبدو ان السيد جمال الوالى فى وضع لا يحسد عليه الآن بعد ان اعاد الثقة فى كل اجهزة النادى و بدا

فى تضميد جراح الجماهير التى كادت ان تنفجر من الحسره و الأسف الطويل.

تحياتى فضل

أين الوطنية التى كانوا يتبجحون بها

آل أيه !!!

سيدا وملكها المتوج ما عندو وطنية

يا أخوانا مرمي الله ما بترفع والمحرّش ما بكاتل ومال الحرام ما بودي قدّام

ومعليش يا ول نوية .. لكن كما قال الشاعر .. لابد من شكوى وقلبي أخو ألم

نعم عودنا دوماً الإعلام الأزرق بهذه الكلمات عندما تحصل هزيمة للمريخ ..نعم قد أتفق مع صاحب المقال في بعض النقاط وهي ماجاء علي لسان الوالي بتحميل المسئولية علي المنتخب وهذا غير منطقي ؛فالخروج كان لأساب جمه هذا المدعو أسميه صحفي الظروف فقط؛يظهر فقط عندما ينهزم المريخ أوتحل به كارثة لينشر سمومه وحقده ومرضه الذي يسمي متلازمة المريخ..
أين ذهب عندما حدثت السكوهة ؟فقد غاب يومين وثلاثة وأربعة وحتي أسبوع كمان ؛ولم يفتح الله عليه ولو بكلمة عن السكوهة
فأمثال هذا المدعو لايحركون فينا شئ........

تحياتي لكم ،،، معليش يا جماعة لأسباب قاهرة لم أتمكن من الدخول طيلة هذا الأسبوع وفاتنا مولد (المسوكهين) أنقولياً ، ول نوية ياخ مريخكم دا مسوكه خلقة ياهو ديمة حالكم أفريقياً اللهم لا شماتة.
وكدي هاك بيت الشعر دا :
وهو من وحي أشعار مسوكه أبوالقاسم المريخي الطبّال سبب الأزية الأنقولية:

وَدَّع الْمِرِّيخ إِن(الْبَدْرِي) مُرْتَحِل**هَل تُطِيْق وَدَاعَا أَيُّهَا (الْحَضَرِي)..!

مع البدري المريخ ودع بدري
ومع الوالي المريخ مودع طوالي

سلم لي على عثمان الدقير كان الملايين التلحست ترجع لخزينة الدولة
المال الحرام ... المال الحرام والقبر قدام

دا الاعتداء على المال العام ولا بلاش يا فضل

تحيات ول نويه

والبرير البياكل حق ناس الفنادق ده بقولوا عليهو شنو يا أهلنا ..
وحق الناس ياهو ظهر في الجماعة حالاً دخل عليهم بالساحق والماحق والبلاءالمتلاحق (من المطار بسوقو مدير نادي للسجن واستقالات بالجملة )والله حالة صعبة جداً .ربنا يستر الجماعة من إغلاق أبواب ناديهم ويقلبوهو زريبة فحم

سلامات حمر وزرق

دا كلو يا خدوره عشان المريخ مرق من البطولة؟؟ يا ما دخلنا للبها وقلعنا قلبها..وين لناس...عينك فوقه ما تشيله..ويظل المريخ فى السودان هو الرقم الصحيح بالنسبة للبطولات وما عداه صفر لا ينمو الا ليتقزم ولا يكبر الا ليعود عرجونا كما فال ود ابو القاسم...فكاك الطلاسم..المزمل

السودان كان راجى الهلال يجيب ليه كأس...الرماد كاله...حسب التاريخ..فرجال البطولات يمرضون ولكن لا يموتون...نايمين متطمنين وما خايفنكم تجيبو الكونفدراليه دعك من الابطال...تمانين سنه بدون بطوله بتخلينا نطمن لسنه بدون بطوله....التوانسه نحن الذين تخطيناهم وأحرزنا الكأس الأول القارى للسودان....تذكر ثنائية سانتو فى البنزرتى...ولا نتوقع منكم غير الفضايح حين تقابلون التوانسه...ستات وخمسات...وكمان السنة دى عليها روح الثوره وشباب الثوره..الله يستر من بى غادى للستات...السبعات..ويمكن الراوات ولا كوستى عديل.... ول نويه....لا يهمك والتوم ريحته واحده ما حصل اتغيرت...يا هو الهلال ذاتو الأخد خمسه جوه البلد...وكمان اتعس......

د. الجنيد ( بركة الجيت يا سيدى )

نعم هذا الغضب له ما يبرره يا الجنيد لان المريخ مؤسسة حكومية و هى ملك للشعب.

الاربعات و الخمسات اخدتها من الهلال و بدون عناء سفر و اما لو حصل و انك سافرت مثلا

الى الاردن للعلاج لا سمح الله او النزهه تلقى قدامك الستات و السبعات.

اما الحديث عن المال العام فان عدتم عدنا

ياجماعة ماعندي فهم للموضوع...لكن ناس المريخ كان قاعدين خسارة ساكت ووجع قلب محتاجين ليهم في الحملة الانتخابية بتاعتنا..باقي قالوا الشجر الكبار فوقو الصمغ...احترامي

اقبال اوعى بتخسروا ( والله تستعينى بيهم تسقطوا كلكم )

ديل اسمهم ( تخسرون ) انتى ما عارفه ولا شنو.

شوفى ناس الموردة

من طرف **فلس** 6th أبريل 2011, 18:13

علي خط النار
معاوية صابر

لماذا ينتصر الهلال ويتأهل ويخسر المريخ ويودع ..!!
< سؤال مهم جدا وجهه احد الاخوة الاعزاء ضمن تعقيب علي ما كتبناه امس حول اتهامات المريخاب الجائرة للمنتخب يقول : (لماذا ينتصر الهلال ويتأهل ويخسر المريخ ويودع ) ..!!
< سنحاول ان نجيب علي هذا السؤال الخطير من وجهة نظرنا المتواضعة ونترك لجماهير المريخ فرصة الاجابة كل حسب وجهة نظره ..!!
< نبدأ اولا بالتدريب خلال الفترة من 2004 م الي يومنا هذا .. كم مدربا تعاقد مهم الهلال وكم تعاقبوا علي المريخ .. ؟
< اذا لم تخني الذاكرة هناك في القائمة اتوفيستر وكروجر ورادان وكاربوني الي جانب احمد رفعت ومحمود سعد ومحمد عمر ومعهم مازدا وابو عنجة وصلاح مشكلة ..!! اما في الهلال فهناك ريكاردو وسانتوس وكامبوس وميشو الي جانب الديبة ..!! .. واكتب عندك واحد وافتح الصفحة التانية ..!!
< في صفحة اللاعبين المحترفين الاجانب حدث ولا حرج ..!! فالاحصاءات (غير الرسمية) تشير الي تسجيل اكثر من عشرين لاعبا خلال الفترة من 2004م حتي الان غير الذين حملوا الجنسية السودانية امثال النونو .. اما في الهلال فالوضع مختلف تماما فعمر المحترف عندهم طويل ونضرب مثال بسيط باللاعب الموزمبيقي داريو كان .. واكتب عندك اتنين وافتح الصفحة التانية ..!!
< في تشكيلة الهلال مجموعة لم تتغير طوال السنوات الماضية يقودها هيثم مصطفي ومعه عمر بخيت وعلاء الدين يوسف والمعز محجوب ومساوي انضم اليهم سادومبا وكاريكا .. اتحدي اي شخص ان يكتب اسماء ثلاثة لاعبين فقط حافظوا علي وجودهم في تشكيلة المريخ .. واكتب عندك تلاتة وافتح الصفحة التالية ..!!
< في دائرة الكرة بالهلال عبد المهيمن الامين وعاطف وقبلهما امين .. وفي دائرة المريخ لاعبين واداريين سودانيين ومصريين قائمتهم تطوووووووول .. واكتب عندك اربعة وافتح الصفحة التالية ..!!
< وتلك كانت بعض الاسباب التي جعلت الهلال ينتصر ويتأهل والمريخ يخسر ويودع .. ونلاحظ ان العنوان البارز في كل الاحوال هو عدم الاستقرار .. فالاجهزة الفنية لم تنعم بالاستقرار طوال السنوات الماضية الامر الذي القي بظلاله علي الفريق واصبح بلا هوية .. كذلك تعددت وجوه اللاعبين الاجانب في الفريق كل عام ولم يستفد منهم لعدم الاستقرار فكلما استعان المريخ بلاعب اجنبي موهوب يسعجل الاعلام السالب ويستجيب المجلس ويغادر اللاعب .. واصبح البنيان محلك سر .. شيل الطوبة وخت الطوبة الجديدة .. لم يضع طوبة فوق القديمة .. يشيل ويخت .. يشيل ويخت .. وشال معاهو قلوب الجماهير ..
< المثير للدهشة ان تلك الفترة شهدت استقرارا للمريخ في رئاسة النادي .. ومع صلاح ادريس ويوسف احمد يوسف والامين البرير ظل جمال الوالي رئيسا للمريخ .. !!
< تغيرت في الهلال الرئاسة وظل الفريق ينتصر ويتأهل ولم تتغير في المريخ الرئاسة وظل الفريق يخسر ويودع ..!!
< ارجو من كل قلبي ان يتعامل مجلس المريخ بقيادة الاخ جمال الوالي ولو لمرة واحدة فقط في تاريخه مع هذه الاحداث بهدوء وعقلانية .. ولا داعي ابدا للتعامل برد الفعل .. ويجب ان يحكم صوت العقل ..
< وبالعقل والمنطق فشل الكابتن حسام البدري والطاقم الفني المعاون له في العبور الي الدور الثاني في بطولة الاندية الافريقية الابطال باخطاء ساذجة ومضحكة ومبكية في ان واحد .. ومن غير المعقول ان يواصل عمله بنفس المخصصات والامتيازات والصلاحيات .. فاذا كان المريخ قد اتفق معه علي بناء فريق للمستقبل فالبدري ليس من بناة الفرق ولا يملك التاريخ .. اما اذا كان قد اتفق معه للبطولة والمكافحة من اجل البطولة فقد رسب في الامتحان ..!!
< فكيف يبني مجلس المريخ بطولة للتعويض ويراهن فيها علي البدري ..؟؟ الم يتعلم المريخ من درس سيكافا الاول .. او اذا صح التعبير سيكافا التاكسي التي هبت رياحهها علي المريخ وحولت احلام الجماهير الي كابوس ..؟؟
< كيف يدفع المريخ بفريقه لهذه البطولة التي يفترض ان يفوز بلقبها للتعويض اذا كان الغرض فعلا تعويض الجماهير بقيادة حسام البدري الفاشل فنيا في امتحان بطولة الكاف الكبري ..؟؟
< لن يستطيع احد ان ينكر حب جماهير المريخ للرئيس جمال الوالي .. فهذا الحب الكبير جعل الجمهور يتجاوز اكبر النكسات في تاريخ النادي ويمنح السيد الرئيس الفرصة لمواصلة المشوار والتجريب .. لكن اذا استمرت الاوضاع علي نحو ما هي عليه الان سيفقد السيد جمال الوالي الكثير من اراضيه .. وسيضيع منه حب الجماهير ..
< سيكافا اسم ارتبط باحداث مثيرة وخطيرة في تاريخ ..!!
< وسيكافا تنكأ الجراح ...
< غدا نواصل بدون فواصل ..!!
معاوية صابر

مهاجمة المنتخب الوطني من أجل حسام البدري

مهاجمة المنتخب الوطني من أجل حسام البدري

رد: مهاجمة المنتخب الوطني من أجل حسام البدري

رد: مهاجمة المنتخب الوطني من أجل حسام البدري

رد: مهاجمة المنتخب الوطني من أجل حسام البدري

رد: مهاجمة المنتخب الوطني من أجل حسام البدري

رد: مهاجمة المنتخب الوطني من أجل حسام البدري

رد: مهاجمة المنتخب الوطني من أجل حسام البدري

رد: مهاجمة المنتخب الوطني من أجل حسام البدري

رد: مهاجمة المنتخب الوطني من أجل حسام البدري

رد: مهاجمة المنتخب الوطني من أجل حسام البدري

رد: مهاجمة المنتخب الوطني من أجل حسام البدري

رد: مهاجمة المنتخب الوطني من أجل حسام البدري

رد: مهاجمة المنتخب الوطني من أجل حسام البدري